মোবাইল ফোন অমসুং মীতৈ নিঙোলঃ মীতয়েং অমা

ৱাহৌদোক

সাইন্স অমসুং টেক্নোলোজিগী খম-থেংনা চাওখতপা মতম্নি হৌজিকসি৷ ঈং ২০০০ গী থোঙজিন হেক কানশিল্লকপদগী উবা ফংলিবসি মীওইবগী সভ্যতাদা অঙকপা অহোংবা অমনি৷ হৌজিক মতমসি অহুমশুবা চহী লীসিং (মিলেনিয়ম)নি৷ ঐখোয়না হিংলিবসি চাওখতপগী পন্দোম্না চং ফংনা হাইগতলকপা মতাংদা কাবা ইপোম অমগী মতোন্দনি৷ সাইন্স অমসুং টেক্নোলোজিগী লম্বীদা চাওখতপগী খোঙজেলনা মপা লৈতনা য়াঙখতলকপগী মহৈ ওইনা থোরকপনি মোবাইল৷ ঈ-পাউ ফাওনবগী তাইবংদা লৈবা থাক ৱাংখতলবা ফম্বাক অমদা ঐখোয়না মোবাইল হায়বসিগা শকখঙনবনি৷

মোবাইল অমসুং মীতৈ

মোবাইল হায়বসি মী অমগা অতোপ্পা মী অমগগী মরক্তা খোঞ্জেলগী মতেংনা তাবা ফংদবা মফমদা লৈখিবদা শীজিন্নবা পাউ ফাওননবা পাম্বৈ ওইবা খূতলাই অমনি৷ অনকপদা লৈতবা মীগা ঈনক নক্না পাউ ফাওদোক্নবা য়াবা অফবা খূতলাই অসি থোরকত্রিঙৈগী মমাঙদা মীওইবনা লম চতপা মীদা পাউ থানরম্মী, মী অমবু থারম্মী, ইদুনা পীনরম্মী, থাদোক-থাজিন তৌনরম্মী৷ খোঞ্জেলগী মতেংনা পাউ ফাওনবা য়াবা ফোন থোরকই৷ লেন ফোন্দগী কোদলেস হেন্দসেত, কোদলেস হেন্দসেততগী দব্লিউ এল এল, দব্লিউ এল এলদগী মোবাইল, মোবাইলদগী নেট অমসুং নেটতা ভিদিও কন্ফরেন্স অসিনচিংবা মথং-মথং চাওতথলকই৷

ফোন লাকপা মতমদা অহল-লমনশিংনা মখোয়গী মতমদা কয়া ৱানা ঈ-পাউ ফাওননবা হোতনরম্বগে হায়বদু নীংশিংদুনা ৱারী শাই৷ মোবাইল থোরকপা মতমদদি ‘করিনো যুগসে মতা অমা ওইরে’ হায়দুনা ঙাঙনরকই৷ মোবাইলনা মপাংগল ফংনা মীতৈ খুনাইদা লাকপসি ঈং ২০০৩গী মতুংদগীনি৷ অহানবা ওইনা মোবাইল পায়বা নুপাদু অচৌবা থবক তৌবা নত্ত্রগা অচৌ-অরেম য়াম্না পাম্বা ওইনা খন্নরম্মী৷ মচিন য়াওবা অহল খরনা মোবাইল পায়বা মীবু য়াম্নমক তাথিনা শোল্লি অদুবু অঙাং-নুবীনদি কুম্মৈগুম্না য়েংনৈ৷ চতলিবা চহী ২০০৯ অসিগী অরোইবা ফাওবসিদদি মী অমনা সিম অমদগী হেন্না পায়নরে অমসুং মোবাইল পায়দবা মীতৈ ঈমুং লৈশিল্লকত্রে হায়বা য়াই৷ ঈমুং অমদা লৈবা মীওইশিংগী মনুংদা দরকারগী মতুং ইন্না অয়াম্বনা মোবাইল পায়নরে৷ নহাশিংসু য়ামদ্রবদা অমমমদি শোয়দনা পায়নরে৷

মোবাইলগী খুদোং চাবশিং

মোবাইল অমগী মমল লুপা ১০০০ (লীসিং অমা)দগী হৌরগা য়াম্না তাঙবা ফাওবা লৈরে৷ হৌজিক ফাওবগী ওইনা খ্বাইদগী য়াম্না য়োনবা ঙম্বা কম্পনিসি নোকিয়া, সামসুং, এল জি, সোনি এরিক্সন অমসুং মোটোরোলানা মথং-মনাউ নাইনা লৈরি৷ মোবাইল অমদা কোল তৌদুনা অরাপ্পদা লৈবা মী অমগা ৱারী শানবা য়াবগা লোয়ননা মসিদা টেক্স মেসেজশিং ইদুনা থাবা য়াই৷ মসিদা কোলশিং রেজিষ্টার তৌবা য়াই, ঈশৈ (MP3) তাবা অমসুং ভিদিও (MP4) য়েংবতা নত্তনা খোঞ্জেল রেকোর্দ তৌবা য়াই, ফোটো কাপ্পা য়াই, কেমকোর্দারগুম্না ভিদিও রেকোর্দিং তৌবসু য়াই৷ মসিদা কলকুলেটর য়াওরি, ঘরি য়াওরি, শান্নবা য়াবা প্রোগ্রাম কয়ামরোম অমসু য়াওরি৷ রেদিও তাবা য়াই, টি ভি য়েংবা য়াই, এলার্ম থম্বা য়াই, তুংলমচত্তা নীংশিংলক্নবা প্রোগ্রাম কয়া চনশিন্দুনা থম্বা য়াই, পার্সনেল ওর্গনাইজর নত্ত্রগা পার্সনেল দিজিতেল এসিষ্টেন্ট ওইনসু শীজিন্নবা য়াই৷ মসিদা ব্লুতুত য়াওরি, ব্লুতুতকী মতেংনা মোবাইল সেত অমগা অতোপ্পা সেত অমগা শেল তিংদনা প্রোগ্রাম থাদোক-থাজিন তৌবা য়াই৷ কম্প্যুটরগা কনেক তৌদুনা প্রোগ্রাম লৌথোক-লৌশিন তৌবসু য়াই৷ মাঙোন্দা মেমোরি কার্দ রিদর য়াওরি, য়ু এস বিগী খুদোং চাবা লৈ৷ ৱ্যের্লেস মোদেম অমা ওইনা শীজিন্নবসু য়াই, ই-মেল তৌবসু য়াই৷ তাঙবা-হোঙবগী মতুং ইন্না ব্লেক এন্দ হ্বাইত অমসুং কলর মোনিটর ফংই৷ ময়ামসিগী মথক্তা মশাসু স্ক্রিন তচ হায়বদি খূতনা শোক-শোক্তুনা প্রোগ্রাম তৌবা য়াবসিনি৷ মসি অপীকপা কম্প্যুটার অমনি৷

মীতৈ নিঙোল অমসুং মোবাইল

মীতৈ খুনাইদা ‘নিঙোল’ হায়রগা খঙনরবসি অপাকপা মীতয়েংদা নুপী পূম্নমকপুনি৷ নুপী পূম্নমক মপাম্লোমদগী য়েংলকপা মীতয়েংদা নিঙোল ঙাক্তনি৷ খরা পীকশিল্লবা মীতয়েংদনা ময়ূম-মকৈ পান্দ্রিবশিংবু নিঙোল হায়না খঙনরে৷ মতাং অসিদা, ৱারেং অসিনা ‘নিঙোল’ হায়রগা খঙহনবা পাম্লিবসি ময়ূম-মকৈ পান্দ্রিবীশিংবুনি৷ মীতৈ নিঙোলশিংসি খুঙ্গং অমসুং শহর তূননা য়েংলগা, খরা হেন্না পাক চাউবা মীতয়েংদগী য়াবা হায়বা ৱাফম খরদি-

১. চাউরাক্না মখোয় চহী ৯-১০দা মীওই মপূং ফায়৷

২. চাউরাক্না মখোয় চহী ৪০ ফাওবা লৈশাদুনা লৈ৷

৩. চাউরাক্না মশাগী চহী ২৫ ফাওবদি লাইরিক কন্না তম্মী৷

৪. ফীবমগী মখা পোন্না লাইরিক তম্বা তোকপসি চাউরাক্না মশাগী চহী ১৫-২০ ফাওবদগী হৌরে৷

৫. সরকারগী থবক অমা মখোয়না পামজৈ৷

৬. লন্নাই শেন্থোক লম্বী লৈজনবা কন্না হোতনবা উবা ফংঙি৷

৭. করিসু তৌদনা লৈথোকপা নিঙোলশিংসু লৈ৷ অদুবু মখোয় ময়ূমদা লৈন-লৈনা তৌশিনবা য়াবদি তৌই৷

৮. মখোয়না য়ূম পানবসি

     ক. হায়ন-শীংনরগা হোঙলবদি মশাগী চহী ২৫ গী মতুংদা ওইগল্লি৷

     খ. মশা-মশা য়ানদুনা চেনবশিংদি অয়াম্বনা চহী ১৬-২৫ ফাওবগী ওইগল্লি৷

৯. মখোয় খরদি ঈরাং পাম্না উই৷

১০. য়ূম পান্দবা নিঙোলসু নোংম-নোংমগী খূত থেকপা য়ারক্লি৷

‘মোবাইল’ হায়রিবা খূতলাই অসি মীতৈ খুনাইদা চঙলকপা মতমদা নুপাশিংগী মখূত্তা হান্না লাকই৷ মবুংশিংনা নত্ত্রগা মৌপ্বাশিংনা পায়নবদগী তপ্না-তপ্না নুপীশিংগী মখূত্তসু লাকখিবনি৷ চহী মতাংগী মতুং ইন্না মীওইবগী অপাম্বা খেন্নৈ৷ মতৌ অদুগুম্না, মীতৈ নিঙোলনা মোবাইল পায়বসু চহী মতাংগী মতুং ইল্লি৷ ক্লাসকি মতুং ইন্না হায়রবদা মাপনশুবী কাবদগী খরা-খরা পায়বা হৌরে৷ মরম অদুনা, চহী মঙা-মঙাবু তাংকক অমমম ওইনা লৌরগা মখাদা মীতৈ নিঙোলনা মোবাইল পায়বগী চাংসি চাদা কয়া ওইবগে হায়না চাউরাক্না শক্তম লেপ্নবা (ৱারেংজরিবগী লন্নাই মীতয়েংদগী) হোতনরি৷

চহী ১৫-২০ ফাওবদা লৈবা মীতৈ নিঙোল ১০০দা ৬০না মহৈরোয় ওইনা মোবাইল পায়৷ চহী ২০-২৫ য়াওনা চহী ২৫-৩০, ৩০-৩৫ অমসুং ৩৫-৪০দা নিঙোলনা মহৈরোয় ওইবগী চাংসি হন্থরকপা উবা ফংই৷ মখোয়না খ্বাইদগী য়াম্না কন্না মহৈ তম্লিবসি চহী ১৫-২৫ ফাওবসীনি৷ মসিগী মতুংদদি শেন্থোক লম্বী লৈবা মায়কৈ পাংনরকই৷ মশাগী চহী ২৫-৩৫ ফাওবদা মখোয়না সরকারগীবু ওইরবসু সরকার নত্তবগীবু ওইরবসু শেন্থোক লম্বী লৈবা মায়োন্দা চঙলকই হায়বা উবা ফংই৷ লায়েক অসিদা য়াম্না নুংঙাইরিবা ৱাফম অমদি করিসু তৌদনা লৈবা নিঙোলগী চাং চাদা ১০, ২০, ২৫, ১৭, ১৩ তৌদুনা থাক খুদীংদা ফংবসিনি অমসুং মখোয়সু মোবাইল পায়রিবসিনি৷

মোবাইল পায়বদা মমা-মপানা য়াবগী মরম

অহান-অহানবদা মমা-মপাশিংনা মচা নিঙোলদা মোবাইল পায়হল্লমদে৷ মখা তাবদা পায়হল্লকপগী মরমশিংগী মনুংদা মখাগীশিং অসি মরু ওই৷

ক. মথৌ তাবগী মখা পোন্না

অ. মহৈরোয়ঃ য়ূমদগী মপান্দা লৈখিঙৈ মতমদা পাউ ফাওননবগীদমক মমা-মপানা পায়হল্লি৷ ত্যুসন চতপা, স্কুল কাখিবা, মতম চানা হল্লকপা য়াদবা মতাংশিং অমদি লাইরিক লাইশুগীদমক মমান্নবা-মমান্নবীশিংগা পাউ ফাওদোক-ফাওজিন তৌনবগীদমক মমা-মপানা পায়হল্লি৷ মায়গৈ অমরোমদা, মপান্দা লাইরিক তমখিবা নত্ত্রগা থবক তৌদুনা লৈখিবী মচা নিঙোলশিংদা য়ূমগা পাউ ফাওনবা য়ানবা মমা-মপানা পায়হল্লি৷

আ. শেন্থোক লম্বী লৈবাঃ মশাগী থবক্কী মখা পোন্না মীশিংগা পাউ ফাওননবগীদমক অমসুং থবক ঈনখাংদা মতেং ওইননবগীদমক মোবাইল পায়জবদা মমা-মপানা য়াই৷

খ. মীমান্নহনবগী ৱাখলদা

মমা-মপা খরনা মচানুপীবু মবুংশিংগুম নত্ত্রগা মমান্নবা অতৈশিংগুম পায়হল্লি৷ মীনা পায়নবা উরগা মচানুপীসু পায়নীংলমগনি হায়না মমা-মপা ওইবশিংনা খল্লি অমসুং মহাক্না করিগুম্বা অমত্তা তৌদ্রবসু নত্ত্রগা মথৌ তাদ্রবসু মী খ্বাইনা পায়নবগী ৱাখলদা মচা নিঙোলবু পায়হনবা অসিনি৷

গ. ৱারকপা ঙমদবদগী

হেঞ্জিন্না পর্মিসিপ পেরেন্ট ওইরুবদগী মচাশিংনা ওনখত্তুনা পানবা ইমুং-মনুংগী মচা-নিঙোল খরদি মমা-মপাবু ঙম্মী৷ মখোয়না মোবাইল পায়বগী মথৌ তাদ্রবসু পায়৷ ঙাঙন-শক্নরুবা ঙমদে, মানা থোকপা অমা খুম্মী, পাউখুম ৱাত্তে৷ মখোয় করি-করিনো খরদা মথৌ য়াম্না চিন্না মতম পূম্বদা লৈগল্লি৷

মোবাইল পায়রগা নিঙোলশিংনা করি-করি তৌই

মোবাইল পায়রগা নিঙোলশিংনা করি-করি তৌই হায়বসি কনানসু হায়বা ঙম্লোইদবা ৱাফম অমনি৷ অদুম ওইনমক, মপান্থোংদগী উবা খরখক মখাগী অসুম্না থম্বা য়াই৷

ক. পাউ ফাওনৈঃ মখোয়না ইমুং-মনুং, মরী-মতা, মরূপ-মপাং, মথৌ তাবশিং অমসুং মখোয়গী খঙন-চান্নবশিংগা পাউ ফাওনৈ৷

খ. ৱারী শান্নৈঃ মখোয়না মমান্নবী অমসুং মমান্নবশিংগা ৱারী শানৈ৷ মতাং অসিদা মমান্নবা হায়রিবসি অয়াম্বনা মখোয়গা নুংশিনবা নুপা নত্ত্রগা নুপাগী মমান্নবশিং ওইগল্লি৷ মখোয়না নুপা-নুপীগী ওইবা ৱারীশিং নুমিদাংদা কুইনা-কুইনা শানৈ৷ ৱারী শান্নবদা মীতৈ নুপীশিংনা চাওখতহল্লকপা মশক অমদি থংননা ফম্মিন্নবশিংফাওবা তাদবা অদুবু মহাক্কা ঙাঙনরিবা মী অদুনদি তাবা মখলগী ৱাঙাঙ মওংশিংনি৷ মতম অমদা চিঠি ইরগা মমান্নবা-মমান্নবীদা পীনরম্বা অমদি চেথাশঙগী খূত্থাঙদা থানরগা কুইনা-কুইনা ইখৌরাংনা ঙাইনরম্বদু হৌজিক লৈত্রে৷ মোবাইলগী টেক্স নত্ত্রগা কোলনা খূদক-খূদক্কী ওইনা লোইনমক মহূত শিনখ্রে৷

গ. টেক্স মেসেজ ইনৈঃ অতেনবা মেসেজ কয়া ই-ইদুনা থানৈ৷ মমান্নবা মমান্নবী কয়াদা ফজ-ফজবা ৱাহৈ কয়া ইদুনা থাদোক-থাজিন তৌনৈ৷ নুংশি-নুংওনগা মরী লৈনবা ৱাহৈ কয়া সবসক্রাইব তৌবা নত্ত্রগা শেম্বা নত্ত্রগা লাইরিক লৈদুনা পারগা মখোয়গা নুংশিনবা নুপাশিংদা থানৈ, মমান্নবা-মমান্নবীদা থানৈ৷ অসাম য়ুনিভর্সিতি, মাস কম্ম্যুনিকেসন দিপার্টমেন্টকী থিজিন-হূমজিনবা কাঙবু অমনা নুপীমচা (য়ুনিভর্সিতি তম্বী) চামগী টেক্স মেসেস ষ্টদি তৌবদা ৮০না নুংশি-নুংওনগা মরী লৈনবা মেসেজ খ্বায়দগী য়াম্না থারম্বা থেংনখি৷ মখোয়না LOVE হায়বা টর্ম অসি চাদা ৬৫গী চাংদা ইরম্বা থেংনখি৷

ঘ. ঈশৈ তানৈঃ নুপীমচা অয়াম্বনা ঈশৈ-নোংমাই, হরাও-কূম্মৈ পাম্মী৷ মখোয়না ঈশৈ তানৈ৷ মখোয়না নাকোং হাপ্পী শীজিন্নৈ নত্ত্রগা চুম্না হেন্দসেততগী তায়৷

ঙ. ফোটো কাপনৈঃ নুপী অমনা অতোপ্পা মমান্নবা, মমান্নবী, মরূপ-মপাং নত্ত্রগা অপাম্বা থৌদোক নত্ত্রগা দৃশ্য অমগী ফোটো কাপ্নবতা নত্তনা মশা-মশানা মশা-মশাগী ফোটোসু কাপ্নৈ৷ মখোয়না মশাগী হকচাং কয়াত ঊতথোকপা ফোটোশিং কয়াসু কাপ্লম্বা থেংনৈ৷ মখোয়না খ্বায়দগী য়াম্না মশাগী মোবাইলদা মশাগী ফোটো কাপচৈ৷ তোঙান-তোঙানবা ফিজেততা, তোঙান-তোঙানবা ঈহুল চেলহনজবা মায়থোঙদা, তোঙান-তোঙানবা ষ্টাইলদা মনীং তমজবা থেংনৈ৷

চ. ভিদিও রেকোর্দিং তৌনৈঃ থৌদোক-ৱাথোক অমসুং মফম কয়াগী অপাম্বা দৃশ্যশিং লৌখতপদা হেন্না শীজিন্নৈ৷ নুপামচাশিংনা নুপীমচাশিংগা হকচাংগী মরী থম্বদা রেকোর্দিং লৌরকপা ঙম্বগুম নুপীমচাশিংনদি তৌদে৷ অদুম ওইনমক, মখোয়না অকোম্বা ফি শেতলগা মোদেল মান্না কা মনুংদা কেতৱাক চতপদি মমান্নবীগা লৈমিন্নবা মতমদা রেকোর্দিং তৌই৷ মীয়াম মাঙদা তৌঙমদবা কয়া মখোয়না মমান্নবীনা পায়বা মোবাইলগী মমাঙদা ঊতথোক্তুনা রেকোর্দিং তৌরম্বা থেংনৈ৷

ছ. ভিদিও য়েংনৈঃ মখল-মখা কয়াগী ভিদিও ক্লিপশিং মখোয়সু য়েংই৷ ইন্টর্নেটকী খূত্থাংদা ফংবা অঙকপশিং মখোয়সু অয়াম্বনা ফংই নত্ত্রগা মখোয়গী মমান্নবা-মমান্নবীশিংনা থাজিন্নরকই৷ ভিদিও য়েংবা য়াবা মোবাইল পায়বা নুপীশিংগী সেততা এলবমগী ঈশৈশিং য়াওই৷ মখোয় খরগী সেততদি ব্লু ফিল্মগী ক্লিপসু য়াওরম্বা থেংনৈ৷ নুপীমচাশিংনা পায়বা লেপটোপ নত্ত্রগা পেন দ্রাইবতসু নুপা-নুপী হকতিন্নবা নত্ত্রগা নুপী-নুপী হকতিন্নবা ঊতপা ফিল্মশিংসি য়াওরম্বা ফংই৷ মখোয় অমনবু ফংখ্রবদি কোইনদবা মমান্নবীশিংদা য়েংহন্নবা নত্ত্রগা ফংহন্নবা হোতনৈ৷ মসি নুপাগা হকচিন্নবা মরী লৈনরুবা নুপা কোইনদবা নুপীশিংদগী অয়াম্বনা ফংবনি৷ অদুগা ইন্টর্নেট শীজিন্নবা য়াম্না হৈবী নুপীশিংদগীসু খরগীমখৈদি ফংই৷

জ. ব্লুতুততা প্রোগ্রাম থাদোক-থাজিন তৌনৈঃ ব্লুতুত য়াওবা হেন্দসেত পায়বী নিঙোলশিং মখোয় মশেন ঈশৈ, ফোটোশিং, এলবম্নচিংবা ফিল্মশিং, রিং টোননচিংবা প্রোগ্রামশিং থাদোক-থাজিন তৌনৈ৷

ওইরক্লিবা মহৈ

মোবাইল লাকপনা অতৈ খুনাইগুম মীতৈ খুনাইদসু অচৌবা অহোংবা অমা লাকখ্রে৷ মীতৈগী পুন্সি মহিংদা, লমচত-শাজততা, ৱাঙাঙ-শাঙাঙদা, থকসি-খাসি অমসুং থৌগল্লোন ব্যবহারদা, ৱাখল-পুখলদা, তৌথোরকপা থবক-থৌরমদা, মীতয়েং-নায়েংদা, অরোন-অথূপতা অসিনচিংবদা অহোংবা অমা লাক্লে৷ লাক্লিবা অওনবসিনা পুরক্লিবা মহৈসি অফবা অমসুং ফত্তবা নত্ত্রগা পামজবা অমসুং পামজদবা হায়বা মায়গৈ অনীনি৷

ক. অফবা (পামজবা)মহৈঃ

মীতৈ নিঙোলগী ৱাখল-পূখলদা তাইবংপানগী ওইরিবা চাওখত-খোঙথাংগী মমি তারে৷ মখোয়না চাওখতপগী খূদোলশিং শীজিন্নদুনা মশাবুসু চাওথতহনজরে৷ মীওইবনা খঙব-হৈবগী লমজেনদা কদায় য়ৌখ্রবগে হায়বা খঙলে৷ মখোয়সু শীজিন্নবা ঙম্নবা হোতনরে৷ মালেম অসিবু সাইন্স অমসুং টেক্নোলোজিগী খূত্থাংদা নোংম-নোংমগী গ্লোবেল সোসাইতি অমা ওইরকপদা মীতৈ নিঙোলসু খুনাই অদুগী খুনাইচা ওইনা শরুক য়ারে৷ চাওখতপগী মহৈবু খূতনা পায়দুনা শান্নবদা মীতৈ নিঙোলসু য়াওরে৷ মখোয়গী পূক্নীং-লৌশিং অমসুং ৱাখল-লৌশিং খূদক-খূদক্কী ওইহনবা ঙম্লে৷ খোঙজেল য়াঙনা চতলিবা সভ্যতাগী য়াওন্দা মখোয়সু য়াওররে৷ ‘মোবাইল’ হায়বা খূতলাই অসি চাওখতপনা পীবা অচৌবা থৌজাল অমনি৷

  

খ. ফত্তবা (পামজদবা)মহৈঃ

মোবাইলসি চাওখতপনা পীবা অফবা থৌজালগী মহৈনি অদুবু মীতৈ নিঙোল খরনদি মসিবু লান্না শীজিন্নৈ নত্ত্রগা অফবা পোতলম অমবু ফত্তবা থবক্কীদমক শীজিন্নৈ হায়না লৌবা য়াবসিনি৷ মখোয়না মোবাইল পায়বদগী থকসি-খাসি, থৌগল্লোন ব্যবহারগী চাংদা হন্থরক্লে৷ অহল-লমন্দা, মবুং মৌপ্বাদা, কৈরোয় লৈকায়দা অমসুং মখোয়গা নুংশিনরিবা নুপাশিংদা চতকদবা শাজত-লীচততা অহোংবা লৈরে৷ নুমিদাং অথেঙবফাওবা ফমুংদা মুরুম-মুরুম শোন্দুনা লৈবা থেংনরে৷ ইরুজফমদা হেন্দসেত ওন তৌরগা ইরু-ইরুনা মাগী কোয়নবা নুপাগা ৱারী শাবা থেংনরে৷ মখোয়না শানবা ৱারীদা, নুপা-নুপীগী মরীদা লৈবা অকাম্বা ৱাহৈশিং মনীং তম্না ঙাঙনবা থেংনরে৷ লম্বীদা ঙাঙন-ঙাঙনদুনা চতপদা অচত-অওকশিংবু ঈকাই খু্ম্নগনি হায়বা খঙদ্রে৷ অকাম্বা ফোটো নত্ত্রগা ফিল্মশিং মনীং তম্না উবা ফংবনা মপুন্সি লৈখা তানবগী অচৌবা মরম ওইরে৷ কদায়গা কনাগা করম্বা মতমদা করি তৌনরিবা কনামত্তনা খঙনদ্রে৷ খুদিংমক মরন্নাই খুসি-রাসি তৌরে৷

মখোয়না থবক লৈতবদগী থৌ থিবা ওইনা মোবাইল পায়রগা নুপাগা খঙননবসু মরম থিবা থেংনৈ৷ মখোয়না নম্বর লৌশিল্লি অদুগা মিসকোল তৌই৷ করিসু তৌদবী নুপী চহী ১৭ দগী ২৬ ফাওবদা লৈবনা নুপা ৫গী চাংদা মোবাইলদা খঙনবগী মরী থম্বা থেংনৈ৷ ঙাঙনবদা নুঙাইবা, মশাগী মশক খঙলকপা, থবক-ইনখাং তৌবা, হিংমিন্নবা য়াগদবা নুপা থেংনরবদি নোংম-নোংমগী নকশিল্লক্তুনা উনবগী তানজা অমদা য়ূম পানশিল্লি৷

করিসু তৌদবা নিঙোলশিংনা মোবাইল পায়রিবসি অয়াম্বনা য়ূম পান্ননবা মরমগী ওইনা উবা ফংই৷ খুনাইদা পামদবা থৌদোকসু কাঙলূপ অসিনা খ্বাইদগী হেন্না থোকহল্লি৷ মখোয়না পায়রিবসি নুপা অমগা মরী শেমদুনা য়ূম পানবা য়ানবনি (খরা হন্থবা ৱাহৈদা হায়রগনা নুপা ফাননবা লাং থাকপনি হায়বসিনি)৷ মখোয়না নুপাবু মোবাইলগী খূত্থাঙদা ৱাহৈগী লৌনম তৌদুনা মরী থম্ননবা হোতনৈ৷ নুপানা নুপী অমদগী পামজবা খোঞ্জেলশিং খূদম ওইনা কেবগী, ওইনবগী, নিঙাই তৌবগী, লক্নবগী, খোয়থুম্ননা নোকপগী ঈরাং য়াম্না য়াওবা ~ থাংবা খোঞ্জেলশিং মখোয়গা ৱারী শানরিবা নুপাশিংদা তাহল্লি৷ মতম অমা চিঠিদফাওবা ইনবা ঙম্লমদবা ৱাহৈশিং ঙসিগী মোবাইল পায়রিবা নিঙোলশিংনা ঈরাই লায়না হায়দোকপা ঙম্লে৷ চূপ্পগী মখোলসু তাহন্নরে, মদুসু হকচাং কয়াতকী মফমশিং হোং-হোংদুনা হায়রগা মখোল তাহল্লে৷ মসিনা নুপা ওইবগী মতৌ অদু য়াকাইরকপনা অমুক্তং উনবগী ঈখৌরাংবদু য়াকাইহল্লকই৷ ৱাহৈদা কা হেনজিন্নখিবনা মরম ওইরগা অমনা অমগা উনবদা হংগোইবা, ঈকাইবা অমত্তা ফাওনদে৷ উনবগা নুপা-নুপীগী মরীদা চেতশিন্নরুই, খুদোং চারগনা কা হেনজিন্নরুই৷ মসিমক নিঙোল অদুনা পাম্লম্বনি মরমদি মসুম্না তৌবসিনা মশাগী দাবী অমা নুপাদুগী মফমদা মপাংগল কন্না লৈবা হৌই৷ ৱাহৈ অমরোমদা হায়রগা, উনবা মতমদা নুপীনা মশাগী অশোনবদু পীথোক্লগা নুপাগী অকনবগা ওন্নথোকই হায়বসিনি৷ নুপী অমদা মশাগী অকনবা পীথোক্লুরবা নুপানা নুপীদুগী মমাঙদা মরাল লৈরবগুম মপাঙ্গল শোন্থখি৷ হায়রিবা শোন্থবগী তানজা অসিবু ঙাইরিবা নিঙোল অদুনা নুপা অদুদা য়ূম পানশিনবনি৷ মসি ফোর্মুলা অমনি৷

নুপাশিংগী মরক্তা নিঙম-পোঙমদবা নত্ত্রগা হিংচা-য়াইতমদবশিংনা মখোয়গী লাংদা থুবনি৷ নিঙোলশিংগী ৱাখলদা নুপা অমগা য়ূম পানবা ফংহৌবা হায়বসী পুন্সি চূপ্পা চাবা কোন্নরবা লোটরি অমা ফাওবগুম্বনি৷ মখোয়না পুন্সিগী মহৈসি ‘নুপা অমগা য়ূম পালহৌবা হায়বসিনি’ হায়না লৌই৷ মখোয়গী লাংদা খ্বাইদগী থুরিবসী চহী নৌনা থবক চঙখিবা নুপামচাশিংনা অয়াম্বনি৷ করিগুম্বদা নুপীবু লায়না শান্নবা ঙম্বা নুপাশিং থেংনরুরগনা মশানা থাকচবা লাংদা মশা অদুমক থুজরগা লৈখা তারবী, মাঙজরবী অমা ওইনা লৈহৌই৷ মচিং ফত্তবী, মীনা লাকচবা য়াদবী ওইরগনা লান থোকই৷ মীশি-মীনা ফাওবা থোকই৷ মসিদগী মখল-মখা কয়াগী ক্রাইম থোরকই৷ লম্বী অসিদা মরন্নাই শেন্থোক লম্বী থিজরিবা নিঙোল মচাশিং খরসু মোবাইল পায়রগা চতপা থেংনগনি৷

মায়গৈ অসোমদা নিঙোল য়াম্না পোকপী মমাশিংনা নারোন্দগী মতেং পাংশিনবসু য়াওই৷ মরমদি, খুনাই শেন্মীতলোনগী ফীবম ফতশিল্লক্তবতা নত্তবা থবক ফংদবগী, তৌফম খঙদবগী, লাইরিক মখা চত্থনা তমদবগী ককঙাউনরবশিংনা নোংম-নোংমগী লম্বী লান্না চতশিল্লকপগী মরক্সিদা তংদু লৈতাবা পুন্সি মরেল অমা ফংবা ঙম্লকত্রবা মীতৈ খুনাই ওইরকপসিনি৷ নুপানা য়ূম্লিংবা খুনাই অসিদা নুপীনা নুপাগী মপান তাংদুনা হিংবা তাই৷ অদু ওইরবদি, ‘কনাদা য়ূম পাল্লগা চনীং তাবা পুন্সি মরেল অমা ফংগদগে’ হায়বসি অচৌবা ৱাহং ওইরক্লি৷ নুপীশিংবু লৌরগা লোইগদৌরিবা (মীতৈগী কন্টেক্সতা মপুরোইবা ওইবগী ৱাহন্থোক) নুপাশিংগী পুন্সি মহিংগী ফীবম অসি নোংম-নোংমগী ফতচিল্লকত্রি৷ মসি হৌরক্লিবা নিঙোলশিংনা উই৷ উনা-উনা খঙন-খঙনা থায়নগুম মমা-মপাগী হায়বা ইনবী নিঙোল ওইদুনা থাজবা মফমদা চতলুবা য়াদ্রে হায়বা খঙলক্লি৷ মমীত-মনা শিংবা মপান থোকপা নুপীশিংনা, হিংবা য়ারবা শেন্থোক লৈবা নুপামখৈদা লৈশিনখ্রবদা অতৈদি কনাদা য়ূম পানগদগে৷ হৌজিক্তি মীগী মমলসি শেলনা লেপ্পা মতম্নি৷ ফনা ফবা নুপাদু শেল থোক্ত্রবদি অরেম্বা ওইরক্লি৷ নিঙোলবু মমা-মপানা শেন্থোক লম্বী লৈবা লম্বী (মবুংশিংগীদমক খনবগুম) পীবিদবদগী মসি অয়াম্বনা থোরকপনি৷ নুপা অমা ফংবা হায়বসি শেল থোকপা থবক অমা ফংবগা অমত্তনি৷ নুপা ময়ূমদা চাক্রি (থবক) তৌবনি৷ কোন ফেঙগনি, ৱাইরম শেংগনি, ফিজু-ফিজামগনি, ৱাইশিত-ৱাইশেংগনি, ফমুং-ফানুং লোইশিল্লগা মাবু লোইবা মপুবু পেলহনগনি৷ অঙাংসু পোকপীগনি, খোমসু পীথক্কনি, চাউনবসু য়োকপীগনি, থাগতপা নত্ত্রগা মীচৈসু চাগনি৷ মীনাই ওইনা, মশাগী পুন্সিগী মমল খঙদনা লোইখিগনি৷ পূ্ম্নমকসি ওইদুনসু চরা হেল্লোইদবা নুপা অমা ফংহৌনবা হোতনবা হায়বসি য়াম্নমক তঙাইফদবনি৷ মশাগী মিংদা খরদং থীখ্রবসু অঙাং অমবু য়াওখ্রবদি কাউনখিবা ঙাক্তনি হায়বা খঙই৷

ৱারোইশিন

হৌজিক্কী মীতৈ খুনাইদা মতিক চাবা নুপা ফংবা ৱাবগী ৱাফমদি লাপ্না থমখিবা য়াই, তশেংবদি নুপা ফংজিল্লক্তবা অসিনি৷ মীতৈ খুনাইদা য়ূম্বান্দবা নুপাগী মশীংদগী নুপীগী মশীংনা হেন্না লৈবা থেংনরে৷ মসিনা তাকপদি নুপা মশীংদগী নুপী মশীংনা কা হেন্না য়াম্লে হায়বসিনি৷ মতম তানজা অসিদা, হৌরক্লিবা মীরোলশিংনা করি তৌবা তাই৷ মখোয়গী মফমদা য়াম্না চাউবা ৱাহং অমা লাক্লি৷ ৱাহং অদুগী পাউখুম থিবা খোঙচত্তা মোবাইল ফোনবু অফবা খূতলাই অমা ওইনা থেংনরুবদগী নিঙোলমচা খরনা শীজিন্নদুনা চাংয়েংবনি৷ মসিদা মখোয়না মঙাল লৈবা তুংলমচতকী মপুদা য়ূম পানবা ঙম্বা অসি অচৌবা মায় পাকপা অমনি৷

অদুম ওইনমক, মোবাইল পায়বা নিঙোল খরনদি খুনাই অসিবু লৈখা তানা চিংথরি৷ মোবাইল পায়বা মীতৈ নিঙোল অয়াম্বগী লমচত-শাজতশিং চিংননীংঙাই ওইরক্লি৷ থাজবা য়াদবা নিঙোলশিংগী মরক্তা মোবাইল পায়বীশিংনা খ্বাইদগী থাজদনীংঙাই ওইরক্লি৷ মসিগী মহৈনা য়ূম্বাল্লকপা মতুংদা সাইকোলোজিকেল ৱারফ্যের অমমম থোরক্লি৷ হিকোম-হিকোম্বা মখলগী মরী চাওখতলক্লি৷ মীশি-মীনা থোরক্লি৷ চনীং তাদবা পুন্সি মরেল অমা য়োকখতলি, পূক্নীং লৈতানা হিংবা ফংলকত্রি৷ মসিশিংসি থিংহৌনবা হোতনবা চঙই৷ থিংনবা হোতনবগী লম্বীদা মমা-মপা, মবুং মৌপ্বাশিংগী থৌদাং য়াম্না য়াওই৷ ইমুং-মনুং, মরী-মতাশিংগী মথক্তা, নিঙোল অদুগী অকোয়বদা লৈরিবা নুপাশিং অমসুং মোবাইল শীজিন্নরিবা নিঙোল অদুগীসু থৌদাং য়াম্নমক চাউনা লৈবনি৷ ঈনখতলকপা পুন্সিগী ঈহম্নরকপা ৱাখল্লোন খরনা লমজিংদুনা ইশাবু, পুন্সি মরেলবু অমসুং মথংগী মীরোলবু লম্বী লান্না লমজিংবীরম্বা (পাপকী মহৈ লোকফমদা লংশিনবিরম্বা) হায়বসি মোবাইল হায়রিবা খূতলাই অসিগী মরালনদি ওইরোই৷ শীজিন্নরিবা ঐখোয়-ঐখোয়গী পূক্নীং-লৌশিং চাওখত্তবনা ওইগনি৷ মী ওইবগী মতৌ লাপথোরকপদগী ওইগনি৷ অচুম্বা, অফবা অমসুং ফজবা মশক খঙনবা হোতনদবদগী ওইগনি৷ মীতৈ নিঙোল ওইবগী দিফিনিসন্না মমল লৈরক্তবদগী ওইগনি৷ ঐখোয় ইশানা ইশাগী জিন (লৈহৌ মরূগী মপাংগল) মাঙহনজবনা ওইগনি৷ হৌজিক ওইরিবা ফীবমসিদা লেপ্তনা চত্থরবদি ঐখোয়গী থংনবা মীরোলগী মরায়বক্সি লৈখা তারবা খুনাই পুন্সি-মরেল অমদা লৈহৌরগনি হায়বসিনি৷

হৌজিক কৈথেলদা ফংলিবা মোবাইল মখলশিংদি - নোকিয়া, সামসুং, মোটোরোলা, সোনি এরিক্সন, এল জি, এপ্পল, ঐচটিসি, আই-মেট, ও২, ইটেন, ঐচপি, এসস, গিগাবাইত, এসর, পাল্ম, ব্লেকবেরি, বোদাফোন, টি-মোবাইল, সাজেম, এলকটল, ফিলিপস, সার্ফ, টোসিবা, বেংক্যু, এনইসি, হাৱৈ, পানটেক, আই-মোবাইল, আইএনক্যু, ভর্টুনচিংবনি