মনেম-মকুগা পূন্না লৈমিন্ননীংদবী মৌ

(‘লাইথরোইগী মহাও’দা য়াওবা ৱারীমচা মরিদা য়ূম্ফম ওইরগা নৈনবা)

ৱাহৌদোক

কব্রবম ধীরেন্দ্রবু অপাবা খুনাইনা খঙবসী মরু ওইনা ‘মরূপ’ (আগরতলাদগী ফোঙবা চয়োলগী পাউচে) অমসুং ‘ইচেম্মা’দা ইবা মহাক্কী ৱারেংশিংদগীনি ৷ অদুম ওইনমক, মহাকপু ৱারীমচা ইবা অমা ওইনা শক তাক্লিবসীদি মহাক্কী লাইরিক ‘লাইথরোইগী মহাও’ হায়বসিননি ৷ মমাঙদা ‘পূর্ণিমা’ অমসুং ‘সনথোঙ’নচিংবদা ‘চীংলেম্বা’ হায়বা পেন নেম শীজিন্নরগা ৱারীমচা খরা ফোঙখি ৷ লাইরিকসি অইবগী অহানবা খূতলান্থোক্নি ৷

ৱারীমচা ২১ (কুনমাথোই) য়াওবা লাইরিক অসিদা অইবা ধীরেন্দ্রনা মহাক্কী ৱারী লীবা হৈবগী মতিং অদু নীংথিনা ঊতথোকপা ঙমখি ৷ লাইরিক অসিগী থোইদোকপা অমদি ৱারীমচাশিংসীদা য়াওরিবা মপূং ওইবা লমচত অমফাওবগী মমিং য়াওহন্দবা অসিনি ৷ ৱারীমচা অমখককী লমচত নত্তনা পূম্নমকপু অইবনা থর্দ পর্সন সিংগুলর নম্বর ‘মা’ (মহাক) ওইনা থম্মী ৷ মসি অচৌবা চাংয়েং অমনি, মায় পাকখি হায়না লৌই ৷ অইবনা ‘মা’ কুন অমসুং ‘মখোয়’(‘মা’ নুপা অমগা ‘মা’ নুপী অমগা) অমগগী ৱারী লীবনি ৷ অইবগী ‘মা’ অসি নুপী অনীখক (‘বসন্তনা লাক্লবদ’, লাঃ ৮৯ অমসুং ‘ঈ-শদোংগী লীচত’, লাঃ ৯৪) নত্তনা অতৈদি নুপা ঙাক্তনি ৷

খুনাই, ইমুং-মনুং, মীওইবগী পুন্সী অমসুং লমচত-শাজতকা মরী লৈনবা ৱারীশিং ইরিবা ধীরেন্দ্রগী লাইরিক অসিদা য়াওরিবা নুপীশিংসিগী মনুংদা ৱারীমচা মরিগী নুপীশিংদি মপুরোইবগা মহাক অমদি মখোয়গী অঙাংশিংতগা লৈমিন্ননীংবা, অতৈ কনা অমত্তগা পূন্না লৈমিন্ননীংদবা ওইনা তৌই ৷ হায়রিবা মখলগী নুপীশিং অসি অইবগী ৱারীমচা ‘ঐগী থরো’, ‘শাইদাংবী’, ‘নিঙোল মতৈ’, ‘অহানব অহীংগী সরপ্রাইজ’ হায়বসীদা থেংনৈ ৷ (অতৈ মখলশিংদি মীতয়েং চঙশিনজদ্রে) ৷

মৌ অমসুং মহাক্কী মফম

খুনাইনা য়াবা মওংদা নুপা-নুপীনা য়ূম্বানমিন্নদুনা লৈমিন্নরিবা নত্ত্রগা লৈমিন্নরম্বা নুপীশিংবু ‘মৌ’ কৌই ৷ শম্না – ময়ূম পাল্লবা (পাল্লুবা, পাল্লুরবা য়াওনা) নুপীবু ‘মৌ’ কৌই ৷ নুপী অমগী পুন্সীগী তাংকক অমবু খঙনবা মিংথোলনি ৷ নুপী অমনা অঙাং পোকপা ঙম্লিবা মতম মখৈবু ‘মৌ’ হায়বা মিংথোলসিগী মখাদা থম্বা য়াই ৷ য়ূম পান্দ্রিঙৈ মমাঙদা ‘লৈশাবী’ কৌরম্মী ৷ লুহোংবা হেক লোইখিবদগীনা অঙাং অমদং ঙায়জরিবা অমসুং অঙাং অদুনা পীক্লিঙৈ ফাওবনা ‘মৌনহা’ হায়না খঙনৈ ৷ ইমুং অমদা মৌ মশীং য়ামশিল্লক্লবদদি নৌনা চঙলক্লিবা মৌ অদুবু ইমুং অদুগী মীশিংনা ‘মৌ অনৌবী’ হায়না কৌনৈ ৷ ‘মৌ’ হায়বা মিংথোলসি য়ূম্নাক শাগৈ নত্ত্রগা ইমুং-মনুং অমগা মরী লৈনৈ ৷ খূদম ওইনা ‘য়ূম্নামগী মৌ’, ‘...হোয়গী মৌ’ অসিনচিংবা ৷

‘মৌ’ হায়বসি নুপা অমগী লোয়নবীনি ৷ ‘লোয়নবী’বু ‘মতু’, ‘নুপী’, ‘তালোয়’ হায়না কৌনৈ ৷ থায়না ‘মরুম্বী’ নত্ত্রগা ‘তালোয় মরুম্বী’ হায়নসু কৌনরম্মী ৷ মৌ অদু, লৌরিবা নুপা অদুগী মপা-মমাগীনা ‘মমৌ’নি, ময়াম্বগীনা মনাউনুপীনি, মনাউগীনা মতৈমনি, মচেগীনা মনীংনি, মচনগীনা মনম্মনি ৷ নুপা অদুগী ময়াম্বগী মচাশিংনা – ইন্দোনচৌবী (মপাগা থংনবা মখুরাগী ওইরগা), ইন্দোন য়াইমা (য়াইমগী ওইরগা), ইন্দোমচা (অতোনবগী ওইরগা) কৌনৈ ৷ মনাউগী মচাশিংনা – ইহ্মান্ধৌ (অহনগী ওইরগনা), ইহ্মানয়াইমা (য়াইমগী ওইরগা), ইহ্মানতোন (অতোনবগী ওইরগা) কৌনৈ ৷ মচন অমসুং মনীংগী মচাশিংগীনা নেনে, নেচৌ, নেয়াই, নেচা, নেতোননি ৷ মহাক্না পোকচবা মচাশিংগীনা ‘মমা’নি ৷

মহাকপু লৌরিবা নুপা অদুগী অপোকপা-অপোকপীদু মৌ অদুগী মকুবোক-মনেবোকনি ৷ মকু-মনেমগী ময়াম্বা অমসুং মতৈমদা ইকুহন-ইনেমহন হায়না কৌগনি ৷ মনাউনুপাশিংদা ইকুয়াইমা, ইকুতোন অমসুং মনাউনুপীদা ইনেময়াইমা, ইনেমতোন কৌগনি ৷ মকুবোককী মচেশিংদা ইহ্মান অদুগা মচলশিংদনা ইন্দোন কৌগনি ৷ মপুরোইবগী ময়াম্বদা ইতৈ (ইতৈহন, ইতৈয়াইমা, ইতৈতোন) কৌনৈ, মথক থোংবা মৌশিংদা ইচেমহন, ইচেয়াইম, ইচেমতোন কৌনৈ ৷ মপুরোইবগী মনাউনুপাশিংসি মহাক্কী মনাউনুপা থোকই ৷ মখোয়দা মহাক্না য়াইমা, তোম্বা হায়না কৌনৈ অদুবু কনাগুম্বনা মমিং নত্ত্রগা নুংশিনা কৌবা মিংথোল অমা শীজিন্নরগা কৌবসু থেংনৈ, মখা থাবা মৌদনা ইনাউ, য়াইমবী, তোম্বীনচিংবা কৌনৈ ৷ মপুরোইবগী মচেসি মনম্মা থোকই, মচনদি মাগীসু মচন থোকই, ইচন হায়না কৌবা নত্ত্রগা মিং ওইনা কৌবা য়াই ৷ মতৌ অসুম্না, পাক চাউরবা লমগন অমগী মনুংদা মৌ অমনা লেপ্পী ৷

নুপাশিংনা মহাক্কী লোয়নবীদগী করি পাম্মী

নুপা অমনা তাইবংপানসিদা পুন্সী তোলোইনা হিংমিন্ননবা অমসুং পানমিন্ননবা মপাং অমা দরকার লৈরকই ৷ মপাং অসিগা লোয়ননা লৈমিন্নবা য়ানবা ‘লুহোংবা’ হায়বা থৌরম পাঙথোকই ৷ মসিবু ‘পুন্সি লৈপুন ওইমিন্নবা’ অমসুং ‘য়ূম্বান পুন্সিদা খোঙদামিন্নবা’ হায়নসু খঙনৈ ৷ (খুনাইনা য়াবা মওংদা য়ূম পানমিন্ননবা থৌওং কয়ামরোম লৈ, অমদা হেক্তা য়াই) ৷ মপাং অসিগা লোয়ননা পুন্সিগী খুনীংথেক অমদা চতমিন্নবদা নুপা অসিনা মহাক্কী পুন্সিগী অকোয়বদা হিংমিন্নরকখিবা মীশিংগা হান্নগুম মরী থম্নবা পাম্মী ৷ মরু ওইনা মহাক্কী অপোকপা-অপোকপী, ময়াম্বা-মনাউ, মচে-মচল, মরী-মতা, শাগৈ-নাতৈগী অহল-লমনশিংদা থম্লম্বা ঈকাই খুম্নবদু মহাক্কা নৌনা য়ূম্বান পুন্সিদা খোঙদামিন্নরিবা মাগী লোয়নবীনসু চপ চানা ঊতপা পাম্মী ৷ ‘অহানব অহীংগী সরপ্রাইজ’গী মা(নুপা)না মাগী অহল ওইরবা মমা-মপাদুবু সেবা তৌবীবা ঙমগদবা, মীকোন নাউকোনগনবী, ঈং তপ্পী, মতিক চাবী য়ূমগী মৌ অমতং পামজখি ৷

নুপাশিংগী পুন্সিদা মথক থোংবশিং (মমা-মপা, ময়াম্বা-মতৈম, মচে-মচলনচিংবা)না তৌবিরকখিবশিং অমসুং মনাউ-মচলশিংবু নুংশিবদু মখোয়না ঙম্লক্লবা মতমদা অমুক তৌবিমল খঙবা ওইনা থৌদাং লৌজবা পাম্মি ৷ মখোয়বু মী ওইনবা শেম্বীরকখিবশিংদু মখোয়না মী ওইরবা মতমদা অমুক নীংশিংদুনা অফবা মমল থমজবা পাম্মী ৷ নুপাশিংনা মহাক্কী লোয়নবীগা লোয়ননা মখোয়গী অহল-লমন অমসুং মচিন-মনাউবু পূন্না সেবা ফংমিন্নবা পাম্মি ৷ মমা-মপা, মচিন-মনাউনা মহাক্কী লোয়নবী নুপীগা হরাও-তয়াম্না, সেগ-মাইগা তানদুনা, নুংশিননা, য়ানজনা লৈমিন্নবদু উরগা মহাক্না হরাওজৈ ৷ মাগী নুপীগীদমক মহাক্না মপূক্নীংদা নুঙাইবা ফাওজৈ, চাউথোকচৈ ৷

অইবা ধীরেন্দ্রগী ৱাখল্লোন করিনো

অইবা ধীরেন্দ্রনা মাগী লাইরিক অসিগী মনীং থংবা মকু (কভর)দা ই ‘...সংসার অসিদ নুপীন তৌব ঙমদব থবক অমত্ত লৈতে ৷ মীওইবন মাঙোন্দগী মপাঙ্গল কনখ্রব শাশিংবু ইরায় লায়ন লাকশিন্দুন থবক শীজিন্নব ঙম্লিবগুম্ন মপাঙ্গল কল্ল-কল্লব, কন্থি চাউখ্রব নুপা কয়াবুসু নুপীশিংতন লায়ন লাকশিনব ঙমই ৷ ৱাখল-থৌনা-পূক্নীং চেতখ্রব বিশ্বামিত্রগুম্বা মুনিফাওব করিসু লৈত্রব স্বর্গগী জগোয়শাবী অমগী শুম্মতলাংদ থুখিবগী খূদম লৈরি ৷’ মহাক্না ‘নুপাশিংগী অকনব আকর্ষনগী মচাক ওইরিব নুপীশিংসি প্রকৃতিগী অঙকপা খূতশেমনি ৷ অদুবু আকর্ষনসিবু খূতলাই ওইনা শীজিন্নদুনা মশাগী ওইজবদমক খনবী, কল্লক মিহৌ চাউবী, হাইগতলাং থাক্লগ নুঙাইজবী নুপীশিং(খর)ন মশাগী অনীংব, অপাম্বশিংদো পাঙথোক্নব হোতনরি ৷ মপূকচেল তথক-তথকপ নুপাশিংবুদি মখোয়গী শুম্মতলাংদ থুহন্দুন য়াম্ন লায়ন অনম-অহা চুহনব ঙমই ৷ থাঙ্গৈশেংবদি, নুপীশিংন হায়রিব খূতলাইসি শীজিন্নরিবসি কনাগী মায়োক্তনো - মাগুম্বী নুপীশিং হায়বদি মনেম, মচেম, মনাউ, মচনশিংগী মায়োক্তা নত্ত্রা ৷ মদুনদি ঙসিগী মনেম লাক্নবী মমৌদুন হয়েংগী মমৌ লাক্নবী মনেমসু ওইরকই’ হায়রদুনা অমুকসু মখা তাই ‘নুপীশিংন হায়রিব আকর্ষনগী খূতলাইসি শীজিন্নদ্রবদি মমা-মপাবু লাইদৌন নীংজরম্ব মচানুপাদুন নুপী হেক থিবদগী পূংওন ওনখিবদুন করম্বনো ৷ থোইদোক্ন খন্থনীংঙাইনি’ ৷

মনেম-মকুগা পূন্না লৈমিন্ননীংদবী মৌ

হৌজিক মতমগী মৌশিংসে খুল্লক্কী ৱাহৈদা হায়রগা ‘মনেম-মকু পীজনীংদরে, মচা-মৱাদগী হেন্না খঙদরে’ হায়নবদুনা অয়াম্বা ওইরে ৷ নুপী অমনা ময়ূম পাল্লক্লিবা ইমুং অদুগী অহল-লমন সেবা তৌদুনা মচিন-মনাউ তোরো-খোদাননা লৈমিন্ননীংবগী অপাম্বসি অয়াম্বনা লৈনদ্রে ৷ শাগৈ-নাতৈ, মরী-মতাবু খঙবা পামদ্রে ৷ মখোয়দা য়েতশিল্লরনি, লৌগে হায়ররনি হায়বসিগী পাখতপনা অয়াম্বা মরীশিংদগী লাপথোক্নবা হোতনবা উরে ৷ মখোয়না নুপা অমগী ‘লোয়নবী’গা অঙাংশিংগী ‘মমা’ অমা ওইবদগী হেন্না অতৈ মিংথোল অমত্তবু মমল লৈনা লৌনীংদ্রে ৷

মখোয়সি অয়াম্বনা মপামদা লৈরিঙৈদা নাউয়োক-নাউকোন য়ৌরক্তবা নত্ত্রগা নাউকোল্লক্তবা ওইনা তৌই ৷ মখোয়গী মমা-মপাদু মচাশিংনা হায়রিবমখৈ য়াগনবা (permissive parent) নত্ত্রগা মচাশিংবু হন্না য়েংশিনবিরক্তবা (neglected parent) মখলগী ওইগল্লি ৷ ইমুং-মনুংদা মমা-মপাবু ঙম্না পাল্লকপা নুপীশিং নত্ত্রগা লৈকায়না ঙাঙনবা ঙম্লক্তবীশিং নত্ত্রগা মপান্দা লাইরিক তম্লকপীশিং নত্ত্রগা ইনাক খরা খুনজবা, অওং-অউন মরাং কায়না তম্লকপী নুপীশিং নত্ত্রগা লাইরিক হৈরবীনি হায়না নাপন তৌজবী নুপীশিংনা মনেম-মকুগা পূন্না লৈমিন্নীংদবী মৌ ওইগল্লি ৷ মখোয় অয়াম্বনা মশাগী শেন্থোক লম্বী লৈগন্দে, মখোয়গী নুপাদি শেন্থোক লম্বী নীংথিনা লৈবা ওইগল্লি ৷ মখোয়না মখোয়গী নুপাগী শেন্থোক অদু শীজিন্নবী নুপী ওইগল্লি ৷ ইনাক খুনবা ইমুংগী মচানুপীনা মপাম ইনাক খুনবা নত্ত্রগা অতৈ নুপীনা মপুরোইবগী শেন্থোক অদুগী য়ূম্ফমদা লেপ্লগা মনেম-মকুগা লৈমিন্নীংদবা মৌ ওইগল্লি ৷ নুপা শেন থোক্তবগী নুপী নত্ত্রগা মপাম লায়রজবী নুপী নত্ত্রগা লাইরিক হৈতবী নত্ত্রগা হৈরগা নাপন তৌদবী নুপী নত্ত্রগা নাউয়োক-নাউকোন নীংথিনা তৌরকপী নিঙোলশিংনা মনেম-মকুগা লৈমিন্ননীংদবী মৌ ওইবা কয়া ঙমগন্দে ৷ তৌবগীদি মসি শেন-থুমদা খরা হেন্না য়ূম্ফম ওইবগী মতৌ ওইনা উবা ফংই ৷

মনেম-মকুগা পূন্না লৈমিন্ননীংদবী মৌশিংনা য়ূম হেক পাল্লকপগা তোঙান চানবগী থৌরাং অমসুং লৌরোন কয়া তৌগল্লি ৷

লৌরোন খরাঃ নুপানা অরাপ্পদা থবক তৌবা ওইরগনা নুপাগী থবক মফমদা চতখিনবা হোতনবগী লৌরোন, অনকপদা তৌবা ওইরগনা ক্বাটরদা লৈরুনবগী লৌরোন, নত্ত্রগনা ইমুং অমত্তদা লৈমিন্নরগা চাকখুম তোঙান্নবগী লৌরোন অসিনচিংবসি তৌগল্লি ৷ মসিনা অঙাং য়াওদ্রিঙৈগী নত্ত্রগা চাউদ্রিঙৈগী লৌরোননি ৷ অঙাংনা লাইরিক তম্বা হৌরকপা মতম য়ৌরক্লবদি ইংলিস ষ্কুলদা তমহনবগী মিংদা ষ্কুল মনাক্তা ভারা লৈনবগী লৌরোন অসি মপাঙ্গল কন্না তৌরম্বা উবা ফংই ৷

লৌরোনশিংসি মায় পাক্নবা হোতনবদা মৌশিং অসিনা মখোয়গী পূক্নীং-লৌশিং অরৈবা মখৈ শীজিন্নৈ ৷ কনাগুম্বীনা মপামদা মমাগা তানবা য়াওই নত্ত্রগা ৱাখল্লোন মান্নবী নুপীশিংগা চীকথনবা উবা ফংই ৷ মখোয়না চাকথোং-ফৌসুদা, ৱাইশিত-ৱাইরমদা, ফিসু-ফিজামদা, কোল্লিক ফেঙবা-চাম্বদা, খোমহাম্বুন নত্ত্রগা অশেংবা ঈশিং শোকতপদা, লাই-থাউমৈ থানবদা লৌতানরকই ৷ মশা ঙমদবা, থবক চিনবা, অঙাং থাদোকপা য়াদবনচিংবগী লৌরোন তৌই ৷ অদুগা মশাবু অচুম্বা শারগা অতৈবুনা অরানবা তাহন্দুনা শেমজিন-শাজিনবা ৱাহৈ পরেং কয়া মাগী নুপাদা ইশৌ লাংদুনা হেক-হেক তমশিনগল্লি ৷ মদুদা মথ্বায় নুঙাইতবা, মমীত্তগী মপি তাবা, কেথবা, শাউজিনবনচিংবা লিলা কয়ামা তৌবা থেংনৈ ৷

মখোয়না তৌবা লৌরোন মায় পাক্তুনা মচা-মৱাখক্তগা লৈমিন্নবা ঙম্লবদি তাইবংপানসিগী মথক্তা পানবা ঙম্লবগুম মখোয়না খঞ্জৈ ৷ নুপাবু মহাক্কী লংশুংনা শান্নবা লাইধী ওইহনবা হায়বসি মহাক্কী অমত্তা ঙায়রবা লাইনীংগুম তৌই অমসুং থৌদাং পাঙই ৷ মাগী অনীংবদু ওইরগতা মহাক্না হরাওজৈ ৷ মখোয়সি থকসি-খাসি, থৌগল্লোন ব্যবহার কয়া খঙগন্দে, মরৈ-মরা য়াম্না তৌগল্লি ৷ নোল্লুক্কন্দে, মানা খনবতনা চুম্মী অমসুং চুমদবা য়াদে হায়বা মখলগী মরৈ তৌগল্লি ৷ মখোয় মশাগী মরাল খঙগন্দে অদুগা মীবু মরাল শীবদি য়াম্নমক হৈগল্লি ৷ মশাবু লানজদবী ওইনা শেমগতপা মরৈদা কক্লুনীঙাই য়াওগন্দে ৷ মখোয়না মপুরোইবদা হীরম কয়াগী ৱাকত থমগল্লি, ৱাকতশিং অদুগী কান্নবদু ফোঙদোক্তুনা তাহল্লি ৷ মহাক্কী ৱা অদু তানবা হোতনবদা মফম-মতম-তানজা য়াম্না য়েংগল্লি অমসুং খঙগল্লি ৷ নুপাগী শোন্থরকপা তানফমদা মখোয়গী পুঙম থাংঙমদ্রবা দাবী কয়া তৌশিনগল্লি ৷ নুপাবু মথুম-মরাং হৌহল্লগসু মখোয়না মখোয়গী অপাম্বশিংদু ফোঙদোক্কল্লি ৷ মখোয়না নুপাগী অনীংবগী মখা পোনগন্দে মদুগী ওন্নতৈনবদা নুপাবু মহাক্কী অনীংবগী মখাদা থমগল্লি ৷ মাগী নুপানা পুথোকপা মবুকথোক্কী ৱাফম অয়াম্বা লালহনগল্লি ৷ অদুগা মশাগী ৱাখল্লোন অমা পুথোক্তুনা নুপা অদুদা য়াহনগল্লি ৷ মহাক্না হায়বা তাবিনবগীদমক কেথবা, ওইনবনচিংবা তৌগল্লি, তাবিদবা মতমদনা মরৈ তৌদুনা (শাউজিন্নদুনা, মশা নুঙাইতেনচিংবা হায়জিন্দুনা) নুপাবু মনাক্তা চঙহনগন্দে, মশা শোকহনগন্দে, অরাম-খৌরাংবা কোকহনগন্দে ৷ মখোয়না হায়জবা ৱাফমশিং তাবিদ্রে হায়না খনবগা কপ্প-ও, পেব-ও তৌদুনা ‘ইপামদা থিনবিরো’, ‘ঐবুদি নুংশিবীবা নত্তে’, ‘ঐনা হায়জবদি তাবীবা নত্তে’ হায়বনচিংবসি তোয়না হায়গল্লি ৷

তোঙান চানীংবা নুপীশিংগী নুপাঃ মখোয়সি অয়াম্বনা নহা ওইরিঙৈদা নুপী নহা কয়া লোয়নরক্তবা মীওই ওইনা তৌগল্লি ৷ মরম অদুনা শক্লোন য়াম্বা নুপীগী মায়থোং খঙবা ঙমগন্দে ৷ মহাক্না উরু-উরুবদু থাজগল্লি, নুপীনা অহায়-অহায়বদু অচুম্বা ওইনা লৌগল্লি ৷ নুপীগী ওইনবনা করম্বনো, নিঙাইনা করম্বনো, করি হায়নীংলিবনো, অচুম্বনা করিনো হায়বা খঙগন্দে, মাগী নুপীনা হায়বখক্তবু অশেংবা ওইনা লৌগল্লি ৷ নুপীগী মীচঙ চঙদুনা অতৈগা চীন্দা পাউদানবা থোক্কল্লি ৷ মীমাঙদা মাগী নুপীবু চৈশিন্নবা, ফূজিন্নবগী লিলাসু তৌগল্লি ৷ মখোয়না অচীকপদা মখোয়গী মমা-মপা, মচিন-মনাউ মরী-মতাবু নীংশিংই অদুবু মাগী নুপীনা ৱারৌখিনি খন্দুনা নীংশিংবা অদু মমি শামহনগল্লি ৷ মহাক্না মহাক্কী মবেম্মা ওইরিবা নুপী অদুনা য়াবিনবা, থৌজানবিনবা, অহীংদা মশা শোকপা য়ানবগীদমক হায়বা পূম্নমক ইনগল্লি ৷ মচিন-মনাউবু কাউথোকউ, নীংশিংবা য়াদে হায়বদা কাউথোকই, নীংশিংদে ৷ থীনা চৈরগা তান্থোকখো হায়রগসু অদুম তান্থোকখি ৷ শেল পীবা য়াদে হায়রগসু পীদে ৷ মপামদা অৱা-অনা তারে হায়দুনা মতেং পাংনবা হায়রগসু অদুম পাংই ৷ মনাউনুপী থাজবগী পোতলুম পূম্নমক পুগদবনি হায়রবসু অদুম পুই ৷ নুপা খরদি মাগী নুপীনা উদবা খঙদবা মফমদা মাগী মরী-মতাশিংবু লোন্না মতেং পাংবসু য়াওই ৷ খঙনরক্লগা খতনবসু য়াওই ৷ মীনম্বা ঙাঙদুনা মাগী নুপীবু থাজহনবসু য়াওদবা নত্তে ৷ নুপা খরদি মশানা তানজবা শেনফমদু মশাগী নুপীগী শেনগাউদগী অমুক হূরানবসু য়াওই ৷ মমান্নবশিংনা ময়ূমদা কোয়রকপা থোক্লবদি মহাক্না মাগী নুপীবু ঙম্বা শাদুনা ৱা ঙাঙবা য়াওই ৷ হেনজিল্লকপদগী মিহুন কাঙনদুনা মীমাঙ-পোমাং নাইদবী নুপীশিংনা মৱা-মপুরোইববু মীমাঙদা চঙহাত হাত্তোকপীবসু য়াওই ৷ মথমোয়দা পেন্দবা কয়া লৈরবসু মখোয়না তূমিন্না লৈ অদুগা মাগী নুপীনা শাউরিবদু ঈংথনবা থেমজিনগল্লি ৷ নুপা খরদি লাইৱা (লাইৱা মরোল কয়ামরোম লৈ, মদুদগী কোক্নবা পাম্বৈসু লৈ)না শুমজিনখিবা ওইনা তৌই ৷ কোন্নথংদা মখোয় নুপীনা হায়বা ইনবা নুপা ওইগল্লি ৷ মসিবু মীতৈনা ‘নুপীগী খুদোম্বীদা লৈখিবা’ হায়, অতোপ্পা ৱাহৈদনা ‘নুপীনা ঙম্বা’ নত্ত্রগা ‘অধামোরা’ নত্ত্রগা ‘অধামোরা চুবা’ হায়নৈ ৷ মখোয়গী নুপীনা লাইরেম্বী ওইরগা মখোয়না লাইরেম্বীগী অচানবা মনাই ওইনা পুন্সী লেনগল্লি ৷

লাইৱা অমসুং মসিগী মহয়ঃ নুপীনা মহাক্কী নুপাদু মহাক্না হায়বা ইন্নবা, মহাক্না হায়বতমক তানবা লাইৱা তৌদুনা ফাবসি মীতৈদা চতনৈ ৷ মসি নুপী মশানা নত্ত্রগা মমানা শীনবিবা থেংনৈ ৷ যন্ত্র শিবিবা, মোনপাক মখাদা লাইৱা ইদুনা থম্বা, নুপাদুনা খাঙবা মোন মনুংদা যন্ত্র হাপ্পা, ক্বা মপুম য়োতশিল্লগা অমাংবা মরক্তগী লৌথোক্তুনা খায়রগা মাগী নুপাদা পীজবা, অমাংবা মতোন লৌদুনা নুপাগী চানবদা হাপ্লগা পীজবা অসিনচিংবসি নুপীনা নুপা ফানবা থৌৱোং ঙাক্তনি ৷ অসুম্না ফাবসিনা নুপীনা পাম্বশিংদু ফংবা ঙম্মী হায়ববু কোন্নথংদা নুপাদু শোন্দম-নাদম্নগল্লি, ফম্বী কংগল্লি, মৈ শোন্থগল্লি, অনম-অহা চুগল্লি, মশাগী ওইবা ৱাখল্লোনশিং মাঙগল্লি, অনা-লাইয়োং খঙদনা নাগল্লি, ঙন্না শিগল্লি ৷ নুপীদু ঙন্না লুখ্রা ওইগল্লি ৷

লাইৱানা ফারিঙৈ মতমদা নুপী অদুনা নুপা অদুদগী অঙাং মীরোল্লবদি হয়েং পোক্লবা মতমদা মহাক্সু মপাগুম্না শোন্দম-নাদম্নগল্লি, চিরি য়াংগংনগল্লি, পেত-পেত নাগল্লি, মতিক-মঙম শানগন্দে, হৈথোই-শিংথোইগন্দে, মমান্নবশিংদগী মতম অয়াম্বদা শোত্থগল্লি, পুন্সি নুংশাংগন্দে ৷

‘লাইথরোইগী মহাও’দা য়াওবা মনেম-মকুগা পূন্না লৈমিন্ননীংদবী মৌশিং

মনেম-মকুগা পূন্না লৈমিন্ননীংদবী মৌশিং অসি ‘লাইথরোইগী মহাও’ হায়বা লাইরিক অসিগী ‘ঐগী থরো’, ‘শাইদাংবী’, ‘নিঙোল মতৈ’, ‘অহানব অহীংগী সরপ্রাইজ’ হায়রিবা ৱারীমচাশিংসিদা য়াওরি ৷

‘ঐগী থরো’দা য়াওরিবা থরোসি লুহোংবা কুইদ্রিবী ওইনা তৌই অদুবু তোঙান চানীংবগী ৱাফম মাগী নুপাদা তোয়না হৌদোকপা ওইনা তৌই ৷ নুপীগী শুমহতয়াইদা পঙথখ্রবা ‘মা’মক্তি লুহোংবা নৌরিঙৈদদি মমা-মপানা হায়বা ইন্দুনা চতলম্বনি ৷ অদুবু মতম খরনি মতৈ-মনাউ মতুপামদা লৈরুবদগী পোতশেমনা ফাজিনখিবনিসু হায়নৈ হায়রি ৷ থরোনা ইমুং-মনুংদা লৈমিন্নরিবশিংগা চীন্দা পাউদানৈ অদুগা মপুরোইবা লাক্লগা তমশিল্লি ‘ঐ শিরনি, ঐ সিদ সুম লৈরবদি ঐ শোয়দন কোকসে পুবা ঙমদন শিরনি ৷ ঐবু হয়েংমক ইপামদ থিনবীগদবনি ৷ মফমসিদ ঐ মীকুপ অমফান লৈজনীংদ্রে ৷ লৈত লৈয়ু হায়রগন মখোয়দগী তোঙান্ন খঙলব্র ৷ মীন নহান্দগী হায়বদি অমত্তসু তাবিদব’ ৷ থরোনা মখা তানা কপ্পও লাউবও শমথরকই ‘ঐগী পুন্সিসে পূম্মাং মাঙলবনিকো ৷ ঐবু মখোয়ন ফত্তে, থবক শূনীংদে, মনেম লাক্নৈ হায়দুন লৈকায় পূম্ব য়োন্থোকপীদুনা লোইরে ৷ ঐ মায়সে পুথোকপ ঙমদ্রে...’ ৷ মপুরোইবসু পোলোইদা ফিরেপ লৌই ‘থরো, ঐ অতৈ করিম খঙদে, ঐ নঙবুদি থাদোক্তুন সুংলৈ লৈব ঙম্লোই’ ৷

‘শাইদাংবী’গী অওং-অউন চাউনা তম্লকপী নুংশিবীনা লুহোংলকপগী চয়োল অমা ফারকপদা তৌবা নিঙাইদি মপুরোইবগী এ সি য়াওবা ফ্লেততা হোংদোকখ্রসি হায়বসিনি ৷ মপুরোইবনা লৈবা য়ূম অদুদা মহাক শাবা খাঙবা ঙমদে, ঈশিং ফত্তে ইলর্জি তৌই, মৈসু চাং নাইদে অদুগুম্বা খুন্নুংদুদা মহাক লৈবা ঙমদে, ঙম্মোই হায়বসিনি ৷ মহাক্না মপুরোইবদা হায় ‘লৈহৌ নঙগী ফোরফাদার মতমগী গুহা মনুংসিদা ৷ ঐদি সিদ লৈব সুঙম ঙম্মোই ৷ আই ক্যান্ট লিভ হেয়্যা অ্যানি মোর’ ৷ নুপীনা হায়বা ইনবা ‘মা’সু মমা-মপাবু থাদোক্লগা নুপীনা হেল্লে খন্দুনা ফ্লেততা লৈখি ৷ অদুবু নুংশিবীগী অঙাং উনবা মতমদা মীনাই অমা দরকার লৈবদু মনেমবু ওইনা মহূত শিলহনখি ৷ অঙাং শেন্ননবা মী ওইনা মচানুপাগী ময়ূমদা শাইদাংবীগী পুন্সি লেল্লি ৷ নোংমা অঙাং মথীদা নুংশিবীনা নেতশিল্লুবা নুমিত্তুদা মনেমদা হায় ‘হনুবী নঙ ৷ ঙসাইনা অঙাং মথী লৈহৌরিবসি শেংদোক্লম্মু হায়বদু ননাদু পঙব্র হা’ ৷ মনেমনা নোল্লুক্না খুমজৈ ‘ইবেম্ম, ঐসু চাকখুমগী হোতনরিঙৈদ অঙাং মখোঙ হাম্বগক খঙহৌদ্রে’ ৷ পাউখুমসিবু ওক্লদুনা নুংশিবীনা লাক্তুনা খুম্মী ‘করিগী খঙলোইদ্রিবনো ৷ লেমজা চামন্দুনা নমীত-ননাগ লোইন পঙশিল্লব্র ৷ হনুবী নঙ লৈবগী করি কান্নরিবগে হা ৷ অঙাং মথী শেংবফাও হেক কান্নদে ৷ হনুবী, মৱাচাবী, মীনুখাঙ নুপী, হিংচাবীসিন ঐখোয়বু অতৈ কয়ানি য়েতখিগে হায়রিবনো খঙদ্রে’ ৷

‘নিঙোল মতৈ’দা য়াম্না নুঙাইরিবদি ‘মা’গী মনেম লৈবাক্লৈসু মপুরোইববু পুদুনা লাকখি মচানুপী অহনসু মপুরোইবগা পূন্না থবক মফমদা লৈমিন্নখি ৷ মচানুপাসু মমৌনা পুরগা চতখি ৷ মচেচৌবী হায়রিবা নুপী অসিনা ‘মা’বু ময়ূমগা শমজিন্নহন্দে, অমুক্তসু চতহনখিদে ৷ ছুটি থোকপদসু নুপীপামদা ওইনা থুংই ৷ মচন্নুপী অবেমগী লুহোং-খোঙদোংবগী অফবা তানজা কয়া লাকখ্রবসু মহাক্না লুহোংবিখিদে, মনাউনুপীগীদি লাখ অনীরোম চঙনা লুহোংবীখি ৷ মপা লায়েংবদা শেন অমত্তসু থাবা ঙমহৌদে, শিখিবনা হানখি ৷ লৈবাক্লৈ অমসুং মচানুপী অহল মচেচৌবীগী লিলা অঙকপনি ৷ অমরোমদা, তোম্বীসনাগী মবুংসু নুপীগী মতুং ইনখিদুনা মচলগী লুহোংবদা মতেং পাংলক্তে ৷ তোম্বীসনাগী মপা অশোনবদুনা হায়, ‘মমা মপা মশক খঙদব হূই লমশাদুগী ৱা ঐঙোন্দ পল্লক্কনু ৷ মদু ঐন পোকপ ইচা নত্তে ৷ ঐন শিরগ মাবু থাং পায়হনব য়াদে হায়রিবসিনি...’ ৷ ৱাফমসিনা ‘মা’গুম্বশিংবু মপা ওইবশিংনা করম্না খনবগে হায়বদু ফোঙদোকই ৷

‘অহানব অহীংগী সরপ্রাইজ’ হায়বা ৱারীমচা অসিগী ‘মা’না রাধাবু য়াম্না থাজজবনি ৷ ময়াম্বনা মতৈমগী মতুং ইন্দুনা চতখিবদুনা মরম ওইরগা মাগী নুপীদি অহল-লমন সেবা তৌগদবী, মিকোন নাউকোনগদবীনি খন্দুনা রাধাগা লুহোংজবনি ৷ লুহোংবগী অহানবা অহীং অদুমক্তদা শহরদা লৈবা মামতোনগী ফ্লেত অদু রাধানা ফংজহৌবগী চে অদু মাঙোন্দা পীরগা কৈদৌঙৈ চতসিগে হায়না হংবনি, রাধাদি খূদক্তুদা চতনীংলবনি ৷ মদুদা মানা ‘অদুবু রাধা, ঈমা পাবুংগ ৱা তানদন’ হায়জবনি ৷ রাধানা খুম্মী ‘ঐখোয়নীগী মরকসিদ অমুক কদায়দগী ঈমা পাবুংবু নপশিল্লক্লিবনো’ ৷ মী অতৈগা মান্নদবা নুপীনি খন্দুনা হরাও-হরাও তৌজরুবদু রাধাসু মতৈমগুম অমদি অতৈ নুপীগুম মনেম-মকুগা পূন্না লৈমিন্নীংদবা নুপী ওইরম্মী ৷

ৱারোইশিন

মনেম-মকু নত্ত্রগা মচিন-মনাউগা তোরো-খোদাননা, পূকচেল-খোয়জেল তিন্ননা লৈমিন্নবা ঙম্বা অসিনা মৌ অমগী অফবা মশক ওইনা মীতৈ খুনাইনা শীংথানরি ৷ ফীবমগী মখা পোন্না ‘ঘোরজমাই লৈবা’ (নুপী মপামদা লৈখিবা, য়াৱোং ইনবা) অসিসু চতনরক্লি ৷ অহল-লমনগী থৌজাল অমদি মীতয়েং মখাদা তোঙাননা চানবসু অফবনি ৷ মপানদা পূন্না লৈনীংলবসু অহল-লমনগী অয়াবা য়াওরগা লৈমিন্নগদবনি ৷ অহল-লমন লৈবশিংনা মখোয়বু ঈকাই খুম্ননা চতকদবনি ৷ মখোয়গী ৱা তাদনা মৌ অমনা ময়ূম পাল্লকপগা, মপুরোইবগা পূন্না তোঙান্না লৈনীংবা অমদি লৈনবা থৌরাং তৌরবদি মহাক্না মশাতবু নত্তনা মহাক্কী মমা-মপা, মবুং-মৌপ্বা, য়ূম্নাক শাগৈ, মরৈকায় য়াওনা পূম্নমকপু মিংদা থীহল্লি, নোরোক তাহল্লি ৷ হায়রিবা মখলগী নুপীশিং অসিনা খুনাইগী অয়াকপা মীচৈ তাবদা নত্তনা অৱা-অনা কয়াগী পোতলুম পুরগা লেমহৌরিবা পুন্সি লেনগল্লি ৷ মখোয়গী পুন্সিদা খুদোং থীবা কয়ানা মহূম শাগল্লি ৷ পুন্সিদা অকি-অখং কয়া নংগল্লি ৷ মচা-মশূশিংদসু তীনবানগল্লি ৷

মকু-মনেমগী সেবা ফংজবা অসিনা মৌ অদুগী মপামদা লৈহৌরিবা মমা-মপা, মবুং-মৌপ্বা, য়ূম্নাক শাগৈ অমসুং মরৈকায়গী মিংচত হেনগতহল্লি ৷ অহল-লমননা পেল্লবা অমদি থৌজানবিরবা মৌশিং অদুনা পুন্সি তোলোইনা মচা-মৱা সেবা ফংজদুনা, হরাও-তয়াম্না অমসুং নুঙাই-য়াইফনা পানবা ফংজৈ ৷ মনেম-মকুশিংনা মচা-মমৌবু হরাও-তয়াম্না, নুঙাই-য়াইফনা লৈবদু মমীতনা উজনীংই ৷ মদু উজবদা পূক্নীং লৈতানা মীত উইশিনবা ঙম্মী ৷ মখোয়না মবুক্নীং পেন্না থৌজানবিবদু পুন্সিনা তানশিনজবা অথোইবা লননি, মদু মাঙবা নাইদবনি ৷

মমা-মপা ওইবশিংনা মচানুপীশিংবু মতৌ অসিগুম্না য়াইফবী মৌ অমগী মশক ওইহনবা ঙম্বদু মখোয়না মচানুপী পোকচবগী অফবা মহয় লোকচবনি ৷ মখোয় চঙনা লাইরম্লেন ফংবনি ৷ মচানুপাশিংবুসু মকোয়গী অহল-লমননা লাইরিক-লাইসুদা ফাজিন-পুনশিন্দুনা থম্বীবগী মহূত্তা মীরক তিলহন্দুনা খুনাইগী চতন-লোনচতশিং খঙহন্দুনা মশাগী মপুন্সীগা শকখঙনহনবীগদবনি ৷ লাইরিক্তি মহৈশঙদা তম্মী অদুগা দিগ্রি ওইনা শকখঙচে অমা ফংই ৷ লাইশুদি মহৈশঙগী ৱাংমদা তম্মী অদুগা মী অমনা তানশিনবা ঙমজবদুমখৈ মহাক্কী দিগ্রি ওই, মসিদা শকখঙচে য়াওদে ৷ অদুবু পুন্সিনা হেন্না মরু ওইরিবদি শকখঙচে য়াওদবা দিগ্রিদুনি ৷ মাঙবা নাইবা শেল, মৈনা চাকখিগদবা শকখঙ-চে ময়ামদুদা নাপন তৌদুনা পুন্সিবু মশক খঙলুদবা হায়বসিনা তুংলমচততা পুরকপা মাঙজবা অদুদি অমুক হন্না মেনখতপা ঙম্লোইদবা অৱাতপদুনি ৷ মথক্তা পীজখিবা পাক চাউরবা লমগন অদুদা মৌ অমনা লেপ্পা ঙম্বা ওইসনু ৷

নুপা অমগী লোয়নবী, অঙাংশিংগী মমা ওইবখক্তনা মৌ অমগী অরোইবা পংখৈদু নত্তে ৷ মথক্তা পনজখিবা মিংথোল পূম্নমক্কী মমল পীবা ঙম্বী মৌদু য়াইফবীনি, লাইবক ফবীনি, ইনাক খুনবীনি, মরল লৈবীনি ৷ মাদি মপুরোইবগী চাউথোকচনীংঙাইদুনি, মচাশিংগী ফিদম্নীঙাইনি ৷ মনেম-মকুশিংনা হরাওনা হায়গনি ‘ঐগী ইমৌদি সনানি, মণি-মুক্তানি, ইচাদগী ইমৌনা হেল্লি, ঐখোয়না ইচা শেম্বদগী নখোয়গী ইমা-ইপানা নঙবু শেম্বীরকপনা হেল্লি ৷ নুঙাইজরো ইবেম, নঙনা ৱাগদবা শরুক পূম্বা ঐখোয়না পুখ্রগে, ঐখোয়গী নুঙাই-য়াইফবা শরুক পূম্বা নঙগী ওইজহৌরো’ ৷ মনেম-মকু লৈবা মৌ পূম্নমক্না মখোয়গী সেবা ফংজদুনা মপান নাইদ্রদবা অপেনবগী থৌজাল ফংবা ওইরসনু ৷

--------