মণিপুরী খুনাইদা পাথাং-পুথাং নাইবা শিনফমঃ ‘লোইয়ুম্বা শিনয়েন’দা মীৎয়েং থম্লগা নৈনবা

ৱাহৌদোক

মীরোল অমদগী মীরোল অমদা পাথাং-পুথাং নাইনা থাদোক্তনা পায়রকপা শিনফমবু হেরেদিটরি ওকুপেসন হায়না কৌই। মীশিংনা মপা-মপু হাক্তক্তগী চত্থদুনা লাকপা শিনফম অমবু ঈকাই খুম্ননীংঙাই ওইবা মওংদা মখা চত্থবতা নত্তনা লাক্কদবা মীরোলদা অমুক শিন্নরম্মী। ঙল্লিঙৈ, নিংথৌ পাল্লিঙৈ মতমদা নিংথৌনা শিন্নরম্বা শিন্থা কয়া হৌজিক্কী পুন্সী মহীংগা চানরক্তবা অমসুং নাৎকী হোংলকপা মশকশিংনা মরম ওইরগা মদুগী শীজিন্নফম লৈরক্তবদগী তপ্না-তপ্না মূৎখিবা শিনফম কয়া অমসু লৈফম থোকই। অদুম ওইনমক কনা-কনানা করি-করি শিনফমগীদমক শিন্থা পাঙনরম্বগে হায়বসী নৈননবগী য়াম্নমক মরু ওইবা হীরম অমনি। মীতৈগী ওইনা ঙল্লিঙৈগী চৎনবীদা য়ূম্নাক শাগৈশিংবু শিনফম অমমমদা নিংথৌনা শিন্থা পীদুনা পাঙথোকহল্লম্বগী মমি ‘লোইয়ুম্বা শিনয়েন’ কৌবা লাইরিক্তা ময়েক শেংনা তারম্মী।

লোইয়ুম্বা শিনয়েন

লাইরিক অসী মণিপুরী সাহিত্যগী অঙনবা মতমদা ইরম্বা মণিপুরগী লৈঙাক পথাপকী ওইবা লাইরিকনি হায়না লৌবা য়াই। মৈদিংঙু লোইয়ুম্বা (১০৭৪ - ১১২২) না মহাক্কী মতমদা লাংশঙদা ফমদুনা তোঙান-তোঙানবা য়ূম্নাক শাগৈনা পায়গদবা শিনফমশিং য়েন্থোক্লম্বগী মতাংদা লাচলহৌবা লাইরিকনি। শিনফম অমবু কনানা পায়গদগে হায়না য়েন্থোক্লগা পীবা অসীনা মরম ওইরগা য়ূম্নাক অমগা অতোপ্পা য়ূম্নাক অমগা অনীগী মরক্তা শিনফমদা য়েৎশিন্নদনবা মরমসু ওইহল্লি। মৈদিংঙু লোইয়ুম্বনা শিন্থা য়েন্থোকপগী মরমদা ইবা লাইরিক ওইবনা মরম ওইরগা লাইরিক অসীগী মিং নিংথৌগী মিং লৌরগা ‘লোইয়ুম্বা শিনয়েন’ হায়না কৌখিবনি।

লাইরিক অসীদা শিন্থা য়েন্থোক্তুনা পীরিবসী মৈদিংঙুনা মহাক্কী মমাঙদা পানখিবা মৈদিংঙুশিংগী হাক্তক্তা চৎনরম্বা চৎন-পথাপশিং অমসুং অতৈ চৎনরোলশিং অদুবু কূপ্না নৈনরবা মতুংদা লৌশিনবা য়াবমখৈ লৌশিল্লগা অৱাৎপা শরুক কয়া মেনশিন্দুনা লৈবাক ঙাকপদা, ৱায়েন থৌদাদা, শেন্মীৎলোনদা, লাইনীংলোন্দা খুদোং চাননবগীদমক অমদি চয়েৎনদনবগীদমক চৎন-পথাপ পরেং ওইনা লেংশিন্দুনা চৎনহল্লম্বনি। লাইরিক অসীদা মৈদিংঙু লোইয়ুম্বগী মতুংদা পানখিবা নিংথৌ খরগী হাক্তক্তা থোকপা থৌদোক খরগী হাপ্তোক-হাপচিন খরা লৈবগী মতৌ উবা ফংই। লাইরিক অসীগী অরোইবা শরুক্তা মৈদিংঙু খাগেম্বা সনা হাক্তক্তা মূর্ত্তি হৈদুনা তোল্লোং লম্মহন অমদি খোইবু ৱাংগোইদা লাইশঙ শাদুনা লাৎপা হৌখিবা চিঙ্ঙু তাইবং খায়বা লাইনিংথৌ সনামহী অমসুং কোনুংদা লাইশঙ শাদুনা লাৎপা হৌখিবা লাইয়িংথৌ নোংশাবা অনীগী মরমদা ৱাহৈ খরদং য়াওরিবা অসীদি মৈদিংঙু খাগেম্বা সনা হাক্তক্তা (১৫৯৭ – ১৬৫২) হাপচিনখিবা শোয়দনা ওইগনি হায়বসীনি।

মণিপুর অসী অপীকপা লৈবাক ওইদুনা মী মশীং য়ামজদ্রবসু ১২ শুবা চহীচাদা – থবক অমা তৌবদা থোইদোক হেন্দোক্না মমূৎ তানা পাঙথোকপদা খূৎলোইনবগীদমক মী-মীগী মশিন খায়দোকপগী চৎন পথাপনচিংবা ইদুনা থম্লম্বা হায়বসীনা লৈবাক অসী ঙল্লিঙৈ মতমদা কয়া য়াম্না থাক ৱাংনা চাওখৎলম্বগে অমদি লৈবাক মচা তারম্বগে  হায়বগী লেঙদ্রবা খূদম অমসু ওইরি। ‘লোইয়ুম্বা শিনয়েন’ হায়বা লাইরিক অসী  লমায় ২০ শুনা পান্দবা অপীকপা লাইরিক মচা অমনি। অদুম ওইনমক, মতম অমগী লৈবাক অমা ঙাকপগী, খুনাই অমা শেমগৎপগী, নিংথৌ মনাই অঙম-অথৌ ফম্নাইবগী, শেন্মীৎলোনগী, মথৌ-মশিলগী, লাইনীং লীচৎকী অমদি চৎনরোলনচিংবগী ৱারোলনচিংবশিং শূপ্না য়াওবা লাইরিক্নি। অসীগুম্বা মখলগী লাইরিক্তি অঙনবা মতমগী পৃথিবীগী লৈমায়দা থিবদা খরা ৱানা থোক্কনি হায়জনীংই।

মৈদিংঙু লোইয়ুম্বা

মৈদিংঙু ইরেংবা (৯৮৪ - ১০৭৪) না খয়োইরোন তমহৈবী অমসুং হাওরৈম পিদোংনু ফাবী পান্নদুনা তমহৈবীনা লোইয়ুম্বা অমসুং পিদোংনু ফাবীনা খম্লাং পমশাবা পোকই। মপাবুং নিংথৌনা ফম্বাল কূম্লবা মতুং মচা ইবুঙো অহল লোইয়ুম্বনা মীতৈ নিংথৌ ওইনা ফম্বাল তোংখি (১০৭৪ - ১১২২) বনি। মৈদিংঙু অসীগী মতমদা মীগা লাইগা পূন্না লাল্লূপ কামিন্নরম্বদগী মীনা লাকচদুনা লাইশিং মখৈনা মাঙখিদুনা মী মখৈনা শিলহৌবনি। মৈদিংঙু অসীগী মতমদা পানা খায়বা হৌদোকখি, নিংথৌরোল শৈশককা পূন্না নোংদা লাইরেন পাখংবগী মতমদা লৈস্নাগা পূন্না ফম্বাল কাবদা শকখিবা ঔগ্রিসু শকখি অমসুং য়ূম্নাক শাগৈশিংনা পায়গদবা মশিল শিন্থা অমমম পীদুনা য়েন্থোকপীরম্মী। শিন্থা য়েন্থোকপগী অকূপ্পা মরোলদু ‘লোইয়ুম্বা শিনয়েন’ কৌবা লাইরিকতা ইশিন্দুনা থম্বীরম্মী।

মীতৈ লৈবাক্তা ফনেক ফিবান খোই লোনবা হৌদোকখিবসী মৈদিংঙু লোইয়ুম্বগী মপু নিংথৌ য়াংলৌ কৈফাবা (৯৬৯ – ৯৮৪) গী সনা হাক্তক্তনি। অদুগা কাং শান্নবা হৌদোকখিবনা মচা নিংথৌ লোইতোংবা (১১২২ - ১১৫০) গী সনা হাক্তক্তনি।

‘লোইয়ুম্বা শিনয়েন’দা য়েন্থোক্লম্বা শিন্থাশিং – ফি শাবা

মীতৈ লৈবাক্তা ফি অসী মপু নিংথৌ য়াংলৌ কৈফাবা হাক্তক্কী য়াম্নমক মমাঙদগী শাদুনা শেৎনবা হৌরক্লমগনি হায়বসী মপু নিংথৌ অসীগী মতমদা ফনেক ফীবানদা খোই লোনবা হৌদোকখি হায়বসীনা ময়েক শেংনা খঙহল্লি। মৈদিংঙু লোইয়ুম্বগী সনা হাক্তক্তা তোঙান-তোঙানবা ফি মখল অমসুং মখোয় অদু করম্বা য়ূম্নাক্কী মীওইশিংনা শাগদবনো হায়বসী ‘লোইয়ুম্বা শিনয়েন’দা য়েন্থোক্লম্বগী মতাংদু মখাগী অসুম্না থমজরি-

য়ূম্নাক	শাগদবা ফি
থিংকুজম	মুংফি
নিংথৌজম	চীলফি
লাইরেল্লাকপম	লাইফি
কাম্বম	কাতংফি
চকপা থিয়াম	লাইফি তোংকাপ
চকপালমপম	ফিরেল
কোংপাচম	লংতোমফি
থোংকাপম	য়ারোংফি
খুমল্লমপম	চামিফি
হাওখোম	তোংকাপফি
লাইপাখ্রমপম	সারোংফি
সনচিরাম	লৈরূম
ৱাহেংপম	তুল্লাই কূপফি
কাপাচম	তুল্লাই থানফি
অপুচম	ফৈরোইফি
হাওতৈজম	হৈকোয়ফি
থোইতিংচম	সীংখপফি
খোংপম	লাইয়েকফি
কোংপম	প্রুমফি
চিঙ্ঙাখনপম	ফাকংফি
থৌতাম	তারাউফি
থীনপম	পূমথিৎফি
তাইপংচম	ফিমুয়েক পাংয়ুংফি
য়ূমলেলপম	নোংফি
ৱোকথীয়ামপম	খুনুং মুসুমফি
খোইরীশুমপম	খুনুং চুমখনফি
য়ূম্নাকসঙপম	চীংখোঙফি ফিমু
খোইসানাম	ফিমু লানফী
সীংখাঙপম	খুনুং মাথংফি
চীংখামপম	কোরৌফি ফিঙাঙ
ৱাংপাচম	সঙমু লাংমুফি
থাঙকংশাবম	থাঙলি সাকারামৈ
অহোংশাংবম	খূৎসুরি খোঙলিমা

ফিশিং অসী তোঙান-তোঙানবা মফমদা তোঙান-তোঙান্না শীজিন্নগদবা ওইবনা তোঙান-তোঙানবা মিংদা লৈরি। খুদম ওইনা, মুংফি হায়রিবসী ঙল্লিঙৈ মতমদগী শীজিন্নরক্লবা ঙবোং (ফাকং)গুম্বা ময়েক থোকপা ফিনি। মৈদিংঙু নোংদা লাইরেন পাখঙবগী মতমদা মুংফি লৈরুম হায়না খঙনরম্মী, মৈদিংঙু লোইয়ুম্বগী মতম য়ৌরকপদা মচু-মমেন অমসুং ময়েক থোকপদা খেন্নবা লৈরকপদগী ফিখল অনী থোক্না খায়দোক্লগা মুংফিবু থিংকুজমদা শাহল্লগা লৈরুমবু সনচিরাম য়ূম্নাক্কী মীওইশিংদা শাহনখি। মায়কৈ অমরোমদা, চীলফি হায়বসীনা ইন্নফি মখল অমনি। মসী পান্থোইবীনা শক লোৎলগা তাংখুল নুরাবী ওইনা লৈরিঙৈ থক্কী হকচাং কূপ্নফি ওইনা শীজিন্নখি হায়না ‘পান্থোইবী খোঙ্গুল’দা ইরম্বা থেংনৈ। অসুম ফি খূদিংমক্কী তোঙান-তোঙানবা ৱারী লৈরি।

‘লোইয়ুম্বা শিনয়েন’দা য়েন্থোক্লম্বা শিন্থাশিং – লং মচু শঙবা

মীতৈ লৈপাক্তা ১১-১২ শুবা চহীচাদা ফিশা-লোনশাদা য়াম্নমক চাোখৎলম্বগী মমি উবা ফংই। লং পুথোক্তুনা মচু শঙদুনা মখল মথেল কয়াগী মচু শঙনবা হোৎনরম্বা অসীনা তাকপদি চহীচাশিং অসীদা মীতৈ লৈপাক্তা শিল্প কলাগী থবক অসী য়াম্নমক চাওখৎলম্লে হায়বসীনি। ‘লোইয়ুম্বা শিনয়েন’দা য়েন্থোক্লম্বা শিন্থাশিংগী মনুংদা করম-করম্বা য়ূম্নাকশিংনা করি-করি লং মচু শঙগদগে হায়বগী মতাংদা মখাগী অসুম্না থমজরি-

য়ূম্নাক	শঙগদবা মচু
অকাংচমপম	লৈরেন খোইপাকলৈ
চীংখাংপম	চীংশাং ময়ূমলৈ
য়িরোমপম	তলা উরৈরোম মকোং মৈরী মালপা
ফিশাপা ঙানপা	লোইরং থাউচুলৈ
খুমলথেমপম	হিকোক নানৌলৈ
খুমুকচম	কুম্লং কুম্পাললৈ
য়িপুশঙপম	চীংয়া নাপু লৈ, তাউচীং হৈতাউলৈ
ৱুশিয়ামপম	ৱানা কাতং মালপা শঙলেল য়াইচুলৈ,
হকৱানথেম	লোইয়ামপা

‘লোইয়ুম্বা শিনয়েন’দা য়েন্থোক্লম্বা শিন্থাশিং – চীং, লাই শঙবা

মীতৈ লৈপাক্তা মীওই কয়াবু লাইগী থাক্তা থাঙ্গৎতুনা লাৎলম্বা উবা ফংই। মসী ইপা-ইপু লাৎপগী ৱাখল্লোন (ancestor worship) অদু ওইগনি। চীং-পাৎ-তুরেলনচিংবা কয়াবুসু লাইগী থাক্তা থাঙ্গৎতুনা লাৎলম্বগী মমি (Animism, Totemism)অমা উবা ফংই। ‘লোইয়ুম্বা শিনয়েন’দা য়েন্থোক্লম্বা শিন্থাশিংগী মনুংদা করম-করম্বা য়ূম্নাকশিংনা করি-করি চীং, লম, লাইশিংবু শঙগদগে হায়বগী মতাংদা মখাগী অসুম্না থমজরি-

য়ূম্নাক	শঙগদবা লাই
হৈরোম	মৈরৈমা
য়িরোম	খম্লাংপা
সোয়াম	উসোয়
হিতাম	য়িখৈ
শোইরেলশঙপম	সোরারেল
নিঙোলপম	ৱাংকোল
সরাংথেম লৈশাংথেম	লমাপী
সোরোকখাইপম	ফৌওইপী
পোৎশঙপম	শঙলাংমৈ
মোইরাং পুখ্রমপম	কুচু
অয়াম পুরোইচম	পুরোইলৈম
সৌপাম	মৱাউলৈম
হৈসনাম	পান্থোইপী
খোইসিনাম	পেতঙ্ঙা
হোইতোলকোকপম	হোইতোল লাইরেম্মা
তাইপংচম	লাইখুরেমপী
কোন্থৌচম	হুইমু লৈম
অশাংপম	লৈনাউতাপী
চিখ্বাম	নুংথেললৈম
অরামপম	সৌপোললৈম
য়েলখোম ফিসাফম	অৱাংপা
লুৱাংশঙপম	লুৱাংচীং
সিনাম লাইশঙপম	লাইয়িংথৌ হলপা
মোইরাংথেম পুথেম	পুথিপা
মোংশতাপম	পুরৈরোমপা
লংমাইথেম	তেলোংপা
য়ারংয়ানপম	থোঙ্ঙাক
নাকনপম	চীংকোল নিংথৌ
খুরাইচম	চীংপাললৈম
মৈয়েংপম	য়াওরৈপী
লৈশাংথেম	কৌপারেল
য়েলখোম	চাখাপা
নিংথৌচম	নুমিৎলৈম
পুখলপম	কৌপ্রু
চেংলৈ লাইশঙপম	মরাচীং
মোইরাংথেম	মোইরাং ফকতোম
কাংপুচম	হোংনেময়োই খুলচাউপা
চীংঙাখলপম	চীঙঙা
লোংচম ফৈরোইচম	লাংচীং
তেকচম	লাংকোল
লংমাই য়ুমমাথেম	লংমাইচীং
নিংথৌচম	চীংঙালৈম
হৈথৌ খোংতেকচম	হৈপোক
চীখামপম	লাইচীং হিয়াংথাং লৈম
থাউপিচম	য়ূমচাউ লাইরৈম

‘লোইয়ুম্বা শিনয়েন’দা য়েন্থোক্লম্বা শিন্থাশিং – মাইবগী শিন্থা

মীতৈ লৈপাক্তা তোঙান-তোঙানবা য়ূম্নাকশিংনা নাৎকী থৌরমশিংগা মরী লৈননা কনা-কনানা করি-করি থৌ পাঙথোক্কদগে হায়বসী য়াম্নমক লূম্না লৌনরম্মী। ‘লোইয়ুম্বা শিনয়েন’দা য়েন্থোক্লম্বা শিন্থাশিংগী মনুংদা করম-করম্বা য়ূম্নাকশিংনা করি করি থৌ তৌগদগে হায়বগী মতাংদা মখাগী অসুম্না থমজরি-

য়ূম্নাক	তৌগদবা শিন্থা
অশাংপম	খোঙ হামবা
অরামপম	য়িরুবা
লৈরোংচম	লৈরোনবা
তোইপীচম	থরাউচী খোংবা
অরুপম	অশেং অরু তৌবা
লৌরেমপম	য়ূমচাউ চেঙ কাপ্পা
কোনশাপম	লোলৈ লূকথক শাবা
অহৈবা	পুখম নাতি হৈবা
হিচাপা	ফালশাং লৈমায় শাবা
থাংশাপা	থাঙ-তা শাবা
ফৈরোইচম	লপত্রৈ য়ানবা
মোইচমপম	মোইরীক শাবা
লৌখাম	মৈপা চিংবা
লৌশি নহাকপম	মৈপা চিংবা
খুন্থৌপম নহাকপম	মৈপা চিংবা
মোইরাংথেম	হিরি খোংশাং লাকপা
মাইমুয়াম	মাইমু তোমশোল লাৎপা
তাইপংচম	অতাই পুরী থোকপা
মাইপা থিয়াম	শীংখায় হুনবা, মঙ চঙবা
মৈহৌপম	মৈ হৌবা
মৈফুৱাম	মৈ কাম্বা
নাউকনশঙপম	নাউ শঙবা
অপুচম	নাউফম পুবা
তোকপম	লৈপাক তৌবা
তোংপুরম থাংশাপম	লৈ থোনবা
তৌরেম	অয়াং তৌ লানবা
নাউরোইপম	অঙাং লৌবা
লৈশাংথেম	অয়াং লমকুম্বা
পূকয়ুহৌপম	য়ু শিনবা
ৱাংখেম লোংচম	লোঙ পায়বা
ঙাথেম	ঙামী কৌবা
লাংকোল চুমপা	মং চঙবা
লাংতেন	লালচৈ হুনবা
লাংকমপম	লালচৈ য়ানবা
থোংপম	থোংকা থিংবা
লাইতোনজম	অয়াং চঙবা
শীংখাংপম	শীং খাঙবা
আতোম	শরৈ থেম্বা
য়ুরুংপম	লাল হোইবা
ময়াংলম্পম	শামী কৌবা
লাঙহৈপম	লাং শেম্বা
তৌমোম	তৌ য়ানবা
তৌরিয়াম	তৌ য়ৈখায়বা
হাওমুকপম	ফক শাবা
খোইরিশুমপম	খোইরী কিবা
খোইরিয়ানপম	খোইরী ককপা
লাইরেনচম	ফি শূবা
থৌথিপম	লা খাঙবা
লিশম	লী শাবা
লৈশা ওনপম	চফূ শাবা
ঙানুকাপ্পম	ঙানু পাইবা
খুয়োনথেম	হামেং পুশিনবা
ৱোকক্রমপম	ওক পুশিনবা
মাইপম অফ্রামপম	মাইপা তম্বা
অহোংপম	অহোং অচাউ তম্বা
মাইপম	চূপ শাবা
ঙাঙোম	কোনয়াই হুনবা
য়েংকোকপম	য়েরুম থাবা
অখাম	শম ককপা
শাথোকপম	শেৎথোকপা
সোরোকখাইবম	ফাকতোকপা
খাইতেম	হকচাং খাইবা
হকৱানথেম	হন ফাৎতোকপা
হলনোইপম	হন নোইহৎপা

‘লোইয়ুম্বা শিনয়েন’দা য়েন্থোক্লম্বা শিন্থাশিং – লাই লাৎপা অমসুং থৌগন চঙবা

মীতৈ লৈবাক্তা তোঙান-তোঙানবা পোৎলমশিংবু থৱায় পাল্লি হায়না লৌবতা নত্তনা পোৎশকশিং অদুবু অথোইবা থাক্তা থাঙ্গৎতুনা লাৎনরম্বা অমদি মখোয়গী থৌগল চঙনরম্বগী খূদম উবা ফংই। ‘লোইয়ুম্বা শিনয়েন’দা য়েন্থোক্লম্বা শিন্থাশিংগী মনুংদা করম-করম্বা য়ূম্নাকশিংনা করি-করি লাই নত্ত্রগা পোৎলমশিং নৎ্ত্রগা থৱায় পানবা জীবশিংবু অৱাংবা থাক্তা থাঙ্গৎতুনা লাৎলম্বগে অমসুং থৌগন চঙনরম্বগে হায়বগী মতাংদা মখাগী অসুম্না থমজরি-

য়ূম্নাক	লাই লাৎপা, থৌগন চঙবা
কিয়াম	কিয়াম লাই লাৎপা
নম্পুচম	নম্পুচম লাই লাৎপা
অশৈপা	সনা লমওক শকপা
অসেম ঙাখাখোই	য়াকৈ ঈশৈ শকপা
খোইনাইচম	খোই লাৎপা
সনচিরাম্পম	ষণ চিংবা
পাউপম	পাউতা হিতেলতা লাইপাউ তাবা
ফমতোম	খোংকাং খুতা নাবা
লাইশ্রম	সন্থোং লাৎপা
কামপম	তোকপা লাৎপা
নাউখোংচম	খোং লাৎপা
খরাইচম	খরাইথোং খনবা
য়ূম্লেলপম	য়িশিং লাৎপা
অখোংপম	খোং থিনবা
থিনপম	নাকথিনবা
থিংনাম	উ কারোং লাৎপা
লাইশোম	উচি লাৎপা
থিয়াম	হি লাৎপা
হৈসনাম	হয়িং লাৎপা
থোঙাম	অহোংলোন শকপা
শরাইচম	খোইচু লমওক শকপা
মোইরাং পুখ্রনপম	তিংলেন কাংলেন লাৎপা
নংপোকপম	নোং লাৎপা
ৱাইখোম	ৱাই খোম্বা
অকোইজম	মীকোল হিহোলবা
সলাম	লংমাইচীং লাৎপা
হিতাম	সনা লীফক শাবা
নাওরেম	নাউশোংফাল লাৎপা
নোংচেলপম	নোং কাপ্পা
লাইরেল্লাকপম	নোংমৈ শীংচঙ লাৎপা
হৈথম	খোঙ হাম্বা, য়িরুবা
খম্নাম	খম্নুং চয়োম থাবা
নামারম	কাসাতেল লাৎপা
ফূরিৎশাপম	য়েৎতুম পূমকা লাকপা
পুতোলচম	লু পুবা
শাংতোলচম	লু থেৎপা

ৱারোইশিন

‘লোইয়ুম্বা শিনয়েন’ হায়রিবা লাইরিক অসী নৈনবা মতমদা মতম অদুগী মীতৈ খুনাই নাৎ অমসুং মখোয়গী লৈঙাক্লোনগা লোয়ননা লাইনীংলোনগী মতাংদা ময়েক শেংনা খঙবা ঙম্মী। মৈদিংঙু লোইয়ুম্বগী সনাহাক্তক মমাঙদগী মীতৈ লৈবাক্তা ফিশা লোনশাগী থবক চত্থরক্লে অমসুং শিল্পকলাদা মীতৈনা কয়া য়াম্না খুমাঙ চাওশিল্লম্বগে  হায়বসী মপু নিংথৌ য়াংলৌ কৈফাবগী সনা হাক্তক্তা ফনেক মপান খোই লোল্লম্বা অসীদগী লায়না খঙবা ঙম্মী। মী শিবগী মথৌ মঙমগা মরী লৈনবা থৌরমশিংদা করম-করম্বা য়ূম্নাক্না করি করি শিন্থা পায়গদগে হায়না য়েন্থোকপীরম্বা অমসুং লাইনীং লাইশোলগা মরী লৈননা করম-করম্বা লাইশিংবু করম-করম্বা য়ূম্নাক্না শঙগদগে অমসুং লাৎকদগে হায়বগী মতাংদা অমগা অমগা য়েৎশিন্নদনবা য়াৎথোকপীরম্বা অসীমক মৈদিংঙু লোইয়ুম্বগী থোইদোক হেন্দোক্না থাক ৱাংলবা ৱাখল-লৌশিং অদু খঙবা ঙম্মী। অসুম্না শিন্থা খায়দোক্তুনা য়েৎনহন্দনা লৈঙাকপগী মওংসি মালেমদা অতাংবনি। লাইরিক অসী পীকচরবসু য়াম্নমক মমল লৈরবা, লৈঙাক্লোনগা মরী লৈননা শেম্বা চৎন-কাঙলোন কয়া থন্না য়াওবা লাইরিক অমনি হায়না লৌনরি। মরম ময়ামশিং অসীদগী ‘লোইয়ুম্বা শিনয়েন’বু the ancient constitution of Manipur হায়রগসু খঙনরিবনি।

মতেং লৌজখিবা লাইরিকশিং

১. অয়েকপম তোম্বা মীতৈ, ‘মীতৈ য়েক শলাই অসুপ্পা’, (অনীশুবা খূৎনম), স্যামকুমার লাইশ্রমচা, ইম্ফাল, ২০০৮

২. ইরাবোৎ নিংথৌজা, ‘সলাই মৈহৌরোন’, লৈহৌ নোংহৌ শঙলেন, ইম্ফাল, ২০১৫

৩. এন খেলচন্দ্র অমসুং এল ইবুঙোহল, ‘চৈথারোল কুম্বাবা’, মণিপুরী সাহিত্য পরিষদ, ইম্ফাল, ২০০৫

৪. কোন্সম মণিকচান্দ সিংহ, (খোম), ‘লোইয়ুম্পা শিলয়েন’, কোন্সম ইমো সিংহ, ইম্ফাল, ২০১২

৫. বি কুলচন্দ্র, ‘ফম্লোন’, হিজম চনু ফজবী, ইম্ফাল, ২০০৯