অসামদা মীতৈগী ইকোনোমিক পেকেজঃ নৈননীংঙাই ওইবা মীতয়েং তরা

অসামদা মীতৈ(মীতৈরোনবু মমারোন ওইনা ঙাঙলিবা মীওই কাঙলূপ)গী ইকোনোমিক পেকেজ অমা লৈরগনি হায়না লাউথোকপীখিবা/ লাউথোক্লগনি তাকপীখিবা রাজ্যগী চিফ মিনিষ্টর শ্রী তরুন গোগোই অমদি মহাক্না লুচিংবা সরকারবু অহানবদা থাগতচরি৷ পেকেজ অসিবু সরকারগী ওইনা লাউথোকহন্নবগী থৌদাং য়াখিবা ওজাশিং, অখঙ-অহৈশিং, মীয়ামগী লুচিংবশিংবুসু ঙমখৈ লৈতনা থাগতচরি৷ অসামদা খুন্দাদুনা লৈরিবা মীতৈগী ইকোনোমিক পেকেজ অমা লৈফম থোক্লম্বদু হন্দক লাউথোরকপা অসিনা রাজ্য অসিগী মীতৈ খুনাই পুন্সিরোল অমসুং খুনাই শেন্মীতলোন্দা অনৌবা যুগ অমা শোয়দনা হৌরগনি৷ পেকেজ অসিনা অসামগী মীতৈশিংদা নিংথৌকাঙলোনগী মপাঙ্গল অমসুং মসিদা ৱাখল লৌশিং চাওখতপনা তুংগী মীরোলদা পীরক্কদবা অফবা তাইবং অমগী লম্বীসু তাকপীরগনি৷

হৌজিক রাজ্য অসিদা মীতৈগী ইকোনোমিক পেকেজ অমা লৈরগনি হায়বসিদা প্রজা মীয়াম্না খঙনীংলিবা ৱাফম খরদি মখাগী অসিনি-

১.    পেকেজ অসি কৈদৌঙৈদগী থবক্তা ওন্থোক্কদগে

২.    পেকেজ অসিদা চহী অমগী ওইনা সরকারনা কাইথোক্কদবা শেনফম অদুনা কয়ানো

৩.    পেকেজ অসি কনাগী লমজিং মখাদা মীওই কয়ানা শেন্নগদগে

৪.    শেন্নগদবা মীওইশিংদু নৌনা খনগদ্রা নত্ত্রগা সরকারগী হান্নগী থৌমীশিংদা শিন্নগদ্রা

৫.    নৌনা খল্লবদি কন্টেক বেসিসতা থৌ পুহনগদ্রা নত্ত্রগা ফুল তাইম ওইহনগদ্রা

৬.    পেকেজ অসিগী শেন্নফম লোয়শঙনা কদায়দা ওইগদগে

৭.    পেকেজ অসি ওতোনোমস বোদি অমদা শিন্নগদ্রা নত্ত্রগা সরকার মশানা চলাইজগদ্রা

৮.    পেকেজ অসিগী মখাদা পায়খতকদবা থৌরম-থৌদাশিংদু করি-করিনো

৯.    পেকেজ অসি মতম খরখক্তগীরা নত্ত্রগা মতম চূপ্পগীরা

১০.   পেকেজ অসিগী অকূপ্পা মরোল মীয়ামদা কৈদৌঙৈ ফংহনগদগে

পেকেজ অসি অসামদা লৈবা মীতৈ মীয়ামগী ওইবনা, মীয়ামগীদমক য়েংলগা মখাদা ৱাখল্লোন খরদং থমজরি-

১.   পেকেজ অসিনা, অসামদা খুন্দারিবা মীতৈগী মহৈ-মশীং চাওখতহনবগী মায়গৈদা অহানবা মীতয়েং থম্বীগদবনি৷ মসিদা মীতৈরোননা তাকপী-তম্বীবগী পাম্বৈ ওইবা মহৈশঙশিংগী ফীবম ফগতহনবদসু হকথেংননা নত্ত্রগা নাকোইননা মীতয়েং থম্বা য়াই৷ তোঙান-তোঙানবা প্রোফেসনেল কোর্সশিং লৌদুনা তমজনীংবশিংদা পেকেজ অসিনা শেলগী মতেং ফংহনবিবা য়াই৷

২.   খুনাই শেন্মীতলোনগী ফীবম ফগতহনবগী মায়গৈদা মীতয়েং থম্বীগদবনি৷ খুনাই শেন্মীতলোন চাওখতনবগী মরু ওইবা লম্বীশিংদি-

ক. তোঙান-তোঙানবা হীরমদা শেন্থোক লৈগদবা শিনফমশিংগী তম্ফমশঙ হাংবা নত্ত্রগা থৱায় য়াওবা কনাগুম্বনা তমজবদা শেলগী মতেং পীবিবা৷

খ. মশা-মশানা হৈনজবা শিনফম অমমম পায়জদুনা হিংনবা লম্বী ওইজরিবা মীওইশিংদা হেন্না পোত্থোক পুথোকপা ঙম্নবগীদমক শেলগী মতেং পীবিবা

গ. মীওই অমনা লন্নাই ওইনা পুথোকচরিবা পোত্থোকশিংবু কৈথেলদা ফংহনবা ঙম্নবা লম্বী পীবিবা

ঘ. লৌউ-শীংউগী থবক্তা হেন্না সাইন্টিফিক ওইহন্নবা হোতনবগা লোয়ননা পোত্থোক মরাং কায়না পুথোকহন্নবগী লম্বীদা মতেং পাংবিবা

ঙ. পেকেজ অসিবু শেন্ননবা লিংবা লোয়শঙদা মখল কয়াগী ত্রেনিং ফংহনবিবা হায়বসিনি৷

৩.   কলা অমসুং সংস্কৃতিবু হেন্না মমল লৈহনবদা শরুক য়ারিবশিং মীওইশিংবু শেলগী মতেং ফংহনবিবা য়াই৷

৪.   শান্নরোয়শিংবু (মীতৈগা চূনবা অখন্নবা মশান্না খরখক্তদা) হেন্না ৱাংবা থাক্তা কাখতপা য়ানবা লম্বী পীবিবা য়াই৷

৫.   পেকেজ অসিনা পাম্লিবা পান্দম অদু ফংনবা তাল্লিবা মোদেল ভিলেজ অমা শেমগতপা য়াই৷

৬.   মীতৈগা মরী লৈনবা হিসতোরিকেল প্লেস অমসুং মোন্যুমেন্টশিংবু ঙাকশেন্দুনা থম্বদা সরকারগী মতেং পাংবা ওইনা লমকোয়বা লাকপশিংগী মীতয়েং চিংশিনফম ওইবা য়াবা থাক্তা শেমগতপা য়াই৷

৭.   মীতৈগী পুন্সীরোলবু অতোপ্পদা খঙহনবা য়াবা ওপেন ম্যুজিয়ম অমা শেমগতপা য়াই৷

৮.   মীতৈগী খুঙ্গংশিংবু শহর নত্ত্রগা কৈথেলগা লম্বী শমজিন্নহনবা য়াই৷

৯    লায়রবশিংদা ময়ূম-মকৈ অমসুং চানবা ফংহনবিগদবনি৷

১০.   পেকেজ অসিগী মশাগী ওইবা থবক-থৌরমশিং ফোঙদোকপা মতম নাইবা বুলেতিন (ইংলিশ অমসুং মীতৈরোনদা ফোঙবা) অমা লৈগদবনি৷

সরকারগী ওইবা পেকেজ ওইবনা সরকার মশানা লেপচবা থৌরাং লৈরম্বদি য়াই৷ ঐখোয়নদি, পেকেজ অসি মীতৈ দেবলপমেন্ট অথোরিতি (নত্ত্রগা অতোপ্পা মিং অমা) গুম্বা লোয়শঙ অমা শেম্লগা লোয়শঙ অদুগী মখাদা মীতৈগী চাওখত থৌরাং তৌহনজনীংই৷ সরকারনা ঐখোয় মীতৈগী চাওখত খোঙথাং থাংজনবগী থৌরাংদি য়াতপীরে৷ হৌজিক কিজরিবদি-

১.    মকোক মরু ওইবা তান্নবদা চয়েতনবা থোকহল্লক্কদ্রা হায়বসিনি

২.    ঐখোয়গী লিংজেন মান্নদবনা খতনরক্কদ্রা হায়বসিনি

৩.    ঐগী ওইজবা হেন্না তানবদা মীয়াম্না পেন্নরোইদ্রা হায়বসিনি

৪.    মীচঙ সঙ্গন লৈবা অমসুং শক্তি পায়বশিংনা লান্না শান্নরক্কদ্রা হায়বসিনি

৫.    পেকেজ অসিনা খুনাইসিবু ললোনপোতকুম উহল্লক্কদ্রা হায়বসিনি

৬.    মীচঙ মীখাই নাইবনা প্রজা ৱারৌনরক্কদ্রা হায়বসিনি

৭.    ব্রহ্মপুত্র বরাক চিংখাইনরক্কদ্রা, লখিপুর শিলচর হায়লাকান্দি চিংখাইনরক্কদ্রা হায়বসিনি

৮.    মীতৈ মশেন খতননবা মরম ওইহল্লক্কদ্রা হায়বসিনি

৯.    মীওই খরখক্তগী মখাউ তোঙনবা ওইখিগদ্রা হায়বসিনি

১০.   সরকার পায়রিবা পার্তিগী পোলিতিকেল প্রেক্টিস অমা ওইনা ভোট মমাঙদা তৌবা নমথাক ওইগদ্রা হায়বসিনি৷

মতমনা পুরকপা অচুম্বা অদুদি ঙাইবা তারি৷ তোঙান-তোঙানবা মীতয়েংদগী ওইথোকপা য়াবা কয়ামরোম ফোঙদোক্নরবসু মপূমদা য়েংবদগী উরিবা পেকেজ অসিগী তঙাইফদবা অমসুং রাজ্য অসিদা লৈরিবা মীওই কাঙলূপশিংগী চাওখত থৌরাংগী মরমদা পায়খতলকপা য়াইফ-থৌরাং অসিদি ফনা শীংথানীংঙাইনি৷ অতৈ থংনবা রাজ্যশিংনফাওবা তমজনফমনি৷ ত্রিপুরাদসু মীতৈগী ইকোনোমিক পেকেজ অমগী তঙাইফদবা লৈ হায়জনীংই৷