মতমগী খোঙলৈনা পুরকখিবা মীতৈ পুৱারীগী অহোংবা অমসুং মায়চৌ লৌরেম্বা খোংনাংথাবা

ৱাহৌদোক

মীওইবদি ফীবম-মফম-মতমগী মনাইনি হায়বসী মীওই খরনা খঙলবসু অয়াম্বনদি খঙনদে। পুন্সীদা থোক্লিবা নৎত্রগা ওইরিবশিং অসী ঐনা থোকহনবনি নৎত্রগা ঐনা ওইহনবনি, মরম অদুনা মায় পাকপা অদু ঐগীনি নৎত্রগা মায়থীবা অদু ঐগীনি হায়না খনবা মীওই কয়া অমা লৈ। মসী অচৌবা মরৈ অমনি। অদুম ওইনমক, মরৈ অদুগী ৱাংমদা লৈরিবা অচুম্বা অদু খঙলবশিং অদু য়াইফবনি। মতৌ অসীগুম্না, মতমগী খোঙলৈনা মণিপুরগী চত্থরক্লিবা পুৱারীগী শক্লোন কয়াদা মীওই কয়াবু ফনা শীংথাহনখি অদুগা খরবুনা তাথি-তাওইনা উহনখি। অদুবু অচুম্বা অদুদি অয়াম্বনা খঙখিদে, খঙহনবা খরবু চুম্মী নৎত্রগা লাল্লি খঙদনা চৎনখিবা মশক অদুদি ঐখোয়না উবা ফংখি।

মতমগী খোঙলৈনা পুরকপা পুৱারীগী শক্লোন

মণিপুরগী পুৱারীদা মতমগী খোঙলৈনা হোংহনখিবা শক্লোন কয়ামরোম লৈখি। ময়ামগী মনুংদা নীংশিংবা য়াবা মরু ওইবা ৫ দি-

১. মৈদিংঙু খাগেম্বা মতম(১৫৯৭-১৬৫২)দা কৈথেল ১০ লিংবা হৌখি। জ্যোতিষ (এষ্ট্রোলোজি)কী থবক হৌবা উখি। লাইরিক থোকহন্দুনা তম্বা হৌখি। মীতৈ পাঙনগী মীরোল তারক্নবা মরম ওইখি।

২. মৈদিংঙু পামহৈবা মতম(১৭০৯-১৭৪৯)দা মীয়ান মচা মশীং য়াম্না লাইনীংগা কোন্ননা চঙশিল্লকপা হৌখি। নিংথৌ য়াওনা লৈবাক মীয়াম্না মীয়ান লাইনীং ওইরিবা রামান্দি লাইনীং লৌখি। লাইনীং-লাইশোনগা মরী লৈনবা ৱারী লাইরিক কয়া ইশিল্লকই। চৎনরোল কয়াদা অহোংবা লাকখি। য়ূম কূংনা, কৃক-কৃক ইন্নদুনা শাবা তোকহল্লগা খরা-খরা লন্থোক্না খুল্লিংবা হৌহল্লম্মী। য়ূম ময়াদা অশিবা হকচাং লৈরোন চনশিনবা তোকহল্লগা লাপ্না তুরেল মপান্দা মৈ থাদুনা পোৎলোয়বা চৎনহল্লম্মী। ওক, য়েন লোইবা তোকহল্লম্মী। তোঙান-তোঙানবা থুমখোং কয়া তৌরগা মীতৈ-থুম পুথোক্তুনা চৎনবা হৌহল্লম্মী। কৈথেল লিংবা, লম্বী সোরোক অচৌবা শেম্বা, লাইশঙ কয়ামরোম শাগৎপগা লোয়ননা নোংচূপকী পুন্সীরোল কয়া চৎনবা হৌহনখি।

৩. মৈদিংঙু চীংথংখোম্বা মতম(১৭৬৩-১৭৯৮)দা মণিপুরী গৌড়িয় বৈষ্ণবিজম চঙশিল্লকখি। বেঙ্গল অমসুং অসামগী তোঙান-তোঙানবা বৈষ্ণবিজমগী মশক লৌশিল্লগা মীতৈগী মওংদা শেমগৎখি। ট্রিতি ওফ চিট্টাগাং ইনদুনা বৃটিশকা অহানবা ওইনা খূৎশম্নবা হৌখি। তেখাওগা নাৎকী ওইবা মশক কয়ামরোম লৌথোক-লৌশিন তৌবগা লোয়ননা পোৎলমগী ওইবা মশক কয়াদসু লৌথোক-লৌশিন তৌনখি। তেখাও-লূ শাবা, তেখাও লম্বী শেম্বতা নত্তনা নিঙোল থাজদুনা মরী শেমগৎখি।

৪. মহারাজ চুড়াচান্দ মতম(১৮৯১-১৯৪১)দা বৃটিশ লৈঙাক চঙশিল্লকখি। মণিপুরদা বৃটিশকী লৈঙাক হৌরকপগা লোয়ননা নোংচূপলোমগী মহৈ-মশিং চঙশিল্লক্তুনা পূম্নমকপু লাইরিক লাইশু হৈহন্নবা হোৎনখি। ইলেক্ট্রিসিতি, টেলিফোন, টেলিগ্রাফ, টেলেষ্কোপ, থক্নবা ঈশিং ফংহনবা, চেন্নবা গারি, পূংশিং তাকপা ঘরি, শেৎনবা ফূরিৎ-খোঙগ্রাও-খোঙউপ-তগী হৌরগা নোংচূপকী চৎনরোলশিং চঙশিল্লকপা হৌরকখি।

৫. মহারাজ বোধচন্দ্র মতম(১৯৪১-১৯৫৫)দা ভারতকী লৈঙাক মনুং চনখি।

মণিপুরগী পুৱারীদা থেংনখিবা মায়চৌশিং

মণিপুরদা পানখিবা নিংথৌশিংগী মতম-মতমদা মায়চৌশিং মরাং কায়না লৈরম্বা উবা ফংখি। মখোয়শিংগী মশক মমিং পূম্নমক শুনা খঙদোকপদি ঙমদ্রি। হৌজিক ফাওবদা খঙদোকপা ঙম্নরবা মায়চৌ খরদি মখাগী অসুম্না নিংথৌশিংগী মতম নাইনা থম্বা য়াই।

খাগেম্বা মতমগী মায়চৌশিং	১. কোনোক থেংগ্রা (লুৱাংচম থেংকুলা) ২. লাংগোল লুখোই ৩. লৈশাং খোমা ৪. ৱাহেংবম খরো (খরোম্বা) ৫. নিংথৌজম কিয়াম্বা ৬. খাকি মাইবী -সাইরেম নীলবীর ‘চীংঙু মায়চৌ লৌরেম্বা খোংনাংথাব’ লামায় ২৭ ৭. অপোইননা মচা ৮. য়ূম্নাম তোম্বা ৯. সলাম সনা ১০. খাইদেম তেম্বা -সাইরেম নীলবীর ‘চীংঙু মায়চৌ লৌরেম্বা খোংনাংথাব’, লামায় ৪ ১১. খারম থাদোই ১২. অন্দ্রো মাইথোন ১৩. শেক্তা (অশাংবম) লাইবা -এল অশোক কুমার, ‘চীংঙু মায়চৌ শামুরৌ চীগোং’, লামায় ৪
পামহৈবা মতমগী মায়চৌশিং	১. লৌরেম্বা খোংনাংথাবা ২. মোইরাং ললহানবা ৩. কমেং ফদিবা ৪. খুরখুল তেপীপা ৫. নম্বোল থোংবা হিমাইবা ৬. ৱাংঙু পাচি ৭. শামুরৌ চিগোং -সাইরেম নীলবীর ‘চীংঙু মায়চৌ লৌরেম্বা খোংনাংথাব’, লামায় ৪২ ৮. য়াম্বেম ফৌগাক -এল অশোক কুমার, ‘চীংঙু মায়চৌ শামুরৌ চীগোং’, লামায় ৩
চীংথঙখোম্বা মতম ফাওবদা লৈরম্বা মায়চৌশিং	১. মরু লাঙ্গোল লুখোই ২. ৱাংগোই খেমা ৩. শামুরৌ চিগোং ৪. থোঙ হিমাইবা ৫. কমেং ফদিবা ৬. য়ূম্নাম তোম্বা ৭. ৱাংঙু পাবা (পাচি) -নিংঙোম্বম মনিজাও পণ্ডিত ‘মতমগী খোঙলৈ তাকপা পুয়াশিং’ লামায় ৬০

মায়চৌ লৌরেম্বা খোংনাংথাবাঃ খঙন-তানরিবা ৱারী-ৱাখোঙ

মায়চৌ লৌরেম্বা খোংনাংথাবগী মীয়াম্না খঙন-তানরিবা ৱারী-ৱাখোঙ অদুদি, মহাক অসী মৈদিংঙু পামহৈবা (খৃষ্ট চহী ১৭০৯-১৭৪৯) সনা হাকথক্তা মায়চৌ ওইনা লৈবাক্কী থৌগন তৌরম্বা মীওই অমনি। মহাক্কী ৱারীদা য়াম্নমক মরু ওইনা লৌনরিবসী – মীয়ান লাইনীং শন্দোকপা লাকপা শান্তিদাস মহন্ত থাকুর গোসাইগা মূক্নবশিং অদুনি। ৱারীগী মতুং ইন্না, ইপূ লৌরেম্বম খোংনাংথাবগী মখূত্তা শান্তিদাস হীরম খূদিংমক্তা মায়থিখি। অদুম ওইনমক, নিংথৌগা লাইবক তিন্নখিবনা গোসাইগী মৱা লৌদুনা লৈবাক পূম্বা মীয়ান লাইনীং চৎহনখি হায়বসীনি।

ৱারীগী মতুং ইন্না, মীতৈগী লৈরম্বা মায়চৌগী পুৱারীদা লৌরেম্বম খোংনাংথাবনা খ্বাইদগী মতিক-ময়াই লৈবা মায়চৌ ওইনা শাগৎপা উবা ফংই। মহাক অসী তাইবং শেম্বা মপূনা কংলা মনুংদা হৌবা খোংনাং পাম্বী থাহনখিবা ৱারীদগী মমিং খোংনাংথাবা কৌখিবনি হায়নৈ। খোংনাংথাবা কৌদ্রিঙৈদা করি অতোপ্পা মমিং কৌরম্বগে হায়বদি খঙনদে। অদুম ওইনমক অখঙ-অহৈ খরনদি- ইখঙদা খঙবা অঙাংনি হায়দুনা ‘খঙবা’ কৌই হায়নবসু য়াওই। খোংনাং পাম্বী অদুদি ওল্দ কছাড় রোদতা চৎলগা লৈবা খুয়োন হাওবা হায়বা মফম অদুদা থাখিবনিসু হায়নৈ। হায়রিবা খোংনাং লাইওইবা অসীগা কোন্ননা খোংনাংথাবনা লোক্তাক ঈরোলনুংদা লাইয়ামশিং তিন্নবা য়াওরুখিবা মতমদগী মহাক্কী মমিং অসী খোঙলৈথাবা হায়না মিংগৌখি। খোঙলৈথাবা হায়বদি- মতমগী খোঙলৈ তাকপা ঙম্বা নৎত্রগা থোক্লগদবা থৌদোক ৱাথোক হান্না হায়বা ঙম্বা হায়বনি।

লৌরেম্বম খোংনাংথাবগী অপোকপা অপোকপীগী মতাংদা অসুম্না পন্নবা থেংনৈ। মহাকপু পোকপা পন্থৌগী কোলোই মিংলেন অসী খুনপুরেন অসূপ্পা কৌই অমসুং পলেম মমা পোকমাগীগী মিংনা লৈমা ঈরেনতোম্বী কৌই। পোকফমগী মতাংদা মান্নদবা থেংনৈ, কনাগুম্বা অখঙ-অহৈ খরনা থৌবাল কৈথেলদগী নোংপোক মায়গৈদা কিঃমিঃ ৫-৬ চৎলগা লৈবা লৌরেম্বম খুন/লৈকাই অসীদনি হায়না পনবীরম্মী। অদুগা অতোপ্পা খরনদি, খোংমনদা লৈরিবা লৌরেম্বম অসীনা পোকফমনি হায়বসীনি। খোংমনদা লৈরিবা লৌরেম্বম অসীনা মায়চৌ খোংনাংথাবা অসী মখোয়গী পুকোকনি হায়দুনা লাইশঙ শারগা চহীগী ফিজোল হোংদুনা চাক্লোন কৎলি হায়রি। পোকপা চহীগী মতাংদা পল্লম্বসী ‘শকাব্দ (ইং কুমজা) ১২৭৫ লমতা থাগী ১২নি পানবা নোংমাইজিং নুমিৎতা খোংনাংথাবা পোকখি’।

(‘শকাব্দ’-বু ‘ইং কুমজা’-গা মান্ননা থম্লিবসী চুমদে। অইবা অসীনা অনী অসীগী খেন্নবা খঙদ্রে। মরম অদুনা করম্বদা পাগদগে হায়বগী অরেপ্পা খঙদোকপদা অপনবা লৈহল্লি। খঙজিনবা য়াবা ৱাফম অমনা, ইং কুমজাবু ওইরবসু, শকাব্দবু ওইরবসু ১২৭৫ গী লমতা ১২ নি পানবা অসী নোংমাইজিং নুমিৎ নত্তে হায়বসীনি।)

লৌরেম্বম শাগৈগী খুন্থোক্লোন

মৈদিংঙু উরা কোন্থৌবা (খৃষ্ট চহী ৫৬৮-৬৫৮) না নোংবাল্লোন হোইয়াম্বী পান্নদুনা ফৌরায়াং লাইকোকসু পোকই। লাইকোকসুনা অঙোম চনু তাশোনঙম্বী পান্নদুনা লাংশাহনবা পোকই। লাংশাহনবগী ঈ-দগী লৌরেম্বম হায়বা য়ূম্নাক অসী তাখিবনি (“চেকখোঙ” খূৎই লাইরিক)। য়ূম্নাক অসীগী মিংথোল অসীমক্তি “খাগেম্বা য়ূম্বী”দা হায়রম্বা মতুং ইন্না ‘মপূন লৌউপত অহিংত লাইন লৌ য়ৈখ্রে, খর লেমহৌই হায়পকি লৌরেম্পম কৌএ’ হায়না “শাগৈ-শলাইরোন” কৌবা লাইরিক (১৯৯৪, লা ৩২)তা ইরম্মী। লৌরেম্বমসী নিংথৌজা য়েককী মনুং চনবা য়ূম্নাকনি।

পু মরীদা পামহৈবা অমসুং খোংনাংথাবা

পু মরী-দা য়েংবদা মৈদিংঙু পামহৈবা অমসুং খোংনাংথাবা অনী অসী অমত্তনি। উরা কোন্থৌবগী ঈ ঙাক্তনি, নাউথিংখোঙ অমসুং মমা তিন্নদবা মচিন-মনাউ লাইকোকসুদগী খাইনরকপতনি।

উরা কোন্থৌবা

 

                                  নাউথিংখোং           লাইকোকসু

 

                                  তোনসেনঙম্বা         খোংনাংথাবা

 

                                  চরাইরোংবা                 -

 

                                  পামহৈবা                    -

মৈদিংঙু নাউথিংখোংদগীনা মনাউ ইবুঙো তোনসেনঙম্বা ফাওবসী মীরোল ২৭নি। চীনবুং থাজ-ৱারীগী মতুং ইন্না মৈদিংঙু পামহৈবা-না মায়চৌ খোংনাংথাবা-দা ‘ইপু’ কৌবা থেংনৈ। মসীনা তাকপদি মায়চৌ খোংনাংথাবা-সী মনাউ ইবুঙো তোনসেনঙম্বা-গী মীরোলদা পোকপা ওইগনি হায়বসীনি। মৈদিংঙু পামহৈবা-না মায়চৌ খোংনাংথাবা-দা ইপু কৌরিবসী অহল ওইরবা মীওই অমদা ইচম চম্না থৌগল্লোন ঊৎপা ওইনা কৌবা মিংগৌ নত্তে, পু তিন্নবা শাগৈগী মরীদগী কৌবা মিঙ্গৌ ওইগনি হায়বসীনি।

থাজ-ৱারী অমসুং মায়চৌ লৌরেম্বা খোংনাংথাবা-গী পুন্সী

থাজ-ৱারী হায়বসী চীনবুং সাহিত্য (ফোক লিটরেচর)গী মনুং চনবা চীনবুং ৱারেং (ফোক নেরেটিব) গী মনুং চনবা মশক অমনি। মসীবু ইংরাজিদা ‘লেজেন্দ’ হায়না খঙনৈ। থাজ-ৱারী হায়বসী তশেংনা থোকখি হায়না লীরিবা অমসুং তারিবা অনীমক্না থাজনবা, চাউরাকপা মতম অমসু হায়বা ঙম্বা অদুবু চপ চাবা অকক্নবা মতম হায়বদি প্রমানগা লোয়নবা নুমিৎ (শোক-তারিখ)তি হায়বা ঙমদনা লৈবা মশক অদুনি। থৌদোক থোকখিবা মতম হায়বা ঙম্বা থাজ-ৱারীশিংনা অমুক পুৱারী ওইরকই। থাজ-ৱারীদা লীরিবা মীওইনা মশাগী ওইবা শাজিনবা কল্পনাগী শরুক কয়ামরোম মরাং কায়না হাপচিনবা হায়বসী থাজ-ৱারীগী মহৌশা ওইবা মশক ওইনা লৈ। অদুম ওইনমক, লীরিবা ৱারী অদুদা মখল কয়াগী শাক্ষি-প্রমান পীদুনা ৱারী অদুমক থাজবা য়াবনি হায়বদু তারিবশিংদা ঊৎনবা হোৎনবা মতৌসু লৈ।

মায়চৌ লৌরেম্বা খোংনাংথাবা-গী ৱারী অসীসু অসীগুম্বা মখলগী ৱারী অমনি। ৱারী অসী চীনবুং খক্তদা মীরোল নাইনা থঙথদুনা লাকপা ওইবনা পামহৈবগী মতমদা য়াওবা পুৱারীগী চরিত্রশিংগা শমজিন্নহল্লগা শাগৎপা ওইবনা থোকখিবা মতমদি চাউরাক্না খঙলবসু মহাক্না তৌরম্বা থবকশিং অমসুং মহাক্কী পুন্সীগা মরী লৈনবা থৌদোকশিং অসীগী অকক্নবা শোক-তারিখনচিংবদি খঙদনা লৈ। ৱারী অসী থাজ-ৱারীগী মনুং চনবা লৈবাক্কী ওইবা থাজ-ৱারী (National Legend) নি হায়না লৌবা য়ারবসু লাইনীংগা মরী লৈনবা থাজ-ৱারী (Religious Legend) নি হায়না পনবদা হেন্না নকশিন্ননা থোকই। মখল অসীগী মনুংদা অমুক সাধু সন্তগী ওইবা থাজ-ৱারী (Saint Legend)দা মায়চৌ লৌরেম্বা খোংনাংথাবা-গী ৱারী অসী থম্বা য়াই।

মায়চৌ লৌরেম্বা খোংনাংথাবা-গী চরিত্র অসী থাজ-ৱারীগী চরিত্র (Legendary character) নি। থাজ-ৱারীগী চরিত্রবু পুৱারীগী চরিত্র (Historical character) ওইহন্নবা হোৎনরকপা অসী অফবা খোঙথাঙনি। অদুম ওইনমক চেকশিন্নীংঙাই কয়ামরোম লৈবা অদুদি নীংশিংহৌবা ফৈ। মরমদি নাম চিংদুনবু ওইরবসু জেনরেলাইজ ওইবা ঙমহৌদবা মশকশিংদি হিষ্ট্রিওগ্রাফিনা অদুমক ইরায় লায়না ফাগৎলকপা ঙম্মী।

মায়চৌ লৌরেম্বা খোংনাংথাবা-বু তেংবানবা মপু য়াইবীরেল শিদবা-গী লাংওন ওইনা খাগেম্বগী মতমদা পোকখিবা মায়চৌ অপোইননা মচাগী মখা চত্থরকপা পামহৈবা মতমগী লাংওননি হায়না লৌরম্বসু থেংনৈ। মহাক্না হৌজিক্কী মতম অসীদা ‘কা’ হায়বা খোন্থোক অসীনা হৌবা মিংদা লাংওন তৌবিগনি হায়বসীনি।

লৈশেম্বা মতম	তেংবানবা মপূ য়াইবীরেল শিদবা	চীংঙু খোইয়ুম অশিবা লাইনিংথৌ সনামহী	ইপুধৌ কোনজিন তিংথোকপা পাখঙবা
খাগেম্বা মতম	অপোইননা মচা	কোনোক থেংগ্রা	য়ূম্নাম তোম্বা
পামহৈবা মতম	লৌরেম্বা খোংনাংথাবা	মোইরাং ললহানবা	???
হৌজিক মতম	কা খোন্থোক অসীনা হৌবা	নি খোন্থোক অসীনা হৌবা	??? ???

অসীগুম্বা মখলগী শেমগৎপা মতৌশিং অসী থাজ-ৱারীগী মশক অমনি। মায়গৈ অমরোমদা, মায়চৌ ৭ (করম্বা মীৎয়েংদা মায়চৌ ৭ খক্তনি হায়না লেপ্পনো হায়বসী খঙদনা লৈরি) না মতমগী খোঙলৈ মতুং ইন্না থূপ্লমদাইদা মখাগী ৱারোলশিং অসী লেপমীন্নখি হায়নসু অখঙ-অহৈ-শিংনা থম্বীরম্মী।

মশীং	মায়চৌগী মিং	লেপ্নখিবা ৱারোলশিং	ঙাক্লগদবা মায়গৈ
১	লৌরেম্বা খোংনাংথাবা	কংলা মনুংদা, নুংগোইবী মফমদা চীংথ্রাউ পাম্বী ওইনা হৌরগে	নোংপোক
২	কোনোক থেংগ্রা মৈহৌবা	চকপী কারোংগী পনকোইনুং হিদেন (কোনোক হিদেন) দা	খা
৩	লাংগোল লুখোই	লাংগোল চীংগী নাপোমদা লী পাম্বী ওইনা হৌরগে	অৱাং
৪	মোইরাং ললহানবা	ৱাংঙু পনকোইনুংদা লৈহাউ পাম্বী ওইনা হৌরগে	মোইরাং
৫	দেবিপা	লমলেন মাক্লংগী লময়াইদা হৈবী পাম্বী ওইনা হৌরগে	নোংচূপ
৬	খারম থাদোই	নোংচূপ লাইমতোন চীংদা লৈরগে	নোংচূপ
৭	শামুরৌ চীগোং	হিয়াংথাঙদা হৈক্রেং উপাম্বী ওইনা হৌরগে	খা মৈরম

অসুম্না শাগৎপা মশকশিং অসীবু ফোকলোর নৈনরোলদা লাইনীং-লাইশোনগী ৱারীদা হাপচিন্দুনা লীবা থাজ-ৱারী (Folk Bible) হায়না কৌই। মসী লম-লমগী অমসুং মশাগী ফোক নোলেজ লৈজবা মীওই কাঙলূপ পূম্নমক্কী থাজ-ৱারীদা য়াওবা মহৌশা অমনি। অদুবু ঐখোয়গী মায়চৌ ৭ অসীদা মৈহৌবা মায়চৌ কোনোক থেংগ্রা অসী মীতৈ য়েলহৌমী নত্তে, নোংচূপ হারমগী কোনোক (Astrologer) অমনি হায়বা ৱাফম অমা লৈরি। অদুগা অমুক নাকন অমরোমদা, পুৱারীগী চরিত্র ওইরিবা কত্বান মোইরাং ললহানবা অসীবু মায়চৌগী ফিদাদা থমদুনা ৱারী লীখুন কয়া পানখৎলিবা অসীসু অমুক হন্না য়েংশিন্নীংঙাই লৈরি হায়জনীংই।

মতমগী খোঙলৈনা পুরকপা অহোংবা অমসুং মায়চৌ লৌরেম্বা খোংনাংথাবা

মতমগী খোঙলৈনা মৈদিংঙু পামহৈবা সনা হাক্তক্তা অহোংবা কয়ামরোম পুরকখি। ময়ামগী মরক্তগী মরু ওইবা ১০দং মখাগী অসুম্না খনগৎলগা থমজরি,

১.   মৈদিংঙু পামহৈবা-না মীয়ান লাইনীংদা অহুম্লক লাইমিং লৌখি। মখোয়শিং অদুদি- অহানবদা, শাক্ত লাইনীং, অনীশুবদা রমান্দি লাইনীং অমসুং অহুমশুবদা প্রমার্থ লাইনীং অসীনি।

২.   লাইনীং-লাইশোন চাওখৎহন্নবা হোৎনবদা ৱারী কয়ামরোম মীতৈরোনদা লাইরিক ওইনা ইশিনখি। ৱারী ওইনা লীদুনা ময়ামদা তাহনখি।

৩.   শেন্মীৎলোন চাওখৎনবা হোৎনবদা থুমখোং কয়ামরোম হূকখি। মৈদিংঙু খাগেম্বা মতমদগী চৎনরকপা কৈথেলগী চৎনবীদু হেন্না মপাঙ্গল হাপ্নবা হোৎনবা ওইনা অনৌবা কৈথেল কয়ামরোমসু লিংদুনা কাহনখি।

৪.   লাইনীং-লাইশোনগী অনৌবা মশক (মীয়ান লাইনীং) শিং তম্পাকতা লৈবা মীওই ফূরূপশিংদতা নত্তনা চীংমীশিংদসু য়ৌহন্নবা হোৎনরম্মী। লাইশঙ শাবা হৌগৎলম্মী।

৫.   লাইনীং-লাইশোনগী মপাঙ্গল হেন্না কনখৎহন্নবা হোৎনবদা হান্নদগী চৎনরম্বা লাইনীং-লাইশোনগী মশকশিং মাঙহন্নবা হোৎনখি। উমংলাই খুবমশিং মাঙহন্দুনা মোংবহনবা উমংদা ফুমজিনখি। পুয়াশিং খোমগত্তুনা কংলা উত্রা মমাঙদা মৈ থাখি। মায়গৈ অমরোমদা, মীয়ান লাইনীংগা মরী লৈনবা লাই মুর্তি কয়া অমসুং লাইশঙ কয়া শাগৎখি।

৬.   লম্বী-থোংগী ফিবম ফগৎহন্নবা হোৎনখি। হান্না লৈরম্বা লম্বীশিং চাউথোকহনখি অমসুং তু-খোং লান্নবা থোং কয়া শাখি। মায়গৈ অমরোমদা, কৃক-কৃক ঈন্নবমখৈ চনন্নবা মওংদা য়ূম শাজিন্নরম্বদু খরা লন্থোক্না শাবা হৌদোকখি। মীশিং হেনগৎনবা, খুঞ্জাউ-লৈচাউনা পান্নবা নিংথৌনা চীংমী য়াওনা অতৈ লানফা কয়াবু খুন লিংহনখি। খুদোং চানবগীদমক খুন হোংদোক-হোংজিনসু তৌহনখি। তোঙান-তোঙানবা ফূরুপ মচাশিং লৌন-লৈনহন্নবগী য়াথং তাউথখি।

৭.   খুল্লকতা ওক-য়েন লোইবা থিংহল্লম্মী। অথিংবা কিদদুনা লোইবশিংবু লৱায়দা থারম্মী। য়ূম্লকতা অশিবা হকচাং লৈরোন চনশিনবগী থবকসু লেপহল্লম্মী। লৈরোন চনবগী থবক তোকহল্লগা তুরেল মপান্দা মৈ থাবগী চৎনবীসু হৌদোকখি।

৮.  লোন শীজিন্নবদা মপান লমগী লোনগী মশক মরাং কায়না চঙশিনবা হৌখি। মৈত্রবাকপু মণিপুর, নিংথৌবু মহারাজ অমসুং পামহৈবা নিংথৌ মশাগী মিংসু গরিবনিৱাজ হায়না কৌখি। অতৈ মীচমশিংসু মীয়ান মরোনদা মিং থোনবা চৎনহনখি।

৯.   পেনা খোংবা হৌদোকপগা লোয়ননা নিংথৌ অমসুং অঙম-অথৌশিংবু শৈথাদুনা ঈশৈ শকপসু হৌদোকখি।

১০.  নুপা শিবগী পোৎলোইবদা মনাই নুপীশিং য়াওনা মৈ থাবগী চৎনবী ওইরিবা সতি মৈ থাবগী চৎনবী অদু লমদম অসীদসু চৎনরকপা উবা ফংখি।

পঞ্জখ্রিবা অহোংবশিং অসী মৈদিংঙু চরাইরোংবা হাক্তক্তগী থঙথরকপা শরুকশিংগা লোয়ননা অয়াম্বা মশকশিংদি মৈদিংঙু পামহৈবা-গী মতমদা লাকখিবা অহোংবশিংনি। অহোংবশিং অসী, তশেংনদি, মৈদিংঙু পামহৈবা-না নিংথৌ ওইরকপা চহী ১২ শুরকপা মতমদা মীতৈ লৈবাক্তা মরোই মনাউ ১০গা লোয়ননা থোরকখিবা গোসাই (শান্তদাস) না ধর্ম্মগুরু ওইরকপদগী লাকখিবা ঙাক্তনি হায়বা য়াই। ওইরক্লিবা অহোংবশিং অসীদা পামজবা শরুক অমসুং পামজদবা শরুক কয়ামরোম য়াওরি। অদুম ওইনমক, অহোংবা অসী শান্তদাসকী খূত্থাংদা নিংথৌ অমসুং লৈবাক মীয়াম্না য়ানীংনবু ওইরবসু য়ানীংদনবু ওইরবসু লৌশিন্দুনা চৎনহনখি।

হৌজিক্কী মীরোল অসীদা লৈবা লৈবাক মীয়ামগী শরুক অমনা শাগৎপা মীৎয়েংদা মৈদিংঙু পামহৈবা হাক্তকতা লাকখিবা অহোংবা অসীগী মনুংদগী ১, ৫ অমসুং ৮ অসীদা ময়োল ওইবা মীৎয়েং থম্লগা শান্তদাস অমসুং মৈদিংঙু পামহৈবা-বু মরাল লৈহল্লগা মদুগী মায়োক্তা লৌরেম্বম খোংনাংথাবা-বু লেপহন্দুনা শেমগৎপনি। ৱারী শেমগৎলিবা হৌজিক মতমগী মীরোল শরুক অদুনা পুৱারী মরিক চূম্না খঙদবনিনা অপীকপা শরুক অমা-অনীখক্তদা মপাঙ্গল ঊৎহন্দুনা খোংনাংথাবা-বু থম্লম্বনি। ৱারী শেমগৎপা মীরোলনা খোংনাংথাবা-বু ২, ৩, ৬, ৭, ৯ অমসুং ১০ গী মায়োক্তা লেপ্তুনা থিংখি হায়বগী ৱারী লীখুনদি থম্লম্বা উবা ফংদে। মসীদি ঐখোয়গী মীৎয়েং পাক্তবনা মরম ওইরগা খোংনাংথাবা-বু হেন্না পীকশিলহনবা ওইনা থোকহল্লি।

লৌরেম্বা খোংনাংথাবগী মরমদা রেকোর্দ তৌশিল্লম্বা ৱারী-লীখুনশিং লৈতে। মহাক্কী মরমদা শাগৎলিবা ৱারীশিং অসী অয়াম্বনা চীনবুংদা লৈবা ঙাক্তনি। অতৈদি ১৯৪৫ ইংগী মতুংদা লান্না মচু শঙজিল্লকপা ৱারী ঙাক্তা ওইগনি হায়বসীনি। মায়চৌ খোংনাংথাবা-বু মতমগী খোঙলৈ খঙবা অমসুং তাকপা মীওই ওইনা শাগৎলি অদুগা নাকন অমরোমদনা মাঙ-তুং করিসু খঙদবা জীব অমা ওইনা শাগৎপসু উবা ফংই। থাজৱারীগী মতুং ইন্না, মায়চৌ খোংনাংথাবা-না মমাঙগী মপোক ওইরিবা অপোইননা মচাগী মতমদা মৈদিংঙু খাগেম্বা অমসুং অতৈ মায়চৌশিংগা লোয়ননা শরী ৱাশক্নখিবনি- পামহৈবা মতমদা লাইনীং কনমিন্নসী হায়বগী। অদুম ওইনমক, মতমগী খোঙলৈদগী মায়চৌ লৌরেম্বা খোংনাংথাবা-না হেন্না চাউবা ঙমখিদে, চাউনবসু হোৎনখিদে হায়জনীংই। মায়চৌ খোংনাংথাবা অমসুং মহাক্কী মতমগী মীরোলদগীসু মতমগী খোঙলৈনা হেন্না মপাঙ্গল লৈখি।

থাজনরিবা ৱারীশিংদা য়াওরিবা অরানবা মশকশিং

ঐখোয়না মায়চৌ লৌরেম্বম খোংনাংথাবা-গী মরমদা হকথেংননা অমসুং নাকোইননা খঙলিবা অমসুং তারিবা ৱারীশিং অসীদা অরানবা কয়া অমসু য়াওবা থেংনৈ। য়াম্না শম্না

১.   মায়চৌ লৌরেম্বম খোংনাংথাবা-গী মপোক নুমিৎ পীরিবা অসী ৱাখলনা পংশা শাগৎপা মশক অমনি। ‘শকাব্দ (ইং কুমজা) ১২৭৫ লমতা থাগী ১২নি পানবা নোংমাইজিং নুমিৎতা খোংনাংথাবা পোকখি’ হায়রিবা অসীদা শকাব্দবু ওইরবসু ইং কুমজাবু ওইরবসু লমতাগী ১২নি পানবা অসী নোংমাইজিং নত্তে হায়বসীনি।

২.   মায়চৌ লৌরেম্বম খোংনাংথাবা-গী মরমদা লীন-তানরিবা ৱারীশিং অসী অইবা রেকোর্দ অমত্তা লৈরম্বা নত্তে। মসী ফোক নেরেটিবকী মনুং চনবা থাজ-ৱারী (লেজেন্দ) গী মখল অমা ওইরিবা সেইন্ট লেজেন্দ হায়বদুনি। মায়চৌ লৌরেম্বম খোংনাংথাবা লেজেন্দরি করেক্টর অমনি হায়বসীনি।

৩.   ৱারীগী মনুংদা মোইরাং ললহানবা-বু পামহৈবা-না হাৎনবা হোৎনবদা মায়চৌ লৌরেম্বম খোংনাংথাবা-না কনবগী মতাং য়াওবা অদুসু অচুম্বা নত্তে। মোইরাং ললহানবদি মায়চৌসু নত্তে, মহাক্তি তোঙান-তোঙানবা ফম মচাদগী মথং-মথং কারক্তুনা পোলোইদা কত্বান ওইনা নিংথৌ পামহৈবা-গী থৌগন তৌখিবা মীশক্নি। নিংথৌ পামহৈবা-না মচা ইবুঙো য়াইমা চিৎ সাই (মেনখোম্বা) দা নিংথৌ ফম্বাল শিন্নরবা মতুংদা কোনুং থাদোক্তুনা লৈগদবা য়ূম অদু ললহানবা-না শাবীখিবনি। নিংথৌ পামহৈবা-গা লৈনবা মরীদু মখা তানা চেৎনা লৈহৌনবগীদমক মসূনুপীবু পামহৈবা-গী মজা ইবুঙো ঙৌব্রাম সাই (মাইবম চনু চরোইঙম্বী-না পোকপা) দা লুহোংদুনা পীখিবা মীশক অমনি।

৪.   মৈদিংঙু পামহৈবা-বু তূক্কৎচনা উননবা মমা লৈমরেনবু লমচৎ নাইদবী ওইহন্দুনা পামহৈবা-বু ময়াং মচানি হায়না শাগৎপা ৱারীশিংসু অরানবা ঙাক্তনি। পামহৈবা-দি মপা ইবুঙো চরাইরোংবা-না নিংথৌ ওইদ্রিঙৈদা পোকপনি। চরাইরোংবা-না নিংথৌ ওইরবা তুংদা লাকপা মীয়ান লম্বোইবা অমনা লৈমরেনগী কা-দা চঙদুনা পামহৈবা মরু হুনখিবনি হায়না শাগৎপা ৱারীশিং অরানবনি। পামহৈবা-গী মমাদি মপাবুংনা নিংথৌ ওইদ্রিঙৈদনা কোরৌ নোংগাখ্রবনি।

৫.   হৌজিক্কী মীরোলনা মায়চৌ ৭ হায়দুনা য়ানরিবা অসী করম্বা পরিং অমদা ৭ অসীবু খনগৎপনো হায়বসী খঙবা ঙমদনা লৈ। মরমদি মায়চৌদি ৭ খক্তা নত্তে। অদুগীসু মথক্তা মোইরাং ললহানবা-বু মায়চৌগী পরেংদা থম্বা অসীসু চুমদে। মায়গৈ অমরোমদা, কোনোক থেংগ্রাবু মীতৈ মায়চৌনি হানা থম্লিবা অসীসু চুমদে। মরমদি, কোনোক থেংগ্রা মীতৈ নত্তে, মৈদিংঙু খাগেম্বা-গী মতমদা লৈরম্বা নোংচূপলোমগী জ্যোতিষ শাস্ত্র হৈবা কোনোক অমনি। মহাক্না পোকপা মচাশিং বামোন শাগৈ ফংখিবনি।

ৱারোইশিন

লেজন্দরি করেক্টর অমা ওইরিবা মায়চৌ লৌরেম্বা খোংনাংথাবা-গী ৱারী অসী হেন্না মমূৎ তানা থিজিনবা চঙলি। নাকন নামতা য়েংবা মীৎয়েংদগী মহাকপু মশক খঙনবা হোৎনবা অসী অচুম্বা খোঙথাং অমা ওইরোই। ফোক লিটরেচরগী মহৌশা অমা ওইনা হেঞ্জিনবা অমদি পুৱারীগা শমজিন্নরকপদা চানরক্তবা মশক কয়া লৈবা অসী কূপ্না য়েংশিন্দ্রবদি মায়চৌ লৌরেম্বা খোংনাংথাবা-বু হিষ্টোরিকেল করেক্টর ওইনা শাগৎলকপদা অপনবা কয়া অদুমক থেংনগনি। লেজেন্দ শাগৎপগী হৌনশা ওইনা লীরিবা ৱারী অদু চুমহন্নবা হোৎনবদা পীরিবা শাক্ষিশিং অদু অরানবা অমদি চূনদবা ওইরবদি তরু-তরুবা করেক্টর অমা ওইরিবা মায়চৌ লৌরেম্বা খোংনাংথাবা-গী মশক অসী হেন্না-হেন্না থীহল্লকপসু য়াই। পূম্নমক্না খঙনৈ, মৈদিংঙু পামহৈবা সনা হাক্তকতা মীতৈ মালেমদা মতমগী খোঙলৈনা অওনবা খরা পুরকখি অমসুং হায়রিবা অওনবা অসী পুরকপা মতমদা কনা অমত্তনা থিংবা ঙমখিদে। মরমদি থিংগদৌরিবশিং অদুসু মতম অদুগী খোঙলৈগী মনুংদা লৈবা ঙাক্তনি, মায়চৌ খোংনাংথাবা-সু মদুমক ওইখিবনি। পূম্নমক্সী ওইদুনসু মহাক্না মীতৈ ঐখোয়গী হান্নগী পরীং, লাইনীং-লাইশোন কন্দুনা থম্বা পামখি হায়না হৌজিক্কী মীরোলনা মপাঙ্গল লৈনা শাগৎনরক্লিবা মশক অসীগী মীৎয়েংদগী হায়বা তারবদি- লৌরেম্বা খোংনাংথাবা অসী মীতৈগী মায়চৌ পুরেননি হায়বসীনি।