মপান মণিপুরদা মণিপুরী চেফোঙঃ অশম্বা পুৱারী

ৱাহৌদোক

চেফোঙ হায়বসী য়াম্নমক মপাঙ্গল লৈবা প্রিন্ট মেদিয়া অমনি। মসীনা মীওই ফূরূপ নত্ত্রগা লম নত্ত্রগা লৈবাক নত্ত্রগা মীওইবা খুনাই অমগী সাহিত্য, কলা, সংষ্কৃতিগা লোয়ননা হীরম কয়ামরোমগী পাউজেল পুদুনা চৎলি। চেফোঙগী খূত্থাংদগী সাহিত্যকার কয়া, অৱাংবা থাক্কী ৱাঙুরোয় কয়া, পাউজেল্লোয় কয়া মপোক লাংওন তম্লকই। মখোয়না খুনাই অমবু অচুম্বা অফবা অমদি ফজবা মায়গৈ তাকপীদুনা তাইবংপান অসীদা ঐখোয়না হরাও-তয়াম্না, নুংশি চান্ননা অমসুং চাওখৎপগী ফম্বাক্তা পূন্না লৈমিন্ননবগী মরম ওইহল্লি। চেফোঙ হায়বসী শম্না হায়রবদা লৈবাক অমা, জাতি অমা শেমগৎপগী মরিশুবা য়ূম্বী মখোঙ অদুনি। মণিপুরী জাতি অসীগী চাওখৎ লমদাংদসু চেফোঙনা অচৌবা থৌদাং য়াখি। মশক নাইবা মীওই কয়া চেফোঙগী মপান্দগী মপোক ফংখি। মপান মণিপুরদসু চেফোঙ অসী ঙল্লিঙৈ মতমদগী হৌনা মশাগী মপুন্সী অমা লৈজরকখি।

চেফোঙ

চেফোঙ হায়রগা ঐখোয়না করিগুম্বা হীরম অমা নত্ত্রগা খরদা য়ূম্ফম ওইরগা ইশিন্দুনা নত্ত্রগা উনম তৌদুনা মতম নাইনা ফোঙদোকপা চেরোল অদুবু খঙনৈ। মসীগা ইংরাজিগী জর্নেল নত্ত্রগা মেগাজিন হায়বসীগা মান্নবা অর্থদা লৌবা য়াই। জর্নেল হায়বসী a newspaper or magazine that deals with a particular subject or professional activity হায়না য়ানৈ অদুগা মেগাজিন হায়বসীনা a periodical publication containing articles and illustrations, often on a particular subject or aimed at a particular readership নত্ত্রগনা a periodical containing a collection of articles, stories, pictures, or other features হায়রগা য়ানৈ। চেফোঙবু পাব্লিকেসন, পেরিওদিকেল, পেপর, প্রোসিদিংস, সপ্লিমেন্ট, গেজেত, দাইজেষ্ট, রিভিয়ু, নিউজলেটর, নিউজসিত, বুলেটিন, নিউজপেপার অসীনচিংবা মিংথোলদসু ফীবমগী মখা পোন্না খঙনৈ।

চেফোঙ মখল খায়বা

চেফোঙশিং অসীদা খূৎইনা ইবা অমসুং উনম তৌবা চেফোঙ হায়না অহানবদা মখল খায়বা য়াই। খূৎইনা ইবা চেফোঙদা লৈকাইগী লূপশিং অমসুং মহৈশঙ খরগী ফক্লাং চেফোঙ অসী য়াম্নমক মমল লৈখি। মথংদা, লন্নাই ওইনা ফোঙবা, লূপনা ফোঙবা, মহৈশঙনা ফোঙবা চেফোঙ হায়না অমুক মখল খায়বা য়াই। হীরমগী মীৎয়েংদগীসু মখল খায়বা য়াই, খূদম ওইনা- নুপীগী চেফোঙ, বিজ্ঞানগী চেফোঙ, সাহিত্যগী চেফোঙ, নিংথৌ কাঙলোনগী চেফোঙ, লাইনীংগী চেফোঙ, ৱায়েলগী চেফোঙ অসীনচিংবা। মতম নাইবগী মীৎয়েংদা য়েংলগনা নুংতিগী পাউচে, চয়োলগী পাউচে, থাখাইগী চেফোঙ, থাগী চেফোঙ, থা অনীগী চেফোঙ, থা অহুমগী চেফোঙ, থা তরুককী চেফোঙ, চহীগী চেফোঙ, মতম নাইদবা চেফোঙ অসুম হায়না মখল খায়বসু য়াই।

মপান মণিপুরদা মণিপুরী চেফোঙগী অশম্বা পুৱারীঃ অঙনবা মতম

মপান মণিপুরদা মণিপুরী চেফোঙ অসী ২০ শুবা চহীচাগী অঙনবা শরুক্তগী ফোঙবা হৌই। অহানবা চেফোঙ অদুগী মিং মৈতৈ লৈম কৌই অমসুং মদু মপান মণিপুরদা (কাছাড়দনি) ইং ১৯১৭-১৮ অদুৱাইদা ফোঙখিবনি হায়না এ চুংমৈ কামৈনা হায়। তুংদা জাগরন কৌবা চেফোঙ অমা, মদুগী অহানবা মশীংদু ইংরাজি চহী ১৯২৫ গী জনুৱারী থাদা ফোঙদোকখিবনি হায়না লৌনৈ। সিলেটকী মুরারিচান্দ কোলেজদা তম্বা মণিপুরী (মীতৈ অমসুং লৈমনাইশিং) মহৈরোয়শিংনা কোলেজদা পূনশিনমিন্নরগা থাগী ওইনা পুথোকপদা লেপ্নদুনা ইস্লামিয়া প্রেসতা উনম তৌরগা পুথোকপনি। চেফোঙ অসীগী অহানবা খোরীলাঙবা মীওই অদুগী মিং অর্জুন সিংহ অমসুং ঙমথং খোরীলাঙবা অদুগী মিংনা নীলমনি সিংহ কৌই। বাংলা লোনদা ইবা আর্টিকলশিংনা মপূং ওইহনবা চেফোঙ অসী পুথোকপদা মরু ওইবা থৌদাং লৌখিবদি- অহানবা লো গ্রেজুএত ওইখিবা শ্রী অর্জুন সিংহনি। অতৈ নহা লুচিংবশিংগী মনুংদা মিং পনবা য়াবশিংদি- শ্রী নীলমনি সিংহ, শ্রী হরিদাস সিংহ, শ্রী বাবুচান্দ সিনহা, শ্রী নিত্যাইচান্দ সিনহানচিংবনি। নিত্যাইচান্দ সিনহানা অফোঙবা ওইবীখিবনি। থৱায় য়াওবা নহারোলশিং অসীনা চেফোঙ অসী পুথোকপগী ৱা খন্নদুনা কোক চূংশিন্নবা মতমদা মতমদুগী ইতিহাসকার শ্রী মহেন্দ্র কুমার সিংহনা শরুক য়াবীদুনা ময়াম্বু পূক্নীং থৌগৎপীখি অমসুং লমজিং লমতাকপীখি। হায়রিবা চেফোঙ অসীনা হৌজিক ফাওবগী ওইনা মণিপুরী চেফোঙগী পুৱারীদা অহানবনি হায়না য়ানরি।

মতম অসীৱায়দা মণিপুরী নত্তবা অতৈ অইবশিংনা মণিপুরীশিংবু ত্রাইবেলনি অমসুং চাওখত্তবা কাঙলূপনি হায়না কন্না ইনরকপা মতমদা শ্রী তোনু সিংহ, শ্রী কৃষ্ণকুমার সিংহ, শ্রী মহেন্দ্র কুমার সিংহ, শ্রী নিত্যাইনন্দ সিনহা, শ্রী নীলমনি সিংহ, শ্রী ললিত মোহন সিনহা অমসুং শ্রী হরিদাস সিংহখোয়না কন্না য়ানীংদবা ফোঙদোক্তুনা জাগরন চেফোঙ অসীদা ইখি। নীংশিংবা য়াবা মরু ওইবা ৱাফম অমনা, চেফোঙ অসীদা দা. লমাবম কমলগী ‘ব্রজেন্দ্রগী লুহোংবা’ হায়বা ৱারীমচা অসী ফোঙদোকখিবনি হায়না শ্রী বিজয় তায়েঞ্জমনা মহাক্কী ৱারেংদা পল্লম্মী।

অনীশুবা চেফোঙনা মণিপুরী নি হায়না য়ানরি। ইং ১৯৩৩ গী সেপ্টেম্বর-ওক্টোবর-দা অহানবা ওইনা পুথোকপা থাগী চেফোঙ অসী লোন অহুমদা ফোঙবনি। লোনশিং অদুদি- বাংলা, মীতৈ লোন অমসুং লৈমনাই (বিষ্ণুপ্রিয়া) লোন অসীনি। মতমদুগী কাছাড় জিলাগী দিষ্ট্রিক অমসুং সেসন জজ ওইবিরম্বা বিএসসি বিএল শ্রী সমরজিত সিনহানা খোরীলাঙবা ওইনা চহী খরা থৌ পুবীখিবনি। মীতৈশিংগী মরক্তা চেফোঙ অসীবু হেন্না পাম্নহন্নবা অমসুং পাক্না শন্দোক্নবগীদমক দা. লৈরেন সিংহসু এদিটরিয়েল বোর্দতা য়াওখি।

মণিপুরী হায়বা চেফোঙ অসীগী মতুংদা মেখলী কৌবা থা অনীগী চেফোঙ অমসু শ্রী ফাল্গুনি সিনহানা খোরীলাংবা ওইদুনা ইং ১৯৩৮ দগী ১৯৪১ ফাওবা ফোঙলম্মী। হায়রিবা মিংথোল অসী মণিপুরী চেফোঙগী মিংথোলদা য়ানদবা লাকপদগী ধরণি সংহিতা কৌবা পুরানদা পল্লম্বা থেংনবদগী লৌখত্তুনা মেখলী হায়না ফোঙবনি। অদুবু মসীগী য়ানদবা অসীনা চহী খরা মখা চত্থরম্লবা মতুংদা ইং ১৯৪১ দা অমুক পূন্না ফম্মিন্নরগা মিং অনীমক লৌথোক্তুনা ক্ষেত্রিয়জ্যোতি কৌবা থা অনী খূদিংগী ফোঙবা চেফোঙ ওইনা মখা চত্থরকখি। মণিপুরী অমসুং মেখলী লেপখ্রগা ক্ষেত্রিয়জ্যোতি মিংথোলগী মখাদা ফোঙলকপা মতমদা মেখলী গী খোরীলাংবা ফাল্গুনি সিনহানা মখা তানা খোরীলাংবগী থৌদাং লৌখি। লোন অহুমদা ফোঙবা চেফোঙ অসী মালেমগী অনীশুবা লাঞ্জাউ মতম ফাওবা ফোঙলম্মী। অদুম ওইনমক লান লোইখ্রবা মতমদগীদি অমুক মখা চত্থবা ঙমখিদে।

মালেমগী অনীশুবা লাঞ্জাউনা মরম ওইদুনা মতম খরা লেপলুরবা মতুংদগী অমুক হন্না শমজিন্নবা হোৎনরকখিবসী ত্রিপুরাগী আগরটলাদগীনি। ইং ১৯৪৭, ভারতনা নীংতম্বা ফংবা চহীদা মাধবজিত রাজকুমারনা খোরীলাঙবা খোঞ্জেল কৌবা থাখায়গী পাউচে অমা পুথোকখি। পাউচে অসীগী এসিষ্টেন্ট এদিটর ওইনা শ্রী কমলজিত রাজকুমারনা ওইখি।

মপান মণিপুরদা মণিপুরী চেফোঙগী অশম্বা পুৱারীঃ ময়ায় চনবা মতম

মপান মণিপুরদা মণিপুরী চেফোঙগী অঙনবা মতমসী ভারতনা নীংতম্বা ফংবা চহী অসীফাওববু লৌরগা মসীগী মতুংদগী ময়ায় চনবা মতম হায়না লৌবা য়াই। ময়ায় চনবা মতম অসী ইং ১৯৫০ গী মতমদগী হৌবা উবা ফংবা অসীনা মরম ওইরগা মতম খায়বা অসী ইং ১৯৫০ মমাঙবু অঙনবা অদুগা মতুংবুনা ময়ায় চনবা হায়না লৌরবসু অকায়বা লৈতে।

ময়ায় চনবা মতমগী অহানবা চেফোঙসী পলারবোনদগী ফোঙলকপা ওজা নোংথোম্বম কুঞ্জমোহন সিংহনা খোরীলাঙবা ইং ১৯৫২ দা পুথোকপা পঞ্জেন কৌবা চেফোঙ অসীনি হায়না লৌবা তারী। পঞ্জেন হায়রিবা চেফোঙ অসী থা অহুমগী চেফোঙনি। মতম অসীৱাইদা লৈরম্বা মণিপুরী মহৈরোয়শিং অসী মণিপুরী লোন অমসুং সাহিত্যগীদমক য়াম্না খোয়রাংনখিবা মতম অমনি। মরম অদুনা মহৈশঙদা কাদুনা লাইরিক তম্লিবা মহৈরোয়শিংনসু অচৌবা থৌদাং লৌনরকই। মণিপুরী মহৈরোয়শিংনা ওল কাছাড় মণিপুরী ষ্টুদেন্টস এসোসিএসন কৌবা লূপ অমা শেম্মী। লূপ অসীগী মরূপচাশিংনা পূনশিল্লগা ঈচেল কৌবা চেফোঙ অমা ইং ১৯৫৯ দা শ্রী এনজি গোপীমোহন সিংহনা খোরীলাঙদুনা পুথোরকখি। নাকন অমরোমদা, চহী অসীমক্তদা গুরুচরণ (জিসি) কোলেজগী মণিপুরী ষ্টুদেন্টস য়ুনিয়ননসু মতমগী পাউতাক কৌবা চেফোঙ অমা মোইরাংময়ূম মান্যবাবু সিংহনা খোরীলাঙলগা ফোঙদোরক্তুনা মপান মণিপুরগী মণিপুরী চেফোঙগী ঈচেল অসীদা অনৌবা ঈনোৎ হাপ্লকখি।

চেফোঙ ফোঙবগী ঈথিল অসী তোঙান-তোঙানবা মফমদা লৈবা মীওই কয়াদসু তোঙান-তোঙানবা ঈথিল পীরম্মী। ইং ১৯৬০ দা শিলচরদা অঙোম বি সিংহ-না মৈতৈ লৈম কৌবা থা অনীগী চেফোঙ অমা ফোঙলম্মী। নাকন অমরোমদা, লালারোমদসু শ্রী সোরাম বাবুসনা সিংহনা খোরীলাঙদুনা ইং ১৯৬১ দা ঈরাৎ কৌবা থাখাইগী চেফোঙ অমা পুথোরকখি। চেফোঙ অসী অহানবদা খূৎই ওইনা পুথোক্লম্লগা ইং ১৯৬৩ দগী উনম তৌবনি। ইং ১৯৬৮ দগীদি মণিপুরী সাহিত্য পরিষদ, অসাম, অৱাং জারিবোন মশানা মখোয়গী ওইনা থা অহুমদা অমুক মখা চত্থনা ফোঙলম্মী। ইং ১৯৬৬ তা সোনাই চান্দপুরগী রাজকুমার গৌরমণিনি খোরীলাঙদুনা বিজয়া কৌবা থা তরুককী চেফোঙ অমা থাংজমলৈকাইদগী ফোঙদোকই। চহী অসীমক্তদা চয়োলগী পাউচে অমসু ইহান হান্না লৌশিং মৈরা হায়বা মিংথোলগী মখাদা পুথোরকখি। মায়গৈ অমরোমদনা শিলচরগী ইটখোলাদা লৈবী সোরাম ওঙবী ইমাচাউবী দেবীনা ইং ১৯৬৭ তা ঐখোয় কৌবা থাগী চেফোঙ অমা খোরীলাঙদুনা পুথোরকখি। ঙসী ফাওবগী ওইনা মপান মণিপুরগী মণিপুরী চেফোঙগী পুৱারীদা ইমাচাউবীনা অহানবা নুপী খোরীলাঙবী অদু ওইরি। চহী অসীমক্তদা অপোকপা লাইনীংগী মাউথপিচ ওইবা থাগী চেফোঙ সিদ-মপাউ সু শ্রী নাওরিয়া অমুস্নানা খোরীলাঙদুনা পুথোকপীরকখি।

মতম অসীৱাইদা ফোঙবা থোইদোক্না মমল লৈবা চেফোঙ অমদি অনৌবা ঈচেল কৌবা থা অহুমগী চেফোঙ অসীনি। চেফোঙ অসী মণিপুরী সাহিত্য পরিষদ, ইম্ফালগী কাছাড় মশা কমিতিনা ইহান হান্না ইং ১৯৬৮ দা ফোঙদোকপনি। অহানবা ওইনা খোরীলাঙবগী থৌ পুবীরম্বদি শ্রী ঙারিয়ানবম নবদ্বিপ সিংহনি। চেফোঙ অসী মণিপুরী সাহিত্য পরিযদ, অসাম ওইরবা মতুংদসু মিং অসীমক্তদা মখা চত্থরকখি অমসুং হৌজিক ফাওবা লেপ্তনা ফোঙলি। মপান মণিপুরগী মণিপুরী চেফোঙগী পুৱারীদা অনৌবা ঈচেল হায়রিবা চেফোঙ অসীনা খ্বাইদগী মপুন্সী শাংনা হিংবা ঙম্বা চেফোঙ হায়বদু ওইরি।

মায়গৈ অমরোমদা, আগরটলাদগী ময়েংবম নীলমনিনা খোরীলাঙবা ওইদুনা ইং ১৯৬৯ দা চয়োলগী মণিপুরী পাউচে মরূপ ফোঙলকই। ওল্লকপা চহীদা মরূপ পাউচেগী চহীগী চেফোঙ শরতকী ঈচেল সু ইং ১৯৭০ দা ময়েংবম নীলমনি মশামক্না খোরীলাঙদুনা ফোঙদোরকই।

মণিপুরী সাহিত্য পরিযদ শেম্লক্তুনা মপান মণিপুরদা মণিপুরী লোন, সাহিত্য, সমাজ অমসুং সংষ্কৃতিগী হীরমদা খূৎই কয়া ফোঙদোক্নরকপা অসীনা অকনবা ঈথিল পীদুনা ইবা-পাবা হৌবা মীপূম খূদিংমক্কী থমোয়দা ঈথক কয়া হৌখি। তোঙান-তোঙানবা মাইয়োনদা মাগী-মাগী ঙমজবী থাক্তা চঙশিন্নরক্তুনা মতম নাইবা চেফোঙ কয়া ফোঙনরকখি। চয়োলগী চেফোঙদা লালা গ্বালিপারদগী কৈশাম বীরচন্দ্রনা খোরীলাঙদুনা ইং ১৯৭৩ দা জাফিরবন্দ ফোঙখি। শিলচরদগী তোংব্রম মনোহরনা ইং ১৯৭৯ দা শক্তম, লক্ষিপুরগী ঙাথেম ইবুঙোয়াইমনা খোরীলাঙদুনা ইং ১৯৮০ দা মৈরম-মৈরা, শিলচরদগী থিংগোম প্রিয়োকুমার সিংহনা খোরীলাঙদুনা ইং ১৯৯৫ দা ভারত লৈম অমসুং চহী অসীমক্তদা গুৱাহাতিদগী ফুরিৎসাবম বীরমনিনা খোরীলাঙদুনা পূর্ণিমা ফোঙদোরকই। তুংদা ঐখোয়গী মণিপুর (খোরীলাঙবা ফূরিৎসাবম বীরমণি), মাঙজিল থাবা (খোরীলাঙবা সিঐচ বিজান্দো), মীরাওখোল (খোরীলাঙবা কুঞ্জলাল য়েন্দ্রেম্বম), হিংমিন্নসী নচিংবা ফোঙদোক্নরকপা উবা ফংই। চয়োলগী চেফোঙদা খ্বাইদগী শীংথানবা য়াবা অদুদি আগরটলাদগী ফোঙবা মরূপ পাউচে অসীনি। পাউচে অসী চহী ৪৭ চূপ্না লেপ্তনা ফোঙলক্লি।

বাংলাদেশতসু চেফোঙগী ঈথিল অসী ইং ১৯৭৫ দা লাকপা উখি। চহী অসীমক্তদা শ্রী এ কে সেরামনা খোরীলাঙদুনা দ্বিপানিতা ফোঙদোকখি। চেফোঙ অসীনা লেপ্তনা ফোঙলকপনা চহী ১৫ শুবা চহীদগী মৈরা কৌদুনা ইং ১৯৮৮ দগী ফোঙলকপনা হৌজিক ফাওবা লেপ্তনা ফোঙলক্লি। দ্বিপানিতা মতমদগী হৌরগা হৌজিক ফাওবদা নীংশিং চেফোঙ য়াওনা চেফোঙ মশীং ৫৬ রোম বাংলাদেশতা ফোঙদোকপা উবা ফংই। ইং ২০০০ ফাওবদা ফোঙদোকখিবা মিং পনবা য়াবা চেফোঙ খরদি, এ কে সেরাম, ঐচ তোনুবাবু অমসুং ৱাই শান্তকুমারনা খোরীলাঙবা থরো-থম্বাল-থারিকথ্রা (১৯৭৮), এন জে কিশোর কুমারনা খোরীলাঙবা থাজ (১৯৭৮), এস ইবেমতোম্বীনা খোরীলাঙবা মতম (১৯৭৯), এম জয়ন্তকুমারনা খোরীলাঙবা ময়েোল (১৯৭৯), কারাম নীলবাবুনা খোরীলাঙবা অনৌবা মঙাল (১৯৭৯), খোইরোম কামিনিকুমারনা খোরীলাঙবা তাম্না (১৯৮২), এস মঞ্জুশ্রীনা খোরীলাঙবা খোল্লাউ (১৯৮৩), সুধেন্দ্র কুমার অমসুং ও রঞ্জিতনা খোরীলাঙবা ঈচেল (১৯৮৬), এম ইবুঙোতোম্বীনা খোরীলাঙবা য়াকাইৱা (১৯৮৮), সনাতোন হামোম, খোইরোম ইন্দ্রজিত অমসুং কোন্থৌজম সুরঞ্জিতনা খোরীলাঙবা ইপোম (১৯৯০), অহৈবম দিল্লিপনা খোরীলাঙবা অনৌবা খোঙথাং (১৯৯০), শেরাম নিরঞ্জননা খোরীলাঙবা শজিবু (১৯৯২) নচিংবনি। শজিবু অসী হৌজিক ফাওবা লেপ্তনা ফোঙলি। ইং ২০০০ ফাওবদা পনবা য়াবা অতৈ চেফোঙশিংদি নিঙোম্বম থম্বালনা খোরীলাঙবা মীৎকপ থোকপা (১৯৯৬), প্রিয়বর্ত্ত সিংহ রাজু, এম উত্তম সিংহ রতননা খোরীলাঙবা মঙাল (১৯৯৭), সেরম সনারৈনা খোরীলাঙবা অঙাংগী চেফোঙ য়েন্নীং (১৯৯৯), এম শান্তনা খোরীলাঙবা লৈপুন (২০০০), য়েন্সেম্বম চন্দ্রজিতনা খোরীলাঙবা লৈচন (২০০০) অমসুং নামব্রম শঙ্কর, কৈশাম বিমল অমসুং মৈস্নাম রাজেসনা খোরীলাঙবা খোঙথাং (২০০০) অসীনচিংবসী পনবা য়াই।

থাখায়গী চেফোঙদা লালাদগী হিজম বীরেন্দ্রনা খোরীলাঙদুনা ইং ১৯৭৭ তা খূদোল, ত্রিপুরা সরকারগী মায়গৈদগী খুমন্থেম কার্ত্তিক সিংহনা খোরীলাঙদুনা ইং ১৯৭৯ দা ত্রিপুরা চে, লালাদগী ঙৌবরেন সিংহনা খোরীলাঙদুনা ইং ১৯৯৪ দা লংদাই অমসুং চহী অসীমক্তদা লাইশ্রম ফনিন্দ্র সিংহনা বরাক তম্পাক ফোঙদোক্নরকই। থাগী চেফোঙদা লালা চেংবিলদগী অঞ্জন লুৱাংনা খোরীলাঙদুনা ইং ১৯৮৪ দা সনরিক, জাফিরবন্দদগী সেঞ্জম বিজয় সিংহনা খোরীলাঙদুনা ইং ১৯৮৭ তা মঙাল অমসুং থাংজমলৈকাইগী নোংথম্বম ধীরেন সিংহনা খোরীলাঙদুনা ইং ২০১০ দা হিংমিন্নসী ফোঙদোরকই। থাগী চেফোঙদা শীংথাবা য়াবদি ফূরিৎসাবম বীরমণিনা খোরীলাঙবা গুৱাহাতিদগী চহী ১৭ চূপ্না চাং নাইনা ফোঙলক্লিবা নুপীগী চেফোঙ ইচেম্মা হায়বসীনি। থা অনীগী চেফোঙদা পনবা য়াবশিংদি- মণিপুরী লিটরেরী ফোরম অসামগী মায়কৈদগী রানিপুরগী শ্রী চোংথাম গৌর সিংহনা খোরীলাঙদুনা ইং ১৯৭১ দা পান্থা পুথোরকই। মখা তানা ইং ১৯৭৯ দা শিলচরগী মৈস্নাম ভূবননা খোরীলাঙদুনা ঈচেল, ইং ১৯৮০ দা পলারবন্দগী শ্রী সাপম বল্লব সিংহনা খোরীলাঙদুনা লমজেল অমসুং ইং ১৯৮১ দা লাইশ্রমখুনগী ৱালা খুমননা খোরীলাঙদুনা লম্বী ফোঙদোকখি।

থা অহুমগী চেফোঙসী মপান মণিপুরদা য়াম্নমক পাম্ননা উবা ফংই। পঞ্জেন অমসুং অনৌবা ঈচেল গী মতুংদা শীংথাবা য়াবা চেফোঙ অমা থোরকখি ইং ১৯৭৩ দা নোংপোক মৈরা হায়বা মিংথোলদা শিলচরদগী ইপু শ্রী ইরুংবম চন্দ্র সিংহনা খোরীলাঙদুনা। ইং ১৯৭৬ তসু বাসকান্দিদগী ওজা শ্রী আব্দুস সহীদ চৌধুরী খোরীলাঙদুনা নুমীৎলৈ পুথোরকখি। মায়গৈ অমরোমদা, লক্ষিপুরদগী ওজা ৱাংখেম শরৎচন্দ্রনা খোরীলাঙদুনা ইং ১৯৭৮ দা খোরীরোল, আগরটলাদগী এম রামগোপালনা খোরীলাঙদুনা চহী অসীমক্তদা তখেল লৈরাং, রাণিপুরগী ওজা শ্রী ঙারিয়ানবম নবদ্বিপ সিংহনা খোরীলাঙদুনা ইং ১৯৮০ দা সাহিত্য বিনা, বোরখোলাদগী ওজা শ্রী কোন্থৌজম কালেঞ্জাউনা খোরীলাঙদুনা ইং ১৯৮৩ দা অনৌবা পৃথিবী, চহী অসীমক্তদা শিলচরদগী ওজা শ্রী কে এন চান্দনা খোরীলাঙদুনা ৱাকৎ, নহারোল খোর্জ্জৈ শিন্থালূপ জারিবোনগী মায়গৈদগী লাইশ্রমখুনগী ওজা শ্রী বীরেন লাইশ্রমনা খোরীলাঙদুনা ইং ১৯৯৪ দা খোর্জ্জৈ, চহী অসীমক্তদা লালাদগী ওজা শ্রী তৌরাংবম নিমাইচান্দ সিংহনা খোরীলাঙদুনা মৈরা, ত্রিপুরা সরকারগী মায়গৈদগী এল বিনোদ অমসুং দব্লিউ বিরেননা খোরীলাঙদুনা ইং ১৯৯৭ তা চুমথাং, মণিপুরী লিটরেরী সোসাইতি অসামগী মায়গৈদগী ওজা শ্রী লাইশ্রম তরনিকান্তনা খোরীলাঙদুনা ইং ২০০০ দা য়েনীং, ওজা য়ূম্নাম ইন্দ্রবাবুনা খোরীলাঙবা সনা লৈবাক ফোঙই।

থা তরুককী চেফোঙদা বিজয়াগী তুংদা নহারোল সাহিত্য প্রেমী জাফিরবন্দগী মায়গৈদগী অঞ্জন লুৱাংনা খোরীলাঙদুনা ইং ১৯৭৮ দা ঈচেন, লৈশুংবম এম মঙাংগী ষ্টেটৱার্ল্দ (১৯৮৪), বোৱালজুরদগী ওক্রম মিনানা খোরীলাঙবা খোঙজেল (১৯৯৬), সিঙ্গেরবন্দদগী থোকচোম বিশ্বনাথনা খোরীলাঙবা নুমিৎ য়ুংবদা (১৯৯২) অসীনচিংবসী পনবা য়াই।

চহীগী চেফোঙদা অসাম মণিপুরী সাহিত্য পরিষদকী মায়কৈদগী শ্রী রাজকুমার সুরেন্দ্রজিত সিংহনা খোরীলাঙদুনা ইং ১৯৭৩ দা পি-থাদোই ফোঙখি। বোনতারাপুরগী শ্রী সিনাম মেঞ্জর সিংহনা খোরীলাঙদুনা ইং ১৯৮৩ দা নহারূপ, আগরটলাগী এন অসিত দত্তনা খোরীলাঙদুনা ইং ১৯৮৪ দা লমজেল, আগরটলাগী এল বীরমঙ্গলনা খোরীলাঙদুনা ইং ১৯৮৫ দা শরী, আগরটলাগী মুতুম চনু অঞ্জনানা খোরীলাঙদুনা ইং ১৯৯১ দা চিত্রাঙ্গদা, আগরটলাদগী খোইস্নাম মঙ্গলনা খোরীলাঙদুনা ইং ১৯৯৫ দা হৈঙাল, থাংজমলৈকাই নহারোল চাওখৎলূপকী মায়কৈদগী হোদাম নীরেন্দ্রনা খোরীলাঙদুনা ইং ১৯৯৬ তা থৌদাং, আগরটলাদগী টিঐচ সোনামনিনা খোরীলাঙদুনা ইং ১৯৯৭ তা রামধেনু, লাইশ্রমখুনদগী শ্রী মোইরেংজম দেব সিংহনা খোরীলাঙদুনা ইং ১৯৯৮ দা ঐখোয়গী নহারোল, আগরটলাদগী খোইস্নাম বিজুনা খোরীলাঙদুনা ইং ১৯৯৯ দা খোঞ্জেল পুথোক্নরকখি। মসীশিংসীগী মথক্তা ঝরাগুলদগী খোঙচৎ, লালাদগী শায়োন নচিংবসু ফোঙদোক্নরকখি। মায়কৈ অমরোমদা, বেঙ্গলোরদগী ৱাংমদা কৌবা চেফোঙ ফোঙলকপা উবা ফংই।

মায়কৈ অমরোমদা চাং নাইবা অমসুং নাইদবা থিদনা ষ্কুল, কোলেজ অমসুং য়ুনিভর্সিতিদা তম্বা মণিপুরী মহৈরোয়শিংনসু পূনশিন্নদুনা নত্ত্রগা মণিপুরী দিপার্টমেন্টনা চেফোঙ পুথোক্নরকই। পনবা য়াবা খরদি শনারৈ মীতৈ হাই ষ্কুলগী লৈচন, কাছাড় কোলেজগী মৈরা, জি সি কোলেজগী নাচোম (অহানবা মশীংগী খোরীলাঙবা এন দি হোদাম্বা), এম সি দি কোলেজগী ইঙাল্লৈ (অহানবা মশীংগী খোরীলাঙবা রাজকুমার রঞ্জন সনা), জনতা কোলেজগী য়েন্নীং (অহানবা মশীংগী খোরীলাঙবা সেঞ্জম হেমন্ত সিংহ) অমসুং ৱিমেন কোলেজগী নিঙোল (অহানবা মশীংগী খোরীলাঙবা মোইরাংথেম মেমতোম্বী) পনবা য়াই। মসীশিংসীগী মথক্তা মতম-মতমগী ওইনা পুথোকপা নীংশিং চেফোঙশিং পনবা য়াই।

মপান মণিপুরদা মণিপুরী চেফোঙগী অশম্বা পুৱারীঃ হৌজিক্কী মতম

উনমকোনদা ময়েক শাগৎপদা কম্প্যুটরগী মতেংদগী শাগৎপা হৌরকপা অসীবু ঐখোয়না হৌজিক্কি মতম হায়না লৌবা য়াই। মথক্তা পঞ্জখিবা চয়োলগী পাউচে পূর্ণিমা অসীনা ইহান হান্না কম্প্যুটরদা ময়েক শাগত্তুনা নমথোকপা হৌবনি। মরম অদুনা ইং ১৯৯০ গী মতম অসীবু ময়াই চনবা মতমনা লোইশিল্লকপা অমসুং হৌজিক্কী মতমনা হৌগৎলকপা মতমনি হায়না লৌবা য়াই। কম্প্যুটরদা ময়েক শাগত্তুনা নমথোক্লবশিংবুনা হৌজিক্কী মতমদা থম্লগা, মরুদা শাগত্তুনা নমথোকপশিংবুনা ময়াইগী মতমদা থম্বা য়াই। খূদম ওইনা ১৯৯০ মতমগী পূর্ণিমা, ঐখোয়গী মণিপুর-নচিংবা চয়োলগী পাউচেশিং অসীদগী হৌবা য়ারে। অদুম ওইনমক পাক শন্না কম্প্যুটরদা উনম তৌদুনা ফোঙনরকপদি ইং ২০০০ গী মতম অসীদগীনি। মরম অদুনা ইং ১৯৯০ গী মতমবু হৌজিক্কী মতমগী য়ূম্ফম থোনবা মতমনি হায়না লৌরগা ইং ২০০০ গী মতম অমসুং মতুং তাবা মতমবুনা হৌজিক্কী মতমগী মপূং ফাবা মতমনি হায়না লৌবা য়াই।

মতম অসীদা ফোঙদোকপা নীংশিবা য়াবা চেফোঙশিং খরদি- চয়েলগী পাউচেদা মাঙজিল থাবা, মীরাউখোল, হিংমিন্নসীনচিংবনি। থাগী চেফোঙদা য়াকাই খোঞ্জেল পনবা য়াই। থা ৩ গী চেফোঙদা বাসকান্দিগী ওজা শ্রী আব্দুস সহীদনা খোরীলাঙদুনা ইং ২০০৯ দা অত্ তয়ির মণিপুরী সাহিত্য পরিষদ লক্ষিপুর মশা কমিতিগী মায়গৈদগী এন কুলজিতনা খোরীলাঙবা তাবুনুংদগী অমসুং ইং ২০১৩ দা কুঞ্জলাল য়েন্দ্রেম্বমনা খোরীলাঙদুনাশমজিরৈ, অহমদ হাসাননা খোরীলাঙবা থৱানমিচাক অমসুং বশিষ্ঠ শর্ম্মানা খোরীলাঙবা ইঙেল্লৈগা লোয়ননা ইং ২০১৪ দা এফ অহমদনা খোরীলাঙবা ইথিল নচিংবা চেফোঙশিংসী ফোঙদোক্নরকই।

থা ৬ কী চেফোঙদা সোনাইদগী এন দি হোদাম্বনা খোরীলাঙবা নৈনরোল (২০০৪) অমসুং নহারোল সাহিত্য মরূপ অসামগী মায়গৈদগী কুঞ্জলাল য়েন্দ্রেম্বমনা খোরীলাঙবা নোংলৈ (২০০৬) পনবা য়াই। নৈনরোল লেপ্তনা ফোঙলি। চহীগী চেফোঙদা বাসকান্দি দারুল উলুমগী মায়কৈদগী ইং ২০০৬ তা অল-ইলম, আগরটলাদগী সোরোকখাইবম গম্ভীনিনা খোরীলাঙদুনা ইং ২০০১ দা খোঙচত অমসুং খোইস্নাম মঙ্গলনা খোরীলাঙদুনা ইং ২০১০ দা ফোঙবা মেখলী নীংশিংবা য়াই। মায়গৈ অমরোমদা, অসাম য়ুনিভর্সিতি মণিপুরী মশঙদগীসু এন দি হোদাম্বনা খোমজিন্দুনা ইং ২০০৪ দা মণিপুরী ফোঙদোরকই।

মতম অসীদা ফোঙদোক্নরকখিবা বাংলাদেশকী পনবা য়াবা চেফোঙশিং অদুদি- সনাতোন হামোমনা খোরীলাঙবা অয়ূক (২০০১), চন্দ্রজিত সিংহনা খোরীলাঙবা ঈথিল (২০০২), এম য়ু কে সাধননা খোরীলাঙবা মৈঙাল (২০০৩), এল সান্তনা দেবীনা খোরীলাঙবা জগোয়, ৱাই নন্দলাল সিংহনা খোরীলাঙবা লৈরাংবী, ফেলেম ধীরেননা খোরীলাঙবা অনৌবা খোল্লাউ, নামব্রম শঙ্করনা খোরীলাঙবা ইঙ্খোল (২০০৪), এ কে সেরামনা খোরীলাঙবা মঙলান (২০০৬), থিঙ্গুজম হীরেননা খোরীলাঙবা খোঙ্গুল লীবা (২০০৭) অমসুং অনিল কুমার সিংহনা খোরীলাঙবা অপূনবা খোঙচৎ (২০১৩) নি।

ৱারোইশিন

মপান মণিপুরগী মণিপুরী চেফোঙগী পুৱারী অসী নৈনবা মতমদা অসামখক্তা নত্তনা ত্রিপুরা অমসুং বাংলাদেশকী মণিপুরী ইপাচা-ইপুচাশিংনা ঙল্লিঙৈ মতমদগী হৌনা অচৌবা থৌদাং লৌনরকখিবা উবা ফংই। ফোঙনরিবা চেফোঙশিং অসীগী মনুংদা পাউচেশিং নত্তবদা অতৈ চেফোঙশিংদি অয়াম্বনা মণিপুরী লোন, সাহিত্য অমসুং সংস্কুতিদা য়ূম্ফম ওইবা ঙাক্তা ওইনা তৌই। ইচেম্মা কৌবা থাগী চেফোঙনা নুপীদা য়ূম্ফম ওইবগুম, ৱায়েল কাঙলোনদা, বিজ্ঞানদা, শান্নবদা, হকশেলদা, মহৈ-মশিংদা অমসুং অতৈ হীরম কয়াদা মপূং ওইনা য়ূম্ফম ওইবা চেফোঙশিংগী অৱাৎপদি লৈরী। হায়রিবা অৱাৎপশিং অসীনা মেনশিল্লক্তুনা হেন্না মপূং ফাবা মণিপুরী চেফোঙগী তাইবংপান অমা শেমগৎপা হায়বসীদি তুংদা লাক্কদবা থৱায় য়াওবা ইচিল-ইনাউশিংগী খূত্তা শিন্নজরি।

তানজখিবা

১. ওজা এ কে সেরাম, বাংলাদেশ, ‘বাংলাদেশকী মণিপুরী চেফোঙ অমসুং লাইরিক’, খূৎই

২. ওজা এ কামৈ, ‘হিষ্টোরিকেল ষ্টাদি ওফ প্রিন্ট জর্নেলিজম ইন মণিপুর (১৯১০-৮০)’

(http://e-pao.net/epSubPageExtractor.asp?src=manipur.History_of_Manipur.Historical_Study_Of_Print_Journalism_1)

৩. ওজা কৈশাম বাবু, শিলচর, ‘বরাক তম্পাক্কী মণিপুরী অইবশিংগী খূদোলশিং’, মণিপুরী লিটরেরী সোসাইতি অসাম, ২০১২

৪. ওজা তায়েঞ্জম বিজয়কুমার সিংহ, ‘দ কষ্কেদ ওফ মণিপুরী সোর্ট ষ্টোরি’

(https://books.google.co.in/books?id=BZ2HAwAAQBAJ&pg=PA99&lpg=PA99&dq=manipuri+journals&source=bl&ots=bWq5G9BFD2&sig=FsNVnfgUg4ienlimJ_0nRvMMOZY&hl=en&sa=X&sqi=2&ved=0CDsQ6AEwBWoVChMI5qTm4czsxwIVgwmOCh1KZQR0#v=onepage&q=manipuri%20journals&f=false)

৫. ওজা রাজকুমার তরুণজিত, আগরতলা

৬. ওজা লক্ষ্মীন্দ্র সিনহা, ‘এ ষ্টাদি ওন দি বিষ্ণুপ্রিয়া মণিপুরী জর্নেলস’

(http://nungkoopi.blogspot.in/2012/05/story.html)