ইমা ফজবী, নেশনেল হায়ৱে ৫৩ অমসুং ঐ

(লনাই ওইনা নোংমা পূনখিববু নীংশিংলগা ইবা)

Imphal Jiribam Lambi (New Cachar Road)

Imphal Jiribam Lambi (New Cachar Road)

মতমদু ইং ২০০৮ নত্ত্রগা ২০০৯ ওইরম্বা য়াই (য়াম্না কাউগল্লি)৷ ফোটো খরসু লৈখিবনি, মদুসু থম্ফম খঙদ্রে৷ পোক্নফম, শিলচরদা লৈরিঙৈ নোংমা ইমা ফজবী মাগী খোঙলোয় মরিগা পূন্না লাকখিবনি৷ পাউ ফংবগা, কেমেরা অমা পায়দুনা ঐগী গারি মচাদু তোংখতলগা শিলচরগী সদর থোং ফাওবা থৌৱি৷ হংনরবা মতুংদা খঙলে, মাঙদা লৈরিবা মীওই মঙা অসি ইম্ফালদগী শিলচরদা লাকখিবা ইমা ফজবীগী কাঙবু অদুনি৷

মখোয়গা পাউ ফাওনবদগী খঙবসি, মখোয়না নেশনেল হায়ৱে ৫৩ (হৌজিক্না ৩৭ কৌরগদবা)গী থবক পুরিবা মকোক (মমিং কাউরে) অদু উনবা লাকপনি৷ কসার কলেজ মনাক্তা লৈবা বি আর টি এফকী কেম্পতা চুমদ্রিং চঙলসি হায়দুনা চঙই৷ কর্মচারি মচাশিংনা খরদি ৱাহনখি৷ ঐহাক্কা পাউ ফাওনরবা মতুংদা মখোয়না ঐখোয়বু গেষ্ট রুমদা ফমহল্লগা চানবচিংবা শীনবিখি৷ মফমদুদা অৱা পোথানৈ৷ ঙাইহাক মতুংদা ঐখোয়না ঙাইরিবা মকোকতু লাক্লরোই, ছুটিদা লৈখি হায়বা পাউ তারে৷ লৈফমগী মরমদা হংই৷ ওটোদা ঙাঙনদুনা চতলি৷ অদুবু থৌরিবা নুপা অদুনা লান্না পুবদগী ওন্নরদুনা অমুক হন্দোক-হনজিন তৌবদা ইমা ফজবী য়াম্না শাউখি৷ কোন্নথংদা হংনবদগী খঙবা ঙম্লবা মতুংদা য়াম্না ৱানা মকোক অদুগী ক্বাটর য়ৌখি৷

মীতৈ অহল নুপী (হনুবী)গী হৌনবী- মীতৈরোনদা চৈর-চৈরদুনা মকোক অদুগী য়ূমদা চঙই৷ পাউ ফংলবদা মকোক অদুসু মাগী নুপীগা থোরক্তুনা ওকই৷ ইমা ফজবীনা মীতৈরোনদা ঙাঙল-ঙাঙলগা চঙশিনখিদুনা মকোক ওইরিবদুগী মনমদা ফূই৷ মকোক অদুসু নোক্ল-নোক্লদুনা মনমদু নোন্থরদুনা ফূহল্লি৷ খরা ফূরগা মমায়দমুক নানবী অদুগা লম্বী লাকপগী অৱাবা, ওফিসতা ঙাইরগা লাক্তবা, লম্বী লান্না চতলুবশিংদু পন্দুনা মীতৈরোনদা হায়৷ মকোক্তুসু নোক্না নোক্না তাই৷ অদুগা লোয়নরকপশিংদা হংই ‘করি হায়রিবনো’? মকোক অদুগী নুপী অদুসু চঙশিল্লক্তুনা ইমাগী মনাক্তা ফম্মী অদুগা মখূত্তু পায়শিনমিন্নৈ, নোংমা-নিনি নচাগীদা লৈখো, কোন্না চতলু...নচিংবা নুংশিনবগী ৱাফম ময়াম অমা হায়নদুনা ফম্মিন্নৈ৷ মতৌ অদুদগী খঙবা ঙম্বদি, ইমা ফজবীগা মখোয়গা হান্নদগী খঙনরক্লে, অদুগা মখোয় মশেন অমনা অমবু য়াম্নমক নক্ননা অমসুং ঈকাই খুম্ননা লোয়নৈ-লৈমিন্নৈ হায়বসিনি৷

কোন্নথংদা, লাকপগী মরম হংনৈ৷ ইমানা শাউৱি, ‘ঐনা লাকপবু অমুক করিগীনো হংই, ঐখোয়গী লম্বীসি কৈদৌঙৈ লোইশিনগে হায়রিবনো? কয়ানি অসুমাইনা তেক-তেক তৌদুনা লৈগদৌরিবনো?’ অসিনচিংবা মীতৈরোনদা ঙাক্তনি৷ লোয়নরকপশিংনা হন্দোক্তুনা খঙহল্লি, ৱারেংজরিবসু মরক-মরক্তা য়াওশিল্লি৷ মতমদুদা মকোক ওইরিবদুগী নুপীদু চা শেম্বা চঙখি৷

অকূপ্পা ৱা খন্নৈ, ২০১২ ফাওবদদি ইমা ফজবীনা পাম্বা মওংদা উবা ফংলগনি হায়না থাজবা পীনৈ৷ নোনে, নুংবানচিংবা মফমশিংদা ফমুং ১০ লৈবা গেষ্ট হাউস, ফমুং ২৫ লৈবা অনা লায়েংশঙ থম্বগী ৱাসু য়াওনৈ৷ বরাক থোং মনাক্তা লাইশঙ অমা শাগে মদুদা মণিপুরগী ঈশিংগী লাই অমগী মুর্তিসু থমগে৷ মুর্তি অদু মকোক অদুনা মশাগী মরন্নাই শেনফমদগী কতচবা ওইনা পুথোকচরমগে অসিনচিংবা হায়নখি৷

ৱারেংজরিবনা খনজখি৷ ইমা ফজবীসি অচম্বদি নত্তে অদুবু মাদি পাউচেদা করিদা অমত্তা উদে৷ মণিপুরদদি থবক তৌনরিবসি অয়াম্বনা পাউচেদা হাপ্নবগীদমক তৌবা ওইনা উই৷ পাউমী লাকপা মতমদা মখোয়গীদু উহনবা, ফোটো কাপ্পমদাইদা পোস শেম্নবা ঙাক্তনা অয়াম্বনি৷ নেশনেল হায়ৱে ৫৩গীদমক অসুম্না লন্নাই মীওই অমনা নত্ত্রগা সংস্থান অমনা লাক্তুনা উনরবা হায়বসিগী মরুমদা চেল্লিবা মমা লৈবাক নুংশিবা, মরমদমগীদমক খনজবা মতৌদু কয়াদা ঈকাই খুম্ননীংঙাই ওইরিবনো?

ৱারী কয়া’মা শাখিবনি ইমাগা৷ ইমানা নহা ওইরিঙৈ পুন্সিগী ৱারী কয়াসু লীথোকপীরম্বনি৷ নোংমদং উনবদো য়াম্না লুনা তৌবীরম্মী, ৱারীশিংসু ফনা য়াম্না লীবিরম্মী৷ ইমাবু কনানো হায়বদুদি চপ চানা খঙবা ঙমহৌদে৷ পাউগী মচল ওইবা ঙম্নবগী শানখিবা ৱারীদুদা য়ূম্ফম ওইরগা নোংঙাল্লকপগী পাউচেদদি য়াওহনজখিবনি৷ খনজখিবনি, ইমাগী মরমদা খঙনবা হোতনগে, ইমাগী মরমদা করিনো খরদং ইশিন্দুনা থমহৌগে৷

ফীবমগী মখা পোন্না লাপ্নরবা মতমসিদা ঙসিদি অমুক নীংসিংদুনসু খাওদোকখ্রবা লৌফমদা চিত্থ-নান্থহৌবা ফৌ-চরোং খরা খুনবগুম নীংশিংবা নত্তনা মপূং ওইবশিংদুদি লোইনা ঐগী নীংশিংবগী লৌবুক্তা হৌরমদ্রে৷ অদুবু ইমানা নেশনেল হায়ৱে ৫৩গীদমক নোংমা সোনিয়া গান্ধি উনরুবগী ফোটো অমা পাউচেদা য়াওরকপা থেংনরুবদগী অমুক হন্না নীংশিংহল্লকপনি৷ ইমা ফজবীগী পুন্সীনা নেশনেল হায়ৱে ৫৩গী মরু ওইবা খঙবা অসিগী মমল শীংথাদুনা লোইবা নাইরোই৷