খঙলে হায়বদুগী মথক্তা হেন্না খঙবা অমসু লৈ

‘ইচেম্মা’দা ইবা চিঠি

‘ইচেম্মা’ জনুৱারি ২০১১ ইশ্যুদা ইরকপা মুহম্মদ অব্দুর রহমানগী ৱারোলদা থাগতচবগা লোয়ননা ৱাহং খরা

ঈকাই খুম্নজরিবা এদিটর,

‘হোলি কুরআন’গী পন্দুপ (অধ্যায়) ১২ পরেং (পদ) ৭৬ তা য়াওবা ৱাহৈ পরেং ‘...খঙলে হায়বদুগী মথক্তা হেন্না খঙবা অমসু লৈ ’ হায়বসী হোদাম্বা-নসু ঙক নোন্না লৌশিঞ্জৈ অমসুং খ্বায়দগী খঙবদু মপু ইবুঙোনি হায়না চেতনা থাজজবদু ওজা মুহম্মদ অব্দুর রহমানদসু শাক্ষি পীথোকচরি ৷ তাইবং মীওইবদি লোম্নাইবনি অদুগা মপু ইবুঙো লাইনিংথৌদি লোম্নাইদবনি ৷ হোদাম্বা-দি বুদ্ধি-লৌশিংগী মায়গৈদা মশুং-মমান্নবশিংদগী ইশোত্ত-শোত্থদুনা লৈহৌরবা, খ্বায়দগী মমৈতা থংদুনা লৈজরক্লিবা অমনি ৷

একাদেমিক ওইনা ফোঙদোক্নরিবা ৱাখল্লোনশিংবু মফম পীবিবগীদমক ‘ইচেম্মা’বুসু মমল লৈনা লৌজরি ৷

অদোম্না তাকপীবা ‘ঐ অমুক মখা তাজররোই ৷ ঐনা মখা তারক্লবসু তৌবিরক্লগনু হায়বা ৱাকত থমজরি’ হায়বা অদোমগী ৱাকত অদুগী মায়োক্তা লেপচবা নত্তবদা অদোম্বু হেন্না মমল থমজরগা মখা তাবা ৱারোল অসী ইজখিবনি ৷ থিজিনবা মীওইশিংবু চুম্না লমজিংবিবা ঙম্বগী পূক্নীং-লৌশিং-জ্ঞান অদোমগী মতিক চানা লৈ হায়বসী খঙজরুবনা অতৈ খঙজদবা ইচিন-ইনাউশিংগা পূন্না খঙমিন্নবা পামজবদগী ‘ইচেম্মা’গী থোঙদা মখাগী ৱাহং খরসিগী পাউখুম পীবিরক্নবা নোল্লুকচরি ৷ অদোম্না পাউখুম পীবিরক্লগদি ‘ইচেম্মা’নসু মমল থম্বীগনি হায়বগী থাজবা থমজরি ৷

১. মৈদিংঙু খাগেম্বা মতমদা লানফা ওইনা লাকখিবা টুর্কি আফগানগী লান্মীশিংদুদা অলিম নত্ত্রগা মৌলানা নত্ত্রগা মৌলৱী নত্ত্রগা ইসলামগী মরমদা তম্বী-তাকপীবা ঙম্বা মীওই কয়াখক য়াওরকখিবগে অমসুং মখোয়শিংদু কনা কনানো ? মখোয়না ‘মপুগী অশেংবা কুরআন’ কয়াখক লোয়নরকখিবগে ?

টুর্কি আফগানদগী লাকখিবনি

মণিগী লৈবাক মণিপুরদা

ইনিংথৌ খাগেম্বা মহারাজনা

লৌখতপীরম্বনি ঐখোয়সে ৷

- মরিফতকী মতেক অমা

২. ফাদোকশিং অদুবু নীংতমহল্লগা মীতৈ চনুরা কয়া পীদুনা লুহোং-খোঙদোংখি অমসুং য়ূম্বান পুন্সিদা খোঙদাহনখি ৷ মতম অসিগী মীতৈ চনুরাশিংদু মখোয়গী অহানবা মীরোলমক্তদা ইসলাম লৌশিনখিব্রা নত্ত্রগা করম্বা মতমদা লৌশিনখিবগে ?

ইনিংথৌ খাগেম্বা মহারাজনা

সনা লৈবাক মণিপুরগী

মফম অয়াম্বদা থম্লদুনা

মীতৈ চনুরা পীরদুনা

পাঙন শাগৈদা পোকখিবনি ৷

      - মরিফতকী মতেক অমা

৩. ইসলাম লৌশিনবগী ওইবা চতন-পথাপশিংদু অনীশুবা অমসুং মখা তাবা মীরোলশিংগী মতমদা কনা-কনানা অখঙ-অহৈ লুচিংবা ওইনা চত্থরম্বগে ? মীতৈ চনুরাশিংনা মতৌ করম্না ইসলাম পুরকখিবগে (মুসলমান ওনখিবগে) ?

৪. মীতৈ পাঙনগী মঙাশুবা মীরোল ফাওবদা ‘মপুগী অশেংবা কুরআন’ কয়াখক মণিপুরদা লৈরমগনি হায়না থাজবিবগে ? কুরআন পারগা অর্থ নীংথিনা খঙবা অমসুং চুম্না খঙহনবা ঙম্বা মীওইনা কয়াখক লৈরম্বগে ?

৫. মতমদুগী টুর্কি আফগানগী লান্মীশিংদু করম্বা মতমদগী মীতৈরোন লোনবা অমসুং পাক শন্না শীজিন্নবা হৌখিবগে ? মখোয়গী অহানবা শমথরকপা মীরোলদগী হৌনা মীতৈ পাঙননা মীতৈরোনবু মমারোন ওইখিবনি হায়বসিদা অয়েতপা ৱা লৈবিবরা ? মীতৈ নিঙোনদগী শমথরকপা মীরোলদুনা মীতৈ পাঙন ওইবা হৌখিবনি ৷ মীতৈ পাঙনদি নোংচূপ হারমদগী লাকখিবা মীওইশিংগী চাদা নাউদা ওইবা মীতৈনি ৷ মখোয়না ইসলাম লাইনিং চতলি ৷ মীতৈ পাঙন খুনাইদা নুপাদগী নুপীনা হান্না ইনিংথৌ খুঞ্জাউবগী মতমদা খুনুং ঈশৈ শকখি হায়বসি য়াবিবরা ? নুপারোমদনা সেলিম কৌবা অমনা ইহান হান্না ইনিংথৌ পাইখোম্বগী মতমদা শকই হায়না থাজনরি ৷ সেলিমনা শকখিবা খুনুং ঈশৈদু মখাগী অসিনি-

হা ইবেম

মাঞ্জ মচাবু পামুবি

লোয়া তাম্লৌ কাচিনদা

পাখঙ নুংওন লৌকোনদা

ইঙেন থা থুংলববু ঙাইবদি

... ... ... ... ...

ইনেম মচাও নঙবুদি উদরে ৷

৬. অহানবা মীরোলগী মীতৈ চনুরাশিংদু পর্দা তৌখিবরা ? মখোয়দা কোরআন কনানা তম্বিখিবগে ? মখা তারকপদা, ‘খোঙলৈ ঈশৈ’ শক্তুনা লুহোংবগী থাবল চোংবদা শরুক য়াখিবা মীতৈ পাঙন নুপীশিংনা পর্দা তৌখিবরা ? খোঙলৈ ঈশৈ মতেক অমদং থমজরি-

সোরারেনগী লম্বোইবা

নঙগী পুখ্রি অদুদি

ময়ূং লমজিং কয়ানো

মরাক লমজিংনা কয়ানো

নঙগী পুখ্রি মপানদা

গুলাপ লৈবু থারমগে

গুলাপ লৈগী লৈনাদা

লৈহাউ লৈবু থারমগে  ৷

৭. ‘অস-সলামু অলৈকুম’, ‘ৱ-অলৈকুমুস সলাম’, ‘য়গফিরুল্লহু লনা ৱ-ল-কুম’ হায়রিবা ৱাহৈশিংসি ইসলামিক থিওলোজি তম্বশিংতনা অয়াম্বা খঙবনি অমসুং চুম্না হায়বা ঙম্বনি, অচম্বা মীরোলশিংনদি খঙদে, হায়বসু ঙমদে হায়বসি য়াবিবরা ? মখোয়না ‘সলামালেগুম’, ‘মালেগুম সলাম’ নচিংবা শমজিল্লগা হায় হায়বসি য়াবিনীংদবরা ? হৈবী মহী তৈরিঙৈগা গ্লেসরিন তৈরকঙৈগা খেন্নবা খরদং লৈফম থোক্তব্রা ? ঙসি-ঙসিদা ইমাম, অলিম, মৌলানা, মৌলৱীশিংনা খঙবা ইসলামগা মীচম লৌমী অমনা খঙবা ইসলামগা চাংদা চপ মান্নৈ হায়দুনা দাবি তৌবিগদৌরিবরা ? অদোম্না তাকপীরিবসি, মীতৈ পাঙনদা ইসলামনা অসি য়ৌনা চাওখতলবা মতমসিদফাওবা চুম্না হায়বা ঙমদবা মী মশীং য়াম্না লৈ হায়বিরোইদৌরিবরা ?

৮. হিজম অঙাংহলগী ‘জহেরা’গী মতমদগীনা হৌজিক ফাওবগী মীতৈ পাঙন খুনাইদা ইসলামগী চাওখতপা মশক অমফাওবা উবা ফংবিদবরা ? ঙসি চাওখতলিবা ইসলামগী থাক অসিগা জহেরাগী মতমগা চপ মান্নৈ হায়বিগদৌরিবরা নত্ত্রগা খাগেম্বা মতমগা মান্নৈ হায়বিগদৌরিবরা ?

৯. ‘লাইবক থীবনি ৷ শান্তিদাস গোষাইগী মতম অমসুং মাগী মতুংদা পাঙন মাংলুরে ৷ হোদাম্বনা থিজিনবিবদা তাংকক অসিসু থেংনবিগনি’ ৷ অদোমনা থিজিনবিবদা ‘মাঙলুরে’ হায়বা থেংনবিরগদি ‘মণিপুরদা ইস্লাম মূতলুবা মতম লৈখিদ্রি’ হায়না চিঠি ইবিরকখিবনা করিগীনো ? হোদাম্বা-না থিজিনবদা ৱাতপদি ময়াম অমা লৈগনি, হৌবু নীংথিনা হৌগতত্রি হায়বা য়াই, অদুবু ‘মাঙলুরে’ হায়বদি থেংনজদে ৷ মূতথরুরে, শিথরুরে, মুন্না খঙজিল্লুদরে হায়বদি থেংনজখি ৷ অদোমগী ৱারোলসি অদোমগী মরৈগা তায়োন্নবা ওইনা থোকই হায়না খঞ্জৈ ৷

১০. তানজৌ মৌলৱীদগী হানবা মৌলানা লৈবা য়াদে  ৷ তানজৌনা হানদবা য়াদে – হায়বনচিংবা হোদাম্বা-গী দাবী লৈজদে ৷ হানবদুনা অহানবনি ৷ হোদাম্বা-না ফংজবদা তানজৌনা অহানবনি ৷ মহাক্না উত্তর প্রদেশকী রামপুর জিলাদা লৈবা মাদ্রাসা অমদগী মৌলানা পাস তৌদুনা থোরকখিবনি ৷ (অকক্নবা চহী থিজিন্নীংঙাই লৈরি) মীতৈ পাঙনগী মনুংদা মৌলানা পাস তৌবসি তানজৌ মৌলৱী (অব্দুল জলিল) না অহানবনি হায়না য়ানরি ৷ ইরোংগী চেশম শাগৈদা পোকখিবা এবাদুল্লাসু বাংলাদেশরোমদা তম্লম্মি হায়বদি তাজরে ৷

মতাং অসিদা অদোম্না লৌখতপীরিবা ‘টর্কো আফগানগী চাদা-নাউদা’ হায়রিবা লাইরিক অসি মখা তানা চুমথোক্নীংঙাই লৈবা লাইরিক অমনি হায়বা থমজরি ৷ লাইরিক অসি মীতৈ পাঙন মীয়াম্না থিংজিনখিবা লৈখি হায়নসু তাজখিবনি ৷

লাইরিক অসিদা য়ূম্ফম ওইরগা মখাগী ৱারোলশিংসি থমজরি-

১. এবাদুল্লানা মৌলানা পাস তৌখিবদি ১৮৭১ দনি

২. তানজৌনা পাস তৌখিবনা ইং ১৮৭৬ তনি

৩. এবাদুল্লানা পাস তৌরবা মতুং কাছাড়দা নুপী লৌরগা চহী ১৪ রোম লৈথরম্মী

৪. তানজৌনা পাস তৌখিবা চহী অদুমক্তদা মণিপুরদা থোক্তুনা মৌলৱী ওইখি ৷ (লাঃ ২০৪-২০৬)

মতাং অসিদা, এবাদুল্লানা কাছাড়দা চহী ১৪রোমতমক লৈরম্বনি হায়বা ৱাফম অসিগা তানজৌনা মৌলানা পাস তৌবা চহীদা মণিপুর থোক্তুনা মৌলৱী ওইখি হায়বা ৱাফমশিং অসিগসু অমুক মখা তানা থিজিন্নীংঙাই লৈরি ৷ অদুম ওইনমক, অদোম্না পনবিরিবা লাইরিক অসিগী একাউন্ট অসিমক্নসু মণপুরগী অহানবা মৌলৱীসি তানজৌনি হায়বদা শৌগতলি ৷

১. এবাদুল্লানা মৌলানা পাস তৌবা চহী ১৮৭১ ৷ নুপী লৌরগা কাছাড়দা লৈথবনা চহী ১৪ ৷ অদু ওইরবদি এবাদুল্লানা ইং ১৮৮৫ ফাওবা কাছাড়দা লৈরম্মী ৷

২. তানজৌনা পাস তৌবা ১৮৭৬ মক্তদা মণিপুরদা থোক্লগা মৌলৱী ওইখি হায়রিবনিনা মহাক্না এবাদুল্লাদগী চহী ১০রোম হান্না মণিপুরগী মৌলৱী ওই ৷ (মীতৈ পাঙনদা মৌলানা পাস তৌবা অহানবসি এবাদুল্লানি হায়রবসু মহাক্না ইং ১৮৮৫দা মণিপুর চঙদুনা অনীশুবা মৌলৱী ওইখিবনি হায়বা তাই ৷)

লাইরিক অসিগী লামায় ২০৬তা তানজৌ মৌলৱী মণিপুরদা পোকপনি হায়না ইরিবসি ওইনা অদোম্না খঙবিরবদি অদোম্না অমসুং অতৈ পাঙনশিংনা তানজৌবু কয়াম চুম্না খঙবিরিবগে ? মৌলানা অব্দুল জলিল (তানজৌ মৌলৱী)গী শম্লপ্পা পুন্সি ৱারী খঙবীনীংলবদি ‘নৈনরোল’ ৫শুবা মশীং, আগষ্ট ২০, ২০১০ ইংগী ইশ্যুদা মোইজিং হুসেন অহমদ-না ইবিখিবদু পাবিনবা হায়জরি ৷ এবাদুল্লা-গী পুন্সি ৱারীসু পাজনীংই ৷ পাবা ফংহনবীগনি হায়নসু থাজরি ৷ থিজিনবগী লম্বীদা অস্বাইফাওবনা লোইরে হায়বসু লৈবা নত্তে ৷

মীতৈ পাঙনগী মরমদা খঙনবা হোতনবা খোঙজংদা অদোমগী অচৌবা খূদোল লৈগনি হায়না নীংজরি ৷ ‘ইচেম্মা’নসু মতেং পাংবিগনি হায়বগী থাজবা থমজরি ৷ থাগতচরি ৷

থাগতচরিবা

এন দি হোদাম্বা