কাছাড়দা মীতৈনা খুন্দাবা
অয়াম্বনা ঈরাই লায়না হেক খন্নরিবসী – কাছাড়দা
মীতৈনা খুন্দাবা হৌরকখিবসী চহী তরেৎ খুন্তাকপা অমসুং মদুগী মতুংদগীনি হায়বসীনি।
খরগা কূপথনা য়েংশিল্লুরবদি, চহী তরেৎ খুন্তাকপা মমাঙদগী হৌনা কাছাড়দা মীতৈ মশীং
য়াম্না খুন্দারম্লে হায়বসী খঙবা ঙম্মী। নিঙোল থাজবগী পরীংদা, মৈদিংঙু চলাম্বা
(১৫৪৫ – ১৫৬২) সনা হাক্তক্তগী হৌনা মীতৈ নিংঙোলশিংনা ময়াং লৈমা ওইবা হৌরে। অসুম্না
মখা চত্থরকপনা মৈদিংঙু মুংয়াম্বা (১৫৬২ – ১৫৯৭), মৈদিংঙু খাগেম্বা (১৫৯৭ – ১৬৫২),
মৈদিংঙু পাইখোম্বা (১৬৬৬ – ১৬৯৭), মৈদিংঙু পামহৈবা (১৭০৯ – ১৭৪৮) অমসুং মৈদিংঙু
তম্লেনখোম্বা (মধুচন্দ্র, ১৮০০ – ১৮০৩) গী মতম ফাওবদা নিঙোল ৮ রোম থাজদুনা মরী
থম্নখিবা মতমদা য়াওখিবা মচা-মনাইশিং অসীদগী, কাছাড়দা মীতৈনা খুন্দাবা হৌখিবনি।
মসীগী মথক্তা ললোন-ঈতিক অমসুং চৎথোক-চৎশিনগী ওইবা মরমশিংদগীসু ঙল্লিঙৈ মতমদগী
খুন্দারক্লে হায়বসীনি।
‘চৈথারোল
কুম্বাবা’দা চনশিল্লম্বা রেকোর্দকী
মতুং ইন্না, মৈদিংঙু লোইরেনখোম্বা (লাবণ্যচন্দ্র, ১৭৯৮-১৮০০) সনা হাক্তক্তা ফকির
অমনা ময়াং লৈবাক থুগায়বা মতমদা ময়াংদা লৈরম্বা মীতৈ ৬৩৫ মীতৈ লৈবাকতা চেনশিল্লকএ
হায়না পল্লম্মী। অসুম্না মীতৈ লৈবাক্তা মীতৈ মশীং য়াম্না চেন্থোরক্লবা মতুংদা
মৈদিংঙু তম্লেনখোম্বা (মধুচন্দ্র, ১৮০০ – ১৮০৩) গী মতমদা মনাউ ইবুঙো য়ুবরাজ
চৌরজিৎনা কাছাড়দা থৈরগা অরোনবা কোনুং শেমদুনা মীতৈ কয়া মশীং য়াম্না খোম্লগা ময়াম্বুং নিংথৌগী মথক্তা লান্দাদুনা
তান্থোক্লগা নিংথৌ খুবম লৌখিবা অসীদগীসু চহী তরেৎ খুন্তাকপা মমাঙদা কাছাড়দা মীতৈ
মশীং য়াম্না লৈরে হায়বসী হেন্না ময়েক শেংহল্লি। খুন্তাকপা অসীদগী হেন্না পাক শন্না
খুন্দাবা হৌখিবনি হায়না লৌবদি চুম্মি।
মপাবুং নিংথৌ চৌরজিৎ অমসুং
জারিবোন
মৈদিংঙু লোইরেনখোম্বা (লাবণ্যচন্দ্র, ১৭৯৮-১৮০০)
বু য়েক্নবনা লৌরোন তৌদুনা কাঙজৈ শান্নবদা হাৎখ্রবা মতুং ফম্বাল হাঙদুনা লৈবা
য়াদবনা মরম ওইরগা হেক থংনবা মনাউ ইবুঙো মধুচন্দ্রবু ফম্বাল মিংলেন তম্লেনখোম্বা
কৌদুনা লৈবাক্না ফম্বাল শিন্নৈ। মধুচন্দ্রনা নিংথৌ ফম্বালদা লৈরিঙৈ য়ুবরাজ ওইনা থৌ
পুরিবা মনাউ চৌরজিৎনা ফম্বাল অদুবু কল্লক্তুনা মথৌদা মপূক্নীং চঙলমদে, ময়াম্বুং
নিংথৌগা পূকচেল তিন্নরমদে। মরম অসীদগী মণিপুর থাদোক্তুনা ময়াংলমদা চঙঙি, ময়াম্বুং
নিংথৌনা মী থাদুনা খামহল্লুই। ‘চৈথারোল কুম্বাবা’ দা পল্লি-
...
ইবুংশিজ চৌরজিৎ য়ুবরাজ ময়াংলম চঙখিএ। ... লংমাইজিংদা গুরু মশূ ঠাকুর থোকচাউ
কৈরুংবা ২মা ইবুংশিজ য়ুবরাজ খাম্লুবা থুংলৈএ। -লাঃ ১৮২
য়ুবরাজ চৌরজিৎনা মণিপুর থাদোকপসী ময়াম্বুং
নিংথৌবু ফম্বালদগী তান্থোক্লগা নিংথৌ ওইগে হায়না খনবদগীনি হায়না ‘মীতৈ নিংথৌরোল
লম্বুবা’ কৌবা লাইরিকতা পল্লম্মী। য়ুবরাজনা মণিপুর থাদোকপা মতমসিদা লৌনম তৌদুনা
বৃন্দাবোন চৎকনি হায়দুনা ফোঙদোক্লম্মি, অদুবু বৃন্দাবোনদদি চত্তদুনা কাছাড়দা থৈরগা
মীতৈ মচা ময়াম খোমদুনা
ময়াম্বুং নিংথৌগী মথক্তা লান্দারকখি-
খৃষ্টাব্দ
১৮০২ লাংবন মঙানি পানবা থাংজ নুমিৎতা বৃন্দাবোন চৎকনি হায়রম্লগা চৎখিদুনা কাছাড়দা
লৈখি। মফম অদুদা লৈরগা মীতৈ মচা ময়াম খোম্লগা লান্মী শেমগৎতুনা মীতৈ লৈবাক্তা
লান্দারক্লে। -১৪
হন্দক্কী কাছাড়দা থৈরগা অরোনবা কোনুং শেমদুনা
মীতৈ লান্মী খোমজিল্লিবা মফম অসী হৌজিক্কী জারিবোন অসীনি হায়না অখঙ-অহৈশিংনা
থাজনৈ। মফম অসীদগী হৌবা লান্দা মায় পাক্তুনা ময়াম্বুং নিংথৌবু তান্থোক্লগা মনাউ
ইবুঙো চৌরজিৎনা ফম্বাল মিংলেন ফালোক ৱাইরং পামহৈবা কৌদুনা মীতৈ
লৈবাককী নিংথৌ খৃষ্ট চহী ১৮০৩ দা ওই। নিংথৌ ওইবা মতমদা লান পাংখিবা মনাউ য়ুবরাজ
মারজিৎ (মধুচন্দ্রগী মতমদা সেনাপতি ওইরম্বা) কা চহী মঙা-মঙা নিংথৌ ওইমিন্নসী হায়দুনা
য়ানখি। অদুবু মতম শুরবা ফাওবদা নিংথৌ ফম শিন্নদবগী মরমনা মারজিৎ শাউরকখি অমসুং
হায়নখিবা ৱাফমগী মতুং ইন্না ফংফম থোকপা ফম্বাল ফংননবা হ়ঞ্জিন-হঞ্জিন লান হৌবদা
মায়থীরবা মতুং অরোইবা পাম্বৈ ওইনা অৱাগী মতেং লৌরগা ময়াম্বগী মথক্তা লান্দাদুনা
খৃষ্ট চহী ১৮১৩দা ফম্বালদগী তান্থোকখি। নুমিৎ ১১নি মনাউগা মায়োক্নখিবা লানফমদা
মায়থীরদুনা মৈদিংঙু ফালোক ৱাইরং পামহৈবা ময়াং লৈবাক্তা চেনখি, অদুবু ময়াম্বুং
নিংথৌ তম্লেনখোম্ববু হাৎখিবগী মলোমনা মচানিঙোল কাছাড়গী লৈমরেন ইন্দুপ্রভাগী
মপুরোইবা নিংথৌনা চঙহনখিদে। চঙজফম লৈত্রবা চৌরজিৎ জয়ন্তিয়াদা চঙজফম লৌদুনা লৈখি।
নীংশিংবা য়াই, চৌরজিৎকী খূৎতা মারজিৎনা মায়থীদুনা চেল্লকখিবা মতমদসু কাছাড়দা চঙজফম
পীখিদে। মরম অসীদগী মারজিৎনা কাছাড়ি নিংথৌগী মথক্তা নুঙাইখিদবসু লৈখি।
ময়াম্বুং নিংথৌ ফালোক ৱাইরং পামহৈববু
তান্থোক্লগা মারজিৎনা ফম্বাল মিংলেন নোংপোক ৱাইরং পামহৈবা কৌদুনা ফম্বাল কাখিবা
মতুংদা মতম অমা কাছাড়দা চঙজফম পীখিদবা অমসুং কাছাড়ি নিংথৌ গোবিন্দচন্দ্রগী মথক্তা
ৱারৌবা লৈবগী লমন খুম্বা ওইনা খ়ৃষ্ট চহী ১৮১৭তা কাছাড়দা লান্দারক্লম্মি। মতমদু কাছাড়গী
ফীবম ফৎলমদবনা মরম ওইরগা মারজিৎকা লান্থেংনবা ঙমদবদগী কাছাড় য়াম্নমক ফীবম চাখিদে।
মতমদুদা কাছাড়বু কন্ননবা পাম্বৈ অমতংদি, চঙজফম পীখিদ্রবা চৌরজিৎপু লান নেক্লুবা
অসীখক্তা ঙায়রম্মি। মরৈবাকপু কন্ননবা ‘লান পাংবিয়ু, করিগুম্বা কাছাড়বু কনবা
ঙমহৌরবদি লৈবাক তংখায় অমা পীথোক্কনি’ হায়না কাছাড়ি নিংথৌগা চৌরজিৎকা য়ানরম্মি।
মনাউ মারজিৎনা লান্দা মায়থীবা পীদুনা
তান্থোরকপগী নুঙাইতবা মলোমগা, জয়ন্তিয়াদা লৈবগী খুদোং চাদবা অসীগা মরম অনী অসীনা
লমজিংদুনা কাছাড়দা লান পাংবগী ৱাফম অদু চৌরজিৎনা য়াখি। মনাউ ইবুংঙো গম্ভীরসিংহনা সেনাপতি
ওইরিবা কাছাড়গী লান্মীশিংদা ময়াম্বুং ইবুঙো চৌরজিৎনা লান পাংদুনা মহাক্কী মথক্তা
লান হৌরক্কদৌরে হায়বা পাউ তাবদা মারজিৎনা ময়াং অচঙবা ১০০০ ফারগা মখা তানা লান
শোক্নরমদনা হনখি অমসুং ময়াংঙম্বা হায়বা মিংথোল লৌজখি।
অসোমদনা হায়নখিবা মতুং ইন্না চৌরজিৎনা কাছাড়গী খা থংবা শরুক লৌরগা জারিবোনগী
লৈহৌপোকপীদা কোনুং শেমদুনা পানখি।
জারিবোনগী নিংথৌরোল
মারজিৎনা মণিপুরগী নিংথৌ ওইবসী অৱাগী মপান্দগীনি,
অৱাগী মখা পোনবা নিংথৌনি, অৱানা ওইহনবনি, অৱাগী ৱা তাগদবনি, ইনগদবনি। অদুবু খৃষ্ট
চহী ১৮১৯দা অৱাগী মশূ য়ুবরাজ বাগিদাউনা নিংথৌ ওইনা ফম্বাল কাবা মতমদা য়াওরনবা
খঙহল্লকপদা চৎহৌদবগী লঙজরবা অমসুং তৌবিমল খঙদবা মারজিৎগী মতৌ অদুদা ৱারক্নবগীদমক
অচৌবা লান্মী তেঙ্গোল পুদুনা জেনরেল মহাবন্দুলানা লান্দারকখি। লান্দা মায়োক্নবা
ঙমদদুনা কায়রগা খা থংবা কাছাড়দা পাল্লিবা ময়াম্বুং নিংথৌ চৌরজিৎকী মফমদগী চঙজফম
লৌখি। অসুম্না কাছাড়দা চৌরজিৎ, মারজিৎ, গম্ভীরসিংহ মচিন-মনাউ অহুম পূনশিল্লগা
লৈরিঙৈ মতমসীদা কাছাড়ি নিংথৌ গোবিন্দচন্দ্রগী অশোনবদা খুদোং চাবা লৌদুনা নিংথৌগী
মথক্তা লান্দাদুনা তান্থোক্লম্মী অদুগা কাছাড়বু মপুম ওইনা লৌশিল্লম্মী। লৌশিল্লবা কাছাড়বু
মচিন-মনাউনা শরুক অহুম থোক্না য়েন্নরম্মী। য়েন্নবা মতমদা চৌরজিৎনা তিলাইন চীংগী
নোংপোক থংবা শরুকতা সোনাই ফংদুনা দুংগ্রিপারদা কোনুং শেমখি, মারজিৎনা হাইলাকান্দি
ফংদুনা জারিবোনদা কোনুং শেমখি, কোনুং শেমদুনা পানখিবা লৈকাইবু কোনুং লৈকাই কৌখি
অদুগা গম্ভীরসিংহনা তিলাইন চীংগী নোংচূপ থোংবা শরুক বদরপুর ফংদুনা গুমড়াদা কোনুং
শেম্লগা পান্নখি। ‘কাছাড়ের ইতিবৃত’দা হায়রি-
কাছাড়
রাজ্য ইতি পূর্ব্বেই দুই অংশে বিভক্ত হইয়াছিল, এক্ষণে তিন অংশে বিভক্ত হইল। এই সময়
হইতে ১৮২৩ খৃঃ পয্যন্ত কাছাড়ের সমতল ভাগ ভ্রাতৃত্রয়ের মধ্যে বিভক্ত ছিল। তাহাঁরা পৃথক পৃথক রাজধানী স্থানপুর্বক রাজ্য
শাসন করিতে লাগিলেন। গম্ভীরসিংহ তিলাইন পাহাড়ের পশ্চিমদিক প্রাপ্ত হইয়া গুমরাতে,
মারজিৎ সিংহ হাইলাকান্দি প্রাপ্ত হইয়া ঝাপিরবন্দ নামক স্থানে এবং সরজিৎ সিংহ
তিলাইন পহাড়ের পূর্ব্বাংশ প্রাপ্ত হইয়া সোনাইমুখের নিকটবর্ত্তী ডুঙ্গুরিরপার নামক
স্থানে রাজত্ব করিতে লাগিলেন। - লাঃ ৯৩
করি মরমদগী মারজিৎনা জারিবোন ফংবনো হায়বসী খঙবা
ঙমদনা লৈরি। পরীংদা য়েংলুরবদি চৌরজিৎনা ফংফম নৎত্রগা লৌফম থোক্লম্বনি। চৌরজিৎনা
য়ুবরাজ ওইরিঙৈ, ময়াম্বুং নিংথৌ মধুচন্দ্রদা লালহৌখিবসু জারিবোনদগীনি। মনাউ ইবুঙো
নিংথৌ মারজিৎপু তান্থোক্তুনা কাছাড়বু কলহৌবগী মনা ওইনা খা থংবা কাছাড় ফংদুনা কোনুং
শেমখিবসু জারিবোনদনি। অদুগা মচিন-মনাউ অহুমনা য়েন্নবা মতম অসীদনা জারিবোন অসী
মারজিৎনা মতৌ করম্না ফংবনো খঙদে। অসুম্না মারজিৎ হাক্তক্তা অনৌবা কোনুং শেম্বা
অদুবুনা কোনুং লৈকাই কৌরগা হান্না চৌরজিৎ হাক্তক্তা কোনুং ওইরম্বা লৈহৌপোকপী
অসীবুনা কোনুং অমনবা হায়না খঙনদুনা লৈহৌরি। মীৎয়েং অসোমদগী জারিবোন লৈবাক্কী
নিংথৌরোল পরীংদা চৌরজিৎপু অহানবা অদুগা মারজিৎপুনা অনীশুবা হায়না থমজরি। মখা তাবা
মচা মশূশিংগী মরক্তগী নিংথৌ অমসুং লৈবাক মপু ওইখিবশিংগী পরীং অমা থমজরি-
ভাগ্যচন্দ্র
চৌরজিৎ (১) মারজিৎ(২)
ত্রিভূবোনজিৎ(৩) সনা চহী অহুম(৪)
সনা কালা(৫) মৌলেন্দ্রজিৎ
 |
 |
কোইরেংসনা(৬) লালজিৎসনা(৭)
গোলাপসনা(৮) তোম্বীসনা(৯)
চীংলেনসনা(১০) মেঘজিৎসনা(১১)
পরীং অসীদগী ঐখোয়না খঙবা ঙম্বদি, মসীদা মারজিৎকী
মচা-মশূশিং অমত্তনা জারিবোনদা মীৎয়েং চঙলকখিবা লৈতে হায়বসীনি। মায়কৈ অমরোমদা,
মপাবুং ইবুংঙোনা অরোনবা কোনুং শেম্বা অমসুং লৈবাক তংখায় ফংবা হাক্তক্তা জারিবোনদা
কোনুং শেমদুনা পাল্লম্বা লৈবাক অদুগী পরীং মখা চত্থরুনবা, মতোন মারজিৎকী তুংদা মজা
ইবুংঙো ত্রিভুবনজিৎনা হোৎনরখি। অসুম্না থাজনৈ – মণিপুরগী নিংথৌ ফম্বালদা মতোন
গম্ভীর, নর অমসুং গম্ভীরগী চাদা-নাউদানা লৈহৌরগদবা অদুদা অমুক হন্না য়েৎনীংদ্রদুনা
ত্রিভুবনজিৎনা জারিবোনদা মপাবুংনা শেমগৎলম্বা লৈবাক অদুদা নিংথৌ ওইনা পান্দুনা
লৈরুনবা লাকখিবনি হায়বসীনি। মহাক্না নিংথৌ ওইবা মতমদা মনাউ ইবুঙো সনা চহী অহুমনা
য়ুবরাজ ওইনা পানখি। অদুবু মীচং শঙ্গন অমসুং খূৎশু খূৎলাই মতিক চানা লৈরকপা অমসুং
বৃটিশকা য়াম্না চান্নবা অমা ওইরকপদগী মণিপুরগী নিংথৌ ফম্বাললোমদা অমুক মীৎয়েং
থম্লক্তুনা লান হৌরুই। মতিক চাবা নিংথৌ মচা ওইবনা খৃষ্ট চহী ১৮৪১ গী কালেন ২৩ নিদা
মণিপুর কোনুং পায় অদুবু মখোয়গী অশোনবা খঙদোকখিবনা কালেন ২৪দা অমুক মায়থীবা নংদুনা
লানফমদা থৱায় থাখি।
নিংথৌ অমসুং লৈবাক মপূশিংগী পাল্লম্বা মতম (চুমথোক্কদবা)
১. নিংথৌরেল চৌরজিৎ ১৮১৭ – ১৮১৯
২. নিংথৌরেল মারজিৎ ১৮১৯ – ১৮২৪
৩. ইনিংথৌ ত্রিভুবনজিৎ ১৮৩০ – ১৮৪১
৪. ইনিংথৌ রণজিৎ ১৮৪১ – ১৮৫৮
৫. ইনিংথৌ দয়াবন্ত (সনা কালা) -------*
– ১৯২০
৬. লৈবাক মপু কোয়রেংসনা ১৯২০ – ১৯৬৪
৭. লৈবাক মপু লালাসনা ১৯৬৪ – ১৯৮৪
৮. লৈবাক মপু গোলাপসনা ১৯৮৪ – ১৯৯০
৯. লৈবাক মপু তোম্বীসনা ১৯৯০ – ২০০৮
১০. লৈবাক মপু চীংলেনসনা ২০০৮ – ২০১৪
১১. লৈবাক মপু মেঘজিৎসনা ২০১৪ – হৌজিকসু
* সনাকালা
অঙাং ওইনা জারিবোনদা লাকখিবনি। মরম অদুনা মহাক্না করম্বা চহীদগী নিংথৌ ওইনা পানবা
হৌখিবনো হায়বগী চপ চাবা মতম পীবদা অপনবা খরদি মায়োক্নরি।
সনা চহী অহুম পোকপা অমসুং
চাউবা
মচা ইবুঙো সনা চহী অহুমসি মপাবুং নিংথৌ চৌরজিৎনা
সোনাইগী দুংগ্রিপারদা কোনুং হোংজিনবা কুম খৃষ্ট চহী ১৮১৯ গী এপ্রিল ২৭, লৈবাকপোকপা
নুমিৎ (শকাব্দ ১৭৪১, বৈশাখকী ২ নি পানবা মঙ্গলবার)তা তাইবং মীৎকপ থোকখিবনি (শকাব্দ ১৭৪১, বৈশাখকী ২ নি পানবা হায়রিবসী মঙ্গলবার
নত্তে, শগোলসেননি, খৃষ্ট চহী ১৮১৯ গী এপ্রিল ২২ ওই। অদুগা খৃষ্ট চহী ১৮১৯ গী
এপ্রিল ২৭, লৈবাকপোকপা নুমিৎ অসী শকাব্দ ১৭৪১, বৈশাখকী ৭ নি পানবা মঙ্গলবার ওইনা
থেংনজৈ)। মমাগী শিয়োম্নুংদা চহী ৩ নাক্লু ফিয়াল্লগা
তাইবং ফাওবনি হায়বগীদমক মহাকপু সনা চহী অহুম হায়না কৌবনি। মহাক্কী অশেংবা মিংদি
রণজিৎ সিংহ হায়বসীনি, মহাকপু বৃটিশনা নরেন্দ্রজিৎ সিংহ হায়না লাচল্লম্বা থেংনৈ। মহাক
সোনাইগী দুংগ্রিপারদা পোকচরবসু মপাবুং কায়নরবা মতুং ১৮২৪গী চুংদগীদি জারিবোনদা
লৈরগা চাউবনি হায়না থাজনৈ।
মৈদিংঙু ফালোক/ভালোক/নোংচূপ ৱাইরং পামহৈবা
(চৌরজিৎ) কী তালোয় শীংদা চনখিবী লৈমা ৫০গী মনুংদা মখাগী ১১ অসীনা মচা ইবুঙোশিং
পোকখি। মখোয়শিং অদুদি-
পরীং
|
মমা
ইবেম ওইখিবীশিং
|
মচা
ইবুঙোশিং
|
১
|
খুম্বোংময়ূম চনু অহন
|
সনা
ত্রিভূবনজিৎ (কীর্ত্তি) সিংহ
|
২
|
খুম্বোংময়ূম চনু য়াইমা
|
সনা রাম সিংহ
|
৩
|
খুম্বোংময়ূম চনু নহা
|
সনা তিলান তাবা
|
৪
|
ক্ষেত্রিময়ূম চনু
|
সনা নদিয়াচান্দ সিংহ
|
৫
|
লাইরিকয়েংবম চনু
|
সনা
রণজিৎ (সনা চহী অহুম) সিংহ
|
৬
|
লাইশ্রম চনু থোংলান
(খোংনাং) লান্থবী মহারানি
|
সনাহল পলান্দ সিংহ
|
৭
|
ঙাঙবম চনু অপাম্বী
|
সনা বৃন্দাবন তাবা সেনাপতি
|
৮
|
নোংমাইথেম চনু
|
সনা শিলোং তাবা
|
৯
|
নোংমাইথেম চনু নহা
|
সনা ইসাময়ি সিংহ
|
১০
|
ওইনাম চনু
|
মীতৈ তাবা হেনালজিৎ সিংহ
|
১১
|
সনসম চনু
|
সনা ধর্ম্মসেন সেনাপতি
|
পরীং অসীদা কনানা অহননো অদুগা কনানা অতোম্বনো
হায়বগী মথং-মনাউদি হায়বা ঙমদে। অদুম ওইনমক, সনা চহী অহুমসী ত্রিভুবনজিৎকী মখা তাবা
মনাউনি হায়বসীমদি ময়েক শেংনা খঙবা ঙম্মী। সনা ত্রিভুবনজিৎতি মণিপুরদা ইং ১৮০৯ গী
জুলাই ৫ (শকাব্দ ১৭৩১, আষাঢ় ১৪),
য়ূমজকৈশা নুমিৎ পোকপনি, সনা চহী অহুমদগী মহাক্না চহী ১০রোম হল্লি।
জারিবোনগী নিংথৌ ওইবা
ময়াম্বুং ত্রিভুবনজিৎনা মণিপুর থাদোক্তুনা
শিলেটতা লৈরম্বা মতুংদা জারিবোনদা লাক্লগা ৱারী-ৱাখোঙ কয়া থিগৎতুনা মপাবুং নিংথৌনা
শেমগৎচরম্বা মীতৈ লৈবাক অসী মহাক্না অমুক মখা শমথনা শেমগৎপা পামদুনা থৌদাং লৌখি।
মতম অসীদা কুকি (লুশাই) শিংগী হাওরাননা মরম ওইরগা বৃটিশশিংনা য়াম্নমক মকোক চীকপা
মতম ওইরম্মি। বৃটিশনা মীতৈবু চীংমী লাকশিনবদা খ্বাইদগী হৈ-শিংবা কাঙবুনি হায়বসী
খঙবনা মরম ওইরগা মজাইবুঙো ত্রিভুবনজিৎতা টুকাভি (tuccavi)
লোনগী খূত্থাংদা শেলগী মতেং পাংদুনা কাছাড়গী খা থংবা শরুক্তা খুন্দা-লৈতাহনখি,
লৌউ-শিংউগী থবক চত্থহনখি। (টুকাভিগী খুত্থাংদা লোন পীদুনা খুন্দা-লৈতাহনবা অমসুং
লৌউ-শিংউবগী থবক চত্থহনবসী রানি ইন্দুপ্রভাগী মৌপ্বানিপা পুরবিতা/পবিত্র সিংহ রাজকুমারদসু
তৌহনখি) মজাইবুঙো অসীনা বৃটিশতগী খুন্দা-লৈতাহনবা অমসুং লৌউ শিংউবগী মিংদা লুপা
২,৬৩৬ ফংলবা মতুংদা অমুক মখা তানা লুপা ৬০০ অমগা পীবিরক্নবা হায়জখিবসু লৈখি। (Cachar
District Records, Silchar,1969, p.272) শা-ষণ, শগোল-শামু
য়াওনা খূৎসু-খূৎলাই কয়ামরোম মতেং পাংদুনা লুশাই ঙাকপদা মতেং ওইনবা শিন্নখিবসু
লৈখি। অসুম্না মজা ইবুঙো অসীনা থৌদাং লৌদুনা পানবা মতম অসীদা মনাউ ইবুঙো সনা চহী
অহুমবু য়ুবরাজগী থৌদাং লৌহনখি। মতম অসীদা ত্রিভুবনজিৎনা জারিবোনদা গারোৎ লিংলম্বগী
ৱাফমসু লৈখি।
মণিপুরদা নিংথেম পীশক (চন্দ্রকীর্তি)না য়াম্না
অঙাং ওইনা নিংথৌ ওইদুনা লৈবা অসীদা নাকন কয়ামরোমদগী ফম্বাল লান হৌখিবা লৈখি। শেল-থুম,
খূৎসু-খূৎলাই, মীচং-শঙ্গন মরাং কায়না লৈরকপা মতম অসীদা মজাইবুঙো ত্রিভুবনজিৎসু লান
হৌবা ময়ামগী মনুংদা অমা ওইখি। বৃটিশকী মতেং নিরুখি, অদুবু য়ারকখিদে। অদুম ওইনমক,
মচিন-মনাউ রাম সিংহ (খুম্বোংময়ূম চনু য়াইমনা পোকপা)গী মতেংদগী লান্মী ৬০০ রোম
পুদুনা লান তাখি। খৃষ্ট চহী ১৮৪১, মে ১৫গী লানফমদা কোনুং পায়বা ঙমখ্রবসু মথংগী
নুমিৎতা মায়থিবা নংদুনা মচিন-মনাউ অনীমক থৱায় থাখি। মেগজিন মনুংগী লানদা সেনাপতি
দেবেন্দ্রনা ত্রিভুবনজিৎপু হকথেংননা হাৎখিবনি। সেনাপতিনা অসুম্না চৌরজিৎকী মচা
ইবুঙো ত্রিভুবনজিৎপু হাৎখিবা অসীদা দেবেন্দ্রগী ময়াম্বুং য়ুবরাজ নর সিংহনা মহাক্কী
য়াথং য়াওদনা ত্রিভুবনবু হাৎখিবগীদমক নুঙাইতবা ফোঙদোকখি। ত্রিভুবনজিৎনা ফম্বাল লান
চৎপা মতম (মশাগী চহী ৩২রোম শুরে, মতমসীদা সনা চহী অহুমগীদি ২২ রোম শুরগনি) অসীদা,
মনাউ ইবুঙো সনা চহী অহুমদা জারিবোনগী নিংথৌ খুবম শিন্নরম্মী। ত্রিভুবনজিৎপু
হাৎখ্রবা মতুংদা মচা ইবুংঙো সনা কালা (দয়াবন্ত)বু নিংথৌনা কোনুংদা পুখৎতুনা য়োকখি।
নোংমা থাঙ্গাল জেনরেলনা ‘মহারাজ, কৈ মচা য়োক্লিবা করিগীনো ? হয়েং চাউরক্লগা চীক্লোইদ্রা
?’
হায়বা তাহৌবদগী মণিপুর থাদোক্তুনা মপাবুংনা নিংথৌ ওইরম্বা জারিবোনদা লাকখিবনি।
দয়াবন্তনা কোনুং থাদোক্তুনা জারিবোনদা লাকখ্রবসু, নিংথৌনা চান-থক্নবা, শেল-থুম অমদি হিংবদা
চঙগদবা পোৎলম কয়া মতম-মতমগী থারকখিবা লৈখি।
সিপাহী লালহৌদা সনা চহী অহুম
মণিপুরগী নিংথৌ চন্দ্রকীর্তিগী হাক্তক্তা,
ফম্বাল লান হৌরুবা মরমদগী ত্রিভুবনজিৎপু হাৎখিবা অমসুং অতৈ নিংথেমচা কয়ানা ফম্বাল
মিহৌদুনা লালহৌবা অসীদগী লৈঙাক্লোনদা মরা তাদবা ফীবম অমা লৈখিবদু লাকশিনবা ঙম্নবা
কাছাড়দা লৈবা নিংথেমচাশিংবু লাপ্না থৈদোকপীখিনবা মণিপুরগী পোলিটিকেল এজেন্টনা
খঙহল্লকপা মতুং ইন্না কাছাড়গী সুপরিন্টেন্দেন্ট কেপ্টেইন লিওনসনা নিংথেমচা পবিত্র
সিংহ (মৈদিংঙু
তম্লেনখোম্বা/মধুচন্দ্রনা
নোংথোম্বম চনু অপাম্বীদা পোকপা),
নিলম্বোর সিংহ (মৈদিংঙু
তম্লেনখোম্বা/মধুচন্দ্রনা
লৌরিয়াম চনুদা পোকপা) অমসুং নরেন্দ্রজিৎ সিংহবু ১৮৪১গী মে ১৬তা ফারগা ধাকাদা থমখি।
মসী মখোয়না অমুক হন্না মণিপুরগী নিংথৌগী মথক্তা লান হৌরক্কদ্রা হায়না চিংনবদগীনি।
মখোয়না ধাকাদা বৃটিশকী মীৎয়েং মখাদা নজরবন্দি লৈগনি অমসুং সরকারগী অয়াবা য়াওদনা
চত্থোক-চৎশিন তৌবা য়ারোই। ধাকাদা লৈরিঙৈ নরেন্দ্রজিৎনা মখোয়বু মরম চাদনা ফাজিনবনি,
মখোয়বু থাদোকউ হায়না চেরোল অমা ইদুনা খৃষ্ট চহী ১৮৪২ এপ্রিল ২৫ দা থাজিনখি অদুবু
য়াবিখিদে। কাছাড়গী অতোপ্পা সুপরিন্টেন্দেন্ট কেপ্টেইন জি বর্নরনদি নরেন্দ্রজিৎপু
ঈরাং শাগৎলকপা য়াবা নিংথেমচা অমনি হায়না লৌরমদে, লানদি ময়াম্বনা হৌরম্বনি হায়না
পনখিবা লৈখি। মণিপুরগী নিংথৌ চন্দ্রকীর্তিনা অনীরকশুবা ওইনা নিংথৌ ওইবগা ইং ১৮৫১দা
ধাকাদা লৈরিবা নিংথেমচাশিংবু মনীং তমহনবিনবা খঙহল্লকখি, লোয়ননা চহী অসীমক্কী
নবেম্বর ৭ তা ফাজিল্লম্বা মখোয়বু থাদোকখি। নরেন্দ্রজিৎনা কাছাড়দা হল্লক্তুনা
লৈরিঙৈ মতমদা নিলম্বোর, নল/নাওল
সিংহ (মৈদিংঙু তম্লেনখোম্বা/মধুচন্দ্রনা
য়েন্দ্রেম্বম চনু ইন্দ্রানিদা পোকপা) অমসুং সনা কণ্হাই (মৈদিংঙু নোংপোক ৱাইরং
পামহৈবা/মারজিৎনা
লাইশ্রম চনুদা পোকপা) না
লুচিংবা কাঙবুনা ১৮৫১দা অমসুং ৱাংখৈরাকপা (মৈদিংঙু নোংপোক ৱাইরং পামহৈবা/মারজিৎনা মীতৈ লৈম থাংজম চনু পূণ্যবতি দা পোকপা
য়ুবরাজ সনা য়োগেন্দ্র সিংহ), কণ্হাই অমসুং কিশোরগী কাঙবুনা ১৮৫৬তা মণিপুরগী ফম্বাল
লান হৌখিবশিংদা য়াওখিদে।
নরেন্দ্রজিৎকী পুন্সীদা বৃটিশকা লৈনখিবা মরী অসী
কয়া অফবা নত্তে। মহাক মশামক্না থেংনখিবা নুঙাইখিদবা অমসুং মপাবুং হাক্তক্তা ঊৎখিবা
ফজদবা মতৌশিংগী মথক্তা মণিপুরগী কবো তম্পাকপু অৱাদা পীথোকখিবা, অসোমদনা, কাছাড়দা
মণিপুরীশিংবু শেল খরা লোন পীদুনা নমথাক তৌরগা থবক শূহনখিবা অদুগা মরম চাদনা ভারত
মচাশিংবু থৌরী য়ান্দুনা হাৎখিবা অসীনচিংবা অসীনা থনুংদা অচাবা মতম ঙাইদুনা লৈখি।
হায়রিবা তাল্লক তাঞ্জা অসীদা, চিট্টাগাংগী ৩৪শুবা নেটিব ইনফেন্ট্রিনা খৃষ্ট চহী
১৮৫৭তা হৌবা সিপাহী লালহৌগী শরুক অমা ওইনা দিসেম্বর ১৮, লাটুগী লানফমদা বৃটিশ
ওফিসর মেজর বিং (Byng)বু হাৎলগা দিসেম্বর ২০দা
কাছাড়দা চঙশিল্লকপদা মতম চারে খন্দুনা মহাক মশামক মহাক্কী খোঙলোয়শিংগা লোয়ননা
লালহৌ অদুদা য়াওশিনখিবনি। তৌবগীদি দিসেম্বরগী তাং ৮দা চে ইনদুনা লালহৌদা পূক্নীং
হকচাং য়াওনা শৌগৎপগা লোয়ননা মতেং পাংগনি হায়দুনা মাঙজৌননা য়ানখিবা লৈখিবননি।
নরেন্দ্রজিৎ য়াওশিল্লকপদগী লালহৌ অদু হেন্না
মৈরী কনখৎলকখি। রণটিলাদা লালহৌবশিং পোত্থাদুনা লৈরিঙৈ, চান-থক্নবা লাঙলিঙৈ মীশিংনা
তাকশিন্দুনা বৃটিশকা খঙহৌদনা অকনবা লান শোক্নখি। মশীং থিঙমদনা শিখি। ফাহৌবশিংবু
কাটাখাল তুরেল মপান্দা হৌবা খোংনাং পাম্বীগী মশাদা চরোং-চরোং থৌরী য়ান্দুনা হাৎখি।
কালাপহারদা হিবোৎ থন্না খূৎশূ-খূৎলাই হাপ্লগা খোংনাং পাম্বী অমগী মখোঙদা লোঙ্গোরনা
পুন্দুনা লোৎলম্মী। অসুম্না মখা চত্থরকপনা জলঙ্গাদা অমসুং দিসেম্বর ২৪ দা সাতলা
আউরদা খূৎফংননা শোক্নখি। অশোক-অপনশিংগী লাইয়েংবগী পোৎলুমসু সনা চহী অহুমনা
লৌরম্মি। সাতলাগী মতুংদা সোনাইমুখকী নগদিরগ্রাম, বোনরাজ, গোবিন্দনগর, কেপ্তেইনপুর
ফাওরগা বিন্নাকান্দিরোমদা তাখিদুনা ভুবোন চীংখোঙরোমদা নকশিন্নবা নরেন্দ্রজিৎনা
লমজিংখিবনি। মহাক অফবা লমজিংবা অমনি। মহাক্কী লাল্লোংদি- লোয়ন-তিন্নবা, লালহৌ
হৌমিন্নরিবশিংবু কন্নবা হোৎনবদা মশামক্কী ফীবম য়েংদবা অসীনি। লাইবক ফদুনা অয়াম্বা
শরুক ভুবোন চীংগী উমংদা ফাওজিনবা ঙমখি। অদুম ওইনমক, সোনাই তুরেল লান্থোক্নবা হোৎনরিঙৈ মতমদা
খূৎথোক্নবা অদুদা লালহৌবা লান্মী কয়াদি থৱায় মাঙখি।
মখোয়না ভুবোন চীংখোঙদা লৈরিঙৈদা বিন্নাকান্দিদা অকনবা
খূৎথোক্নবা অমা থোকখি। খূৎথোক্নবা অসীনা লমদম অসীদা থোকখিবা খ্বাইদগী চাউবা
লানফমনি হায়না লৌবা য়াই। বরাক তম্পাক অসীদা সিপাহী লালহৌগী মরমদা পন্নরকপদা লাটুগী
লানফমগী মথংদা বিন্নাকান্দিগী লানফম অসী শীংথানীংঙাই ওইখি। মসীদগী নরেন্দ্রজিৎ উমং
ফাওনা চঙখ্রগা মণিপুরগী ঙমখৈরোমদা লানশিনখি। অসোমদনা বৃটিশপু মতেং পাংনবা মণিপুরগী
নিংথৌনা মেজর লোংজাম্বা রোমানা লুচিংবা লান্মী ৪০০ থারক্লম্মী। মখোয়গা থেংনদুনা
জিরি উমংদা খূৎথোক্নবা অমদা লোয়নরকপা মরোয়-মনাউশিংবু কন্নবা হোৎনবদা সনা চহী অহুম
অশোক-অপন নংখি। লানফম অসীদসু, বৃটিশ সরকারগী মায়োক্তা, নীংতম্না হিংনীংবগী খোল্লাউ
লাউদুনা খূৎলাই পায়খিবা লান্মী কয়ানা মশাগী পুন্সী বলিদান ওইনা কৎখি। অসুম্না
অশোকপা সনা চহী অহুমবু লোয়নবা কয়াগা লোয়ননা ফারবা মতুংদা মণিপুরদা নিংথৌগী মনাক্তা
পুখি। ফারবা লালহৌবা পূম্নমকপু কাছাড়দা বৃটিশকী ৱায়েল চত্থবা য়ানবা থিন্দোরকখি।
অদুবু নরেন্দ্রজিৎপুদি নিংথৌনা ঈকাই খুম্নবগা লোয়ননা মণিপুরদা থমহৌই, ফনা তৌবিখি।
মহাক্না হৌরিবা লান অদু মণিপুরগী ফম্বাল মিহৌবা লান নত্তে, ইশাগী ঈরমদা মীগী মীখা
পোন্না পুন্সী হিংবা অদু পামজদদুনা বৃটিশকী মায়োক্তা হৌবা লান্নি হায়বদু খঙবদগী,
মথৱায় কন্নীংবগী ৱাখল্লোনদা ৱায়েল খরা তৌরগা কৈশুমশঙদা থম্নীংলম্মী অদুবু মণিপুরগী
নিংথৌসু বৃটিশকী মখা পোনবা ওইবনা, খঙহল্লকপগী মতুং ইন্না বৃটিশকী মখূৎতা খৃষ্ট চহী
১৮৫৮, এপ্রিল ২৫দা অমুক শিন্নখি।
‘চৈথারোল কুম্বাবা’দা হায়রি
ফাইরেন
থা থাংজনা হল্লে, ... তরামাথোইনি নিংথৌকাবা (১৮৫৮, জনুৱারী ২৫)দা ময়াম্বুং ইবুঙো
চহী অহুম ময়াংদগী থুংলৈএ। ... কালেন থাদি য়ুমশকৈশানা হল্লে, ... অনীনি শগোলসেন
(১৮৫৮, এপ্রিল ২৫)দা ইবুঙো চহী অহুম ময়াংদা থাজিনখিএ। -লা ৩৩৫-৩৩৬
মসীদা পল্লিবা থুংলবগী ৱাফমসী নরেন্দ্রজিৎপু
মণিপুরগী লান্মীনা ফারগা পুখিবগী মতাংনি, অদুগা থাজিনখিবা অসীনা বৃটিশ সরকারদা
অমুক খূৎশিন্নখিবা মতাং অদুনি। মণিপুরগী নিংথৌনা বৃটিশ সরকারদা শিন্নবগী অতোপ্পা
মরম অমদি মতমদুদা লৈরম্বা মীতৈগী ৱাখল্লোনদা সিপাহী লালহৌগী পান্দম ‘… all mutineers
want is the Sahibs life and why sacrifice lives for the Ferenghees’
হায়বসী চুম্মী হায়না য়ানীংলকপদুনি।
কালাপানিদা থাবা
মণিপুরগী কৈশুমশঙদা থমদুনা মপুন্সী কলহৌনীংবগী
অপাম্বা মণিপুরগী নিংথৌদা লৈরবসু য়াথংগী মখা পোন্না অমসুং মখোয়গী পান্দম অদুদা
অতৈসু য়াওশিল্লক্তুনা মৈরী হেনগৎলক্কদ্রা হায়বগী অকিবা লৈবদগী বৃটিশ সরকারদা
শিন্নখিবনি। অদুম ওইনমক, মণিপুরগী নিংথৌ চন্দ্রকীর্তিনা ময়াম্বুং থোকপা নরেন্দ্রজিৎপু
ঈকাই খুম্নবগী চাংসি য়াম্না ৱাংলম্মী। নিংথৌনা বৃটিশ সরকারদা খঙহনখিবা চেরোল অমদা
মহাক্কী মথৱায় কনবিবা পাম্বগী অনীংবদু ফোঙদোকখি-
As the British
Government has been pleased to approve of my previous conduct I earnestly hope
that in consideration for me the British Government even if his fault be - found a heavy one may spare his
life.
নিংথৌগী অনীংবা অদু বৃটিশ সরকারনসু ঙাকখি, লালহৌবশিং
কয়ামা শিবগী চৈরাক পীখ্রবসু মহাকপু সমুদ্র ৱাংমদা থাদোকখিবা হায়না হুকুম
থোক্লম্মি-
Narendrojeet
Sing having been tried under Act No. XIV, of 1857, and having apparently been
found guilty of a criminal offence ought not to be treated as a state
prisoner....
Honourable
President in Council agrees with Lieutenant Stewart in thinking that it would
be inexpedient to sentence the prisoner capitally. If imprisoned for life, it
can only be the transportation beyond seas. -(Secretary, Government of India to Secretary, Government of Bengal, No.
2272, 25 June 1858, MSA.)
সমুদ্র ৱাংমা, কালাপানিদা থাবগী ৱারেপ অসী লৈরবা
মতমদা নরেন্দ্রজিৎ হায়রিবা নিংথেমচা অসী কাছাড়দা মীয়াম্না য়াম্নমক লুনা নীংনবা
মীশক অমা ওইবনা মরম ওইরগা মহাকপু মফম অসীদা কুইনা থম্বা কিবদগী খূদক্তা কলিকাতাদা
থিন্দোকখি।
I
have taken the advantage of a large batch of prisoners proceeding to Calcutta
under a strong guard and have forwarded Norindrajeet Sing along with them. His
presence, and that of the other princes in Cachar is not calculated to allay
the excitement which had recently prevailed among the Monipoories, and I trust
that his honour will approve of the step I have taken, instead of awaiting
orders upon a reference.
কালাপানিদা থাবগী মতাংসীদা থাজৱারী অনী লৈ।
মখোয়শিং অদুদি- অহানবদা, সনা চহী অহুম কালাপানিদা চৎলি অদুগা জেলরগী নুপী/মচানুপী
লায়েংবদগী ফরদুনা লোন্না অমুক থাদোরকই। অনীশুবনা, সনা চহী অহুম কালাপানিদা চৎখিদে,
জেলরগী নুপী/মচানুপী
লায়েংবদগী ফরদুনা অশিবা অমগী মফমদা থৈদোরক্লগা ঈশিংদা পোঙ (বুঙ্গা) শারগা থাদোরকখিবনি।
ৱারী অনীমক্তা সনা চহী অহুমসি কালাপানিদা মপুন্সী লোমখিদে হায়বসীমদি ইশেং শেংই।
সনা চহী অহুমগী ইমুং-মনুং
সনা চহী অহুমগী পুন্সীদা নিঙোল কয়ামরোমবু তালোই
শীংদা চল্লম্মী। বি কুলচন্দ্র শর্ম্মানা মশীং তাকপা মতমদা ৭নি হায়বিরম্মী। ৭কী
মনুংদা ৪না অঙাং য়াওদে অদুগা ৩ – লাইশ্রম চনুনা ধাকা তাবা পোকই, হাওরোংবম চনুনা
চাউবা পোকই অমসুং থিংবাইজম চনুনা অঙৌ অমসুং গোকুল পোকই হায়না মহাক্কী লাইরিক ‘সনা
চহী অহুম’দা ইবিরম্মী। লাইরিক অসীদা পল্লিবা নিঙোলশিং অসীগী মিং অমসুং লৈফমনচিংবদি
পীবিরমদে। অদুম ওইনমক, ওইনাম উষারানিনা থেংনবা মতুং ইন্না অঙাং য়াওখিদবী হাওবম চনু
অতোম্বীগী অউনপোৎ ওইনা কোনগী কোরফু অমা কোনুং লৈকাইদা লৈবা হাওবম বাবুগিদা লৈবা
থেংনৈ হায়বসীনা তাকপদি হাওবম চনু অসী কোনুং লৈকাইগী ওইগনি হায়বসীনি। শ্রী
শর্ম্মানা পীরিবা রেকোর্দ অসীগী মতুং ইন্না জারিবোন থিঙ্গোমখুনদা লৈহৌবা সনা চহী
অহুমগী মচাইবুঙো মৌলেন্দ্রজিৎ অমসুং মহাক্কী চারোলগা লোয়ননা ত্রিপুরাদা লৈখিবা
মচাইবুঙো ভূপেন্দ্রজিৎসনা অমসুং মহাক্কী চারোলগী মরমদা পনবিরমদে। মরম অদুনা,
মৌলেন্দ্রবু পোকপা হাওরম্বম চনু ভাগ্যবতি অমসুং ভূপেন্দ্রজিৎসনা পোকপী য়াওরগদি
পূন্না নিঙোল ৯ পান্নরম্মী হায়না লৌবা য়াই। মায়কৈ অমরোমদা, সনা চহী অহুমনা অহোরাই
থুংবা সাহেপ নুপী অমা লায়েংদুনা ফখি হায়রিবা নুপী অদু পান্নদুনসু মতম খরা লৈরম্মী
হায়বগী ৱারীসু অহল্লমননা পনবিরম্বা লৈবনিনা ১১ নি হায়না মশীং পাবসু য়াই।
সিপাহী লালহৌগা মরী লৈনবা
বেঙ্গলি খুনুং ঈশৈ
মতমদুগী সুর্মা তম্পাক্কী (শিলেট অমসুং কাছাড়)
বেঙ্গলি চীনবুংদা সিপাহী লালহৌগা মরী লৈননা শাগৎখিবা খুনুং ঈশৈ অমা মতম কুইনা
শক্নরম্মি।
দুয়ার বন্ধ রে সিপাহী আইলা
ঘাটে
সাহেব বাবু-এ হুকুম দিলা
মরবা-ই ফাসিঁর কাটে
হাই-রে মরবা-ই ফাসিঁর কাটে।
থোঙ লোনশিল্লু সিপাই লাক্লে
ঘাটতা
সাহেব বাবুনা হুকুম থোক্লি
মখোয়বু চঙজফম পীর’দি
শিজনি ফাসিঁগী থৌরিদা।
যাইওনা যাইওনা ভাই রে
লাটুর বজার দিয়া
শয়ে শয়ে সিপাই
আইছইন ইংরেজ খেদিয়া
হাই-রে ইংরেজ খেদিয়া
চৎখিনু চৎখিনু ইনাউসা
লাটুগী কৈথেলরোমদা
সিপাই চাম-চামনা
লাকই ইংরেজ তান্থোকপা
হাই-রে ইংরেজ তান্থোকপা
ও মন পরাণ ফাটে রে
চোখে দেখা দেয়
কলির কোপে হায় হায়
সিপাইর পরাণ যায়
---------------
পথে বসে কাঁদে সতী পতির আশায়
পুত্র কন্যা অসহায় করে হায়
হায়।
হে পূক্নীং থৱায় অসী কায়খরে
ইমীৎসিনা উবা ফংলি
কলি যুগকী চক্রিসিদা
সিপাইশিংনা থৱায় থারি
---------------
লম্বীদা থোক্তুনা কপ্লি সতী
মপুরোইবগী আশাদা
মচা নিঙোল পিবা লৈত্রে পাম্বৈ ৱাখরেদা
ৱাখরে
সনা চহী অহুমগী অঙকপা ৱারী খরা
মীওইপোক অমদা হেন্দোক থোইদোকপা অঙকপা গুণ চেন্না
পোক্লকপা হায়বসী য়াম্না তাঙনা থোকই। অদুগুম্বা অতাঙবা মীওইপোক অমদা সনা চহী অহুমসু
তাইবং ফাওরকখি, হিংখি, থবক তৌরমখি, হৌজিক ফাওবদা মহাক্কী তাইবং থাখিবগী পাউ কনানসু
খঙবা ঙমদ্রি। মহাক্না পোকপা, হিংবা অমসুং শিবা তানবা ফাওবদা লৈরম্বা, ময়াম্না
থাজনরিবা অঙকপা ৱারী খরদং মখাদা থমজরি-
১. মহাক
অসী মমাগী শিয়োম্নুংদা চহী অহুম (কনাগুম্বনা চহী অহুম, থা অহুম, নুমিৎ হুম্নিসু
হায়) লৈরগা পোকপনি।
২. মহাক
অসী ঈরাই নুমিৎ খূদিংগী মখূৎ নাম খূ মখা লান্থনা শাংথৈ হায়দুনা ‘অজানুলম্বিত ভূজা’
হায়নসু খঙনৈ।
৩. মহাক্না
কালাপহারগী খোং ময়াদা লোঙ্গোরনা পুন্দুনা থম্লম্বা খূৎলাই য়াওবা হিবোৎ অদু হৌজিকসু
মতম মতমদা মথি ফোংই, খুরুম তোংনা চৎপগী মখোল তায় হায়নৈ।
৪. কালাপহার
চীং অসীদা হৌবা ৱা পাম্বীশিং অসী পৈনা-পৈনা হৌরি, মসী সনা চহী অহুমনা
হাইদোক-হাইদোক্তুনা চৎখিবগী খুদমনি হায়বসীনি।
৫. মোগ্লান
চীংদা চাক থোংদুনা চানবা হোৎনরিঙৈদা বৃটিশনা লান্দারক্তুনা থাদোক্লম্বা মতমদা
খুহৌবা মৈখুদু হৌজিকসু নোংথি নোংমংবা মতমদা হেক-হেক খুবা উরি হায়নৈ।
৬. খুচিলা
চীংদা লোৎলিঙৈদা বৃটিশনা তান্নরকপদগী থৈবদা, ঈমায় চোবা তুরেল লানবা তারবদা, অতৈ
পাম্বৈ অমত্তা লৈরক্তবদগী লা লাতোন অমদা ফম্লগা ক্ষেত্রিখুনদগী লান্থোকখিবা উনহৌই
হায়না ৱারী তৌই।
৭. মহাক্না
শিবা থোক্লবদি ঈগী নোং চুগনি অদুগা লৈনাংগী নোং তারক্কনি হায়না ফোঙদোক্লম্বা লৈখি।
ময়াম্বুং ত্রিভুবনগী মশূ ইবুঙো লৈবাকমপু ওইরম্বা কোয়রেংসনানা লফু মকাদা ঈরিক নপ্পা
অমসুং ঈচুম তাবীদা লৈনাংগী নোং তারকপা উবদগী মপুচা অসী লৈখিদ্রবোই নীংখিবা লৈখি।
৮. শোকপদা
অনাবা ফবগী গুণ সনা চহী অহুমদা য়াওই, মশাগী মতিনবুসু হীদাক ওইনা শীজিন্নখি। জেলরগী
মচনুপীনা অহোরাই পকপদু মশা শেংনা চয়োল অমা লাইৱা হায়দুনা মশাগী মতিন তৈরগা
লায়েংদুনা ফখিবনি হায়না থাজনৈ।
৯. মহাক
উহন্দবা হায়বদি মাঙবা ঙম্মি। মশূ শূথাং ভৈরবজিৎ (ত্রিভূবন – সনাকালা – সনায়াইম –
ভৈরবজিৎ) কী লোয়নবী তখেল্লৈনা হৱাই অশাংবী হেক্লিঙৈদা ‘খজিক্তা পীবিয়ু’ হায়রকপদা ‘লাই
কৎচদ্রি’ হায়না খুম্লুবনা লৈথোরকপদা লৈরমদে।
১০. চেংবিলগী
হিজম খম্বতোননা হায়নখিবা মতুং ইন্না লালাগী কালি মন্দিরগী উখোঙদা অহীং লেক্কনি
হায়রম্বা সনা চহী অহুমগা উনরুবা অহীংগী নোংঙাল্লকপদগী পেং চোইবা মী অমগুম পুন্সী লেনখি।
পুন্সীগী অরোইবা শরুক
কালাপানিদা থাবা থৌদোক্কী মতমদা শিরে হায়না
শন্দোকখিবা লৈবা, কালাপানিদা লৈখ্রে হায়বা পাউ লৈখিবা ময়ামসীনা মতম পূম্নমক্তা শক
তাকথোক্তনা মীরোৎ ওইনা অদুমক সনা চহী অহুমগী অরোইবা পুন্সী লেনখি হায়বা তাই।
তোঙান-তোঙানবা মীশিংদা মহাক ময়ামগী মরক্তা লৈরি হায়বসী লোন্না খঙহনবা ওইনা উনরখি।
থৌরম থৌদোক কয়াদা শক লোৎনা, লাইনীংবগী ফিজোলদা কয়ারক হন্না উনখিবা লৈখি। বামোন
লৈকাইগী লৈবা মহাক্কী সেবোক মৈস্নাম শামুঙৌ (বুজিপা হায়না ময়াম্না খঙনবা) গীদা
লাক্তুনা ‘নহাক্তি য়াম্না অহল ওইশিল্লম্লেদনা, নহাকথক্তদি উনরে, মখা অতৈদি অমুক
উনররোই’ হায়না ফোঙদোক্লম্বা লৈখি হায়রি।
অসুম্না লাইনীংবগী ফিজোলদা মফম-মফমদা
তোঙান-তোঙানবা মীওইশিংদা শক তাক্লম্বগী অরোইবা ওইনা খৃষ্ট চহী ১৮৮৮ দা লাইশ্রমখুনগী
লাইশ্রম মাধব সিংহনা উখি, মসীগী মতুংদগীদি অতৈ উখিদরে হায়বসীদা য়ূম্ফম থম্লগা বি কুলচন্দ্র
শর্ম্মাখোয়না সনা চহী অহুমগী শিখিবা মতম অসী খৃষ্ট চহী ১৮৮৮ ওইনা লৌরম্বসু থেংনৈ।
অদুম ওইনমক, জারিবোনদা ঙসী ফাওবদা সনা চহী অহুমগী শ্রাদ্ধ কর্ম্ম পাঙথোকখিবা
লৈত্রি হায়না খঙনরি। লাইনীং ফিজোলদা মহাকপু উখিবা মশক খঙদবশিংনদি লৈরু-লৈরুবা
মফমগী মতুং ইন্না লোঙ্গোর বাবা অমসুং ভূবোন বাবাজি ওইনা খঙনহৌই।
ইশাগী ইরমদা মীখা পোন্দনা, নীংতম্না হিংনীংবগী ৱাখল্লোনদা
হৌখিবা অহানবা নীংতম লানদা সুর্মা তম্পাক্কী অথোইবা লুচিংবা সনা চহী অহুমগী
অরোন-অথূপ নাইবা ৱারী কয়া ঙসিসু থিগদবা ৱাৎলি। নিংথৌ খুবম মিহৌদুনা হঞ্জিন-হ়ঞ্জিন
লান হৌনখিবা নিংথেমচাশিংগী মরক্তা য়াওখিদবা, লান্দা শরুক য়াখিদবা, মীচঙ চঙখিদবা
নিংথেমচা অসীগী মরমদা খঙগদবা ৱাৎলি। বৃটিশকী মায়োক্তা, মীখা পোন্নীংদবগী, নীং
তম্না হিংনীংবগী হৌরকপা ঈহৌদা শৌগত্তুনা, মরোয়-মনাউশিংনা থাংজিল্লিবা খোঙথাংবুদি
মশাগী ওইজবা পূম্নমক কত্থোক্তুনা লমজিংখিবা লুচিংবা অসীগী মরমদা লীথোক্কদবা ৱারী
কয়া অমসু ৱাৎলি। ঐখোয়গী হোৎনবনা ৱাৎপা, মহাক্কী পুন্সীগী অরোন-অথূপ্না হেন্না থাক ৱাংখিবা
পুন্সী অমনি সনা চহী অহুম। মখা তানা মহাক্কী মরমদা অনৌবা ৱারী কয়া তারখিগনি হায়বগী
থাজবা থমজরি।
মতেং
লৌজখিবা লাইরিকশিং অমসুং চেফোঙশিং
১. এন খেলচন্দ্র অমসুং এল ইবুঙোহল, ‘চৈথারোল
কুম্বাবা’, মণিপুরী সাহিত্য পরিষদ, ইম্ফাল, ২০০৫
২. কাম্বম চন্দ্রসেখর, ‘জারিবোনগী ৱারী লীখুন’,
জারিবোন, ১৯৯৭
৩. লাইশ্রম ৱাকচিং, ‘অচাইবা ৱারেং’, ১৯৯৯
৪. বি. কুলচন্দ্র শর্ম্মা, ‘সনা চহী অহুম’,
দুধরিগোপাল, ইম্ফাল, ২০১১
৫. উপেন্দ্র চন্দ্র গুহ, ‘কাছাড়ের ইতিবৃত’,
পারুল প্রকাশনী, ত্রিপুরা, ২০০৬
৬. সরাংথেম বরমণি, ‘মৈতৈ নিংথৌরোল লম্বুবা’
(অনীশুবা শরুক), ইম্ফাল, ২০০০
৭. এন দি হোদাম্বা, ‘জারিবোন লৈবাক্কী নিংথৌরোল’,
নৈনরোল, মঙাশুবা মশীং, ২০১০
৮. ওইনাম উষারানী, ‘মরৈবাক নীংবা অমা ওইনা সনা
চহী অহুম অমসুং মাগী পুন্সী মরেল’, নৈনরোল,
অহানবা মশীং, ২০০৮
তানজখিবা
মীওইশিং
১. তোম্বীসনা রাজকুমার (লৈবাক মপু ওইবিরম্বা),
থিংগোমখুন
২. কবোকসনা রাজকুমারী, থিংগোমখুন
৩. লক্ষিসনা অমসুং মঞ্জুসনা রাজকুমারী, কোনুং
লৈকাই
৪. নোনিসনা রাজকুমার (তোম্বীসনাগী মচা ইবুঙো),
থিংগোমখুন
৫. নোংথোম্বম হোরেন্দ্র, লালা
লিঙ্ক
No comments:
Post a Comment