Thursday 22 September 2016

assamda manipuri sumaang lilaa

অসামদা মণিপুরী সুমাঙ লিলা
এন দি হোদাম্বা



সুমাঙ লিলাঃ মশক তাকপা

সুমাঙ লীলা হায়বসী মীয়াম্না থোইদোক্না য়াম্নমক পাম্নবা ফোক থিয়েটরগী মনুং চনবা কলাগী মচল ময়ামগী মনুংদা অমনি। মচল অসী কলাকার অমদগী হেনবনা সুমাঙ নৎত্রগা মান্দোব নৎত্রগা অহাঙবা মফম অমদা লিলা শান্নরগা শান্নফম অদুগী অকোয়বা মায়গৈ মরিমক্তগী ভাবোক্না কোয়শিন্দুনা য়েংবনি। শান্নরিবা লিলা অদু অহৌবা, ময়ায় অমসুং পোলোই নাইবা ৱারী অমদা য়ূম্ফম ওইবনি। মতমগী মতাংদা হায়বা য়াবদি- চাউরাক্না পূং ১.৩০ দগী পূং ৩.০০ ফাওবগী মনুংদা ৱারী অমবু লান্থোকপনি হায়বসীনি। শান্নফম অসীনা চাউরাক্না ফুট ১৮ অমসুং ১৮ গী মরাক-ময়ূং ওইবা লমগন অমগী মনুংদা ওই, মসী কোন্নথংদা লেপ্পকপা মশক অমনি।

সুমাঙ লিলাঃ খোঙহৌ অমসুং খোঙচৎ

সুমাঙ লিলানা মশাগী মশক অমা লেপ্তুনা মপুন্সী ফংবা ঙমখিবসী ফাগি লিলাদগীনি। ফাগি লিলা হায়বসী ইনিংথৌ চন্দ্রকীর্ত্তি (১৮১৫-১৮৮৬) সনা হাক্তক্তা মপান ফনা হৌরকপনা ইনিংথৌ চুড়াচান্দ (১৮৯১-১৯৪১) সনা হাক্তক ফাওবদা মপাঙ্গল লৈনা চত্থরম্বা কলাগী মশক অমনি। মিং পনবা য়াবা ফাগি লিলা খরদি- অবুজাম্বা ফাগি, চেংবা ফাগি, য়োৎশুবী মখোঙ, কাবুলি পালা, ফদিবী পালা অসীনচিংবনি। মিং লৈখিবা ফাগিরোয় খরদি- অবুজাম্বা সাইতোন অমসুং খরিবম লাইসুবা (অনী অসী ইনিংথৌ চন্দ্রকীর্ত্তিগী অচানবা মনাই অনীনি। ফাগি লিলা হায়বসী মখোয়না নিংথৌগী সনা য়াথং ফংদুনা শেমগৎখিবনি), লাইথংবা, উরিৎ মহূম, হৈনীং মরূ, চেংবা শাবা বাবুল, অকোনবা চেংবা শাবা থাংজম শিতল, কোলু থোংপাক, মুতুম ইবোতোন, ঙাথেম পোদোন, লৈশাংথেম অমুথোই, চুংখা হৌদোং, মোইরাং শারী অসীনচিংবনি। মখোয়শিংসীগী মথক্তা নুপী শাখিবা লিলারোয় খরগী মিং পঞ্জরবদা – থোকচোম চাউয়াইমা, কোন্সম য়াইমবী, লৌরেম্বম ইবোচা খোয়সিনি। ইবোচানা নুপী শাবদু মশক য়াম্না ফজরম্মী, মরম অসীদগী নিংথৌনা ‘ইবেচা’ হায়না কৌবিরম্মী। নিংথৌনা কৌবা মিংদগী ‘ইবোচা’বু ‘ইবেচা’ হায়না লৈবাক্না শকখঙনখি।

ইনিংথৌশিং অসীগী হাক্তক্তা শান্নখিবা ফাগি লিলাশিং অসী লৈবাক নিংথৌমক্না য়াবা অমসুং ফনা শীংথানরম্বতা নত্তনা থৱায় য়াওনা শৌগৎলম্বা কলাগী মশক অমা ওইরম্মী। বৃটিশ ওফিসরশিং নৎত্রগা মপান লমগী নিংথৌ অঙম-অথৌশিং মণিপুরদা লাকপা মতমদা মখোয়বু তরাম্না ওক্তুনা লমশাং লাকপগী অৱাবা পোত্থাহনবা ওইনা ঊৎখিবা কুমৈগী মচলশিংদা ফাগি লিলা অসীসু অমা ওইরম্মী। চৈথারোল কুম্বাবাদা পল্লম্মি-

‘লাৎসাহেবনা মহারাজদা লুপাগী তকমান পীএ। লোইরগা শগোল কাঙজৈ, মূক্না, লমজেন, খৌশাবা অসীনচিংবা কুমৈ য়াম্না তৌএ। মতীক য়েংনা লুপা পীএ। অহিংদা জগোয়, খূবাক ঈশৈ, ফাগিনচিংবা কুমৈ তৌএ।’ (লামায় ৫৩৮-৩৯)

‘থাসি নোং নিংথৌকাবা তখেল নিংথৌনা মনাউ অহুমগা বাবু ফম্নাইবা ৭, সাহেব ১, মীনাই ২৫ সূপ্না মী ৬১  থুংলৈয়ে। অদু নুমিৎতা হোলিনে, য়োৎশুবী ফাগিসি য়েংহল্লে।’ (লামায় ৫৫৪)

ফাগি লিলা লোইরকপদা সামাজিক হায়দুনা মতেক অমা নপশিনবা, খোংজোম লানগী মীৎনা উহৌবা পাউদম এক্টিংগা কোন্ননা সনা মাঙদা পাউদম্বা, ফম্বাক্তা শান্নবা বাংলা লোনগী লিলা উরকপা নৎত্রগা তারকপা থৱায় য়াওবা ওজাশিংনা সুমাঙ লিলাগি মশক অসী শেমগৎ-শাগৎলকখিবনি। অহানবা ওইনা শান্নখিবা সুমাঙ লিলা অসী ইং ১৯১৮ দা শান্নখিবা ‘হরিশ্চন্দ্র’ অসিনি হায়না য়ানরি। ৱাফম অসী ওজা অরাম্বম সমরেন্দ্রনসু শৌগৎপীরম্মী।

মতাং অসীদা পঞ্জনীংবা ৱাফম অমদি, ফাগি লিলাদগী মপুন্সী ফংখিবা সুমাঙ লিলা অসীগী য়ূম্ফমদি মীতৈ লাই হরাওবগী থৌরম পরেংশিংদা য়াওবা তাংখুল থোকপা, খোরীফাবা, হিন্দু লাইনীংগী ঈথিলদগী শাগৎলকপা রৌখালদা য়াওবা মপা শাবা, মমা শাবা, হিংচাবা থোকপা, বালাবাসু থোকপনচিংবা অসীনা ওইখিবনি হায়বসীনি। ফম্বাক লিলাদি মপূং ওইনা মপান্দগী চঙশিল্লকখিবা কলাগী মচল অমনি অদুম ওইনমক, সুমাঙ লিলাদি মণিপুরগী লৈহাওদগী ময়েক শেংনা শাগৎলকপা কলাগী মচল অমনি হায়বসীনি। 
সুমাঙ লিলাগী চাওখৎলকপা মশক ওইনা ইং ১৯৮০ গী অঙনবা শরুক্তা ঈশৈ লিলা অসী পোকখি। ঈশৈ-নোংমাইগী অনৌবা মহাউ অমা মচল শুরবা যন্ত্রশিংগা লোয়ননা হাপচিল্লকপনা সুমাঙ লিলাগী খোঙচৎতা অঙকপা য়াওল ঈহৌ অমা ওইখি। হৌজিক্কী মতমদদি দিজিতেলাইজ ওইরবা মশক্তা লীশিন্দুনা ওদিও অমসুং ওদিও ভিজুএলগী খূত্থাংদা ইরায় লায়নসু ফংবা ঙম্লে। মসীদগী ঐখোয়না লেপথোকপা য়াবা ৱাফম অমদি- সুমাঙ লিলা অসী ঐখোয়না মশক অহূমদা ফংবা ঙম্লে হায়বসীনি। মখোয়শিং অদুদি-

১. লাইব ফোর্মেৎ (ভাবোকশিংগী মাঙদা হকথেংননা শান্নবা লিলা)
২. ওদিও ফোর্মেৎ (খোঞ্জেল ওইনা তানবা রেকোর্দ তৌদুনা পুথোক্লবা লিলা)
৩. ওদিও-ভিজুএল ফোর্মেৎ (খোঞ্জেল ওইনা তানবা অমসুং য়েংনবা রেকোর্দ তৌদুনা পুথোক্লবা লিলা)

অসামদা মণিপুরী সুমাঙ লিলাঃ মতম খায়বা

অসামদা শান্নখিবা সুমাঙ লিলাগী খোঙচ অসী য়েংলগা ঐখোয়না মপূং ওইনা মতম অহুম থোক্না খায়বা য়াই। মখোয়শিং অদুদি- অহানবদা অঙনবা মতম, অনীশুবদা ময়ায় চনবা মতম অমসুং অহুমশুবদা অনৌবা মতম হায়বসীনি। অঙনবা মতম হায়বসী চাউরাক্না ইং ১৯৫০ গী মমাঙগী মতমবু খঙনবা পাম্মী। ময়ায় চনবা মতম হায়রগনা ১৯৫০ গী মতমদগীনা ৮০ গী মতম অসীফাওবা থম্বা পাম্মী। ৮০গী মতম অসী য়াম্নমক মরু ওইবা মতমনি। মতম অসী ময়ায় চনবা মতমগী সুমাঙ লিলানা খোঙচৎ তপশিল্লকপা অমসুং অনৌবা মতমগী ঈশৈ লীলানা ময়োল চোংখৎলক্তুনা মশা-মথেন ফাগৎলকপা মতমনি। মরম অদুনা ১৯৮০গী মতম অসীদগী অনৌবা মতম অসী লৌবা পাম্মী।

অঙনবা মতমঃ

অসামদা রৌখালগী বালাবাসু থোকপা অমসুং লাই হরাওবগী তাংখুল থোকপনচিংবদা য়াওরিবা লিলাশিং অসীদগী চাওখৎলকপা মশক্তা শান্নরকপা অহানবা লিলাদি মোইরাং পর্ব্ব অসীনি। লিলা অসী মতমদুগী শিলচরদা মহৈ তমখিবা মণিপুরী মহৈরোয়শিংনা পূনশিল্লগা শেম্বা মীতৈ ছাত্র মরূপ-না শিলচরগী মধূরামুখতা ফম্বাক শারগা ইং ১৯১৮ দা শান্নখিবনি হায়বসীনি। ওজাশিংদগী ফংজবা লীখুন মতুং ইন্না ইং ১৯৫০ মমাঙ ফাওবদা শান্নখি হায়না রেকোর্দ তৌরবা লিলাশিং মখাদা থমজরি-

পরিং
লিলা মমিং
অইবা / হন্দেোকপা
শান্নখিবা কাঙবু / লম
শান্নখিবা চহী
লমজিংবা
মোইরাং পর্ব্ব

মীতৈ ছাত্র মরূপ, মধূরামুখ, শিলচর
১৯১৮

হরিশ্চন্দ্র
নাউরিয়া ফুলো
লাইশ্রমখুন, জারিবোন
১৯১৮-২০

রাম বনবাস
,,
,,
,,

হরিশ্চন্দ্র
খাঙেম্বম বাগেন্দ্র, ওজা সনাহল
---
১৯১৯

ধ্রুব চরিত
,,
---
,,

হরিশ্চন্দ্র

লাইশ্রমখুন, মমাঙ লৈকাই, জারিবোন
১৯২৭-২৮
বীরচন্দ্র শর্ম্ম
মোইরাং পর্ব্ব

লাইশ্রমখুন, মনীং লৈকাই, জারিবোন
,,
অসেম সেনাপতি
চন্দ্রহাস

জোরাগুল
১৯৩২-৩৩

সিতার পতাল প্রবেশ
নাউরিয়া ফুলো
লাইশ্রমখুন, জারিবোন
১৯৩৫

১০
রামায়ণ

বেরাখাল, শিলচর
১৯৩৫-৩৬
ললিত মোহন শর্ম্ম
১১
ভারত হরণ লান

লালা, জারিবোন
(১৯৩৭-৩৯)

১২
রামায়ণ

,,
,,

১৩
চন্দ্রহাস

ভাটিরগ্রাম, জারিবোন
,,

১৪
পাউনা ব্রজবাসি

জোইপুর, কাছাড়
১৯৪০
অয়েকপম ধনঞ্জয়
১৫
কংস লিলা

চান্দপুর, সোনাই
১৯৪০-৪১
কাংঙবম মুদি
১৬
মোইরাং পর্ব্ব

চান্দপুর, সোনাই
১৯৪৩
কৈশামগী ওজা
১৭
বিরাত পর্ব্ব

জোরাগুল, সোনাই
১৯৪৪
পণ্ডিত চন্দ্রশেখর
১৮
পুত্র পরিচয়

সোরামখুন, জারিবোন
১৯৪৫
ওজা গুলাপসনা
১৯
হরিশ্চন্দ্র

,,
,,

২০
সাবিত্রি সত্যবান

,,
,,

২১
মোইদানা

তোনজাউবী পার্টি, লাইশ্রমখুন, জারিবোন
(১৯৪৭-৪৮)
ওজা ধন

মতম অসীদা শান্নখিবা লিলাশিং অসী মপূং ওইনা পৌরানিক অমসুং ঐতিহাসিক ওইবা ৱারীদা য়ূম্ফম ওইরগা শান্নখিবা ঙাক্তনি।  ‘মোইরাং পর্ব্ব’ হায়রিবা লিলা অসী নত্তবা অতৈ লিলাশিংদি হিন্দু লাইনীংদা য়ূম্ফম ওইবা ঙাক্তনি।

মতাং অসীদা পঞ্জনীংবা ৱাফম অমদি- অহানবগী লিলা মঙা অসীগী মতাংদনি। অহানবা লিলা ‘মোইরাং পর্ব্ব’ অসী ফম্বাক লিলা ওইনা শান্নখিবনি হায়বসীনি। অনীশুবা অমসুং অহুমশুবদা লৈরিবা লিলা অনী অসী লাইনীংহন নাউরিয়া ফুলোনা ইবনি হায়বসীদি শেংলে অদুবু করম্বা লিলাগী মওংদা শান্নখিবনো হায়বসীদি লেপথোকপা ঙমদনা লৈবনি। মরিশুবা অমসুং মঙাশুবা লিলা অসীসু ফম্বাক লিলাগী পরিংদা লৈবা ওইনা উবা ফংই। নৈন-চেরোল অসীনা লাইশ্রমখুন মমাঙ লৈকাইদা ইং ১৯২৭-২৮ অসীৱায়দা ওজা বীরচন্দ্র শর্ম্মনা তাকপী-তম্বীদুনা শান্নখিবা ‘হরিশ্চন্দ্র’ অসীনা অহানবা সুমাঙ লিলানি হায়না লৌবা পামজৈ। মশামক য়াওদুনা লিলাদা বিশ্বামিত্র মুনিগী শক্তম লাংখিবা ওজা বীরচন্দ্র শর্ম্ম মণিপুর সনা লৈবাকতগীনি। মহাক্না মণিপুরদা অহানবা শান্নখিবা সুমাঙ লিলা ‘হরিশ্চন্দ্র’ উরক্লম্বা য়াই, লাইশ্রমখুন মমাঙ লৈকাইদা লৈবা লাইনীংহনগী খূৎই অদুসু তানরম্বা য়াই। লিলাসিদা নুপীগী শক্তম নুপানা লাংখি।

হরিশ্চন্দ্র’ ফোঙদোকখ্রবা মতুংদা লাইশ্রমখুন মনীং লৈকাইদসু হিদান্নবগুম ‘মোইরাং পর্ব্ব’ পানখৎলকপনি। লিলা অসীসু মণিপুর সনা লৈবাক্তগী লেঙবীরকপা ওজা অসেম সেনাপতিনা তাকপী-তম্বীবনি। নুপানা থোইবী শাবদগী ভাবোককী থমোয় চিংশিনবা খরা ৱানা থোক্লুবদু নুপীনা শিনবদগী লাইশ্রমখুনগী মোইরাং পর্ব্ব  হায়না মমিং চৎখি, জারিবোনগী লৈকাই পূম্নমক্তা লিলা শান্নফম ফংখি। লিলা অসীদা শক্তম লাংখিবা নুপী আর্টিষ্ট অনীনি মখোয়শিং অদুদি- থোইবীগী শক্তমদা অসেম ইনাক খুনবী অমসুং সেনুগী শক্তমদা চোংথাম রুহিনি-নি। চোংথাম রুহিনিগী তুংদা নাউরেম তোম্বীনা সেনুগী শক্তম লাংখি। মীৎয়েং অসোমদগী হায়বা য়াবা ৱাফম অমদি- অসেম ইনাক খুনবী, চোংথাম রুহিনি অমসুং নাউরেম তোম্বী অসামগী মণিপুরী সুমাঙ লিলাগী তাইবংদা থোরকখিবা অহানবা নুপী আর্টিষ্টশিংনি হায়বসিনি।

ইং ১৯৪৪, জোরাগুলদা শান্নখিবা লিলা ‘বিরাত পর্ব্ব’ অসীবু তম্বীখিবা ওজা পণ্ডিত চন্দ্রশেখরসু মণিপুরদগীনি। অসুম্না, অসামগী মণিপুরী সুমাঙ লিলা অসী মণিপুরগী ওজাশিংনা হকথংননা নৎত্রগা নাকোয়ননা ইথিল পীরগা হৌগৎনরকপনি হায়বসীনি।

ময়ায় চনবা মতমঃ

অসামগী মণিপুরী সুমাঙ লিলাগী খোঙচৎতা অনৌবা খূনীংথেক অমা লাকখিবসী বোনতারাপুরগী ‘মোইরাং পর্ব্ব’ থোরকপা অসীদগীনি হায়না লৌজরি। সুমাঙ লিলাগী টেক্নীক, ৱারী পরীং, মেক-অপ, কোষ্ট্যুমনচিংবদা হান্নদগী খরা হেন্না ফগৎলকপা মশক উবা ফংখিবা অসীদা য়ূম্ফম ওইরগা খূনীংথেক অসী মতাং অসীদগী লৌজবনি। লিলা অসী য়াম্নমক ফনা শীংথানখিবা, মীয়াম্না ফনা শোন্নখিবা লিলা অমা ওইখিবনি। তৌবগীদি তেক্নীকতা খরা হেন্না ফগৎলকপা উখিবা অহানবা লিলাদি ‘বিরাত পর্ব্ব’ (১৯৪৪) অসীদগীনি হায়না উহৌবা ওজাশিংনা পনবি। ময়ায় চনবা মতম অসীদা শান্নখিবা লিলাশিংগী মরক্তগী খরগী মমিং-মথা মখাদা থমজরি-

পরিং
লিলা মমিং
অইবা
শান্নখিবা কাঙবু / লম
শান্নখিবা চহী
লমজিংবা
মোইরাং পর্ব্ব

বোনতারাপুর
১৯৫০
ওজা অমুথোই
ভাগ্যচন্দ্র

লক্ষিপুর
১৯৫০

মধু-মালতি

বারমোনি
১৯৫১-৫২

চিত্রাঙ্গদা

চান্দপুর
১৯৫৪-৫৫
লাইরেনময়ূম তাম্রধ্বজ
মৈরাচরিত

মঙ্গোলপুর
১৯৫৫
মোইরাংথেম নিলজিত
নরসিংহ

বেরাবাক
১৯৫৯
ওজা জুগেশ্বর
লোইকা লোইকুম

মুতুম অতেনগী পার্টি, মঙ্গোলপুর
১৯৬০
ওজা সেউরা
শামু খোঙয়েপা

,,
,,
,,
লৈ লাংবা

,,
,,
,,
১০
রামায়ণ

বাম মালুগ্রাম
,,
ওজা আনন্দ
১১
লৈ-লাংবা

লৈহৌপোকপী
১৯৬৫
হাউবম ধনবাবু
১২
লিলা নাচোম

মঙ্গোলপুর নহারোল
১৯৬৭

১৩
অস্বপতি মহারাজ

মিরিরগুল, জারিবোন
১৯৬৯

১৪
লৈরাং পরেং
থীক্নাম গঙ্গা
নহারোল লিলা পার্টি, জোরাগুল
১৯৭৩
থীক্নাম গঙ্গা
১৫
ইঙেল্লৈ
ওজা বামচা
নহারোল লিলা পার্টি, জোরাগুল
১৯৭৪
থীক্নাম গঙ্গা
১৬
হেঞ্জুনহা

দি মীতৈ শৈশোল্লূপ, জারিবোন
১৯৭৪
নাউরিয়া লালমোহন
১৭
সতি খোংনাং

,,


১৮
তাউজিং অমত্তগী হৈরাঙ
মোইরেংজম দেবো
,,


১৯
মধু-মালতি

,,


২০
মচিন-মৌপ্বা
কোন্সম বিনোদ
নালুবাক
১৯৭৪

২১
পুন্সী লৈপুন
,,
,,
,,

২২
শমজীগী লৈরাং
,,
,,
,,

২৩
নিঙোল ১,২,৩

নিঙোল পাখঙ য়াত্রা মন্দল, চান্দপুর
১৯৭৪-৭৫

২৪
খোঙ্গাউনরবী লৈরাং
মুতুৱা নিলমোহন
মঙ্গোলপুর নহারোল সুমাঙ লিলা পার্টি
১৯৭৫-৭৬
মুতুৱা নিলমোহন
২৫
ঐদি মীনাইনি, মীওই শুদ্রবনি
,,
,,
,,
,,
২৬
ইমা

পামুবী আর্টিষ্ট, চান্দপুর
১৯৭৭

২৭
থম্বালনু

,,
১৯৭৭

২৮
ঐখোয় অমত্তনি
ব্রজবিধু শর্ম্ম
রূপরঙ্গ আর্টিষ্ট এসোসিএসন, জোরাগুল
১৯৭৭

২৯
খূবাক খূনম
মাইবম রামচরণ
,,


৩০
নীংশিংলি মেরাগী থাবল
য়ূম্নাম ইবোমচা
,,


৩১
লমজিং মৈরা
কে এম চন্দ্র শর্ম্ম
,,


৩২
তায়োন্নবা লমন
থীক্নাম গঙ্গা
,,


৩৩
তাইবংগী ৱাংমদা
মুতুম চীংলেন
,,


৩৪
অরোইবা মরূ
মুতুৱা নিলমোহন
,,


৩৫
সন্ধ্যাগী লৈচিল
রাজেন তোইজাম্বা
,,


৩৬
সনাপাকী থারিকথা
চনা লুখোই
,,


৩৭
প্রাইশ্চি

ক্ষেত্রিখুন, জারিবোন
১৯৮১
সোরোকখাইবম সুরেন্দ্র
৩৮
মী নত্তে শানি

পান মীতৈ লৈম লিলা পার্টি, কালাখুন, হোজাই
১৯৮৩-৮৪
থরোইজম হরি, ওজা শিঙ্গাবী
৩৯
জা ওনবা

,,
,,
,,
৪০
মণি নত্তে কলঙ্কিনিনি

,,
,,
,,
৪১
পুন্সী ৱারী

,,
,,
,,
৪২
ঈ থক্লবা কংলাশা
রাজেন তোইজাম্বা
শজিক-থবা আর্টিষ্ট এসোসিয়েসন, কাছাড়
১৯৯২
৯৬১৩৩৬৭৪২৯
জীবন
৪৩
ঈগী তর্পন

থাংজমলৈকাই
১৯৯৪
ওজা ইরাবোত

ময়ায় চনবা মতমগী অহানবা তংখায় হায়বদি ইং ১৯৭০ গী মমাঙগী মতম অসীদি অঙনবা মতমগী মতৌগুম পৌরানিক অমসুং ঐতিহাসিক ওইবা ৱারী পরীংদা য়ূম্ফম শেমদুনা শাগৎপা লিলা ঙাক্তনি। মতম অসীগী অনীশুবা তংখায় অসীদি অয়াম্বনা সামাজিক ওইবা লিলারোমদা মাইয়োন থম্বা উবা ফংই। সামাজিক লিলাগী পরীংদা ওজা থীক্নাম গঙ্গাগী ‘লৈরাং পরেং’ অসীনা মাঙজিন থাবা ওইনসু লৈবা উরি। মতম অসীদা শান্নবা লিলাশিংদা হেন্না চেকশিনবা মতৌ উবা ফংই।

মতম অসীদা শান্নখিবা লিলা লূপশিংগী মনুংদা থোইদোক্না শীংথাবা য়াবা অমদি জোরাগুলগী রূপরঙ্গ আর্টিষ্ট এসোসিএসন অসীনি। লূপ অসী অসামগী সুমাঙ লিলাগী তাইবংদা খ্বায়দগী মায় পাক্না লিলা শান্নখিবা, ট্যুরিং লিলা পার্টি অমা ওইনসু লৈবাক শীনবা থুংনা মীয়ামগী থৌগল তৌখিবা লিলা লূপ অমা ওইবা ঙমখি। ইং ১৯৮০ দা কাপ্টানপুর নয়াগ্রামগী ৱেলফ্যের কমিতিনা চীংদোংলৈকায়দা শীনখিবা সুমাঙ লিলা কম্পিটিসনদা পার্টি অসীনা শান্নবা ‘ঐখোয় অমত্তনি’না অহানবা মনা অমসুং চান্দপুরগী পামুবী আর্টিষ্টনা শান্নবা ‘ইমা’না অনীশুবা মনা ফংখি।

ময়ায় চনবা মতমগী অনীশুবা তংখায় অসীদি রূপরঙ্গ-গী মতমনি হায়না লৌবা য়াই। মতম অসীদা লৈরম্বা লিলা লূপশিংগী মনুংদা থোইদোক্না শীংথানবা য়াবা খরদি- দি মীতৈ শৈশোল্লূপ, জারিবোন, নিঙোল পাখঙ য়াত্রা মন্দল, চান্দপুর, মঙ্গোলপুর নহারোল সুমাঙ লিলা পার্টি, পামুবী আর্টিষ্ট, চান্দপুর অসীনচিংবনি।

মতম অসীদা ব্রহ্মপুত্র তম্পাক্লোমদা লৈখিবা মীতৈ ইচিল-ইনাউশিংনসু লিলা শান্নরম্বা উবা ফংই। হোজাই, নগাও লান্থোক্তুনা বরাক তম্পাক্লোমদা লিলা ঊলনবা য়ৌরকখি। শীংথানবা য়াবা টিম অমদি- পান মীতৈ লৈম লিলা পার্টি, কালাখুন, হোজাই অসীনি। মখোয়না শ্রীবারদা লিলা ঊলখি, জোরাগুলদা ঊকদবা নুমিতু নোং চুথরক্তুনা ঊৎপা ঙমহৌদে। অচিনবা লৈখিবদগী মখা তানা লৈথদুনা লিলা ঊৎপা ঙমখিদে হায়না ওজা মুক্তা সিংহনা ৱারী তম্মী। ট্যুরিং লিলা পার্টিগী থাক্তা কাখৎলকখিবদি লিলা লূপ অসীখক্তমক উবা ফংখি। অতৈদি লৈকাই-লৈকাইদা শান্নবনি হায়নসু ওজানা পনবী।

অনৌবা মতমঃ

অনৌবা মতম হায়বসী ঈশৈ লিলা থোরকখিবা মতম অদুদগীনি হায়না নৈন-চেরোল অসীনা লৌবা পাম্মী। অসামগী মণিপুরী সুমাঙ লিলাগী তাইবংদা ঈশৈ লিলা থোরকখিবসী ইং ১৯৮৫ দা বাম মালুগ্রামগী কাঙবুনা শান্নখিবা ‘মীত্তাঙবা কলাকার’ হায়বা লিলা অসীনি। লিলা অসীগী ঈশৈশিং মমিং লৈরবা শৈশকপা ওজা শ্রী বি কুঞ্জবিহারী শর্ম্মনা শকখিবনি। লিলা অসীনা অহানবা মপূং ফাবা অমসুং মচু তারবা ঈশৈ লিলানি হায়না লৌবা য়াই। অদুম ওইনমক, জারিবোনগী বামোন লৈকাইদা ইং ১৯৮২ দা শান্নখিবা লিলা প্রেমলতা অসী ঈশৈ য়াওনা শান্নখিবা লিলা অসীনা অহানবা য়ূম্ফম থোনখিবনি হায়না লৌবসু য়াই। অনৌবা মতম অসীদা শান্নখিবা ঈশৈ লিলা খরগী মিং পঞ্জরবদা

পরিং
লিলা মমিং
অইবা
শান্নখিবা কাঙবু / লম
শান্নখিবা চহী
লমজিংবা
প্রেমলতা

বামোন লৈকাই, জারিবোন
১৯৮২
ওইনাম উপেন্দ্র
মীত্তাঙবা কলাকার
সুনামনি সলাম
বাম মালুগ্রামগী কাঙবু
১৯৮৫

নমৌ ইবেম ৱারকউ ইমা

অথৌবা নীংশিংলূপ (লক্ষিপুর)
১৯৮৭-৮৮

আশাগী ৱাংমদা
পোশঙবম বীরহরি
,,
১৯৮৭-৮৮

ঐখোয় তামোসে চাকইকো

,,
১৯৮৭-৮৮

অনম্বা শম্ব্রু

,,
১৯৮৭-৮৮

৭.
পুনশিলহৌদ্রবা শম্বুল
এস মণিকুমার
বরাক ভেলি ওপেরা য়ুনিয়ন (রোংপুর)
১৯৯০

লৈরোলনুংদা থম্বাল
কে মঙ্গি
ইরমদম মীতৈ আর্টিষ্ট য়ুনিয়ন (ভাদ্রি)
১৯৯২
য়ুম্নাম ইন্দ্রবাবু
পুন্সীগী পাপ
কোন্থৌজম বিস্বজিত
,,
১৯৯২

১০
মঙলানগী ফূরা

ক্বিভর আর্টিষ্ট এসোসিএসন (শ্রীবার)
১৯৯২-৯৩

১১
কংলৈপাককী ৱাংমদসু
সোমোর লুৱাং
নেশনেল থিএটর সেন্টর, অসাম
১৯৯৪

১২


ইমোইনু শাথেকলূপ (পোইলাপুল)
১৯৯৫-৯৬
আর কে নরেন
১৩
লৈশাবীদো মমানি

নেশনেল থিএটর সেন্টর, অসাম
১৯৯৬

১৪
পিরাংসে নঙগীনি
হিয়াং দেবেন
,,
১৯৯৬

১৫
পাউখুমদো থমোয়গীদি নত্তেকো

বরাক ভেলি আর্টিষ্ট য়ুনিয়ন (চীংদোংলৈকাই)
১৯৯৭
থীক্নাম গঙ্গা, অরাম্বম চন্দ্রমোহন
১৬
মৈরীরক্তা

নেশনেল থিএটর সেন্টর, অসাম
১৯৯৭

১৭
গধানা মী ওনবা
মণিকুমার নাউরেমচা
,,
২০০১

১৮
শজিবুগী নোংলৈ
,,
,,
২০০১

১৯
ইমৌ ইবেম
,,
,,
২০০২

২০
নুংশিবৈ চৈনাখোল
রাজেন তোইজাম্বা
,,
২০০২

২১
কদোমদনো ধ্রুবতারা
মণিকুমার নাউরেমচা
,,
২০০৩-০৪

২২
অহিংবলক্তা অশিবগী লান
,,
,,
২০০৬

২৩
লৈরোলনুদা থম্বাল

,,
২০০৬

২৪
মসিনা ফরোইদ্রনে

,,
২০০৬

২৫
মৈরীরক্তা মৈরানবী

সুমাঙ লিলা লূপ, সিঙ্গেরবোন
২০১২
চনম রাজেন, উসম চাউবা
২৬
অহূবা লন

,,
২০১৩
উসম চাউবা
২৭
লৈকং থম্বাল

,,
২০১৪
উসম চাউবা
২৮
নাথৈখ্রবা ঈচেল
সোমোর লুৱাং
নেশনেল থিএটর সেন্টর, অসাম
২০১৪-১৫
সোমোর লুৱাং
২৯
লগেকো ইমা

সুমাঙ লিলা লূপ, সিঙ্গেরবোন
২০১৫
উসম চাউবা
৩০
হিংবগী মমল

,,
২০১৬
উসম চাউবা
৩১
মোংবনা য়ূমজঙবা
কুঞ্জলাল য়েন্দ্রেম্বম
নেশনেল থিএটর সেন্টর, অসাম
২০১৬
সোমোর লুৱাং

ইং ১৯৮০গী মতমসি সুমাঙ লিলাগী ময়ায় চনবা মতম অমসুং অনৌবা মতমগী শামজিন্নবা মতমনি। হান্নদগী চত্থরকপা পরিংনা মখা শমথরকপদু অনৌবা মচল ওইবা ঈশৈ লিলানা মহূৎ শিনজিল্লকপনি। অসুম্না মহূৎ শিনজিল্লকপা অসীনা ইং ২০০০ ফাওবদদি সুমাঙ লিলাগী হান্নগী লৈরম্বা মশক অসী খমখি, ঈশৈ লিলানা মপূং ফানা মহূৎ শিনখি।

মতাং অসীদা ‘ঈশৈ লিলা’ হায়রগা খঙনরিবসী করিনো হায়বগী মতাংদা খরদং থমজনীংই। ‘ঈশৈ লিলা’ হায়বসী হান্নদগী চত্থদুনা লাকপা সুমাঙ লিলাগী মখা তানা চাওখৎলকপা মশক অমনি। হান্নদগী চত্থরকপা সুমাঙ লিলাগী মশক অদুমক্তদা মতাং মতম চানা ঈশৈ-নোংমাই অমসুং জগোইগী মফম হাপচিল্লকপা, ঈশৈশিংদু প্লেবেক সিঙ্গর অমনা বেকগ্রাউনদগী শক্লগা লিলারোয়শিংনা ভাবোককী মাঙদা এক্ট তৌদুনা ঊৎথোকপা, সাউন্দ অমদি ম্যুজিকেল ইফেক্টশিং শীজিন্নরকপা, ফিজেৎ-লৈতেং অমদি অতৈ মচলশিংদা ফিল্মগুম্না অয়েংবা ভাবোকশিংগী পূক্নীং চিংশিনবা ঙম্নবা হোৎনদুনা শান্নবা লিলা অদুবুনি ‘ঈশৈ লিলা’ হায়রিবসী। য়াম্না শম্না হায়রবদা – ঈশৈ নোংমাইগী শরুক য়াওনা শান্নরবা সুমাঙ লিলাবু ‘ঈশৈ লিলা’ কৌই হায়বসীনি।

ঈশৈ লিলাগী মতমদা খ্বাইদগী অচৌবা ফিদা কনখিবদি নেশনেল থিয়েটর সেন্টর, অসাম হায়রিবা লূপ অসীনি। লূপ অসীনা ইং ১৯৯৪ দা মখোয়গী অহানবা লিলা ‘কংলৈপাক্কী ৱাংমদসু’ হায়বসী পুথোরকখি। লূপ অসীনা ঙসী ফাওবদা লিলা ২০ রোম হেন্না লিলা মফম ৫০০ রোম হেনবদা ঊৎপা ঙমখ্রে। অসামগী মণিপুরী সুমাঙ লিলাগী তাইবংদা অনৌবা মতম অসীদি নেশনেল থিয়েটর সেন্টর, অসামগী মতমনি হায়না লৌবা য়াই। লূপ অসীনা ইং ২০০০ গী মতম অসীদি মতোমতনা লৈবাক্কী থৌগল তৌরম্মী। মথংগী চহী ১০ গী মতম হায়বদি ইং ২০১০গী মতমদা মরোয়-মনাউ ওইবা লূপ ওইনা সুমাঙ লিলা লূপ, সিঙ্গেরবোন অসী থোরক্তুনা পূন্না লৈবাক্কী থৌগল তৌমিন্নরকখি। চৎলিবা চহী ১০গী মতম অসীদা হায়রিবা লিলা লূপ অনী অসীখক্তনা মীয়ামগী থৌগন তৌরিবা ওইনা উবা ফংই। হৌজিক ফাওবদা খ্বাইদগী মপুন্সী শাংনা হিংবা ঙম্বা অমসুং লিলা মশীং খ্বাইদগী য়াম্না ঊৎপা ঙম্বা লূপসী নেশনেল থিয়েটর অসামনা ওইরি।

অসামদা মণিপুরী সুমাঙ লিলাঃ অপনবা-অশোনবা অমসুং কোক্নবা পাম্বৈ

সুমাঙ লিলাগী তাইবংদা লৈরিবসী লিলা লূপ, লিলারোয়, অইবা, লমজিং-লমতাকপা অমসুং অয়েংবা ভাবোকশিং অসীনি। ঈশৈ লিলাগী মতম য়ৌরকপদদি পঞ্জখ্রিবশিং অসীগী মথক্তা ঈশৈ-নোংমাইগী কাঙবু অসীসু হাপচিনবা য়াই। ময়ামশিংসীগী মনুংদা খ্বাইদগী মপাঙ্গল কল্লিবসী অয়েংবা ভাবোকশিংসীনি হায়বসীনি। অসামদা সুমাঙ লিলা য়েংনীংদবা ভাবোক থিবদা অৱাবা ওইগনি। ‘লৈকাইদা সুমাঙ লিলা লৈ’ হায়রবদি ময়ূম সো লোন্নবনা অয়াম্বনি। অসুম্না য়েংবিনবা ভাবোক মরাং কায়না লৈ হায়বা খঙলবসু অসামদা মণিপুরী সুমাঙ লিলা লূপনা নৎত্রগা লিলানা মশা-মথেন ফনা হিংলগা লৈবা ঙমদবগী অপনবা অমদি অদুমক মায়োক্নবা উবা ফংই। সুমাঙ লিলানা মশা-মথেন ফনা হিংলগা লৈবা ঙমদবগী অপনবা অমা মায়োক্নরিবসীগি মরম খরা মখাগী অসুম্না থম্বা য়াই-

১. বার্তোন মরাঙ কায়না ফংদবাঃ লিলালূপ অমনা মশা মথেন ফনা, অফবা লিলা পুথোক্তুনা মীয়ামগী থৌগনগীদমক থৌরাং তৌদুনা লৈবা ঙমগদবসী বার্তোন মরাঙ কায়না ফংবা অসীগী মখা পোল্লি। চহী অমদা লিলা ২ নৎত্রগা ৩ থৌরাং তৌরগা লিলা শান্নফম ১০ ফাওবা ফংদ্রবদি লিলা লূপ অদু পূক্নীং হন্থরক্নীঙাই মরম ওইরকই। ময়ায় চনবা মতম অমদি অনৌবা মতমগী অহানবা তংখায়গী মতমদা শান্নরম্বা সুমাঙ লিলাগী মতমদা য়ামদ্রবদা লিলা অমনা শান্নফম ২৫-৩০ দগী তাদনা ফংলম্বদু ঈশৈ লিলাগী মতমদা হন্থরকপা উবা ফংই। মসীগী ওইথোকপা য়াবা মরম অনীদি-

১.ক. অৱাইমন পীবা ঙম্লক্তবাঃ সুমাঙ লিলাগী মতমদা জুৱারীশিংনা তোয়না লৈকায় লৈকায়দা লিলা কৌথদুনা কুমৈ পানখৎপগী চাং য়াম্না ৱাংলম্মী। জুৱারীশিংগী মিংদা মেলা কয়া খূদম ওইনা ধবলি মেলা, চাউমু মেলা অসীনচিংবা কয়া তোয়না তৌরম্মী। মেলাশিং অসীদা পানখৎলম্বা কুমৈদি মপূং ওইনা সুমাঙ লিলা অসীনা ওইরম্মী। অতৈ খরদি- বাশোক, খূবাক ঈশৈ, রৌখাল, রাশলিলা অসীনচিংবনি। অসুম্না হায়নৈ ‘জুৱার হায়বসী অফবদি নত্তে অদুবু জুৱারীশিং অদুনা খুঞ্জাশিংদা কুমৈদি য়াম্না য়েংহল্লমখ্রেদা।

মতমসীদা লিলা কৌথবগী অৱাইমন পীবিনবা কনাগীসু পোৎলুম ওইনরমদে। জুৱারীশিং অদুনা পোৎলুম পুনখিবা ঙাক্তনি। অদুগা সুমাঙ লিলাগী মতমদা লিলা কৌথবগী অৱাইমনসু পঙয়াম য়াম্লমদে। হৌজিক্কী ঈশৈ লিলা অসীদি হান্নগী সুমাঙ লিলাগা চাংদম্নরুবদা শরুক ৪-৫ রোম হেল্লিবনি। মমল ৱাংখৎলকপা অসীগী মথক্তা হান্নগুম্না জুৱারীশিং মনীং তম্লক্তবা অসীনি।

১.খ. ৱারী নুঙাইতবাঃ মমল ৱাংবা নেম্বা থিদনা হৌজিক্সু জুৱারী খরনা অয়াবা লৈকায় খরদা লিলা কৌথদুনা কুমৈ পানখৎপা উবা ফংই। লৈকায়না নৎত্রগা লন্নাই য়ূম অমনা কৌথদুনা লিলা তৌবগী চাংদি খরা নেম্মী। মসীগী মরম অমদি লিলা অদুনা ভাবোক অমসুং লৈকায়গী লিলা পাম্বশিংগী পূক্নীং চিংশিনবা ঙমদবা অসীদগীনি হায়বসীনি। লিলা অমা লৈকায় অমদা ফোঙবা হায়বসীদা থংনবদা লৈবা অনকপা অমসুং অরাপ্পা লৈকায়গী মীশিংসু য়েংলৈ। লিলা নুঙাইরবদি মথোয়না ফনা শীংথানদুনা মখোয়-মখোয়গী লৈকায়দসু য়েংহন্নীংদুনা মশেন তানরগা কৌথনবা অসী হৌনশা ওইনা লাকপনি। লিলা অদুনা ভাবোককী পূক্নীং চিংশিনবা ঙমখিদ্রবদি মখা তাবা বার্তোন অনকপা লৈকায়শিং অদুদদি ফংবা ঙমদে হায়বসীনি।

অসামগী মীতৈ তাবা খুঙ্গংশিংদা অসামগী লিলালূপ অনী (হৌজিক লৈরিবা) অসীগা মণিপুরদগী লাকপা লিলালূপশিংগা য়েংনবদা মণিপুরদগী লাকপা লিলালূপশিংনা হেন্না বার্তোন ফংবা অসী উবা ফংই। জুৱারীশিংনা মীথিৎ ফংগদবা লিলা য়েংলকপদা খরা হেন্না মণিপুরদগী লাকপা লিলালূপশিংদা মীৎয়েং থমখিবা উবা ফংই। (লমগী ষণনা মচি শাংবগী ৱারা খঙদে) মসী ঐখোয়গী লিলালূপশিংনা পানখৎলিবা ৱারী অমসুং অফবা লিলারোয় ফংবগী অপনবা লৈবা অসী মরম অমমনি হায়না লৌজরি।

২. অফবা লিলারোয়গী অৱাৎপাঃ অসামগী লৈমায়দা মীতৈ লিলারোয় অফবা লৈতবদি নত্তে, অদুবু ফংবা ঙমদবগী অপনবা অমদি লৈ। লিলারোয় অফবা ওইবা য়াবশিংনা মশাবু লিলাগীদমক কত্থোকপা ঙমদে। কত্থোকপা ঙমদবগী মরমসী ইমুং-মনুংগী শৌগৎপীবা ফংদবা, মশাদা ফিয়র সাইকোসিস (অকিবগী অনাবা) কী অনাবা লৈবা, ফ্যুচর প্রোষ্পেক লৈতবা, অরেম্বদা মতম মাঙহনবনি হায়না খনবা নিগেতিব ইন্টর্প্রিতেসনশিংনা মশাবু নমথদুনা থমখিবননি। ঐখোয়গী লিলাদা নুপী শানবা লিলারোয় হৌজিককী মতমদা ফংবা ঙমদনা লৈরি।
মতম অমা লৈকায়-লৈকায়গী ওইনা লিলালূপ লিংখৎনরকপা মতমদদি পোজিতিব ইন্টর্প্রিতেসন ফংদুনা হৈগদবসু হৈরোইদবসু অমত্তা ওইশিন্দুনা পানখৎনরম্মী। থবক চঙনখিবা, হিংনবগী লান্ফমদা মপান থোক্নখিবা কয়াদগী লৈকায়গী লিলালূপশিং মখা চত্থবা ঙম্নরক্তে। খুদোং চাদবা অসীনা মরম ওইরগা লিলা পানখৎপা ঙম্লক্তবা, লৈকায় অমদা অফবা লিলারোয় মশীং শুনা লৈগনি হায়বসী য়ানীংদবা অমসুং অফবা আর্টিষ্টশিং পূনশিল্লগা লিলা পানখৎনীংবগী অপাম্বা অসী ঊৎথোক্নরকখি। থংনবা লৈকায় অনী-অহুম পূনশিন্নরগা লূপকী মমিং-মথা থোন্দনা লিলা পুথোক্নরকপা য়াওনরকখি। মসীনসু তুং কোইবা সোল্যুসন ওইবা য়ারোইদবা লৈবা উদুনা ইরমদম মীতৈ আর্টিষ্ট এসোসিএসন অমসুং ক্বিবর আর্টিষ্ট এসোসিএসন, শ্রীবার পূনশিল্লগা ইং ১৯৯৪ দা মতম অদুগী লিলা-দ্রামাদা থোইদোক্না মায়পুনবিরম্বা ওজা য়ূম্নাম ইন্দ্রবাবুনা লুচিংদুনা ফম্বাক অমসুং সুমাঙ নৎত্রগা ঈশৈ লিলা পানখৎতুনা মীয়ামগী থৌগল তৌবগা লোয়ননা জাতিগী থাক্তা লিলা ঊৎলুনবগী পান্দমদা শেমগৎখিবনি নেশনেল থিয়েটর সেন্টর, অসাম। সেন্টর অসীনা থম্লিবা পান্দম অসীগী হায়রুরবদি অফবা থবক কয়া অমা মখা তানা তৌরকখিগনি হায়বগী থাজবা লৈ। হৌজিক ফাওবদা লূপ অসীনা লেপ্পা নাইদনা লিলা পুথোক্তুনা মীয়ামগী থৌগন ফংলি। অদুম ওইনমক অপনবা, অশোনবা, অৱাৎপা কয়াদি ঙসীসু মায়োক্নদুনা চৎলি।

৩. লিলাগী ময়েকঃ মতম অমা অঙনবা মতমদা ময়েক য়াওদনা লিলা পানখৎলগা শান্নরম্মী। ময়েক য়াওনরকপা মতমদা লমদমসিগী অমসুং মণিপুরদগী ময়েক্না চৎনরম্মী। লমদমসীগী ময়েক ইবশিংগী মনুংদা শীংথানবা য়াবা খরদি- ওজা থীক্নাম গঙ্গা, ওজা বামচা, মোইরেংজম দেব (সুব্রাম), মুতুৱা নিলমোহন, কোন্সম বিনোদ, মুতুম চীংলেন, পোৎশংবম বীরহরি, এস মণিকুমার, কে মঙ্গি, কোন্থৌজম বিস্বজিত, সোমোর লুৱাং, মণিকুমার নাউরেমচা, কুঞ্জলাল য়েন্দ্রেম্বমনচিংবা অসীনি। ওজা থীক্নাম গঙ্গাদি সামাজিক লিলা ইবা অহানবা অইবনি, মহাকপু অসামগী মণিপুরী সুমাঙ লিলাগী সামাজিক লিলা ময়েক ইবা অপোকপনি হায়না শীংথাবা য়াই। ঈশৈ লিলাগী মতমদা মণিকুমার নাউরেমচাগী ময়েকশিং ফনা শীংথাবা য়াই। মমিং লৈরবা রেদিও লিলা ইবা ওজা কুঞ্জলালগী ৱারীসু সুমাঙ লিলাগী ফম্বাক্তা চঙশিল্লকপদা তরাম্না ওকপা য়াই।

হন্দক্কী দিকেদ অনী (২০০০গী মতম অমসুং ২০১০গী মতম) অসীদা শান্নরিবা ঈশৈ লিলাশিং অসীদা এনটিসিনবু ওইরবসু সুমাঙ লিলা লূপ সিঙ্গেরবোননবু ওইরবসু লিলা ময়েক খনগৎপগী অশোনবা অমা লৈবা থেংনৈ। মণিপুরগী ময়েকপু ওইরবসু অসামগী অইবা অমগী ময়েকপু ওইরবসু লিলা ময়েক খনগৎপা হায়বসী য়াম্নমক মরু ওইনা চেকশিনগদবা মফমনি। মতাং অসীদা থোইদোক্না মীৎয়েং থমহন্নীংবদি –লমদম অসীগী ভাবোক্না ঈখৌ লাংলিবসী করিনো– হায়বসী খঙবগী তঙাই ফদবা লৈ হায়বসীনি। মণিপুরদা থোকপা থৌদোক ৱারী অমা অফবা অইবা অমনা ইরগা হেক্তমক পানখৎপনা অফবা লিলা ওইগনি হায়বা লৈতে। অসামগী মণিপুরী খুনাইদা থোকপা থৌদোক অমসু হেক্তমক পাম্নগনি হায়বসু লৈতে। ৱারী খনগৎপদা শোয়খিবনা লিলালূপ অদু চহী অদুমা চূপ্না বার্তোন মরাং কায়না ফংদনবসু মরম ওইহল্লকপা য়াই হায়বসীনি।

৪. লমজিং-লমতাকপাঃ অফবা ময়েক, অফবা লিলারোয় লৈরগতা য়াদে, অফবা লমজিং লমতাকপা অমগী তঙাই ফদবা লৈ। সুমাঙ লিলাগী মতমদা রূপরঙ্গগী ওজা থীক্নাম গঙ্গা, ইরোম বিদ্যা অমসুং ওজা মুতুম চীংলেনগী লমজিং-লমতাকপগী চেকশিনবা মতৌ অদু ফনা শীংথানবা য়াই। ঈশৈ লিলাগী মতমদা সুমাঙ লিলা লূপ সিঙ্গেরবোনগী লমজিং-লমতাকপা ওজা উসম চাউবগী চেকশিনবা মতৌ অসীসু পূক্নীং থৌগৎনীংঙাই ওই। লমজিং-লমতাকপদা অশোনবা লৈখিবা লিলাশিংসু মপুন্সী শাংবা ঙমদে।

৫. শৌগৎপীনবা ৱাৎপাঃ অসামগী মণিপুরী সুমাঙ লিলানা শোত্থবা অমসুং মঙম শানবা ইঙম ঙমদনা লৈরিবসীগী অতোপ্পা মরু ওইবা মরম অমদি শৌগৎপীনবা ৱাৎপা অসীসু মরম অমনি। সরকারগী মায়গৈদগী শিন্ফম অসীগীদমক করিগুম্বা থৌরাং অমত্তা লৈবা উদে। মসীদনি মণিপুরগা অসামগগি সুমাঙ লিলাদা অনেম-অৱাং লৈবা উরিবসী। মণিপুরদদি সরকারগী মায়গৈদগীসু, লৈকায়দগীসু শৌগৎপীবা অসী লৈ। অসামদদি মায়গৈ অনীমক্তগী লৈবা উদে। অসামদা মণিপুরী দেবলপমেন্ট কাউন্সিল হায়দুনা অসাম সরকারগী মীৎয়েং মখাদা লৈ। অদুম ওইনমক, মখোয়না ঙসী ফাওবদা সুমাঙ লিলা চাওখৎলক্নবা, হেন্না মতেং ওইবা য়াবা, শৌগৎপীবা থৌরম নৎত্রগা পোরম অমত্তা শীল্লকপা উবা ফংদে। ইং ১৯৮০ দা পাঙথোকখিবা সুমাঙ লিলা কম্পিটিসন অদুগী মখা তারকপদা কনাগুম্বা লন্নাই নৎত্রগা সরকারগী সংস্থান অমত্তনা কম্পিটিসন শীল্লকখিবা উবা ফংদে।

কোক্ন-পাম্বৈ ওইনা খরদং হায়বা য়াবশিং অদুদি-

১. সুমাঙ লিলাগী ৱার্কসোপ চাং নাইনা শীনবিবা চঙই। মসীনা আর্ট ফোর্ম অসীবু খঙবা অমসুং পূক্নীং থিংজিলহনবদা মতেং ওইগনি। মসীনা অইবদসু, তম্বী-তাকপীবদসু অদুগা লিলারোয়শিংদসু হকথেংননা মতেং ওইগনি। লিলা পামজবা কয়াদসু নাকোয়ননা পূক্নীং চিংশিলহনগনি।

২. সুমাঙ লিলাগী মরমদা খন্ন-নৈনবা অফোংবা থৌরম কয়া শীনবগী তঙায় ফদবা লৈ। থৌরম অদুদা সুমাঙ লিলাগী মরমদা খন্ন-নৈনবতা নত্তনা অহন ওইরবা লিলারোয়শিংবু কৌখৎতুনা ঈকাই খুম্নবা ঊৎপীবসু চঙই। মসীনা লিলারোয়শিংদা পূক্নীং থৌগৎপীবা থোক্কনি।

৩. হেন্দান্নবা থৌরম শীন্দুনা মকোক মথং তাবশিংদা শেলগী মনা য়াওনা অতৈ মনা কয়ামরোমসু চহী অনী-অনীগী পীদুনা অহেন অথোই তান্নবনা হেন্না ফজবা লিলা পুথোক্নরক্নবগী অমত্তা ঙায়রবা লম্বীসু ওইগনি। বেষ্ট প্লেদা লুপা লিশিং ৫০, সেকন বেষ্ট প্লেদা লুপা লিশিং ২৫, অইবা অমসুং তাকপী তম্বীবা য়াওনা লন্নাই অফবা আর্টিষ্টশিংদা লুপা লিশিং ১০-১০গী চাংদা ফংহনবা ঙম্বা থৌরম শীল্লবদি অফবা খোঙথাং ওইগনি।

৪. অসীগুম্বা খোঙথাং অসী সরকার নৎত্রগা সরকারগী মখাদা লৈবা দেবলপমেন্ট কাউন্সিলগুম্বনা শীনবিরবদি হেন্না মচু তাবা হায়বদু ওইগনি অমসুং হেন্না মমল হেনগৎকনি হায়বসীনি।

৫. লাইফ ফোর্মেৎতা লিলা শান্নবা অসী নীংথিজনা রেকোর্দ তৌবিরগা ওদিও অমসুং ওদিও-ভিজুএল ফোর্মেৎতা অমুক হন্না ফংহনবা অসীসু মতমগা চূনবা ৱাখল্লোন ওইগনি হায়বসীনি।

৬. নুপী শাবীনবা নুপা লিলারোয়শিং ঙল্লিঙৈ মতমদগী লৈরকখ্রবসু হৌজিককী মতমদা লৈতদুনা মণিপুররোমদগী হেক-হেক ৱায়বা উবা ফংই। লৈকায়দা শান্নবা লিলাশিংদা অফবা নুপী শাবা লিলারোয় উবা ফংখি। মসীগীসু মথক্তা, ইং ১৯৮৬-৯০ অদুৱাইদা জিরিবামদা লৈরম্বা য়াইফ-লমজিং আর্টিষ্ট য়ুনিয়ননা শান্নখিবা লিলাশিংদা নুপীগী শক্তম লাংখিবশিং অদু লক্ষিপুররোমদগী ঙাক্তনি।  মায়গৈ অমরোমদা, নুপীগী শক্তম অসী নুপী লিলারোয়শিংনা লাংলম্বা থেংনখি। বারমোনিদা শান্নখিবা লিলা মধু-মালতিদা মালতিগী শক্তম লাংখিবী ইমাইবেম ইরোম ওঙবী                                       দা ঙসী মনা পীদুনা ঈকাই খুম্নগনি হায়বসী য়াম্নমক পূক্নীং থৌগৎনীঙাই ওইবা ৱাফম অমনি। লিলা অসী মতমদুদা ভাবোকশিংনা য়াম্নমক পাম্নখি, অদুগা ইমা ইবেমবুসু মীয়াম্না পাম্নখি। ইমা ইবেম অসীগী মমৌনুপী ইরোম ওঙবী                          (লিলারোয় ওজা ইরোম বিদ্যাগী লোয়নবী)সু নুপীগী শক্তম লাংখিবী লিলারোয়নি। অসুম্না হৌজিক্কী মীরোলদা নুপী আর্টিষ্টশিং নৌহৌনা পূক্নীং থৌগৎপা ঙম্লবদি অফবা খোঙথাং ওইগনি হায়বসীনি।

হীরম অসীবু হেন্না মপূং ফাহনবা অমসুং কূপথনা থিজিন-হূমজিনবদি থৱায় য়াওবা ইচিন-ইনাউশিংগী মফমদা শিন্নজরি।


তানজখিবা লাইরিকশিং অমসুং উনখিবা মীওইশিং

১. ইরোম বিদ্যা সিংহ, ‘কাছাড়দা সুমাঙ লিলাগী শম্লপ্পা পুৱারী’, নৈনরোল, থা ৬ কী চেফোঙ, রাসে, থাংজমলৈকাই, কাছাড়, ২০০৮
২. ওইনাম য়াইম, চান্দপুর
৩. কুঞ্জলাল য়েন্দ্রম্বম, ‘বরাক তম্পাককী মণিপুরী দ্রামাগী খোঙহৌ অমসুং খোঙচৎ’, তোর্বানসিগী ৱারেং চরোং, য়েন্দ্রেম্বম ওঙবী বেনু জেবী, শিলচর, ২০০৯
৪. থীক্নাম গঙ্গা, জোরাগুল, কাছাড়
৫. দা. এম রাজেন্দ্র সিংহ, ‘মণিপুরী সাহিত্যদা সুমাঙ লিলা’, মণিপুরী, চহীগী চেফোঙ, ৪ শুবা মশীং, মণিপুরী মশঙ, অসাম য়ুনিভর্সিতি, শিলচর, ২০০৮
৬. দা. এল শশিকুমার সিংহ, ‘মণিপুরী সুমাঙ লিলাদা হোংলক্লিবা মশক’, মণিপুরী সাহিত্যগী তাইবঙ, নোংচুপ হারম খোর্জৈ লূপ (নোহাখোল), য়ুরেম্বম, ইম্ফাল, ২০১২
৭. লাইরেনময়ূম ইবুঙোহল অমসুং নিংথৌখোঙজম খেলচন্দ্র, (খোম) ‘চৈথারোল কুম্বাবা’, মণিপুরী সাহিত্য পরিষদ, ইম্ফাল, ১৯৮৯
৮. সুব্রাম, ‘জারিবোন লৈবাকতা সুমাঙ লিলাঅমসুং দ্রামা’, নৈনরোল, থা ৬ কী চেফোঙ, রাসে, থাংজমলৈকাই, কাছাড়, ২০০৯
৯. সোমোর লুৱাং, গোসাইপুর, কাছাড়