দিসেম্বর ২৫: খৃষ্টমাস অমসুং যিসু পোকপা নুমিত

দিসেম্বর ২৫: খৃষ্টমাস

দিসেম্বরগী তাং ২৫ মালেমগী মীপূম অয়াম্বনা ‘খৃষ্টমাস’ হায়না অচৌবা থৌরম পাঙথোক্নৈ৷ থৌরম অসী পাঙথোক্নবগীদমক্তসু লৈবাক অয়াম্বনা লোয়শঙ কানদে, লৈবাক্কী লোয়শঙশিংসু ছুটি থায়৷ খৃষ্টমাস অসী যিসু খূষ্টগী মপোক নুমিতনি হায়নসু ময়াম্না খঙনরি৷ নুমিত অসীদা মীপূম খূদিংমক হরাও তয়াম্মিন্নৈ, অমনা অমদা য়াইফ-পাউজেল পীনৈ৷ অহনবা ফি-রোল শেত চাদুনা চতথোক্নৈ৷ নীংনশঙ (চর্চ) তা নীংশিং থৌরম পাঙথোক্নৈ৷ থাগত ঈশৈ, হরাও তয়াম্বা ফোঙদোকপা ঈশৈ, যিসু পোকপগা মরী লৈনবা ঈশৈ অমসুং বাইবলগী পরেং কয়া মানা-মানা ঙম্বা মওংদা শক্নদুনা অমসুং পাথোক্নদুনা নুমিত অসীবু ঙাক্নৈ৷ শীংলূপকী অহল লুচিংবা পাষ্টরনা যিসু পোকপগী মরমদা ৱাপাউ শন্দোক্তুনা নুমিত অসীগী মরু ওইবদু অমুক হন্না নীংশিংই৷ শীংলূপকী থবক লোইরগা ইমুং অমনা অমবু কৌনদুনা অহাউ-অথুম, মথেল-মকোইনচিংবা চামিন্নৈ৷ পূম্নমক অসীগী ময়োল অসী ইবুংঙো খৃষ্ট যিসুদা ওই৷ ইবুঙো খৃষ্ট যিসুদা য়ূম্ফম ওইদবা খৃষ্টমাসকী থৌরম অদুদি অরেম্বনি৷

‘খৃষ্টমাস’ হায়বা ৱাহৈ অসী খৃষ্ট চহী ১০৩৮ অদুৱাইদা অহানবা ওইনা শীজিন্নবা থেংনখি৷ মসী ‘খৃষ্ট’ অমসুং ‘মাস’ হায়বা ৱাহৈ অনী অসী পূনশিন্নরগা শেম্বনি৷ অপূনবা অর্থনা ‘থাউ নোইবিখ্রবা/হৈবীখ্রবা অদুবু নীংশিংবা থৌরম’ হায়বনি৷ তৌবগীদি খৃষ্টমাসকী থৌরম অসী যিসু পোকত্রিঙৈদগী চতনরকপা কুম্মৈ ওইনা লৈরম্বনি৷ মতমদুদা অতোপ্পা লৌরোক কুম্মৈ ওইনা লৈরম্বনি৷ কোন্নথংদা, অখঙ-অহৈশিংনা যিসু পোকপা নুমিতকা মরী লৈনহনখিবনি৷

নুমিত অসী পাঙথোকপদা নোংপোক অমসুং নোংচূপ অনীগী মতম খেন্নবা লৈরম্মী৷ নোংচূপকী থাজবশিংনা দিসেম্বর ২৫ দা পাঙথোক্লগা নোংপোককী থাজবশিংনা জনুৱারী ৬ তা পাঙথোক্নরম্মী৷ হৌজিকসু মফম খরদা পাঙথোক্নবা লৈরি৷ অদুম ওইনমক, মালেমগী ওইনা য়ানরিবসি দিসেম্বর ২৫ অসীদা ওইরে৷ দিসেম্বর ২৫ না খৃষ্টমাসকী নুমিত ওইনা লৌরগা জনুৱারী ৬ ফাওববুনা খৃষ্টমাসকী মতম (সিজন) হায়না লৌনদুনা থৌরম পাঙথোক্নবা অসী অয়াম্বা মফমদা চতনরি৷

যিসু পোকপা নুমিত

কনা অমত্তনা যিসুগী অশেংবা মপোক নুমিত হায়বা ঙমদ্রি৷ হীরম অসীদা অখঙ-অহৈ কয়ানা তোঙান-তোঙানবা মতম অমসুং নুমিত পী৷ হৌজিক-হৌজিক য়ানদুনা চতলিবা দিসেম্বর ২৫ অসী যিসুগী মপোক নুমিত ওইফম থোক্তে হায়না প্রমান পীবা থিজিল্লোয় কয়া অমসু লৈ৷ অদুম ওইনমক, লৈখাই অমা তানদ্রিবা ফাওবদি ঐখোয়না দিসেম্বর ২৫ অসী ইবুংঙো খৃষ্ট যিসুগী মপোক নুমিতনি হায়না লৌখিগনি৷

যিসু পোকপগী ৱারী

যিসু পোকপগী ৱারী অসী ‘অশেংবা বাইবল’ শাস্ত্র অসীদা ময়েক শেংনা য়াওই৷ মাত্থি ১: ১৮-২৫ তা ৱারী অসী মখাগী অসুম্না লীরি-

‘‘যিসু খৃষ্ট অসী মতৌ অসুম্না পোকখি, মহাক্কী মমা মেরী অসী যোষেফকা ৱারোইনরগা, মখোয়গা লৈমিন্নদ্রিঙৈগী মমাঙদা মহাক অসী থৱায় অশেংবগী মপান্না মীরোল্লে হায়বা খঙলে৷ অদুবু মহাক্কী মপোরোইবা যোষেফ অসী অচুম্বা চতপা মী অমসুং মীয়ামগী মাঙদা মহাকপু পান্দম ওইহন্নীংদবা মরম্না যোষেফনা মহাকপু লোন্না থাদোক্কে হায়না খল্লম্মী৷ অদুবু মহাক্না ৱাফম অসী খল্লিঙৈদা, য়েংঙু, ইবুংঙোগী দুত অমনা মহাক্কী মমঙদা উহনবিদুনা হায়, ‘দেবিদকী মচা যোষেফ, মেরীবু নহাক্কী নুপী ওইনা লৌবা কিগনু, মরমদি মহাক্না মীরোল্লিবা অঙাং অদু থৱায় অশেংবদগীনি৷ মহাক্না মচা নুপা অমা পোক্কনি, অদুগা নহাক্না মহাক্কী মমিং যিসু থোনগদবনি, মরমদি মহাক্না মহাক্কী মীশিংবু মখোয়গী পাপতগী কনবিগনি’৷ ৱা তাকথোকপা অদুগী মপান্না ইবুঙোনা হায়খিবা অদু থুংননবা পূম্নমক অসী থোক্লরেঃ ‘য়েংঙু লৈশাবী অশেংবী অদুনা মীরোন্দুনা মচা নুপা অমা পোক্কনি, মহাক্কী মিমং ইম্মানুয়েল কৌগনি’ মসীগী অর্থদি ‘ঐখোয়গা লৈমিন্নবা ঈশ্বর’ হায়বনি৷ যোষেফনা তূম্বদগী হৌগতলগা ইবুঙোগী দুত অদুনা মাঙোন্দা য়াথং পীখিবা মতুং ইন্না মহাক্না তৌখি, অদুগা নুপী অদু মহাক্কী নুপী ওইনা লৌখি৷ অদুবু মহাক্না অহানবা মচানুপা অদু পোকত্রিবা ফাওবা ফমদিন্নরমদে, অদুগা যোষেফনা অঙাং অদুগী মিং যিসু থোনখি৷’’

 

পোকত্রিঙৈদগী হৌনা যিসুগী মরমদা শাস্ত্রনা ফোঙদোকপীখি

যিসু পোক্ত্রঙৈদগী হৌনা মহাক পোক্কনি হায়বসী মাঙজৌননা ফোঙদোকপীখিবা লৈখি৷ অরিবা ৱালেপ্নবগী লাইরিক যিশাইয়া ৭: ১৪ দা হায়দোকপীরম্মি ‘য়েংঙু, লৈশাবী অশেংবী অদুনা মীরোন্দুনা মচা নুপা অমা পোক্কনি, মহাক্কী মমিং ইম্মানুয়েল কৌগনি’৷ হায়রিবা ইম্মানুয়েল অসী মথক্কী পরেংশিংদা ‘ঐখোয়গা লৈমিন্নবা ঈশ্বর’ হায়না ৱাহন্থোক পীখ্রবা অদুনি৷ লাইরিক অসীমক্কী পন্দুপ ৯ ৱাহৈ পরেং ৬ অমসুং ৭ তা অতৈসু হায়রম্মি ‘মরমদি ঐখোয়দা অঙাং অমা পোক্লে, ঐখোয়দা মচানুপা অমা পীবিরে, মহাক্কী লেংবান্দা লৈঙাক সাসন লৈগনি, মহাক্কী মমিং কৌগনি অঙকপা, পাউতাক পীবা, মতিক চাউবা ঈশ্বর, লোম্বা নাইদবা ইপা অমসুং ঈংথবগী নিংথৌ’৷

যিসু পোকপগা মরী লৈনবা থৌদোক খরা

১. লৈশা-লৈশানা মেরীনা অঙাং অমা পোক্কনি হায়রবদা মদু করম্না ওইথোক্কদগে হায়না হংবা ৱাহংগী পাউখুম ওইনা স্বর্গদুতনা মেরীদা ফোঙদোকপীখি৷ লুক ১: ৩৫ দা ইরি, ‘থৱায় অশেংবনা নহাক্কী নথক্তা লেঙথবিরক্কনি অদুগা ৱাংথোইরবা অদুগী পাঙ্গলনা নহাকপু লুমশিনবিগনি, মরম অদুনা পোক্কদৌবা অশেংবা অঙাং অদু ঈশ্বরগী মচানুপা কৌগনি৷

২. মীথুংশঙদা মখোয়গী লৈফম লৈরমদে, মরম অদুনা যিসু য়াউশঙদা পোকখি৷ লুক ২: ১-৭ দা হায় ‘মতম অদুদা অসুম্না থোকখি, তাইবংপান্দা লৈবা মী খূদিংমকপু মশীং থীগদবনি হায়না কৈশার আগষ্টসনা য়াথং অমা পীখি৷ মসীগী মীকোক থীবা অসী কুরিনিনা শাইরিয়াগী লৈঙাক মপু ওইরিঙৈদনি৷ অদুনা মী খূদিং মাগী-মাগী শহরদা মিং ইখতনবা চতনরম্মী৷ যোষেফসু গালিলগী নজারেথ খুংগংদগী জুদিয়াগী লমদা, বেথলেহম কৌবা দেবিদকী শহরদা কারকখি, মরমদি মহাক দেবিদকী শাগৈ অমসুং ইমুং ওইরম্মী৷ মহাক্কা ৱারোইনখ্রবী মীরোল্লিবী মেরীগা মমিং ইখতনবা মহাক্না মফম অদুদা লৈরিঙৈদা মেরীনা অঙাং উনবগী মতম ওইরম্মী৷ অদুগা মেরীনা মহাক্কী অহানবা মচানিপা অমা পোকখি, অদুগা অঙাং অদু ফি অমনা য়োমশিল্লগা মহাকপু সবম অমদা হীপহল্লম্মী, মরমদি মীথুংশঙ অদুদা মখোয়গীদমক মফম লৈরমদে৷’

৩. স্বর্গদুতনা অহীং য়ারেক্লিবা য়াউশেনবশিংদা যিসু পোকপগী পাউ ফোঙদোকপীরম্মী৷ লুক ২: ১০-১৪ দা ইরি ‘কিগনু, মরমদি য়েংঙু, ঐনা নখোয়দা মী পূম্নমক্কী ওইগদবা য়াম্না হরাওবগী অফবা ৱাপাউ পুরক্লি, মরমদি ঙসি দেবিদকী শহরদা নখোয়গীদমক কনবীবা মপু অমা পোক্লে, মহাক্তি ইবুঙো খৃষ্টনি৷ মসি নখোয়গীদমক খূদম ওইগনি, সবম অমদা ফিনা য়োমশিনবা অঙাং অমা হিপ্লিবা নখোয়না ফংগনি’৷ অদুগা খঙহৌদনা স্বর্গগী কাঙবু ময়াম্না স্বর্গদুত অদুগা লোয়ননা ঈশ্বরবু থাগত্তুনা হায়রকই ‘খ্বায়দগী হেন্না ৱাংমদা ঈশ্বরগী মতিক মগুন থাগতপা, তাইবংপান্দা মহাক্কী অপেনবা ওইরিবা মীশিংগী মথক্তা ঈংথবা’৷

৪. স্বর্গদুতশিংনা হায়খিবা মতুং ইন্না য়াউশেনবশিংনা য়েংবা লাকখি৷ মখোয়না তাখ্রবা পূম্বা চুম্না উরবদা ঙকখি৷ মখোয়না মসী উরবদা অঙাং অসীগী মরমদা মখোয়না তাখ্রবশিংদু কোইশন শন্দোকখি৷ অতাবশিংসু ঙক্নখি৷ মেরীনদি থৌদোক অদু মপূক্নীংদা থমজিনজখি৷ -লুক ২: ১৫-২০

৫. যিসু পোকপগী থৱানমিচাক উবদা নোংপোক্লোমগী অখঙ-অহৈশিংনা থিরকখি৷ মখোয়না জেরুজলেমদা লাক্লগা হংলবদু মাত্থি ২: ২ দা ইরি ‘যিহুদিশিংগী পোকখ্রবা নিংথৌ অদু কদায়দা লৈবগে মরমদি ঐখোয়না নোংপোক্লোমদা মহাক্কী থৱানমিচাক উরম্মি৷ অদুনা ঐখোয়না মহাকপু খুরুম্নবা লাকচবনি৷’

৬. লাংতক্নরবা হেরোদ নিংথৌনা অথোইবা পুরোহিতশিং অমসুং মীশিংগী ৱায়েন য়াথংগী ওজাশিং খোমজিল্লগা খৃষ্ট পোক্কনি হায়বা মফমগী মতাংদা হংখি৷ অখঙ-অহৈশিংগী পাউখুম অদু মাত্থি ২: ৫-৬ দা ইরি ‘‘‘যুদিয়াগী বেথলেহমদনি’, মরমদি ৱা তাকথোকপা মী অদুনা ইখিবা অদু অসীনি ‘যুদিয়াগী লমদা লৈবা বেথলেহম নহাক্তি, যুদিয়াগী লুচিংবশিংগী মরক্তা খ্বায়দগী তোনবা অদু নত্তে, মরমদি নঙোন্দগী লৈঙাকপা অমা থোরক্কনি, মহাক্না ঐগী মী ইজ্রাইলশিংবু চিংবিগনি৷’’’

৭. অখঙ অহৈশিংনা পোকপদা ঙায়রিবা যিসুবু উরগা খুরমজখি, মখোয়গী লোয়নরকপা লন থুমশিং কতখি৷ মাত্থি ২: ৯-১১ দা ইরি ‘...অঙাং অদুনা লৈরিবা মফম অদুদা লাক্তুনা লেপত্রিবা ফাওবা মখোয়না নোংপোক্লোমদা উখিবা থৱানমিচাক অদুনা মখোয়গী মাঙ থাদুনা চতলম্মী৷ মখোয়না থৱানমিচাক অদু উবা মতমদা হায়নীংঙাই লৈতনা য়াম্না হরাওখি৷ মখোয়না য়ূম অদুদা চঙলকপদা পীক্লিবা অঙাং অদু মমা মেরীগা লোয়ননা লৈবা উরে অমসুং খূ লৈতানা মহাকপু খুরুমজরে৷ অদুগা মখোয়না মখোয়গী লন-থুমশিং লৌথোক্তুনা মাঙোন্দা সনা, কুন্দুরু অমসুং মুরা খূদোন ওইনা তম্লে৷’

 

যিসু কনানো অমসুং মহাক্না করিগীদমক তাইবংপান্দা লাকপীখিবনো

যিসু খৃষ্ট অসী ঈশ্বরনি (যোহান ১: ১, ১৪)৷ ঈশ্বর অদুনা হকচাং পানবা মতমদা মচানুপা ওইনা (গালাতিয় ৪: ৪) তাইবং শক্তম লৌবনি৷ মরম অদুনা মহাকপু ঈশ্বরগী মচানুপা (লুক ১: ৩৫, যোহান ৩: ১৬, ১ যোহান ৫: ২০) হায়না কৌনরিবনি৷ মীতনা উঙমদবা ঈশ্বর অদুনা মীতনা উঙম্বা তাইবং মীওই ওইরকপা মতমদা মচানুপা ওইনা ঐখোয়দা ফোঙদোকপীরবনি৷ খৃষ্টান থিওলোজিনা তম্বীবা ‘ত্রিনিতি’ (মপা ঈশ্বর, মচা ঈশ্বর, থৱায় অশেংবা ঈশ্বর)গী মনুংদা যিসু অসী অনীশুবা ওইনা লৈবনি৷ ঈশ্বর মশামক্না ৱা তাকথোকপা পাউখোল্লোয় (প্রোফেট) শিংগী খূত্থাংদা থেংখাঙ নাইনা ফোঙদোকপীখিবা ৱাশক অদু ইবুঙো খৃষ্ট যিসু ওইনা ফোঙদোকপীদুনা চুমহনবিবনি৷

মহাক্না তাইবংপান অসীদা লাকপীবগী মরু ওইবা মরম ময়ামগী মনুংদা তরাখক লৌখতচরি-

১. পাপীশিংবু কনবিননবা লাকপীখিবনি৷ পাপীশিংবু মাঙহন্ননবা লাকপা নত্তে৷ পাপনা মরম ওইরগা তাইবং মীশিংনা ঈশ্বরগীরোমদগী লাপথোকখ্রে৷ নোরোককী লম্বীদা চতখ্রে, থৱায়দা লোম্বা নাইদনা শিখিদুনা ঈশ্বরগিরোমদা হল্লকত্রে৷ মরম অদুনা পাপতা শিখ্রগদবা পাপীশিংবু কনবিনবা লাকপীখিবনি৷ (খৃষ্ট যিসুনা পাপ চেনবশিংবু কনবিনবা তাইবংপানদা লাক্লে হায়বা ৱা অসী থাজবা য়াবনি অমসুং লৌশিনবদা মতিক চাবনি৷ -১ তিমোথি ১: ১৫)

২. পাপনা মরম ওইরগা মাঙখ্রবা ঈশ্বরগী ওইবশিং অদু অমুক থিজিন্নবা লাকপীখিবনি৷ তাইবং মী অসী ঈশ্বরগী মরলনি অদুবু পাপনা মরম ওইদুনা ঈশ্বরগী ওইরম্বা ঐখোয় মীওইবসী অমাঙবা হায়বদু ওইরে, ঈশ্বরগী ওইদ্রে, সইতানগী ওইখ্রে৷ মরম অদুনা মাঙখ্রবশিংদু অমুক হন্না থিদোক্তুনা ঈশ্বরগী ওইহন্ননবা লাকপীখিবনি৷ (মরমদি মীগী মচানুপা অদুনা মাঙখ্রবা অদুবু থিবা অমসুং কনবিবা লাক্লে৷ –লুক ১৯: ১০)

৩. মশাবু পূম্নমক্কী হন্দোকমল (থাদোকমল) ওইনা কত্থোকপীরনবা লাকপীখিবনি৷ (মীগী মচানুপা অদুনা মশাবু থৌগল তৌহন্নবা লাকপা নত্তে, অদুবু থৌগল তৌনবা অমসুং ময়ামগী থাদোকমল ওইনা মহাক্কী থৱায় থাদোকপা লাকপনি৷ -মাত্থি ২০: ২৮)

৪. মপা (ইপা ঈশ্বর) গী অনীংবা অদু পাঙথোকপীরনবা লাকপীখিবনি৷ (ঐনা ইশাগী অনীংবা তৌনবা স্বর্গদগী কূমথরকপা নত্তে, অদুবু ঐবু থারকপা মহাক্কী অনীংবা তৌনবী কূমথরকপনি৷ –যোহান ৬: ৩৮)

৫. তাইবংপানবগী মঙাল ওইবিরনবগীদমক লাকপীখিবনি৷ (ঐবু থাজবা মী খূদিংমক্না অমম্বদা লৈতনবা ঐনা তাইবংপান্দা মঙাল ওইনা লাক্লে৷ –যোহান ১২: ৪৬)

৬. তাইবংপান অসীবু ৱায়েনবিননবা লাকপীখিবনি৷ (ঐনা ৱায়েন্নবা তাইবংপান্দা লাক্লে, মরমদি উদবা মখোয়বু উহন্নবনি, অউবা মখোয়বু মীত তাঙহন্নবনি৷ -যোহান ৯: ৩৯)

৭. ঈশ্বরগী নিংথৌ লৈবাক অদুগী মরমদা খঙহল্লনবা অমসুং তম্বীরনবগীদমক লাকপীখিবনি৷ (ঐনা পাউ শন্দোক্নবা ঐখোয়না অনকপা শহরশিংদসু চতসি, মরম অসীগীদমক ঐ লাকপনি৷ –মার্ক ১: ৩৮)

৮. ক্রোসতা পাং তিংদুনা শিবিরনবগীদমক লাকপীখিবনি৷ (ইপা পূংফম অসীদগী ঐবু কনবিয়ু, অদুবু মরম অসীগীদমক ঐনা পূংফম অসীদা লাকপনি৷ –যোহান ১২: ২৭)

৯. ৱায়েল য়াথং পূম্নমক মপূং ফাহন্নবা লাকপীখিবনি৷ (ঐনা ৱায়েল য়াথং নত্ত্রগা ৱা তাকথোকপা মীশিংগী ৱা অদু মাঙহনবা লাকপনি হায়না খনগনু, ঐনা মাঙহনবা লাকপা নত্তে, অদুবু থুংহনবা লাকপনি৷ –মাত্থি ৫: ১৭)

১০. লাই ফত্তবা সইতান (দিয়াবোল)গী থবকশিং মাঙহন্নবগীদমক লাকপীখিবনি৷ (পাপকী থবক তৌরিবা মী অদু দিয়াবোলদগীনি, মরমদি দিয়াবোলদি অহৌবদগী পাপ তৌদুনা লৈরক্লি৷ দিয়াবোলগী থবক মাঙহন্নবা ঈশ্বরগী মচানুপা অদুবু ফোঙদোকপীরে৷ -১ যোহান ৩: ৮)

 

ৱারোইশিন

তাইবংপানসীদা পাপনা মরম ওইদুনা ঈশ্বরদগী তাইবং মীওইবনা লাপথোকখ্রবদা, ঈশ্বরগী ওইবশিং অদু ঈশ্বরগীরোমদা অমুক হনজিন্নবা মশাবু পাপীশিংগী উশিন ওইনা ক্রোসতা পাং তিংদুনা শিদোকপীননবা ইবুংঙো খৃষ্ট যিসুনা তাইবংপানদা লাকপীখিবা অসীমক থৱায়গী মরীদা খ্বায়দগী থোই হেল্লবা পাউজেল অদুনি৷ পাউজেল অসী তাইবংপানসিদা লৈরিবা মীপূম খূদিংমক্না ফংবা ওইরসনু৷ অসুম্না ঐখোয়বু থাদোকমল পীবিদুনা হন্দোকপা লাকপীখিবা ইবুংঙো খৃষ্ট যিসুগী মপোক নুমিতনা লাকপা অসীদা খূদিংমকপু হরাও-তয়াম্বা ফোঙদোকচরি৷ মতিক মঙাল চাউরবা ইবুংঙো মহাক্কী মরমদা ইরিবা তেনখ্রবা ৱারোল খরা অসী পাখ্রবশিংগী থৱায়দা ঈশ্বরনা ৱা ঙাঙবিবসু ওইরসনু৷ খৃষ্ট যিসুবু কনবিবা মপুনি হায়না থাজবা অমসুং থাজদবা ইচিন-ইনাউ খূদিংমক্না থৱায়গী লোম্নাইদবা থৌজাল বোর অদু মমল চঙদনা ফংবা ওইরসনু৷ পূম্নমকপু ‘হেপ্পি মেরি খৃষ্টমাস’ হায়বা য়াইফ-পাউজেল অসী পীজরি৷

-***-