খুনাই মীরোল অমগী মখল-মথেল ৱারী

(বিদিতকী ­‘মপুরোইবা অমা লৈরম্বদুমদি’)

চাংখ্রময়ূম বিদিতকুমার

ইং ১৯৬২গী নবেম্বর ১দা চাংখ্রময়ূম বিদিতকুমার কসারগী সিঙ্গেরবন্দদা পোকই ৷ চাংখ্রময়ূম গৌরমণি অমসুং থৌদাম নিঙোল চাংখ্রময়ূম ওঙবী কুঞ্জলতা দেবী অনীগী অনীসুবা মচানুপানি ৷ হৌজিক-হৌজিক ইংলিশ ষ্কুল অমদা ওজা ওইনা থৌ পুরি ৷ মহাক্না মণিপুরী সাহিত্যগী তাইবংদা ‘কৌজেং অমসুং ককচেং’ (২০০০, অঙাংগী শৈরেং), ‘সনাগী তকমান’ (২০০৪, অঙাংগী ৱারী) অমসুং ‘মরৌশিং লৈবা তেনৱা অমুরৈ’ (২০০৮, অঙাংগী ৱারী) খূদোল তৌখ্রে ৷ তোঙান-তোঙানবা পাউচে অমসুং চেফোঙশিংদা মহাক্কী খূতই উবা ফংই ৷ ৱারীমচা হেন্দান্নবা অমদা চাংখ্রময়ূম বিদিতকুমারনা ‘খাইদেম অরুনাতোম্বী মনা’ ইং ২০০৫ দা ফংখি ৷

বরাক তম্পাকতা নহা অইবা মীরোলগী মনুংদা বিদিতকুমার য়াম্নমক শীংথানীংঙাই ওইবা নহা খোরিরোলমী (খোরিরোয়) অমনি ৷ মহাক্না মীতৈ খোরিরোলদা মরু ওইনা অঙাংগী খোরিরোল চাওখতহনবদা অচৌবা থৌদাং লৌরি ৷ খোরিরোলগী তোঙান-তোঙানবা লূপশিংগা খূতশম্নদুনা চতমিন্নরিবা বিদিতকুমার ঈশৈদা য়াম্নমক ঙাওজবা মীওই অমনি, শৈশকপসুনি, মশামক হিন্দুষ্ঠানি শাস্ত্রিয় সঙ্গিত বিসারদ অমসুনি ৷

‘মপুরোইবা অমা লৈরম্বদুমদি’

লাইরিক অসি ইং ১৯৯৩ দগীনা ২০১০ ফাওবগী মনুংদা ইখিবা ৱারীমচা ৭৮ গী অপূনবা মশক অমনি ৷ পূন্না লামায় ১৬০+ পাল্লি ৷ মমল লুপা ৯৯ পী ৷ রাইতর্স গিল্দ, লক্ষিপুরগীদমক চাংখ্রময়ূম ওঙবী মণিতোম্বীনা ইং ২০১১দা ফোঙবনি ৷ লাইরিক অসিগী মতাংদা অইবা মশানা হায়জৈ, ‘মীওইবগী পুন্সিদা অৱাবা নুঙাইবা, নোক্নীংবা কপ্নীংবা, পূকচেল চাউবা পীকপা, মীনুংসি লৈবা লৈতবা, থৌদোক-ৱাথোক কয়ানি ৷ ময়াম অসিগী মওং মতৌদুনা থমোয়দা ফাওরকপা মতমদা তেন্তকনা ৱারীমচা ওইনা ইজখিবনি ৷’ (অইবগী ৱাহৈ খরা)

খুনাই অমদা হিংলিবা মীওই পুন্সি অমনা মখল-মথেলগী থৌদোক কয়ামরোমগা হকথেংনৈ ৷ পুন্সি অদুগী অকোইবদা থোকপা থৌদোকশিংদসু মহাক্না নাকোইননবু ওইরবসু য়াওশিল্লুই ৷ য়াওশিল্লুবমক নত্ত্রবসু তাশিল্লুই ৷ অসিগুম্বা মশীং থীঙমদ্রবা থৌদোক ৱারী ময়ামশিংসিগী মনুংদগী অখন্নবা ৱারী ৭৮ খক্নি ঐখোয়না ‘মপুরোইবা অমা লৈরম্বদুমদি’ হায়বা লাইরিক অসিদা উবা ফংলিবসি ৷ লাইরিক অসিদা হিংমিন্নবা ঙমদবা নত্ত্রগা ফংদবা, অৱা-অনা, লৈত-লায়র, মাঙলোমদা চতখতপা ঙমদবা, ইমুং-মনুং পুবা ঙম্লক্তবা, শেতন খাইনবা, তঙদু লৈতাদবা, থুংনদবা অসিনচিংবা অৱাবনা থল্লবা ৱারী কয়াদি মীনুংশিগা লোয়ননা য়েক্লম্বা থেংনৈ ৷

মখল মথেলগী য়ামখ্রবা ৱারী ময়াম অমা লীরিবা অসিগী মনুংদা মরু ওইবা খরদং লৌখত্তুনা নৈনরবদি ঐখোয়না অহানবদা থেংনরিবসি – হিংবগী লানফমদা প্রাইভেত ইংলিশ ষ্কুল অমদা তোলোব য়ামদনা ওজা ওইবশিংগী পুন্সিগী মরমদা ইবা ৱারীশিং অসিনি ৷ লাইরিক অসিদা য়াওরিবা ওজাশিংসি ওজা অমা ওই হায়বগী নুঙাইনিঙাই অমত্তা লৈতবা ঙাক্তা ওইনা তৌই ৷ ইংলিশ ষ্কুলদা ওজা ওইরগা থাদা তলব ১৫০০ খক্তং ফংবনা য়ূম পুবা ঙমদবদা মপূক্নীং শোন্থরবা ওজা অমনি ‘মোঙফমথক্কী জগোয়’ ৱারীমচাগী ওজা অসি ৷ ওজা অসিনা হায় –

‘খঙদ্রে অতো, মাগী-মাগী মখোঙনা লেপচবা ঙম্ননবা হোতনবসিসু মহৈ-মশিংগী পান্দমনি ৷ সমাজদা হিংবদা চানরিব্রা খঙদ্রে, নীং ওন্থোকখিবদা তিনশীত-মায়শীতনরিব্রা খঙদে ৷ অচুম্বা অফবা শিনফমদি ওজানি ৷ অদুবু চাক চারা অমা পূক থন্না ফংদ্রগদি কৈদৌনরুনি ৷ হোবীগী হিসাবনদি য়ারক্তবা ৷ প্রাইভেট ষ্কুলগী ওজা থাদা লুপা ১৫০০ সিনদি ইমুংগী থুম-থাউ, চেঙ চাক, হাবী-জাবী পুবা থাংবা ঙম্লক্তবদো’ ৷

ইমুং-মনুং অমসুং মচাশিংবু পীজ-পীথক ঙমদবা, অৱাতপনা হেনজিল্লকপদগী মশাগী ইথিক্স মাঙহনবা তারকপা ওজা মাঙ্গোলজাউগী ফীবম ‘অৱামন’ কৌবা ৱারীমচাদা ঊতলি ৷ ওজা চাউবীগী নুঙাইরবা ৱারী খরা ‘ওজা চাউবী’, ‘ইংরাজি পেরিওদ’, ‘ওজা চাউবীগী অরোইবা ক্লাশ’, ‘থবক তোকওগী চে’ হায়বা ৱারীমচাশিংদা য়াওই ৷ লাইরিক অসিদা ‘ঐ’ সেল্ফনা ওজা ওইবা ৱারী (শান্নপোত, ঙহাক্তং পল্লম্বসিদা, মহাও য়াওরিবরনে হিংবসিবু) খরসু য়াওরি ৷ মচাগী অপাম্বা পীবা ঙম্নবা হোতনবদা ঈকাইনীংঙাই ওইবা থবক (অতোপ্পনা লৈরকপা অঙাংগী শান্নপোত অদু লোন্না পুরুবা) ‘শান্নপোত’কী ‘ঐ’ হায়রিবা ওজা অসিনা তৌরুই ৷ বেতোন য়ামদবা ওজাশিংসি মপূকচেলদি চাউই হায়বসি ‘ঙহাক্তং পল্লম্বসিদা’ হায়বা ৱারীমচাগী ওজা অসিনা ঊতলি ৷ তোলোব লীকমনবনা তন্থহল্লবা, মশাগী মরন্নাই অমদি ওজা ওইবগী পুন্সিবু মরেক মহাও থোকহন্দ্রবা, হঞ্জানরবা ‘ঐ’ অমগী শক্তম ‘মহাও য়াওরিবরনে হিংবসিবু’ হায়বা ৱারীমচা অসিদা য়েকই ৷ পঞ্জখ্রিবা ওজাশিং অসি হৌজিক্কী মতম অসিদা য়াম্নমক অৱাবা ফীবম অমদা হিংলি হায়বসি ঊতলি ৷ ওজাশিং অসি অপাবগী মীনুংশি শোয়দনা ফংগনি ৷

লাইরিক অসিদা য়েক্লিবা অতোপ্পা লমচত অমদি ঈশৈদা য়াম্নমক ঙাওজবা মীওইশিং অসিনি ৷ মীওইশিং অসি ‘ঐ’ হায়রিবা লমচত অসিনা ওই ৷ ‘দেবজানি’ কৌবা ৱারীমচাদা ঐ অসিনা নেহরু কলেজদা ঈশৈ শকপা চতলি ৷ ‘ইমিং চতচনীংবসিনা’ অমসুং ‘শাউবা চতনদ্রে’ হায়বা ৱারীমচাদা ঈশৈদা ঙাওজবা অহল অমগী মশক ঊতলি ৷ ‘ঈশৈদা ঙাওজবা’ হায়বা ৱারীমচাগী মীওই অসিনা ঈশৈদা ঙাওজবসি মচাগী হোরলিক্স লৈনবা খাকচবা শেনফম অদু কাইথোক্লগা দিষ্ট্রিক লাইব্রেরিদা পাঙথোকপা নুমিত নিনিগী ঈশৈ হেন্দান্নবদু য়াওরুই ৷ ‘ঙহাক্তং পল্লম্বসিদা’ হায়বসিদা হার্মোনিয়ম অমতং লৈজনীংবা অমসুং ‘ঐসু ঈশৈ শকচহৌরে’দা ‘ঐ’না পাহারীগী ঈশৈ অমা মীয়াম মমাঙদা লান্থোক্লুবগী মোন্দা নুঙাইবা মতৌ ঊতলি ৷ শৈশকপা অসিনা য়াম্না মরু ওইবা ৱাফম অনীখক পল্লি ৷ মদুদি- অহানবদা, মতিক চাবা কলাকার অমনা চেনগদৌবা গুন অসি- ‘খোঞ্জেল ফবা, ঈশৈগী জ্ঞান নীংথিজনা তমশিনবা, গুরুগী নাক্তা ফমদুনা খঙলকপা হৈরকপা কয়া মপুং ফাননবা ঔরাইজবা, অমতংগা হাপচনীংই কথোকপগী পূকচেল চেনবা’ অসিনা ওইগদবনি অমসুং অনীশুবদা, কলাকার অমগী পামজবসি - ‘ঈশৈগী লম্বীদা ইমিং শেগাক শেতনা ফাওবা মিহৌজদে, মনা মথুম ফংদুনতা লৈবা মদুসু পামজদে ৷ ঐনা মসিমতং পাম্মী অনৌ-অনৌবা, মখল-মখলগী শৈহেক-শৈদা ওইগেরা, মীয়ামগী থমোয়বু মীকুপ অমতং পোথাহনবা ঙম্বা, তাইবং শেম্বা মপুবু নুংশিহনবা ঙম্বা, ঈরৈবাক ইজাতিবু নুংশিনা লাতচবা ঙম্বা’ অসিনি হায়বা ঊতলি ৷ ঈশৈদা ঙাওজবতা নত্তনা সাহিত্যদা ঙাওজবা মোইরাংথেম চাওবা (অসিনচিংবা হায়রগা য়ারোই) অমসুং মশাগী নুপীনা মমল থম্বীদবা মনা ফংলকপা ‘ঐ’ (মনা) গী ৱারী ই ৷ ‘ঐ’(মনা)গী নুপী কেথবীগী দাবিদি – শেন থোকপা, ইমুং মনুং পুবা ঙম্বা অদুনি, সাহিত্য তৌদুনা নামত মাঙবদু নত্তে ৷

য়ু অমসুং নত্ত্রগা জ্বারদা ঙাওদুনা মশাগী মপুন্সি মাঙহনজবা চাউস্না (মপুরোইবা অমা লৈরম্বদুমদি), বুঙোথোই (চৈথেংনরবী) অমসুং তেম্বা (ঙা মরূনা য়ুবা)গী ৱারীসু লাইরিক অসিদা য়াওরি ৷ য়ু থকপা অমসুং জ্বার শান্নবগী ৱারী অসি অইবনা য়াম্নমক হকচিন্না লৌদুনা মহাক্কী লাইরিক অসিদা ইরম্বা থেংনৈ ৷ লাইরিককী মিংথোল ওইরিবা ৱারীমচা অসিমক্তদা চাউস্নানা য়ু থকমনবদগী নোংমা লম্বীগী খুদোং থীবা অমদা নোংমন্নখি ৷ মহাক্না লৈখিদবা মতমদা মহাক্কী চহী নৌরিবী লোয়নবী অমসুং পীক্লিবা মচানুপী থনম্মী ৷ অসুম্না মপা ওইবশিংনা য়ু ঙাওদুনা লম্বীদা তারগা লৈবদা পীক্লিবা মচাশিংবু মমান্নবা মমান্নবীশিংগী মমাঙদা ঈকাই ফিরুকসু খুমহল্লি ৷ য়ূমথংনবনসু নুংশিদে, মশাগী নুপীদসু অরুম্বা কোকথোং ওই ৷ মায়গৈ অমরোমদা, অহনথংদা য়ূম পাল্লুবা চান্দবাবু (মমা মচাদুবুনে)না পীক্লিবা মচা অমসুং নহা ওইরিবী লোয়নবীবু হুন্দোক্লম্বা তাবা অমসুং নুপী অতোম্বী লৌরগা নুপী অহন অমসুং মচাবু কাউথোকখ্রবা কুঞ্জমনি (পাপা নঙ য়াম ফত্তে)গী শক্তমসু য়েক্লি ৷

লাইরিক অসিদা তোঙান-তোঙানবা নুপীগী শক্তম কয়া অমসু য়াওরি ৷ মখোয় খরদি – য়ু থক্তুনা মপুন্সি মাঙহনজখ্রবা চাউস্নাগী নুপী চাউবীস্না (মপুরোইবা অমা লৈরম্বদুমদি), অসুম্না য়ু অমসুং জ্বারদা লায়চুরবা তেম্বগী নুপী তেম্বী (ঙা মরূনা য়ুবা)সুনি ৷ নাকন অমরোমদা, লৈহাওবী (চৈথেঙনরবী)সু য়ু ঙাওবা বুঙোথোইদা য়ূম পাল্লুবগী অৱা চৈথেং নংলবী য়ূমগী মৌনি ৷

থারিকথা (ঐতনা পামজরুবগী ৱানি)দি প্রতাপতনা নুংশিজবা অদুগা অতোপ্পদা য়ূম পানখিবী নুপীনি, থাজমানবী (মঙলান্দা লাক্লম্লিবদুবু)না ‘ঐ’গা থুংনহৌদবীনি ৷ দেবজানি (দেবজানি) দি খুল্লক্তা মীগী ফৌসু চেঙসু য়াওরুরগা মচা-মসু থাক্তুনা ইমুং-মনুং পুরিবী কুলি নুপীনি ৷ রাসমনি (মমা মচাদুবুনে)না অহল ওইরবা চান্দবাবুদা য়ূম পাল্লক্লগা পীক্লিবা অঙাং অমগা লৈহৌগদবা পুন্সি অমনি ৷ লৈবাক্লৈ (নমথাক)দি মীনম-নমথাক, তাত-পাত তৌদুনা হিংবা হৈবী নুপীনি ৷ ইন্দোন তরুবী (কুন্দো পরেং)না হৌখ্রবা পুন্সিবু নীংশিংলগা লেমহৌরিবা পুন্সি লোইবা ঙাইরিবীনি ৷

থোংদগী ওন্থবা থৌদোক অমদগী অঙাওবী ওইহৌরবী ইবোক থারিকথা (ইবোক থারিকথা) য়াম্নমক নুংশিবা লমচতনি ৷ মহাক্না ঙাওদ্রিঙৈ মতমদা মচাশিংবু মী ওইহনবা ঙম্নবা পুন্সিগা কন্না লান্থেংনরম্মী অদুবু মচাশিংদুনা মী ওইখ্রবা মতমদদি মমাবু অঙাওবী ওইবদু য়েংশিনবিদবতা নত্তনা চাক্নী-ফিনিবীসু ওইহল্লি ৷ নাকন অমরোমদা, লুখ্রাবী চাউবীতোন (লুখ্রাবী চাউবীতোন)না সমাজ অসিদা মতৌ করম্না হিংলিবগে হায়বদু ঊতলি ৷ চাউবিতোননা মচা অনীবু মী ওইনবা শেম্বা পামজৈ মদুগীদমক লৈখিদ্রবা মপুরোইবগী মিরেলবু কোনজদুনা বোর অমদি থৌনা পীবিনবা থৌনিজৈ ৷ নাকন অমরোমদনা অহল ওইরবা নবঘনশ্যাম অমসুং ইনাক খুনবা সেল্লুংবা কয়াগী অরানবা মীতয়েংনা লুখ্রাবীদা য়েংলিবা তূকতচনীংঙাই ওইরবা মীতয়েংশিংদু চাউবীতোননা মায়োক্নৈ ৷ অদুম ওইনমক পূম্নমক অসিবু মায়োক্ন-মায়োক্নদুনা চাউবীতোননা মচা অনী মী ওইনবগীদমক লান্থেংনরি ৷ পুন্সিবু পাম্বৈ য়াওদনা লান্থেংনরিবী অমনা নুংশিরৈ (ময়াক য়াওদ্রবা পুন্সিগী আশা)নি ৷ মশাগা চানজবা থবক অমতংগীদমক কন্না হোতনরি ৷ অসোমদনা থবকসু ফংদে, চহীসু য়ামশিল্লকই অদুগা মমাসু শোনজিল্লকই ৷ মচানা তোলোব চাদুনা মফম অমা খঙনা লৈহৌবদু মমানা পাম্মী অদুবু থাজবদি অসুম-অসুম লাপথোকখি ৷ মমাসু লৈখিদে, ময়াম চঙদুনা মথৌ মঙম লোইশিনবিখি অদুবু লৈশাবী, থবক ফংদবী, কনা লৈজদ্রবী অদুদি খুঙ্গংদুদা ময়াক য়াওদ্রবা পুন্সিগী আশা অমদা হিংহৌরি ৷

মায়কৈ অমরোমদা থোকচাওগী নুপী চান্দনি (চান্দনি)না মপুরোইবা লৈনা-লৈনা অতোপ্পা নুপাগা লমচত কাম্মিন্নৈ ৷ কয়ারকসু খাইনরুই, অমুক অসুমক মপুরোইবনা লৌরুই ৷ লৈকাইনসু কয়ারক ৱারকই, হনবা লৈতে ৷ লমচত কাম্মিন্নবা হায়রগা অঙাং ১০গী মমা ওইরিবী দোহার থোকচাউগী নুপী রাশেশ্বরি (সোরাত বার্তোন)সু গোবিন্দ কৌবা নুপা অমগা লমচত কাম্মিন্নরম্মী ৷ মপুরোইবনা মপান থোক্তুনা হরি নাম শোল্লিঙৈদা মহাক্না য়ূমদা গোবিন্দ কৌবা অমগা ফম্লানমিন্নরম্মী ৷ মায়গৈ অমরোমদা, মশা ৱারকপা ঙমদবী চাউবী (ততখ্রবা তেলঙ্গা)সু মচা-মৱা থাদোক্লগা অতোপ্পগী মতুং ইনখি ৷ মপুরোইবনদি মচাশিংগী খন্দুনা অমুক হল্লক্লবদি লৌশিনগে হায়না খল্লি ৷

দাশিনি (অৱামন) হায়রিবী মমা অসিনা লৈত-লায়রনা হেনজিমল্লকপদগী মীগী পোতথেন-পোতকত পামখতলকপী ওজাগী নুপী ওইরকই ৷ মিনা (পাইথোকখ্রবা পোম্বী)না নৱাংনরুদুনা য়ূম্বানববু শান্নপোতকুম লৌরগা মপুরোইববু থাদোক্তুনা মপামদা চতলুই ৷ অদুবু য়ূম্বানখ্রবী নুপী অমগী মফম খঙলক্লবদা অমুক হল্লকখি অমসুং মপুরোইবগী মখোঙদা তুদুনা হায়জরৈ ৷ অদুবু ৱারৌখিবা মপুরোইবনা মহাকপু অমুক লৌশিনবা ঙমখিদে, মহাকপু য়ূমদা থনম্লগা লমফৈদা চতখি ৷ মীতকূপ অমা চেকশিলহৌদবদা পুন্সি চূপ্পসিমগী ওইনা মপুরোইববু মাঙজবা তাখি ৷ মণিমালা (পাপা নঙ য়াম ফত্তে) হায়রিবা অঙাং অসি য়াম্নমক নুংশি ৷ মমা অতোম্বীগীদা লৈখ্রবা মপা থিবা চতপদা লমখাঙদা পুন্সি লোম্মী ৷ মপুরোইবনা ইনাকখুনবীগা লৈমিন্নখিবনা মরম ওইরগা মণিমালাগী মমা মধুবালানা মরাইবক থীবী ওইহৌই ৷ মসিনা মরম ওইরগা পীক্লিবা নুপীমচা মণিমালানা মনুং-মতম চাদনা তাইবং থাদোক্নবা মরম ওইখি ৷ নুপী অতোম্বী লৌবনা ইমুং-মনুংদা পুরকপা মাঙজবদু ঊতলি ৷ মপুরোইবনা থাদোকপীরবী নুপী অমনা লৈবাক্লৈ (ইচাগীদমক ঐ হিংদবা য়াদে)নি ৷ পোতফম থংনবী থরোঙৌবীনা বুঙোমপা লাক্লম্বগী ৱা তম্মী অদুবু মচাগীদমক খনবদা লমন খুম্নীংবগী ৱাখল ফাওরক্লবসু তূমিন্না খাঙজিন্দুনা লৈখিবী মমানি ৷ অইবনা অফবা য়ূম্বান পুন্সি অমা পামজবগী লাংতক্নবদু ৱারীশিংসিদা য়াওই ৷

লাইরিক অসিদা মপুরোইবনা সাহিত্য কলাদা ঙাওজববু শৌগত্তবা নুপী ওইনা অহন ওইরবী কেতুকি (অসিনচিংবা হায়রগা য়ারোই) অমসুং কেথবী (মনা) য়েকই ৷ কেথবীদি কেতুকিগুম্না তন্দুনা তূমিন লৈথোকখিবা নুপী নত্তে, মাগী পুন্সিসু শাংনা চতকদবা ৱাতলি ৷ মরম অদুনা ৱা ঙাঙঙকই, অশেংবা ৱাফম অমা শেংদোক্নরসি হায়দুনা দাবী তৌরকই-

‘অশেংবা অমা হায়য়ু নঙ সাহিত্যগী মীফম য়াওখিগদ্রা, করিগী মনানো হৈনৌরা, পুংতোনলা, চফোনলা, থৈবোংলা অদুগুম্বা মনাদুনা হিংবা য়াগদৌরিবরা? ঐ পামদে, হিংনবা নিপা থোকপা থবক তৌ, শেন থোক্নবা লম্বী থিউ, নঙগী থাগত ৱাহৈগী চেনাদু ঐঙোন্দা কৈদৌ হায়নো, কান্নদে-কান্নদে, ঐবু থাকপা ঙম্লোই হায়রগনা খাইনরসি’ ৷

বিদিতকী লাইরিক অসিদা অঙাং খরসু য়াওরি ৷ মখোয়শিংদুদি - ষ্কুলগী অঙাংশিং, ‘মপুরোইবা অমা লৈরম্বদুদি’গী চহী ৮তা ফারিবা মেমি, ‘অৱামন’দা ওজা মাঙ্গোলজাউগী মচাশিং, ‘ঙা মরুনা য়ুবা’গী চহী অমহুমতা ঙায়রিবা সনামনিসু কৌবা মণিমতুম, ‘অসিনচিংবা হায়রগা য়ারোই’গী ঙান্থোই, ‘মমা মচাদুবুনে’গী পুন্সিবা, ‘পাপা নঙ য়াম ফত্তে’গী মনিমালা, ‘ব্লক বোর্দ’কী বোবো, ‘শান্নপোত’কী ওজাগী মচানুপা, ‘ততখ্রবা তেলঙ্গা’গী ঐগী মচাশিং, ‘কনাদা পাবো কৌগনি’গী চাউথোই অসিনচিংবনি ৷ অঙাংশিংসি অয়াম্বনা শেতপা-চাবা মনীং থুংদবা, মমা-মপাগা হরাও-তয়াম্না লৈমিন্নবা ফংদবা, শেতন-খাইনবগী চৈথেং ফংলবা, মঙালগী তুংলমচত ফংদ্রবা ঙাক্তনা অয়াম্বনি ৷ অঙাংশিংসিদা মঙালগী তুংলমচত অমা ফংহনগে হায়রবদি – মমা-মপা, কৈরোয়-লৈকাই, মহৈশঙ অমসুং ওজাশিংনা মশা-মশাগী অচাবা মফমদা লৈবা চঙই হায়বসি লাইরিক অসিনা ঈঙ্গত পীরি ৷

বিদিতকী থূতই

দাইলোগ য়াওনা ৱারী লীবা মখলগী লাইরিক অসিদা (ক) ফর্ষ্ট পর্সন সিঙ্গুলর নম্বর ‘ঐ’না ৱারী লী ৷ মসিগী ‘ঐ’ অসি নুপাগী সেল্ফতা লৈবা ‘ঐ’ অমসুং নুপীগী সেল্ফতা লৈবা ‘ঐ’শিং (গ্রিটিংস কার্দ, শকহৌদ্রবা ঈশৈ, তারিবো, ঐ নঙবু নুংশিয়ে য়াম্না, কনাদা পাবো কৌগনি, য়ূম কৌবতা পাঞ্জখ্ররোই)নি ৷ য়াম্না নুঙাইরিবা অমনা লাইরিকসিদা য়াওরিবা ‘ঐ’ অমদি ‘অমুবী’ হায়না মপুনা মিংথোনবা ষণবী অমনি (কদায়নো চতলিবা খঙদবা খোঙচত অমদা) ৷ মায়গৈ অমরোমদা, (খ) অন আইদেন্টিফাইদ ওইনা লৈবা থর্দ পর্সন অমনা ৱারী লীবা ৱারীমচাশিংসু য়াওই ৷ অপাবশিংবু মহাক্না পুনীংবা মফমদা পুদুনা চতপা ঙম্মী ৷

মসিগী মথক্তা বিদিত মশাগী তোপ-তোপ্পা খূতই মওং খরসু লৈজৈ ৷ মদুশিংদুদি-

১. নোক্নীংবগী ঈহূল অমা য়াওনা ইবা – বিদিতকী খূতইসি মতম অমগী ওজা জি সি তোংব্রা অমদি ওজা এলাংবম দিনমনিগী ৱারীমচা পারগা নোক্নীংবগুম নত্ত্রবসু নাকন অমরোমদা মহাক্কী ৱাহৈ-ৱাতাশিং অসিনা নোক্নীংহল্লি ৷ মণিপুরী ৱারীমচাদা অসুম্না নোক্নীংবগী ঈহুল পুবসি য়াম্না তাঙনা থোকই ৷

২. থৌদোক অমখক্তবু য়াম্না তেন্না লীবা – বিদিতনা অশাংবা ৱারী লীদে ৷ মাগীসি সিঙ্গল সিতিংদা পাবা য়াবা, থৌদোক অমখক্তবু ঊতপা হায়বা ৱারীমচাগী মচাকশিংদু ইন্নবা হোতনবনি হায়নীংই ৷ ৱারী তেন্না লীবা হৈবা হায়বসিসু অচৌবা মগুন অমনি ৷ বিদিতকী ৱারীমচাগী মতৌসি নোংথাংনা অমুক্তং কূপ্লকপদা পীরম্বা মঙাল অদুগুম্না মাগী ৱারীশিং অসিগী মশকশিং অসিনা লৈ ৷ অয়াম্বা ৱারীমচাশিং লামায় অমা মখায়গী মনুংদা লীনবা হোতনৈ ৷

৩. মশাগী ওইবা তোপ-তোপ্পা লোন্দা শীজিন্নবা – মসি মপূং ওইনা লৈতেং তৌরবা ৱাহৈ নত্তবা নোংমগী পুন্সিদা মীচম অমনা ঙাঙনবা লোন্দা অমদি ফাগী চেনবা মীওই অমনা ঙাঙগনবা ৱাঙাঙশিং অদুনি ৷ লাইরিক মপূম অসিদা অসিগুম্বা মখলগী ৱাঙাঙ-ৱাতা অমদি লোন্দাদু তাবা ফংই ৷ লোন্দাশিংসি য়াম্নমক মহৌশা ওই, ফজৈ ৷

ৱারোইশিন

বিদিতনা মহাক্কী লাইরিক অসি মহাক্কী ৱাখলগী খরুঙদা লৈরম্বা মচলশিংদু অমমমতা পুথোক্লগা ৱারী ওইনা তেন্না-তেন্না ইথোকপনি ৷ মরম অসিদগী লাইরিক অসি খুনাই মীরোল অমগী মখল-মথেল ওইবা ৱারীনা মপূং ওইনা লৈবা ওইনা উরিবনি ৷ খুনাই অসিদা থোক্লিবা মখল-মথেলগী ৱারীশিংদু তোঙান-তোঙানবা লৈরক্তগী হেক্লকপা লৈশক তিন্নদবা শিঙেল লৈরাং ওইনা য়েন্দাই অমদা পূনশিন্দুনা থম্বনি ৷ মসিদা অইবনা খ্বায়দগী থৱায় য়াওনা লীখিবা ৱারীসি তোলোব য়ামদবা ইংলিস ষ্কুলগী ওজাগী ৱারীশিং, ঈশৈদা ঙাওজবা কলাকারশিংগী ৱারীশিং অমসুং পুন্সিগী লানফমদা কন্না লান্থেংনরিবী নুপীশিংগী ৱারীশিং অসিনি ৷ ৱারী ময়াম অসিদা অইবনা য়ু থক্তুনা অমসুং জ্বার শান্নদুনা মপুন্সি মাঙহনজবা মীরোল অমগী ৱারী য়াম্নমক পাম্না লীরি ৷ নাকন অমরোমদা, হৌদোং লম্বোইবগুম নুপী লুম্বা নত্ত্রগা থেম্বা নুপা অদুগা অমরোমদনা লমচত লান্ননবগীদমক থৌরাং তৌদুনা লৈবী নুপীশিংগী ৱারী লীরি ৷ ৱারীশিং অসি ৱারী ওইনা লীথোক্লগা অসিগুম্বা পুন্সি মরেল অসি পামজদবগী ঈহুল অমদি লোয়নদুনা চতপা ওইনা পূক্নীংদা ফাওহল্লি ৷

লাইরিক অসিদা য়াওবা পাবা নুঙাইখিবা ৱারী খরদি – ইবোক থারিকথা, মোংফমথক্কী জগোয়, অৱামন, পাইথোকখ্রবী পোম্বী, ওজা চাউবীগী ৱারীশিং, ময়াক য়াওদ্রবা পুন্সিগী আশা, শকহৌদ্রবা ঈশৈ, অউনপোত, সোরাত বার্তোন, ইচাগীদমক ঐ হিংদবা য়াদে, শান্নপোত, মনা, ততখ্রবা তেলঙ্গা, কনাদা পাবো কৌগনি, মহাও য়াওরিবরনে হিংবসিবু, লুখ্রাবী চাউবিতোন-নচিংবসিনি ৷

মায়গৈ অমরোমদা, অইবা অসিগী হেন্দোক-থোইদোকপদি মহাক্না নোক্নীংবগী ঈহুল চেলহন্না ৱারী লীবা ঙম্বগী গুন অসিনি ৷ মখল অসিগী ৱারী অসি অঙাংশিংনা য়াম্না পাম্নগনি ৷ হীরম অসোমদা থওইনা কূমথরক্তুনা, হেন্না নৈনরগা খূত থারক্লবদি অইবা অসিনা অচৌবা মফম অমা মরন্নাইগী ওইনা কনবা ঙমগনি হায়না খল্লি ৷ ৱারীমচাগী মতাংদা অইবগী কোক্কী সুরুংদা ঙংদুনা লৈরম্বা সেকপীশিংদু হোইদোক্লগা মফম অমদা পূনশিলহনখ্রবনিনা মখা তাবা ইরকপা লাইরিকতদি অইবগী মশক অমা লেপ্পা য়ারগনি হায়না নীংই ৷ সেকপী পাইথোকখিবগী হাঙহৌরবা মফম অদুদা অনৌবা ৱারীমচাগী খোই মহূম শাহল্লকপদদি মদু বেঙ্গুনগীরা নত্ত্রগা খোইঙাঙগীরা নত্ত্রগা ঊনাখোইগীরা হায়বদু হেন্না ময়েক শেংহল্লক্কনি অমসুং খোইহী চেল্লক্কনি হায়বগী থাজবা থম্বা য়াই ৷

---