‘ভাগ্যচন্দ্র লারৈ লাথূপ’ কৌবা চীরোন চঙবা লাইরিক অমা ‘মীতম্বাল’ কৌদুনা ফোঙদোরক্লিবা অসী অঙোম গোপীনা ইবা নত্তে।

এন দি হোদাম্বা মীতৈগী পুৱারীদা নিংথৌ অনীগী লারৈ লাথূপ লৈ। মখোয়শিং অদুদি- ‘পামহৈবা লারৈ লাথূপ’ অমসুং ‘ভাগ্যচন্দ্র লারৈ লাথূপ’। ‘পামহৈবা লারৈ লাথূপ’পু ‘শেনবী মুকাক্লৈ’ অমসুং ‘ভাগ্যচন্দ্র লারৈ লাথূপ’পুনা ‘মীতম্বাল’ কৌদুনা উনম তৌরগা কৈথেলদা ফংহল্লে। ‘মীতম্বাল’ কৌরবা ‘ভাগ্যচন্দ্র লারৈ লাথূপ’ অসী মতম অমগী কোনুংগী খোর্জৈ শূবা অঙোম গোপীনা ইবনি হায়না লাইরিক অসীদা ইরম্লিবা অসীমক্না চীরোল মপান থোকপনি হায়বগী মরু ওইবা খূদম ওইরি। লাইরিক অসীদা ইরি, ‘পাংজদ্রব গোপিন অঙোম শাগৈদ পোকচরক্লব মপু মাগী কোলোয়বু শোন্দন হয়েং পোইরৈগীদমক থোক্লক থোক্লকপ ৱাগী ৱাখুনবু ইজরমগে।’ –লা ২ অমুকসু হায়রিবা অঙোম গোপী অসী অঙোম চাউবা কৌরম্মী হায়না অমুক শেংদোরক্লি, ‘... মীতৈ পণ্ডিতশিংবুসু ময়াং ধর্ম্ম লৌদব য়াদে হায়দন লৌহনখি। ময়াংগী ধর্ম্ম অসী লৌদ্রিঙৈদ ওইখিব অশেংব মমিংশিংদি (১) অঙোম গোপী – অঙোম চাওব কৌরম্মী। (২) ৱাহেংব মাধবরাম – ৱাহেংবম চাওঙো কৌরম্মী। (৩) য়ূম্নাব খগেন্দ্র – য়ূম্নাম থোইব কৌরম্মী। অশুম্ন মখোয়গী অশেংব মৈতৈগী মমিংশিং অদু ময়াংগী ধর্ম্ম হেক লৌরুব নুমিত্তগী ...’ –লা ২৪ শেংদোক ৱারোল অসী কনাগুম্বা অহুমশুবা মীওই অমনা অঙোম গোপীখোয়গী মরমদা হায়বা ৱানি। অঙোম গোপী মশামক্না হায়বা ওইরোই হায়বসীনি। মরম অদুনা লাইরিক অসী অঙোম গোপী নত্তবা অতোপ্পা কনাগুম্বা অমনা চীরোল তৌদুনা মহাক্কী মমিং পন্দুনা ইশিনখিবনি হায়বসীনি। নাকন অমরোমদা, চীরোল তৌদুনা মিং পল্লিবা মীওই অদু অঙোম গোপীবু মুন্না খঙবা মীশক অমসু ওইরমদে হায়বসী মহাক্কী শাগৎলোন অসীদগী হায়বা ঙম্মী। মদুদি- ১. অঙোম গোপী হায়বসী মৈদিংঙু চীংথংখোম্বগী মতম (১৭৬৩-১৭৯৮) দা লৈরম্বা কোনুংগী অইবা অমা নত্তে, মহাক্তি মৈদিংঙু পামহৈবা সনা হাক্তক (১৭০৯-১৭৪৮) তা লৈরম্বনি হায়বসীনি। ২. অঙোম গোপীনা ইরম্বা লাইরিকশিংদি কৃতিবাসকী রামায়ণ অমসুং গঙ্গাদাসনা ইরম্বা মহাভারতকী ৱারীশিংনি। লাইরিক ওইনা ফংবদা – পরিক্ষিত সর্প যজ্ঞ, লঙ্কা কাণ্ড, অরণ্য কাণ্ড, কিষ্কিন্ধা কাণ্ড, সুন্দর কাণ্ড অমসুং উত্তর কাণ্ডনি। ৩. অঙোম গোপী মীরোলদা লৈবা ৱারীশিং ইরোলদা ইথোক্লম্বা অইবনি। থৌদোক ৱাথোক্কী মরমদা ইবা অইবা নত্তে। ৪. কোনুংগী অইবা অমত্তনা মহাক্কী মতমগী লৈবাক নিংথৌগী লারৈ লাথূপ ইরোই। পামহৈবা মতমগী অইবা অমনা ভাগ্যচন্দ্রগী মরমদা ইরম্ফম থোক্তে। মরমদি- ইনিংথৌ ভাগ্যচন্দ্রগী মতমদা অঙোম গোপী লৈতে। মৈদিংঙু পামহৈবা মতমদা লৈরম্বা কোনুংগী অতৈ অইবশিংদি – লাইশ্রম অরোই, য়ূম্নাবা অতিবার, নুঙ্গাংবম গোবিন্দরাম, ময়েংবম বৃন্দাবন অমসুং মাধবরাম ৱাহেংবা অসীনি। ইনিংথৌ ভাগ্যচন্দ্রগী মতমদা লৈরম্বা কোনুংগী অইবশিংদি- অ. নুঙ্গাংবম গোবিন্দরাম, আ. মাধবরাম ৱাহেংবা (নুঙ্গাংবম গোবিন্দরামগী পৌরা), ই. ৱাংখৈ পণ্ডিত গোপীরাম সিংহ, ঈ. নবানন্দ য়ুবরাজ অসীনি। নুঙ্গাংবম গোবিন্দরামসী পামহৈবগী মতমদগী লৈরক্লবা অইবনি। মহাক্না পাখঙবা নোঙ্গারোন, তখেল ঙম্বা অমসুং মীতৈরোনদা হন্দোক্লবা অষ্টকাল ইরম্মী। মহাক্না ভাগ্যচন্দ্রগী মতমদা লৈরিঙৈদা মৈহৌবরোন পুয়া ইবা হৌগৎলম্বনি। মাধবরাম ৱাহেংবা অসী শীংথানবা য়াবা অমনি। মহাক্না মৈদিংঙু পামহৈবগী মতমদা নুঙ্গাংবম গোবিন্দরামগী পৌরা ওইনা লৈরম্লগা মপূং ওইনা ইনিংথৌ ভাগ্যচন্দ্রগী মতমদা খ্বাইদগী হেন্না থৌগন তৌরম্মি। মহাক্না ইনিংথৌ লাবন্যচন্দ্রগী মতম ফাওবা সনা থৌগন ফংজরম্মী। মহাক্না ইরম্বা লাইরিকশিং অদুদি- ক. লাংলোন, খ. মহাভারত বিরাত পর্ব্ব, গ. চীংথংখোম্বা গঙ্গা চৎপা অমসুং ঘ. সনামনিক অসীনি। ইনিংথৌ ভাগ্যচন্দ্রগী মতমদা লৈরম্বা অতোপ্পা শীংথানবা য়াবা অইবদি মজাইবুঙো অহন নবানন্দ য়ুবরাজনি। মহাক্না রামকৃষ্ণদাসকী বিরাত পর্ব্ববু মীতৈরোনদা ‘বিরাত শান্থুপরোন’ হায়না হন্দোক্তুনা ইরম্মী। ‘চীংথংখোম্বা গঙ্গা চৎপা’ অসীদি ইনিংথৌ লাবন্যচন্দ্রগী মতমদা নিংথেমগী য়াথং মতুং ইন্না অইবা হরিচরন খাংয়েনবা, বরমণি লৌরেম্বা, খগেন্দ্র য়ূম্নাবা, খোঙচেন অহৈবখোয়না মাধবরাম ৱাহেংবগা পূন্না ইমিন্নখিবনি। ইনিংথৌ অসীগী মতমদা গঙ্গাদাস সেনগী অশ্বমেধ পর্ব্ব বু ‘লাঙ্গোই শগোল থাবা’ হায়না মিং থোন্দুনা অইবা খূৎপু অমদা হন্দোকহনখি। মখোয় অদুদি- মপুং ওইবা থৌদাং য়াখিবা লোংজম পরসুরাম, চিরোম অভিমন্যু, ৱাইরোকপম গঙ্গারাম, ওইনাম নবশ্যাম, থোকচোম ঘনশ্যাম, মাইবম অভিরাম, হিয়ামচা মদন অমসুং খাংলেনবম অভিরামনি। ‘মীতম্বাল’ হায়বা চীরোল চঙবা লাইরিক অসীদা পল্লম্বা অইবা অহুম অদুদা অঙোম গোপীনা মৈদিংঙু পামহৈবা সনা হাক্তক (১৭০৯-১৭৪৮) কিনি। মাধবরাম ৱাহেংবা-না মৈদিংঙু চীংথঙখোম্বা সনা হাক্তক (১৭৬৩-১৭৯৮) কিনি অদুগা য়ূম্নাবা খগেন্দ্র হায়রিবসীনা মৈদিংঙু লোইরেনখোম্বা (লাবন্যচন্দ্র) সনা হাক্তক (১৭৯৮-১৮০০) কিনি। লাইরিক অসীগী লামায় ৩৮ দা পল্লিবা মৈদিংঙু চীংথঙখোম্বগী তোঙান-তোঙানবা মিং ৬ (তরুক) অসীদা য়াওরিবা নাওজিলেন নোংদ্রেনখোম্বা হায়না ৬ শুবদা পল্লিবসী মৈদিংঙু চীংথঙখোম্বগী মিং নত্তে, মসীদি ইনিংথৌ চন্দ্রকীর্ত্তিগী ফম্বাল মিংলেননি। লাইরিক অসীগী লামায় ১ অমসুং ২ দা, মহাসয়না মাইতুম্বীদা ভাগ্যচন্দ্র পোকপা ওইনা অদুগা বীষ্ণু গোস্বামিনা পামহৈবা পোকপা ওইনা শাগৎলিবসী য়ূম্ফম য়াওদবা ৱারী ঙাক্তনি। ‘মীতম্বাল’ হায়রিবা লাইরিক অসিদা ইরিবা লোন্দা-পুদা অসীদগীসু লাইরিক অসী অঙোম গোপীনা ইরম্বা নত্তে হায়বা খঙবা ঙম্মি। মসীদি য়াম্নমক নৌরবা হায়বদি লাঞ্জাউ মতুংগী লোন্দা ওইগনি হায়বসীনি। মরম অদুনা, থমজখ্রিবা মীৎয়েং খরা অসীদগী লেপথোকপা য়াবদি - ‘মীতম্বাল’ হায়বা লাইরিক অসী চীরোল চঙবা, লৌখৎপা য়াদ্রবা লাইরিক অমনি হায়বসীনি। লাইরিক অসী পুৱারীগী থৌদোকশিংগা ফাংনদুনা য়েংবদা মরম চানা লেপচবা ঙমদ্রবা মায়থিরবা লাইরিক অমনি হায়বসীনি।