ইন্টর্নেটকী তাইবং অমসুং মীতৈ খোরিরোল

KHORIROL gi makhum

মীতৈ খোরিরোল (মণিপুরী সাহিত্য) ফনা য়াম্না চাওখতলে ৷ মীতৈ খোরিরোলবু শৌগতপা অমসুং মসিবু খঙবা মীশিংনা চাওখতপা অসিগীদমক চাউথোকপসু ফাওনরে ৷ ভারতকী অতৈ লোনশিংগা চাংদম্নবদা নোপত্রে, মশাগী থাক অমা লেপচবা ঙম্লে৷ সাহিত্য একাদেমিনা লোন অসিগী মশানা ইজবা খোরিরোল অমসুং লোন অসিদা হন্দোকপা খোরিরোলদা অৱাংবা থাক্কী মনা-মথুমসু পীদুনা ঈকাই খুম্নরি৷ লোন অসিগী খোরিরোলগা মরী লৈনবা লনাই লূপশিংনসু মখল-মথেলগী মনা পীদুনা শৌগতপা উরি ৷

মীতৈ খোরিরোল হায়রগা ঐখোয়না মণিপুরদা লৈবা মীশিংনা মীতৈরোনদা ইবা খোরিরোলখক্তবু খঙনবগুম তৌরম্মী ৷ মণিপুর মনুংদনা ইম্ফালখক্তগী ওইনসু তৌরম্মী ৷ হৌজিকপুদি মীতয়েং খরা পাকথোরক্লে ৷ ইম্ফালগী ৱাংমদা লৈবা লমশিংদসু মীতয়েং চঙবা উরে ৷ মতৌ অসুম্না মীতয়েং পাকথোরকপদা মণিপুরগী মপান্দা লৈবা মীশিংনা মীতৈ খোরিরোলগী তাইবংদা তৌরিবা খূদোলশিংবুসু খরা-খরা উবা হৌরক্লে ৷

মণিপুরগী মপান্দা লৈবা মীতৈ খোরিরোলদা মণিপুরনা য়াম্না নক্না খঙলম্বসি কছাড়নি ৷ মপান মণিপুরগী মীতৈ খোরিরোলবু পূক্নীং থৌগতপা ওইনা পীবা কামিনি কুমার মনাসি কছাড়গী অইবা নতত্রগা অইবীতনা ফংলম্মী ৷ মায়গৈ অমরোমদা, কামিনি কুমার মনাসি কছাড়গী নতত্রগা মপান মণিপুরগী খোরিরোলমী (খোরিরোয়) শিংদদি সাহিত্য একাদেমি মনাগা পাংখকনি ৷ কছাড়দগী মীতয়েং খরগা লাপথোরকপা ওইনা উরকপা লমনা ত্রিপুরানি ৷ ত্রিপুরাগী মতুংদা উবনা বাংলাদেশ অমসুং হোজাইনি ৷ মখোয়গী মতুংদা মশাবু উবিনবা হোতনরিবশিংনা মেঘালয়া অমসুং মিজোরামনি ৷

মীতৈ খোরিরোলগী মহৈরোয় নতত্রগা থিজিন-হূমজিনবা নতত্রগা য়াম্না খঙগনবা অখঙ-অহৈ অমদা হংলুরবসু ঐখোয়গী মীতৈ খোরিরোলমী কয়া লৈ, মখোয়দু কনা-কনানো হায়বগী পাউখুম ফংগনি হায়বগী থাজবা লৈতে ৷ মরমদি মণিপুরনা মণিপুরগীদগী হেনবা অতৈ য়াম্না খঙদে, কছাড়না কছাড় অমসুং মণিপুরগী খরা নত্তনা অতৈ খঙদে, ত্রিপুরানা ত্রিপুরা অমসুং মণিপুর নত্তনা অতৈ খঙদে ৷ মতৌ অসিগুম্না বাংলাদেশসু বাংলাদেশ অমসুং মণিপুর নত্তনা অতৈগী থোইনা খঙদে৷ অদু ওইরবদি কনানা ঐখোয়গী মীতৈ খোরিরোলগী তাইবং অসিবু পাক শন্না খঙলিবগে ? হংবা য়াবা ৱাহংনি ৷ পাউখুমদা- কনানসু ঐখোয়গী মীতৈ খোরিরোলগী তাইবং অসিবু পাক শন্না খঙবা লৈতে হায়না খুম্বসিনা চুম্লি ৷

মীতৈ খোরিরোলগী মরমদা খঙগে হায়রবদি-

১. মীতৈ খোরিরোলগী মহৈরোয় ওইবা তাই

২. খোরিরোলগা মরী লৈননা ফোঙবা চেফোঙশিং চাং নাইনা (অরিবা মশীং য়াওনা) পাবা তাই

৩. খন্না-নৈনবা থৌরমশিং চিত্থদনা য়াওবা তাই

৪. পাউচে খূদিংমক নুংতিগী পাবা তাই

৫. লাইরিক ফোঙবগী থৌরম য়াওবা তাই

৬. লাইরিক্কোনদা চঙদুনা লাইরিক পাবা তাই

৭. খঙনীংবগী অপাম্বগা লোয়ননা থিজিন-হূমজিনবা তাই

অদুবু মসিনসু মপুং ফানা খঙবা ঙম্বগী ৱাদি লৈতে৷ মরমদি, পূম্নমকসিগী খুদোং চাবদু মী অমনা লোইনমক ফংবা ঙমদে ৷ ‘সাহিত্যগী পাউ’ চেফোঙনা খোরিরোলগা মরী লৈনবা ঈ-পাউসিং পীবগুম্না অতৈ চেফোঙ অমত্তনা পীবা ঙমদে হায়রবসু চেফোঙ অসিমক্না মপুং ফাবদি নত্তে ৷ মসিনা তাকপদি, খোরিরোলগী তাইবংদা ঐখোয়গী ঈ-পাউ ফাওনবগী চাংসি য়াম্নমক ৱাতলি অমসুং য়াম্নমক লায়ররি হায়বসিনি ৷

ঈ-পাউ ফাওনবগী তাইবংদা হৌজিক্তি ইলেক্ট্রোনিক্সকী মখল-মথেল দিভাইস কয়ামরোম শীজিন্নবা অসিনা খ্বাইদগী য়াঙনবা অমসুং খুদোং চানবা মরম ওইরে ৷ মোবাইলদা আইফোন ফাওবা থোরক্লিবসিনি ৷ কম্প্যুটারদা ইন্টার্নেটকী পাম্বৈনা মালেমসি য়াম্নমক পীকপা লৈকায় অমা ওইহল্লক্লি ৷ কম্প্যুটারসু দেক্সটোপতগী লেপতোপ (নোটবুক), মিনি লেপতোপ/প্লামতোপ (নেটবুক), আইপেদ, পিদিএ (পর্সনেল দিজিটেল এসিষ্টেন্ট) অসিনচিংবা থোরক্লি ৷ হৌজিক্সু অনৌবা থোরকপা লেপত্রি, ৱ্যেরেবল কম্প্যুচর ফাওবা থোরক্লি ৷ ইন্টর্নেট অসিসু কেবল মরীদা দাইল-অপ কনেক্সন লৌরম্বদগী ব্রোদবেন্দ কনেক্সন লৌদুনা ফরে খন্নরম্বদু হৌজিক্তি য়ু এস বি মোদেম ওইনা ফংলে ৷ ইশাগী লেপতোপ অমদা পানশিল্লগা অপাম্বা মফমদা ফমদুনা/লেপতুনা/চত্তুনসু মালেমগা পাউ ফাওনবা য়ারে ৷ মোবাইলদসু ইন্টর্নেটকী খুদোং চাবা লৈরে ৷ হায়রিবা খুদোং চাবশিং অসিদা ঐখোয়গী মীতৈ খোরিরোলমী অমসুং থৱায় য়াওবশিংদি কদায়দা লৈহৌরবগে ? কম্প্যুটার শীজিন্নবা হৈব্রসু হৈতবা, ইন্টর্নেট শীজিন্নবা হৈব্রসু হৈতবা, অহৈবশিংনা খোরিরোল থৱায় য়াওব্রসু য়াওদবা অসিনচিংবা মরম কয়া অসিগী মীতয়েংদগী য়েংলবদি মীতৈ খোরিরোলসি ঈ-পাউ ফাওনবগী তাইবংদা য়াম্নমক শোত্থরি হায়বসিনি৷ মশাগী ই-মেইল এদ্রেস লৈজবা খোরিরোলমী মশীং কয়া ওইগদগে হায়বসি ৱাহং ওইনা হংবা য়ারি ৷

হৌজিক্কী তাইবংপান অসিদি অসুক্কী মতিক খোঙজেলসু য়াঙখ্রে ৷ মালেমগী ওইরক্লিবা ফীবম অসিদা মীতৈনা তান্নবা ঙমগনি হায়বসু থাজদ্রে ৷ চিঠি ইদুনা পোষ্টতা থানদ্রে, মেইলদা ওইনা ইনরে৷ ওফিসিএল লেটর ফাওবা মেইলদা ফংহল্লে৷ হার্দ কোপী কোন্না থানরে৷ ইনভাইতেসন, ফোর্ম সবমিট, এপ্লিকেসন্নচিংবা পূম্নমক মেইলদা তৌনরে ৷ থবক্সু নেটকী খূত্থাংদা লৌনরে ৷ ঈ-পাউ খূদিংমক নেটকী খূত্থাংদা চতনবনা মরম ওইরগা প্রাইভেট লাইফ ফাওবা ওফিসিএল লাইফ ওইনরক্লে ৷ অহীংগী পূং অনীদা ইরুবা মেইলগী পাউখুম পূংখাই অমগী মনুংদা ফংনরে ৷ কনানা কদায়দা করি তৌরিবগে হায়বদু য়াম্নমক লায়না, মী অমনা খঙবদু অতোপ্পা অমদা তাক্নবা য়ারে ৷

কম্প্যুটার অমসুং ইন্টর্নেট অসিগী খূত্থাংদা ঈ-পাউসি য়াম্নমক পীবা য়াই৷ দাটাবেজ শেম্বা, ফোটো হাপকতপা, এজুকেসন পীবা, অতৈগা পাউ ফাওনবা, অতোপ্পগী মরমদা খঙবা হায়বসি য়াম্নমক লায়রবা থবক ওইরে ৷ অসিগুম্বা খুদোং চারবা মতম তানজা অসিদা ঐখোয়গী মীতৈ খোরিরোল অসি ইন্টর্নেটকী খূত্থাংদা ময়াম পূন্না খঙমিন্নবা য়ানবগী থৌরাং কনানা তৌবিরিবগে ? কনানসু তৌদে হায়রবদি মসিগী তঙাইফদবা লৈতবগীরা ? নতত্রগনা মতমগী য়াওলগা ঈরোইননা ঐখোয়না চতমিন্নবা ঙমদবগীরা ? মরম অমদি লৈফম থোকই ৷

ইন্টর্নেটকী খূত্থাংদা ফংহল্লবনিনা মালেমগী মফম-মফমদা শন্দোক্তুনা লৈখিবা মীতৈশিংনা মীতৈরোনদা ফোঙবা পাউচে মঙাদি পাবা ফংলে ৷ পাউচে মঙা অদুদি- পোক্নফম, হুইয়েন লানপাউ, নহারোলগী থৌদাং, ইরৈবাক, শঙাই এক্সপ্রেস অসিনি ৷ ইংরাজিগী শঙাই এক্সপ্রেস, ইম্ফাল ফ্রি প্রেসনচিংবসু ইন্টর্নেটকী খূত্থাংদা পাবা ফংলি ৷ মসিগী মথক্তা ‘ঈ-পাউ’, ‘কংলা ওনলাইন’নচিংবসু ইংরাজি লোন্দা পাবা ফংলি ৷ মায়গৈ অমরোমদা, মীওই কয়ানা মশা-মশাগী ব্লোক শেম্নদুনা ইনরি, মরন্নাই সাইটসু হাংনরি৷ য়াহু, গুগল, লিঙ্কইননচিংবদসু গ্রুপ সাইট কয়া শেম্নদুনা মশা-মশানা পামজবা ঈ-পাউশিং শন্দোক্নরি ৷ অদুবু মখোয় কনা অমত্তনা মীতৈ খোরিরোলবুদি থৱায় য়াওনা মশক তাক্নবা হোতনরম্বা উবা ফংদে ৷

মীতৈ খোরিরোলসি ইন্টর্নেটকী খূত্থাংদা কনা অমত্তনা মমল থম্বীরমদবসি মশাগী মমল লৈতববগী তৌবরা, খঙদবগী তৌবরা, হৈতবগী তৌবরা অমদি শোয়দনা ওইগনি ৷ পোক্নফম পাউচেগী লিটরেচর কলমদা সাহিত্য একাদেমি মনা (মশানা ইজবা অমসসুং হন্দোকপা)গী অপদেত তৌবিদ্রবা ইনফোর্মেসন থম্বিবা নত্তনা খোরিরোলমী অমত্তগী ফোটো, মখোয়গী লাইররিকশিং, অতৈ মনা-মথুমনচিংবগী খঙফম ওইবা দাটাবেজ কনাগুম্বা অমত্তনা ইন্টর্নেটকী তাইবংদা শেম্বীদ্রি ৷ মসি ঐখোয়গী লাইবক য়াম্না থীবনি, য়াম্নমক লাইবক থিরবনি ৷

হন্দক য়াহু গ্রুপকী সাইট অমা ওইনা শৈরাংবা মরূপ কৌবা ফম্বাক অমা থেংনৈ ৷ লোন, সাহিত্য, কলা অমসুং সংষ্কৃতিগা মরী লৈননা খন্ন-নৈনবা ফম্বাক্নি ৷ কোন্নথংদা খঙবা ঙম্লকপদি ফম্বাক অসি বাংলাদেশকী থৱায় য়াওবা নহারোলশিংনা শেম্বনি হায়বসিনি ৷ মখোয়গী থৌরাং থাগতনীংঙাইনি ৷ রোমান ময়েক্তা মীতৈরোন ইবা ফম্বাক অসিনা মরম ওইরগা মিং চল্লবা মরূপচা ৪৫০ হেনবনা লোন, সাহিত্য, কলা অমসুং সংষ্কৃতিগী মরমদা খন্ন-নৈনরম্বা থেংনৈ৷ ফম্বাক অসিগী মীতয়েং চাউমনবনা খোরিরোলগী তাইবংদা অখন্ননা চঙশিল্লকপা ঙমদে ৷ খোরিরোলমী অমত্তগী ফোটো য়াওদে, মখোয়গী মরমদা ঈ-পাউ অমত্তা ফংদে ৷ অহাঙবা দাটাবেজ অমসুং মীতৈ খোরিরোলমীগী ফোটো অমত্তা য়াওদবা এলবম ওইনা তৌই ৷

হন্দক নৌনা খোরিরোল কৌবা ফম্বাক (লিটরেরি ই-ফোরম) অমা য়াহু গ্রুপকী মখাদা শেম্লম্বা থেংনৈ ৷ রোমান ময়েক্না মীতৈরোন ইবা ফম্বাক অসিমদি মরু ওইনা মীতৈ খোরিরোলদা অখন্নবা মীতয়েং থম্বা মাল্লি ৷ নৌনা হৌগতচরবসু মখোয়গী দাটাবেজ য়াম্নমক চঙখোন্না ঈনাক খুল্লি ৷ মখোয়গী ফোটোদা মণিপুর, অসাম, ত্রিপুরা, বাংলাদেশকী খোরিরোলমীশিংগী ফোটো হাপ্পা ঙম্লে ৷ পিদিএফ ফোর্মেটতা চেফোঙ (মৈরা, শজিবু, নৈনরোল, মনিপুরি) খরসু পাবা ফংলি ৷ লিঙ্কতসু য়াম্নমক মরাং কায়না ভারত, মালেমগী খোরিরোলশিংগা শমজিন্নফম পীরি ৷ ফম্বাক অসি য়াম্নদি পীকই হায়ববু মসিদা লেপ্লগা য়াম্না চাউবা তাইবংপানদি উবা ফংই ৷ অদুম ওইনমক অৱাতপদি লৈরি অদুবু মখোয়গী থৌরাং অসী মায় পাক্কনি খল্লি ৷ ঈ-পাউ ফংবা ঙমদবদগী অৱাতপা খরসী লৈবনি হায়না খল্লি ৷ কনাগুম্বনা খোরিরোলগী সাইট http://groups.yahoo.com/group/KHORIROL/ অসিদা চঙবিরবদি মীতৈ খোরিরোলগী তাইবং অমা শং-শংনা উবা ফংবিগনি হায়না থাজরি ৷ ফম্বাক অসিনা মপুং ফারকপদা চহী অমরোমদি চঙখিগনি হায়না খল্লি ৷ চহী অমগী মতুংদদি কনাগুম্বা মীওই অমনা মীতৈ খোরিরোলগী অপূনবা তাইবং অমগী মশক্তু ফম্বাক অসিদা উবা ফংলগনি হায়না নীংই ৷ অসিগুম্বা মখলগী লিটরেরি ই-ফোরম অমা অমসুং অমদগী হেন্না লৈবগী য়াম্নমক তঙাইফদবা লৈবনি ৷

মসিনা গ্রুপ অমগী মখাদা শেম্বা ফোরম অমগী নত্ত্রগা খরগী ৱানি ৷ ইন্টর্নেটতা মীতৈ খোরিরোলগী ওইবা মশাগী ৱেবসাইট অমা শেম্বা হায়বসি ঐখোয়না থাজবা থম্বা য়াই ৷ থাজবা অসী মণিপুরী সাহিত্য পরিষদ, ইম্ফালনা থবক্তা ওন্থোকপীবনা হেন্না মতিক চায় হায়নসু খল্লি ৷ রাইটর্স ফোরম, নহারোল সাহিত্য প্রেমি সমিতি, কলচরেল ফোরমনচিংবনসু হীরম অসিদা চঙশিল্লকপা য়াই ৷ মীতৈ খোরিরোলগী অকূপ্পা মরোল পূম্বা ফংফম অমা লৈবগী মতমদু য়াম্নমক থেঙমল্লবনি ৷ মীতৈ খোরিরোলগী মশাগী ওইবা ৱেবসাইট অমা লৈত্রিবফাওবদি খোরিরোলনা মহূত শিনবা ঙমগনি হায়নসু থাজৈ ৷ মীতৈ খোরিরোলগী মশাগী ওইবা ৱেবসাইট অমা লৈজরবা ফাওবদা খোরিরোলনা মরোই-মনাউ ওইনা কান্নরবা ঈ-পাউশিং পীগনি হায়বসু থাজরি ৷

ইন্টর্নেটকী তাইবংদা মীতৈ খোরিরোলগী মশাগী ওইবা মপূং ফাবা ফম্বাক অমা অথুবা মতমদা লৈরসনু ৷