মায়খুম হাংবা ৱারোল
১৪-০৫-২০১৪
জিরিবামদা নীংশিংখুন লৈ হায়বসী ময়াম্না তানৈ৷ খরনা চতনরুরে, খরনা চতনদ্রি৷ খরনা য়ৌনীংবগী ঈহুল লৈ, খরনা য়ৌনীংদুনসু পাম্বৈ লৈতে হায়না
খঞ্জদুনা য়ৌরকপা ঙমজদে৷ নীংশিংখুনদা করি লৈবগে, নীংশিংখুন অসী করিগীদমক্নো, মসীগী পান্দম্না করিনো,
মসীনা ঐখোয়দা করি পাউখোং চল্লিবগে অদুগা ঐখোয়না করি পাউখুম পীগদৌরিবগে হায়বনচিংবা
ঐখোয়না খঙলুবা লৈতে৷ জিরিবামদা নীংশিংখুন কৌবা অমা লৈ হায়বদগী হেন্না ঐখোয় কনাসু
নীংশিংখুনগী মরমদা খঙদে৷
হোয়
ঐনা খঙখিবা অমদি- হাই ষ্কুলদা তম্মিন্নরিঙৈ, নোংজুথাদা খোঙগ্রাউ তাখত্তুনা পেদা
শেন্দল থেতচল্লগা, লাইরিক খাউ নম্বো নঙ্গন্দা পোদুনা হঙ্গত-হন্দা চতমিন্নখিবা ঐগী
নুংশিরবা মরূপ বুধ-না নীংশিংখুন অসী নীংশিংখুন ওইহল্লক্নবা হোতনবদা অচৌবা থৌদাং
লৌখি হায়বসীনি৷ ১৯৯৭-৯৮ কী অদুৱাইদা ঐনা মণিপুরগী মেদিয়া পর্সন অমা ওইনা মিনিষ্টর
ওইরম্বা মতমদুগী লৌউ-শীংউ মন্ত্রি শ্রী এন মঙ্গিগা লাকমিন্নরম্বা মতমদা মরূপ বুধগা
মতম কুইনগী তুংদা উনখিবনি৷ মহাক্না লুচিংদুনা ঐখোয়বু মফম কয়াদা পুবিখিবনি৷ মতমদুদা
মহাক্কী ৱাখলদা অসীগুম্বা অমগী মমি তম্বা হৌহৌরবনি৷ ঐ হৌজিক নীংশিংখুন অসীদা
লেপ্লগা বুধগা ঐগা লাইরিক তম্মিন্নরকপা মরূপনি হায়বদা চাউথোকচবা পোক্লি৷
মীওইনা
পোক্লবা মীওইপোক খূদিংমক্তা মশাগী ফূরুপ-কাঙলুপ, হৌরক-শাতলকফম, মরৈবাক মরমদম অমদি
ঐখোয়গী হৌখ্রবা ইপা-ইপুশিংবু নুংশিজবগী ঈহুল অসী মশা খঙনা নত্ত্রগা খঙদনা লৈজৈ৷
মদু মখোয়না মশা খঙনা নত্ত্রগা খঙদনা মশা-মশাগী ঙমজবা মওঙদা ফোঙদোকই৷ কনাগুম্বা
ইদুনা ফোঙদোকই অদুগা কনাগুম্বনা নৈনদুনা ফোঙদোকই, ঈশৈ শক্তুনসু ফোঙদোকখি, মীয়ামগী
থৌগল তৌদুনসু ফোঙদোকখি অসীনচিংবা ময়ামগী মরক্তা নীংশিংখুন শেমদুনসু মশাগী মরৈবাক,
মরমদম, মফূরুপ, মখুনাই অমদি হৌখ্রবা ঐখোয়গী ইপা-ইপুগী মিতম খিন্দুনা ফোঙদোকই৷
ইসু
ইদবা, নৈসু নৈনদবা, শকসু শক্তবা, শাসু শাদবশিংনদি মশাগী মরৈবাক, মরমদম, মফূরুপ,
মখুনাই অমদি হৌখ্রবা ঐখোয়গী ইপা-ইপুবু নুংশিদব্রা৷ নুংশি, মখোয়সু ফোঙদোকপা
ঙম্বশিংগা চপ মান্ননা নুংশি৷ মদু মখোয়না মথমোয়দা চাং তমজৈ৷ ইপা-ইপুশিংগী মিতম
মখোঙদা লাক্তুনা মশাগী নোল্লকপা ঊতচদুনা নুংশিজবা অদু ফোঙদোকচৈ৷ ঐখোয়না ইশাগী
ইরৈবাক, ইরমদম, ইফূরুপ, ইখুনাই অমদি হৌখ্রবা ঐখোয়গী ইপা-ইপুশিংবু নুংশিবা অমসুং
ঈকাই খুম্নবা ঊতপা অসীমক ঐখোয়গী থমোয়দা লৈবা নোল্লুকপা অদু ঊতপনি৷ নোল্লুকপা
অদুমক্নি ঊতলিবসী, ঐখোয়না ঙসী মিতমশিং অসীগী মখোঙদা লেপচরিবসী৷ টিকেন্দ্রজিত,
থাঙ্গাল, পাউনাগী মিতম মখোঙসিদা লেপ্লবদা, ফম্লবদা ঐখোয়গী থমোয়দা ৱাহং কয়া হংই৷
চাউথোকচবা কয়া ফাওই৷ মখোয়না তৌরম্বা থবকশিং নীংশিংই৷ মদুনা চোংহল্লি ঐখোয়গী থমোয়দা
ইরৈবাক, ইরমদম, ইফূরুপ, ইখুনাই অমদি হৌখ্রবা ঐখোয়গী ইপা-ইপুশিংবু নুংশিবা অমসুং ঈকাই
খুম্নবা ঊতনীংবগী ময়োল অদু অমুক নৌহৌননা৷
ঐখোয়না
মিতমশিংসীগী মখোঙদা লেপ্লগা শৈরেং থীগদৌরিবসী, ঈশৈ শক্কদৌরিবসী নত্ত্রগা করিগুম্বা
খরা ফোঙদোক্নরিবসী ঐখোয় ইশাগী হৈজ-শিংজবা অদু ঊতথোক্নবা নত্তে৷ অথৌবশিংদা ঊতপা
ঐখোয়গী নোল্লুকপা অদুনি, শ্রদ্ধা অদুনি, ভক্তি অদুনি, ঈকাই খুম্নবা অদুনি৷ চহী
অমদা নোংমদং থৌরম পাঙথোক্তুনা অথৌবশিংবু নীংশিংবখক নত্তনা অতৈ নুমিতশিংদসু ৱাখল্লোন
তিন্নবশিংনা পূনশিল্লগা পাঙথোকপা য়াই হায়বসীনি৷ পান্দম অসীগী মখাদা ময়াম
পূম্নমক্না সুতি ওইনবা নুমিত অসীদা ঐখোয় মশেন পূনমিন্নদুনা মিতমশিং অসীগী মখোঙদা
পূনমিন্ননবা থৌরম অসী শীন-লাঙজখিবনি৷
ঙসীগি
থৌরম অসীনা পাউজেল খরা থম্বা পাম্মী৷ মদুশিংদুদি-
১.
নীংশিংখুনগী ঙমখৈ অমা লেপথোক্লগা ফরাইকোন (চেকপল) চলহন্নীংই৷
২.
অথৌবা অতৈ খরসু লেপথোকমিন্নরগা নীংশিংখুনগী মফম-মফমদা মখোয়গী মিতমশিং
লৈতেংহন্নীংই৷ ময়ামগী মনুংদা জিরিবামবু খুন্দাহল্লম্বা রাজা ডুম্ব্র সিংহগী মিতমসু
থমহন্নীংই৷
৩. ইপু
লৌরেম্বা খোংনাং থাবা-গী মিতমসু লৈহন্নীংই৷
৪. নুপী
অথৌবী খরগী মিতমসু থম্বা য়াই৷
৫.
তোঙান-তোঙানবা লমশিংদগী লাকপা মীওইশিংনা হেন্না পূক্নীং চিংশিনবা য়াবা থৌরাং খরসু
পায়খতহন্নীংই৷ নুমিত খূদিংগী লাকপদা চোকথরোইদবা মওংদা শেমগতহন্নীংই৷
৬. নীংশিংখুন
তাবগী লম্বী অসী শেমজিনবীবগা লোয়ননা জিরিবাম বস পর্কিংদগী নীংশিংখুন ফাওবগী মিনি
বস সর্ভিস লৈহন্নীংই৷
৭. জিরিবামগী
পুৱারীগা কোন্ননা নীংশিংখুন ওইরকপগী পুৱারী ইশিন্দুনা লাইরিক ওইনা থমহন্নীংই অমসুং
ইন্টর্নেতকী খূত্থাংদসু পাবা ফংহন্নীংই৷ সোসল নেতবর্কিং গ্রুপতসু পেজ নত্ত্রগা
গ্রুপ হাংদুনা মীয়ামগী পূক্নীং চিংশিনহন্নীংই৷
৮. মণিপুরগী
হেন্দলুম এন্দ হেন্দিক্রাফ্টকী পোতলমশিং ফংবা দুকান অমা সরকারগী নত্ত্রগা লন্নাই
মীওইগী লৈহনবা য়াই৷
৯. নীংশিংখুনগী
ঙাকশেল লোয়শঙ অমা লৈহন্নীংই৷
১০.
লোইশিন্দনা লৈরিবা থবকশিং অসী থৱায় য়াওনা লোইশিনহন্নীংই৷
জিরিবাম
অসী ইং ১৯০৭ কী মমাঙদদি উমং/উনুং ওইনা লৈরম্বনি৷ মণিপুরগী নিংথৌ, অঙম-অথৌ অমসুং মীচমশিংনা ময়াং লৈবাক য়ৌনা
চতপদা জিরি উমং/উনুং
অসী লান্দুনা চতনরম্বনি৷ উনুং অসীদগী অঙম-অথৌশিংনা উ য়াল্লম্মী, শামু ফারম্মী৷ ইং
১৮৫৯ দা লোংজাম্বা পোতশঙবা হঞ্জবা লোমানা লুচিংবা কাঙবু অমনা উনুং অসীদগী শামু ৬৩
ফাখি, ৫ শি, ৪৮ না ময়াংদা য়োল্লম্মী, অতৈনা মীতৈ লৈবাক্তা পুশিল্লম্মী৷
মীতৈ
লৈবাক অমসুং ময়াং লৈবাক অনীগী ঙমখৈদা লৈবা উনুং অসীদা খুন তাবা হৌরকখিবসী
রেকোর্দকী মতুং ইন্না ই ১৯০৭ তগীনি হায়বা খঙবা ঙম্মী৷ মীতৈ লৈবাক্কী বোরসাহেব কোলোনেল সি জে
সেক্সপিয়রগী য়াথং মতুং ইন্না ইনিংথৌ চুরাচান্দগী ময়াম্বুং ইবুংঙো অহল রাজা ডুম্ব্র
সিংহনা জিরি উনুং অসীদা লৌ শেমদুনা/শীন্দুনা মী তাহনখিবনি৷ অহানবা
খুন্দাহনখিবসী-
১.
মীতৈ ১
২.
বামোন ১
৩.
পাঙন ১
৪.
নমসুদ্র ১
৫.
পতলি ১
৬. দেশৱালি
১
৭.
মুচি ১
৮. (?)
জাত ৮
খুন্দাহনখি হায়না ‘চৈথারোল
কুম্বাবা’দা
পল্লম্বা থেংনৈ৷ শজিবু থাদা খুন্দাহনখিবা মীওই ফূরূপ ৮ অসী কসারদগী ঙাক্তনি৷
ইং
১৯২২, ফাইরেন ২০, শগোলশেনদা গান্ধীবু শৌগতপা কাঙবুনা ময়াংদা কৈথেল থুগায়, খজনা
থীহন্দে হায়দুনা মহারাজ চুরাচান্দনা পুলিস সিফাই ১৫০ পুদুনা জিরিবামদা লাকখি,
কাম্রংখাদা থুংখি৷ ময়াং লৈবাক্তা লৈবা মীতৈশিংনা গান্ধী শৌগতলি হায়বা পাউ অদু
চুম্লমদে৷ সিফাই ১০০ দি সিলেত ফাওবা চঙশিল্লুখি৷
ইনিংথৌনা
জিরিবামদা লৈরিঙৈ, লমদা
৩, য়ুমজকৈশদা তিবোং(দিবোং), পাতচাউ খুন ২ না ‘য়াম্না লাই কল্লে, মহয়-মরোংসু ফত্ত্রে’ হায়দুনা খুরম্লৈ৷ শ্রীযুত সনা য়াথং ‘ঙসীদগী হৌনা তীন-কাঙ হন্থবা অদুগা মহয়-মরোং ফবা ওইরো’ হায়না ফৌ য়েনবীরম্মী৷ খুনশিংগী লাইফম-তীনফমদি নামৈরাকপা
অমুখোম্বা পন্দিতপু তৌহনখি৷ ইনিংথৌনা কাম্রংখাদা লৈবা বামোন ব্রহ্মচারিময়ূম মেলৈ
শর্ম্মাবু সর্ভূমা হাপ্পীরম্মী, ফিরাংজি ফিদা, খামেন চতপা পীবিরম্মী৷ অসুম্না মখাগী
মীওইশিং অসীদসু ফম শিন্নরম্মী-
লাইশ্রম
দুলান্ত – কাম্রংখা – দেৱান
সৌগাইজম
চন্দ্র – জিরি লক্ষিপুর – শঙলেন লাকপা
ক্ষেত্রি
ইবুংঙোতোন – জিরি শামু পুনফম – কৈরুংবা
ৱাহেংবা
বাবু – জিরি শামু পুনফম – তেনসুহনবা
খোংবানতাবা
মুহোন – জিরি দিবোং – থাংজহনবা
চোংথাম
বীরচন্দ্র – জিরি চন্দ্রপুর – সাজর
থাংজম
মিকোই – জিরি কাম্রংখা – বলদেব সন্য হজারি
য়েংখোম
বাবু – জিরি চন্দ্রপুর – সুবেদার
হৌজিক্কী
মতম অসীদা খুঙ্গং ৫০ (মখাদা য়েংবিয়ু) লৈবা জিরিবাম অসী ইং ১৯৪০ দা মৌজার ওইদুনা
মৌজাদার লৈরম্বদগী ইং ১৯৫০ দা এসদিসি (সব দিপুটি কলেক্টর) ওফিস হাংদুনা লৈরকখিবনি৷
চহী ১০-১০ গী মীকোক মশীং থীবা অসীদা মণিপুরী (পাঙন অমসুং মীতৈ য়াওনা) না
নোংমা-নোংমগী মীশীং হন্থরকপা অদুগা মীতোপনা কা হেন্না মশীং হেনগতলকপা জিরিবাম
অসীগী মরাইবক অসীদা মপূং ফাবা দিষ্ট্রিক্ট অমা ওইরকপদু য়াম্নমক নকশিল্লক্লবনি৷ ঈখঙ
খঙহৌদনা নুমিত অমদা হেক্তমক লাউথোরক্তুনা চতনবসু য়ারিবনি৷ অসীগুম্বা লমদম অসীদা
নীংশিংখুন অমা লৈহৌবা অমসুং মসীগী মশক হেন্না থোকহনবা হায়বসী য়াম্নমক তঙাইফদবনি৷
নীংশিং খুনগী হৌজিক লৈরিবা পোপুলরিতি অসী ঐখোয় মণিপুরী খক্তদা নত্তনা ভারতকী অমসুং
মালেমগী মীওইশিংগী মরক্তসু পোপুলরিতি শাগতনবা ঐখোয় খূদিংমক্না হোতনবা চুমগনি খল্লি৷
নীংশিংখুনদা
ঐখোয় তোয়না উনবা চঙলি৷ অথৌবশিংগী মুর্তি মরুমদা লেপ্লগা তুংলমচতকী থৌরাং কয়াগী
পোমীত য়াতমিন্নবা চঙলি৷ ঐখোয়না ঙসী মফমসীদা শৈরেং পাথোকমিন্নগদবা, ঈশৈ শকমিন্নগদবা
অসীনা হেন্না মশক থোকপা তুংলমচত অমগী অফবা শৈহৌ ওইহৌরসনু হায়বসী থম্লগা তেনশিঞ্জরি৷
