মণিপুরগী মপান্দা চোইনা খুন্দাখ্রবা মণিপুরীশিংনা মণিপুরবু য়াম্না নুংশিজৈ. মখোয়না ফনা অতোপ্পা লৈবাক অমসুং অতোপ্পা রাজ্যদা খুন্দাখিদুনসু মমালৈবাক মণিপুরবু কৈদৌঙৈদা কাউবা ঙমজদে.
মখোয়না ইম্ফালদগী শন্দোকপা মণিপুরী থৌরমসি ময়েক শেংলবসু শেংদ্রবসু নোংমগী কাংদনা তানবা হোতনজৈ. ময়েক শেংনা তাবা ফংলবদিকো হায়না তকশি শোন্নজৈ. টিভিদা মণিপুরী থৌরম লাক্লবদি পায়নরম্বা মথৌ হুন্দোক্নদুনা চেনশিল্লক্লগা য়েংনৈ. লৈকায়দা লৈবা মীশিং ফাওবা - মীতৈরোনগী থৌরম লাকই, য়েংহৌরোলাউ - হায়না কৌরগা য়েংহন্নৈ. কেবলদা শন্দোকপা চেনেল অমতং য়েংবা ফংলবদি কো হায়না খন্নজৈ.
হৌজিক মণিপুরদা নোংমা কাংদনা থোক্লিবা মীশি-মীনা, মীহাত-মীপুন অসিনা মখোয়গী থমোয়বু য়াম্নমক লাংতক্নহল্লি.
কংলৈ সনা পূংময়োল
লাইনা থাবা লমদমনি
লাইরৈবাকনি হায়না খুরুমজরিবা মমালৈবাক মণিপুরনা শারৈবাকতগীসু হেন্না তমথিবা মতৌদা মীহাতপূং ওন্থোকতুনা নুমিত খূদিংগী মীকপ মীরাওখোলতনা নিলহনবসি মখোয়গী খাঙঙমজদবা অদুনি. মসি পূম্নমকতগী কোকহনবিরো হায়দুনা অয়াম্বনা গোবিন্দ খুরুম্নজৈ. মীতৈ লাইনিং চতপশিংনা লাইনিংথৌ সনামহি, পাখঙবা, শিদবা মপু খুরুম্নজৈ. খৃষ্টান লাইনিং চতপশিংনা প্রভূ যিসুদা প্রার্থনা তৌনজৈ.
মপান মণিপুরদা লৈরিবা মণিপুরীশিংগী অমত্তা ঙায়রবা লাইশোন্দি - কৈদৌঙৈ মণিপুর সনা লৈবাকসে ঈং তপ্পা, মরা তাবা, শান্তি লৈবা লৈবাক অমা ওইরক্কদগে হায়বসিনা ওইরবনি.
No comments:
Post a Comment