কল্লক য়েংথীনবনা থনবা তাইবংসীদা নুংশি চান্নবগী পাউজেল পুদুনা ‘লাক্কনি অমুক হন্না’

মালেমগী ওইবা মণিপুরী সাহিত্যগী সিম্ফনি অমা শাগৎপদা ভারতনা মপূং ওইনা থৌদাং লৌরী। ভারতকী ওইনা রাজ্যশিংগী মনুংদা মণিপুরনা লমজিংবগী থৌদাং লৌরগা হেক ঙমথংদা থৌদাং য়ারিবসী অসাম রাজ্যনি। রাজ্য অসীগী তম্পাক অনীগী মনুংদা অমুক বরাকনা ব্রহ্মপুত্র তম্পাকতগী খরা হেন্না চাওখৎনা সাহিত্য নৈনবা উবা ফংই। বরাক তম্পাক্তা য়াকাই শৈরোল শৈশকখিবা অশৈবা নাউরিয়া ফুলো অমসুং য়েংখোম কমলগী তুংদা থোরকপা মরোয় মনাউ অশৈবশিংবু অহল্লোন, সরীনহা, নহারোল অমসুং নহামচা হায়না কাঙলূপ খায়দোকপা মতমদা ‘লাক্কনি অমুক হন্না’ ইবা অশৈবা তাহির সাজবম নহারোল মীরোলগী লমজিংবা ওইনা থম্বা য়াই।

  

অশৈবা তাহির সাজবম, কাছাড়গী সিঙ্গেরবন্দ খুঙ্গংদা ইং ১৯৬৪, মার্চকী তাং ১৩ দা  তাইবং ফাওখিবনি। অপোকপগী মিংনা শহাদত অলি অমসুং অপোকপীগী মিংনা কৈনৌময়ূম নজিমুননেছা কৌই। ৱারীমচা ‘ঙাইখিনি অচুম্বনা পোলোই ওইরকপা’ ইবী অইবী বদরুন নেছাগী মবুংনি। ষ্কুল, কোলেজ তম্লিঙৈদগী হৌরগা সাহিত্যগী চেফোঙ অমসুং শৈরেং শৈদিন্নবা কয়াদা শৈরেং কয়া ফোঙদোক-পাথোকখ্রবা মতুংদা অহানবা ওইনা ইং ১৯৯৮, ওক্টোবর থাদা, ‘অমম্বা মরকসিদা’ কৌবা শৈরেং লাইরিক অমা সাহিত্যগী তাইবংদা খূদোল তম্লকখিবনি। ওল ইন্দিয়া রেদিওগী এপ্রুব তৌরবা শৈরেংবা অমসু ওইরিবা অশৈবা তাহিরগী ‘লাক্কনি অমুক হন্না’ হায়বা শৈরেং লাইরিক অসী অশৈবগী অনীশুবা খূদোল ওইনা, অহানবা শৈরেং লাইরিককী চহী ২০ মতুং, ইং ২০১৮, ওক্টোবর থামক্তদা ফোঙদোরকপনি।

অশৈবা অসীগী অহানবা লাইরিক ‘অমম্বা মরকসিদা’ হায়বসীদা মশাগী ৱাখল্লোন ফোঙদোক্লদুনা হায়,

তঙ তানা, নুংশি চান্ন-চিন্ননা হিংমিন্নবগী ৱাখলনা মরাই চায়থরকপা, চাওখৎপগী খোঙজেলনা মহৌশাগী শংবানবা শক্তমবু মাঙহল্লকপা, আইন অমসুং শক্তিবু লান্না শীজিন্নরদুনা মীওইবগী হকপু খোঙ্গাওনরকপা, ইশাগী ওইজবতা থিবদা মীওইবা জাতিনি হায়বা ফাও’ কাউনরক্লবদা লৈশেম মপুগী নীংথিজরবা তাইবং কূপশিল্লকখি মৈখু মপৈনা। তাইবংগী মায়থোংনা মকশিল্লকপদা মিপাইজখি ঐগী থমোয়। লাংতক্ননা থিজখি থমোয়না মঙালগী লম্বী, অমম্বা মরক্তা।

অমম্বা মরক্তা মঙালবু থিবগী খোঙচৎ অসীগী মতাংদা শীংথানরবা অশৈবা খৈরুদ্দিন চৌধুরিনা ৱাহন্থোক পীরদুনা হায়,

মঙালদি ফজবা, থাজবা, অচুম্বা, নুংশিবা, অপেনবগী পান্দমনি। অমম্বনা চিংনবা, হিংচাবা, কল্লকপা, মিহৌবা, ওইজবা তানবা, হাৎন-থিন্নবা, মাঙ তাকপগী পান্দম্নি। কাংখোঙ চাইরবা পুন্সী মরেলনা মপূং ওইবা খুনাইগী মীচঙ শঙ্গন নাইরবা লৈঙাক্লোন, অমোৎপা শাজৎতা ওইজবতা তানবা অচৌবা সমাজ অমদা অপীকপা ফূরূপ অমগী পুন্সীদা থুংলরিবা অমম্বা অসীগী মরক্তা হিংলরিবা মীওইবা কাঙলূপ অসীগী মাঙচৎকী আশা অমা লৈরকত্রবদা ...।

অসুম্না, অহানবা লাইরিক্কী মতমদা চিংনবা, হিংচাবা, কল্লকপা, মিহৌবা, ওইজবা তানবা, হাৎন-থিন্নবা, মাঙ তাকপগী তাইবংপান ওইরিবা অমম্বা মরকসিদা লৈরগা ফজবা, থাজবা, অচুম্বা, নুংশিবা, অপেনবগী পান্দম ওইরিবা মঙালবু ঈখৌ লাংজখিবনি। অনীশুবা লাইরিক অসীদসু অশৈবা অসীগী মীৎয়েং পরীং মখা শমথরকপা ওইনা উই। ফোঙদোকপগী মওংদা মঙালগী পান্দম ওইরিবা নুংশিবগী পাউখোল্লোয় ওইনা মহাক্কী শৈরেংগী চরিত্র ওইরিবা ফার্ষ্ট পর্সন সিঙ্গুলর নম্বর ‘ঐ’ অসীনা নুংশিবগী পাউখোল্লোয় ওইদুনা অমুক হন্না মহাক্কী খুঙ্গংদা লাক্কনি হায়রি,

সনা মচুগী

ফৌ চরোংনা শেন্নরিবা

খুঙ্গংগী পীক্লবা লম্বীদা

লাক্কনি ঐ অমুক হন্না

নুংশিবতনা থল্লবা

থম্মোয়গী পোৎয়োমসে পুদুনা।

(লাক্কনি অমুক হন্না, লা.১১০)

অশৈবগী পোক্নফম লম্লেন ওইরিবা খুঙ্গং অসী ‘হাইফেৎ শকফম হোংখ্রবী’ ওইনা উরি। শকফম হোংহল্লিবসী অশৈবা খৈরুদ্দিনগী মীৎয়েংদগীদি চিংনবা, হিংচাবা, কল্লকপা, মিহৌবা, ওইজবা তানবা, হাৎন-থিন্নবা, মাঙ তাকপগী মরমনা ওইগনি হায়বসীনি। মরম অদুনা নুংশিবগী পাউখোল্লোয় ওইরিবা ‘ঐ’ অসীনা নুংশিবা অমসুং চান্ন-চিন্ননা হিংমিন্নবগী পান্দম ওইরিবা মঙালগী পাউজেল পুদুনা ‘লাক্কনি অমুক হন্না’ হায়রিবনি।

অশৈবা তাহির সাজবম

অশৈবগী অহানবা শৈরেং লাইরিকতা মালেম-পৃথিবী অমসুং মীওইবা খুনাই অসীবু সেকন্দ পর্সন সিঙ্গুলর নম্বর ‘নঙ’ হায়না এদ্রেস তৌরগা ‘ইমা’ ওইনা পর্সোনিফাইদ তৌদুনা ফোঙদোকখি। অমরোমদনা, শৈরেংদা ৱা ঙাঙলিবা চরিত্র (speaker of the poem) অসীনা মমাবু নুংশিজবা মচা ওইনা মমাগী শোকচিল্লবা ফীবমদা নিংদোল পোমজবগা লোয়ননা মঙালগী তাইবং অমবু ঈখৌলাংজবা ওইনা শৈথাখি। অনীশুবা শৈরেং লাইরিক অসীদনা, মালেম-পৃথিবী অমসুং মীওইবা খুনাই অসীবু ‘হাইফেৎ শকফম হোংখ্রবী’ মখুঙ্গং ওইনা শাগৎলগা ফজবা, অফবা, থাজবা, অচুম্বা, নুংশিবা, অপেনবনা থনজরম্বা মালেম অমা শেম্বা ঙম্নবা ৱা ঙাঙলিবা চরিত্র ‘ঐ’ অসীমক্না নুংশিবগী পাউখোল্লোয় ওইনা শৈথারি। ‘লাক্কনি অমুক হন্না’ হায়রিবগী মরমদি, নুংশিবা অমসুং চান্ন-চিন্নবনচিংবশিংসী লৈরম্মী, ফীবম খরদা লৈরুদরে, মরম অদুনা অমুক হন্না লাক্তুনা হান্নগী ফজবা তাইবংপান অদু অমুক হন্না শেমগৎনীংবগী ৱাফমনি। ঈশ্বর থাজবা অশৈবা অসীনা মখুঙ্গং ওইনা শৈথারিবা মালেম-পৃথিবী অসীদা ঈংথনা, মরা তপ্না, নুঙাই য়াইফনা পানবা তাইবংপান অমা ওইহনবীনবা লৈশেম্বগী মফমদসু থৌনিজগনি হায়রি।

‘লাক্কনি অমুক হন্না’ হায়বা লাইরিক অসীদা থেংনরিবা মখল-মথেলগী মীৎয়েং কয়ামরোম অসীদগী মপূং ওইনা লৌখৎচনীংবা মীৎয়েংসী অনীখক্তনি। মখোয়শিং অদুদি, অহানবদা- মালেম অসী য়েক্নবা, য়েংথিনবা, তূকৎচবা, তমথিবা, মীহাৎ-মীপুন, চরাংনবা, লৈতাদবা, লাংতক্নবা, মীপাইবা, তপথদবা, ওইজবা তানবা, হাৎন-শুনবা, হিংশা, কাঙলূপ নাইবগী অখূবা ৱাখল্লোন, লানগী মৈরীনা চাকথেক্লবা তাইবং, অচুম-অরানগী মশক লেপ্পা ঙম্লক্তবা মশক্না থল্লকপা মতৌ ওইনা উরিবসী পামজদবা ওইনা ফোঙদোকই। অনীশুবদা- নুংশিবা, নুংশিনবা, মীনুংশি, থাজবা অমসুং চিন্ন-চান্ননা হিংমিন্নবা মালেম অমা শেম্নীংবগী মতৌ অসীনি।

অহানবা মীৎয়েং অসী ফোঙদোকপা পরেং খরদং নীংশিংবা য়াবদি

ক.      মরাল লৈজদ্রবা অতিয়াগী মায়থোঙ

          কূপশিল্লকই চরাংনবগী অহীংনা

          থৱান্মিচাকশিংসু চোংথোরকই মথং-মথং

          কংশিল্লবা ঈগী

          অমসুং পিরাংগী।

                             (লান অসী লোইদ্রি, লা.১)

খ.       ইখঙ খঙহৌদনা নোংমা

          ওনখি মচু থম্মোয় অতিয়া

          তৈশীল্লদুনা মায়থোঙদা অমুবা

          লৈখি শমায় ঐঙোন্দগী।

          ফংখিদ্রে উবা নুমিত্তুদগী

          সনা ফূদোংবা মঙালসু কোরৌগী।

                             (নুংশিবগী মচু, লা.১৮)

অনীশুবগী মীৎয়েং অসী ফোঙদোকপা পরেং খরদি

ক.      লৈখল য়াম্বা লৈকোলনা

          হেনবগুম নীংথিবা ফজবা

          ওইহনসি তাইবং লৈকোলসে

          নীংথিবা পূম্বৈ নীংথিবা

          ফজবা পূম্বৈ ফজবা।

                             (হিংমিন্নসি, লা.২৬)

খ.       অহীং মমৈ ওইরক্লে

          থোক্লসী মীকপ মরূপশিং

          তোক্লসি শান্নবা ঈগী হোলি

          শেম্লসী লৈকোল নুংশি চান্নবগী

          য়েল্লসি লৈনম মালেম শীন্না।

                             (য়েল্লসি লৈনম, লা.৩৭)

গ.       হে লীক্লা

          পুন্সী ওইরবসু তেল্লবা

          মীনোক তমজনীংইনে ঐসু নহাক্কুম

          নুংশিবতনা থল্লবা

          অনৌবা অয়ুক অমদা

          কল্লক য়েংথিনবগী

          অমম্বা অহীংসিনা লোইখ্রগা।

                             (লীক্লা, লা.১০৩)

মীৎয়েং অনীসি ফোঙদোকপনা লাইরিক অসীগী মপূং ওইবা হীরম ওই। শীংথাবা য়াবা শৈরেংশিং খরদি- লান অসী লোইদ্রি (লা.১,২), মৈখু মরক্তা (লা.৩,৪), লীররোই খোঙ্গুল (লা.৫), লম্বীসীবু কদোমদনো (লা.১০,১১), নোংমা ইনাক্তা (লা.১৪,১৫), মরূপ শান্নসী (লা.১৯,২০), অরোইবা ৱায়েলগী নুমিত্তা (লা.৩২.৩৩), মাঙখ্রবদা সুর নুংশিবগী ঈশৈনা (লা.৩৮), অঙাঙবা নুমিৎ (লা.৩৯), কনাদা শিন্নরম্বগে (লা.৪০,৪১), মূৎশিল্লক্লবদা খোঙ্গুল মঙালগী (লা.৪৪,৪৫), বসন্ত (লা.৬৩-৬৫), চুরক্লো নোং (লা.৬৬,৬৭), কৈদৌঙৈ হল্লক্কনি (লা.৪৬,৪৭),  মেরাগী থাবল (লা.১০২) অসীনচিংবা।

অশৈবা তাহির সাজবমগী অনীশুবা শৈরেং লাইরিক ‘লাক্কনি অমুক হন্না’ হায়বসীগী মিংথোল ওইরিবা শৈরং অসী পারুরগা বাংলাদেশকী মমিং লৈরবা কবি এ কে সেরামনা মখাগী অসুম্না ফোঙদোকই।

‘লাক্কনি অমুক হন্না’, কদায়দা লাক্কনি হায়বনো, কদায়দগী লাক্কদবনো। কবি’সিবু কদায়দা চৎখিগদৌবনো, করিগীনো। মখল মখাগী ৱাখল কয়ানা লাংতক্নহনখি ঐগী থম্মোয়। মিংসি হেক তাবদা জীবনানন্দবুসু নীংশিংহনখি, নীংশিংখি মাগী শৈরেং- ‘আবার আসিব ফিরে’। নীংশিংখি মহাক্না হায়বিখিবা- ‘আবার আসিব ফিরে ধানসিঁড়িটির তীরে - এই বাংলায়/ হয়তো মানুষ নয় - হয়তো বা শঙ্খচিল শালিখের বেশে।’ কবি তাহির সাজবমসু মাগী মরমদম মরৈবাকপু নুংশিদুনা মনাৎ মশক্তমবু পামজদুনা হন্না-হন্না হল্লকনীংখি মাগী খুঙ্গংদুদা নুংশিবগী পোৎয়োম পুদুনা। কবিসিনা হায়রি- ‘সনামচুগী/ ফৌ চরোংনা শেন্নরিবা/ খুঙ্গংগী পীক্লবা লম্বীদা/ লাক্কনি ঐ অমুক হন্না/ নুংশিবতনা থল্লবা/ থম্মোয়গী পোৎয়োমসে পুদুনা’।

অশৈবগী ফোঙদোকপগী মতৌদা ৱাহৈ-ৱাতাগী থোৎ নৌবা অমদি নীংথিনা লৈচল শেম্বা মতৌনা পাবদা নুঙাইহল্লি, থমোয় অসীদা থলহল্লি। চম্না ফোঙদোকপা মতৌ অসীনা ফোঙদোক্নীংলিবা অদু থমোয়দা লায়না য়ৌরকপা ঙমহল্লি। নুংশিবা মাঙশিল্লক্লবা মালেম অসীদা নুংশিবগী পাউখোল্লোয় ওইনা লেপ্লিবা অসীমক ফীদম্নীংঙাই ওইবা অশৈবা অমগী মশক্নি। মতম চূপ্পদা অচুম্বা, অফবা অমসুং ফজবতবু লাংতক্নজবগী মতৌ ফোঙদোকপা অসীনা অশৈবা অসীগী লাইরিক অসী মীওইবা খুনাই অসীদা য়াম্নমক মমল লৈবা সাহিত্যগী পোত্থোক অমা ওইগনি হায়বগী থাজবা থম্লি। অশৈবা অসীনা চেল্লিবা নুংশিবগী পাউজেল অসী পাখ্রবা, নৈনখ্রবা অমদি তাখ্রবা মীপূম খূদিংমক্কী থমোয়দা নুংশিবা তূংদুনা লৈহৌবা ওইরবসনু। শাগৈ-জাত, কুচু-লোন তিন্নদবা, অনেম-অৱাং, অচৌ-মচা, লায়র-ঈনাক খুনবা, লাইনীং-লাইশোনগী খেন্নবা থিদনা মশেনগী মরক্তা নুংশিননা অমসুং চিন্ন-চান্ননা হিংমিন্নবা য়াবা থমোয়গী মালেম অমা শেমগৎপদা ‘লাক্কনি অমুক হন্না’ হায়রিবা লাইরিক অসীনসু অচৌবা থৌদাং লৌবা ওইরসনু।