য়ূম্বানবাঃ নুপা-নুপীগী চহীদা লৈবা অরাপ্পা

‘য়ূম্বানবা’ হায়বসী মীওই পুন্সী অমগী য়াম্নমক মরু ওইরবা, তৌদবা য়াদবা থৌদাং অমনি (হায়না লৌনৈ)৷ থৌদাং অসী লৌনবা হোতনবদা পাঙথোকপা খুনাইগী ওইবা থৌরম্বু ‘লুহোংবা’ হায়না খঙনৈ৷ ‘লুহোংবা’ হায়বসী ‘পা’ ওইবদা মতিক চারবা নুপা অমগা ‘পী’ ওইবদা মতিক চারবী নুপী অমগগী মরক্তা পুন্সী-লৈপুন শেম্বীবা অদুবুনি৷ মখোয়না ঈশ্বরগী য়াবিবগী মতুং ইন্না খুনাই অমসুং ইমুং-মনুং অমা শেমগতপগা লোয়ননা মীওইবগী তুংলমচত শেম্ননবা চাদা-নাউদা শন্দোকই৷

চাদা-নাউদা শন্দোকপগী থৌওং চত্থরকপা য়ানবা শেম্বা লৈপুন অসিদা নুপা অমনা নুপী অমগা য়ূম পাল্লি৷ য়ূম পানমিন্নরিবা নুপা-নুপী অনীদু তাইবংপানসিদা লৈরিবা নুপা অমগা নুপী অমগা হেক্তমক ওইবা য়াই৷ অদুম ওইনমক শাগৈ, জাত, কাঙলূপ, য়েক, শলাই, গোত্র, মায়গৈ, নুমিত, মপোক ময়ি, ফমনচিংবগী চান-চূনবা য়েংশিনবগুম্না নুপা-নুপীগী মরক্তা লৈনরিবা চহীগী অরাপ্পা, হনবা-হন্দবা হায়বসিসু চতনবীনা য়েংশিল্লি৷ মীতৈ য়ূম্বানদা ফংবা চহী খেন্নবগী মশকসি মখাগী অসুম্না থম্বা য়াই৷

১. নুপীনা হনবাঃ মীতৈ য়ূম্বানদা নুপীনা হনবসী লৌন-লৈনবা য়াদবা মশক ওইনা লৈবনি৷ নুপা অমগী পুন্সিদা মহাক্কী মমা তরেত লৈ হায়না হিন্দু শাস্ত্রনা তম্বী৷ মমা তরেতকী মনুংদা মশাদগী চহী হনবা নুপীশিংসিসু অমা ওইবনি৷ মরম অদুনা নুপীনা হনবগা য়ূম পান্নববু ‘মমা লৌবা শকই’ হায়দুনা ফত্তনা পন্নরম্লিবনি৷ মখোয়গী মচাশিংদু লাই-তিন অরুবশিংগী থবক-ইনখাংদা য়াওহন্নদে৷

অদুম ওইনমক, মীতৈ খুনাইদা নুপানা মশাগী চহীদগী হনবা নুপীশিংগা য়ূম পানমিন্নদুনা লৈমিন্নবা মরাং কায়না উরি৷ খুনাইনা য়ানীংদবা মফম থোক্লুরগনা ‘মমা শকপগা য়ূম্বানমিন্নবা’ হায়দুনা থীনা চৈবি, পাউথোকপী, ফনা শীংথাবিদে৷ য়ানবা মফম থোক্লুরগনা ‘নুপীনা হল্লগদি ইনাক খুল্লি/নুঙাই-য়াইফৈ’ হায়দুনা শৌগতপী, ফনা শোনবী৷

নুপীনা হনবগা য়ূম্বানমিন্নবসি মখাগী মরমশিংসিদগী ওইনা অয়াম্বনা ফংই-

১.ক. মশা-মশা য়ানবাঃ মশা-মশা য়ানরুবদগী, পাম্নরুবদগী, ফীবমগী মখা পোল্লুদবদগী চহীনা হল্লবসু অকায়বা ওইহন্দে৷ পূন্না য়ূম্বানমিন্নখি৷

১.খ. হায়ন-শীংনবাঃ হায়ন-শীংনবা মতমদা নুপাগী মমা-মপা অমত্তনা মমৌদু মচানুপাদগী চহী হনবা পামগন্দে৷ অদুবু নুপীগী মমা-মপানা মচানুপীগী চহী হন্থহল্লগা (কুঠি শেমদোক্লগা) থাজবিরকপা য়াওই৷

১.গ. লমচত লান্নরুবাঃ থংননা লৈমিন্নরুবদগী নুপা-নুপী অনীমক্না লমচত লানমিন্নরুবদগী চেনবা য়াদদুনা য়ূম্বানমিন্নখিবসু থেংনৈ৷ পাখঙ-লৈশাবীখক্তা নত্তনা পাখঙনা মতৈমা (নত্ত্রগা মতৈমা থোকপশিং) নত্ত্রগা লুখ্রাবী নত্ত্রগা মপুরোইবগা পান্নরিবী মৌশিংগা লমচত লান্নরুবদগী লৈমিন্নখিবসু থেংনৈ৷

২. চহী লেংগা মান্নবাঃ চহী লেঙ্গা মান্নবগা য়ূম পানমিন্নবসি অয়াম্বনা নুংশিনবা থুংনবা ঙাক্তা ওইনা তৌই৷ অঙাং ওইনা নুংশিবা খঙলকপা মতমদা মমান্নবা মমান্নবীশিংদা খোয়দানরুবা, থমোয় লান্থোক্নরুবনা মরম ওইরগা পন্থুং শেম্বা পাম্লুদুনা য়ূম্বানমিন্নরকপদা চহী লেঙ্গা মান্নবগা থোক্লুবনি৷ মরন-মথুম য়েংলগা য়াশিল্লুদুনা লৌনবসু য়াওদবা নত্তে৷

৩. নুপানা হনবাঃ মীতৈ য়ূম্বাল্লোননা খ্বাইদগী ফনা শীংথাবসী ‘য়ূম পানবদা নুপানা নুপীদগী চহী খরা হনবা’ হায়বসিনি৷ চহীদা লাপ্নবগী চাংসি মখাগী অসুম্না ফংই-

৩.ক. চহী ১-৫ (চতনরিবা)ঃ চহী মঙা ফাওবা খেন্নবসি অহল-লমনশিংনা য়াম্না পাম্মী৷ নুপীমচা নৌরিবী (চহী ১৬কী মখাদা লৈবী) শিংনদি চহী মঙা খেন্নবসি খেন্নরমালে হায়না খনগল্লি৷ মসিনা মপূং ফারক্তুনা মশাগী চহী ২৫ অমসুং লান্থোরক্লবশিংদি চহী ৩-৫ ফাওবা লাপ্নবসি য়াম্না পামগল্লি৷ য়ূম পানমিন্নবদা য়াম্নমক নুঙাইনা থোকই হায়না য়ানৈ৷

৩.খ. চহী ৬-১০ (খরা খেন্নবা)ঃ পাম্নজবা থোক্লুরবদি ৭-৮ ফাওবা ফরে হায়না অসুমক লৌনৈ৷ অদুবু চহী ১০রোম খেন্নরবদি ‘খরা খেন্নবা হায়বদু থোক্লে’ হায়না পন্নৈ৷ নুপানা পীক্তক চেংতকপা ওইরবদি নত্ত্রগা নুপীনা শাহৌ ফরবদি চহী ১০ খেন্নবসি য়াম্না খেন্নবা ওইনা উদে৷

হায়ন-শিংনবদা অহনশিংনা ফরে হায়নবা চহী মতাংসি ৩-৭ ফাওবা অসিনি৷ চহী ৩-৭ ফাওবদা নুপানা হনবসী য়াম্না ফৈ, মপা চানৈ, অমগা-অমগা য়াম্না নীংনগল্লি৷ মখোয় মশেন অমনা-অমদা য়াম্না চিংশিন্নগল্লি৷ য়াইফ-য়ূম্বানগী থুম-থোইরবা নুংশি ঈরূদু মখোয়না থকমিন্নজৈ৷

৩.গ. চহী ১১-১৫ (য়াম্না খেন্নবা)ঃ শাহৌ ফবা নুপী নত্ত্রগা পীক্তক চেংতকপা নুপা নত্তনদি চহী মতাং অসিসু য়াম্না খেন্নরে হায়না লৌনৈ৷ অহন-লমননসু খজিক চানমন্দ্রে হায়না খন্নৈ৷ অদুম ওইনমক, ফীবমগী মখা পোন্না য়ানরুবদগী লৌন-লৈনবা য়াওদবদি নত্তে৷ চহী অহন ওইরবা নুপা-নুপীদদি মসি থোইনা খন্নবা উদে৷

৩.ঘ. চহী ১৬-২০ (কা হেন্না খেন্নবা)ঃ ফীবমগী মখা পোন্না য়ানরুবা নত্তনদি চহী মতাং অসিফাওবা খেন্নবা মীতৈ (গৌরদা লৈবা) নুপা-নুপীনা য়ূম পান্নদে৷ নুপানসু নুপীদু অঙাংনি হায়না খনগল্লি, মতৌ অদুগুম্না, নুপীনসু অহল ওইমল্লে হায়না খনগল্লি৷ অদুবু, মশাগী চহী ৪৫ হেনখ্রবা নুপা নত্ত্রগা মশাগী চহী ৩৫ হেনখ্রবা নুপীশিংনদি (য়ূম্বাল্লুরবা নত্ত্রগা য়ূম্বান্দ্রিবশিং) চহী ১৬ নত্ত্রগা ২০গী লাপ্নবসি লুনা লৌরক্তে৷ মায়গৈ অমরোমদা, ওজা নত্ত্রগা বোস নত্ত্রগা নক্ননা লৈমিন্নরুবা য়াম্নমক মগুন লৈবা নুপাশিংদা মখোয়গী মগুন অদুনা নমহত্তুনা নত্ত্রগা নুপাদুগী পুন্সী মহীং অদুদা মীনুংশি পোক্লক্তুনা নুপীশিংনা য়ূম্বাল্লুবা য়াওই৷

৩.ঙ. চহী ২১- মথক (মপা-মচা)ঃ মসি কয়া ফনদি শীংথানদে৷ নুপা অদুবুনা ‘হনুথংদা ঙাওবা’ ‘নুপী অঙাংদা চোপ্পা’ অদুগা নুপী অদুবুনা ‘নুপা নহাদা ঙাওগনবী’ ওইনা থীনা ঙাঙনবী৷ মখোয়বু ‘মপা-মচা লৌনবা’ হায়নসু ফত্তনা শীংথানবিবা থেংনৈ৷ য়াম্না তাঙনবু ওইরবসু নুপা অমনা মচানুপীদগী হেন্না অঙাং ওইবা নুপীমচাগা য়ূম্বানমিন্নবা য়াওরি৷ মখোয়দু অয়াম্বনদি ময়ূম পাল্লুরবা নুপাশিং ওইগল্লি৷ পাখঙ ওইনা লৈবা নুপাশিংদদি মথক্কীগুম্না ওজা নত্ত্রগা বোস নত্ত্রগা নক্ননা লৈমিন্নরুবা য়াম্নমক মগুন লৈবা নুপাশিংদা মখোয়গী মগুন অদুনা নমহত্তুনা নত্ত্রগা নুপাদুগী পুন্সী মহীং অদুদা মীনুংশি পোক্লক্তুনা নুপীশিংনা য়ূম্বাল্লুবা থোকই৷

নক্ননা লৈমিন্নবদগী খঙনরকপা পুন্সীশিংনা চহীগী অরাপ্পদা অপনবা কয়া থোকহন্দে৷ মসিদা নুপা অদুনা থেঙনা ফিরেপ লৌবা অমসুং নুপী অদুনা কত্থোকপগী মশক অমা য়াওবা মানবদু তশেংনদি মখোয় অনীগী য়ানবা অদুদা পূমশূপ শূপ্পী৷ পূক্নীংনা খোয়দাবা অমসুং লৈতানা য়ূম্বানবগী মশক অমা শেমগতমিন্নবদা মখোয় অনীগী য়ানবা অদু মপাঙ্গল কন্না লৈরম্বসু য়াওবা থেংনৈ৷

য়ূম্বানবদা নুপানা নুপীদগী হনবগী কাঙলোন

য়ূম্বানমিন্নবদা নুপানা নুপীদগী চহী খরা হলহনবসী কাঙলোন অমনি৷ কাঙলোন অসিদা লৈরিবা মরম ময়ামগি মনুংদা মখাগীশিংসি শীংথানবা য়াই-

১.  হকচাংগী অমসুং ৱাখল-লৌশিংগী চাওখতলকপগী খোঙজেলসি নুপাদগীদি নুপীনা হেন্না য়াঙই৷ খোঙজেল অসিদা নুপানা তপ্না-তপ্না শোত্থহৌদুনা মশাগী চহীদগী চহী ৩-৭ ফাওবদা লৈহৌবা নুপীশিংগা চাউরাক্না মান্নরকই৷ মরম অদুনা, ৱাখল-লৌশিংদা খল মান্নবা নুপা-নুপীগা য়ূম পানমিন্নদুনা হেন্না য়াইফ-য়ূম্বাল পুন্সি অমা শেমগতপা ঙম্ননবগী থৌরাং ওইনা তৌই৷

২. চহীদা হনবনা মরম ওইরগা থকসি-খাসি, থৌগল্লোন-ব্যবহারদা নোল্লুকপা মতৌ লৈনা পানমিন্নবা য়ানবগী মতৌ য়াওই৷

৩. নুপানা ঙম্না পানবনা খুনাই নত্ত্রগা ইমুং-মনুং অমগী তংদু-লৈতাবা পুরকপদা খুদোং চাহল্লি হায়বগীদমক নুপানা হলহনবা মানবা মতৌসু য়াওই৷

৪. নুপা-নুপী অনীনা য়ূম্বী ওইদুনা শেমগতলকপা খুনাই নত্ত্রগা ইমুং-মনুং অমদা নুপানা মপূং ওইবা থৌদাং লৌবনা মরম ওইরগা মহাক্কা পানমিন্নগদৌরিবা নুপী অদুগী তেংবাং পাম্বদগী নুপানা হলহনবা ওইনা তৌই৷

৫. খুনাই নত্ত্রগা ইমুং-মনুংগী থৌশিলদা নুপীগী ৱাখল-লৌশিংনা লমজিংবা পামদবদগী মাঙোন্দগী চহীদা হনবা নুপাবু লমজিংহন্নবা হোতনবদগী নুপানা হলহনবা ওইনা তৌই৷

নুপীনা হনবগী খুরৌ

য়ূম্বানবদা নুপীনা হনবগী খুরৌ খরা লৈ৷ মখোয়শিংদুদি- ১. নুপীনা হান্না হনুশিনখিবা, ২. থকসি-খাসি থৌগল্লোন-ব্যবহার ৱাতপা মতৌ চেনবা, ৩. নুপাবু অঙাংগুম উশিত-থওইদবা মান্না লোয়নবা, ৪. নুপাগী পূক্নীংদা লৈতাবা ফংহন্দবা, ৫. নুপাদু শোন্দম-নাদমগনবা অসিনচিংবা৷

চহী লেঙ্গা মান্নবগী খুরৌ

নুপা-নুপী অনীনা চহী লেঙ্গা মান্নবগী খুরৌশিংদুদি- ১. মমান্নবা-মমান্নবী ওইবগী উশিতনদবা, ২. থকসি-খাসি থৌগল্লোন-ব্যবহার য়াম্না লৈনগন্দবা, ৩. চহী চতশিল্লক্লিবা মখৈ নুপীনা নুপাদা খন্বনবা হেল্লকপা, ৪. ইমুং-মনুং মনা-মনিল নাইগল্লকপা, ৫. নুপাদুগী তংদু লৈতাবা ৱাখল পরিং ফংগন্দবা, ৬. হকচাংগী মরীদা লাকপা অরাম-খৌরাংবদা নুপীনা হান্না হনুশিনখিদুনা খল মান্নদবা থোকপা, অসিনচিংবা৷

নুপানা কা হেন্না হনখিবগী খুরৌ

নুপানা কা হেন্না হনখিবগী খুরৌসু লৈ- ১. পাউ ফাওনবা ৱাতপা, ২. নুপীনা কে-মৌরকপদা খম্বনবা, ৩. য়ূম্বানবগী পাঙ্গলদা নুপীনা হেন্না কনখতলকপা, ৪. নুপাগী পূক্নীং লৈতাবা মতৌ মাঙলকপা, ৫ নুপীনা নুপা অতৈদা মীতয়েং থম্লকপদগী থোকপা ৱাথোকশিং মায়োক্নরকপা, ৬. নুপীনা ইশৌ-তোয়না লাংলক্লকপদগী ঈং-তপ্পা য়ূম্বান পুন্সী ওইরক্তবা অসিনচিংবা পনবা য়াই৷

খুরৌদগী কোক্নবা পাম্বৈশিং

খুরৌশিংসিনা য়ূম্বান পুন্সীদা তংদু-লৈতাহন্দদুনা খাইবুং-খাইবুং নাইনহন্দুনা হিংমিন্নবা কয়া অমা য়াওহল্লি৷ খরনা নুমিত তারক্লগা মাগী নুপীগা হীপমিন্নগনি হায়বা কি, খরনা মাগী নুপীগা হীপমিন্নবা ফংলোই খল্লুবদা খোইদৌ শাউগত্তুনা লৈকাই কোয়রগা লৈ, খরনা নুপীগী ইশৌ তানীংদদুনা মপান্দা লৈরগতা নুঙাই, খরনা ময়ূমদা হন্দ্রিমখৈ ফরে খন্দুনা মপান্দা লৈথোকই, খরনা খতনরুবা পামদদুনা তৌরিবমখৈ য়ারগা মীতম্বালগুম্না পুন্সী লেল্লি, খরনা মশাগী নুপীনা অতোপ্পগা ফম্লান্নবদু খঙশিন্নদদুনা লৈথোকই অসিনচিংবা৷ খরনা নুপী কোয়রকই, খরনা ওক্তবীশঙদা চতলি, খরনা য়ু থকই, খরনা জ্বার শান্নৈ, খরনা গঞ্জা ঙাওরগা লৈ, খরনা মরাল থি-থিদুনা ফূবী অসিনচিংবা৷ অসুম্না নুপা-নুপী য়ূম্বানমিন্নবগী মরীসি চেতলক্তে, হিকোম-হিকোম্মকই৷

নুপা অয়াম্বনা তংদু-লৈতাবা, তোরো-খোদাননা হিংমিন্নবা পুন্সি মরেল অমা পাম্মী৷ নুপীনা মহাকপু ইকাই খুম্নবা পাম্মী৷ মশাগী অশোনবদা ঈকাইহন্দবা, করেম-কথাইনদবা পাম্মী, অসিনচিংবা৷ নুপী অয়াম্বসু নুপাগী নুংশিবা পাম্মী, লুনা তৌবিবদু পাম্মী, মহাক্কী অনীংবদু খঙবীবা পাম্মী, মশাবু শেন্নবীবা, লোয়নবিবা পাম্মী, অসিনচিংবা৷ খূদিংমকসি খঙবা তাই, ‘য়ূম্বাল্লোনদি লৈঙোই চোচ্রোবীদগীসু হেন্না কূপ্পী’ হায়রগা মীতৈনা ইপৌ-পৌনা হেক্তা য়ূম পান্নৈ৷ মরম অসিদগীসু খুরৌ ময়ামসি থোক্লিবনি৷ খুরৌসি কোক্ননবগী পাম্বৈ খরদি-

১. খুনাই অমগী তমজনীংঙাই ওইবা য়ূম্বান-কাঙলোন অদু মতম-মতমগী ওইনা চানহন্দুনা হৌরক্লিবা মীরোলদা খঙহন্নবগী পাম্বৈ লৈগদবনি৷

১.ক. থৱায়গী পুন্সী চাওখতনবা তম্ফম লৈগদবনি৷

১.খ. য়াইফ-য়ূম্বানগা মরী লৈনবা লাইরিক ফংহনবীগদবনি৷

১.গ. লমচত-শাজত শেমগতপদা মতেং ওইগদবা লাইরিকশিং মরাং কায়না ফংহনগদবনি৷

১.ঘ. য়ূম্বান্দ্রিবা নহাশিংদা অতেনবা মখলগী মহৈ-মশিং পীফম মহৈকোল লৈগদবনি৷

১.ঙ. চতনরোল খঙহন্নবা পাম্বৈ লৈজগদবনি৷

২. মমা-মপানা মচাশিংবু য়াইফ-য়ূম্বানগী মরমদা খঙহনবিরক্কদবনি৷ মখোয়গী মনুংদা-

২.ক. থৱায়গী মরীদা চাওখতনবা মচিঞ্জাক পীজবিগদবনি৷

২.খ. লমচত-শাজত, থৌগল্লোন-ব্যবহার তম্বিরক্কদবনি৷

২.গ. তমজনফম ওইবা মতৈ-মনাউশিংগী পুন্সী ৱারী তাবা ফংহনবিগদবনি৷

২.ঘ. য়ুথ লিদরসিপ ত্রেনিংশিং লৌহনবীগদবনি৷

২.ঙ. অপাম্বা কলা নত্ত্রগা শান্ন-খোতনবদা পূক্নীং চঙহনবিগদবনি৷

৩. নুপা-নুপী মশানা মশাবু মতিক চাহঞ্জগদবনি৷

৩.ক. থৱায়গী পুন্সী চাওখতহনগদবনি৷

৩.খ. চতনবীনা তম্বিবা থৌগল্লোন-ব্যবহারদা অতৈনা তমজনফম ওইগদবনি৷

৩.গ. লিদরসিপ ত্রেনিং কোর্সগুম্বা তোয়না য়াওবিগদবনি৷

৩.ঘ. কলা অমদা নত্ত্রগা শান্ন-খোতনবদা অমদা পূক্নীং চঙবীগদবনি৷

৩.ঙ. পুন্সিসি থাজরিবা ঈশ্বর অমসুং ইপা-ইমাগী অফবা খূদম ওইনা হিংবিগদবনি৷

৪. য়ূম্বানমিন্নরিবা অনীমক্না তৌমিন্নবিগদবা ময়ামগী মনুংদা পনবা য়াবা খরদি-

৪.ক. মখোয় অনীনা য়ূম্বানমিন্নবসি লাইনিংথৌগী অনীংবদগীনি হায়বা খঙমিন্নরবা মতুংদা থাগত্তুনা অমসুং হরাওবা ফোঙদোক্তুনা খুরুম্মিন্নবা৷

৪.খ. নোংমগী পুন্সিদা থোকখিবা থৌদোকশিং নীংশিংমিন্নদুনা – হরাও-তয়াম্বদা থাগতমিন্নবা অমসুং শোয়খি-লানখিবদা ঙাকপীনবা হায়জমিন্নবগা লোয়ননা শেমদোকমিন্নবা৷

৪.গ. মরূপ-মপাং, শাগৈ-নাতৈ, মরী-মতানা অৱাবা তাবদা মতেং পাংমিন্নবগা লোয়ননা ঈশ্বরদা হায়জমিন্নবা৷ (হায়জমিন্নবদা অঙাংশিং লৈরবদি য়াওহনবিগদবনি অমসুং হায়জমিন্নরিবা অতৈনসু তানবা খোঞ্জেল থোক্না হায়জবিগদবনি অমসুং থাগত-ৱারোল পীবিগদবনি৷)

৪.ঘ. মপুরোইবশিংগী মপান্দগী মাগী নুপীগী অফবা মিংচত পুরকসনু অমসুং লোয়নবীশিংনসু মপুরোইবগী মিংচত হেন্না লৈহনসনু৷ নুপাদু য়েংলগা নুপীদু ফনা শীংথাসনু অদুগুম্না নুপীদু য়েংলগা নুপাদু ফনা শীংথাসনু৷

৪.ঙ. নোল্লুকপা অমসুং পূকচেল শেংনবা মতৌনা খুরৌশিং পূম্বা কোক্নবা মরম ওইসনু৷ চহী মতাং খেন্নবদা লৈবা খুরৌশিং পূম্বা মশেনগী মরক্তা লৈবা য়ানবা, নীংনবা, নুংশিনবা, ফনা খন্নবা অমসুং হায়জমিন্নবগী মপান্না কোক্নবা পাম্বৈসু ওইসনু৷