সাহিত্য একাদেমিদা অসাম অমসুং ত্রিপুরানা শোত্থহৌরিবা শরুক

মতম অমা ভারতকী সাহিত্য একাদেমি অসি লাইরৈবাকতগীসু হেন্না লাপখিবা মফমগুম অসাম অমসুং ত্রিপুরাগী মণিপুরী খোরিরোলমী (সাহিত্যকার)শিংনা খন্নরম্বদু হন্দক্তগীদি খরা নকশিন্না অমসুং ইমুং-মনুংগুম্না খনবা ঙম্লগনি হায়বগী থাজবা লৈরে ৷ সাহিত্য একাদেমি করিনো অমসুং মসিনা করি-করি তৌই হায়বদু মণিপুরগী অখঙ-অহৈ খরতনা খঙলম্বা অমসুং মখোয় খরতগী শরুক অমগুম্না লৈরম্বদু মপান মণিপুরগী মীওইশিংনসু খরমখৈদি খঙবা ঙম্লগনি ৷

একাদেমিদা ঐখোয় (অসাম অমসুং ত্রিপুরা)গী মীহূত লৈত্রিঙৈদা সাহিত্য একাদেমি হায়বসি মণিপুরখক্তগী মদুসু অহানবদা ইম্ফাল খক্তগী ওইরগা লৈরম্বনি ৷ হৌজিক্তি ঐখোয়গীসু মীহূত লৈরে, ঐখোয়গীসু শরুক য়াওরবগুম খলহল্লে ৷ অদুবু মান্ননা থাংবা খোঙথাংগী মতাংদদি অসাম অমসুং ত্রিপুরানা য়াম্নমক লাপ্না শোত্থদুনা লৈহৌরি ৷ ঐখোয় তপ্না-তপ্না মান্নবগী মায়গৈদা খোঙ থাংজিনবা তারি ৷

ঐখোয় (অসাম অমসুং ত্রিপুরা)না অহানবদা তৌগদবসি করি-করিনো-

১. প্রোগ্রাম ওইনা তৌগদবশিংদা-

১.ক. সেমিনারঃ সাহিত্যগী তোঙান-তোঙানবা হীরমশিংদা য়ামদ্রবদা চহী অমগী অমুক্তং ওইরবসু সেমিনার অমদি শীনবিগদবনি ৷ শৈরেংগী, ৱারীমচাগী, উপন্যাসকী অমসুং অতৈ মচলশিংগী ৷ মসিদা ঐখোয়না হন্দোক্লবা লাইরিকশিংবু ওরিজিনেল অদুগা চাংদম্নদুনা পোত্থোক অদুগী মমল লেপ্পা সেমিনার শীনবসু কান্নগনি ৷

১.খ. সিম্পোজিয়মঃ সাহিত্য অমসুং লোনগী হীরম অমদা সিম্পোজিয়ম শীনবিবা য়াই ৷

১.গ. কবিসন্ধীঃ রাজ্যগী ওইনা নতত্রগা অপূনবগী ওইনা শীনবিবা য়াই ৷

১.ঘ. কথাসন্ধীঃ রাজ্যগী ওইনা নতত্রগা অপূনবগী ওইনা শীনবিবা য়াই ৷

১.ঙ. ৱর্কসোপঃ লিটরেরি টর্মস শেম্বগী, গ্লোসরি নতত্রগা দিক্সনরি শেম্বগী ৱর্কসোপ পাঙথোকপা য়াই ৷

২. নহা ওইরিবা অইবশিংবু মপান লমদা থাবাঃ 

মশাগী চহী ৪০গী মখাদা লৈবা অইবা অইবীশিংবু ভারতকী রাজ্য অমদা চতলগা লম অদুগী খোরিরোলমীশিংগা উনদুনা পাউ ফাওদোক্নবগী ষ্কিম অসিগী মখাদা চহী খূদিংগী মীওই অমা নতত্রগা অমদগী হেনবা শোয়দনা থাবিগদবনি ৷ হৌজিক ফাওবদা মপান মণিপুরগী ওইনা ষ্কিম অসিগী মখাদা চতখিবা মীওই অনীদি- নাওরেম বিদ্যাসাগর অমসুং এনদি হোদাম্বনি ৷ চহী খূদিংগী মীওই মঙা নতত্রগা তরুকলোম চতপা য়াবা ষ্কিম অসিদা অসাম অমসুং ত্রিপুরানা মীওই অমদগী তাদনা চহী খূদিংগী থাবিবা য়াই ৷

নাওরেম বিদ্যাসাগর – অসামগী অইবা ওইনা চতখিবা নত্তে ৷ মহাক্না মণিপুরদা লৈরিঙৈদা মণিপুরগী নহা অইবা অমা ওইনা চতখিবনি ৷

এন দি হোদাম্বা – ওজা সৌগাইজম ব্রজেশ্বরনা সাহিত্য একাদেমি মণিপুরী এদভাইজরি বোর্দগী মেম্বর ওইবগী অহানবা থৌরাং ওইনা মিং লানখনপীবদগী চতখিবনি ৷

চেকশিন-ৱা – মণিপুরদগী শরুক য়ারিবা মেম্বরশিংনা ষ্কিম অসিগী মখাদা মখোয়-মখোয়গী মীখক্তবু থাননবা হোতনবনি ৷ মপান মণিপুরগী নহা অইবশিংবু কয়া মশীং থানবিদবনি ৷ হোদাম্বা থাবগী মতমদা মিং থাগতলগা ফাইনেল সিলেক্সনদা ককথতখি ৷ ওজা ব্রজেশ্বরনা মদু উরবদা ইষ্টর্ন জোনেলগী সেক্রেটরিদা ৱারী শাখি ৷ মপান মণিপুরদা মণিপুরী সাহিত্যকার নৌনা থোরকপবু শৌগতনীংবা সেক্রেটরি মশামকনা ‘হোদাম্বা হায়রিবা অসামগী অইবদু নম্বর ৱান-দা থম্মু মাবু করিগী লৌথোক্লিবনো, মপান মণিপুরগীদি শোয়দনা য়াওহনগদবনি’ হায়দুনা মেম্বরশিংদা হায়বদগী ককথতলুরবা হোদাম্বগী মিং অদু খনগতপদা য়াওখিবনি ৷ (ওজা ব্রজেশ্বর-না হিংলিঙৈদা তম্বীরম্বদগী) ৷ মরম অদুনা অসাম অমসুং ত্রিপুরাগী নহা অইবশিং থানবগী লান অসি মেম্বর অনী (এল নিলমনি অমসুং এল বিরমঙ্গল)না কন্না হোতনবিবা তাই ৷ নতত্রবদি, মিং লানখতলবসু মণিপুরগী মখোয় মশেন মান্নরগা হেক্তা ককথতপীবনি ৷ অদুনসু ঙসি ফাওবদা মপান মণিপুরগী নহা অইবা অমত্তা স্কিম অসিগী মখাদা চতপা ফংলকত্রিবনি ৷ অদুগা মণিপুরগীনা পঙচততা চতপনি, অঙাং পীক্নাউ ফাওবা পঙথাদা থাবনি ৷

ঐখোয়গী নহাশিং, মিং পনজরবদা – নন্দকুমার, বিদিত, দিকেন, উষারানি, চীংলেন, প্রদিপকুমার, মঙ্গল, ধীরেন, গম্ভিনি (মখোয়না মশাগী চহী ৪০ শুদ্রিবা ওইরবদি) মখোয়বু হান্না থাবিগদবনি ৷

৩. এসাইনমেন্ট ওইনা লাইরিক হন্দোকপা অমসুং খোমজিন্দুনা লাইরিক পুথোকপাঃ 

ভারতকী তোঙান-তোঙানবা লোন্দগী মণিপুরী লোন্দা অমসুং মণিপুরী লোন্দগী ভারতকী অতৈ লোন্দা হন্দোক্নবা থৌরাং অসিদা অসাম অমসুং ত্রিপুরাগী হন্দোক্লোয়শিংনা থৱায় য়াওনা চঙশিল্লকপা চঙই ৷ এন্থোলোজিগুম্বগী খোমজিনবগী থবক্তসু শরুক য়াশিল্লকপা অমসুং এসাইনমেন্ট ফংহনবিরকপা চঙই ৷

হন্দোকপগী থবক অসিদা ভারতকী লৈরিবা লোনশিং অসিগী সাহিত্যগী ইতিহাস মশীং শুনবা হান্না হন্দোকহন্নীংই ৷ তামিল, তেলুগু, মলয়ালম, কন্নরা লোনগী সাহিত্যগী ইতিহাস খঙবা অমসুং মখোয়গী সাহিত্য মণিপুরী লোন্দা হন্দোক্তুনা পাবা ফংহনবগী অপাম্বা লৈ ৷ অৱাং নোংপোক্কী মরু ওইবা লোন মরি – অসামিস, বোদো, (মণিপুরী), নেপালিগসু নক্নবা মরী শেমগতপগী অপাম্বা লৈ ৷ মৈথিলি, সন্থালি, দোগ্রি, গুজরাতি, কাশ্মিরি, পঞ্জাবীনচিংবসি ঐখোয়গী মীশিংনা কয়া খঙবা মান্দে ৷ ঐখোয়না অয়াম্বদা খঙলিবসি হিন্দি অমসুং বাংলানি ৷ ঐখোয় মীতয়েং পাকথোকপা তারি ৷

সাহিত্য একাদেমিসি রাজ্য-রাজ্যদা মীতয়েং থম্বা ভারত সরকারগী সংস্থান নত্তে ৷ মসিদি লোন অমগী সাহিত্যদা য়ূম্ফম ওইবা লূপ অমনি ৷ মণিপুরী হায়রিবা লোন অসিগী সাহিত্যগী পোত্থোকসি ভারতকী রাজ্যশিংগী মনুংদা মণিপুরখক্তদগী থোকপা নত্তে ৷ অসাম, ত্রিপুরা অমসুং মেঘালয়াদগী থোক্লিবনি ৷ মরম অদুনা একাদেমি অসিগী মীতয়েং মতম অমদা মণিপুর- মদুসু ইম্ফালখক্তদা লৈরম্বদু পাকথোক-চাউথোকহল্লকপনি ৷ অসাম অমসুং ত্রিপুরাদা মণিপুরী সাহিত্য তৌই হায়বসি ঙসি-ঙরাংতা খঙলকপগী মতৌগুম তৌবনা মরম ওইরগা শোত্থদুনা লৈরম্বা অসি ঐখোয় ময়াম চঙদুনা চাওখতনবা হোতনবা তাবনি ৷ মসিদা সাহিত্য চর্চাগী তঙাইফদবা য়াম্না লৈ ৷ সাহিত্য একাদেমিগা শম্নদুনা চাওখতনবা হোতনবসি অচৌবা সীরী অমা ওইগনি হায়না থাজরি ৷

হৌজিক লৈরিবা মণিপুরগী সাহিত্যকারশিং অসিদগী ঐখোয় (মপান মণিপুরগী মণিপুরী সাহিত্যবু শৌগতপা অমসুং মান্নবা থাক্তা পুখতপা পাম্বা কাঙবু)না থাজবা থম্বিরুদবনা ফগনি ৷ মখোয় (মণিপুরদা খোর্জৈ পায়বা) অয়াম্বনা সাহিত্য চর্চা তৌবা অমসুং সাহিত্যগী সেবা তৌরিবনি হায়দুনা তৌরিবসি মশাগী ওইজবা তানবা ঙাক্তনা অয়াম্বনি ৷ মখোয়খক্তগী মফম ওইনা কোনশিন্দুনা অমসুং কনশিন্দুনা লৈবনি নতত্রগা থম্বনি ৷ অতৈদা খুদোং চাবা পীবগী নতত্রগা শৌগতপগী ৱাখল্লোন কয়া লৈতবনি ৷ মখোয় অয়াম্বনা অসাম অমসুং ত্রিপুরানচিংবগী মণিপুরী সাহিত্যবু মমল পীনবা হোতনবদা থৱায় য়াওরোই ৷ “ঐখোয়গী স্বাইদফাওবা মফম চন্নদ্রে, কদায়দগী মপানগী মীদা খুদোং চাবা পীগদবনো” হায়না খন্নবা ঙাক্তনা অয়াম্বনি ৷ মতম অমগী রাজকুমার সুরেন্দ্রজিত (অসামগী মণিপুরী সাহিত্যবু শৌগতপদা থৱায় য়াওরম্বা), নীলবির শাস্ত্রি (ত্রিপুরাগী মণিপুরী সাহিত্যবু শৌগতপদা থৱায় য়াওরম্বা) এলাংবম নীলকান্ত (বাংলাদেশকী মণিপুরী সাহিত্যবু শৌগতপদা থৱায় য়াওরম্বা)গুম্বা মীওইশিংদি হৌজিক মতমদা মণিপুরদা ইরৈ লৈত্রবনি ৷ অয়াম্বনা মশাগী ওইজবা থিবা ঙাক্তা ঙায়নরবনি ৷ সাহিত্য চাওখতপদগী হেন্না মশাগী মিংচত তানবরোমদা অয়াম্বনা মমীত লাওথোকপা ঙাক্তা ঙায়নরবনি ৷

মরম অদুনা সেন্তর অমসুং মার্জিনগী ষ্ট্রাকচর শাগত্তুনা খেন্নবা থম্বা পাম্বা মণিপুরগী সাহিত্যকারশিংগী মমীততুদা খূদোম্বীনা থিনজিনগদবনি ৷ খোল্লাউ তাদবা মনাকোংদু তানবা য়ৈগদবনি ৷ মায়গৈ অমরোমদা, ঐখোয়না ঐখোয়গী সাহিত্যগী পোত্থোক মরাং কায়না পুথোকপদা নত্তনা সাহিত্য চর্চা তৌদুনা হেন্না ফবা থাক অমদা পুখতনবা হোতনগদবনি ৷ মসিগীদমক সাহিত্য একাদেমিগা পূন্না খূতশম্নরগা চতমিন্নবদা থোইদোক্না মমল লৈগনি হায়না থাজরি ৷ সাহিত্য একাদেমি, মণিপুরী এদভাইজরি বোর্দতা মপান মণিপুরগী মেম্বর অহুম (অসামদগী ২ অমসুং ত্রিপুরাদগী ১) লৈবা হায়বসি মণিপুরগী থৌজাল ওইফম থোক্তে, ঐখোয়গী ফংফম থোকপা অদুনি ৷ ঐখোয়গী অৱাতপা শরুক মেনখতপা হায়বসিসু ঐখোয়গী থৌদাং ওইফম থোকই ৷