মণিপুরদা লম্বী-থোংগী ফীবম ফগতহনবা

Pame Road

মণিপুরদা খ্বাইদগী ইহান হান্না পায়খতকদবা মরু ওইবা থবক খরগী মনুংদা লম্বী-থোংগী ফীবম ফগতহনবা হায়বসিসু অমনি৷ মণিপুর মনুংগী ওইনা চত্থোক-চতশিনগী অমত্তা ঙায়রবা পাম্বৈসি কংফাল (সোরোক) লম্বী অসিনা ওইরিবনি৷ ভারতকী অতৈ রাজ্য খরদদি সোরোক লম্বী অসি নীংথিজনা লৈবতা নত্তনা ত্রেইনগী অমসুং নোংথক্কী খুদোং চাবসু লৈ৷

মণিপুরনা মপান লমগা শম্ননবগী পাম্বৈসু কংফাল লম্বী অসিগা নোংথক লম্বী অসিগা অনী অসিতনি৷ নোংথক লম্বীদি মণিপুরগী কন্ত্রোল মখাদা লৈতবনিনা নীংথিজনা চলাইরি৷ অদুবু কংফাল লম্বীদা অমত্তা ঙায়রিবা সোরোক লম্বী অসিদি মণিপুরগী কন্ত্রোল মখাদা (নাকোইননবু ওইরবসু) লৈবনা চাওখতহনবা ঙমদে৷ (মণিপুরনা কন্ত্রোল তৌবদা চাওখতপা লোয়শঙ নত্ত্রগা মশঙ অমত্তা লৈতে৷)

সোরোক লম্বীদা নেসনেল হায়ৱে অমসুং ষ্টেট হায়ৱে হায়বসি য়াম্নমক মরু ওইবনি৷ নেসনেল হায়ৱেনা অতৈ রাজ্যশিংগা শমজিন্নহল্লি অদুগা ষ্টেট হায়ৱেনা দিষ্ট্রিক মশেন শমজিন্নহল্লি৷ মণিপুরগী নেসনেল হায়ৱে অনীনি৷ মণিপুরনা ভারতকী রাজ্য অমা ওইনা চহী ৩৮রোম লৈরক্লবফাওবদা খৌনাউগী মরু ওইবা শিংলী অনী ওইরিবা হায়ৱে অনীসিবু কন্ত্রোল তৌবা ঙমদে৷ নেসনেল হায়ৱেদা সেন্তরনা হকথেংননা কন্ত্রোল তৌরবসু রাজ্য সরকারগী মপাঙ্গলদি নাকোইননবু ওইরবসু লৈ৷ মদু মণিপুরনা শীজিন্নবা ঙমলক্তে, ঙমদ্রি, ঙমগনি হায়বসু থাজদে৷

মণিপুর এসেমব্লিনা চহী খূদিংগী বদজেটতা লম্বী-থোংগীদমক শেনফম কয়ামরোম কাইথোক্লি৷ অদুবু দিষ্ট্রিক মশেন শমজিন্নবা লম্বীগী ফীবমদি ফগতহনবা ঙমদে৷ মশাগী কন্ত্রোল মনুংদা হকথেংননা মপাঙ্গল লৈবা মফমদা লম্বী থোং ফগতহনবা ঙমদবা অসিনা তাকপদি মণিপুর সরকারসি হীরম অসিদা মরু ওইনা লৌদে, খন্দে নত্ত্রগা হীরম অসি মরন্নাই শেন্দান লম্বী ওইনা লৌৱি হায়বসিনি৷

দিষ্ট্রিক মশেন শমজিন্ননবগী লম্বী শেম্বদা মীতয়েং থম্বা ঙমদবা সরকার অসিনা দিষ্ট্রিক অমদগী মাগী সব দিবিজনশিংগী শমজিন্নবা লম্বীদি কদায়দগী নীংথিনা মীতয়েং চঙবা ঙম্লমগদগে৷ ম্যুনিসিপালিতিগী এরিয়াশিং অমসুং খুঙ্গংগা শম্নবা লম্বীগী ফীবম করি ওইরমগদগে৷ লম্বী-থোংগী ফীবম অসি য়েংলগসু মণিপুর সরকারদি পেরালাইজ ওইরবা সরকারনি হায়না অঙাং অমনসু হায়গনি৷

মরম অদুনা নেসনেল হায়ৱে ৫৩ (দবল লেন ওইহনবা) য়াওনা মণিপুরগী ষ্টেট হায়ৱেশিং, মরু ওইবা দিষ্ট্রক লম্বী(Major District Roads)শিং, অতৈ দিষ্ট্রিক লম্বী(Other District Roads)শিং, খুঙ্গংগা ফাওনবা লম্বী(Inter- village Roads)শিং চাওখতহন্নবগীদমক ইং ২০১১-২০১৫বু লম্বী-থোং শেম্বগী চহী মঙা হায়না লাউথোক্তুনা ফীবম ফগতহন্নবা হোতনবিগদবনি৷ খরা ফনা লৈরবশিংনা অকায়-অতোই শেমজিনবা, ফীবম তাদ্রবশিংনা তাহন্নবা হোতনবা৷ থবক মায় পাক্নবগীদমক প্লানগী শেন্ফমসু হেনগতহনবিগদবনি৷

লম্বী-থোং চাওখতপা হায়বসী মণিপুরগী মরু ওইবা তৌদবা য়াদবশিংগী মনুংদা অমনি৷
---
ত্রান্সপোর্টেসননা মরম ওইরগা মণিপুরনা নাগালেণ্ডগা লৈনরম্বা অফবা মরী মাঙশিল্লক্লি. মীতৈগা নাগাগা খাইবুং-খাইবুং তানবা উরক্লি. গারি থৌবা (দ্রাইভর) অমসুং মখোয়গী লূপশিংগা লেম্না শেন্দানবা (শেল দিমান্দ তৌবা)শিংগা অফবা মরী লৈনরকত্রি. প্রজাশিংনা মসিগী চৈথেঙ ফংলি.

মসিগী ওন্ন-তৈনবদা, ত্রান্সপোর্টেসননা বোরোগা অসামিসকা অমত্তা ওইশিন্নরকই. মণিপুরগী নাগা ইচিন-ইনাউগা নাগালেণ্ডগী নাগা ইচিন-ইনাউশিংগা নকশিন্নহল্লি, অসিনচিংবা. মিজোরমগা মেঘালয়া অমসুং অসামগা নুংশিনহল্লি, অসামগা অরুনাচল অমসুং ত্রিপুরাগা নুংশিনহল্লি. পীথোক-পীশিনগী মরী হেনগতহল্লি. নুংশিনবা চাওখতলি. লৈত-লায়রা তাথোক-তাশিন তৌনরকই. অমনা-অমগী মাঙনবা তৌনদে. নুংশিনবগী, য়াশিনবগী, ঙাকপীবগী য়ূম্ফম পাকথোক-চাউথোরকই.

ইম্ফালনা খোয়দৌ ওইরগা অতৈ দিষ্ট্রিক্টশিংগা ত্রান্সপোর্তেসনগী খ্বাইদগী ফবা মরীদু লৈরম্লবদি হৌজিক লৈরিবা ঈরাং অসিগী চাংদা লৈরমদবা ফাওবা য়ারম্মী. মণিপুর সরকারনা নত্ত্রগা অখঙ-অহৈশিংনা ত্রান্সপোর্টেসনগী মমল খঙলমদবসি অচৌবা অহোবা অমনি. হীরমসিদা ঐখোয়গী অখঙ-অহৈশিং মরাং কায়দে হায়না লৌবা তারি.

ত্রান্সপোর্টেসননা করিগুম্বদা অমগা-অমগা য়েক্নহনবা ঙম্লবদি ত্রান্সপোর্টসননা নুংশিনবসু পুরকপা ঙমফম থোকই. ঐখোয়গী ত্রান্সপোর্টেসননা অমগা-অমগা য়েংথিনহনবগী মায়গৈদা লৈরবসি নুংশিনহনবগী মায়গৈদা পুরকপা অমা চঙলি. চাওখতপগী মায়গৈদা চতখতকে হায়রবদি ত্রান্সপোর্টেসনগী তঙাইফদবসি খঙফম থোকই.

-এন দি হোদাম্বা.