"অসামিস" হায়বসীগী ৱাহন্থোক অনী লৈ। অহানবা অদুনা ঙাঙনরিবা লোন অমগী মিংনি অদুগা অতোপ্পা অমনা লোন অদুবু ঙাঙলিবা মীওই ফূরূপ নৎত্রগা কাঙলূপ অদুগী মিংনি। অসামদা লৈবা মীশিংবু "অসামিস" কৌই হায়বসী অরানবা ৱাহন্থোকনি। অচুম্বদি "অসামবাসী" "অসামদা লৈবা" কৌগদবনি।
মণিপুর রাজ্যদা লৈবা মীওইশিংবু "মণিপুরী" কৌই হায়বা মণিপুরগী মীওই খরনা শাগৎপা অরানবা ৱাখল্লোন অমা লৈ। মীওইশিংদুগী মনুংদা সিএম ওইবীরিবা নোংথোম্বম বীরেন সিংহসু অমনি। মখোয়গী মীৎয়েংদা মিংথোল অসীনা অপূনবা শক্তম অমা শাগৎপা ঙমগনি হায়না থাজরুবনি। তশেংনদি মসী য়াম্না চাউবা অরানবা অমনি।
মীৎয়েং অসীদগী অসামদা লৈবা মীওই পূম্নমক "অসামিস" কৌই হায়না নোংথোম্বম বীরেন সিংহ অমসুং মখোয়গী ৱাখল্লোন তিন্নবশিংনা লৌজবনি। মণিপুরদা লৈরিবা ফূরূপশিংবু মণিপুরী তাংখুল, মণিপুরী খোংজাই, মণিপুরী কবুই অসীনচিংবা হায়দুনা শাগৎপগী মেন্টলিতি অদুগী পরিংদা অসামিস মণিপুরী, অসামিস বেঙ্গলি, অসামিস বোদো, অসামিস মার, অসামিস বিষ্ণুপ্রিয়া মণিপুরী, অসামিস নেপালি অসীনচিংবগী মিংদা পন্নবা হোৎনবনি।
মীৎয়েং অসী চৎনবা য়ারোই। মদুগী মরমদি. মসী পাক শন্না শীজিন্নবদা অকায়বা লৈগনি, চূংশিন্নবা লৈরোই। ফোর্মুলা অসীমক অরানবা ফোর্মুলা অমনি। মদুগী খূদমদি- ত্রিপুরী বেঙ্গলি, ত্রিপুরী মণিপুরী অসীনচিংবা য়ারোই। মিজোরামি মণিপুরী, মিজোরামি বেঙ্গলি হায়বা য়ারোই। নাগলেন্দি মণিপুরী, নাগালেন্দি মরাম হায়বা য়ারোই। কন্নরিকা মণিপুরী, অরুণাচলি মণিপুরী, সিকিমিস মণিপুরী, বাংগালি মণিপুরী, উরিয়া মণিপুরী, পঞ্জাবী মণিপুরী, গুজরাটি মণিপুরী অসীনচিংবা হায়বা য়ারোই।
মায়গৈ অমরোমদা, মণিপুরী মীতৈ, অসামিস অসামিস, ত্রিপুরী ত্রিপুরী, মিজোরামি মিজো, বাংগালি বেংগলি, উরিয়া উরিয়া, তামিলিয়ান তামিল, কন্নরিকা কন্নরি অসীনচিংবা হায়বা য়ারোইদবগুম "অসামিস মণিপুরী" হায়বা টর্ম অসী চৎনবা য়ারোইবদা, লোজিকেল ওইদবা মিংথোল অমনি।
তশেংনদি নোংথোম্বম বীরেন সিংহ অমসুং মহাক্কা মোত তিন্নবা কাঙবু অদু "মণিপুরী" অমসুং "মণিপুরবাসী", "অসামিস" অমসুং "অসামবাসী"নচিংবগী ৱাহন্থোক খঙদদুনা তৌবনি।
"মণিপুরী" হায়বসী লোন অমসুং লোন অদুবু ঙাঙলিবা ফূরূপ অদুগী মিংনি। মালেমগী মফম খূদিংমক্তা লৈরবসু মখোয় মণিপুরীনি। "অসামিস মণিপুরী" হায়গদবা নত্তে, "অসামবাসী মণিপুরী" নৎত্রগা "অসামদা লৈবা মণিপুরী" নৎত্রগা "অসামগী মণিপুরী" হায়গদবনি।
No comments:
Post a Comment