মীতৈ খুনাইদা লুখ্রাবীগী মফম

(বিদিতকী ­‘মপুরোইবা অমা লৈরম্বদুদি’ হায়বা ৱারীমচা লাইরিক্তা মীতয়েং থম্লগা নৈনবা)

লুখ্রাবী

মপুরোইবা লৈখিদ্রবা মতুংদা অমুক হন্না য়ূম পান্দনা লৈবা নুপীবু ‘লুখ্রাবী’ কৌই ৷ মতাংসিদা শীজিন্নরিবা ‘লৈখিদ্রবা’ হায়বসি ‘শিখ্রবা’ (নোঙ্গাখ্রবা, অমন য়াইথোং কূমখ্রবা) বু মরু ওইনা খঙনৈ ৷ মসিগী হেক ওন্ন-তৈনবদা মশাগী নুপী শিখ্রগা অমুক অতোপ্পা নুপীগা লুহোংদনা লৈবা নুপাবু ‘পাখ্রা’ কৌই ৷

মায়গৈ অমরোমদা, মপুরোইবগা ফীবম কয়ামরোমদা লৈমিন্নদবা নুপীশিংসু লৈ ৷ মখোয়দু মপূং ওইনা ‘খাইনদুনা লৈবা নুপী’ নতত্রগা ‘খাইনরগা মপামদা হল্লক্তুনা লৈবা নুপী’ নতত্রগা ‘হল্লকপী’ হায়রগা খঙনৈ ৷ অদুম ওইনমক, তোঙান-তোঙানবা ফীবমশিংসিদা য়েংলুরগদি মখোয়সি মিংথোল অতৈ কয়ামরুমসু পীবা য়াই ৷ ‘খাইনদুনা লৈবা নুপী’সি ‘লুখ্রাবী’দি কৌদে অদুম ওইনমক, ফীবম খরদা মখোয়না লুখ্রাবীগী মতৌদা পুন্সি হিংই ৷ মরম অদুনা ৱারেং অসিদা মখোয়বুসু লুখ্রাবী মখল অমা ওইনা লৌজরি ৷ মীতয়েং অসোমদা পূক্নীং চিংশিল্লগা, থর্দ ৱর্ল্দ কনত্রিশিংদা লৈবা নুপানা খুল্লিংবা খুনাইদা মপুরোইবগা লৈমিন্নদবী নুপীশিংবু তোঙান-তোঙানবা মখল ১০ (তরা) দা থম্লগা মখাদা নৈনজরি ৷ মখোয় অদুদি-

১. ৱায়েলনা য়ারবী লুখ্রাবী (True Widow/Legal Widow/Perfect Widow) – মপুরোইবা শিখ্রবা মতুংদা অমুক হন্না য়ূম পান্দনা লৈবী নুপীবু খঙনৈ ৷

২. ৱায়েলনা য়াদবী লুখ্রাবী (Illegal Widow/Deserted Widow) – লৈশাবী অমনা লুহোংদ্রিঙৈ মমাঙদা অঙাং অমা পোক্লবা অমসুং মতুংদা অঙাং অদুগী মপা অদু শিখ্রবা নতত্রগা মহাকপু থাদোকপীরম্লবদি অদুগুম্বা নুপীবু ৱায়েলনা য়াদবা লুখ্রাবী কৌগনি ৷

৩. লুখ্রাদবী লুখ্রাবী (Married Widow) – মসি মপুরোইবা শিখ্রবা মতুংদা অতোপ্পা নুপাদা য়ূম পান্দুনা লৈখ্রবী অমা নত্তে ৷ মহাক্না লুখ্রা-লুখ্রানা য়ূম পাল্লবী মৌ অমগুম পুন্সি লেনবা মখল অদুবুনি ৷

৪. য়ূম্বান্দবী লুখ্রাবী (Imaginary Widow/Bachelor Widow/Spinster Widow/Unmarried Widow) – মমা-মপা ওইবশিংনা করিগুম্বদা মচানুপীনা পামজবা, খোয়দাজবা অমসুং য়ানজবা নুপাগা য়ূম্বানমিন্নহন্দবা থৌদোক থোকই ৷ মমা-মপানা পাম্বা নুপাদা নমদুনা থাজবিনবা হোতনরকপসু থোকই ৷ মতম অসিদা নুপী অদুনা মূক্নদুনা য়ূম পান্দে হায়না খল্লসি ৷ চৈরক অসিদা মহাক্কী য়ানজবা নুপা অদু শিখিবা নতত্রগা তাথী-তাওইনা তৌবিবা থৌদোক্তগী কায়নদুনা লৈ ৷ হায়রিবা নুপী অসিনা নীংবা কায়দুনা মহাক্কী শক্তম লেপহৌদ্রবা নুপা অদুগীদমক কত্থোক্তুনা য়ূম্বান্দনা লুখ্রাবীগুম পুন্সি লেনখি ৷ অসিগুম্না পুন্সি লেনখিবী নুপীশিংবু য়ূম্বান্দবী লুখ্রাবী, ৱাখলগী লুখ্রাবী, লৈশাবী লুখ্রাবীনচিংবা মিংদা খঙনবা য়াই ৷

৫. তংখাই চাবী লুখ্রাবী (Half Widow) - ‘খাইনদুনা লৈবা নুপী’ নতত্রগা ‘খাইনরগা মপামদা হল্লক্তুনা লৈবা নুপী’বু ‘তংখাই চাবী লুখ্রাবী’ নতত্রগা ‘মপূং ফাদবী লুখ্রাবী’ হায়না খঙনবা য়াই ৷ মরমদি মহাক্না মপুরোইবদু লৈনা-লৈনা লৈতবগা পাংখক ওইরে ৷ অসুম্না খাইনরিঙৈদা নুপা অদুনা শিদোকখিবা তারবদি নুপী অদু লুখ্রাবীদি ওই অদুবু মপুং ফাবী লুখ্রাবীনি হায়বদদি অপনবা লৈ ৷

কনাগুম্বা য়ূম্বাল্লবী নুপী অমনা মৱা-মপুরোইবা লৈনা-লৈনা অতোপ্পা নুপাগা অহেনবা মরী লৈমিন্নরবদি হায়রিবা নুপী অদুবুসু ‘তংখাই চাবী লুখ্রাবী’ হায়না কৌবা য়াই ৷

৬. ৱায়েলনা খঙদবী লুখ্রাবী (Unofficial Widow) – কনাগুম্বা য়ূম্বাল্লবা নুপী অমনা ৱায়েল লোয়শঙগী অয়াবা য়াওদনা মপুরোইবগা তূমিন্না খাইনরগা লৈরবদি নতত্রগা অতোপ্পা নুপা অমগা হিংমিন্নখ্রবদি মদুগুম্বা নুপী অদুবু ৱায়েলনা খঙদবী লুখ্রাবী কৌগনি ৷

৭. শক্লেপতবী লুখ্রাবী (Unrecognised Widow) – কনাগুম্বা য়ূম্বাল্লবা নুপী অমগী মপুরোইবদু কুইনা মফম-মরাং খঙদনা লৈখ্রবদি নতত্রগা মাঙখ্রবদি অদুগুম্বা মখলগী নুপীবু ‘শক্লেপতবী লুখ্রাবী’ কৌগনি ৷ মহাক্না করিগুম্বা ‘ৱায়েলনা য়ারবা লুখ্রাবী’ ওইনীংলবদি ৱায়েল লোয়শঙগী চতনরোল মপূং ফাহনবা তাই অমসুং মপুরোইবা অদু লৈখিদ্রে (শিখ্রে) হায়বগী মথৌ-মঙম অমসু পাঙথোকপা তাই ৷

৮. মোমোন্নবী লুখ্রাবী (Happy Widow) – পোতলুমগুম খল্লবা মপুরোইবনা শিখিবদা হরাওবা নুপীদু ‘মোমোন্নবী লুখ্রাবী’ হায়না কৌগনি ৷ মপুরোইবগী মশক উনীংদবা, অতৈ অনৌ-অনৌবা নুপাশিংগী মায়থোং উনীংবনা অমসুং হরাও-তয়াম্না লৈনীংবগী ৱাখলনা লমজিংদুনা মপুরোইবগী পুন্সি ফাওবা মাঙহনবা ঙম্বী নুপীনি ৷ মপুরোইবা অদুনা হায়ন-তানবা য়াদবা য়ুঙাউবা ওইরবা নতত্রগা মৈ শোল্লবা নতত্রগা মরাইথুং পক্তুনা শদৌ থোংলবা, শোল্লবা নতত্রগা সোনো (বুদু-সুদু, বং চুবা, অপঙবা, অঙাওবা) চুরবা নতত্রগা নুপী য়াম্না ওতকনবা নুপা ওইরবদি অসিগুম্বা মখল অসিগী নুপীশিংনা মপুরোইববু ঙন্না পুন্সি নোংখম্নহল্লগা মোমোন্নবী লুখ্রাবী ওইরকই ৷

৯. য়ানরগা ওইবী লুখ্রাবী (Mutual Widow) – করিগুম্বা হীরম খরদগী মতৈ-মনাউশিংনা য়ানদুনা মখোয়-মখোয়গী নুপীশিংদু লান্থোক-লানশিন (একচেঞ্জ) তৌনৈ ৷ অদুবু মখোয় খাইনরবনি হায়বদি য়াদে ৷ থৌদোক অসিদা নুপীশিং অদুনা মখোয়গী য়ূম্বান পুন্সিদা অমুক হনজিনবা মতমদা মখোয় ‘য়ানরবা লুখ্রাবী’ ওইরবা মতুংদা হনজিনখি হায়না লৌবা তাই ৷

১০. পাখতকনবী লুখ্রাবী (Would-Be Widow) – মরম অমত্তা লৈতবদা নতত্রগা মরম চাদনা, মশা মতোমতনা মপুরোইবদু শিখ্রগদ্রা হায়না পঙপাদা পাখতচবা নুপীনি ৷ হায়রিবা অকিবা ৱাখলগী অনাবা পুদুনা য়ূম্বাল্লিবা মৌ অদুবু ‘পাখতকনবী লুখ্রাবী’ কৌগনি ৷

চাংখ্রময়ূম বিদিতকুমারগী ‘মপুরোইবা অমা লৈরম্বদুমদি’

‘মপুরোইবা অমা লৈরম্বদুমদি’ হায়বা ৱারীমচাগী লাইরিক অসি চাংখ্রময়ূম বিদিতকুমারগী মরিশুবা লাইরিকনি ৷ লাইরিক অসিগী মতাংদা অইবা মশানা হায়জৈ, ‘মীওইবগী পুন্সিদা অৱাবা নুঙাইবা, নোক্নীংবা কপ্নীংবা, পূকচেল চাউবা পীকপা, মীনুংসি লৈবা লৈতবা, থৌদোক-ৱাথোক কয়ানি৷ ময়াম অসিগী মওং মতৌদুনা থমোয়দা ফাওরকপা মতমদা তেন্তকনা ৱারীমচা ওইনা ইজখিবনি ৷’ (অইবগী ৱাহৈ খরা)

খুনাই অমদা হিংলিবা মীওই পুন্সি অমনা মখল-মথেলগী থৌদোক কয়ামরোমগা হকথেংনৈ ৷ পুন্সি অদুগী অকোইবদা থোকপা থৌদোকশিংদসু মহাক্না নাকোইননবু ওইরবসু য়াওশিল্লুই ৷ য়াওশিল্লুবমক নতত্রবসু তাশিল্লুই ৷ অসিগুম্বা মশীং থীঙমদ্রবা থৌদোক ৱারী ময়ামশিংসিগী মনুংদগী অখন্নবা ৱারী ৭৮ খক্নি ঐখোয়না ‘মপুরোইবা অমা লৈরম্বদুমদি’ হায়বা লাইরিক অসিদা পাবা ফংলিবসি ৷ লাইরিক অসিদা হিংমিন্নবা ঙমদবা নতত্রগা ফংদবা, অৱা-অনা, লৈত-লায়র, মাঙলোমদা চতখতপা ঙমদবা, ইমুং-মনুং পুবা ঙম্লক্তবা, শেতন খাইনবা, তঙদু লৈতাদবা, থুংনদবা অসিনচিংবা অৱাবনা থল্লবা ৱারী কয়াদি মীনুংশিগা লোয়ননা য়েক্লম্বা থেংনৈ ৷

মখল মথেলগী য়ামখ্রবা ৱারী ময়াম অমা লীরিবা লাইরিক অসিগী মনুংদা মরু ওইবা খরদং লৌখত্তুনা নৈনরবদি ঐখোয়না অহানবদা থেংনরিবসি – হিংবগী লানফমদা প্রাইভেত ইংলিশ ষ্কুল অমদা তোলোব য়ামদনা ওজা ওইবশিংগী পুন্সিগী মরমদা ইবা ৱারীশিং, ঈশৈদা য়াম্নমক ঙাওজবা মীওইশিং, য়ু অমসুং নতত্রগা জ্বারদা ঙাওদুনা মশাগী মপুন্সি মাঙহনজবা পুন্সিশিং অমসুং নুপীশিংগী তোঙান-তোঙানবা পুন্সিশিং অসিনি৷

লাইরিকসিদা য়াওরিবা নুপীশিং

লাইরিক অসিদা তোঙান-তোঙানবা নুপীগী শক্তম কয়া অমসু য়াওরি ৷ মখোয় খরদি –

১. য়ু থকপা নুপাগী লোয়নবী নুপী - চাউবীস্না (মপুরোইবা অমা লৈরম্বদুমদি), য়ু থক্তুনা মপুন্সি মাঙহনজখ্রবা চাউস্নাগী নুপীনি ৷ তেম্বী (ঙা মরূনা য়ুবা) য়ু অমসুং জ্বারদা লায়চুরবা তেম্বগী নুপীনি ৷ লৈহাওবী (চৈথেঙনরবী)সু য়ু ঙাওবা বুঙোথোইদা য়ূম পাল্লুবগী অৱা চৈথেং নংলবী য়ূমগী মৌনি ৷

২. মপুরোইবনা থাদোকপীরবী নুপী - মপুরোইবনা ইনাকখুনবীগা লৈমিন্নখিবনা মরম ওইরগা মণিমালাগী মমা মধুবালা (পাপা নঙ য়াম ফত্তে) না মরাইবক থীবী ওইহৌই ৷ মসিনা মরম ওইরগা পীক্লিবা নুপীমচা মণিমালানা মপা থিবা চতপদা মনুং-মতম চাদনা তাইবং থাদোক্নবা মরম ওইখি ৷

মপুরোইবনা থাদোকপীরবী নুপী অমনা লৈবাক্লৈ (ইচাগীদমক ঐ হিংদবা য়াদে) নি ৷ পোতফম থংনবী থরোঙৌবীনা বুঙোমপা লাক্লম্বগী ৱা তম্মী অদুবু মচাগীদমক খনবদা লমন খুম্নীংবগী ৱাখল ফাওরক্লবসু তূমিন্না খাঙজিন্দুনা লৈখিবী মমানি ৷

৩. লমচত কাম্বী নুপীশিং - থোকচাওগী নুপী চান্দনি (চান্দনি)না মপুরোইবা লৈনা-লৈনা অতোপ্পা নুপাগা লমচত কাম্মিন্নৈ ৷ কয়ারকসু খাইনরুই, অমুক অসুমক মপুরোইবনা লৌরুই ৷ লৈকাইনসু কয়ারক ৱারকই, হনবা লৈতে ৷ লমচত কাম্মিন্নবা হায়রগা অঙাং ১০গী মমা ওইরিবী দোহার থোকচাউগী নুপী রাশেশ্বরি (সোরাত বার্তোন)সু গোবিন্দ কৌবা নুপা অমগা লমচত কাম্মিন্নরম্মী ৷ মপুরোইবনা মপান থোক্তুনা হরি নাম শোল্লিঙৈদা মহাক্না য়ূমদা গোবিন্দ কৌবা অমগা ফম্লানমিন্নরম্মী ৷ মায়গৈ অমরোমদা, মশা ৱারকপা ঙমদবী চাউবী (ততখ্রবা তেলঙ্গা)সু মচা-মৱা থাদোক্লগা অতোপ্পগী মতুং ইনখি ৷ মপুরোইবনদি মচাশিংগী খন্দুনা অমুক হল্লক্লবদি লৌশিনগে হায়না খল্লি ৷

৪. মপুরোইবনা সাহিত্য কলা তৌববু ফীবমগী মখা পোনবনা শৌগতপা ঙমদবী নুপী - লাইরিক অসিদা মপুরোইবনা সাহিত্য কলাদা ঙাওজববু শৌগত্তবা নুপী ওইনা অহন ওইরবী কেতুকি (অসিনচিংবা হায়রগা য়ারোই) অমসুং কেথবী (মনা) য়েকই ৷ কেথবীদি কেতুকিগুম্না তন্দুনা তূমিন লৈথোকখিবা নুপী নত্তে, মাগী পুন্সিসু শাংনা চতকদবা ৱাতলি ৷ মরম অদুনা ৱা ঙাঙঙকই, অশেংবা ৱাফম অমা শেংদোক্নরসি হায়দুনা দাবী তৌরকই-

‘অশেংবা অমা হায়য়ু নঙ সাহিত্যগী মীফম য়াওখিগদ্রা, করিগী মনানো হৈনৌরা, পুংতোনলা, চফোনলা, থৈবোংলা অদুগুম্বা মনাদুনা হিংবা য়াগদৌরিবরা ? ঐ পামদে, হিংনবা নিপা থোকপা থবক তৌ, শেন থোক্নবা লম্বী থিউ, নঙগী থাগত ৱাহৈগী চেনাদু ঐঙোন্দা কৈদৌ হায়নো, কান্নদে-কান্নদে, ঐবু থাকপা ঙম্লোই হায়রগনা খাইনরসি’ ৷

৫. অঙাং নুপীমচাশিং - বিদিতকী লাইরিক অসিদা অঙাং নুপীমচা খরসু য়াওরি ৷ মখোয়শিংদুদি - ‘মপুরোইবা অমা লৈরম্বদুদি’গী চহী ৮তা ফারিবা মেমি, ‘পাপা নঙ য়াম ফত্তে’গী মনিমালা, অসিনচিংবনি ৷  মণিমালা (পাপা নঙ য়াম ফত্তে) হায়রিবা অঙাং অসি য়াম্নমক নুংশি ৷ মমা অতোম্বীগীদা লৈখ্রবা মপা থিবা চতপদা লমখাঙদা পুন্সি লোম্মী ৷ মপুরোইবনা ইনাকখুনবীগা লৈমিন্নখিবনা মরম ওইরগা মণিমালাগী মমা মধুবালানা মরাইবক থীবী ওইহৌই ৷ মসিনা মরম ওইরগা পীক্লিবা নুপীমচা মণিমালানা মনুং-মতম চাদনা তাইবং থাদোক্নবা মরম ওইখি ৷ নুপী অতোম্বী লৌবনা ইমুং-মনুংদা পুরকপা মাঙজবদু ঊতলি ৷

৬. লুখ্রাবী – চাউবীস্না (মপুরোইবা অমা লৈরম্বদুমদি) দি মপুরোইবা শিখিবদা ঙায়রিবীনি ৷ মাঙোন্দা লুখ্রাবীগী পুন্সি অদু ঐখোয়না উদ্রি৷ থোংদগী ওন্থবা থৌদোক অমদগী অঙাওবী ওইহৌরবী ইবোক থারিকথা (ইবোক থারিকথা) য়াম্নমক নুংশিবা লমচতনি ৷ মহাক্না ঙাওদ্রিঙৈ মতমদা মচাশিংবু মী ওইহনবা ঙম্নবা পুন্সিগা কন্না লান্থেংনরম্মী অদুবু মচাশিংদুনা মী ওইখ্রবা মতমদদি মমাবু অঙাওবী ওইবদু য়েংশিনবিদবতা নত্তনা চাক্নী-ফিনিবীসু ওইহল্লি ৷ নুংশিরৈ (ময়াক য়াওদ্রবা পুন্সিগী আশা)গী মমাসু লুখ্রাবীনি৷ মচানুপীবু লাইরিক তমহনজরম্মী অদুবু মহৈ চাবদুদি উবা ফংদনা মমীত উইশিনখি ৷

লুখ্রাবীগী পুন্সি নীংথিনা ঊতখিবদি লুখ্রাবী চাউবীতোন (লুখ্রাবী চাউবীতোন) হায়রিবা লমচত অসিনি ৷ মহাক্না সমাজ অসিদা মতৌ করম্না হিংলিবগে হায়বদু ময়েক শেংনা ঊতলি ৷ চাউবিতোননা মচা অনীবু মী ওইনবা শেম্বা পামজৈ মদুগীদমক লৈখিদ্রবা মপুরোইবগী মিরেলবু কোনজদুনা বোর অমদি থৌনা পীবিনবা থৌনিজৈ ৷ নাকন অমরোমদনা অহল ওইরবা নবঘনশ্যাম অমসুং ইনাক খুনবা সেল্লুংবা কয়াগী অরানবা মীতয়েংনা লুখ্রাবীদা য়েংলিবা তূকতচনীংঙাই ওইরবা মীতয়েংশিংদু চাউবীতোননা মায়োক্নৈ ৷ ময়ূমদা চঙঙক্তুনা শানৈ য়ুনৈরগা লমচত মাঙমিন্ননবফাওবা হোতনরকই ৷ অদুম ওইনমক পূম্নমক অসিবু মায়োক্ন-মায়োক্নদুনা চাউবীতোননা মচা অনী মী ওইনবগীদমক লান্থেংনরি ৷

৭. অতৈ-অতৈ নুপীশিং - পুন্সিবু পাম্বৈ অমত্তা য়াওদনা নুংশিরৈ (ময়াক য়াওদ্রবা পুন্সিগী আশা) লান্থেংনরি ৷ মশাগা চানজবা থবক অমতংগীদমক কন্না হোতনজরি ৷ অসোমদনা থবকসু ফংদে, চহীসু য়ামশিল্লকই অদুগা মমাসু শোনজিল্লকই ৷ মচানা তোলোব চাদুনা মফম অমা খঙনা লৈহৌবদু মমানা পাম্মী অদুবু থাজবদি অসুম-অসুম লাপথোকখি ৷ মমাসু লৈখিদে, ময়াম চঙদুনা মথৌ মঙম লোইশিনবিখি অদুবু লৈশাবী, থবক ফংদবী, কনা লৈজদ্রবী অদুদি খুঙ্গংদুদা ময়াক য়াওদ্রবা পুন্সিগী আশা অমদা হিংহৌরি ৷

থারিকথা (ঐতনা পামজরুবগী ৱানি)দি প্রতাপতনা নুংশিজবা অদুগা অতোপ্পদা য়ূম পানখিবী নুপীনি, থাজমানবী (মঙলান্দা লাক্লম্লিবদুবু)না ‘ঐ’গা থুংনহৌদবীনি ৷ দেবজানি (দেবজানি) দি খুল্লক্তা মীগী ফৌসু চেঙসু য়াওরুরগা মচা-মসু থাক্তুনা ইমুং-মনুং পুরিবী কুলি নুপীনি ৷ রাসমনি (মমা মচাদুবুনে) না অহল ওইরবা চান্দবাবুদা য়ূম পাল্লক্লগা পীক্লিবা অঙাং অমগা লৈহৌগদবা পুন্সি অমনি ৷ লৈবাক্লৈ (নমথাক)দি মীনম-নমথাক, তাত-পাত তৌদুনা হিংবা হৈবী নুপীনি ৷ ইন্দোন তরুবী (কুন্দো পরেং) না হৌখ্রবা পুন্সিবু নীংশিংলগা লেমহৌরিবা পুন্সি লোইবা ঙাইরিবীনি ৷

দাশিনি (অৱামন) হায়রিবী মমা অসিনা লৈত-লায়রনা হেনজিমল্লকপদগী মীগী পোতথেন-পোতকত পামখতলকপী ওজাগী নুপী ওইরকই ৷ মিনা (পাইথোকখ্রবা পোম্বী) না নৱাংনরুদুনা য়ূম্বানববু শান্নপোতকুম লৌরগা মপুরোইববু থাদোক্তুনা মপামদা চতলুই ৷ অদুবু য়ূম্বানখ্রবী নুপী অমগী মফম খঙলক্লবদা অমুক হল্লকখি অমসুং মপুরোইবগী মখোঙদা তুদুনা হায়জরৈ ৷ অদুবু ৱারৌখিবা মপুরোইবনা মহাকপু অমুক লৌশিনবা ঙমখিদে, মহাকপু য়ূমদা থনম্লগা লমফৈদা চতখি ৷ মীতকূপ অমা চেকশিলহৌদবদা পুন্সি চূপ্পসিমগী ওইনা মপুরোইববু মাঙজবা তাখি ৷

মীতৈ খুনাইদা লুখ্রাবীগী মফম

মীতৈ খুনাইদা লুখ্রাবীগী মফমসি মখোয়-মখোয়গী লুখ্রাবী ওইহৌবগী চহী মতাংগী মতুং ইন্না খেন্ননা লৈবা উবা ফংই ৷ নুপী অমনা থাজরকপগা চহী অমগী মনুংদা মপুরোইবদু শিদোকখ্রবদি ‘মৱা চাবী হিংচাবী’নি হায়দুনা ফনা শীংথানদে ৷ মখোয়না অঙাং মীরোন্দ্রিবা নতত্রগা অঙাং য়াওদবা ওইরবদি মপুরোইবগী ইমুং অদুনা ময়ূম শক্লগা অতোপ্পা নুপা অমদা য়ূম পালহনবিবসু চতনৈ ৷ মচা (অমা, অনী নতত্রগা খরা) য়াওরবদি মখোয়না মপুরোইবনা থম্বীরম্বা য়ূম অদুদা অঙাংশিংদু চাউনবা য়োকপা থেংনৈ ৷ হায়রিবা মখলগী মৌ নহা লুখ্রাবীশিং অসি নুপাশিংনা অয়াম্বা মতমদা অরানবা মীতয়েংনা য়েংই ৷ মচা চাউরবা নতত্রগা চহী লৈশিল্লবা লুখ্রাবীদি মসিগী ঈরাংদগী খরামখৈ লাপথোকই ৷ অদুগা অহল ওইরগা লুখ্রা ওইবদদি নত্তবা মীতয়েংনা য়েংদে ৷

নহা ওইনা লুখ্রাবী ওইহৌবা লুখ্রাবীশিংনা ইমুং-মনুং, শাগৈ নাতৈ লিংদুনা কিনবা ওইরবদি মফম চাবদা অমুক লুহোংবীবসি চতনরম্মী ৷ মচা য়াওরবা ফাওবদা চাউবোক ওইনা মমাগী মতুং ইন্নহল্লম্মী, নতত্রগা নুপা য়োকচদুনা লৈনরম্মী ৷ মায়গৈ অমরোমদা মীচঙ সঙ্গন য়ামজদবা, মবুং মৌপ্বা মরাং কায়জদবা লুখ্রাবীশিংদি য়াম্নমক অহাউবা অচাপোত ওইনা উবিবগী মতৌ লৈরম্মী ৷ মতম অমা জারিবোনদা লৈবাক মপু ওইরম্বা গুলাপসনানা লুখ্রাবী অমগী ময়ূমদা তোয়না কোয়রম্মী অদুগা ফাগী তৌরম্মী ‘নঙগী মুকা ঙা অয়াইবসি কাংশোই অসিদা থাকচিল্লগে’ ৷ গুলাপসনানা মচানুপী অনী অমসুং ময়ূম লংথোক্লগা লুখ্রাবী অদুগা লৈমিন্নখি অদুগা মরন মথুম অয়াম্বসু লুখ্রাবী অদুদা লোইশিনখি ৷ সোনাইগী থাংজমলৈকাইদা মচানুপা অমা য়াওজরবা অবুজমগী লুখ্রাবী অমবু কব্রবমগী অঙাং মঙাগী মপা অমনা মরুম থুজিন্দুনা মচানুপী অমগী মমা ওইহনখি ৷

অনৌবা মতম অসিদদি নহা লুখ্রাবীশিংনা হরাও-হরাওনা ইমুংদা লৈমিন্নবা নতত্রগা শাগৈগী মনাউশিং নতত্রগা লৈকায়গী পাখঙ নতত্রগা হৌদোং লম্বোইবগুম লৈকায় কোয়রকপশিংগা লমচত লান্নমিন্নবা উবা ফংই ৷ মতম অমা অঙাং য়ৈথবা ঙমদ্রিঙৈগী কিনরম্বদু হৌজিক্তি লৈত্রবনিনা কিনদ্রে ৷ নাকন অমরোমদা, মং অনী সুজনীংদবী, লমচত লান্নববু অভিসাপনি খনজবী কয়ানা অচেতপা ব্রতগা লোয়ননা শেংনা পুন্সি লেন্ননবা হোতনজৈ ৷ অদুবু অকোয়বদা লৈবা অরানবা মখূতশিং অমসুং মমীতশিংনা পায়শিল্লকপা অমসুং য়েংশিল্লকপনা মথৱায় চাক্না মপুন্সি লেল্লি ৷

নুপাশিংনা মখোয় (লুখ্রাবীশিং)গী ময়ূমদা কোয়শিল্লি নতত্রগা উনবা মফমদা ৱা হৌদোকই ৷ মখোয়না পাম্লিবসি ইন্দ্রিয়গী ইখৌরাংবা কোক্নবা অদুখক্তনি মদুগীদমক মওং-মওংগী মোইথেম তৌই ৷ বিদিতকী লাইরিক অসিদা য়াওরিবা চাউবিতোন হায়রিবসি মপুরোইবনা শিন্নরম্বা অঙাং অনীবু মী ওইনবগীদমক শেম্বা পাম্বী নুপীনি ৷ মহাক্না লমচত লানবা নতত্রগা অতোপ্পদা য়ূম পানবগী ৱাখল খন্দে অদুবু অহল ওইরবা নবঘনশ্যাম, ইনাক খুনবা সেল্লুংবা অমসুং অতৈনা কাইহৌই ৷ মসিদা মহাক্না মখোয়রী থীতপমখৈ শাউই ৷ মায়গৈ অমরোমদা, লুখ্রাবীনা লুখ্রাবী ওইনা ওইনা মপুরোইবনা থম্বিরম্বা অঙাংশিংবু চাউনবা য়োকপদা নত্তনা মখোয়বু মতিক চাবা মী ওইনবা শেম্বা ঙম্মী ৷ ইবোক থারিকথানা মচাশিংবু মী ওইনবা শেমখি ৷

মীতৈ খুনাইদা চহী নৌনা মপুরোইবা কায়নরবী লুখ্রাবীশিংগী মশীং য়ামখতলক্লি ৷ মসি মরু ওইনা হাত্তোক্নবা অসিদগীসু অয়াম্বা ওইবনি হায়না পানরি ৷ লান্মীশিং (সরকার অমসুং য়াওল ঈহৌ) গী নুপী ওইনা লুখ্রাবী ওইহৌবী নুপী মশীং অসিসু অঙকপা ফংনা য়াম্লে ৷ ফ্রাঙ্ক ভান লিরে (Frank van Lierde) না ইবা ‘ৱি, দ ৱিদোস ওফ দ গন’ (দ হোগ-না ২০১১দা ফোঙবা) হায়বা লাইরিকতা মণিপুরগী নহা লুখ্রাবী মঙাগী ৱারী লীরী ৷ 

বিদিতকী লুখ্রাবীশিং অসিদা লুখ্রাবী চাউবীতোন, ইবোক থারিকথা, চাউবীস্না, নুংশিরৈগী মমাখোয়সি ‘ৱায়েলনা য়ারবী লুখ্রাবী’শিংনি ৷ চান্দনি, রাশেশ্বরীখোয়সিনা ‘তংখাই চাবী লুখ্রাবী’ হায়বসিদা থম্বা য়াই ৷ চাউবীনা ‘ৱায়েলনা খঙদবী লুখ্রাবী’ ওইনা থম্বা য়াই ৷

ৱারোইশিন

মীতৈ খুনাইদা লুখ্রাবীশিংবু অমুক হন্না লুহোংবা য়াবগী চতনবী অসি মাঙলমচততগী লৈরকই ৷ চহী নৌরিবী লুখ্রাবীশিং (চাউরাক্না মশাগী চহী ৪৫-৫০ ফাওবগী মনুংদা লুখ্রাবী নতত্রগা হল্লকপী ওইবী)না মশানা য়াজরবদি অহনশিংগা য়ানদুনা অমুক হন্না য়ূম্বান পুন্সিদা খোঙদাবা হায়বসি য়াম্না চুমগনি খল্লি ৷ মসি ৱায়েলনসু য়াবা (The Hindu Widows' Remarriage Act, 1856, also Act XV, 1856, enacted on 25 July 1856) থৌওং অমনি ৷

মায়গৈ অমরোমদা, মীতৈ খুনাইদা লুখ্রাবীনা অমুক হন্না অতোপ্পা নুপা অমদা য়ূম পাল্লবদি নুপা অদুবু ‘নুপী তুমন লৌবা নুপা’ হায়না কৌবীদুনা হন্থনা খন্নরম্মী ৷ পাউরৌ ওইনসু থনম্মী ‘ঙমু লুকং চাগনু, নুপী তুমন লৌগনু’ ৷ তুমন লৌবা নুপাশিং শাগৈগী পিবা ওইবসু য়াহল্লমদে ৷  লাই-তিনগী অরুবা থবক থৌরমশিংদা মকোক-মরু ওইনসু থৌদাংসু পুহল্লমদে ৷ অদুম ওইনমক, পুন্সিবু খঙবিবা, পূন্না হিংমিন্ননীংবগী অপাম্বা লৈনরবদি ৱায়েলনা য়াবা মওংদা অমুক হন্না য়ূম পানবসি থোইদোক্না শৌগতনীংঙাই ওই ৷ তোঙান-তোঙাননা লৈনরগা লমচত লান্নবদগীদি, খুনাইনা অমসুং ৱায়েলনা য়াবা মওংদা অমুক হন্না য়ূম্বানমিন্নবনা হেন্না ফৈ হায়না লৌফম থোকই ৷ লাই-তীনগী থবক্তা শরুক য়াবা নতত্রগা য়াদবা, পিবা ফম ফংবা নতত্রগা ফংদবা মসিদগী হেন্না মরু ওইরিবসি নাম হাঙদুনা লৈরিবা শরুকশিং অদু মেনশিনমিন্নবদুনি ৷ মতাং অসিদা, লুখ্রাবী নুপীবু পাখ্রাখক্তনা লৌগনি নতত্রগা পাখ্রাখক্তগা য়ূম পানমিন্নগনি হায়বা লৈতে ৷ ৱায়েলনা য়ারবী নতত্রগা ৱায়েলনা খঙবী লুখ্রাশিংদি পাখঙশিংগসু অমুক হন্না য়ূম্বান পুন্সিদা খোঙদামিন্নবা য়াই ৷ মীতৈ খুনাইদা মশাগী চহী ২০-২৫ দগী হৌনা লুখ্রাবী ওইরবী কয়াসু লৈবা উরে ৷

কনাগুম্বা নুপী অমনা মপুরোইবগা পান্নরিঙৈদা অতোপ্পা নুপাশিংগা লমচত লান্নবা (চান্দনি, রাশেশ্বরিগুম্না) নতত্রগা অতোপ্পা নুপাগী তুং ইনখিবা (চাউবীগুম্না) অসি য়ারিবমখৈ তৌদবনা ফৈ ৷ লমচত লান্নগে হায়না খনবা নুপীশিংদি মনীং তম্বী ওইনা লৈবনবু হেন্না ফগনি ৷ মপুরোইবগা পান্নরিঙৈদা অতোপ্পগা লমচত লান্নবা হায়বসি ঙাকপীফম অমুক লৈতবা মখলগী লঙজবা অমনি হায়না লৌবা তাই ৷ অদুগা অতোপ্পা নুপাগী তুং ইনগে হায়না খল্লবদি ৱায়েলনা য়াবা মওংদা খাইনরগা অতোপ্পা নুপা অদুগা অমুক ৱায়েলনা নতত্রগা খুনাইনা য়াবা মওংদা য়ূম পানমিন্নবনা হেন্না চুমগনি নীংই ৷

মীতৈ খুনাইনা অমসুং/নতত্রগা লৈবাক অদুগী ৱায়েলনা অমসুং/নতত্রগা লনাই লূপশিংনা লুখ্রাবীশিংগী য়াইফ-থৌরাংগী মরমদা অখন্নবা থবক পায়খতপা চঙলি ৷ য়াইফ-থৌরাংশিংগী মনুংদা চহী নৌরিবীশিংবু মশাগী অপাম্বা লৈরবদি অমুক হন্না য়ূম্বানবগী লম্বীদা খোঙদানবগী লম্বী পীবিবগি য়াম্নমক তঙাইফদবা লৈরি ৷ চহী অহল ওইরবীশিংদা মখোয়গী পুন্সি মরেল অদু খঙবিবগা লোয়ননা মখোয়গীদমক তোঙানবা য়াইফ-থৌরাং পায়খতপগীসু তঙাইফদবা লৈরি ৷ য়াইফ-থৌরাংশিংগী মনুংদা মখোয়দা থা-থাগী পেন্সন পীবিবসি য়াম্নমক মরু ওইবনি হায়বসিনি ৷ পুন্সি মহীংদা অশোনবগী মমি তাবশিংদা চৈঙাক ওইনা মখোয়দা শেনথোক লম্বী অমা পীবিবগী তঙাইফদবসু লৈ ৷ মখোয়গী অনা লায়েংনচিংবশিংদা মমল লৌদনা লায়েংবিবা য়াবগী পোরম য়াতপসু চঙলি ৷ মখোয়না মখোয়গী মতমদা মীরোল অমবু শেম্নবা লৌখিবা থৌদাংশিংদু য়াম্নমক ঈকাই খুম্নবা মওংদা মমল থম্বিবা চঙই ৷

---