ৱাহৌদোকঃ
মতমগী য়াওলনা পুরকপা চাওখতপগী লমজেলদা টেলিফোন থাদোক্লম্লগা
মোবাইলগী তাইবংদা খোঙদারম্বদগী হৌজিক্না অমুক ইন্টর্নেটকী তাইবংগা ঐখোয় শম্নররে৷ হৌজিক্কী নহারোল মীরোল অসিদদি ইন্টর্নেটতা মশাগী
আইদি অমমমদি লৈনরে৷ মসিগী মথক্তা ব্লোক অমসুং গ্রুপ শেম্নদুনা মরূপ মপাং কয়াগা ঈ-পাউ ফাওনবতা
নত্তনা তোঙান-তোঙানবা হীরমদা ৱাখল্লোন ফোঙদোক্নরে৷ ব্লোক অমসুং গ্রুপতা ইনরম্বদগী মীশিংনা সোসল নেটৱর্কিংগী তাইবংগা অমুক শকখঙনরকই৷ তাইবং অসিদা মশাগী একাউন্ট অমদগী তাদনা হাংনদুনা গ্লোবল
সোসাইতি অমগী সোসিএলাইজেসনদা কন্না শরুক য়াশিন্নরক্লি৷ খোঙচত অসিদা মীতৈ নহারোল
কয়া’মা মশীং থীঙমদনা চঙশিল্লক্লি অমসুং মসিদা মীতৈ নিঙোলশিংসু মনীং তম্না একাউন্ট
হোল্দর অমমম ওইনদুনা তাইবংপানগা শমজিন্নরক্লি৷
মতম অমা, মীওই অমগী পোষ্টেল এদ্রেস খক্তমক লৈনরম্মী৷ চেথাশঙ (পোষ্ট ওফিস)গী খূত্থাংদা তাইবংপানগা
শমজিন্নরম্মী৷ মথংদা টেলিফোন (লেন্দ ফোন) নম্বর লৈনরকই৷ মখা তারকপদা মোবাইল ফোন লৈনরকই অমসুং মেইল আইদি
লৈনরকই৷ ইং ২০০১ মতমগী অহানবা তংখায়দা মোবাইল নম্বর অমসুং মেইল আইদি লৈতবশিংবু
তাইবংপানগী চাওখতপা অসিগী মমি তাদবগুম খন্নরম্বদু অনীশুবা তংখায়দগীদি সোসল নেটৱর্কিংগী একাউন্ট লৈতবশিংবু তাইবংপানগা শম্নদবা ওইনা
খন্নবা তপ্না-তপ্না হৌরকখি৷ সোসল নেটৱর্কিং করিনো হায়না কন্না খঙনরমদবদু ২০১০-১১ অসিদদি য়াম্নমক পাক শন্না ঈশিং
ঈচাউগুম শন্দোরক্তুনা সোসল নেটৱর্কিং অমা নত্ত্রগা অমদা মশা-মশাগী একাউন্ট অমমম লৈনরকখি৷
সোসল
নেটৱর্কিং সাইট অমসুং ফেসবুকঃ
সোসল নেটৱর্কিং সাইট হায়বসি ইন্টর্নেটকী
তাইবংদা মেইল আইদি অমমম লৈজরবা লন্নাই মীওই অমমমনা নেটকী তাইবংদা পূনশিন্নদুনা ৱাখল্লোন
ফোঙদোক্নবা য়াবা অখন্নবা মফম অমনি৷ য়াম্না শম্না হায়রবদা
Social networking is the grouping
of individuals into specific groups. (১)
হায়রিবা অখন্নবা মফম অসিদা ময়াম্না পূনবনা মরম ওইরগা মসিবু
সোসাইতি অমা ওইনা লৌবা য়াই নত্ত্রগা লৈবাক অমা ওইনা লৌবা য়াই৷ খুনাই অমগী খুনাইরোয় অমনা নত্ত্রগা লৈবাক অমগী
লৈবাকমচা অমনা লৈমিন্নরিবা অতৈ খুনাইরোয় নত্ত্রগা লৈবাক মচাশিংগা মরী থম্নবগুম
ইন্টর্নেটকী তাইবংদা শেম্বা খুনাই নত্ত্রগা লৈবাক অসিদা অমগা–অমগা মরী থম্নবা য়াই৷ মসি ইন্টর্নেট য়ুজরশিংগী ওইবা খুনাই অমনি, লৈবাক
অমনি,
A social networking service is an
online
service, platform, or site that focuses on building and reflecting
of social
networks or social relations among people, who, for
example, share interests and/or activities. A social network service
essentially consists of a representation of each user (often a profile),
his/her social links, and a variety of additional services. ...in a broader sense, social
network service usually means an individual-centered service .... Social networking sites allow
users to share ideas, activities, events, and interests within their individual
networks. (২)
হৌজিক-হৌজিক লৈরিবা সোসল নেটৱর্কিং সাইট
মশীং অসি ২০৩ নি হায়না রেকোর্দ তৌরি (৩)৷ মসিগী মনুংদা মকোক মখং
তারিবা ১৫ দি – ফেসবুক (Facebook, ৭০০,০০০,০০০,
মখাদা মশীং হেনগতলকপা থেংনবিগনি), ট্বিটর
(Twitter, ২০০,০০০,০০০), লিঙ্কইন (LinkedIn, ১০০,০০০,০০০), মাইষ্পেস (MySpace), নিং (Ning), গুগলপ্লস (Google Plus+), টেগ (Tagged), ওর্কুট (orkut, ১৫,৫০০,০০০), হাই৫ (hi5), মাইইয়ারবুক (myyearbook), মিতঅপ (Meetup), বাদু (Badoo), বেবো (bebo), মাইলাইফ (mylife), ফ্রেন্দষ্টার (friendster) অসিনি (৪)৷ ফেসবুক অসি মীয়াম্না খ্বাইদগী পাম্নবা সোসল নেটৱর্কিং সাইট অমনি৷ ফেসবুকনা লৈবাক অমা ওইনা লৌরগা সাইট
অসিগী মেম্বর মশীংনা লৈবাক অদুগী মীকোক মশীং ওইনা পারবদি পৃথিবীদা লৈরিবা মীশিং য়াম্বা
লৈবাকশিংগী মনুংদা ফেসবুকনা অহুমশুবদা
লৈ হায়না পানরি৷ হায়রিবা সোসল নেটৱর্কিং সাইট অসিদা মীতৈ মচাশিংসু খ্বাইদগী মশীং
য়াম্না য়াওই৷ মীতৈ মচানা পাম্না য়াওনরম্বা সাইটতি পঞ্জখ্রিবা ১৫ অসিগী মনুংদা
মথং-মনাউ নাইনা ফেসবুক, ওর্কুত, ট্বিটর, লিঙ্কইন অমসুং মাইষ্পেস হায়রিবা খরা অসিনি৷
ফেসবুক
অমসুং মীতৈ নিঙোলঃ
ফেসবুক
হায়বসি মী অমগী প্রোফাইল অমসুং মশাগী
ফোটোশিং য়াওবা ওনলাইন দিরেক্টরি (A
facebook is a printed or online directory found at American
universities consisting of individuals’ photographs and names)(৫) অমা ওইনা হৌদোকখিবনি৷ মসিবু ওফিসিএল
ওইনা লোঞ্চ তৌখিবসি ফেব্রুৱারি ৪, ২০০৪ ইংদনি৷ ইং ২০০৮ গী আগষ্ট ২৮ ফাওবদা য়ুজর
মিলিয়ন ১০০ লৈরম্বা ফেসবুকনা ২০১১গী
জুলাই ৬ ফাওবদা মীওই মিলিয়ন ৭৫০ (ক্রোর ৭৫) রোম্না মসিগী য়ুজর ওইখি৷(৬)
মসিদা মীতৈ মচা কয়াম য়াওরমগদগে হায়বগী অকক্নবা হায়বদি ঙমদে অদুবু য়ামদ্রবদা ১৫,০০০
রোমদি লৈরে হায়বসীমদি শেংলে৷ মসিদগী হেন্না লৈরম্বা য়াই হায়না পানরি৷ মখোয়না ফেসবুকতা য়াওবগী ওইবা চহী মতাংগী চাংচত
অসি মখাগী অসুম্না চাউরাক্না লেপ্পা য়াই-
মশাগী চহী ১০০দা
১০-১৫ ১০
১৫-২৫ ৬০
২৫-৩৫ ২০
৩৫-৭০ ১০
মসিদা নুপানা কয়ানো অদুগা নুপীনা কয়ানো
হায়বা চপ চানা লেপথোকপা ঙমদ্রবসু অপূনবা মশীংগী চাদা ৪৫ রোম্না নিঙোল মচাশিংগী
মশীং ওইগনি হায়না লেপ্পা য়াই৷ ফেসবুকতা
মীতৈ নুপীনা য়াওবগী চাংসিসু মথক্তা পীজরিবা টেবল অসিগী চাংদা ওইগনি হায়না থাজবা
য়াই৷ (মসি নুংশিবী মণিপুর কৌবা একাউন্ট অমনা মহাক্কী ৱালদা লৌখিবা
ক্বেসনিয়র অমদা য়ূম্ফম ওইরগা হায়জবনি)৷ মসিদা ময়ূম পাল্লবী কয়াসু য়াওরি৷ মণিপুরী
ফিল্মগী তাইবংদা মশেক মঙান নাইরিবী এক্ট্রেস কয়াসু য়াওরি৷
মালেমগী মফম কয়াদা তোঙান-তোঙাননা
লৈনখ্রবা মীওইশিংগা ফেসবুকতা য়াম্না নক্না পাউ ফাওনবা অমসুং উনবা য়ারি৷ মীতৈনা
মপূং ওইনা খুন্দাবা ভারত অমদি বাংলাদেশকী ৱাংমদা লৈরিবা মীওইশিংসু ফেসবুকতা য়াওরি,
মখোয়গা শকখঙনবগী খুদোং চাবা লৈ৷ ভারত অমদি বাংলাদেশকী ৱাংমদা মীতৈ মশীং থীঙমদনা লৈ
অমসুং চোইনা লৈনখ্রবা ময়াম্বু খোমজিন্দুনা ফেসবুকতা উনবগী অমসুং ৱাখল্লোন ফাোদোক্নবগী
খুদোং চাবদু লৈরি৷
ফেসবুকতা
মীতৈ নিঙোলশিংনা করি তৌবগেঃ
মীওই অয়াম্বনা সোসল নেটৱর্কিং সাইট
হায়বসি ৱাথী তৌফম, ৱারেম ঙাঙফম, লৈপুং ফম্ফম ওইনা খন্নৈ৷ খরনা মশাবু এক্সপোজ তৌনবা
কন্না হোতনৈ৷ খরনা সাহিত্যদা, নাতকী ওইবশিংদা অদুগা খরনা মণিপুরগী ওইবা ঈ-পাউ ময়ামদা
ফংহন্নবা কন্না হোতনবা উই৷ মণিপুরগী ওইবশিংবু ফেসবুকতা য়াওরিবা ময়ামদা য়েংহন্নীংবা, খঙহন্নীংবা, তাহন্নীংবা কয়া
অমসু য়াওই৷ ফিল্ম তৌবনা ফিল্মগী, ঈশৈ তৌবনা ঈশৈগী, নাতকী মচলশিংদা ঙাওজবশিং,
ফোটোদা ঙাওবশিং অমসুং মশা-মশানা পামজবা হীরমদা ঙাওজবশিংসু মখোয়-মখোয়গী লম্বীদা হাপকতনরকপা
থেংনৈ৷
নিঙোলশিংনসু ফেসবুকতা মিং চন্দুনা একাউন্ট হাংই, প্রোফাইল ইনফোর্মেসন নীংথিনা পী,
ফ্রেন্দ রিক্যুএষ্ট তৌই নত্ত্রগা অতোপ্পনা তৌরকপবু এক্সেপ তৌই, ফোটো কয়ামরোম এলবম
শেমদুনা হাপকতলি, মশাগী ৱালদা অনীংবা ৱাফম ফোঙদোকই, মরূপ-মপাংশিংগী ৱালদা কমেন্ট
ফোঙদোক্লুই৷ ময়ামদা পাউজেল কয়া পীনীংদুনা গ্রুপ কয়ামরোমসু শেম্মকই নত্ত্রগা
শেমদুনা লৈরম্বা গ্রুপ কয়াদা য়াওরকই৷ মায়গৈ অমরোমদা, নিঙোলশিংগীদমক পূন্নফম অমসুং
তিন্নফম ওইবা গ্রুপসু শেম্নরকই৷ খূদম ওইনা খরদং পঞ্জরবদা – মণিপুরী ৱুমেন্স লাইফ,
নিঙোলগী তাইবং অসিনচিংবা৷ মসিদা মখোয়না মখোয়গী অনীংবা অপাম্বা কয়াসু ফোঙদোক্নবা উই৷
ফেসবুকতা
মীতৈ নিঙোলগী একাউন্টঃ
মীতৈ নিঙোলগী মিংদা লৈরিবা ফেসবুক একাউন্টশিংসি মখল অনীদা ফংই৷ মখোয়
অদুদি- ১. মশানা শেমজবা একাউন্ট অমসুং ২. অতোপ্পনা শেম্বীবা একাউন্ট হায়বসিনি৷
অতোপ্পনা শেম্বীবা একাউন্ট হায়বসিদা অমুক ২.১. নুপানা নুপী অমগী মিংদা শেম্বা
একাউন্ট অমসুং ২.২. নুপীনা অতোপ্পা নুপী অমগী মিংদা শেম্বা একাউন্ট অসি থম্বা য়াই৷
নুপীনা অতোপ্পা নুপী অমগী মিংদা শেম্বা হায়বসিদা মশাগী মিং ওন্থোক্লগা শেম্ববুসু
খঙনবা য়াই৷ অতোপ্পগী মিংদা শেম্বা একাউন্ট অসি মখোয়না খ্বাইদগী পামজবা নুপীগী মিং
অমা শীজিন্নবা য়াই নত্ত্রগা মীনা পাম্নবা মিং অমা শীজিন্নবা য়াই নত্ত্রগা মীওই অদুনা
শাগতচবা ৱাখলগী নুপী অমা ওইবা য়াই৷ ময়ামসিগী মনুংদা য়াম্নমক শীংথানীংঙাই ওইরিবদি
মী অমনা মশাগী পামজবা এক্ট্রেস অমগী মিংদা একাউন্ট শেম্বা অসিসু পনবা য়াই৷ মশাগী
নত্তবা একাউন্টশিংবু ফেক একাউন্ট হায়না খঙনৈ৷ ফেক একাউন্টশিংগী মনুংদা মীগী মমিংদা
শেম্বা নত্তবশিংদি অদুমক ঈকাই খুম্নবা উবা ফংই৷ অদুবু মদু কনানা তৌবনো হায়বগী
খঙনীংবদি ৱাহং ওইনা অদুম্মক লৈনৈ৷
নুপাশিংনা মখোয়গী ৱাখলগী নুপী অমমমবু
ফেসবুককী একাউন্ট হোল্দর অমা ওইনা শেম্বসি য়াম্না তোয়না থেংনৈ৷ মতৌ অসিগুম্না নুপী
খরনসু নুপাগী মিং অমদা একাউন্ট হাংদুনা ময়ামগা পাউ ফাওনরম্বসু থেংনৈ৷ মসি অয়াম্বনা
মখোয়গী ৱাঙাং শাঙাং য়েংলগসু খঙবা ঙম্মী নাকন অমরোমদা মখোয়গী প্রোফাইল ইনফোর্মেসন
অমসুং ফোটো এলবমনচিংবা য়েংলগসু খঙবা ঙম্নৈ৷
ফেসবুকতা
মীতৈ এক্ট্রেসশিং
ফেসবুকতা মীতৈ এক্ট্রেস কয়ামরোমসু মশাগী একাউন্ট হাংদুনা ময়ামগা
পাউ ফাওনরি৷ খরগী মিং পঞ্জরবদা – কমলা সাইখোম, মায়া চৌধুরি, দেবিতা উরিকখিনবম, অবেনাউ
এলাংবম, সোনিয়া হিজম, বালা হিজম, সোমা লাইশ্রম, জেনিফর লুক্রাম অসিনচিংবনি৷ মখোয়না
মখোয়গী ফ্রেন্দ ৫০০ – ৫০০০ রোমগা পাউ ফাওনৈ৷ মখোয়না মতম-মতমদা ষ্টেটস অপলোদ তৌরকই,
ময়াম্না কমেন্ট পীনৈ৷ ময়াম্নসু মখোয়গী ৱালদা অফবা অমসুং ফত্তবা ৱা কয়ামরোম ইশিল্লি৷
ফ্রেন্দশিংনা মখোয়গী ফোটো কয়াদা এক্ট্রেসশিংগী মিং তেগ তৌশিল্লি৷
ফেসবুকতা খ্বাইদগী য়াম্না অতোপ্পনা একাউন্ট হাংবিবা মীতৈ এক্ট্রেস
অমদি হিজম সুর্য্যবালানি৷ বালাগী মিংদা একাউন্ট ১৫ রোম হেন্না অতোপ্পা মীনা হাংবি
অমসুং মখোয়না বালা শারগা মাঙোন্দা ফ্রেন্দ রিক্যুএষ্ট তৌরকপশিংবু এক্সেপ তৌই অমসুং
পাউ ফাওনৈ৷ খঙদবশিংনা বালানি খন্দুনা মাগী ৱালদা ষ্টেটস কয়ামরোম ইশিল্লি, কমেন্ট
কয়ামসু পীশিল্লি৷ বালাগী লৈরিবা একাউন্ট ১৫রোম হেনবা অসিগী মনুংদা মশাগী অশেংবা
অমসু য়াওই অদুবু করম্বনা অশেংবনো হায়বদুদি অয়াম্বনা খঙনদে৷ বালাগী মিংসি হিজম
সুরবালা নত্ত্রগা সুর্য্যবালা, সুরবালা হিজম, বালা হিজম, সুরবালা, বালা অসিনচিংবা
হায়না ময়াম্না শীজিন্নরগা হাংবি৷ বালা খরগী একাউন্টতা ফ্রেন্দ ৫০০০ রোম লৈ৷
৫০০০দগী হেনবা ফ্রেন্দদি এক্সেপ তৌবা য়াদে অদুনা কান্নদবা, কারন তাবা, ফেক মানবা
খরবু ককথতপসু থেংনৈ৷ বালাগী মিংদা একাউন্ট হাংবতা নত্তনা পেজনচিংবা হাংবিবসু য়াওরি৷
বালাগী একাউন্ট ময়াম হাংবসি মায়গৈ
অমরোমদা বালাবু ময়াম চঙদুনা হেন্না মমল লৈহনবনি৷ ময়াম্না মাবু য়াম্নমক পাম্নবগীল
শৌগতপীবগী খূদমনি অদুবু মায়গৈ অমরোমদা বালাগী মরুমদা লৈরিবা মীওই অদুনা বালাগী
মিংদা হায়হৈদবা কয়া হায়রকপা, বালাগী মিংদা থীবা য়াবা কয়া ইরকপা থেংনবা অসিনি৷
মসিদগী বালাগী একাউন্ট (মদু অশেংবনি হায়না খরনা খন্নবা) অমনা ময়ামদা অদুম্না
তৌবিদনবা কন্না অপিল তৌজৈ৷ ফেসবুকতা
বালাদি নুংশিবা ময়াম্না থাঙ্গতপীবা নাকন অমরোমদনা মিংদা থীহনবীবগী চক্রবিহ্যু অমদা
ঊংদুনা লৈবনি৷ বালাগুম্না অতৈ এক্ট্রেসশিংদি কয়া কোক শাবা উদে৷
ফেসবুকতা
মীতৈ নিঙোলশিংগী প্রোফাইল পিকচরঃ
ফেসবুকতা য়াওরিবা মীতৈ নিঙোলশিংনা মখোয়গী প্রোফাইল পিকচর অসি
মশাগী ফোটো হাপ্পসু য়াওই অদুগা হাপ্তবসু য়াওই৷ মশাগী ফোটো হাপ্পগা হাপ্তবগা মশীংসি
চাউরাক্না মান্নগনি৷ নিঙোলশিংনা ফেসবুকতা মশাগী ফোটো হাপ্তবগী ওইথোকপা য়াবা
মরমশিংদি-
১. মশক ফজদবদগী
২. মশাবু ময়ামদগী লোতচনীংবদগী
৩. মশাগী অশেংবা একাউন্ট নত্তবদগী
৪. মশাগী অশেংবা ফোঙদোকপদা সেব ওইদবা মফম্নি খনবদগী
৫. মশাগী পূক্নীং ঈহূল ফোঙদোকপা ঙম্বা অয়েকপা লাই
উহন্নীংবদগী
মসিননি হায়না লৌবা য়াই৷ মশক থীবা
নিঙোলশিংনা মশাগী অশেংবা মিংদা একাউন্ট হাংলগা মখোয়না ফজৈ হায়না খনজবা ফিল্ম
এক্ট্রেসশিংগী ফোটো মখোয়গী প্রোফাইল পিকচর ওইনা হাপ্পা থেংনৈ৷ মখোয়না অয়াম্বা
মতমদা কোরিয়ন এক্ট্রেসশিংগী পিকচর হাপ্পা উবা ফংই৷ মায়গৈ অমরোমদা, মশাবু মীয়ামদগী
লোতচনীংদুনা অতোপ্পগী ফোটো হাপচিনবসু য়াওই৷ মশাগী নত্তবা একাউন্ট ওইবনা মরম ওইরগা
ফোটো লৈতদুনা অতোপ্পগী হাপ্পসু থেংনৈ৷ মতাং অসিদা ফেসবুক অসি ইশাগী অশেংবা প্রোফাইল পীবদা সেব ওইদবা মফম্নি হায়দুনা
লান্না শন্দোকপা অমসু চাউনা লৈবা থেংনৈ৷ মরম অদুনা মশাগী অশেংবা ফোটো অপলোদ তৌনদে৷
হন্দক নৈনরোয় অমনা ফেসবুকতা পীরিবা
মীওইশিংগী প্রোফাইল পিকচর অদু নৈনরগা মখোয়গী পূক্নীং মতা অমসুং ঈহুল নত্ত্রগা ফীবম
অদু মচা খায়না নৈনরগা ফোঙদোকখি৷ ৱারেং অদুদা নৈনরোয় অদুনা পূক্নীংগী ফীবম ৯ খক
পুথোকপা ঙমখি৷ মতৌ অসুম্না, প্রোফাইল পিকচর নৈনরগা মী অমগী মতমদুগী ওইরবা ফীবম
নত্ত্রগা মহাক্কী পামজবশিংদু খঙবা ঙম্মী হায়নসু মহাক্না ঊতখি৷
মায়গৈ অমরোমদা, নিঙোলনা মখোয়গী কোয়নবা
নুপা নত্ত্রগা কনাগুম্বীনা মখোয়গী মবুং নত্ত্রগা মৌপ্বাগী নত্ত্রগা এক্টর অমগী
ফোটোনা প্রোফাইল পিকচর ওইহল্লকপসু থেংনৈ৷
ফেসবুকতা
মীতৈ নিঙোলশিংগী মশাগী ফোটো এলবমঃ
ফেসবুকতা মশাগী অকূপ্পা মরোল (প্রোফাইল ইনফোর্মেসন) পীফম লৈবা
অমসুং ইশাগী ৱালদা হায়নীংবা ৱাফম ফোটোগা কোন্না ফোঙদোকপা য়াবগুম ইশাগী ফোটো এলবম
কয়ামরোম থমদুনা মশীং থীঙমদবা ফোটোসু হাপকতপা য়াই৷ মতাং অসিদা নিঙোল খরনা মখোয়গী
ফোটো হাপকত্তে অদুগা খরনা মশীং থীঙমদনা হাপকতলি৷ মায়গৈ অমরোমদা, ফেসবুককী ফোটো
থম্ফমসি দিজিটেল ফোটো এলবম ওইবনা মরম ওইরগা মসিদা প্রাইভেসি মেইন্টেন তৌবসু য়াই৷ অদুবু
অয়াম্বনা মখোয়গী ফ্রেন্দশিংদদি উহন্নৈ৷ মরক-মরক্তা নিঙোলশিংনা মখোয়গী পুন্সিগা মরী
লৈনবা ফোটো হাপকতলকপদা অফবা মায়গৈসু য়াওরকই অদুগা অতোপ্পনা উবদা মীত নাবসু য়াওরকই৷
অফবশিংদি খূদম ওইনা পল্লবদা, মখোয়গী
ইমুং মনুং, মরূপ-মপাং, শাগৈ নাতৈ, মচা মশূ, মখোয় মশা য়াওবা থৌদোকশিং, লম-তু
কোয়থোক্লুবা অমদি থৌওইনা কাপচদুনা লীশিনজরবা ফোটোশিং অসিনি৷ মসিগী মনুংদা মীয়াম্না
পাম্নদবা ফোটোশিংদি – মশাগী ফিজেত কোম্বা ফোটো, নুংশি-নুংওন্নরিবা নুপাগা হকচিনবা
মওংদা কাপমিন্নবা ফোটোশিং অসিনি৷ নিঙোলশিংনা মনুংগী ফিজেত হায়বদি থা অমদি
ফিনুংখক্তবু কূপ্পা ফিজেত মচা অনীদুতং শেতলগা মতোমতা কাপচবা ফোটো হাপকতনরকই৷ মসি
মখোয়না মিংশেলদা ওনশিন্দুনা কাপচবা নত্ত্রগা মশাদা ওনশিঞ্জরগা কাপচবা ঙাক্তনা
অয়াম্বনি৷ করিগুম্বদা মশানা পোজ তৌরগা মী অতোপ্পনা কাপ্পীবসু হাপকতলকই৷ মায়গৈ
অমরোমদা ষ্কর্ট অকৌবা শেতলগা ফৈবোম মতা ফবদু ঊতথোকপা ফোটো কয়া অমসু হাপকতনরকই৷
করিগুম্বদনা নুংশিনবা নুপাগা কোন্নবগী অমদি চূপ্নবগী ফোটো হাপকতনরকই৷ মতাং অসিদা
নুংশিনরিবা নুপা অদুনা মীয়ানচা ওইরবদি অউবা নুপা অতৈশিংনা য়াম্না শাউনৈ৷ মরম অদুনা
মেম্বর ৫০০০ হেন্না য়াওবা গ্রুপতা মখোয়গী ফোটোশিংদু লৌথোক্লগা অমুক হাপকতনরক্তুনা
অচৌবা ৱাথোক ওইনৈ৷
(দাইনা কৌবী অমনা মাগী এলবমদা হাপকতলকপা
ফোটোদা য়ূম্ফম ওইরগা খোয়শাউনরবা নহা নুপা অমনা ময়াম মাঙদা পুথোরক্তুনা ফেসবুকতা
য়াম্না চাউবা ৱাথোক ওইখি৷ ৱাথোক ওইখিবা ফোটোদু অমুক হন্না থমজরি৷)
ফেসবুকতা
নুপানা হাপকতলকপা নুপীগী ফোটোঃ
মীতৈ নুপীগী পোর্ণ ফিল্ম অমদি পোর্ণ
ওইবা দর্টি পিকচর কয়া ইন্টর্নেটকী তাইবংদা মশীং থীঙমদনা ফংএ৷ মসিদা মখোয় থীতনা শাউরবা
নুপামচা খরনা মীতৈ নুপীগী ওইরিবা লৈখা তাথরকপগী ফীবম অদু ময়ামদা খঙহন্নীংদুনা
মশাগী ফেক একাউন্ট অমমম ফেসবুকতা হাংলগা
মীতৈ নুপীশিংগী ফিরোল য়াওদবা অমদি ফিরোল হাংদোকপগী ফোটো কয়া অমা হাপকতনরকই৷ মসিদা
মশাগী চহী ১৬-১৭তগী ৪০-৪৫ ফাওবগী নুপীশিংগী ফোটো য়াওরম্বা থেংনৈ৷ মীতৈ নুপীনি
হায়বসি মখোয়গী ফনেক অমসুং করিগুম্বদনা চন্দোন থিনবা অদুনা খঙহল্লি৷ ফোটোশিংদু
অয়াম্বনা মোবাইলগী মতেংদগী লৌখতনরকপা ঙাক্তা ওইনা তৌই, করিগুম্বদনা য়াম্নমক মমল
তাঙবা কেমেরানা কাপ্পা ফোটোসু য়াওরম্বা থেংনৈ৷ মায়গৈ অমরোমদা, নুপা খরনা মীগী
অচেত-অকোম য়েংলগা হূরান্দুনা কাপ্পা ফোটো কয়া অমসু হাপকতনরকই৷ মসিদা নুপীনা ইরুজরিঙৈদা
হুরান্দুনা কাপ্পা অমদি ফমুংদা তূম্লিঙৈ নত্ত্রগা হিপ্লিঙৈ নত্ত্রগা মফি হোংলিঙৈদা
কাপ্পা ঙাক্তা ওইনা থেংনৈ৷ থওইনা মফি চিংথরগা কাপ্পা ফোটোশিংসু য়াওরকপা উবা ফংই৷
ফেসবুককি
অফবা মায়গৈ অমসুং মীতৈ নিঙোলঃ
ফেসবুক হায়বসি চাওখতপগী খোঙলৈ অসিনা মীওইবা খুনাইদা পীবা খ্বাইদগী
ফবা খূদোলশিংগী মনুংদা অমনি৷ মসিনা ঐখোয়বু গ্লোবেল ফেমিলি অমগী মীওইশিং ওইবা
তম্বী, গ্লোবেল ভিলেজ অমগী খুঞ্জা-মচা ওইবা তম্বী৷ মসিনা মালেমবু ঐখোয়গী খুদোম্বী
মতোনসিদা থম্বিরি৷ লমচত-শাজত, থৌগল্লোন-ব্যবহার, তোঙান-তোঙানবা নাত, চতনবী, ৱাঙাং-শঙাং,
ফিজেত-চাকচা কয়া উহল্লি, তাহল্লি অমসুং খঙহল্লি৷ মাস মেদিয়া হায়বসি সোসিএলাইজেসনগী
অচৌবা এজেন্ট অমনি অমসুং ফেসবুক অসিসু
মাস মেদিয়াগী মচল অমা ওইনা সোসিএলাইজেসনদা অচৌবা মতেং পাংলি৷ মসিদা মীতৈ
নিঙোলশিংসু শরুক য়ারি৷ মখোয়না ফজদবা ৱাঙাং-শঙাং ঙাঙদে অমসুং মখোয়দা ঙাঙলকপা পামদে৷
চাওখতপা অমদি লেমজবা চতনবী অমগী মতৌ ঙাক্তুনা মখোয়না ফেসবুকতা ইদুকেসন, ইন্সত্রাকসন অমসুং এম্যুজমেন্ট পীবতা নত্তনা
মখোয়নসু তমশিল্লি, মশাবু হেন্না ফগতহল্লি৷ মখোয়না ফেসবুকতা মখোয়গী লৈবাক নীংবগী পূক্নীং ঈহুলবু মথৌ শঙই৷ মমারোন মজাতি
মখুনাই অমদি মরমদমবু নুংশিবগী ৱাখল্লোন চাওখতহল্লি৷
ফেসবুককি
ফত্তবা মায়গৈ অমসুং মীতৈ নিঙোলঃ
অচৌবা লৈবাক অমবু লোয়শঙ অমনা ঙাক শেনবা
ঙমদবগুম ফেসবুককি এদমিনশিংনসু য়ামখ্রবা মেম্বরশিংসি ঙাক শেনবা ঙমদে৷ মসিগী খুদোং
চাবা লৌরগা ফেক একাউন্ট শেমদুনা ঙাঙনীংবা ঙাঙবা, ইনীংবা ইবা অমসুং হাপকতনীংবা ফোটো
নত্ত্রগা ভিদিও হাপকত্তুনা হৌরক্লিবা অনৌবা নহারোল মীরোলদা লমচত নাইদবগী,
মীহাত-মীথিনগী, মতোমতা শিজনবগী অমদি মশানা মশাবু ৱারক্তনবগী মরম ওইহল্লকপা থেংনৈ৷ ফেসবুকসিদা লৈরিবা খুদোং চাবা ময়াম অসিগী
লান্না শীজিন্নদুনা মীতৈ নিঙোলশিংগী লৈখা তাথরকপা ফোটো অমদি ফিল্ম কয়া অপলোদ
তৌরক্তুনা মরন্নাই পুন্সিগী অরোনবা মতৌদু সেবাক ফাক্লি৷ মসিনা অতৈ জাতিগী মমাঙদা
মায় খূনীংঙাই ওইবা মরমসু ওইরক্লি৷ মীতৈ নিঙোলশিংবু লমচত নাইদবী ওইনা উহল্লকপা
য়াবগী থাক্তসু কাখতলক্লি৷
অসিগুম্বা সাইট অসিনা খুনাইদা অমদি
লৈঙাক শাসনদা অকায়বা কয়া পুরকপা য়াই হায়বগী মরম কয়া পীরদুনা চাইনা, ভিয়েতনাম,
ইরান, উজবেকিন্থান, পাকিষ্টান, সাইরিয়া অমসুং বাংলাদেশ (বাংলাদেশতা অথিংবা
লৈতবগুম্লে)তা অথিংবা থম্মী৷(৭)
ফেসবুককি
লোন অমসুং মীতৈ নিঙোলঃ
ফেসবুক য়ুজর ওইরিবা মীতৈ মচাশিংনা শীজিন্নরিবা লোন অসি মথং শীতনা
১. ইংরাজি – মীতৈ অয়াম্বনা ইংরাজি লোন্দা মখোয়গী ৱাখল্লোন ফোঙদোকই৷
২. মীতৈরোন – মীতৈশিংগী মনুংদা চাদা ৩০
রোম্না মীতৈরোনদা ই৷
৩. বাংলা – বাংলাদেশতা লৈবা মীতৈ মচা
অয়াম্বনা মখোয়গী ষ্টেটস হাপকতপা মতমদা বাংলাদা ইরকই৷
৪. হিন্দী – অপূনবা মীতৈগী চাদা ২ রোম্না
হিন্দীদা ষ্টেটস হাপকতলি নত্ত্রগা কমেন্ট পীরকই৷
ইংরাজি ইবসি লাইরিক হৈবা মীনি হায়বা
তাকপনি অদুগা ফেসবুক হায়বসি মালেমগীনি,
অদুনা মালেমগী ফম্বাক্তা লাইরিক হৈবা মীওই অমনা ৱাখল্লোন ফোঙদোক্লবদি ইংরাজিদা
ফোঙদোকফম থোকই হায়বসিনা অহানবা মরম্নি হায়না লৌবা য়াই৷ মীতয়েং অসোমদা মীতৈ অমনসু
মীতৈ অমগা মচিন-মনাউ ওইরবসু ফেসবুকতা ৱাখল্লোন
ফোঙদোক্নরবদি ইংরাজিদা ইনরকই৷ রোমান ময়েকনা ইংরাজি নত্তবা অতৈ অতোপ্পা লোন ইবা
য়াদবগুম খনবা অসিনা অনীশুবা মরম ওইবা য়াই৷ ‘রোমান ময়েকনা মীতৈরোন ইবসি মতম কুইনা
চঙই অদুনা ইংরাজিদা ইবনি অদুগা রোমানদা মীতৈরোন ইবসি শমজিন্দুনা পানবা হোতনবদা মতম
কুইনা চঙই অদুনা ঐসু ইংরাজিদা ইরক্কে অদুগা ঐঙোন্দসু ইংরাজিদা ইরকউ’ হায়বসি মখোয়গী
ৱাফমনি৷
ফেসবুকতা মীতৈ নিঙোল খরা লৈ মখোয়গা ৱাখল্লোন ফাওদোক্নগে হায়রবদি
ইংরাজিদা ইবা তাই হায়রি৷ মখোয়না মীতৈরোন হায়বসি খুন্নুং-মান্নুংগী ওইবা চাওখত্তবা
লোনগুম খল্লি অদুনা মখোয় মশাবুনা থাক ৱাংবা (মালেমগী ওইবা থোক্তাত লৈখ্রবা),
চাওখতলবা অমগুম খঞ্জদুনা মীতৈরোন শীজিন্নদে৷ মসি হায় হায়দুনা মীতৈরোনদা ইবা নিঙোল
শূক্লৈমক লৈতবদি নত্তে হায়ববু মখোয়না হান্না ইরক্লবদি ইংরাজিদা হান্না হেক্তমক
অয়াম্বনা ইবা হৌনরকই৷ কনাগুম্বনা মীতৈরোনদা ইরুরগা মীতৈরোনদা হল্লকপদি ফনা য়াম্না
লৈ৷ মীতৈরোনবু রোমান ময়েক্না ফেসবুকতা
ইদুনা পাউ ফাওদোক্নবা য়াই হায়বসি খনবা ঙমদবা মীতৈসু লৈ৷ মসিগী মনুংদা মীতৈ
নিঙোলশিংগী মশীংসু য়াম্মী৷
বাংলাদেশকী মীতৈ খরনা মীতৈরোন ইবদা
শোয়খ্রগা অতৈনা নোক্নবিরক্কনি কিদুনা ইদবা য়াওই৷ অদুবু থৌনা ফবা কয়ামরোমসু লৈ৷
ভারততা লৈবা মীতৈ নিঙোলদা মশীং য়ামদ্রবসু মতম পূম্নমকতা রোমান ময়েক অসিনা মীতৈরোন
ইগনবা লৈ৷ অতৈ অয়াম্বদি মীনা ইরকপগী পাউখুমদা মীতৈরোননা খুম্বতনি৷ মখোয়না চেতিংদা
মীতৈরোননা ইনবদা লোন শুদে, হৈতে হায়দুনা ইংরাজি হেক্তমক ওন্থোকখি হায়না পল্লি৷
ফেসবুকতা
ইনবা ময়েক অমসুং মীতৈ নিঙোলঃ
ফেসবুকতা য়ুনিকোদ ওইবা ময়েক অমনা হেক্তা ইবা য়াই৷ অদুবু
কনাগুম্বনা বাংলা ময়েকতা মীতৈরোন ইরবদি ফনা শীংথানদে৷ মখোয়না ‘ইগে হায়রগনা মীতৈ
ময়েকনা ইয়ু নত্ত্রগা রোমান ময়েক অসিনা অদুমক ইয়ু’ হায়বা পাম্মী, হায়৷ মরম অদুনা ফেসবুকতা মীতৈনা ইনরিবা ময়েক অসি চাদা ৯৫
রোমদি রোমান ময়েক অসিনি৷ চাদা ৩.৫ গুম্বনা বাংলা ময়েক শীজিন্নরম্বা য়াই৷ মসিগী
মনুংদা বাংলাদেশকী অয়াম্বা মীতৈদি বাংলা ময়েকতা ইরকপা থেংনৈ, ভারতকিদি চাং য়াম্নমক
হন্থৈ৷ অদুবু ভারততসু বাংলাদেশতসু নিঙোলশিংনদি বাংলা ময়েক অসি কয়া শীজিন্নবা উদে৷
মরম অসিদগী রোমান ময়েকনা ইবা মীতৈরোনগী
মশক অমা য়াম্না পাক শন্না ফেসবুকতদা
নত্তনা ইন্টর্নেটকী তাইবংদা শন্দোরক্লি৷ মসি ইন্টর্নেট অমসুং ফেসবুককি অচৌবা খূদোল অমনি৷ মায়গৈ অমরোমদা, মখোঙ য়াঙবা খৃষ্টান
কাঙবুনা মীতৈরোনদা বাইবলগী গোষ্পেল লাইরিক অমা (যোহননা ইবা অফবা ৱা-পাউ)বু রোমান
ময়েকতা ইথোক্তুনা নেটতা অমসুং ফেসবুকতা
ফংহল্লক্লি৷
নৈনবাঃ
পোত খূদিংমক্কী অফবা অমসুং ফত্তবা মায়গৈ
লৈবগুম্না ফেসবুক অসিগীসু অফবা অমসুং
ফত্তবা মায়গৈ লৈরি৷ অফবা মায়গৈদা ফেসবুক
য়ুজর খরনা মীশিংবু পুশিল্লক্নবা হোতনৈ৷ মখোয়না পান মণিপুর, কংলৈপাক মণিপুর, কংলৈ
সনা পূংময়োল, রিদিসকোভর মীতৈ, ফোটো সেয়র ওফ মণিপুর, নিঙোলগী তাইবং, লাইনিংহল
নাউরিয়া ফুলো, লাইনিংথৌ সনামহী, অল্লাহনা অথোইবনি, জগতকী মপু ইবুঙো কৃষ্ণ,
কংলানচিংবা গ্রুপ অমদি পেজশিং শেমদুনা ময়ামদা মীতৈলোন, নাত, চতনবী, থাজনবী, লাইনীং
লাইশোন, ৱাখল-লৌশিং কয়া পীনবা হোতনৈ৷ মসিগী মথক্তা মতম-মতমগী থোক্লিবা ঈরাংদা
য়ূম্ফম ওইদুনা ৱাফম কয়ামরোম অমসু হাপকত্তুনা খন্ন-নৈনৈ৷ হায়রিবা গ্রুপ অমসুং
পেজশিং অসিদা মীতৈ নিঙোলশিংনা চঙবগী চাং খরমখৈ নেম্মী৷ মখোয়না বোইস এন্দ গর্লস,
হ্বাট আর য়ু লিসেনিং নাউ, লব, হ্বাট আর য়ু থিঙ্কিং নাউ, ফেসবুক মিষ্টর হেন্দসম
কন্টেষ্ট ২০১১, ফেসবুক মিস বিউটিফুল কন্টেষ্ট ২০১১ নচিংবদনা হেন্না থৱায় য়াওবা উবা
ফংই৷ অয়াম্বা নিঙোলশিংনা গ্রুপশিংদা য়াওদনা মশাগী অমদি মরূপশিংগী ৱালশিংদা ষ্টেটস
অমদি কমেন্ট পীনবখক্তনা লোইশিনবসু য়াওরি৷
ফেসবুক অসিনা মীতৈ নহারোলশিংদা গ্লোবেল সোসাইতি অমগী সোসলাইজেসন
অমা কন্না পীরি৷ তাইবংপানগী চতনবী অসিনা মখোয়গী লমচত-শাজততা অওনবা কয়ামরোম
পুরক্নীংঙাই ওইরি৷ মসিদা হাপকতনরকপা ফোটো অমসুং ভিদিওশিং অসিনা মীতৈ নহারোলশিংগী
লৈখা তাথরকপগী মমি অমসু উবা ফংলক্লি৷ অকিবা ফংবা মায়ওন অমদা চঙশিনখিবা য়াবগী মমিসু
উরক্লি৷ মীতৈ নিঙোলবু অতোপ্পা কাঙলূপকী মীওইশিংনা শান্নপোত নত্ত্রগা সেক্স ওবজেক্ট
ওইনা উরকপসু য়ারি৷ মসিদা চহী নৌরিবা অঙাং ক্লাস সেভেন তম্বশিংনসু য়াওশিল্লকপসি
হরাওনীংঙাই ওইব্রা নত্ত্রগা কপ্নীংঙাই ওইব্রা হায়বসিসু ৱাহং ওইরক্লি৷
মায়কৈ অমরোমদা, ফেসবুকসি অচৌবা মহৈকোল অমনি হায়না লৌবসু য়ারি৷ মসিদা অফবা কয়ামসু
মহৈরোয় নত্ত্রগা ওজা ওইরম্বা য়ারি অদুগা ফত্তবা কয়া অমসু য়াওরম্বা য়ারি৷ মহৈকোল
অসিদগী নহারোল মীরোলনা অচৌবা পারা কয়া তমশিন্দুনা পুন্সিবু মায় পাকপগী লম্বীদা
চতনবা হোতনবদা মতেং কয়ামরোম ওইনীংঙাইসু লৈরি৷ মসিদা নিঙোলশিংনা ফেসবুককী মহৈরোয় অমা ওইনা লেমজনীংঙাই
ওইবা থাক্তা কাখতলকপসু য়ারি৷ মথংগী লাক্কদবা মীরোল অসিদা ফেসবুকনা পীবা সোসলাইজেসনগী মমি য়াম্না চাউনা তাগদৌরি৷
ৱারোইশিনঃ
ফেসবুকনা মীওই অমগী লন্নাই পুন্সিখক্তা নত্তনা পুন্সি অদুগী
অকোইবদা লৈরবা মজাতি, মখুনাই, মনাত, মহৈ-মশিং, মমারোল অমসুং নিংথৌ কাঙলোনগী ওইবা
হীরমশিংদা চাউনা মমি তাহনবা ঙম্মী৷ খূদম ওইনা ইজিপতা অওনবা অমা পুরকখিবদু ফেসবুকনা অচৌবা থৌদাং লৌখি হায়না য়ানরি৷
ফেসবুক মূত্থতলগনি হায়বা তোকঙা অমা শন্দোরকপা মতমদা মীওই কয়ানা মকোকতা খূত হাপ্নখি৷
ফেসবুকনা পুন্সিগী শরুক অমা ওইনবা ফাওবা য়াওনরক্লিবনি৷ সোসল নেটৱর্কিং সাইটপু চুম্না
শীজিন্নরবদি মীতৈ নিঙোলশিংসু হেন্না পাক শন্না শীংথানীংঙাই ওইবা লন্নাই অমা শাগতচবা
য়াই৷ লৈবাক্কী ইশ্যুদা নৈনরিবশিং অসিদা শরুক য়াশিল্লক্তুনা অওনবা খুনাই, অওনবা
মণিপুর অমা পুরকপদা শরুক য়াশিল্লকপা য়াই৷ মরমদি ফেসবুক য়ুজর পূম্নমক মহৈগী মঙাল ফংনরবা ঙাক্তনা অয়াম্বনি৷ মীতৈ
নিঙোলশিংনা মশাবু অচুম্বা লম্বীদা চতচবতা নত্তনা লম্বী লম্মাংনখ্রগদবা তুংগী
মীরোলবুসু ফেসবুককী মতেংনা কন্নবা
হোতনবগী থৌদাং লৌরকপা য়াই৷ ফেসবুককী
মতেংদগী হৌরক্লিবা লাইরিক-লাইশু হৈরবা নহারোলশিংনা মণিপুরদা অনৌবা য়াওল অমা পুরক্কনি
হায়বগী থম্নরিবা থাজনবা অসিদা নিঙোল ওইবিশিংনসু অচৌবা থৌদাং লৌরক্কনি হায়বগী থাজবা
থম্বদা চুমহল্লকপা অমা চঙলি৷
মরী লৈনখিবা লিঙ্ক খরা
(৫) http://en.wikipedia.org/wiki/Facebook_%28directory%29
(৬) http://en.wikipedia.org/wiki/Facebook
(৭) মথক্কী
No comments:
Post a Comment