SILCHAR semgattana MANIPUR chaaokhatpa yaaroi, Cachar-si Manipur-gidi Mangolpur-ni

শিলচর শেমগত্তনা মণিপুর চাওখতপা য়ারোই, কসারসি মণিপুরগীদি মঙ্গলপুরনি

Silchar, Cachar, Assam

মণিপুরনা অৱাবা তারকপা মতম-মতমদা নিংথৌ মচাশিংনা কসারদা থৈরগা অমুক হেক-হেক মণিপুরবু উদ্ধার তৌখি৷ ইনিংথৌ ভাগ্যচন্দ্রগী মতমদা তেখাওদগী মতেং ফংখিবদুসু কসারদা মনেম হরিপ্রিয়া লৈরম্বদগীনি৷

গম্ভিরসিংহনা কসারদা সেনাপতি ওইদুনা থাদা লুপা ৫০ তোলোপ চাদুনা লৈরম্বা অমসুং কোন্নথংদা মণিপুরবু হন্দোকপা ঙমখিবদু কসারদা ময়াম্বামধুচন্দ্রগী মচানুপী ইন্দুপ্রভা লৈরম্বদগীনি৷

পুৱারীদা শানোংবনা ময়াম্বা খাগেম্বগী মথক্তা লান্দাখিবদু কসারদা লাক্লগা মীচঙ খোম্লখিবদগী ঙমখিবনি৷ চৌরজিত মহারাজনা ময়াম্বা মধুচন্দ্রগী মথক্তা লালহৌবা পামদুনা কসারদা লাক্লগা জারিবোন্দা অরোনবা কোনুং শেমখিবনি৷ কোন্নথংদা, মীচঙ খোমদুনা লান্দাখিবদুনি৷ মহারাজত্রিভুবোনজিতসু কসারদগী মণিপুরদা লান্দাদুনা নোংমতং ওইরবসু সনা ফম্বালদা কারম্মি৷

ইনিংথৌ গম্ভিরসিংহনা মণিপুরগী নিংথৌ ওইদ্রিঙৈদা কসারদা মচিন-মনাউ অহুম পূন্দুনা কসারবু লৌশিল্লগা শরুক অহুম থোক্না খায়দোক্লগা পানমিন্নরম্মি৷ ইনিংথৌ গম্ভিরসিংহনা পাল্লম্বা গুমরা (হৌজিক্কী বদরপুর, মতম অমগী সুরমা ভেলি) ইনিংথৌ মারজিতনা পাল্লম্বা জারিবোন(কোনুংলৈকাইদা কোনুং ওইবা) অমসুং ইনিংথৌ চৌরজিতনা পাল্লম্বা দুংগ্রিপার (হৌজিক্কী সোনাই, মফমসিদা সনা চহী অহুম পোকখিবনি, কোন্নথংদা বোনরাজ মীতৈ লৈবাক হায়না শেমগতখিবা) অসি য়াম্নমক মরু ওইবা মফমশিংনি৷

ইনিংথৌ গম্ভিরসিংহনা থানা লিংলগা-ললোন ইতিক্কি থবক য়েংশিল্লম্বা চন্দ্রপুর, ইনিংথৌ চন্দ্রকির্ত্তিনা দরবার লাক্লম্বা জিলা (হৌজিক্কী শিলচর) অসি য়াম্নমক মরু ওইবা মফমশিংনি৷ হৌজিক লৈরিবা রোংপুর, তুকো, খেলমা, বেরাখাল অমসুং লখিপুর অসি মণিপুরগী চাওখত-থৌরাংগীদমক ইপা-ইপুশিংনা থোনবিরম্বা য়ূম্ফম ঙাক্তনি৷

শিলচরদগী গৌহাতি য়ৌবা মহাসোরোক্কী জিরো পোইন্টসি রোংপুরনি৷ ইম্ফালদগী আইজোল (শিলচর চঙদনা চতকদবা) লম্বীদু ফুলেরতোল (থোং শাবা লোইগদৌরবা), লখিপুর অমসুং সোনাই ফাওরগা কাবুগঞ্জদগী য়ৌগদবনি৷ শিলচরগী এফ সি আই গোদাউন লৈরিবসি মীতৈ খুন তুকোদনি৷ তুকোসি জননেতা হিজম ইরাবোতকী মরু ওইবা মফম অমা ওইরম্লিবনি৷ মতম অমা অঙাংবা লানবনসু ওইরম্লিবনি৷

কসারদা মীতৈনা লৈরিবসি পুৱারীগী থৌদোকশিংনা অচৌবা মরম ওইহনখ্রবসু মণিপুরনা অৱাবা তারকপশিংদগী কন্ননবা থম্বিরম্লবা লৈশা তারবা য়ূম্ফম অদুনি হায়না লৌবা য়ারিবনি৷ ঐখোয়গী অহল-লমনশিংনা কসারবু মরু ওইনা লৌরম্লিবসি মণিপুরবু কন্ননবগীদমক লৈবা য়ূম্ফম ওইবগীনি৷ মণিপুরনা হৌজিক তারিবা অৱাবসি কসার শম্নদবদগীনি হায়না খল্লি৷ কসার য়াওদনা মণিপুরগী অৱাবা কোক্কদবা লৈতে৷ মরম অদুনা, মণিপুরগী চাওখত-থৌরাং অমসুং অৱাবা তারকপদা মায়োক্ননবা পোরম য়াতপদা শিলচর (কসারগী সদর) থাদোক্লম্বা য়ারোই৷ কসারসি মণিপুরগীদি মঙ্গলপুরনি৷

Imphal, Manipur