সাহিত্য একাদেমি, নিয়ু দেল্লিগী মণিপুরী এদভাইজরি বোর্দ-তা মপান মণিপুরগী মীহূত লৈরম্বাঃ অমুক লৈরক্তবা

Sougaijam Brajeshwar Singha

সাহিত্য একাদেমি, নিয়ু দেল্লিগী মণিপুরী এদভাইজরি বোর্দ-তা মপান মণিপুরগী মহূত শিন্দুনা মেম্বর ওইরম্বা শ্রী সৌগাইজম ব্রজেস্বর সিংহ (মণিপুরী সাহিত্য পরিষদ, অসাম-গীসু প্রসিদেন্ট ওইবিরম্বা)না থূপখ্রবা মতুংদা অমুক লাইতোঞ্জম নিলমনি (মণিপুরী সাহিত্য পরিষদ, অসাম-গী প্রসিদেন্ট ওইনা থৌ পুবিরিবা) অমসুং লাঙ্গোলজম বীরমঙ্গল (মণিপুরী সাহিত্য পরিষদ, ত্রিপুরা-গী এসিষ্টেন্ট জেনরেল সেক্রেটরি ওইবিরিবা)বু বোর্দ অসিগী মেম্বর ওইনা খল্লক্লে হায়বা পাউ তাবদা হায়নীংঙাই লৈতনা হরাওবদু ফোঙদোকচরি৷ নীংশিংবা য়াই, মেম্বর তরা লৈবা বোর্দ অসিদা য়াওরিবা অতৈ মেম্বরশিং অদুদি – প্রোফেসর এন. খগেন্দ্র, প্রোফেসর হুইরেম বিহারি, বি. জয়ন্তকুমার শর্ম্মা, দ. এম. প্রিয়বর্ত্ত, বি. এস. রাজকুমার, এল. উপেন্দ্র, মায়া নেপ্রম, এন. জি ইবোতোন অসিনি৷

সাহিত্য একাদেমি, নিয়ু দেল্লিগী মণিপুরী এদভাইজরি বোর্দ-তা মপান মণিপুরগী মহূত শিন্দুনা মেম্বর ওইরম্বসি ইরুংবম চন্দ্র সিংহ অমসুং খৈরুদ্দিন চৌধুরিনি৷ মদুগী মতুংদা মতম শাংনা মপান মণিপুরবু কাউথোক্লুরবনি৷ অসুম্না, মণিপুরনা মপান লমবু নীংশিংবিদবা অসিনা অপূনবা মণিপুরী সাহিত্যগী মশক অমা শাগতপদা অৱাতপা অমা ওইদুনা লৈরে হায়বা খঙজরকপদগী ৱারেংজরিবনা হীরম অসি করম্না ওইথোকহনবা য়াগদগে হায়না ৱাখল তৌবা হৌখি৷ মণিপুরী সাহিত্য পরিষদ, ত্রিপুরাগী চহীগী মীফম্লেন অমদা বার্তোনসু ফংদনা ওজা বীরমঙ্গল (মনাউ ওইনা খনবিবনি, হান্নদগী লুনা তৌবিরকখিবা ইয়াম্বনি, ঈকাই খুম্নজবদগী ওজা কৌজবনি) দা ‘ঐহাক লাকচরে’ হায়রগা নম্ফূদা চতশিনখি৷ ওজানা ৱারেংজরিবগী থৱায় য়াওজবদুদা য়াম্না লুনা থম্বিখি৷ ময়ামগী থুংফমদা ৱারেংজরিবনা ওজা লোংজম জয়চন্দ্রগা অহানবা ওইনা ৱারী শাই৷ ওজানা ওইথোকপা য়াবা লম্বী তাকপীখি, কে শান্তিবালাগসু উনহনখি৷

Kheiruddin Choudhury

ৱাফমসিগী মতাংদা ৱাখল্লোন তিন্নবা মতমদুগী মরূপ মোইরাংথেম শিতলজিত, সরাংথেম সমরেন্দ্র (নহারোল সাহিত্য মরূপ-কী প্রসেদেন্ট অমসুং ফাইনান্স সেক্রেটরিনি, মতমসিদা অইবনা মরূপ অসিগী জেনরেল সেক্রেটরি ওইজৈ) গা ৱারী শাবা হৌজৈ৷ সাহিত্য একাদেমি, নিয়ু দেল্লিগী মণিপুরী এদভাইজরি বোর্দ-তা মপান মণিপুরগী মহূত শিন্দুনা মেম্বর অহূম (অসামদগী অনী, ত্রিপুরাদগী অমা) লৈহনবা চঙই হায়বা ৱাফম অসি ওজা কব্রবম নিলকান্ত (মতমদুগী মণিপুরী সাহিত্য পরিষদ, অসামগী জেনরেল সেক্রেটরি)দা খঙহল্লি৷ মহাক্কী অপাম্বসু ফোঙদোকপীরকই৷

মণিপুরী সাহিত্য পরিষদ, ইম্ফালগী চহীগী মীফম্লেন অমা য়াওনবগী চতপা খোঙচত অমদা ওজা কব্রবম নিলকান্তনা ঐখোয় অহূম (মোইরাংথেম শিতলজিত, সরাংথেম সমরেন্দ্র অমসুং অইবা ইশা) বুসু পুবিখি৷ খোঙচত অদুদা ঐখোয় মরি (ওজা নিলকান্ত য়াওরগা) বু তোঙান-তোঙানবা সংস্থান কয়ানা ঙাইহাক্তং ফম্মিন্নবগী বার্তোন তৌবিরকখি৷ বার্তোন ফংদুনা চতচখিবা অমসুং উনখিবা লূপশিংদি মরু ওইনা মণিপুরী সাহিত্য পরিষদ, ইম্ফাল, নহারোল সাহিত্য প্রেমি সমিতি, ইম্ফাল অমসুং লৈকোল, ইম্ফালনি৷ অতৈদি ঙম্লক্তে৷ উনবশিং অদুদা ঐখোয়না মতমদুদা থমজবা ৱাফমশিংগী মনুংদা-

১. মপান মণিপুরগী মণিপুরী সাহিত্য অসি পূন্না নৈনমিন্নবা চঙই

২. মণিপুরী সাহিত্য পরিষদ অসাম অসি সাহিত্য একাদেমি, নিয়ু দেল্লিগী এফিলিয়েসন ফংলিবনি৷ মরম অদুনা পরিষদ অসিগা একাদেমিগা পূন্না থবক তৌমিন্ননবগী তাঞ্জা ফংফম থোকই৷

৩. সাহিত্য একাদেমি, নিয়ু দেল্লিগী মণিপুরী এদভাইজরি বোর্দ-তা মপান মণিপুরগী মহূত শিন্দুনা মেম্বর অহূম (অসামদগী অনী, ত্রিপুরাদগী অমা) লৈহনবা চঙই হায়বসি কন্না থমজখি৷

মতমদুদা ঐখোয়বু চেকশিন্না শেন্নবিখিবসি তামো রঘু লৈশাংথেমনি৷ ঐখোয়গী ৱাফমদু মহাক্না তারবা মতুংদা মতমদুগী সাহিত্য একাদেমি, নিয়ু দেল্লিগী মণিপুরী এদভাইজরি বোর্দ-তা কনভেনর ওইবিবা ওজা খুমন্থেম প্রকাশকা উনদুনা ৱারী শানবগী লম্বী শীনবিরকখি৷ তামো রঘু অমসুং ওজা নিলকান্তগা ঐখোয় মঙা ওজাবু উনজরুই৷ উনজরুবা অদুদা ঐখোয়গী থাজবা পূম্ববু মাঙহনবিরগা –

১. ‘মণিপুরী সাহিত্য পরিষদ, অসাম অসি থবক তৌদবা সংস্থাননি৷ মরম অদুনা সাহিত্য একাদেমি, নিয়ু দেল্লিগী এফিলিয়েসন অদু কক্লগা থবক তৌবা সংস্থান অমদা শিন্নখ্রগনি’ হায়বিরকই৷

২. ‘এদভাইজরি কমিতিদা মপান মণিপুরদগী মী য়াওগনি হায়বা লৈতে৷ ঐখোয়গী স্বাইসিদফাওবা য়েন্নবা থুংনদ্রে, কদায়দগী মপানগী হাপকদবনো’ হায়না তাকপীরকই৷

ৱারী শানবা য়াদ্রবা অহল অদুদা ঐখোয়গী পাম্বৈ লৈতবনা এফিলিয়েসন ককপীগনু অদুগা মথংগী সেসনদা ৱাফম অসি খন্নবিয়ু হায়জরম্লগা ঐখোয় থোরকখি৷

Saratchand Thiyam

খরনি মতুংদা শিলচর তুকোগী শঙাই কাঙবুনা মণিপুরদগী অখন্নবা মীওই অমবু মখোয়গী চহীগী মীফম্লেনদা শরুক য়াহন্নীংবদগী ওজা খাইদেম শাজৌনা থৌদাবিদুনা তামো শরতচান্দ থিয়ামবু পাউ ফাওনজখি৷ তামোগী খোঙচত অদু ৱারেংজরিবনা চয়োল অমগী শেমজখি৷ ‘চয়োল অমগী ওইবা শরতচান্দ থিয়ামগী কসার খোঙচত’ হায়না মিং থোঞ্জখি৷ তামোগী খোঙচততা শঙাই, মণিপুরী সাহিত্য পরিষদ, অসাম, মণিপুরী লিটরেরি সোসাইতি, অসাম, নহারোল খোরিরোল শিল্লূপ, লখিপুর, নহারোল সাহিত্য মরূপ, অসাম, মণিপুরী দিপার্টমেন্ট, অসাম য়ুনিভর্সিতিগী মহৈরোয়শিং অমসুং কসারগী তোঙান-তোঙানবা লন্নাই মীওই কয়াগা শক উনখি৷ খোঙচত অদুগী অয়াম্বা নুমিদাং অখন্নবা মীওই অমগী য়ূমদা ইচিন-ইনাউ পোথামিন্নখি৷

খোঙচত অসিদগী তামো শরতচান্দনা য়াম্না তমশিনখি হায়না তম্বীরম্মী৷ ফনা য়াম্নসু ফোঙদোকপীরমখি৷ ৱাফম কয়া ইচিন-ইনাউ শান্নখিবগী মনুংদা সাহিত্য একাদেমি, নিয়ু দেল্লিগী মণিপুরী এদভাইজরি বোর্দ-তা মপান মণিপুরগী মীহূত অহুম য়াওহনবগী ৱাফমসু য়াওখি৷ ‘মদু তঙাইফদবনি, লৈফম থোকপনি’ হায়না মহাক্কী অচেতপা ৱাখল্লোন ফোঙদোকপীরমখি৷ মহাক্না মণিপুরদা হনবগা পায়খতকদবা থবক অনীদি-

১. মণিপুরগী শক্নাইরবা অইবশিংদা লিটরেরি পেন্সন পীহন্নবা হোতনবা

২. সাহিত্য একাদেমি, নিয়ু দেল্লিগী মণিপুরী এদভাইজরি বোর্দ-তা মপান মণিপুরগী মীহূত য়াওহন্নবা হোতনবা

অনীসিনা ওইগনি হায়না তাকপীরম্মী৷ ৱাফম অসি নোংমা ওজা আই এস থিঙ্গোমগীদা অহিং পোত্থাবা মতমদা ঐখোয় অহূম কোক চূংশিনমিন্নখি৷

Kabrabam Nilkanta Singha

I S Thingom

তামোনা চতখিবগা ইমাসি বিনোদিনি-গা ৱতানদুনা প্রোফেসর এন. খগেন্দ্রদা চে ইহল্লি, পাউ ফাওনহল্লি৷ অহানবদদি, ‘ঐখোয়গী অসিদফাওবা ঈন্থোক্নবা ঙমদ্রে’ হায়দুনা য়ারমদে৷ মদুগী মতাংদা কব্রবম নিলকান্তনা ইম্ফালদা নুমিত কুন্নিরোম লৈথোক্তুনা মী অমদি মেম্বর ওইহন্নবা মীওই কয়া উনখি৷ কোন্নথংদা মীওই অমবু ওইহনবগী ৱাফম য়ানখি৷ মতাং অসিদা ঐখোয়না কনাবু ওইহনগদগে হায়না কন্না খন্নখি৷ মীওই অহূমগী মিং খনগতপখিবনি, কোন্নথংদা মতমদুগী মণিপুরী সাহিত্য পরিষদ, অসামগী প্রসিদেন্ট ওইরম্বা ওজা সৌগাইজম ব্রজেস্বরগী মিং ওইনা খনগতখি৷ চৈরক অসিদা মীওই কাঙবু অমনা অতোপ্পা মীওই অমগী মিং একাদেমিগী কলিকাতাদা লৈবা ওফিসতা থাজিন্দুনা ৱাথোক মচা অমা ওইখি৷ ৱাথোক অদুগী খুদোং চাবা লৌরগা মপান মণিপুরদগী কনাগুম্বা অমত্তা হাপ্তনবা অমুক খন্নরুই৷ কাইনথংদা, ‘অমদি তঙাইফদনা য়াওহনগদবনি’ হায়দুনা ওজা সৌগাইজম ব্রজেস্বরগী মিং অসি লেপনখিবনি৷

Laitonjam Nilamani Singha

মসিদা ৱারেংজরিবা অমসুং ওজা নিলকান্তনা ইরন্নাই ওইনা য়াম্নমক হরাওজখি অমসুং ওজা ব্রজেস্বরগা করি-করি তৌগদগে হায়না তানবা হৌখি৷ ওজা ব্রজেস্বরনা ৱারেংজরিবগী হোতনজমল ওইনা অহানবা থবকসি ‘হন্দক্কী নহা অইবগী ত্রেভেলিং গ্রান্ট অদু নহাক্কী নমিং থাগতখ্রবনি’ হায়না তাকপী৷ ৱারেংজরিবনা ফনা য়াজদদুনসু ‘অতৈ অইবশিং কোন্না চতপা য়াই অদমকপু নহাক্না মাঙজিন থাগদবনি’ হায়দুনা মিং থাগতপীখি৷ মপান মণিপুরগী নহা অইবদা অহানবা ওইনা সাহিত্য একাদেমিগী ত্রেভেলিং গ্রান্ট ফংদুনা চতচবসি ৱারেংজরিবনা ওইজখি৷ (ৱারেংজরিবগী মমাঙদা নাওরেম বিদ্যাসাগরনা চতখি অদুবু মদু মণিপুরদগী চতখিবনি, হৌজিক ফাওবদা অতৈ কনা অমত্তবু খনগতপীবা লৈত্রি)৷ বোর্দ মেম্বর ওইনা শিন্নরকপা থবক থৌরমশিং খন্নমিন্নরবা মতুংদা সেমিনার অমা হান্না পাঙথোক্নবা হোতনসি হায়না লেপমিন্নজখি৷ অদুবু ৱারেংজরিবনা হিংনবগী লানফমদা বরাক তম্পাক থাদোক্লম্বনা মরম ওইরগা সেমিনার অদু শরুক য়াবা ফংজখিদে৷ মখা তাবা থবকশিং খন্নবা ফংজখিদ্রে, মদুগী মথক্তা ওজা ব্রজেস্বরসু তাইবং থাদোকপীখ্রে৷ অৱাতপা অসি মতৌ করম্না মেনশিনগদগে হায়না ৱাখল খনবা নত্তনা কোক চূংশিন্নবা অমসুং ৱাতানফমদি ফংখিদ্রে৷

Laangoljam Biramangol (Ibomcha) Singha

তাল্লক তাঞ্জা অসিদা ওজা লাইতোঞ্জম নিলমনি অমসুং লাঙ্গোলজম বীরমঙ্গলবু বোর্দ অসিগী মেম্বর ওইনা খল্লক্লে হায়বা পাউ তাবদা হায়নীংঙাই লৈতনা নুঙাইবা ফাওজখি৷ ৱারেংজরিবগী মঙলান মঙফাওনরে হায়না খঞ্জখি৷ (অৱাতপা হায়ববু অসামগী মশীং অনী ওইহন্নীংবা অদুতা মঙাইরে) ত্রিপুরাবু মশক খঙলক্তুনা ওজা বীরমঙ্গলবু খল্লকপা অসি খ্বাইদগী মতিক চাবনি হায়না হরাওবা ফোঙদোকচরি৷ মমাঙদা ঐখোয়না খন্নজখিবসু মসিমক্নি৷ মথংগী টর্মদা মখোয়না মখা চত্থবা য়াই নত্ত্রগা অতোপ্পা অমবু শিলহনবসু য়াই৷ অসামগী ওইনদি- মণিপুরী সাহিত্য পরিষদকী প্রসিদেন্ট অদু রিজর্ব তৌবিবনা খ্বাইদগী চয়েতনদবা ওইগনি খল্লি৷ অতোপ্পা অখঙ-অহৈ অমবুসু অনীশুবা বোর্দ মেম্বর ওইনা খলহন্নীংই৷ (মণিপুরনা ৭, অসামনা ২ অদুগা ত্রিপুরানা ১ ওইবা ফগনি)৷

সাহিত্য একাদেমি, নিয়ু দেল্লিগী মণিপুরী এদভাইজরি বোর্দ-তা মপান মণিপুরগী মীহূত লৈহনবা ঙম্বগী খোঙচত অসি য়াম্নমক ভাব তামিন্নরকপগী মতৌনি৷ মরী লৈনবা পূম্ববু থাগতচরি৷ লন্নাই ওইনা থাগতপদা মিং পনবা য়াবশিংদি- ইমাসি এম. কে. বিনোদিনি, প্রোফেসর এন. খগেন্দ্র, তামো শরতচান্দ থিয়াম, কব্রবম নিলকান্ত অমসুং ওজা আই. এস. থিঙ্গোমনি৷

মণিপুরনা ভাব খরা তারকপসি য়াম্না নুংঙাই৷ মণিপুরী সাহিত্যসি পূন্না চাওখতমিন্নবা য়াবগী খোঙচত অদু হৌরগনি হায়বগী নুংঙাইবা ফোঙদোকচরি হায়না থাগতপগী অমসুং হরাওবা ফোঙদোকপা লোইদ্রিঙৈদা অমুক হন্দক্কী সেসন অসিদা কনা অমত্তা হাপ্পিদরে৷