ৱাহৌদোক
মণিপুরী অমসুং বেঙ্গলি হায়রিবা মীওই ফূরূপ অনী
অসী মপূং ওইনদি, হিন্দু লাইনীংগা ইরোইননা, মশেনগী মরক্তা মরী লৈনবা হৌরকখিবনি
হায়না লৌবা য়াই। মণিপুরীশিংনা, মরু ওইনা, চহী তরেৎ খুন্তাকপগী মমাঙ অমসুং মতুংদা,
বরাক অমসুং সুরমা তম্পাককী তোঙান-তোঙানবা মফমশিংদা খুন্দারকপদগী বেঙ্গলিশিংগা
কোন্নথংদা য়ূম্লোন-কৈরোন্নবা ওইনা লৈমিন্নরকপনি। অসুম্না নক্ননা খুন্দামিন্নরকপা ফূরূপশিং ওইবনা মরম ওইরগা মশেনগী মরক্তা নাৎকী
অমদি খুনুং চৎনরোল কয়াদা শরুক ফংমিন্নবতা নত্তনা মশেনগী মরক্তা চীনবুং চৎনরোল কয়া
শেমগৎমিন্নরক্নবগী মরমসু ওইনরকই।
বেঙ্গলি
অমসুং মণিপুরী
বরাক তম্পাকতা, মণিপুরী
অমসুং বেঙ্গলি ফূরূপ অনী অসী নিংথৌ পাল্লম্বা দিমাসা কাঙলূপকী লৈঙাক্লোনদা য়াম্নমক
মরু ওইবা ফূরূপ অমমম ওইনা শরুক ফংমিন্নরকপা উবা ফংই। অসুম্না কোনুংদা মণিপুরী
নিংথৌ মচা গম্ভীর সিংহনা সেনাপতি ওইবা মতমদা বাংলা লোননা দিমাসা কোনুংগী অইবা লোন
ওইনা ফাওবা শীজিন্নরম্বগী মশক উবা ফংই। মণিপুরী নিংথৌ মচা চৌরজিৎনা ময়াম্বুং নিংথৌ
মধুচন্দ্রগী মতম (১৮০০ – ১৮০৩) দা নুঙাইতদুনা কাছাড়দা থোরক্লগা অরোনবা কোনুং
শেম্বা অমসুং মনাউ মারজিৎকী মতম (১৮১৩ – ১৮১৯) দা কাছাড়গী খা থংবা শরুক ফংদুনা
পানবা অমসুং মচিন-মনাউ অহুম (চৌরজিৎ, মারজিৎ অমসুং গম্ভীর সিংহ)না অপূনবা কাছাড়গী
লমবু শরুক অহুম থোক্না য়েন্নথোক্লগা চৌরজিৎনা সোনাইগী দুংগ্রিপারদা, মারজিৎনা হাইলাকান্দিগী
জারিবোনদা অমসুং গম্ভীর সিংহনা বদরপুরগী গুমড়াদা কোনুং শেমদুনা পানখিবা অসীনচিংবশিংসী
য়েংলগদি বরাক তম্পাকতা মণিপুরীশিংগী মফম অসী য়াম্নমক চাউনা লৈ হায়না লৌবা য়াই।
মায়গৈ অমরোমদা, মজাইবেমা ইন্দুপ্রভানা কাছাড়গী অরোইবা লৈমরেন ওইরম্বতা নত্তনা
মাঙলমচৎতা মণিপুরী নিঙোল কয়ামসু কাছাড়গী লৈমরেন ওইখিবা লৈখি।
মায়গৈ অমরোমদা, বেঙ্গলিবু মণিপুরীশিংনা
থেংনরুবসী মরু ওইনা লাইনীং-লাইশোন অমসুং মহৈ-মশিংনা মরু ওইবা মরম ওইখি হায়বসীনি। ইশিন-খোৎচিনবগী
থবক্তা মপূং ওইনা মণিপুরীবু পাংননবা বেঙ্গলিগী মতেং লৌবা অসীনি। মণিপুরগী নিংথৌ
চীংথংখোম্বগী মতমদা মণিপুরী অমদি বৃটিশশিংনা অহানবা ওইনা ইনখিবা ট্রিটি ওফ চিটাগাং (১৭৬২, সেপ্টেম্বর ১৪, অহানবা এংলো মণিপুরী ট্রিটি) দা নিংথৌগী মহূৎ
শিন্দুনা চৎখিবদু বেঙ্গলি মচা হরিদাস গোসাইনি। মায়গৈ অমরোমদা, বেঙ্গলদা সনাতন
লাইনীংনা মরাই চায়থরকপা মতম অমদা ইনিংথৌ চীংথঙখোম্বনা, থোঙ লোল্লম্বা লাইশঙ কয়াবু
হাংদোকহন্দুনা লাই খুরম্বা ফংহনখিবগী ৱারী সনাগী ময়েক্না ইদুনা লৈরি। ইনিংথৌ
গম্ভীর সিংহনা মতমদুগী শিলেট য়ৌনা মহাক্কী অকন-অথৌগী ওইবা মতৌ শন্দোক্লম্বতা
নত্তনা মহাক্কী অপাম্বা মতুং ইন্না রথ য়াত্রাগী কাং চিংহনখিবা অসীনচিংবা কয়া
শীংথানবা য়াই। ইনিংথৌ গম্ভীর সিংহগী মতীক ময়াই অমসুং মচাইবুংঙো নিংথৌ শ্রী
চন্দ্রকীর্ত্তি মহারাজপু শীংথাদুনা হৌজিক ফাওবদা বেঙ্গলিশিংনা পদ্দ পুরানগুম ‘কনেষ্ট
ভারথ’ শক্নরি,
বাকি সুন্য পলাইআ নিজ স্থানে গেলা। মহারাজা গম্বির সীঙ্গে জুদ্দ জয় করিলা।। জএ কানির পাদপৌদ্দ ভাবিআ মনগত। রচিল শ্রী রামচন্দ্র কনেষ্ট
ভারথ।। তবে রাজা গম্বির সীঙ্গ শ্রীহট্টে
আসিআ। বাড়ি ক্রয় করিআ রইলা দলান কুঠা দিয়া।।
কাছাড়দা বেঙ্গলিশিংনা খুন্দা লৈতাররিবসী
অয়াম্বনদি মণিপুরীশিংনা খুন্দারম্বা মফমশিং ওইনা তৌই। মণিপুরীশিং অসী পুৱারীগী
তাংকক কয়াদা লাকখিবা অসুম্না বেঙ্গলিশিং অসিসু অয়াম্বনা সিলেটতগী লাকখিবা ঙাক্তনি।
বৃটিশ সম্রাজ্যদা তিনশিল্লবা কাছাড়দা লৌ নীন্দুনা নৎত্রগা উমং কোকথোক্তুনা
খুন্দারবদি নুমীৎ ১০০০ খজনা পীদনা লৈবা য়ারম্মী। খজনা পীবা হায়বসী মণিপুরীশিংনা
মতমদুদা পাম্নরমদে, খজনা পীগদবগী শরুক অতোপ্পা অনৌবা মফম অমা কোকথোক্লগা লৈবনা
হেন্না পাম্নরম্মী, অনৌবা মফমদা চৎপনা হেন্না ঙা-চাকসু মরাং কায়বা হেল্লি হায়না লৌনরম্মী। অসুম্না অতোপ্পা অনৌবা মফম অমদা হোংদোকখিবনা মরম ওইরগা
থাদোক্লম্লবা লম্লেমশিং অদুদা বেঙ্গলিশিংনা খুন্দাশল্লবা ওইনা উবা ফংই।
মণিপুরীশিংদি, কনাগুম্বনা লম কোকথোক্তুনা খুন্দারবা মফমদা লৈরনবা কৌখৎলক্লবসু
নৎত্রগা কোকথোক্লবা লম লেম্না পীথোক্লবসু লৌনরমদে, খজনা থীহনগদগী পীথোক্লিবা
ওইরমগনি হায়দুনা তথী-তথীনা লৌনরম্মী।
বেঙ্গলি চীনবুং চৎনরোলদা মণিপুরী
য়ূমথংননা লৈমিন্নবনা মরম ওইরগা পীথোক-পীশিন
অমসুং লৌথোক-লৌশিন তৌনরিবশিংগী মনুংদা বেঙ্গলিশিংনা মণিপুরীগী শেৎনবা খুদৈ অসী মরু
ওইনা শীজিন্নবা উই, করিগুম্বা মতমদা ফনেক শেৎপসু য়াওদবা নত্তে। মণিপুরীশিংনা শাবা
কাঙখল, খুদৈ-মতেকশিং অমসুং মণিপুরীশিংনা থাবা য়েঞ্ছাং-নাপীশিং য়াম্নমক পাম্না
শীজিন্নবা ঙাক্তনি। মণিপুরীশিংনা তাইবা চেঙ, চেঙপাক, কবোক-মুরি, কবোক অফাবনচিংবসু
কৈথেলদা পোৎশিৎ ফবা ঙাক্তনি। লৈরিবশিং অসী বেঙ্গলি হিন্দু অমসুং মুশলিমশিংনি।
মণিপুরী অহলশিংনা ঙাঙবা শুদবা বেঙ্গলি লোনসু নক্না লৈমিন্নবনা হায়নীংলিবদু মপূং
ফাদ্রবসু লৌশিনবা ঙম্নরম্মী। খূদম ওইনা ‘তুমারগী চাউলসিগা আমারগী চাউলসিগা একোই
কোৎকী চাউলনিনে’, ‘মোসোরি উগু তুমার আমার গুমাইতে পারবো’, ‘দোশটাকাদংদি দেউদনহে’
অসীনচিংবা।
অসুম্না লৈমিন্নবা অসীদগী বেঙ্গলিশিংনা
মণিপুরীবু করম্না খনবগে (folk psyche) অমসুং করি হায়নবগে (folk saying)
হায়বসী য়েংবা য়াই। বেঙ্গলি অয়াম্বনা খনবতা নত্তনা হায়সু হায়
‘মণিপুরীরা আরুআ’, ‘মণিপুরীরা বুদু’। অমরোমদনা, বেঙ্গলিশিংগী মীৎয়েংদা মণিপুরীসি অকন-অথৌদা থাজবা, ফূন-চৈনবা অমসুং
লাক্ন-ফানবদা থৱায় য়াওবা কাঙলূপনি। বেঙ্গলিদি
অকন-অথৌদা, ফূন-চৈনবদা অমসুং লাক্ন-ফানবদা কয়া পামদবগুম লৈবা ফূরূপ ওইরম্মী। মরম
অদুনা মখোয়না মচা-মশূশিংদা চেকশিন্না পাউমেল্লি ‘মণিপুরীদের সঙ্গে বেছি
মিলি-মিছিসনা, একটু দুরে থাক, মাইর-পিঠ হয়তে পারে’। মায়কৈ অমরোমদা, ইমুং অমদা মমীৎ খূবা অঙাং পোক্লবদি নৎত্রগা কুচু ঙৌরগা
বুব-বুব লাউবা অঙাং পোক্লবদি – ‘আমার ছেলে/মেয়েতো
পুরা মণিপুরীর মোতো’ হায়।
‘আমার ছেলে/মেয়েতো
পুরা মণিপুরীর মোতো’ হায়রিবসী ৱাহন্থোক অনীদা লৌবা য়াই। অমনা অফবা অর্থ পুই অমনা অফবা
নত্তবা মওংগী অর্থ পুই। মচানুপী মশক ফজবা, মশম-মনা লেক-লেক লাউবা, য়েংবা নুঙাইরবদি
বেঙ্গলি মুশলিমশিংনা ৱাফম অসী হায়নৈ। অমরোমদা,
রাশি য়াওদবা বং-বং লাউবা অঙাং পোক্লগা মণিপুরীনা হাও মচা মাল্লি হায়বগী অর্থ লৌনবগুম্না
মমীৎ খূবা, বুব-বুব লাউবা অঙাং পোক্লবদি বেঙ্গলি হিন্দুশিংনা ৱাফম অসী হায়নৈ।
মায়কৈ অমরোমদা, মণিপুরী ফূরূপ অসী লায়রবা,
লাইরিক-লাইশু হৈতবা নৎত্রগা তমদবা, চাওখৎপগী মমি য়াম্না ফংদবা, শোত্থবা কাঙলূপ
অমগুম্না লৌরম্মী। তশেংনসু ফৌসু-বেপার তৌদুনা পুন্সী হিংনবা হোৎনবনা মপূং ওইবা
শিনফম ওইনরম্মী। বরাক তম্পাক্কী বেঙ্গলিশিংনা মণিপুরী মুশলিম (মীতৈ পাঙন)বু
মোগ্লাই নৎত্রগা মোগ্লাই মণিপুরী হায়না খঙনরম্মী। অদুবু মণিপুরীশিংদা, হন্থবা
মওংদা চৈ-থাংবা মতমদা ‘মোগ্লাই’ নৎত্রগা ‘মোগ্লাইর ফুআ/বাচ্চা’ নৎত্রগা ‘মোগ্লাইর জাত’ হায়না পনবা থেংনৈ। তশেংনদি, মোগ্লাই হায়বা
ৱাহৈ অসী কদায়দগী লাকপা অমসুং মতৌ করম্না শীজিন্নখিবনো হায়বা খঙবা ঙমদে। অদুম
ওইনমক, অসামিস কাঙবুনা মণিপুরীবু ‘মোগ্লু’ হায়না খঙনৈ হায়বসীদি
থেংনৈ। নাকন অমরোমদা, চীঞ্জাকতা য়েংলগসু হায়নবী কয়া অমা শাগৎলি। মণিপুরীশিংনা
চারিবা চীঞ্জাকশিং অসীদা মখোয়গী হৈনদবা, কা হেঞ্জিনবা কয়া অমবু বেঙ্গলিশিংনা
নিন্দা তৌবা ফাওবা উবা ফংই। মণিপুরীশিংনা পাম্ননা চানরিবা হৱাইজার, শোইবুমনচিংবসী
বেঙ্গলিশিংনা তাথিনা তৌই। থরোই, কোংগ্রেং চাবা অসীসু ফনা শীংথানদে। মায়কৈ অমরোমদা,
উতোঙা-ঙারী চাবগী চাংসী হেনমনবনা মণিপুরীবু ‘সিদোল’ নৎত্রগা ‘সিদোল খাউরা’
অসীনচিংবা হায়দুনসু চৈ-থাংলম্বা নৎত্রগা করেম-কথাইনরম্বগী মমি উবা ফংই। উতোঙা-ঙারী চাবগী মতাংদা বরাক অমদি সুরমা
তম্পাক্তা খুন্দারিবা মণিপুরীশিংগা য়ূমথংনবা বেঙ্গলি অঙাংশিংনা মণিপুরী অঙাংশিংবু
উরগা থাদুনা শকপা য়াম্নমক পোপুলর ওইবা রাইম অমা লৈ। মদুদি-
১ ২ ৩ ৪ ৫ ৬ ৭
মণিপুরী দাদি ম ণি পু রী দা s দি
চিড়া খাইয়া ফাঁদি চি ড়া খাই য়া ফাঁ s দি
চিড়া নাই ঘর চি ড়া নাই s ঘ s র
সিদল খাইয়া মর সি দল খাই য়া ম s র
মণিপুরী হনুবা/বী ম ণি পু রী হ নু বা/বী
চেঙপাক চাবা মোইজাউবা/বী চেঙ পাক চা বা মোই জাউ বা/বী
য়ূমদা চেঙপাক লৈত্রগা য়ূম দা চেঙ পাক লৈ ত্র গা
শিরো ’তোঙা চারগা শি রো তো ঙা চা র গা
রাইম অসী অঙাংশিংগী মচিন্দতা নত্তনা অহলশিংগী
মচিন্দসু হিংদুনা লৈরিবনি। অঙাংশিংনা মণিপুরী মচা উরগা রাইম অসী থীদুনা শাউহল্লি।
শাউবগী মরমদি মখোয়না লক্নবগী লৈখোন্দা শকপা অদুগীনি। অহলশিংনা অঙাংশিংদা অদুম্না
হায়দনবা থেমজিল্লি অদুবু থেমজিন-থেমজিন্না মখোয়নসু অদুমক হায়বা পাম্বা রাইম মখল
অমনি। মণিপুরী উরগা হায়ননবগীদমক অঙাংশিংদা থৌজিনবসু য়াওদবা নত্তে।
মণিপুরীশিংগী অকন-অথৌগী ৱারী শৈথাবগুম্না
মণিপুরীগী মশক মতৌ ফজবগী ৱারীসু ঙল্লিঙৈ মতমগী বেঙ্গলিশিংগী চীনবুংদা হিংদুনা
লৈরম্মী। বেঙ্গলিশিংগী মীৎয়েংদা বরাক অমসুং সুরমা তম্পাক অসীদা খ্বাইদগী মশক
ফজখিবা নুপীসী ইনিংথৌ মধুচন্দ্রগী মমোম কাছাড়গী লৈমরেন ইন্দুপ্রভা অসীনি। লৈমরেন
ইন্দুপ্রভাগী ফজবা মশক বেঙ্গলিশিংনা চীনবুংদা শীংথানরম্বদু নলিনিন্দ্র কুমার
বর্মননা মখাগী অসুম্না ফোঙদোক্লম্মী-
Do you like to see the golden sun-shine?
Ah! go and see Ranee Induprava,
Without waiting for spring or autumn!
লৈমরেন ইন্দুপ্রভাগী মতাং পল্লকপা অসীদা
নীংশিংবা য়াবা চীনবুং ৱারোল অমদি ‘ইন্দুপ্রভার বিয়া কবে’ হায়বসীনি। পূম্নমক্না
খঙই, ইন্দুপ্রভা অসী মৈদিংঙু তম্লেনখোম্বা (মধুচন্দ্র) গী মমোমনি, কাছাড়গী নিংথৌ
কৃষ্ণচন্দ্রদা থাজরকপনি। অদুবু মহাক অমুক হন্না কৃষ্ণচন্দ্রগী মনাউ
গোবিন্দচন্দ্রনা ফম্বাল কাবা মতমদা মহাক্কী মহারাণি ওইনা ফম্বাল কামিন্নখি।
ইন্দুপ্রভাগা গোবিন্দচন্দ্রগা কৈদৌঙৈ লুহোংগদগে হায়না ঙাইরম্বা মরমদগী, মতমদুগী
বেঙ্গলি চীনবুংদা শোন্নদুনা লৈহৌখিবনি। মসীনা তুংদা, করিগুম্বা ওইররোইদবা থবক
নৎত্রগা থৌদোক অমবু প্রমান তৌদুনা হায়রকপা মতমদা নহাক্কীদুদি ‘ইন্দুপ্রভার বিয়া
কবে’ হায়বদুনি হায়না শীজিন্নবা হৌরকখিবনি।
বেঙ্গলি
চীনবুং চৎনরোলদা মণিপুরী খুনাইগী মশক
খুনাই অমা হায়বসী মান্নবা নৎত্রগা য়ানরবা
চৎনরোল অমবু পূন্না শরুক ফংমিন্নরিবা মীওই অনী নৎত্রগা অনীদগী হেনবনা শেম্বা
কাঙলূপ অদুবু খঙনগনি। খুনাইরোলগী মীৎয়েংদগী খুনাই অমা হায়বসী তাংকক অনীদা ফংই।
মখোয়শিং অদুদি- ১. প্রি-ইন্দাষ্ট্রিয়েল সোসাইতি, ২. ইন্দাষ্ট্রিয়েল সোসাইতি
প্রি-ইন্দাষ্ট্রিয়েল সোসাইতিবু জর্মনগী খুনাই
নৈনরোয় ফর্দিনন্দ টোনিসনা ‘কম্ম্যুনিতি’ নৎত্রগা ‘জেমিইনসচেপ্ত’ হায়না পল্লম্মী।
অদুগা অমেরিকান এনথ্রোপোলোজিষ্ট রোবর্ট রেদফিল্দনা ‘ফোক সোসাইতি’ হায়না পল্লম্মী।
রেদফিল্দনা প্রি-ইন্দাষ্ট্রিয়েল সোসাইতিগী মরমদা হায়রম্বদু খুনাই নৈনরোয় এলেক্স
থীওনা মহাক্কী লাইরিক ‘সোসিওলোজিঃ এ ব্রিফ ইন্ট্রোদাক্সন’দা মখাগী অসুম্না
পল্লম্মী,
Pre-industrial societies are small, non literate and homogeneous societies
in which group solidarity is strong.
সোলিদরিতিগী ৱাফম পল্লকপদা ইমাইল দর্খেইমনা
পল্লম্বা ‘মেকানিকেল সোলিদরিতি’ হায়না প্রি-ইন্দাষ্ট্রিয়েল সোসাইতিগী মতাংদা
পল্লম্বদু নীংশিংবা য়াই। মতমসিগী মণিপুরী খুনাই অসী প্রি-ইন্দাষ্ট্রিয়েল সোসাইতিনি
অমসুং মসীগী মখল মরিগী মনুংদা লৌউ-শীংউদুনা হিংবা খুনাইনি হায়বা উবা ফংই।
খুনাই চৎনরোলদা মচল অহুম ফংই। মখোয়শিং অদুদি –
কোগ্নিটিব, নোর্মেটিব অমসুং সিম্বোলিক। লাইনীং-লাইশোননচিংবশিংসী কোগ্নিটিব ওইবা
মচলগী মনুংদা লৈবনি। নোর্মেটিব ওইবা মচলগী মনুংদা সোসিয়েল নোর্মস অমসুং
ভেল্যুশিংসী লৈবনি। নোর্মস অমসুং ভেল্যুশিং অসী ফোকগ্রুপ অমগা অতোপ্পা অমগা
মান্নগনি নৎত্রগা মান্নরোইদবনি হায়বা লৈতে। নোর্মসকী মনুংদা অমুক ফোকৱেজ (তৌফম
থোক্লবসু তৌদবদা চৈরাক ফংদবা), মোরেজ (ফজদবা মওংদা চত্থরকপা থবক্তা চৈরাক ফংনীংঙাই
ওইবা) অমসুং সেঙ্কসন (থবক অমগী ওইরক্লিবা ফজদবা মহয়) হায়দুনা লৈ। সিম্বোলিক ওইবা
মচলগী মনুংদা প্রোক্সিমিক্স হায়বদি
ফূরূপ অমগী মনুংদা লৈমিন্নরিবা মীওইশিংনা ফম্মিন্নবা অমসুং লেপমিন্নবা মতমদা
থম্নরিবা অরাপ্পা অমসুং কাইনেসিক্স
হায়বদি বোদি লেঙ্গুএজশিং হায়বদি মীৎয়েং-নায়েং, থৌদৌ থৌওং, মীওক-মীচান, খুদম-ঈঙ্গিৎনচিংবা
অসী লৈবনি। মণিপুরীগী কাইনেসিক্স
ওইরিবা - নীন্থোক্লবা লম থাদোক্লম্বা, লেম্না লম পীরগা লৌ হায়বা য়াদ্রিবা, খজনা পীবগী
মহূৎ অনৌবা লম নীল্লগা লৈবনা হেন্না ফৈ হায়না খনবা অসীনচিংবা অসীদা বেঙ্গলিশিংনা
ইৱা ৱাদনা চঙশিল্লগা লৈহৌবা অসীনা মখোয়গী মীৎয়েংদা মণিপুরী অসী ‘আরুআ অমসুং বুদু’
ওইনা লৌরক্লিবসী ফোকৱেজ ওইনা লৌবা য়াই।
মণিপুরীশিংনা তৌথোরকপসিমক্তবু বেঙ্গলিশিংগী মীৎয়েংদা অপঙবা অমসুং জ্ঞান ৱাৎপশিংনা
তৌথোরকপা থবকশিং ওইনা উরিবসী মখোয়গী প্রিজুদিস
নি।
বেঙ্গলিশিংনা ওল্লগা লেপ্লিবা চাওখৎপগী পাদম
অদুদা মণিপুরীশিংনা লৈতে। মরম অদুনা, মণিপুরী অসী চাওখৎতবনি, অপঙবনি, খুনাই থাক
হন্থবদা লৈবনি হায়না লৌবা উবা ফংই। অসীগুম্বা মীৎয়েং অসীবু ইথনোসেন্ত্রিক ওইবা কৌই। ঐগীনা ফরগা মীগীনা ফত্তবনি হায়না লৌবা মতৌ
অসী ইথনোসেন্ত্রিজম দা লৈ। মীৎয়েং
অসীদগী থোরকপা নন-এটিক এনালাইসিস শিংনা
করিগুম্বদা ফূরূপশিংগী মরক্তা নুঙাইনহন্দবসু য়াওদবা নত্তে। মরম অদুনা হৌজিক্কী
মতমদা কলচরেল রিলেটিভিজম (অতোপ্পগী
চৎনরোলবু মরাল শীদবা মীৎয়েং) বু হেন্না পাম্নরকইবনি।
বেঙ্গলি অঙাংশিংনা মণিপুরী অঙাংশিং উরগা
লক্নদুনা ‘মণিপুরী দাদি...’ শক্লকপা মতমদা মমান্নবা মশেন ওইরবদি তান্নদুনা ফূনবা
ফাওবা কয়ারক য়াওরিবনি। মসীনা মোরেজ গী
থাক্তা কাখৎলকপা ওইনা উরিবনি। মসীদগী ‘মণিপুরীদের সঙ্গে বেছি মিলি-মিছিসনা...
মাইর-পিঠ হয়তে পারে’ হায়নসু তম্বীরিবনি। ‘মণিপুরী দাদি...’ হায়বা রাইম অসীদা
মণিপুরী অসী উতোঙা চাবা, চেঙপাক চাবা, নুংশিৎ খাইবা মতমদা মখোন হৌনা-হৌনা খাইবগী
চৎনবী লৈবা ফূরূপ ওইনা শীংথারি। উতোঙা হায়রিবসী বেঙ্গলিশিং চাদবা নত্তে, ফূরূপ
অনীমক্না চায় অদুবু উতোঙাগী মশক্তি খেন্নৈ। করিগীদমক উতোঙা চাবা বেঙ্গলিনা উতোঙা
চাবা মণিপুরীবু করেম-কথাইনরিবনো হায়রবদি – উতোঙা অসী বেঙ্গলিগী চানবা মচলশিংগী
মরক্তা অমা ওইবা মতমদা মণিপুরীশিংগীনা মতম পূম্নমক্কী ওইবা থাদোক্নবা য়াদবা মচল
ওইবা অসীনি। মতৌ অদুগুম্না চেঙপাকসুনি, মণিপুরীগী ফীগাউ অয়াম্বদা চেঙপাক ময়োম
য়াওনরম্মী। লাম্মকপা মতমদা দ্রাই ফুদ ওইনা শীজিন্নবদা খ্বাইদগী মতম কুইনা থম্বা
য়াবা মচল অমনি। মায়গৈ অমরোমদা, নুংশিৎ খাইবদি তাইবং মীওইবা পূম্নমক্কী নেচরেল
প্রোসেস অমা ওইরবসু মণিপুরী অহল, মরু ওইনা হনুবশিংনা মীমাঙ-পোমাঙ নাইদবগী মচৎ অমা
লৈরম্বা অদুদা হৌন-খঙদবা, অসভ্য ওইবা মচৎ ওইনা লৌদুনা নোক্নরম্বগী মতৌনি। নুংশিৎ
খাইবদা মণিপুরী অহলশিংনা কয়া য়াম্না মখোল হৌবগে হায়ববু ‘হনুবা হনুবী পান থাবা’গী
ৱারীদা য়াওবা হনুবনা খাইবা নুংশিৎতা খরুঙ কায়দুনা য়োং ময়াম চেনখ্রিবা অদুনি।
বেঙ্গলিদি অতোপ্পনা তৌথোরকপা থবকশিংদা
হঙ্গোইগনবা ঊৎকনবা কাঙলূপ ওইনা তৌই। বেঙ্গলি ফূরূপ মনুংদসু অমনা তৌবা অমনা
য়ানীংদদুনা মচু পৈদুনা ‘সি সি সি’ হায়দুনা হঙ্গোইবা ঊৎকনবা কাঙবুনি। শ্রী চৈতন্য
মহাপ্রভু অমসুং মখোয়গী খোঙলোইশিংনা মধুর ভাবতা ‘গীতগোবিন্দ’ লেংদুনা বৈষ্ণব
কবিশিংনা শকপা ফাওবা অচোপ-অরেম খঙদবা ঈশৈ লেংদুনা শকই হায়দুনা মচু পৈদুনা ‘সি সি
সি’ হায়দুনা হঙ্গোইবা ঊৎনরম্মিবনি। নুপা-নুপী লোয়ন-তিন্নবগী ভাবতা শেমগৎপনি
হায়দুনা চৈনরকপা মতমদা বলেন্দ্রনাথ ঠাকুর খোয়না শেংদোকপগী তঙাইফদবা লৈরম্লিবনি,
সুতরাং শারীরিক সম্ভোগেরই বর্ণনা বলিয়া গীত গোবিন্দকে নিকৃষ্ট শ্রেণীর কাব্য
বলা যাইনা। কবি যদি সেই ঈশ্বরের ভাবে তন্ময় হইয়া সাধারণ সম্ভোগের ভাষা ব্যবহার
করিয়া থাকেন, তাহাতে এমনই কি দোষ আছে।
ৱারোইশিন
বেঙ্গলিশিংগী, মতমদুগী
মীৎয়েংদগী শাগৎলকপা চীনবুং চৎনরোল অসীদগী উবা ফংলিবসী মণিপুরী হায়বা ফূরূপ অসী চাওখৎপগী
অমদি মহৈ-মশিংগী মঙাল ফংদ্রিবা, পঙদা-চুদানবা, ফূন-চৈনদুনা পঙহিং হিংবা, পঙলেন
লেনবা, শোত্থবা অমসুং হন্থবা ফূরূপ কাঙলূপ অমনি হায়বসীনি। মায়গৈ অমরোমদা, নীন্থোক্লবা লম থাদোক্লম্বা, লম পীরগা লৌ হায়বা য়াদবা, খজনা থীবগী মহূৎ
অনৌবা লম কোকথোক্তুনা লৈবনা ফৈ হায়না খনবা, চেঙপাক চাবা, উতোঙা চাবা, থরোই,
কোংগ্রেং চাবা, মখোল হৌনা নুংশিৎ খাইবা অসীনচিংবসী মণিপুরীগী এমিক পর্সপেক্টিব (ফূরূপ অমনা মশাগী চৎনরোলদা য়েংজরিবা মীৎয়েং) নি
অদুগা মশাবু হেন্না শিংবা ফূরূপনি হায়না লৌজরিবা, মীঙোন্দগী ঐনা হেন্না ফৈ হায়বা
মখলগী ইথনোসেন্ত্রিজমদা থাজদুনা প্রিজুদিসকী থাকতা লৈবা বেঙ্গলি ফূরূপকী নন-এটিক এনালাইসিস (অতোপ্পগী চৎনরোলবু
বৈজ্ঞানিক ওইদবা মওংদা নৈনদুনা হায়বা) অমনি। মীৎয়েং অসোমদগী য়েংলুরগদি, বেঙ্গলি
চীনবুং চৎনরোলদা ফংলিবা টেক্সশিং অসীদা তারিবা মণিপুরী খুনাইগী শক্তম অসী আউৎসাইদর অমা ওইনা য়েংলগা শেমগৎলকপা ওইনা
উবা ফংই হায়বসীনি। মণিপুরী খুনাইগী মশক অসী
প্রি-ইন্দাষ্ট্রিয়েল নৎত্রগা কম্ম্যুনিতি নৎত্রগা ফোক সোসাইতি হায়না খঙনবা মখল অদু
ওইবনা মরম ওইরগা মসীদা সিমপ্লিসিতি, হোমোজিনিতি, ইন্টিমেসি অমসুং ত্রেদিসনেলিজমগী
মশক অদু নীংথিজনা উবা ফংই।
মতেং লৌজখিবা অমসুং তানজখিবা লাইরিকশিং
1.
Balendranath Thakur, 1995, ‘Jaydev’, Beishnab Kabi Prasange, Calcutta
2.
Barman. Nalinidra Kumar,
2007, The Queens of Cachar or Herambo and
the History of the Kachchhari, Lakshmi Prasad Barman, Cachar
3.
Choudhury. Ramchandra, (manuscript), Kanestha Bharath
4.
Hodamba. ND, 2012, Naoria Phulo, Meetei Khunai Nat amasung
Khorirolda touramba khudol, Hodamba Publication, Cachar.
9. Roy.
Suparna, 2007, Land System and Management in the
Colonial Period: A Study of Barak Valley, Mittal Publication, New Delhi, (P 34)
10. Singha. Bidyachandra, (Unpublished
PhD thesis), 2001 Cultural relations
Between Manipuri and Bengali: A study on the tendencies Synthesis
11. Thio. Alex, 1994, Sociology: A Brief Introduction, Harper
Collins College Publications, New York.
No comments:
Post a Comment