ঐজ্ঞা গোপাল্, পোক্নফম শিলচর এদিসন অমসুং ঐ

POKNAFAM Silchar edition-gi loisang

 (ঐজ্ঞা গোপাল লৈখিদবদা অৱাবা ফোঙদোকপা ওইনা ইবা)

ঐজ্ঞা গোপালবু অহানবা ওইনা থেংনখিবদু রূপমহলদা পাঙথোকপা থৌরম্ অমদনি৷ মতমদু (চাউরাক্না ১৯৯৮-৯৯) ঐবু মী অতৈদা শক য়াম্না তাক্কনবা মরূপ অমা লৈরম্মি৷ নোংমা ইখঙ খঙহৌদনা ঐখোয় থৌরম অদূগী ফম্ফম পরেং অমত্তদা থংননা ফম্মিন্নরুবনি৷ মদুদা ঐবু অতৈদা শক য়াম্না তাক্কনবা (ঐনা পাম্মি পামদে খঙদনা) মরূপ অদুনা ঐজ্ঞা গোপালদা ঐবু শক্তাকখিবনি৷ ঐজ্ঞা গোপালগী মীনোক অমা লৈবনি, মদু য়াম্না তোয়না মীয়াম্নসু উনরিবদুনি৷ মদুতমক ঐঙোন্দসু ঊতখি, খূত শোক্নখি৷ ঐদি মতমদূ ইশাগী দিজিগ্নেসন খঙদনা লৈজরম্বা ইচম চম্বা ওইবনা (ঐহাক ‘মতমগী য়াকাইরোল’দা কন্না ইজরম্মি৷) ইশাগী ফীবমদুগা ঐজ্ঞা গোপালগা থংননা ফম্মিন্নরুবদু শৌবিং-শৌবিং লাউখিবনি৷ থৌরমদুগী মতুংদগীদি ঐহাক ঐজ্ঞাবু কাউথোকখ্রে৷

নোর্থ ইষ্ট রাইতর্স ফোরম, মণিপুর চেপ্তরনা শীনবা থৌরম (হোটেল এক্সিলেন্সিদা পাঙথোকখিবা, তামো শরতচান্দনা মকোক-মরু ওইনা শীনবা, গম্ভিনিনা ‘বিদায় কংলৈপাক বিদায়’ ইবা ঙমখিবা খোঙচত) অদূদা ঐহাক্সু কসারগী মীহূত অমা ওইনা শরুক য়াখি৷ থৌরম অদুগী কভরেজ পোক্নফমখক্তনা নীংথিজনা তৌবিখি৷ ঐজ্ঞা গোপালসু লাক্তুনা মপান্দগী লাকপা মীহূতশিংগা ৱারী-ৱাতাই শানরৈ৷ মরক-মরক্তা পীজ-পীথক্সু তৌরৈ৷ মতমদুদা ঐনা অমুক হন্না ঐজ্ঞা গোপালবু ফংজখিবনি৷

কসার, শিলচর মোইনারবোনগী কবি কব্রবম নিলকান্ত (মতমসি মহাক মণিপুরি সাহিত্য পরিসদ, অসামগি জেন. সেক্রেটরিনি)গা লোয়ননা চতপা খোঙচত (মদু সাহিত্য পরিসদকী মপোক কুমওন থৌরম য়াওবগী ওইগনি) অমদা (মতমসি ঐহাক নহারোল সাহিত্য মরূপ, অসামগী জেনরেল সেক্রেটরিনি৷ খোঙচত অসিদা মরূপ অসিগী প্রসিদেন্ট মোইরাংথেম শিতলজিত অমসুং ত্রেজরর সরাংথেম সমরেন্দ্রসু য়াওখি)৷ খোঙচত অসিদা রাইটর্স ফোরম, নহারোল সাহিত্য প্রেমী সমিতি, মণিপুরি সাহিত্য পরিসদ, লৈকোলনচিংবনা ঐখোয়বু তরাম্না ওকপীখি৷ কবি রঘু লৈশাংথেম (হন্দক্তা সাহিত্য একাদেমি মনা ফংবা)গা লোয়ননা ঐখোয়না মীওই কয়াগসু উনজখি৷ ময়ামগী মনুংদা খূমন্থেম প্রকাশ (সাহিত্য একাদেমি, মণিপুরি এদভাইজরি কমিতিগী কনভেনর)কসু উনজদুনা মণিপুরী সাহিত্য পরিসদ, অসামগা সাহিত্য একাদেমিগা লৈনরিবা মরী অসি হেন্না প্রোদাক্টিব ওইহন্নবা অমসুং অসামদগী অনী ত্রিপুরাদগী অমা একাদেমিগী মণিপুরী এদভাইজরি কমিতিদা য়াওহনবিনবা তানজরম্মি৷ নীংসিংলি, খোঙচত অসিদা ঐখোয়বু ঐজ্ঞা গোপালনা পোক্নফমদা বার্তোন তৌবিদুনা মহাক্কী কেবিনদা উনজখি৷ খোঙচত অসিদা ঐহাক্কা ঐজ্ঞা গোপালগা অহুম্লক উনজখি৷ ঐহাকপু লৌরনবা গারি থাবিরকই, অমুক্সু থিনবিরকই৷ য়াম্না মমল থম্বিখি৷

অহূম্লক উনবা অসিগী মপূং ওইবসি- ঐজ্ঞানা পোক্নফমগী শিলচর এদিসন অমা পুথোকপা পাম্বা অমসুং মদুদা ঐহাক্কী মতেং পাম্মী হায়বসিনি৷ ঐহাক ৱাফমদু য়াম্না লুনা অমসুং লূম্না লৌজখি৷ শিলচরদা নুংতিগী ফোঙবা পাউচে অমা ফোঙনবগী ঐঙোন্দা লাকখিবা প্রপোজেলদা ঐজ্ঞা গোপালগী অসিনা অনীসুবনি৷ মমাঙগীদু ঐহাক্না হাক্না খনজিল্লুদে অদুবু হন্দক্কী অসিদি য়াম্না মমল লৈনা লৌজবগা লোয়ননা অঙম্বা মতেং পাংগনি হায়দুনা য়ানরমখি৷

eigaa Gopaal

থা খরা কান্নরবা মতুংদা নোংমা ঐহাকপু থিবিরক্তুনা শিলচরদা লাকখ্রবা ঐজ্ঞা গোপাল (তামো সনাজাউবগা লোয়ননা) গা ঐহাক্কা অমুক উনজৈ৷ মতমদু ঐহাক ইকোনোমিক লিবর্তি লৈতবা মতমনি৷ লাক্ষ-লাক্ষগী থবক তৌরিবা মখোয়গা মতেং-ইতেং পাংনবা হায়বসি ঐহাক্কীদি মেন্টল অমসুং ফিজিকেল সপোর্ট নত্তনদি করিসু ঙম্লোইদবনি৷ মতমসি ঐহাক এম.ফিল. লোইরে অমসুং পি.ঐচ.দি.গীদমক মিং চনবা মতমনি৷ মতম অসিদা ঐহাক শিলচরগী জি.সি. কোলেজদা মণিপুরী লোন তাকপী-তম্বীনবগীদমক পার্ট টাইম লেকচরর ওইনসু থবক তৌরি৷ হিরো হোন্দা (পেসন প্লস) বাইক অমা লৈজদুনা ঐগী থৌদাং ঙমজনবা কন্না হোতনজরিঙৈ মতমনি৷

মতমসিদা, পোক্নফমগীদমক মতেং পাংনবা হায়নখিবা ৱাফমদু অমুক হন্না হৌদোক্নরে৷ ঐদি বরাক তম্পাকপু য়াম্নমক নুংশিজবা মীশক অমনি৷ মদুগীদমক কোয়চেন চেন্দুনা হোতনজরম্বনি৷ মতমসিমক্তদা পোক্নফম কৌবা নুংতিগী পাউচে অমা শিলচরদগী ফোঙলগনি, ঐহাক্না মতেং পাংবগী তানজা অমা ফংলি৷ ঐ করি তৌগদগে হায়না কূপ্না খনজখি, শিলচরদা নুংতিগী ফোঙবা পাউচে অমা লৈবা হায়বসি ঐগী নুংশিজরিবা বরাক তম্পাক অসিগীদি অনৌবা যুগ অমগী পাউজেল অমনি৷ অসিগুম্বা অনৌবা যুগ হৌরগদবা মতম অসিদা ঐনা করিগী শরুক য়ারোইদগে হায়না ফিরেপ লৌজৈ৷ বরাক তম্পাক্তগী কনাগুম্বা অমত্তনা তৌবিররোইদ্রবা থবক্নি হন্দক ঐজ্ঞা গোপালনা তৌবিররিবসি৷ মসিগুম্বা ৱাখল খনবা মীগা লোয়নহৌগদবনি, পূন্না থবক তৌমিন্নহৌগদবনি, বরাক তম্পাকপু থৌগন তৌজনবা য়াম্নমক ফবা তানজানি হায়বসি ঐহাক্না খনজখি৷ মতমদুগী পোক্নফমগী মেনেজর তামো সনাজাউবনা থাগী তোলোব ওইনা ঐঙোন্দা লূপা ৩০০০পীগে হায়৷ শেনফম অসি ঐঙোন্দা য়ামদ্রবরা হায়না হংখি৷ ঐ পাউখুম পীখিদে, ঙসি ফাওবদা পীদ্রি, তুংদসু পীগনি হায়বা থাজদে৷

মতেং পাংবা ওইনা থবক হৌগতলি৷ বাংলা পাউচেশিংদা এদ হাপ্পা (বাংলা পাউচেদা মণিপুরী লোন্না এদ হাপ্পসি মসিনা অহানবা ওইগনি), চেজাই য়েন্থোকপা, মফম-মফমশিংদা চত্তুনা কেম্পেইন তৌবা, লম-লমগী অখঙ-অহৈ, অহল-লমনশিংগা উনদুনা ৱারী-ৱতাই শাবা অসিনচিংবা৷ খোঙচত অয়াম্বদা ঐজ্ঞা গোপাল য়াওই৷ মরম অদুনা ঐজ্ঞা গোপালগা ঐহাক্কা য়াম্না নক্না লোয়নবগী খুদোং চাবা ফংজখি৷ মতমদু ঐহাকপু য়ূমদগী হংগত-হন্দা চতপা নুঙাইররোই হায়দুনা রোংপুরদা লৈবা মী লৈনবগীদমক লৌবা য়ূম অদুদা তামো সনাজাউবা, ঐজ্ঞা গোপাল অমসুং ঐহাক লৈমিন্নরম্মী৷ ঐখোয়গী চাক থোংনবা নুপামচা অমগা বোলেরো থৌবা দ্রাইভর মনিগসু লৈমিন্নরম্মি৷ মনিগা ঐগদি সূকথা থাদোক্নদ্রে৷

চাক্কৌবা অমগী মমাঙ নুমীততা ঐখোয় খরা বোলেরোদা ইম্ফাল থোকই৷ ঐসু নোংম-নীনী লৈদুনা পাব্লিকেশন অমসুং লে-আউট দিজাইন্নচিংবা তমশিল্লুগদৌরিবনি৷ (থবক অসি ঐঙোন্দা অনৌবদি নত্তে, ফোঙদোক-ফোঙজিনগী, লে-আউত দিজাইনগী থবক ঐ লেপ্তনা তৌজবা মতমনি) বরাক থোং য়ৌরগা চতপা য়াররোই হায়রকপদগী অমুক হল্লগা গুৱাহাতিরোমদা থৌদুনা দিমাপুর লম্বী তারগা ইম্ফাল থোকই৷ মদুদা ঐজ্ঞানা থৌরানিদা ফোনদা হায়খিবা তাহৌৱি- ‘নঙগীদমক্তনিনে লম্বী চতপগী অৱাবা মায়োক্নবদা চোকথদ্রিবসি’৷ ঐজ্ঞাগী ফাগীদো ঐঙোন্দা য়াম্না নুঙাইনা থোকখি৷

ঐজ্ঞাবু ঐনা ইপাগী ফিদাদা থমজখি (তশেংনসু ঐজ্ঞানা ঐবু পোকপীবা ইপাদগী চহী৩-৪ হল্লি)৷ চামিন-থকমিন্নবা, চতমিন-খোতমিন্নবদা ঐনা ইপাদা তৌগদবশিংদু তৌজখি, সেবা ফংজখি৷ ঐদি মহৌশানা প্রোফেসনদগী হেন্না হ্যুমেন রিলেসনসিপতা ঙাওজবা মীনি, ওফিস (হৌজিক-হৌজিক লৈরিবা)তা থবক তৌমিন্নবশিংদফাওবা ব্রদর নত্ত্রগা সিস্টর কৌই৷ পামদবা য়াওরমদুনা ঈকাইবা নংহল্লকপসু য়াওই৷ অদুবু ঐগী ঈ-তোংদা মীশিংবু ইচিন-ইনাউ, ইপা-ইচা, মরূপ-মপাং, মচে-মবুং-মচন-মৌপ্বা ওইনা উবগী মতৌ অসিদি ইকোক কোকপা ঙমদে৷ মসি মফম-মতম চাদ্রবদি অচৌবা দোষ অমনি৷ অদুবু মফম খরদা ঐ প্রোফেসনেল ওইবা ঙম্নবসু কন্না হোতনখি৷

ইম্ফালদা য়ৌরগা ঐহাকপু পোক্নফম ওফিসকি মথক থংবদা লৈবা মীথুংগী কা অদুদা থম্বী৷ অদুগুম্বা অনানবা, ফজবা কাদা লৈজবা পুন্সীগী অহানবনি৷ হৈনদবনা খাঙবা ঙমখিদে৷ মফমদুদা ঐবু ঐজ্ঞা রোবিন্দ্র (তামোসু কৌই) অমসুং অতৈ ষ্টাফ খরগা শকখঙনহল্লি৷ হান্নদগী খঙনরকপা খরসু লৈরম্মি৷ লে-আউত দিজাইনগীদমক ওফিস মনুংদা ফমদুনা লৈবা হায়বসি ঐ পাম্লমদে অমসুং ঐঙোন্দা শিন্নরিবা কম্প্যুতর অদুসু হান্নদগী পায়রকপা মীওই অদুনা পায়হন্নীংদে৷ কনানো অমনা ঐবু তাকপীদুনসু তৌই৷ ঐসু অদুম তাশিল্লি৷ তৌনীংঙাই লৈতবা মতমদদি ঐ কোয়থোকপা ওইনা এম য়ুগী মণিপুরী মশঙ (ঐহাক্না এম. এ লোইজরকপা মফম)দা চততুনা ওজাশিংগা উনজৈ৷ নোংমদি, তামো সনাজাউবনা খোন কল্লপনা ‘নঙবু অসিদা কোয়বা পুরক্লিবরা’ হায়রকখি৷ ঈকাইজখিবনা লৱাই লুতোন শাতখিবনি৷ মীতকূপতূমক্তদা খনখি, ‘মসি কয়া নুঙাইগদৌবা মানদ্রে, ঐবু তোকহৌবনা ফগদ্রা’৷ পূক্নীং ফাথখি, ঐগী ঈকাইবদগী হেন্না বরাক তম্পাক্কী তুংলমচতনা হেন্না মরু ওই৷ চুমদ্রিংনা তামোগী ওফিসতা চঙই, ‘ওফিসতা ঙাইহাক্তা ফাওবা লৈতে হায়দুনা তামো (ঐজ্ঞা গোপাল)না থিরম্বনি৷ অদুনা নঙোন্দা ফোন তৌখিবনি, ওফিসতা খরা খরা লৈয়ু৷’

ঐনা ফ্রোন্ট পেজ অনী অহূমগী তোঙান-তোঙানবা লে-আউত তৌদুনা তামো রোবিন্দ্রদা য়েংহল্লি৷ তামোনা ফজৈ হায়না থাগতপীরকখি৷ ঐনা লৈরিঙৈদা রিপোর্টর অমগা ঐজ্ঞাগা অৱায়-অখুম তৌনৈ, রিপোর্টরদু নোঙানবদগী লাকখিদে৷ মসিসু ঐঙোন্দা অচৌবা ৱাহং অমা ওইখি৷ ঐ মীনা মীদা চৈবা, তাথীনা তৌবসি তাবা নত্ত্রগা য়েংবা ঙমদে, ঐঙোন্দা কনাগুম্বনা ঙাঙবা-চৈবা তৌরবদি অমুক্কা হেন্না খাঙবা ঙমদে৷ মরক-মরক্তা তৌগদবা তঙাইফদবফাওবা তৌদনা তোকখিবা য়াওই৷

ঐজ্ঞা গোপালনা ৱারী কয়া লীদূনা ঐঙোন্দা তাহনখি৷ ঐজ্ঞানা য়াম্না পামজবা ৱারীসি কর্ণগা দুর্য্যধনগা অনীগী মরক্তা লৈনখিবা মরূপ ওইবগী মরী অদুনি৷ মরী অসিদা, দুর্য্যধনসি ফত্তে হায়বা খঙন-খঙনা কর্ণনা শূকথা থাদোক্তবসিনি ঐজ্ঞানা য়াম্না পামজবসি৷

ঐজ্ঞানা য়াম্না কল্লকচখিবা অমসু লৈ, মদুদি- নুপীনা মাগি মপুরোইববু মমল য়াম্না লৈহনবা অসিনি৷ নোংমা ওজা ইবেতোম্বী (জি সি কোলেজদগী পোত্থারবা ওজা)গীদা কোয়রুই৷ ওজানিগী মপুরোইবা পেরালাইজ ওই৷ অদুম ওইনমক, মশাদা নীংহন্নবা, থৌনা মাঙবা, আশা লৈতবা, নীঙমদবা অমত্তা লৈতে৷ য়াম্না ইচঙ থৌনা, করিসু তৌদবগুম হরাওনা পুন্সী লেল্লি৷ ওজা ইবেতোম্বীনা মপুরোইববু ঈকাই খুম্নবা, নোল্লুকপা, মনীং তমহনবা মতৌশিংদু উরুবদা য়াম্না কল্লকনা শোনখি, ঐখোয়গী মতমদা অসুম্না থোক্লরিগদ্রা৷ অহল ওইরবা মতৈ-মনাউনা অমনা অমদা লুন মমল থম্বগী ফজবা মরীদু ঐজ্ঞানা য়াম্না কল্লকচখি৷

ঐজ্ঞানা হায়রম্বা নীংশিংহৌবা খরা-
১. ঐঙোন্দগী ঐগী মথংগী মীরোলনা শরুক কুন হেন্না চাওখতকদবনি৷
২. ঐগী মমাঙগী মীরোলনা লুপা তরাগী মপু ওইরম্লবদি য়ামদ্রবদা ঐ লুপা কুনগী মপু ওইবা ঙম্নবা হোতনগদবনি৷
৩. ঐ ৱাখল খল্লি, খল্লিবা ৱাখল অদুগী মতাংদা অতৈদগীসু মোত লৌই৷ অদুগা কোন্নথংদা ঐগী ওইবা ফিরেপ লৌই৷
৪. মীনা ঙাঙনরিবা মায়গৈদু নত্তবা অতোপ্পা মায়গৈ অমসু লৈবনি৷
৫. (ফাগি ওইনা) দ্রগ চাবসি ফৈ৷ দ্রগ চাদুনা মরল মথুম মাঙহন্দ্রবদি মখোয়গী অফবা য়ূম্ফমশিংদু ঐখোয়না কদায়দগী ফংলগদগে হা৷

ঐজ্ঞাগী পুন্সী মপূং ফাবা প্রোফেসনেল বিজিনেসমেন ওইনা ঐনা উজখি৷ ঐজ্ঞাগী প্রোফেসনেল ওইবা মতৌগা ঐগী ইমোসোনেল ওইবা মতৌগা থেংগাইনরকখি, চিংখাইনরকখি, মূকখাইনরকখি৷ ঐগী টেসতিমোনিদা থৌনা হন্থরকখি৷ পোক্নফমগী পোরম য়াতপদা মফমদুনা শিলচর ওইরুবনা ইম্ফালগী পোলিসি এপ্লাই তৌবদা চানখিদে, ঐনসু খরা বারৌখি, তোয়না হায়খি, মসি ইম্ফাল নত্তে শিলচরনি৷

মায়গৈ অমরোমদা, মীয়াম্না ঐহাকপু পোক্নফম শিলচর এদিসনগী পূম্নমক্নি হায়না খন্নরবসু ঐহাক ইশানদি ফিজিকেল অমসুং মেন্টল সপোর্টর ওইবা নত্তনা ঐহাক কনানো, পোক্নফমদা ঐহাক করি ওইনা থৌদাং লৌরিবনো হায়বগী পাউখুম কনাদসু পীবা ঙমখিদে, মীঙোন্দা পাউখুম পীবদি লায়রদুনা ঐ ইশা ফাওবনা খঙজখিদে৷ ওজা য়ূম্লেম্বম ইবোমচাসু মরক্তুদা য়াওশল্লবনি৷ নোংমা তামো রোবিন্দ্রো (পোক্নফম শিলচর এদিসনদা লৈমিন্নরিঙৈদা ঐগা তামোগা ফমুং অমত্তদা তূম্মিন্নৈ)না হায়- ‘হোদাম্বা, নহাকপু সুমাইনা কয়ানি লৈখিদোইনো? ঐবু হায়য়ু হায়রবদি নহাক পোক্নফম থাদোক্লগা নহাক্না তৌরিবা পিঐচদিদু লোইশিন্নবা হোতনরো? মদুনা ফরগনি, মসি ময়াম্বা অমা ওইনা হায়রবা ৱানি, মুন্না খল্লু’৷ ঐনা নীংলম্বদুদা মপাঙ্গল ফংদুনা ঐহাক থা অমরোম মাঙজৌননা ঐজ্ঞাদা হায়জখি ‘ঐজ্ঞা, ঐহাক লাক্লিবা তাং...অসিদগী পোত্থাজরগে’ ঐজ্ঞানসু য়াবিরকখি ‘ফরে, ফরে’৷ অসুম্না ঐহাক পোত্থাজখি৷

machine paankhatpa matamda matamdugi Manager taamo Sanaajaaoba