পুৱারী হায়বসী তোঙান-তোঙানবা মশক অহূমদা ফংই। অহানবগী অদুনা নিংথৌ
অমসুং অঙম-অথৌশিংগী মরমদা মখোয়গী য়াথং মখাদা ইবা পুৱারী, অনীশুবা অদুনা লান্না
ইশিল্লকপা নত্ত্রগা শন্দোরকপা পুৱারী অমসুং অহূমশুবা অদুনা লাচনবিদনা লৈরিবা পুৱারীগী
মশক অসীনি। নিংথৌরোল লম্বুবা, চৈথারোল কুম্বাবানচিংবসী অহানবা মখলগী
পুৱারীগী মশক অসীনি। শেনবী মুকাক্লৈ অমসুং মীতম্বালনচিংবা অসীনা অনীশুবা মখলগী
পুৱারীগী মশক অসীনি। য়েন্দ্রেম্বম কুঞ্জলাল সিংহগী খেলেন্দ্র সুবেদার হায়রিবা
লাইরিক অসীদা য়াওরিবা ৱারীশিং অসীনা অহূমশুবা মখলগী পুৱারীগী মশক ওইনা লৈরম্বদগী
খোমজিল্লক্তুনা উনম তৌথোরকপা মশক অদুনি।
মণিপুর অমসুং মণিপুরগী মপান্দা অহূমশুবা মখলগী পুৱারীগী মশক অসী
মরাং কায়না কোয়চাই চাইনা লৈবা অসী ঐখোয়না উবা ফংই। খোমগত্তুনা লাচনবগী থবক তৌবা
হায়বসী তরাই-তরাইবা থবক অমদি নত্তে। অদুম ওইনমক, তরাইদবা থবক অসীদা চুম্না, পূকচেল
শেংনা অমসুং থৱায় য়াওনা কত্থোকপা অমগা লোয়ননা পায়খৎলকপা ওইরবদি মদুগী অফবা মহয়না
অনীশুবা মখলগী পুৱারীগী অরানবশিং অদুফাওবদা অচুম্বা মায়য়োন অমা পীবা ঙম্মী।
খেলেন্দ্র সুবেদার হায়রিবা পুৱারীগী চরিত্র অসীবু দ্রামাগী চরিত্র
ওইনা শক্নাইরবা দ্রামা ইবা মৈত্রম বীরনা মহাক্কী বীর টিকেন্দ্রজিত ইরকপা মতমদদি অচুম্বা মশক্কা ইতায় তায়য়োন্নবা চরিত্র
ওইনা য়েক্লকই। অপাবা অমদি অতাবা মীরোলনা দ্রামা অদুগী খূত্থাংদা সুবেদার
খেলেন্দ্রবু খঙবা অসীনা অমত্তা ঙায়রবা মরম ওইবনা দ্রামা অদুনা য়েক্লিবা লমচৎ অদুমক
পুৱারীগী লমচৎ ওইনা লৌরুই। অদুবু মৈত্রম বীরনা মহাক্কী বীর টিকেন্দ্রজিত দ্রামাদা য়েক্লকপা সুবেদারগী মশক অসীগা সুবেদারগী
অশেংবা পুন্সীগদি তায়য়োন্নরে হায়বসী হন্দক কুঞ্জলালগী থিজিন-হূমজিন্দুনা পুথোরকপা
লাইরিক অসী পারগা খঙবা ঙম্মী। কুঞ্জলাল মশানসু মহাক্কী লাইরিককী লামায়
হাংদোকপীদ্রিঙৈ হায়বসীদা পল্লি- ‘মৈত্রম বীরনা মাগী দ্রামাগী খোঙফম চেৎনবা হোৎনবদা
সুবেদারবু মরন্নাই ওইনা উখি।’ অমুক্সু লামায় ৮১ দা হায় ‘মৈত্রম বীরদি অঙকপা ক্রিয়েটিব
রাইতরনি। নহারোল হৌগৎলকপশিংদি মাগী টিকেন্দ্রজিত দ্রামাসী ইতিহাসনি হায়দুনা অদুম
পারে।’
অসুম্না পুৱারীগী চরিত্রবু দ্রামা নত্রগা হন্না ইথোকপা টেক্স নত্রগা
লীথোকপা ৱারীদা মশাগী মরন্নাই ওইবা মীৎয়েং হাপচিন্নদুনা লান্না মশক শাগৎনবা হোৎনবসী
ইনিংথৌ পামহৈবগী পুন্সীদসু থোকখি, ইনিংথৌ চীংথঙখোম্বগী পুন্সীদসু থোকখি। মখা
চত্থনা ইনিংথৌ চুরাচান্দ অমসুং ইনিংথৌ বোধচন্দ্রগী পুন্সীদসু থোকখ্রিবদুনি।
মসীশিংসী অনীশুবা মখলগী পুৱারীগী মশক ওইনা শাগৎনরকপা ঙাক্তনি।
অদুম ওইনমক, কুঞ্জলালনা মহাক্কী লাইরিক খেলেন্দ্র সুবেদার
অসী অনীশুবা মখলগী পুৱারীগী মশক ওইনা শাগৎখ্রবা ৱারী লীখুন অদুগী শেংদোক-ৱারোল
ওইনা ইবমক্তি নত্তে হায়বসী উবা ফংই। মহাক্না ইরিবা অসীদি ময়োল অমসুং মতাই
হোংদোক-হোংজিন তৌদুনা শাগৎপা খূৎইনি হায়বসীনি। খূদম ওইনা হায়রবদা, ঈং ১৮৯১ গী এংলো
মণিপুর ৱার অসী টিকেন্দ্রজিততা ময়োল ওইবা মীৎয়েং থম্মি অমসুং থাঙ্গাল জেনরেলনা
তুংদা ইন্নবা উই অদুগা খেলেন্দ্র য়াওনা অতৈনা মতাইদা থম্মী। খেলেন্দ্রদি মৈত্রম
বীরনা ভিল্যেন ওইনা শাগৎলকই। মায়গৈ অমরোমদা, খোংজোম লানগী মতাং পল্লকপদা পাউনা
ব্রজবাসীনা ময়োলদা লৈ অদুগা চীংলেনসনানা তুংদা ইন্নরগা অতৈনা মতাইদা লৈ। ময়োলদা
লৈরম্বা য়ুবরাজ টিকেন্দ্রজিত অসী মাইনু পেমচানা ময়োল ওইবা ৱারীদদি মতাইদা লৈবা
ভিল্যেন ওইনা উবা ফংই। মতৌ অদুগুম্না পাউনা অমসুং চীংলেনসনাখোয়না ময়োলদা লৈবা
মতমদা টিকেন্দ্রজিত অমসুং থাঙ্গালহোয়না মতাইদা লৈখি। মিসেস গ্রিমউদনা ময়োল ওইবা
ৱারীদসু অতৈনা মতাইদা লৈখিবা ঙাক্তনি। মীৎয়েং অসোমদগী কুঞ্জলালনসু মৈত্রম বীরনা ঈং
১৮৯১ গী এংলো মণিপুর ৱারদা টিকেন্দ্রজিতপু ময়োল ওইবা মীৎয়েং থম্লগা অতৈনা মতাইদা
থম্লগা ভিল্যেন ওইনা শাগৎপীখ্রবা খেলেন্দ্রদা অমুক ময়োল ওইহন্দুনা পুৱারীগী মশক
ওইনা খোমজিল্লকপনি হায়বসীনি।
কুঞ্জলালগী লাইরিক অসীনা অনৌবা ৱারোলশিং কয়া অমা মরাং কায়না খোমজিল্লক্লি,
মখোয়শিং অসী অমুক ফাওবা লীথোকখিদ্রিবা ৱারী ঙাক্তনা অয়াম্বনি। ময়ামগী মনুংদা মরু
ওইবা ১০ দি-
১. শিলচরদা নিংথেম পুখ্রি অমা লৈ হায়বসীনি। পুখ্রি
অসীবু বেঙ্গলিশিংনা রাজার তলাব হায়না
খঙনরম্মী। পুখ্রি অসী লানফা ওইরবা মীতৈ নিংথৌ মচাশিংনা তৌরম্বনি। খেলেন্দ্রগী
লোয়নবী নিংথেম নিঙোল তরুনিসনানা চৈরাক পুদুনা থবক শূরিবা (মীতৈগী মীৎয়েংদা
নিংথেমচাবু থবক শূহনবা হায়বসী অরোইবা থাক্তা ঈকাইবা পীবনি) মবুং-মৌপ্বা,
মখুরা-মতোনশিংবু খেচ্রি হৌদুনা পীজখিবগী পূক্নীং নুংশিনীংঙাই ওইবা পুৱারীগী শক্লোন
অদু লাইরিক অসীদা লাচল্লকই।
২. খেলেন্দ্রগী
মপূং ফাবা পুন্সীগী মশক অমা লাইরিক অসীদা উবা ফংই।
৩. খেলেন্দ্রগী
লোয়নবী তরুনিসনা অসী কনানো হায়বা খঙবা ঙম্বা অসীনি। মৈদিংঙু পামহৈবনা ঙৌব্রাম সাই
পোকই, ঙৌব্রামনা নোংচূপ লমগাই ঙম্বা ভদ্রসিং পোকই, ভদ্রসিংনা দেবেন্দ্র মহারাজ
পোকই, দেবেন্দ্রনা গোকুলসনা পোকই। তরুনিসনাসী গোকুলসনানা কছাড়-গী বোরবিল নিঙোল
হাওরোংবম চনু রজনিদা পোকপনি।
৪. টিকেন্দ্রজিতকা
খেলেন্দ্রগা নিঙোল মরীদা মশেন-মবাই থোক্নৈ হায়বসী লাইরিক অসী পাবদগী খঙবা ঙম্মী।
চহীদা খেলেন্দ্রনা চহী ৮ রোম হল্লবসু নিঙোল তরুনিসনা অসী শাগৈ মরীদা
টিকেন্দ্রজিতকী মচল থোকপনা মরম ওইরগা খেলেন্দ্রনা টিকেন্দ্রজিততা ইবাই কৌই
হায়বসীনি।
পামহৈবা
শ্যাম
সাই ঙৌব্রাম
সাই
চীংথঙখোম্বা ভদ্রসিংহ
গম্ভীরসিংহ দেবেন্দ্র
চন্দ্রকীর্ত্তি গোকুলসনা
টিকেন্দ্রজিত তরুনিসনা
৫. মৈত্রম
বীরগী দ্রামাগী খূত্থাঙদগী চুম্মী-লাল্লি হায়বা খঙদনা খেলেন্দ্র সুবেদারবু হন্থবা থাক্তা মরাল শীবিদুনা তূকৎচনীংঙাই ওইবা
লমচৎ ওইহল্লি। অদুবু তশেংনা মরাল লৈরবা সুবেদার
মোইরাং তোঞ্জাউবুদি ঊৎ-ৱাইনা কূপতূনা থম্লি হায়বসী কুঞ্জলালগী লাইরিক অসীনা
সেবাক ফাক্লগা উহল্লক্লি। (খেলেন্দ্র সুবেদার অমসুং তোঞ্জাউ সুবেদার অনী অসীগী
মথক্তা ৱায়েল চত্থবা খূৎই অমা ইবদা পূক্নীং চিংশিন্নীংঙাই ওইগনি নীংই।)
৬. এংলো
মণিপুর ৱারগী তুংদা মণিপুরগী নিংথৌ চুড়াচান্দনা ওইবসীদা হকথেংননা অমসুং নাকোইননবু
ওইরবসু খেলেন্দ্র সুবেদারগী খূৎ য়াওই হায়বসীনি। মসী মহাক্কী নুপী মরীরোমগী কাঙবুবু
শৌগৎলম্বগী মশক অমরা হায়বসী খন্ননীংঙাই ওই। ইনিংথৌ চুড়াচান্দগী পুন্সীনা খেলেন্দ্র
অমদি মহাক্কী ইমুং-মনুংবু মতম পূম্নমক্তা মমল লৈনা লৌখিবা অসীনসু খূদম ওইবা য়াই।
ভদ্রসিং
নরসিংহ দেবেন্দ্র
ভূবন গোকুলসনা
চাউবীয়াইম তরুনিসনা
চুড়াচান্দ
৭. নিংথৌ
ওইদ্রিঙৈ মমাঙগী অঙাং ওইরিঙৈ ইনিংথৌ চুড়াচান্দগী পুন্সী অসী কছাড়গী ললাং খুঙ্গংদা
লৈরম্মী। খুঙ্গং অসীদা মপাবুং চাউবীয়াইমা লৈখিদবনি হায়না কুঞ্জলালনা হায়নবা হোৎনরিবা
অসী ইনিংথৌ অসীনা ললাংদা খোঙলেংবীরক্লগা নিংথেম
কির্ত্তন কৎপীরম্বা অদুনসু মপাঙ্গল হাপ্পী। ইনিংথৌগী অঙাং ওইরিঙৈ ললাংগী
পুন্সী অসী য়াম্নমক ৱানা লেনখি হায়বা ৱারী শীংবুল কয়া অমসু লৈরি। অপোকপী মমা ইবেম
ললিত মঞ্জুরিনা অঙাংশিং চাউনবা য়োক্নবা হোৎনবদা টিকি ফাওবা শাখি। মরম অদুনা
চুড়াচান্দ মহারাজনা নিংথৌ ওইখ্রবা মতুংদা কছাড়দগী মীয়াম্না টিকি শাবীগী মচা ফাওবা হায়না খঙনখিবগী ৱারী লীখুন লৈরি।
৮. খেলেন্দ্র
সুবেদারনা য়ুবরাজ টিকেন্দ্রজিতপু ফানবা হোৎনবগী লাক্ন-ফানবা তাঞ্জা অমদা সুবেদারনা
য়ুবরাজবু মখোঙনা কাওখি হায়বা ৱারী অমসু য়াওরক্লি। হন্দক্কী নিংথেমচা অমদা মখোঙনা
কাওরুবা অসীদা নিংথেমনা ৱারৌদুনা বিয়াধী
থুংলো (অঙৌবা পক্লো/ ঊনশা পৎপগী অনাবনা নাদুনা শিরো) হায়দুনা অভিসাপ তৌরম্মী
হায়রি। অভিসাপ অদু লেম্না মাঙখিদে, সুবেদারগী পুন্সীদা থুংখি অমসুং মদুনা পত্তুনা
মপুন্সী লোমখি হায়দুনা লান্না তোকঙা শন্দোকপীখিবগী মতাংসু লৈখি। অদুম ওইনমক,
সুবেদারগী পুন্সীদা করিগুম্বা মখল অমত্তগী লায়না পকখিবা লৈখিদে হায়না কুঞ্জলালগী
লাইরিক অসীনা শেংদোরক্লি। মসেন বাগেশ্বরদা মফি থাঙ্গত্তুনা ‘ঐবু অঙৌবা হায়বদু
পকপ্রা অমুক্তদি য়েংঙুসে’ হায়রগা য়েংহনখিবা মতাংগী ৱারী পল্লি। খেলেন্দ্র
সুবেদার চহী ৯৫ পুন্সীরম্মী।
৯. বিলাতকী
নিংথৌ কিং জোর্জ-V
না নিংথৌ ওইরকপা চহী ২৫ মপূং ফারকপগী হরাও-তয়াম্বা ফোঙদোকপদা খেলেন্দ্র সুবেদারদসু
মেদেল অমা শকখঙ-চেগা লোয়ননা ইং ১৯৩৫ (মতমসিদা খেলেন্দ্র মশাগী চহী ৯২ রোম শুরে) দা
য়ৌহল্লকখিবা অসীমকসু শীংথানীংঙাই অমনি হায়না লাইরিক অসীনা লৌরি।
১০. মৈত্রম
বীরনা মহাক্কী দ্রামাগী খূত্থাংদা খেলেন্দ্র সুবেদারবু মণিপুরী খূদিংমক্তা তূকৎচহনবা
ঙমখ্রবসু মপান মণিপুরগী মণিপুরীশিংগী মনুংদা বৃটিশ সিফাইগী গন সেল্যুটকা লোয়ননা
অরোইবা সংষ্কার তৌখিবা মীতৈ মচাদি খেলেন্দ্র সুবেদারনা অহানবনি / মতোমতনি হায়বসী
কুঞ্জলালগী লাইরিক অসীনা পাউদম্লি।
লাইরিক অসীগী অইবা কুঞ্জলালগী তোপ-তোপ্পা রাইতিং ষ্টাইল অমা লৈ। মসী
সরাংথেম বরমণিগী মীতৈ নিংথৌরোল পাবদা
মরক-মরক্তা থেংনবা মতৌ অদু নীংশিংহল্লি। মখোয় দ্রামা ইবা ক্রিয়েটিব রাইটর ঙাক্তনি।
মরম অদুনা মশাগী ওইবা কল্পনাগী মশক অমগা ইতিহাসকী শরুকশিং অদুগা শমজিন্নহন্নবা হোৎনবগী
খূৎই মশক অসী পাবদা হেন্না নুঙাইহল্লি হায়না লৌবা তাই।
মপান মণিপুরগী মণিপুরী পুৱারীগী লীখুনশিং থিজিনবদা খ্বাইদগী চোকথবা
লৈতনা মাঙলোমদা চঙশিল্লিবা থিজিল্লোয় অমনি কুঞ্জলাল য়েন্দ্রেম্বম। মহাক্না ইবা ৱারেংশিং
অমসুং পাথোকখিবা সেমিনার পেপরশিংদা মহাক্কী কূপ্না থিজিন-হূমজিনবগী মমি নীংথিজনা
তাই। হন্দক লাইরিক ওইনা খেলেন্দ্র সুবেদার
লান্থোরকপা অসীগুম্না অতৈসু অফবা খূৎই কয়া কুঞ্জলালদা লৈ অমসুং হনবা লৈতনা
থিজিন-হূমজিনবগী থবক মখা চত্থরি হায়বসু খঙবা ঙম্মী। খেলেন্দ্র সুবেদারদা মপূং ওইবা
মীৎয়েং থম্লগা লাইরিক অমা শাগৎপা অসীগুম্না বরাক তম্পাককা মরী লৈননা হিজম ইরাবোত,
বোধচন্দ্র মহারাজ, চুড়াচান্দ মহারাজ, নরসিংহ মহারাজ, চৌরজিত, মারজিত অমসুং গম্ভির
সিংহ মহারাজতা নত্তনা ইনিংথৌ চীংথঙখোম্বা অমসুং ইনিংথৌ পামহৈবগা মরী লৈননা
পুৱারীগী লীখুন কয়া হন্না লীথোক্তুনা ইথোকপা য়াই।
খেলেন্দ্র সুবেদার হায়বা লাইরিক অসী মপান
মণিপুরগী মণিপুরীশিংদতা নত্তনা অপূনবা মণিপুরী পুৱারীগী মশক শাগৎপদা য়াম্নমক অচৌবা
মফম কল্লগদবা অফবা লাইরিক অমনি। অসীগুম্বা অনৌবা ইনফোর্মেসন মরাং কায়না য়াওবা অফবা
লাইরিক কয়া অইবা অসীদগী মখা তানা থাজবা থম্বা চুমগনি নীংঙি।
