N D HODAMBA: GOOD FRIDAY: Ibungo KHRISTA JISU-na taaibangpaan-gi paap-ki usin oina thawaai thaabikhiba numit

অশেংবা ঈরাইঃ ইবুঙো খৃষ্ট যিসুনা তাইবংপানগী পাপকী উশিন ওইনা থৱায় থাবিখিবা নুমিত

ৱাহৌদোক

‘গুদ ফ্রাইদে’ হায়বসী খৃষ্টান লাইনীং চতপশিংগী শেংথোইরবা নুমিত অমনি৷ নুমিত অসীদা ঈশ্বরগী মচানুপা ওইনা তাইবংপানসিদা মীওইবগী শক্তম লৌবীদুনা লাকপীরগা পাপীশিংগী উশিন ওইনা কালবারিগী ক্রোসতা পাং তিংবিদুনা থৱায় থাদোকপীখিবা নুমিতনি৷ ক্রোসতা তাবিখিবা মহাক্কী অশেংবা ঈ অদুগী মপান্না পাপীশিংনা থৱায়দা লোম্বা নাইদনা শিগদবদগী হিংবা ফংজনবা মরম ওইবা অসীনা খৃষ্ট যিসুনা শিবীখিবা ঈরাই নুমিত অসীবু ‘গুদ ফ্রাইদে’ নত্ত্রগা ‘হোলি ফ্রাইদে’ হায়না খঙনৈ৷ নুমিত অসীবু তোঙান-তোঙানবা মফমশিংদা ‘গ্রেত ফ্রাইদে’ নত্ত্রগা ‘ইষ্টর ফ্রাইদে’ নত্ত্রগা ‘লোং ফ্রাইদে’ নত্ত্রগা ‘সাইলেন্ট ফ্রাইদে’ অসীনচিংবা হায়না খঙনবসু লৈ৷ মালেমগী ওইনা লাইনীং-লাইশোনগা মরী লৈনবা হোলিদেশিংগী মরক্তা অমা ওইরিবা ‘গুদ ফ্রাইদে’ অসীবু মীতৈরোনদা ‘অফবা ঈরাই’ নত্ত্রগা ‘অশেংবা ঈরাই’ হায়না খঙনৈ৷

পুৱারীদা অশেংবা ঈরাই

ইবুঙো খৃষ্ট যিসুনা শিবীখিবা নুমিত অসী ঈরাইনি হায়বদা য়ানদবা ৱাফম অমত্তা লৈত্রবসু চহীগী মতাংদা খরনা ৩৩ এদি-নি অদুগা খরনা ৩৪ এদি-নি হায়না থম্বিরম্বা থেংনৈ৷ অদুম ওইনমক, পাখোনচতপা পিতরগী রিফরেন্স (পাখোনচতপা ২: ২০) তা পল্লিবা ‘থাবু ঈ ওলহনবা’ হায়বসীগী মতুং ইন্না য়েংনবদা ইবুঙো খৃষ্ট যিসুনা থৱায় থাদোকপীখিবা নুমিত অসী (lunar Crucifixion darkness and eclipse model দা য়ূম্ফম ওইবা এষ্ট্রোলোজিগী মীতয়েংদগী) ৩৩ এদিগী এপ্রিল ৩, ঈরাই নুমিতনি হায়বসিনি৷ ইবুঙো খৃষ্টনা থৱায় থাদোকপীখিবা নুমিত অসী থাগী খোঙচততা পাবা অমসুং ঈরাই নুমিত ওইবনা মরম ওইরগা চহী খূদিংগী ওইনা ঐখোয়না ফংলিবা ইংরাজি কেলেন্দর অসীগী অকক্নবা নুমিত অমদা ওইদে৷ হন্দক ২০১৪ অমসুং তুংদা লাক্কদবা চহী খরা (২০২০ ফাওবা) গী গুদ ফ্রাইদে নুমিত মখাদা থমজরি-

২০১৪ - এপ্ৰিল ১৪

২০১৫ – এপ্ৰিল ৩

২০১৬ – মাৰ্চ ২৫

২০১৭ – এপ্রিল ১৪

২০১৮ – মার্চ ৩০

২০১৯ – এপ্রিল ১৯

২০২০ – এপ্রিল ১০

খৃষ্টানশিংনা ‘অশেংবা ঈরাই’গী নুমিত অসী খৃষ্টগী ৪ শুবা চহীচাদগী হৌনা নীংশিং থৌরম পাঙথোক্তুনা লাকই৷

বাইবলদা য়াওবা খৃষ্টনা শিবীবগী ৱারী

যিসুগী মনাই ১২ গী মনুংদা অমা ওইরিবা যুদাস ইষ্কারিয়োতনা ইবুঙোবু অথোইবা পুরোহিতশিংদা মমল তীক্নরগা লুপা (শিলভর) গী শেন ৩০ দা য়োন্থোকপীরে (মাত্থি ২৬: ১৪-১৬)৷ অসুম্না তৌগনি হায়বসী ইবুঙোনদি খঙখি (মাত্থি ২৬: ২৩-২৫)৷ মসীগী মতুং ইন্না, শাষ্ত্রগী ৱা থুংননবা লান্মী ময়াম্না ইবুংঙোবু গেতসিমনিদগী ফারে৷ ফারবা মতুংদা চহীদুগী অথোইবা পুরোহিতলেন ওইরিবা কায়াফানা মকুবোক হন্নাগী ময়ূমদা পুরে (যোহান ১৮: ১-১৪)৷ মফমদুদা ৱাহং-পাউহং চত্থবা মতমদা ইবুঙো খৃষ্টগী মায়োক্তা মীনম্বা অমসুং অরানবা শাক্ষি পীবিনবা মী থিরম্মী৷ ময়াম্না হায়বশিংদু শীংথানীংঙাই ওইরমদে, কোন্নথংদা ময়ামগী মরক্তগী অনী থোক্তুনা ইবুঙোগী মায়োক্তা মীনম্বা অমসুং অরানবা শাক্ষি পীবা হৌরম্মী৷ মীনম্বা অমসুং অরানবা শাক্ষি অদুবু শৌগতলদুনা পুরোহিতলেননা ইবুঙোদা মরাল শীরম্মী অমসুং ময়াম্না শীরিবা মরালশিং অদুদা ইবুঙোগী পাউখুম ঙাইরম্মী৷ ইবুঙোনা ‘মীগী মচানুপা অদুনা মতীক চাউবগী য়েতথংবদা ফম্বা অমসুং স্বর্গগী লৈচিন্দা লেঙলকপা নখোয়না উগনি’ হায়রবদা ‘ঈশ্বরবু থীনা চৈরে’ হায়দুনা মরাল পীশিল্লগা মহাক্কী ফংফম থোকপা ৱায়েল অদু মীয়ামদা হংলে৷ মদুদা মীয়াম্না ‘মহাকপু হাতপা মতীক চায়’ হায়রগা তিন শীতচিনবা, খূদুম্না শুবা অমসুং খূপাক্না থাদুনা লঙনবিরে৷ অসুম্না ময়াম তানদুনা যিসুবু হাতননবা লৌরোন তৌরগা রোমগী লৈবাক ঙাকপা মপু পিলাত (Roman governor Pontius Pilate)কী মাঙদা ইবুঙোবু ৱায়েন্নবা পুখতলে৷

মায়গৈ অমরোমদা, শেল লৌদুনা ইবুঙোবু পুরোহিতশিংদা পীথোক্লুবা অদুনা, লাঞ্জদবদা মরাল লৈহনবা ওইহল্লে হায়বা মহাক মশাগী তূকতচনীংঙাই ওইরবা মরাল যিহুদা ইষ্কারিয়োত মশানা খঙজরক্তুনা পুরোহিতশিংদা লুপাগী শেন ৩০ অদু হন্দোক্লম্লগা মশা মতোমতা ঙাকপীবা ঙমজদদুনা থৌরী য়ান্দুনা শিদোকচখি৷

পুরোহিতশিংনা কল্লকপদগী যিসুবু মরাল লৈহনবনি, যিসু মশাগী মরাল অমত্তা লৈতে হায়বসী ৱায়েন মপু পিলাতনা খঙলম্মী৷ মহাক্না যিসু অসী গালিলগী মীনি হায়বা খঙলবদা জেরুজলেমদা লৈবা গালিলগী লৈঙাকপা নিংথৌ হেরোদ (King Herod, the ruler of Galilee) কী মফমদা অমুক থারম্মী৷ হেরোদনসু ৱাহং-পাউহং তৌবদা মরাল অমত্তা ফংলমদে অদুনা যিসুবু পিলাততা অমুক হন্না থারক্লম্মী৷ পিলাতনা তিল্লিবা মীয়ামদা ‘নুপা অসীগী মরাল হেরোদনসু অমসুং মহাক্নসু ফংদে, নখোয়না থৈজিল্লিবা মরালশিং অদু মাঙোন্দা ফংদে, শিবা য়াবা লঙজবা অমত্তসু মহাক্না তৌখিবা লৈতে, মরম অদুনা মহাকপু চৈরাক খরা তৌরগা থাদোক্লগনি’ হায়না পুরোহিতশিং অমসুং তিল্লিবা য়িহুদি মীয়ামদা লাউথোক্লম্মী৷ মতম অদু চাকখাঙবা মতম ওইবনা মী অমবু থাদোকপসু য়ারম্মী৷ মদুদা ফতখিদ্রবা, ওক্তবা, মীহাতপনচিংবা মরাল কয়াগীদমক ‘কৈশুমশঙদা লৈরিবা বরব্বা-বু থাদোক্লগা যিসুবু পাং তিংদুনা হাতলু’ হায়না পুরোহিতশিংনা ঈনশিন্দুনা মীয়াম্না খোঞ্জেল ৱাংনা হৌনা নিল্লম্মী৷ পিলাতনা ফনা য়াম্না ‘মী অসীগী মরাল লৈতে’ হায়রবসু মখোয়না ‘ক্রোসতা পাং তিংদুনা হাতলু’ হায়না কন্না-কন্না লাউশিনবা অদুনা ঙম্লম্মী৷ মরম অসীদগি পিলাতনা বরব্বাবু থাদোক্লগা যিসুবু পাং তিংদুনা হাতনবা মখোয়দা শিন্নরম্মি (লুক ২৩: ১-২৫)৷

ৱায়েলগী মতুং ইন্না ইবুঙোনা মহাক্কী পাং তিংনবা উ-কারন পাং (ক্রোস) অদু মশানা পুজরম্মী৷ মহাকপু হিব্রু লোনদা গোলগোথা অমসুং লেটিন লোনদা কালবারি কৌবা লুকংগী লমদা পুরগা অতোপ্পা মী অনীনা মতাই-মতাইদা থম্লগা যিসুনা ময়ায়দা থমদুনা মখোয় অহূমবু পূন্না পাং তিংলম্মী৷ পাং তিংলিবা যিসুগী ক্রোস অদুগী মথক্তা পিলাতকী য়াথংনা থেতহনবা ৱারোল অদুদি ‘নাজরেথকী যিসু য়িহুদিশিংগী নিংথৌ’ হায়বা ৱারোল অসীনি, ৱারোল অসী মফমদুদা লাকপা মীয়াম্নসু পারে৷

ইবুঙো খৃষ্ট যিসুনা ক্রোস মথক্তা পূং ৬ লৈবিরম্মী৷ অকোনবগী পূং ৩ হায়বদি নুমিত য়ুংবদগীনা নুংথিল পূং ৩ ফাওবা অসীদা মফম অদু মমশিল্লক্লম্মী, অরোইবা পূংফমদা যিসুনা হৌনা ৱাহৈ খরা হায়দুনা লাউরম্লগা থৱায় থাদোক্লম্মী৷ ইবুঙোনা থৱায় থাদোকপা মতম অসীদা নীংনশঙগী লৈরম্বা মায়খন-ফি অদু তঙখায় তানা মথক্তগী মখা ফাওবা শরুক অনী থোক্না শেগায়রম্মী, য়ুহা হাদুনা লৈপাক কন্না নীক্লম্মী, নূংজাউ পোখায়রম্মী, মোংফম হাংদোক্লম্মী অমসুং শিখ্রবা অশেংবা মী কয়া হিংগতলক্তুনা অশেংবা শহরদা চঙদুনা মীশিংদা উহল্লম্মী৷ অসীগুম্বা অঙকপা ময়াম অসী উরবদা লান্মী ১০০গী মপূগা যিসুবু শঙবা মহাক্কা লোয়নবশিংনা কিরদুনা হায়রকখি – ‘অওইবমক মী অসী ঈশ্বরগী মচা নুপানি’ (মাত্থি ২৭: ৪৫-৫৪)৷

যিসুনা ক্রোসতা লৈরিঙৈদা হায়রম্বা ৱাহৈশিং

১. হে ইপা মখোয়বু কোকপীয়ু, মরমদি মখোয়না করি তৌরিবা মখোয়না খঙজদে৷ (লুক ২৩: ৩৪)

২. ঐনা নঙোন্দা থাঙৈশেংনা হায়রিবসিনি, ঙসি নঙ ঐগা লোয়ননা পারাদাইসতা লৈমিন্নগনি৷ (লুক ২৩: ৪৩)

৩. হে নুপী, য়েংউ, নচানুপা ... য়েংউ নঙগী নমা৷ (যোহান ১৯: ২৬-২৭)

৪. এলোই, এলোই, লামা শবক্তানি ( ঈশ্বর, ঐগী ঈশ্বর, ইবুঙোনা ঐবু করিগী হুন্দোকপীবগে)৷ (মাত্থি ২৭: ৪৬ অমসুং মার্ক ১৫: ৩৪)

৫. ঐ খৌরাংই৷ (যোহান ১৯: ২৮)

৬. লোইরে৷ (যোহান ১৯: ৩০)

৭. হে ইপা ইথৱায় ইবুঙোগী খূত্তা শিন্নজরে৷ (লুক ২৩: ৪৬)

যিসুনা ক্রোসতা থৱায় থারবা মতুং

ময়াম্না লান্না শাগতনবা ৱাখল অমসুং ফত্তবা তৌবা য়াদবা অহল্লূপতা য়াওদুনা ঈশ্বরগী লৈবাক ঙাইরিবা এরিমেথিয়াগী যোসেফ কৌবা ধর্ম্ম চেনবা নুপা অমনা পিলাতকী মফমদা চঙজদুনা যিসুগী হকচাং অদু নিজরম্মী (লুক ২৩: ৫০-৫২)৷ যিসু শিরে হায়বা তাবদা পিলাত ঙক্লম্মী অমসুং লান্মী ১০০গী মপু অদুদগী অশেংবা অদু খঙলবদা পিলাতনা যিসুগী অশিবা হকচাং অদু যোসেফতা পীনবিরম্মী (মার্ক ১৫: ৪৪-৪৫)৷ যোসেফতা শিন্নদ্রিঙৈদা লান্মীশিংগী মরক্তগী অমনা যিসুগী পূক্নোপতা তানা থিল্লে অমসুং মদুদগী ঈগা ঈশিংগা থোরক্লম্মী (যোহান ১৯: ৩৪)৷ তুংদা লৌথরগা যিহুদিশিংগী চতনবী মতুং ইন্না অনানবা লীমোন ফি অমনা য়োম্লগা মী কনা অমত্তা থম্নদ্রিবা নূংদা হূত্তোক্লবা অহাঙবা মোংফম অদুদা ইবুঙোবু থম্লে৷ ইবুঙোগা লোয়ননা গালিলদগী লাকপা নুপীশিংনসু ইবুঙোবু মতৌ করম্না থম্বগে হায়বদু য়েংবা লাক্লে (লুক ২৩: ৫৩-৫৫)৷ মায়গৈ অমরোমদা, নিকোদিমসনা গন্ধরসকা অগুরুগা (myrrh and aloes) য়ান্নবা পোত সের য়াঙ্খৈরোম পুরকখি (যোহান ১৯: ৩৯)৷ নুপীশিং অদুনা হল্লক্তুনা মনম নুংশিবা পোত অমসুং তৈনথাউ থৌরাং তৌরে৷ মতমদু যিহুদিশিংগী থৌরাং লাঙবা (সবাত) মতম ওইবগী য়াথং মতুং ইন্না যিসুবু মোংফম অদুদা থম্লগা মোংফম অদুগী থোঙদা নূংজাউ অমা ওনশিল্লম্লগা চত্থোক্নখিদুনা পোত্থানখ্রে৷ অদুবু নুপীশিংগী মরক্তগী মগদলিনি মরিয়ম অমসুং অতোপ্পা মরিয়ম অদুনা মোংফম অদুগা মায়োক্ননা ফম্লগা লৈহৌই (মাত্থি ২৭: ৬০-৬১)৷

ইবুংঙো খৃষ্ট যিসুনা হুম্নিসুবদা অমুক হিংগতপা

যিসুনা শিরবা মতুং হুম্নি শুবদা অমুক হিংগতকনি হায়বা পুরোহিতশিংনসু খঙবা মরমনা যিসুগী মনাইশিংনা লোন্না পুথোকখ্রগা অমুক হিঙ্গতলে হায়না নমথাক তৌরক্কনি হায়বগী চিংনবা লৈবদগী পিলাতকী মফমদা চঙজরগা য়াথং লৌদুনা মোংফম ওইরিবা সুরুংগী মমায় অদুদা মোহর নম্লগা মী ঙাকহনখি (মাত্থি ২৭: ৬২-৬৬)৷ ফনা চেকশিন্না ঙাক্লবসু শাষ্ত্রগী ৱা অদু থুংনবা সবাত মতুং চয়োলগী অহানবা নুমিত (নোংমাইজিং), ইবুঙোনা শিবিখিবা নুমিতকী হুম্নিশুবদা অশিববু খূদুম চন্দুনা ইবুঙো মহাক্না অমুক হৌগতপীখি (মাত্থি ২৮: ৬)৷

ইবুঙোনা শিবিবা অমসুং হৌগতপা অসিনা তম্বীবা

ইবুঙো খৃষ্টনা ক্রোসতা পাং তিংদুনা শিবিবা অসীনা তম্বীরিবসী মরু ওইনা থৱায়গী ‘অরান খুবম’গী মরমদনি৷ মীওইবনা পাপ চেন্দুনা ঈশ্বরগী মতিক মঙান্দগী শোত্থদুনা ফত্তবা লাই সইতানগী মনাই ওইরগা নোরোকতা চতখিবশিংদু ঈশ্বরগীরোমদা অমুক হল্লক্নবা ঈশ্বরগী ওইবা থৌরাং অদু মপূং ফাহনবনি৷ থৌদোক অসী থোক্লগদবা লৈরে হায়বসী মাঙজৌননা মায়চৌশিংগী খূত্থাংদা খঙহনখিবদু শাষ্ত্রদা ময়েক শেংনা লাচন্দুনা লৈখ্রবনি৷ ইবুঙো খৃষ্ট যিসুনা শিবিবা অমসুং অমুক হিঙ্গতপীবা অসীগী মপান্না তম্বীবশিংগী মনুংদা পনবা য়াবা খরদি-

১. যিহুদিশিংগী চতনবীদা মৈ ঈরাতপা অমসুং মদুদা থৱায় পানবা জিব অমা অকতপোত পীবা অসী চতনদুনা লাকই৷ কনাগুম্বনা ঈশ্বরদা লঙজরুবা অমসুং পাপ লঙশিল্লুবগীসু প্রাইশ্চিত ওইনা মৈ ঈরাত্তুনা জিব অমা কতপা অসী চতনরকই৷ মী অমগী পাপ অমগী জিব অমা অদুগা পাপ ১০০গী জিব ১০০৷ জিব অসী ঐখোয়না য়াউ কতপা অসী চতনবী ওইনা থেংনৈ৷ অদুগা য়াউ-না মী অমগী ঙম্বগুম্না তাইবংপানবগী ওইনদি ঙম্বা নত্তে৷ মীওইবা অমনসু ঙমদে মরমদি মীওইবা মহাক পাপ চেল্লে৷ মরম অদুনা পাপ চেন্দবা অমনা পাপ চেনবশিংগীদমক মহূত শিন্দুনা প্রাইশ্চিত তৌবিনবা পুন্সী অমগী কত্থোকপগী তঙাইফদবা লৈবা মতম, থায়নদগী চতনরকপা প্রাইশ্চিতকী মওং অসীনা মপূং ফারক্তবা অমসুং ঙাইহাক্কী ওইবা অসীদগী মতম পূম্নমক্কী ওইবা অকতপোত ওইনা ঈশ্বর মশামক্না মশামকপু ইবুঙো যিসু খৃষ্ট ওইনা তাইবংপান্দা লাকপীদুনা তাইবংপানগী পাপ পুবীবা য়াউ মচা অদু ওইবিখিবনি৷ ইবুঙো খৃষ্ট যিসু অসীমক্না তাইবংপান অসীদা লৈরিবা পাপ অসীগী প্রাইষ্চিত তৌবদা অকতপোত ওইবিরগদবা য়াউ অদুনি হায়না শাষ্ত্রদা পল্লম্বা অদু শাক্ষি পীদুনা ইহান হান্না বাপ্টাইস তৌবিবা যোহাননা ইবুঙো খৃষ্ট খোঙলেংলকপা উবদা হায়খি ‘য়েংউ তাইবংপানগী পাপ পুবিবা ঈশ্বরগী য়াউ মচা অদু’৷ (যোহান ১: ২৯) মহাক্কী মপান্দগী তাইবংপানবগী পাপ অসী কোক্নগদবনি হায়সী ফোঙদোকখিবনি৷

২. তুংদা থোক্লগদবা ৱাফম কয়াগী মনুংদা ইবুঙো খৃষ্ট পোক্কনি, মহাক্না অৱা-অনা কয়া মায়োক্নগনি, মহাকপু পাং তিংদুনা হাতকনি, অদুবু মহাক্কী শরুদি থুদেক্লোই (মতমদুদা পাং তিংদুনা শিরবশিংবু শরু থুদেকপগী চতনবী লৈরম্মী), মহাকপু ফুমগনি অমসুং হুম্নিশুবা নুমিততা অমুক হৌগতলক্কনি হায়বনচিংবশিংসী শাষ্ত্রদা ইরম্মী৷ শাষ্ত্রদা ইখিবা ঈশ্বরগী অনীংবশিংদু লোইনমক থোকখি৷ পোলনসু কোরিন্থিয়গী শীংলূপতা হায়খি ‘...শাষ্ত্রগী মতুং ইন্না খৃষ্টনা ঐখোয়গী পাপকীদমক শিবিরে, মহাকপু ফুম্লে অমসুং শাষ্ত্রগী মতুং ইন্না হুম্নি শুবা নুমিততা মহাক হিঙ্গতখ্রে’৷ (১ কোরিন্থিয় ১৫: ৩-৪)

৩. ঐখোয়না পাপতা তাদুনা সইতানগী কৈসুমশঙদা পাপকী মীনাই ওইনা লৈরিঙৈ অমসুং শিরগা নোরোককী মৈদা মতম পূম্নমক্কী ওইনা চাক্তুনা লৈখিগদবা অদু উবিরদুনা ঈশ্বরগী ওইবশিংদু ঈশ্বরগীরোমদা অমুক হল্লক্নবা মশাবু পূম্নমক্কী হন্দোকমল (থাদোকমল) ওইনা কত্থোকপীরনবা লাকপীখিবা অদু থুংহনবীবনি৷ (মীগী মচানুপা অদুনা মশাবু থৌগল তৌহন্নবা লাকপা নত্তে, অদুবু থৌগল তৌনবা অমসুং ময়ামগী থাদোকমল ওইনা মহাক্কী থৱায় থাদোকপা লাকপনি৷ -মাত্থি ২০: ২৮) মহাক্না মশাবু হন্দোকমল ওইনা শিবিরবা অসীবু খঙলবা অমসুং থাজরবা খূদিংমক্না লেম্না চুমহনবীদুনা ঈশ্বরগী মচা-মসু ওইহনবীবনি৷ ফত্তবা লাই সইতানগী কৈসুমশঙদা লৈরুবগী থাদোকমল পীবিবনি, ঐখোয় হৌজিক ঈশ্বরগী নিংথৌ লৈবাক্তা হল্লকপা য়ানবা লম্বী অদু খৃষ্টগী শিবিবগী মপান্না ফংজরবনি৷ মহাক্কী অশেংবা ঈ-না মমল পীবিরম্বনা মরম ওইরগা সইতানগী কৈসুমশঙ অদু ঐখোয়গীদমক লোনশিন্দ্রে, হাংদোকপীরে৷ ঐখোয় নীং তমজরে অমসুং ঈশ্বরগীরোমদা লাকচবা য়ারে, অপনবা অথিংবা লৈত্রে৷

৪. অসুম্না শিবিবা অসীনা লাই ফত্তবা সইতান (দিয়াবোল)গী থবকশিং, মপাঙ্গল অমসুং থৌরাং পূম্নমক মাঙহল্লে৷ (পাপকী থবক তৌরিবা মী অদু দিয়াবোলদগীনি, মরমদি দিয়াবোলদি অহৌবদগী পাপ তৌদুনা লৈরক্লি৷ দিয়াবোলগী থবক মাঙহন্নবা ঈশ্বরগী মচানুপা অদুবু ফোঙদোকপীরে৷ -১ যোহান ৩: ৮) মহাক্না অসুম্না ফোঙদোকপীদুনা সইতানগী থবকশিং মহী-ময়াই চমহন্নবা অমসুং মাঙহন্নবগীদমক মহাক্না শিবিবা অসী তঙাইফদবনি৷ তঙাইফদবা অদুগীদমক ক্রোসতা পাং তিংদুনা শিবিখিবনি৷ (ইপা পূংফম অসীদগী ঐবু কনবিয়ু, অদুবু মরম অসীগীদমক ঐনা পূংফম অসীদা লাকপনি৷ –যোহান ১২: ২৭) মসী খূদিংমক্সি মপা (ইপা ঈশ্বর) গী অনীংবা অদু পাঙথোকপীরখিবনি৷ (ঐনা ইশাগী অনীংবা তৌনবা স্বর্গদগী কূমথরকপা নত্তে, অদুবু ঐবু থারকপা মহাক্কী অনীংবা তৌনবা কূমথরকপনি৷ –যোহান ৬: ৩৮)

৫. পূম্নমক অসীবু থাজরবা খূদিংমক্না হকচাংদা শিরবসু থৱায়দা হিংবা ফংগনি হায়বগী খূদম ঊতপীবনি৷ অশিববু খূদুম চন্দুনা হিংগতহনবা ঙম্মী হায়বসী লজরস-পু হিংগতহন্দুনা খঙহনখ্রবদুনি৷ মহাকপু ফাবা মতমদা স্বর্গদুত কৌথদুনা লান্থেংনরম্বসু ঙম্লম্বনি, থাঙ শতলবা মনাইবুসু থাঙখুমদা হনজিনহনখিবনি, মনা শোইদতলবা অদু খূনগত্তুনা পানশিনবিখিবা অদুনি৷ মসী পূম্নমক অসী ঈশ্বরগী অনীংবা তৌবা অমসুং হায়বা ইনবা মতৌ অদু নোল্লুকপগা লোয়ননা ফোঙদোকপীখিবনি৷ (ফিলিপ্পিয় ২: ৮)

৬. মহাক্না শিবিবা অসীনা মীওইবা অমসুং ঈশ্বরগী মরক্তা পল ওইনা লৈরম্বশিং অদু লৌথোকপীরে৷ নীংনশঙদা লৈরম্বা মায়খন-ফি অদু তংখায় তানা শেগায়খ্রিবা অদুনি৷ (মাত্থি ২৭: ৫২) খৃষ্টনা শিবিখিবা অসীগী মপান্না ঈশ্বরগা মীওইবগা অনীগী মরক্তা পল অমত্তা লৈহন্দ্রে, হকথেংননা উনহল্লে৷ ঈশ্বরগা মীওইবগা অনীগী মরক্তা করিগুম্বা মখল অমত্তগী মায়খন-গুম্বা অপনবা অথিংবা অমত্তা লৈহন্দ্রে৷

৭. তাইবং মী অসী ঈশ্বরগী মরলনি অদুবু পাপনা মরম ওইদুনা ঈশ্বরগী ওইরম্বা ঐখোয় মীওইবসী অমাঙবা হায়বদু ওইরে, ঈশ্বরগী ওইদ্রে, সইতানগী ওইখ্রে৷ মরম অদুনা মাঙখ্রবশিংদু অমুক হন্না থিদোক্তুনা ঈশ্বরগী ওইহন্ননবা মথৱায় কত্তুনা কনবীরম্বনি৷ (মরমদি মীগী মচানুপা অদুনা মাঙখ্রবা অদুবু থিবা অমসুং কনবিবা লাক্লে৷ –লুক ১৯: ১০) খূদিংমক অসী ৱায়েল য়াথং পূম্নমক মপূং ফাহনবিরখিবনি৷ (ঐনা ৱায়েল য়াথং নত্ত্রগা ৱা তাকথোকপা মীশিংগী ৱা অদু মাঙহনবা লাকপনি হায়না খনগনু, ঐনা মাঙহনবা লাকপা নত্তে, অদুবু থুংহনবা লাকপনি৷ –মাত্থি ৫: ১৭)

৮. মহাক্না শিবিদুনা ঐখোয়না শিগদবা অদুদগী কনবীরম্মে, লাই ফত্তবা সইতানগী কৈসুমশঙদগী মহাক্কী ঈ-না মমল পীবিদুনা হন্দোকপীরম্মে৷ মহাক্না শিবিবনা ঐখোয়না থৱায়দা লোম্বা নাইদনা হিংবা ফংজরে৷ ঐখোয়গী ইথক্তা লৈরম্বা ৱায়েল য়াথং অদু লৌথোকপীরে, ঈশ্বরনা ঐখোয়গী পাপ শীংথানবীদরে অমসুং ‘ধর্ম চেনবা’ হায়না শীংথানবিদুনা ঈশ্বরগী মচা-মসুশিং ওইহল্লে৷ অমম্বা কৈসুমশঙদগী মঙালগী মচা-মশুশিং ওইহনবীরে, ঈশ্বরগী নিংথৌ লৈবাক্কী লৈবাকমচাশিং ওইহনবিরে৷

৯. পাপ তৌরিবদি ঐখোয়নি, পাপকী অতৌমনদি শিবনি (রোমিও ৩: ১৬) অদুবু ঐখোয়না শিগদবা অদুগী উশিন ওইবিদুনা মহাক্না শিবীবা অসীমক্না ঐখোয়না হিংবা ফংজবনি৷ মহাক্না মথৱায় ফাওবা থাদোক্তুনা ঐখোয়বু শিগদবদগী কনবীরম্বনি, যিসুদি তাইবংপানসীদা লৈরিবা তাইবং মীওইবা পূম্নমক্কী কনবিবা মপূ অদুনি৷ মহাক্কী মপান্না ঐখোয়না লেম্না চুমজদুনা ঈশ্বরগী নিংথৌ লৈবাক অদু ফংজবনি৷

১০. ঐখোয়না হকচাংদা মহাক্কা লোয়ননা শিমিন্নরবদি ঐখোয়না থৱায়দা মহাক্কা লোয়ননা হিংগতমিন্নগনি৷ (রোমিও ৬: ৮) হিংবা অমসুং হিংগতপা অসী ইবুঙো খৃষ্ট যিসুদা লৈবনি৷

অশেংবা ঈরাইগী থৌরম করম্না পাঙথোকপগে

থাজবা ইচিন-ইনাউশিং খরনা নুমিত অসীদা চরা হেল্লি (ব্রত তৌই), প্রার্থনা কন্না তৌই, শীংলূপতা পূনমিন্নদুনা থাগত ঈশৈ কয়ামরোম শকই, অৱাবা ফোঙদোকই, মহাক্না তৌরম্বশিং নীংশিংদুনা ঊতলি, মহাক্না হায়রম্বা ৱাহৈশিং নীংশিংনৈ, নুমীত অসীগী মরু ওইবদু নীংশিংদুনা শীংলূপকী অহলনা শাষ্ত্রদগী ৱাফোঙ পীদুনা থৱায়গী মচীঞ্জাক পূন্না ফংমিন্নৈ৷ কনাগুম্বশিংনা ঈমুং-মনুং অমসুং মরী-মতাগা পূন্না ইবুঙো খৃষ্টগী মিংদা মথেল-মকোয় তৌদুনা চামিন্নৈ৷ অমগা-অমগা পূক্নীং থৌগতনদুনা থৱায়গী মরীদা হেন্না চাওখতনবা অমসুং চঙখোন্নবা ফনা ঈনশিনমিন্নৈ৷

ৱারোইশিন

ইবুঙো খৃষ্ট যিসুনা তাইবংপানদা লাকপীখিবা অসী পাপ চেল্লবা তাইবং মীওইববু নুংশিবদগীনি৷ ঈশ্বরনা তাইবংপানবা অসীবু মশাগী খূতশেম ওইবগী মরমনা অসুক্কী মতিক নুংশিবিরে মদুদি মসিদগী কনাগুম্বা তাইবং-মী অমত্তবু লাই ফত্তবা সইতানগী মনাই ওইখিদুনা নোরোকতা চতখিবা পামদে, অসুম্না নুংশিবা অসীগী মহয়না মহাক্না মশামকপু মহাক্কী অমত্তা ঙায়রবা মচানুপা ওইনা পীনবিরে৷ মচানুপা অদুনা তাইবংপান অসীদা লাকপীরগা তাইবংপানদা লৈরিবা পাপকী উশিন ওইনা কালবারিগী ক্রোসতা পাং তিংদুনা শিদোকপীরে৷ শিদোকপীবা অদুগী মপান্না, থাজবা মীপূম খূদিংমকপু লেম্না চুমহনবিদুনা লোম্বা নাইদনা হিংবা অদু ফংহনবিরে৷ মহাক্না শিবিবা অসীখক্তনা তাইবং মীওইবগী অরান খুবম হায়বদু ওইবিরে৷ মহাক্না কালবারি ক্রোসতা তাবিখিবা ঈ অদুনা মমল পীবিদুনা ঐখোয়বু লাই ফত্তবা সইতানগী কৈসুমশঙদগী থাদোকমল ওইবিদুনা ঈশ্বরগীরোমদা লাক্ননবা মরম ওইহনবীরে৷

ঐখোয়না পাপ চেল্লিঙৈ মীতকূপমক্তদা নহাক্কী নুংশিবনা মরম ওইদুনা শিবিরবা অসীনা লোম্বা নাইদনা হিংবা ফংহনবীরম্বা অসীগীদমক ঙমখৈ লৈতনা খাগতচরি ইবুঙো খৃষ্ট যিসু৷ নহাক্কী নপান্না নত্তনদি তাইবং মীওইবশিংগী হিংনবগী মরম অতৈ লৈরম্লোইদবনি৷ ইপা ইবুঙো নহাক্কী থৌরাং নচা ইবুঙোদা মপূং ফাহনবিদুনা তাইবংপানদা নহাক্কী নিংথৌ লৈবাক অদু পীবিরম্বগীদমকসু হরাওবা ফোঙদোকচরি৷ তাইবংপানদা নহাক্কী নিংথৌ লৈবাক হেন্না পাকথোক-চাউথোকপা ওইসনু৷ ইবুঙো খৃষ্টগী মিংলেন হেন্না-হেন্না চাওখতপা ওইসনু৷ ইখ্রবা খরসী পাখ্রবশিংগী মথক্তসু ইবুঙোগী নুংশি থৌজাল অদু হৈথবিবা ওইসনু৷ আমেন৷