মণিপুরদা প্রাইবেত বস সর্ভিসঃ অনকপা চেনবনা শিখ্রগা অরাপ্পা চেনবনা হিংহৌরিবা করিগীনো

মণিপুরদা ঐখোয়না হৌজিক-হৌজিক উরিবসী অরাপ্পা চেনবা গারিগী বস সর্ভিসনা শিরুম-নারুম ওইরবসু হিংহৌরগা অনকপা চেনবা খূদিংমক্না শিখিবগী মশক অসিনি৷ মসিগী ওইবা য়াবা মরমশিংদি-

অনকপা চেল্লম্বা বস সর্ভিসনা শিখিবগী মরম-

১. মতম য়াম্না চঙবা (মী থনবা ঙাইদুনা লৈবা)

২. মতম নাইদবা (দ্রাইভর অমদি কন্দক্টরনা খুসি-রাসি তৌবা)

৩. পেসে়ঞ্জরগী দিমান খঙদবা (মতম চানা য়ৌহনবা ঙমদবা) অসিননি

মরম অসিদগী- দিজেল ওটো, টাটা মেজিকনচিংবনা মহূত শিনজিল্লক্তুনা পেসেনজরগী দিমান ফুলফিল তৌবা ঙম্নবা হোতনরি৷ মসিনা মহূত শিনবা য়ারবদুমক্তি নত্তে৷ সিতি অমদা লেমজনীংঙাই ওইবা সিতি বস সর্ভিস অমফাওবা লৈতবা হায়বসিমক শাথিনা ইকাইনীংঙাই ওইবা ৱানি৷ পাল্লিবা সরকার অদুগী থৌশিনদা অশোনবা নত্ত্রগা তৌফম থোকপা মথৌ মশক খঙদবদু তাকপনি৷ সিতি বস সর্ভিসকি মহূত্তা দিজেল ওটোনা মহূত শিল্লি হায়বসিনমুক হেন্না ইকাইনীংঙাই ওইরিবনি৷ মীতয়েং অসোমদগী হায়রুরবদি, মণিপুরগী মীশিংসি মপান-ইপান ইথোক-থোক্তবা, মীরম-নারম ইউ-উদবা, চাওখত্তবা খুন্নুং-মান্নুংগী মীনি হায়বদুনি৷ ফীবম অসি উখিবা ভারতকী অতৈ লমগী মীশিংনা মণিপুরীশিংদি চীংনুং-মান্নুংদা পঙলৈ লৈবা চাওখতপগী মঙাল ফংদ্রিবা জাতি অমনি হায়না খন্নরিবনি৷ থৌদৌনা খলহল্লিবসুনি৷ অদুগুম্না খন্দুনা উশিত-থওইরক্ত্রগনা উশিত-থওইবিদে হায়দুনা মকন্থী থোক্নসু শাউবিরিবদুনি৷ ইশাগী ফীবম ইশানা হান্না মশক খঙজগদবনি৷

ঐখোয়না ঐখোয়বু ঐখোয়তগী ওইবা মীতয়েংদগী য়েংলগা মমল লেপ্পা য়ারোই৷ ইশাগী ফর্ষ্ট পার্সননা ইশাগী সেকন্দ পার্সনবু য়েংবতা নত্তনা ইশাবু মীগী মীতয়েংদগীসু য়েংবা, উবা অমসুং খঙবা ঙম্নবা হোতনদুনা অৱাতপা, অশোয়বশিং মেনখতনবা হোতনগদবনি৷

অরাপ্পা চেনবা বস সর্ভিসনা শিথরকপগী মরম-

১. মতম য়াম্না চঙবা

২. পেসেঞ্জরগী দিমান খঙদবা নত্ত্রগা থৌশাদবা

৩. গারি মচাশিংনা মহূত শিনজিল্লকপা

৪. লম্বীনা সাপোর্ট তৌদবা

৫. শেনখায়-থুমখায় কনমনবা অসিননি

অনকপদা চেল্লম্বনা শিখ্রগা অরাপ্পা চেনবা বস সর্ভিসনা শিরুম-নারুম্লবসু হিংহৌবগী মরম-

১. অতৈ পাম্বৈ অমত্তা লৈতবদগী

২. চত্থোক-চতশিন তৌবগী চাং হন্থদবদগীনি

সরকার অমসুং পাব্লিক অনীগী মরীদি শেন্মীতলোনগী সপ্লাই অমসুং দিমানগা লৈনরিবা মরী অদুনি৷ হৌজিক ওইরিবা মণিপুরগী ফীবমসী-

১. দিমান য়াম্না লৈরগা সপ্লাই মতীক চানা তৌবিদবা নত্ত্রগা শূকতৌ তৌবিদবা

২. দিমানসু লৈতনা সপ্লাই পঙতৌ তৌশিনবা

৩. দিমানসু নত্তবা সপ্লাইসু নত্তবা মওং খরা চত্থবা অসি উবা ফংই৷

অনকপা অমসুং অরাপ্পদা চেনবা গারিগী দিমানদি মীপূম খূদিংমক্কীনি৷ দিমান খ্বাইদগী লৈবা হীরম অসিদা সরকারগী মায়গৈদগী সপ্লাইদি অমত্তা লৈতে৷ মসি ৱাখল খনবা ঙমদবগী খূদমনি৷ লন্নাই মীওইশিংনা ফনা য়াম্না তৌদুনসু লৈবাক অমগী অৱাতপা মেনখতপা ঙম্বা নত্তে৷ অৱাতপা মেনবা হায়বসিগা লৈফম থোকপা লৈবা হায়বসিগা য়াম্না খেন্নৈ৷ লৈবাক অদুগী লৈফম থোকপশিং লৈননবগীদমক সরকার লৈরিবনি, লন্নাই মীওইশিংনা অৱাতপা মেন্ননবগীদমক হোতনবদি য়াই৷ লৈফম থোকপা লৈবা হায়বসিগীদমক সরকারগী মরী লৈনবা মশঙসু তোঙান্না লৈরিবনি৷ মখোয়না অনৌবা পোমীতলোনগা লোয়ননা থৌরাং তৌবা চঙই৷ প্রাইবেত বস সর্ভিসনা মণিপুরগী ত্রান্সপোর্টেসনগী মহূত শিনবা য়ারোই৷ দিজেল ওটোনা সাউন্দ পোল্যুসন থোকহনবগা লোয়ননা সিতি চিলহনবনা মণিপুরগী শক্তম ওইবসু য়ারোই৷ হীরম অসোমদা থমোয় লাইমীত পাঙদ্রিবা মণিপুর সরকার মীকপ থোকপা চঙই৷

মণিপুরদা মনুং অমসুং মপানগী ওইনা বস সর্ভিস লৈনবগীদমক চহী অহূমগী ত্রায়েল চত্থবা ওইনা লুপা ক্রোর লীশীং অমগী প্রোজেক্ট অমা পায়খতপা য়াই৷ মসিদা-

১. গারি অমসুং অতৈ পোতলমশিং লৈবা

২. থৌমীশিংগী থাগী তোলোব

৩. শেমগত-শাগতপা

ক. লোয়শঙগী শঙলেন

খ. আইএসবিটি

গ. গারি ঙাইফম

ঘ. বস ষ্টেসনসিং

ঙ. ইনফোর্মেসন

চ. অনা লায়েংশঙ

ছ. মহৈলোয়শঙগী শঙলেন

জ. ৱার্কসোপ

ঝ. থাউগী পম্পশিং

ঞ. অসিনচিংবা

৪. তাকপী-তম্বীবা

৫. অতৈ-অতৈ লৈহনবা য়াওনা চাদিং তৌবা য়াই৷

থৌরাং অসিগীদমক রাজ্য সরকারনা কেন্দ্র সরকারগী মতেং লৌবসু য়াই৷ মালেমগী চাওখতলবা লৈবাকশিংদা (নত্ত্রগা ভারতকী রাজ্যশিংদা) ওইরিবা ত্রান্সপোর্টেসনগী চাওখতপা ফীবমদু মণিপুরগী লৈমায়দা লৈহনবা য়াই৷ মণিপুরবু মালেমগী থাক্তা চাওখতনবা শেমগতপা তাই৷

মণিপুরনা কোরিয়াবু য়াম্না পাম্মী অদু ওইরবদি অখন্নবা মীওই খরবু ত্রান্সপোর্টেসনগী খূমাঙ চাওশিনবা মতৌদু য়েংলুবা অমসুং তমশিল্লুনবা চতপা, থাবা য়াই৷ মণিপুরনা সিঙ্গাপুরবুসু খোয়দানা তৌই৷ মফম অদুদসু য়েংলুবা অমসুং তম্লুবা য়াই৷ ঐখোয়গী মণিপুরদতা চতনবা, মালেমগী মীশিংনা তমজনীংঙাই ওইবা মতৌসু হৌদোকপা য়াই৷

কৈদৌনরুনি ঐখোয় মশেন হুন্নদুনা, লাউনদুনা লৈরগা, তৌগদবা থবক্তি অমত্তসু তৌদে৷ হুন্নগে হায়রবদি মালেমগা হুন্নবিয়ু, লাউনগে হায়রবসু মালেমগা লাউনবিয়ু৷ লাম্বা পাগে হায়রবসু মালেমগা লাম্বা পানবিয়ু৷ ইশাগী হৈ-শিংবদু মালেমগী কৈথেলদা পুথোকপীয়ু৷ কৈদৌনরুনি, কুহা মনুংদা ঐখোয় মশেনতা অকনবা, অহৈবা, অশিংবা, অঙম্বা শানদুনা লৈরগা৷ কৈথেল কারগা য়ৌনবা চতকেদি নীংদ্রদুনা হূইনা ইতুংদা খোংলবা তান্নদুনা লৈথোকপদি অপঙবগী থৌদৌনি৷ করি কান্নৈ, কৈথেল য়ৌগদবদু য়ৌনবা চতলগা লোইরে৷

থবক ফংগদবা মীওই খূদিংমক চহী অমমমগী কন্টেক বেসিসতা থবক তৌহনগদবনি৷ লোয়শঙ পান্নবা থৌমী খরগা মশঙগী হান্নগী মতিক চাবা থৌবুরোইশিংগা মখোয়তনা পার্মানেন্ট ওইগদবনি৷ পার্সোনেল রিপোর্ট ফজদবা অমসুং কমপ্লেইন লৈবশিংবু লৌথোক্লগা মখা তাবা থৱায় য়াওবা মীশিং নৌনা খনবিদুনা থবক তৌজনবগী খুদোং চাবা পীবিগদবনি৷ মণিপুরগী এমপ্লোইমেন্ট এক্সচেঞ্জগী লাইব রেজিষ্টারদা থবক ফংদবা মীওই ৬,৪০,০১০ (২০০৮ ফাওবদা) লৈ৷ অপেদট তৌবিদ্রবা রিপোর্টতু মখাদা থমজরি-

Exchange wise number of Applicants Registered (As on July, 2008)
Sl. No	Exchange	No. of applicants on Live Register
1	District Employment Exchange, Bishnupur	55,524
2	District Employment Exchange, Chandel	20,755
3	District Employment Exchange, Churachandpur	54,641
4	District Employment Exchange, ImphalEast	86,328
5	District Employment Exchange, Lamphelpat Imphal West	209,043
6	District Employment Exchange, Senapati	44,418
7	District Employment Exchange, Tamenglong	18,002
8	District Employment Exchange, Thoubal	89,280
9	District Employment Exchange, Ukhrul	24,605
10	Town Employment Exchange, Kangpokpi	20,954
11	Town Employment Exchange, Jiribam	3,304
12	University Employment Information & Guidance Bureau, Manipur University, Canchipur	5,099
13	Special Employment Exchange for Handicapped Persons	2,235
14	Town Employment Exchange, Moreh	1,457
15	Town Employment Exchange, Sugnu	1,712
16	Town Employment Exchange, Tamei	207
17	Town Employment Exchange, Saikul	2,446
	Total	6,40,010

মখোয়(ত্রান্সপোর্টেসনগী প্রোজেক্টতা থবক তৌরগদবশিং)গী খূতসূমল মতীক চানা ফংহনবিবা য়াই৷ মতাং অসিদা, থবক ফংগদৌরিবশিংদু নুপা-নুপী খায়বিরোইদবনি৷ নুপীনা দ্রাইভর নত্ত্রগা কন্দক্টর ওইবা য়াদে হায়বা লৈতে৷ ওফিস এসিষ্টেন্টখক্তা ওইগদবা নত্তে৷ শেনজা-থুমজাদি শূকতৌ তৌবিরোইদবনি৷ নোংঙাল্লমদাই পূং ৪.৩০দগীনা নুমিদাংগী পূং ১০.৩০ ফাওবা সর্ভিস লৈহনবা য়াই৷

প্রোজেক্ট অসিগী মখাদা হকথেংননা অমসুং নাকোইননা মীওই লীশীং মঙারোমদগী তাদবীদা থবক ফংবা য়াই৷

মরম অদুনা, হীরম অসিদা পূক্নীং শূকচঙ চঙদবা মানবা- ত্রান্সপোর্টকী পোর্টফোলিও পায়বিরিবা (এজুকেসন অমসুং সেরিকলচরগা কোন্ননা) শ্রী এল জয়ন্তকুমার সিংহ (এজুকেসনদা খরা হেন্না মীতয়েং চঙবা উই৷ তশেংনদি ত্রান্সপোর্টকী তোঙানবা মিনিষ্টর অমা লৈবনা ফগনি) অমসুং হোমগা লোয়ননা ফাইনান্সসু পায়বিরিবা ইকাই খুম্নরবা মণিপুরগী সি এম শ্রী ওক্রম ইবোবী সিংহ (হীরম অসিগী ৱাখল ফাওবা খনবা শঙজদ্রবা)গী মীতয়েং চিংশিনজরি৷