মণিপুরী মেদিয়মগী মহৈশঙশিংদা মণিপুরী মহৈরোয় লৈরক্তবগী মরমশিং

ৱাহৌদোকঃ অসামদা লৈরিবা মণিপুরী মীওই কাঙলূপ অসীনা মতম-মতমদা অচৌ-অচৌবা সমস্যা কয়া মায়োক্নদুনা লাকখি। সমস্যা কয়া অমা কোক্নবা ঙমখি, কয়া অমনা নমথদুনা থম্বা ঙমখি। হৌজিক-হৌজিক মায়োক্নরিবা সমস্যাশিংগী মনুংদা খ্বাইদগী অচৌবা সমস্যা অসী ‘মণিপুরী মেদিয়মগী মহৈশঙশিংদা মণিপুরী মহৈরোয় লৈরক্তবা’ অসীনি হায়না লৌবা য়াই।

হীরম অমা মায় পাকপগী অমসুং মায়থীবগী মরম লৈবগুম্না মণিপুরী মেদিয়মগী মহৈশঙশিংদা মণিপুরী মহৈরোয় লৈরক্তবগী মরমশিংসু লৈ।  তোঙান-তোঙানবা মরম ময়ামগী মনুংদা মরু ওইবা মরম ৫খক মখাদা থমজরি।

১. অঙাং পোকপগী চাং হন্থরকপাঃ ইং ১৯৮০ গী মতমদগী ‘হম দো হমারি দো’ অসী অসামগী মণিপুরী ফূরুপনা পাম্ননা লৌশিন্নখিবা উই। মরম অদুনা, অসামগী মণিপুরী জাতিগী মীশিং হেনগৎপগী লৈঈদা হন্থরকপা উবা ফংখিবসী চহী ১০ গী মতম অসীদগী হৌখিবনি। মসীনা ১৯৯০ গী মতম অমসুং ২০০০ গী মতমদসু পাম্ননা চত্থরকখিবনা ২০১০গী মতম অসীদসু লেপ্তনা চত্থরি। সূপ্না চহী ৩০ + দা হন্থরকপা অঙাং পোকপগী চাং অসীনা মণিপুরী ফূরুপ অসীগী হীরম অয়াম্বদা অচৌবা চৈথেং কয়া মায়োক্নহনখি। চৈথেং ফংহল্লিবা হীরম ময়ামগী মনুংদা মণিপুরী মেদিয়মগী মহৈশঙশিংদা মণিপুরী মহৈরোয় লৈরক্তবা অসীসু অমনি হায়না লৌবা য়াই।

ইং ১৯৮০ গী মমাঙগী মীরোলদা লৈরম্বা ইমুং অমদা অঙাং ৫+ গী চাংদা লৈরম্বা মতমদা ইমুং ১০ (চাউরাক্না) লৈবা খুঙ্গংগী এলপী ষ্কুল অমদা অঙাং ৫০ মুক্না তম্লম্বা উবা ফংই। মসীনা ১৯৮০গী মতম অমসুং মতুংদা অঙাং ২ গী চাংদা হন্থরকপা মতমদা অঙাং ২০ খক্তনা তম্বা তাবনি। হৌজিক্তি অঙাং য়ামখিদবা অহানবা অঙাং মীরোল অদুসু মমা-মপা ওইদুনা মচাশিং মহৈশঙদা থাবা হৌরে। মখাগী টেবল অসীদা অঙাং পোকপগী চাং হন্থবনা মহৈশঙদা তম্বা য়াবা অঙাং মশীংগী চাউরাকপা মশক অদু য়েংমিন্নবা য়াই।

চহী	ইমুং	পোকপা	তম্বা	হন্থবগী চাং
১৯৭০গী মতম	১০	৫	৫০	০%
১৯৮০গী মতম	১০	৪	৪০	২০%
১৯৯০গী মতম	১০	৩	৩০	৪০%
২০০০গী মতম	১০	২	২০	৬০%
২০১০গী মতম	৫	২	১০	৮০%

২. অফবা ওজাগী মশীং হন্থরকপাঃ ওজা হায়বসী পোক্লকপদগী য়াওজরকপা গুণ চেনবা মীওইশিংতনা ওইগদবা শিনফম অমনি। ওজা ওইবা হায়বসী হোৎনরগা ওইবা য়াবা মখলগী শিনফম অমা নত্তে। হৌজিক্কী মতমদা ওজা ওইরিবশিং অসী অয়াম্বনা থাগী তোলোবতা য়ূম্ফম ওইবা ঙাক্তা ওইনা তৌই। মশাগী শিনফমদা কত্থোকপা লৈবা নত্ত্রগা অঙাংশিংবু অফবা য়ূম্বীরেল ওইহনবা পাম্বগী পোৎলুম লৈবা ওজা মশীংদি ইউ উদে হায়বা য়াই। মরম অদুনা মখোয়গী শিনফমগী পুন্সীদা অশোনবা লৈবা অদু তমগদৌরিবা অঙাংশিংগী ইমুং-মনুংনা খঙবনা মরম ওইরগা মহৈশঙ অদুদা লৈরিবা ওজাশিং অদুনা তাকহন্নীংদবদগী মচাশিংবু তমহন্দবা অসীসু মরম অমনি।

মসীদি ঐখোয়গী অসাম সরকারগী সিষ্টেমগীসু অশোয়বা লৈ। শেঞ্জা-থুমজানা ওজাগী শিনফমবু মরুম কোকপী য়েনবীগুম য়োন্থোক-য়োনশিন তৌবদা অথিংবা থমদবগা লোয়ননা মহৈশঙশিংদা ওজা মশীং সুনা থম্বীদবা মতাং কয়ানসু মরম ওইহল্লি।

৩. নৌনা মমা ওইরকপা মৌশিংনা মনেম-মকুগা লৈমিন্ননীংলক্তবাঃ মাঙবা য়াবা অউনপোৎ খরা পুরক্লগা মৌ ওইরকপা, মশাগী মাঙবা নাইররোইদবা সংষ্কারগী মগুণ অদুদি য়াওরক্তবা মৌশিংনা ময়ুম পাল্লকপগা শান্নবা অহানবা লৌরোনদি মতৌ করম্না মনেম-মকু অমসুং মপুরোইবগী মচিন-মনাউশিংগা লৈমিন্নরোইদগে হায়বসীনি। অঙাং য়াওরকপা অমসুং চাউরকপা য়াম্না ৱানা ঙাইরবা মতুংদা অঙাংবু অফবা মহৈশঙদা তমহন্নীংবগী মিংদা ময়ূম থাদোক্লগা শহররোমদা কাখৎনবা অসীসু অচৌবা মরম অমনি। অসীগুম্বা মতাং অসীদা ঐখোয়না ভাব তাবা ঙমদবা মতাংদি- অঙাং ফহন্নীংবগী ময়ূম থাদোক্তুনা শহররোমদা কাখৎলিবরা নত্ত্রগা মনেম-মকু অমসুং মপুরোইবগী মচিন-মনাউশিংগা লৈমিন্ননীংদবগী অঙাং লাইরিক তম্বদা তাইনরিবরা হায়বসীনি। অসুম্না মৌনহাশিংনা শহররোমদা কাখত্তুনা অঙাংশিংবু অতোপ্পা মহৈশঙদা তমহনখিবা অসীনা মণিপুরী মেদিয়মগী মহৈশঙশিংদা মণিপুরী মহৈরোয় লৈরক্তনবা মরম অমসু ওইরিবনি।

৪. সোসিএল ফেসন ওইনা ইংলিস ষ্কুলদা মহৈ তমহন্নরকপাঃ হৌজিক্তি ইংলিস ষ্কুলদা থাদুনা মচাশিংবু মহৈ তমহনবা অসী ফীবমগী মখা পোন্দ্রবসু খুনাই অসীনা শেমজবা সোসিএল ফেসন অমা ওইরে। ইংলিস ষ্কুলদা থাদুনা মচাশিংবু মহৈ তমহনবা হায়বসী মমা অমনা মশাদা লৈতেংজবা লৈতেংপোৎ অমগুম লৌনরে। মমা অমনা মশাগী বেঙ্ক একাউন্ট, মোবাইল অমা, দিটিঐচ কন্নেক্সন টিভি অমা, সিলিন্দর কন্নেক্সন গেস ষ্টোপ, মরোন নাইবী ফনেক, রানি ফিদূপনচিংবা লৈবগুম্না মচাবু ইংলিস ষ্কুলদা থাদুনা মহৈ তমহনবা অসীসু অমা ওইরে। ইংলিস ষ্কুলদা থাদুনা মচাশিংবু মহৈ তমহনদবা মমাশিংদু খুনাই অদুদা ইচু খঙদবী, মতমগী চৎনবী খঙদবী, খুনুংগী নুপী ওইনা হন্থনা লৌনরে। অসীগুম্বা সোসিএল ফেসন অমগী ঈথক অমা ঐখোয়গী খুনাইদা ইপোম চাউনা কাখৎলকপা অসীনসু মণিপুরী মেদিয়মগী মহৈশঙশিংদা মণিপুরী মহৈরোয় লৈরক্তনবগী মরম অমা ওইরিবনি।

৫. ইংলিস এজুকেসনদা পূক্নীং চিংশিন্নরকপা অমসুং থৌগৎনরকপাঃ মতম অমা বাংলা তম্বদা হেন্না পূক্নীং চিংশিন্নরম্মী অমসুং থৌগৎনরম্মী। থংনবা মীৎকূপতা মণিপুরী তম্বদা অমুক অদুগা হৌজিক্না ইংলিস তম্বদা হেন্না পূক্নীং চিংশিন্নরকপগা লোয়ননা থৌগৎনরকপা মতম ওইরি। মতম অহুম্মককী মরমশিং লৈনখিবা ঙাক্তনি। মতম-মতম অদুনা পীবা ঈথিল অমমমনি হায়না লৌবা তাবনি। অহানবগী বাংলাদা পূক্নীং চঙলম্বা মরম অদুগা হৌজিক্কী ইংলিসতা পূক্নীং চঙনরিবা অসী মীৎয়েং অমরোমদা মান্নবা মশক খরদি লৈ। মরু ওইবা অমদি- অঙাংশিং অদুনা চাউখৎলক্লগা মখা তানা তমথরক্কদবা হয়ার এজুকেসনগী মেদিয়ম অদুগী লোন অদু হেন্না কমফোর্টেবল অমসুং ফেমিলিয়র ওইহন্ননবনি।

সর্ভে অমগী মতুং ইন্না, অসামগী কোলেজ অমসুং য়ুনিভর্সিতিগী মণিপুরী মশঙশিংদা ওজা ওইনা থৌ পুরিবা মণিপুরী প্রোফেসর অমসুং এসিষ্টেন্ট প্রোফেসরশিংনা মখোয়গী মচাশিং অমত্তবু মণিপুরী মেদিয়মগী মহৈশঙশিংদা তমহনবা উবা ফংদে। মণিপুরী মেদিয়মগী এলপি, এমই অমসুং হাই ষ্কুলগী মণিপুরী ওজাশিং অয়াম্বসু মখোয়গী মচাশিং মণিপুরী মেদিয়মগী মহৈশঙশিংদা তমহনবা উবা ফংদে। মসীশিংসী মচাশিংবু থাক ৱাংনা মহৈ তমহন্নীংবগী ৱাখল্লোনদা ওইরম্বসু য়াই হায়না লৌজনীংই।

ৱারোইশিনঃ ভারত সরকারগী পোলিসি প্রোগ্রাম মতুং ইন্নদি অঙাংশিংবু মমারোনদা মহৈ তম্বীবনা হেন্না ক্বালিতি লৈবা মহৈরোয় পুথোকপা ঙমগনি হায়বসীনি। মদুগীদমক হয়ার এজুকেসনগী লাইরিকশিংসু মমা মরোনশিংদা হন্দোক্তুনা ফংহন্নবা থৌরাং পায়খৎলি। ইংলিশ লোনদা মহৈ তমহনবা অসীনা চাদা ২০ দগী হেন্না ক্বালিতি লৈবা মহৈরোয় পুথোকপা ঙমদে হায়না থাজনরিঙৈ চৈরক অসীদা অসামগী মণিপুরী খুনাই অসীনদি মচাশিংবু পীক্লিঙৈদগী হৌনা মমারোনদা মহৈ তমহন্দদুনা ইংলিস এজুকেসনদা ঈনশিন্নরি। মমা মরোনদা মহৈ তমহনবা অসীনা লোন খঙনবা হোৎনবগী লেবর অদু লৈহন্দবনা মরম ওইরগা তম্বীরিবা হীরম অদুবু হেন্না মমূৎ তানা খঙবা ঙমহল্লি অদুগা ইংলিশ লোনদা তম্বা অসীনা লোন অদু খঙনবা হোৎনবগী লেবর থাদরিঙৈ তম্বীরিবা হীরম অদু মমূৎ তানা খঙবা ঙমহন্দে হায়বসীনি। অসুম্না ভারত পূম্বগী ওইবা এজুকেসনিষ্টশিং অমসুং হীরমসিগী অখঙ-অহৈশিংনা থম্লিবা ৱারোলশিং অমসুং ৱাখল্লোনশিং অসীগী তাইয়োন্নবদা অসামগী মণিপুরী খুনাই অসীনা হোৎচিন্নরিবা অসী কদায় ফাওবা অচুম্বা খোঙথাং ওইরিবনো হায়বসী মুন্না খন্থনীংঙাই ওইরি।