গমভিনিগী ‘বিদায় কংলৈপাক বিদায়’

(‘বিদায়’ অমসুং ‘চিরবিদায়’ অনীগী কারক্তা লেপ্লিবা চরিত্রদু কনানো)

গমভিনিবু খঙদবা মণিপুরী সাহিত্যগী মী লৈতে হায়না লৌবা য়ারে ৷ ইং ২০০১দা ফোঙদোকখিবা মহাক্কী অহানবা শৈরেং লাইরিক ‘হংলক্কনু ৱাহং অদো’ হায়বসিনা গমভিনিবু মণিপুরী সাহিত্যগী ফম্বাক্তা ফিদা অমা ফংহনখি ৷ লাইরিক অদুদা য়াওবা শৈরেং খরা (মরু ওইনা শৈরেং অনী)না গমভিনিবু য়াম্নমক মগুন চেনবী অশৈবী অমা ওইহনখি ৷ শৈরেংশিং অদুদা নুপীগী পুন্সী অমসুং মখোয়না মী ওইজবগী ফাওরকপা পূক্নীং-ঈহুলশিং ফোঙদোকপা খোল্লাউ অমসুং খোঞ্জেল তাবা ফংই হায়দুনা গমভিনিবু অশৈবী ফেমিনিষ্ট ওইনা খঙনখিবনি ৷ ফেমিনিজমনা মণিপুরী সাহিত্য নৈনবগী তাইবংদা য়াম্নমক মমল লৈনা চঙশিল্লকপা তাংকক অমদা গমভিনিগী শৈরেংশিংনা য়াম্নমক নক্নবা খোঞ্জেল তাহনবা ঙমখিবনি ৷

‘নুপা-নুপী’ হায়বা বাইনরি ওপোজিসন অমনা ‘নুপী’বু ‘অদর মেন’ (মী অতোপ্পা) ওইহন্দুনা মার্জিনদা থম্লম্বা অদুগা ‘নুপা’বুনা ‘মেন’ (মী) ওইনা লৌদুনা সেন্তরদা থম্লম্বা মওঙগী খল (ষ্ট্রকচর) অদু মাঙহল্লগা অনীমক ‘মী’নি হায়বা ৱাফম নুপীনা খঙজরকপগী ঈহৌ অমা ওইনা ‘ফেমিনিজম’ থোরকখিবনি ৷ ‘ফেমিনজম’বু বাংলা লোন্দা ‘নারী চেতনাবাদ’ হায় অদুগা মীতৈরোন্দনা ‘লৈমরোল’ হায়রগা খঙনরে ৷ ‘লৈমরোল’দি ‘নুপী’না মশাবু ‘মী’নি হায়না খঙজরকপা, নুপানা মী অমা ওইনা ফংলিবা ঈকাই খুম্নবা অদু নুপীসু মী ওইনা ফংফম থোকই হায়বা খঙলকপা ঈহৌ অদুনি ৷ ঈহৌ অসিনা পীনীংলিবা খোল্লাউশিংগা গমভিনিনা মহাক্কী শৈরেংশিংদা শাগতলিবা খোল্লাউ নত্ত্রগা থোকহল্লিবা খোঞ্জেলশিং অসিগা ফীবম খরদা নক্নরুবগী মশক য়াওরম্বা অসিনি ৷ মতম্না পুরকপা সাহিত্যগী ঈহৌ অদুদা মপাঙ্গল শোন্নবু ওইরবসু শরুক য়ারিবী গমভিনি মণিপুরী সাহিত্যগী মমল লৈবী অশৈবীনি ৷

মশানা ইজবা অনীশুবা শৈরেং লাইরিক ওইনা ঈং ২০০৭তা ফোঙদোকখিবা ‘বিদায় ! কংলৈপাক বিদায়’ হায়বসি অহানবা শৈরেং লাইরিক ফোঙদোকখ্রবা মতুংদা ইরকখিবা চহী ৬/৭কী শৈরেংশিংদগী খনগতলগা ফোঙদোকপনি ৷ শৈরেং লাইরিক অসিবু অপাবা খুনাইনা য়াম্নমক মমল লৈনা লৌখি অমসুং মপান মণিপুরগী খ্বাইদগী ফবা সাহিত্যগী পোত্থোক্তা মণিপুরী সাহিত্য পরিষদ, ইম্ফালনা পীবা ‘কামিনি কুমার মনা’ অদুসু ফংখি ৷

লাইরিক অসি চহী ৬/৭কী অপূনবা পোত্থোক ওইরবসু অশৈবীনা মণিপুরদা চতলুবদগী থেংনরকপা পেন্দবা কয়ানা লমজিং ওইরগা লাইরিককী মিংথোল ওইরিবা শৈরেং অসি ইখিবনি হায়বা মনিল অসিনা হুমদুনা পুখিবা ওইনা তৌই ৷ ‘নুংশিজরবা, ঐগী মণিপুরী পূম্বগী হৌভম-শাতফম ওইরিবা কংলৈপাক মণিপুরনা - শাগতচরম্বা অমসুং থমোয়নুংদা লাতচরম্বা ফিদম অদুগী ৱাংমদা লৈরম্বদা নীংবা কায়রদুনা ইখিবনি’ হায়না অশৈবীনা মাগী ৱাহৌদোকতসু পল্লি ৷ ‘বিদায় ! কংলৈপাক বিদায়’ হায়বা শৈরেং অসিনা মিংথোল ওইরুবসিনা লাইরিক মপূম অসিগী অশৈবী অসিবু ‘ফেমিনিজম’দগী ‘নেশনেলিজম’রোমদা হেন্না চঙশিল্লকপগুম অপাবা খুনাইনা উবিখিবা মতাংসু য়াওখি ৷

মপান মণিপুরদা লৈবা করম্বা মণিপুরীনবু মণিপুর নুংশিদবগে ? থমোয়নুংদা ফিদম্নফম ওইবা শক্তম অমা শাগতলগা খ্বাইদগী ঈকাই খুম্ননীঙাই ওইরবা মতৌ ওইনা লাতনরিবা ঙাক্তনি ৷ মণিপুরনা ৱারগা কপচরিবনি, মণিপুরনা মায় পাক্লগা হরাওজরিবনি ৷ মণিপুরী অমদং মফম চাখিদ্রে তাবদা থমোয়সে ফূক্তুনা পুখ্রবগুম খাঙফম খঙনদ্রিবনি ৷ মণিপুরী অমনা ফীবম ফগতপা উবদা মচা-মশূনা য়াইফরবগুম পেনজরিবনি ৷ ফোঙদোকপা হৈবা নত্ত্রগা হৈতবগী ৱাখক্তনি, খূফোঙদোক খেন্নবগী মতৌখক্তনি ৷ মমালৈবাক নুংশিদবা কনাসু লৈতে ৷

মণিপুরবু নুংশিবা অসিদা মণিপুর মনুংদা লৈবশিংনা নুংশিবগা মপান্দা লৈবশিংনা নুংশিবগা মশক্তা খরমখৈ খেন্নবদি রোমান্তিসিজমগী মতমদগী হৌনা লৈরক্লে ৷ চাউবা, কমল, অঙাংহল, নবদ্বিপ, দোরেন্দ্রজিত, মিনকেতনখোয়না শৈথারম্বগা মপান মণিপুরদগী নাইতোম শৈশকচরম্বা অশৈবা নাওরিয়া ফুলোনা মমালৈবাক মণিপুরবু নুংশিদুনা শৈথাবগী শৈথারোলদা হেন্না নিংদোন পোম্বগী অমসুং নুংশিবগী মতৌ অসি য়াওরম্বা থেংনখিবদুনি ৷ মতমদুদগী হৌরগা বরাক, ব্রহ্মপুত্র, ত্রিপুরা অমসুং বাংলাদেশকী অশৈবা-অশৈবীশিংনা মমালৈবাক মণিপুরবু নুংশিদুনা শৈথারকপগী খোঞ্জেল অসি মপাঙ্গল কন্না তাবা ফংলক্লি ৷ নহা অশৈবশিংগী মনুংদা – থোকচোম বিশ্বনাথকী ‘ঐখোয়গী কংলা’, বিরেন লাইশ্রমগী ‘মণিপুর মাই হোলি প্লেস’, শেরাম নিরঞ্জনগী ‘ঐ হল্লরোই বাংলাদেশতা’ শীংথানীংঙাই ওইনা পনবা য়াই ৷ পরিং অসিদা গমভিনিগী ‘বিদায় ! কংলৈপাক বিদায়’ অসিসু লৈবনি ৷ (মিং পনবা য়াবা অতৈসু লৈরি) ৷

গমভিনিগী হন্দক্কী শৈরেং লাইরিক অসিদগী তাবা ফংলিবা মপূং ওইবা খোঞ্জেলশিং অদুদি – মমালৈবাক অমসুং মজাতিবু নুংশিদুনা অমসুং নুংশিবা অদুনা লমজিংদুনা ওইহন্নীংবা পামজবা কয়া ওইরমদবদগী ফোঙদোকপা পেন্দবগী খোঞ্জেল (পোক্নফম লমদম, শক্লরোই ঐদি, ঐনা মিত পাঙলকপদা, গুরু শিদবগী য়াথংনি, বিদায় কংলৈপাক বিদায়), লৈত-লায়র অমসুং তোল্ল-তারবশিংগী খোঞ্জেল (মৈরিক’মতং পীনবিয়ু, পীতত-পাততপা অহিংদা, লেম্প পোষ্ট অমগী মখোঙ, কোরাস), নুপী অমসুং নুপীবু ওতপী-নৈবীবগী মায়োক্তা পেন্দবা ফোঙদোকপা খোঞ্জেল (মৈরিক’মতং পীনবিয়ু, শরশয্যা, উনম নম্ফমগী শচি, শম পুনশিল্লু, নোক্লি মাদি, ব্লেক সন ডে, অহাঙবা মহুমদুদা, অহিংগী আরতি, তুরেল) অমসুং ৱাঙুরোনগী মশক চেনবা খোঞ্জেল (য়ূমদা হনগনি, ঐ অমসুং উয়ুং পাম্বী)শিং অসিনা মপূংনি ৷ খোঞ্জেলশিং অসিদা নুঙাই-য়াইফবগী, হরাও-তয়াম্বগী, মায় পাকপগী, অপেনবা ফোঙদোকপগী, শেমগত-শাগতপগীদি কয়া য়াওবা উদে ৷ নিঙমদবা, পেন্দবা, অৱাবা, নুঙাইতবা, নীংবা কায়বা, নিংদোন পোম্বা, তুহতপীবা অমসুং পাম্বৈ লৈজদবশিংনা মতু পোন্না তেংথাবগী খোঞ্জেল ঙাক্তা ওইনা তৌই ৷ অশৈবী অসিগী শৈরেংশিং অয়াম্বদা থাজবা মাঙবগী (মীতশেন খাঙলিবা য়ূম্বী, অমুবা নুংশাদা অসিনচিংবা), নীংবা কায়বগী (লেম্প পোষ্ট অমগী মখোঙ, অহাঙবা মহুম’দুদা, ধূমকেতু অসিনচিংবা) মতৌ ওইনা ফোঙদোক্লম্বা থেংনৈ অদুবু করিগুম্বদা মঙালবু ঈখৌলাংবগী অমসুং থাজবগী ঈঙ্গিত (হায়জবা, চূমথাং, তেংলৈ কাঙবা) খরদি কুফেত-কাফেতনবু ওইরবসু ফোঙদি ফোঙদোক্লম্মী ৷

শৈরেং লাইরিক অসিগী ৱাহৌদোক মুন্না পারবদি গমভিনিসি মমালৈবাক, মজাতি, মখুনাই, মমারোল অমসুং মশাগী নাতপু য়াম্নমক নুংশিবগী মমি উবা ফংবিগনি ৷ ‘ইমা’ হায়বসী ‘অপোকপী ইমা’ অমসুং ‘পোক্নফম লমদম’ অসিনি হায়না গমভিনিনা লৌই ৷ ‘পোক্নফম লমদমনা লাইরৈবাক্তগীসু হেল্লি’ হায়বা ৱাঙুরোনগী ৱাফম অসিসু গমভিনিনা চেতনা থাজৈ ৷ মপোক অসিদা গমভিনিনা ফংজরিবা ইমাসি মরিনি – ১. অপোকপী ইমা, ২. ভারত ইমা, ৩. পোক্নফম লমদম ওইরিবা ত্রিপুরা ইমা অমসুং ৪. মণিপুরী পূম্বগী পোক্নফম, হৌরক-শাতলকফম ওইরিবা ইমা মণিপুর অসিনি ৷ গমভিনিগী লাইরিক অসিদা মমা ওইবি নুপী অমসুং পোক্নফম লমদম ওইরিবা ভারত (ঐনা মীত পাঙলকপদা), ত্রিপুরা (পোক্নফম লমদম) অমসুং মণিপুর (বিদায় কংলৈপাক বিদায়)গী মফম লৈখি ৷

‘বিদায় কংলৈপাক বিদায়’ হায়বা শৈরেংসি ইমা ভারতকী মনুং চন্না লৈবা ‘মপান মণিপুর’গী ‘শকখঙদবা মীওই’ (শৈরেং অসিগী ৱাঙাঙলোয়) অমনা ‘মণিপুর’ হায়না খঙনখ্রবা ‘কংলৈপাক’তা চতলুরগা নিংদোন পোমদুনা হল্লকপদু পূক্নীং নুংশিনা ফোঙদোকপনি ৷ ‘শকখঙদবা মীওই’ (ৱাঙাঙলোয়) অসি মণিপুরবু য়াম্না নুংশিবা ওইনা তৌই (চীং-পাত-তুরেলনা লৈতেংলিবী নুংশিজরবী ঐগী মণিপুর সনালৈবাক হায়নসু মিংথোনবিবা নুংশিথোইবী ইমা... ওঃ কংলৈপাক. নুংশিজরবী ইরমদমগী চীং-পাত-তুরেল...) ৷ মহাক্কী মিং, নুপা-নুপী, চহী, কুচুনচিংবা অমত্তা খঙদে, মহাক্কী মরমদা ঐখোয়না শৈরেংসিদগী খঙবা ঙম্বা হায়ববু মহাক মপান মণিপুরগী মীওই (মণিপুরী) অমনি অমসুং মহাক্না মমালৈবাক মণিপুরবু য়াম্না নুংশিজৈ হায়বসিতনি ৷ মপান মণিপুরগী মণিপুরীশিংনা খনগনবা- ইমা মণিপুরনা মচা ওইরিবা মহাকপু নুংশিনা কৌরবগুম থমোয়নুংদা তাবা,  চতচনীংবা অদুগা খুদোং চাবা ফংবশিংনা চতচবা ঙম্বদু ‘শকখঙদবা মীওই’ অসিদসু থোকই ৷ চাউবা, কমল, অঙাংহলখোয়না নীংথিনা শৈথাখিবা পরেংশিংদু পারুবশিংনা মণিপুরবু ৱাখলদা শাগততুনা লাইরম্লেনদগীসু হেন্না ফজহন্নবা ঙাক্তনি ৷

মদুগী তায়োন্ননা মণিপুরদা থোক্লিবা মীশি-মীনা, মীহাত-মীপুন, মীওত-মীনৈ, মীকপ-মীরাওখোলনা নিল্লবা, তংদু লৈতাদবা পুন্সি মরেল, খুনাইগী শোইনাইরবা মশক, নাতকী মাঙথরক্লিবা মশক, অচুম্বা অফবা ফজবগী মফম মাঙশিল্লক্লিবা, চিংখাইনবগী, মূকখাইনবগী, নাকপাক তানবগী, তোখায় তানবগী, অৱা-অনাগী, তৌফম খঙদবগী, লেমজনীংঙাই অমসুং চাউথোকচনীংঙাই ওইবা মতৌ পূম্বা মাঙলম্বগী, মীরোল নাইনা চত্থরকপা লনশিংনা মফম-মরাং খঙলক্তবগী, অমম্বগী তমথিরবা খূতপায়নুংদা চঙখিদুনা অমুক মঙাল ফংলরোইদবা মশক অমদা লৈখ্রবদা ‘শকখঙদবা মীওই’ (শৈরেংসিগী ৱাঙাঙলোয় ওইরিবা) অসি নুংবংনরে, মপূক্নীং নুংশিরে ৷ নোংমা নুংশিনা শাগতখিবা, ইমাগী চেঙলৌ শক্তম (ইমাগী পূক্নীং হূরবা শান্তিগী লৈকোল)দো উরুরগদি য়েংবা ঙমদ্রে, য়েংনীংদ্রে, য়েংনীংবা পোকত্রে (য়েংজনীংদরে নচাদি, য়েংজনীংদরে নচাদি) ৷ নোংমা কৌরকপগুম নীংদুনা (কৌবিরক্লগনু অচানবী..., কৌবিরক্লগনু ঐবুদি অমুক হন্না ইমাগী নাক্তা) হরাও-হরাও চতলুবদু নীংবা কায়বগী, নীঙমদবগী, পেন্দবগী, তন্থবগী, হনজানবগী, পূক্নীং নুংশিবগী, লৈতাফম খঙদবগী, মায়থিরবগুম খনবগী, তৌফম খঙদবগী, থাজবা লৈত্রবগী, নিংদোন পোম্বগী, কপ্নীংবগী পোতলুম মপৈ-মপৈ পুদুনা হল্লকপা তাখ্রে ৷

কৌবিরক্লগনু ঐবুদি অমুক হন্না ইমাগী নাক্তা

হনজখ্রগে ঐদি তাম্লবা লমদমদুদা

পোক্তবী ইমাগী মশাইগোনদা

লেনজরুগে পুন্সী চূপ্পা ইরু লূক্না, মীখা পোন্না

ইমাগীদমক পিরোইননা

ইমাগী অৱা-মৈচাককী মৈরিক অমতং থমোয়দা কোনজদুনা

বিদায় ইমা! বিদায় মণিপুর! বিদায় নুংশিজরবী কংলৈপাক!

বিদায়! বিদায়!

অসুম্না থমোয়নুংদা পেন্দবগী চৈনাখোল পুদুনা থানিল (ইম্ফাল অমসুং মাগী ঈশিং নুংশিতকী ফীবম)সু হল্লকখি নুংশিজরবা মহাক্কী মমলৈবাক, পোক্নফম লমদম মণিপুরবু থাদোক্লম্লগা ৷ মহাক্না চতলমদাইদা রবিন্দ্রনাথকি ‘তোমার সোনার ঠালায় সাজাবো আজ দুখের অশ্রুধার...’ কতলম্মী ৷ মণিপুরবু নুংশিজবা মপান মণিপুরগী মণিপুরী মচাশিংনা মণিপুরদা হরাও-তয়াম্না চতলুরগা নীংবা কায়না হন্নরকখিবা ঙাক্তনি ৷ মতৌ অদুগুম্না শৈরেং অসিদা য়াওরিবা শকখঙদবা মীওই অসিসু হল্লকখিবনি পূক্নীং নুংশিনা ইমাগী অৱা-মৈচাককী মৈরিক অমতং থমোয়দা কোনজদুনা ৷

শৈরেং অসি অতৈসু কূপথনা নৈনবা য়ারি ৷ খূদম ওইনা, মণিপুরগী ওইরিবা ফীবম অসিদা মপান মণিপুরগী মণিপুরীশিংনা শৈরেং অসিদা য়াওরিবা চরিত্র অসিগুম থাদোক্লমগদ্রা (...নুংশিজরবী ইরমদমগী চীং-পাত-তুরেল, নখোয়দি অসুমক লৈহৌখোকো...) হায়বসিনি ৷ নাকন অমরোমদনা, ইমাবু নুংশিবগী মৈরিক অমদং থমোয়দা কোন্দুনা পুরক্লগা পোক্তবী ইমাগী মশাইগোন্দা মীখা পোন্না, ইরু লূক্না পুন্সী চূপ্পা লৈথোক্লগদ্রা হায়বসিনি ৷ মপান মণিপুরদা লৈবা মণিপুরীশিংগী থৌদাং করি ওইগদৌরিবগে হায়বসিদা মী-মীগী ৱাখল্লোন মান্দবদি য়াই অদুবু ময়াম পূম্নমক্না য়ানবা ৱাফম খরসু শোয়দনা লৈফম থোকই হায়না নীংই ৷ শকখঙদবা মীওই অসিনা লৌখিবা থমোয় নৌথহনবা ফিরেপ অসিনা অরোইবা ওইদৌরিবরা হায়বসিদি শৈরেং অসিগী নুংগী ঈচেলদা ৱাহং ওইনা ফুম্লগা লৈহৌরসনু ৷

শৈরেং অসিগী মতাং-মতাংশিংদা শীজিন্নরিবা ‘বিদায়’ হায়বসি মীতৈরোনগী ‘কায়নবা’ হায়সিগা মান্নবা ৱাহন্থোক ওইনা লৌবা য়াই ৷ ফীবম খরদা ইংরাজিগী ‘বাই’ নত্ত্রগা ‘গুদ-বাই’ নত্ত্রগা ‘বাই-বাই’ হায়বসিগা মান্ননা লৌবসু য়াই ৷ ‘চতলুখিগে’, ‘চতলগে’ ‘চতলে’, ‘চতলবনি’, ‘চতলেদো’ নত্ত্রগা ‘হল্লগে’ ‘হল্লে’, ‘হল্লবনি’, ‘হল্লেদো’ নত্ত্রগা ‘লৈহৌরো’, ‘লৈহৌরোকো’ হায়বগা মান্ননা লৌবসু য়ারি ৷ গমভিনিনা মফমসিদা ‘বিদায়’ হায়না শীজিন্নরিবসি মণিপুরদা চতলুবদগী হল্লকপদা পীরম্বা ‘বিদায়’দুনি ৷ মখাগী অসুম্না থম্বদসু চাউরাক্না মান্নবা ৱাহন্থোক ফংই-

বিদায় ইমা ! বিদায় মণিপুর ! বিদায় নুংশিজরবী কংলৈপাক

বাই-বাই ইমা ! বাই-বাই মণিপুর ! বাই-বাই নুংশিজরবী কংলৈপাক

চতলবনি ইমা ! লৈহৌরোকো মণিপুর ! হল্লবনি নুংশিজরবী কংলৈপাক

শৈরেংগী মতাং অমদা ‘কৌবিরক্লগনু ঐবুদি অমুক হন্না ইমাগী নাক্তা ’ হায়বসিনা খঙহন্নীংলিবদি মহাক্কী ‘বিদায়’ অসি চুম্নগী অমসুং মতম খরখক্কী ‘কায়নবা’দু নত্তে ‘চিরবিদায়’গী ৱাহন্থোক ‘মতম চূপ্পগী ওইনা কায়নবা’রোমদা নকশিল্লি হায়না লৌবা য়াবসিনি ৷ অদু ওইরবদি, ‘বিদায় ! কংলৈপাক বিদায়’সি কায়নরমদাইদা চম্না পীরম্বা ‘বিদায়’ অদুরা নত্ত্রগা মতম চূপ্পগী ওইনা পীখ্রবা ‘চিরবিদায়’ অদুরা হায়বসি নৈননীংঙাই ওইনা লৈহৌরি ৷

শৈরেং অসিদা য়াওরিবা ‘শকখঙদবা মীওই’ অসিনদি অমুক হল্লক্লরোইদবা খোঙচত অমগী বিদায় পীরি অদুগা অশৈবী গমভিনিনদি ‘বিদায়’খক্তমক হায়রি ৷ মমালৈবাক নুংশিবা অমসুং নুংশিরুবদগী ফাওরকপা পেন্দবা ঈহুলগী খলদা অশৈবী গমভিনি অমসুং শৈরেং অসিদা য়াওরিবা শকখঙদবা মীওই অসিগী মরক্তা চিংখাইনবা অমা লৈবা উরে ৷ মরমদি, অশৈবী গমভিনিগী মফমদদি ‘বিদায়’ অসি কায়নরমদাইগী অচম্বা বিদায় ওইরি অদুগা শকখঙদবা মীওই (শৈরেং অসিদা ৱা ঙাঙলিবা মীওই) অসিগীনা চিরবিদায় ওইরি ৷