IYELLEI

IYELLEI

Nupimachaa amagi punsi-da meeyoi suraktuna ahaanba thaa-gi khongkaap laakpada thorakpa (finung-gi) ‘ee’ adubu IYELLEI haaina kou-i. (mayaang maronda KAAM SINDUR haaibaduni). Ningol amagi punsi-da ikhang khanghoudana laakkadaba oibana, laaktringei mamaangdagi houna masigi mataangda mamaa oibisingna machaa ningol oibisingda maangjounana khanghanbigadabani. IYELLEI-na hek thorakpaga leibaak-ta taahankhiba yaade. Leibaak-ta taakhrabadi mamal leite, mayaai maang-i haaiduna ahansingna taakpi. Leimaaida taakhidringeida ningthina amasung cheksinna, setliba fi nattraga lasing nattraga amonba fi-gumba amada lousinduna thambihougadabani. IYELLEI-si mahaakna poklakkadaba machaa khudingmakki ‘yaai’ni.

IMAA-GI FANEK

Ningol amana mou-gi sing-da chanbagi ahaanba fidinnabada setkhiba fanek adusu yaamnamak maru-ni. Fidinnaba aduda thokpa ‘ee’ nattraga atei mahi (paa-pi anigi fambee mahi-nachingba)sing teiraba fanek (ahaanba numidaang nattraga garbhadaan pigadaba fidinnabada setpa ahanba fanek) adu cheksinna poklakkadaba angaang adugi ming-da thambigadabani.

Nupi asina mirollaktuna angaang unaba changba matamdasu asengba fanek ama setpigadabani. Angaang unabada setkhiba fanek asisu pokliba angaang adugi ming-da cheksinna thambigadabani. Mamaa amana angaang unabada setkhiba fi asibuni IMAA-GI FANEK haairaga khangnaribasi. (lamchat sengdaba nupising-gidi mahei leite.)

NAAOKAN-FI

Nouna pokliba angaang asina taaibang-da hek thorakpaga leimaai-da taadringeida asengba fi ama semlaga, pibuknungdagi taarakkadaba mapaa-da yaaduna thambigadabani. Fi asi angouba fiseng oihanba ahansingna paammi. Angaangna taaibang mangfaaonabada okpikhiba fi asina awaa-anaa kayaadagi kanbiba ngammi haaiduna masibu NAAOKAN-FI haaina khangnabani.

‘IYELLEI’, ‘IMAAGI FANEK’ AMASUNG‘NAAOKAN-FI’-gi kaannaba

IYELLEI totkhiba fi/lasing, IMAAGI FANEK amasung NAAOKAN-FI asigi machet khara-khara louraga lang ahingba, hui taret saangba amana yetsinduna pullaga korigi jantra/taabis amada haaptuna sibirabadi laai-tin fattabana sokpa amadi mityeng changba ngamde. Yeknaba leite, leirabasu matik mayaai chammi. Afaba laaising-gi thoujaal fang-i. Hotnaruba khuding maai paak-i. chaaokhatli, matik-mayaai chelli. Mithoi-mihen oi. Nung-thaang, nongmei singjang changde haainarammibani. Haairibasi, mari leinariba angaang adu nattaduna onnakhrabasu mahei leite haaina taakpi.

Ahansing-gi waahallon khennaba

1. Ahan khara-na maru hun-gadaba numidaang-da setkhiba fi asi pande. Makhoi-gi waakhallon-di- IYELLEI, chaabokpada setkhiba IMAA-GI FANEK amasung NAAOKAN-FI ahum asina maru-ni.

2. Ahan khara-na NAAOKAN-FI yaaode. Makhoi-gi waakhallonda- IYELLEI, maru hun-gadaba numidaang-da setkhiba fi, chaabokpada setkhiba IMMA-GI FANEK ahum asina maru-ni.

3. Ahan khara-na amuk marimak yaao-i. IMAA-GI FANEK haairibasi maru hun-gadaba numidaang-da setkhiba fi/fanek amasung chaabokpada setkhiba fi/fanek adugani haaibasini. Anisina ama oina paaraga atei anisiga ahum-ni haaina lou-i.

Akuppa marol thaajaba yaaba ahansing-ga taanabiyu.

LAAI-da thaajakhibi MEETEI NINGOL-sing

লাইদা থাজখিবী মীতৈ নিঙোলশিং

(মণিপুরদসু টেম্পল প্রোসটিট্যুসনগী চতনবী লৈখিবরা)

-এন দি হোদাম্বা-

India-da chatnaba apikpa angaang amabu Devadasi oihanbagi thouram

ৱাহৌদোকঃ

উকংনা শাবা লাইদা, লাইশঙদা, হামেংদা নত্ত্রগা থৱায় পানবা জীব অমদা নত্ত্রগা উ পাম্বীনচিংবদা মচা নিঙোল থাজরম্বগী অঙকপা ৱারী অসী ভারতকী তোঙান-তোঙানবা চতনবী লৈজবা লৈহাও মরক্তা হিংবা মীওই ফূরূপশিংদগী তাবা ফংলম্বনি ৷ মসী ইথা থাজদনা মীতৈগী চতনবীদসু লৈরম্বা থেংনরকপা অসীদা ঙক্নীংঙাই ওইব্রা ওইদব্রা হায়বসী ঙসী ফাওবদি লেপথোক্নবা হোতনদ্রি ৷

থাজ-ৱারীদা নিঙোল অমা লাইদা থাজখিঃ

লাই-তীনগী মচল য়াওবা থাজ ৱারী (mythological legend)দা ঐখোয়না কোন্থৌজম লাইরেম্বী অসী লাইনিংথৌ সোরারেল (কনাগুম্বনা শলাইলেন হায়বা)না লৌরগা সনাগী কৈরাক থাদুনা লাইরৈবাক্তা পুখতখি ৷ মপাম লমদমদা অশি-অনা থোকহল্লোই হায়না সোরারেলনা ৱাশক্লম্মী ৷ মমা-মপানা মচাবু উনীংদুনা অশিবা হূই অমবু মীওইবগুম পোলোইবগী মৈখু কাখতলকপা উবদা মপামদা ‘অশি-অনা থোক্লমালে, অমুক্তা চতলগা য়েংলুগে’ হায়না মপুরোইবা সোরারেলদা তক্নরম্মী ৷ নপামদা কনাসু অশি-অনা থোক্তে হায়রবদসু লাইরেম্বীগী মপাম চতনীংবগী নিঙাইনা কনমনবদগী সনাগী কৈরাক থাবিদুনা মপামদা থাবিরকই ৷ মতমসিদা লাইরেম্বীনা ঙাইহাক্তংগিনি খন্দুনা পীক্লিবা মচা ইবুঙো খোরিফাবা পুরক্তে, তূম্লগা লৈহৌই ৷ চতলমদাইদা চেকশিন-ৱা ওইনা, ‘নঙদি খোইয়ুম লাই ওইরবনিনা তাইবং চীঞ্জাক চারকপদি য়াদে’ হায়না পাউমেনবীরকই ৷

মপামদা য়ৌরগদি লাইনিংথৌনা হায়বগুম অশি-অনাদি থোক্লমদ্রে ৷ ঙাইহাক উনদুনা ৱারী-ৱাতাই তৌনরবা মতুংদা হন্নবা থৌরাং তৌই ৷ মদুদা মমা-মপানা মতম কুইনা উবা ফংলকত্রবা মচা নিঙোলবু তাঙনা উবা ফংবদা হরাওদুনা করিগুম্বা অচা-অথক খরদং শীল্লি ৷ লাকথোক্তনা লাক্লগা করি অমত্তা চাদনা করম্না চতকনি ৷ অসুম্না তক্নবদা লাইরেম্বীনা মপুরোইবগী য়াথং মতুং ইন্না চাদনবা হোতনরম্মী ৷ অদুবু ‘লাইনিংথৌনা উদনবা থাকন ৭ খনবিগে, মদুগী মখাদা চারবদি উরোই’ হায়না থেম্নদুনা পীজরম্মী ৷ অদুবু পূম্নমক উবা ঙম্বা লাইনিংথৌনা তাইবং চীঞ্জাক হন্নমুক চারবী লাইরেম্বীবু লাইরৈবাক য়ৌরক্নবা লম্বী ককথত্তুনা থাবিবা কৈরাক্তু চিংখতখি ৷ অমুক হন্না চতপা ফংখিদে ৷ কোন্থৌজম লাইরেম্বী ওইনা লৈহৌই ৷

ৱারী অসীগী নৈনরোলদা- কোন্থৌজম নিঙোল অমা মীতৈ (কংলাদা পাল্লম্বা নোংদা লাইরেন পাখংবগী চাদা নাউদা) নিংথৌ অমনা লৌবগী ৱারী ওইনা ৱাহন্থোক পীনবা হোতনৈ ৷ অসুম্না, নোংপোক পান্থোইবীগী ৱারী, পোইরৈতোন খুন্থোককী ৱারী, খোংজোম্নুবী নোংগারোলগী ৱারী, নুমিত কাপ্পগী ৱারী, পাখঙবনা লিন ওইবা অদুগা সনামহীনা শগোল অপাইবা ওইবনচিংবা ময়াম অসীগী নৈনরোল কয়া পীনবা থেংনৈ ৷ মপান্থোংগী মীতয়েংদা, কনাগুম্বা চনু নিঙোল অমনা লাইদা থাজখিবগী ৱারী হায়রগদি কোন্থৌজম লাইরেম্বীগী ৱারী অসিনা অহানবা ওইনা থেংনৈ ৷

পুৱারীদসু নিঙোলশিং লাইদা থাজখিঃ

কোন্থৌজম লাইরেম্বীগী ৱারী অসী অকক্নবা মতম অমদি অকক্নবা নিংথৌ মমিংদি খঙদবা, অদুবু থোকখি হায়নদি থাজনবা অদুগুম্বা লাই-তীনগী মচল য়াওবা থাজ-ৱারী অমনি ৷ লাইরেম্বী অসীগী মতুংদা ঐখোয়না মতম-মফম খঙবা থৌদোক্তসু নিঙোল খরা লাইদা থাজরম্বগী ৱারী অসী থেংনৈ ৷ ৱারীশিং অদু মখাদা থমজরি-

১. নাউরোইবম চাউবীঃ লাই কসাদা থাজখিবী

পুৱারীদা ইহান হান্না লাইদা থাজখি হায়না থেংনবা নিঙোলসি নাউরোইবম চাউবীনি ৷ মণিপুরগী পুৱারীদা মৈদিংঙু পাইখোম্বনা খৃষ্ট চহী ১৬৬৬ তগী ১৬৯৭ ফাওবা মীতৈ নিংথৌ ওইনা ফম্বাল তোংলম্মী ৷ মহাক্কী মতম অসিদা মীতৈনা লাতনরম্বা লাইশিংগী মনুংদা লাই কসা হায়বসীসু অমনি ৷ খৃষ্ট চহী ১৬৮১, শজিবু থাদা নাউরোইবম চাউবীবু লাই কসাদা লুহোংদুনা থাজৈ ৷ ‘চৈথারোল কুম্বাবা’ দা ইরম্মী-

‘শাইরোম মাইমুগী কুম শক ১৬০৩ শজিবু থাদা নিংথেমনা নাউরোইবম চাউবীবু লাই কসাদা লুহোংএ ৷’ –লা. ৫০

২. লৈমখুবী হঞ্জবীঃ লাইৱা হায়বদা থিন্থখিবী

মণিপুরগী পুৱারীদা মৈদিংঙু পামহৈবনা খৃষ্ট চহী ১৭০৯ দগী ১৭৪৮ ফাওবা মীতৈ নিংথৌ ওইনা ফম্বাল তোংই ৷ মহাক্কী মতমসিদা লাতলম্বা লাইশিংগী মনুংদা লাইৱা হায়বা অসীসু অমনি ৷ লাইৱা হায়বা হায়রিবা লাই অসী লাইনিংথৌ সনামহীবু খঙনবা অতোপ্পা মিং অমনি ৷ খৃষ্ট চহী ১৭৩০, ফাইরেনগী থানিন, য়ূমশকৈশাদা পামহৈবনা মহাক্কী লৈমশিংগী মনুংদগী লৈমখুবী হঞ্জবীবু লাই কসাদা থিন্থৈ হায়বসীনা অনীশুবা ওইনা থেংনবনি ৷ ‘চৈথারোল কুম্বাবা’ দা ইরম্মী-

‘ফাইরেন থাদি য়ূমশকৈশানা হনএ ৷ থানিন নোং য়ূমশকৈশাদা অঙোম চনু লৈমখুবী হঞ্জবীবু লাইৱাহায়বদা থিনথৈএ ৷’ –লা. ৯১

৩. সনা চীংজরোইবীঃ লাই মারজিংগা লুহোংখিবী

ইনিংথৌ পামহৈবনা পাল্লিঙৈ মতম অসীমক্তদা সনা চীংজরোইবীবু লাই মারজিংগা লুহোংবিরম্মী হায়বসী ঐখোয়না উবা ফংই ৷ খৃষ্ট চহী ১৭৩৪, ইঙা থানিন, য়ুমজকৈশাদা লুহোংবগী থৌরম অদু পাঙথোকখিবনি ৷ ‘চৈথারোল কুম্বাবা’ দা ইরম্মী-

‘ইংঙা থাদি য়ূমশকৈশানা হনএ ৷ থানিন নোং য়ূমশকৈশাদা লাই মারচীঙকা স্না চীংজারোইবীগা লুহোংএ ৷’ –লা. ৯৪

৪. শিজ লাইওঙবী (লাইরোইবী) বিম্বাবতিঃ লাই গোবিন্দজিদা থাজখিবী

Bimbaabati @ Raaseswari @ Sija Laairoibi

চীন্থাং ওইনা খ্বাইদগী মপাঙ্গল কনবা অমসুং মিংদা থীবা কয়ানা লৈতেং ওইবীখিবী বিম্বাবতিগী ৱারী অসী ‘চৈথারোল কুম্বাব’দা লাচল্লম্বদি লৈতে ৷ ৱারীগী মতুং ইন্না, মপাবুং নিংথৌ ভাগ্যচন্দ্র (১৭৫৯-১৭৬২, ১৭৬৩-১৭৯৮) না গোবিন্দ নিরুপন তৌরবা মতুং, রাশলিলা কতপা মতমদা মচা নিঙোল বিম্বাবতিবু রাশেশ্বরী শাহনখি ৷ কোন্নথংদা, মচা নিঙোলগী পূক্নীং মতুং ইন্না গোবিন্দদা থাজবিরগা অনুপ্রভুগী মুর্তি লিংখতপিদুনা নবদ্বিপতা মন্দির শাবিরগা থমখিবা অসীনচিংবগী ৱারী অসী সরাংথেম বরমনিগী ‘মৈতৈ নিংথৌরোল’দা পল্লম্মী-

‘মজাইবেমনা নীংজবা পূক্নীং থুংহনগে খল্লদুনা মহারাজনা নবদ্বিপতা মন্দির শাবিদুনা বিম্বাবতিনা অনুপ্রভু লাত্তুনা শিজ লাইওংবী (লাইরোইবী) মমিং ওন্দুনা মফমদুদা লেঙদনা লৈখি ৷’ –লা. ১৪৬

বিম্বাবতি অমসুং ভাগ্যচন্দ্রগী মরমদা লান্না শন্দোকপা কয়ামরোম লৈ ৷ ময়ামগী মনুংদা মরু ওইবা খরদি-

ক. মহাক অসী লমচত নাইদবা মপা নিংথৌনা ফিদিন্নদুনা মীরোল্লি ৷

খ. মহাক অসী ভাগ্যচন্দ্রনা তেখাউদা শামু ফাবা মতমদা মতেং পাংখিবা মাহুত অদুনা মণিপুরদা লৈরগা ফিদিন্নদুনা মীরোল্লি ৷

গ. মহাক্কী মীরোনবা অদু উহন্দনবা রাশ লিলা থোকপদা পোলোই শেতহনখিবনি ৷

ঘ. মপানা গঙ্গা চতপদা মী কনা খঙহন্দনা দোলাইদা লোতলগা মচানুপীবু পুখিবনি ৷

ঙ. নবদ্বিপতা অঙাং অমা উনরগা মদু হাত্তোকখিবনি ৷

চ. লমচত নাইদবা নিংথৌ ভাগ্যচন্দ্র অসী মচানুপা মধুচন্দ্র অমসুং চৌরজিতনা ঙবোংখাউদা হাপ্লগা গঙ্গাদা নমশিন্দুনা হাতখিবনি ৷ অসিনচিংবা ৷

পল্লিবশিং অসী অরানবা ঙাক্তনি ৷ অচুম্বা হায়ববু, ভাগ্যচন্দ্র মহারাজনা গোবিন্দ নিরুপন তৌদুনা নুমিত মঙানি রাশ লিলা শান্নখিবা মতম অদুদা বিম্বাবতিগী চহী অসী নিপাননি ৷ মহাক্সু চতনবী অমা ওইনা শ্রীগোবিন্দদা থাজবিখি হায়বসিনি ৷

৫. ইপী কোঞ্জেংবীঃ লাইৱা হায়বদা থাজখিবী

ভাগ্যচন্দ্র মহারজগী মজা ইবুংঙো নিংথৌ চৌরজিতকি মতমদসু লাইদা নুপী থাজবা অসী পাঙথোক্লম্মী ৷ মহাক্কী মতম অসীদা থেংনরিবা অসিনা মমাঙগীশিং অদুদগী তোপ-তোপ্পা মশক অমনি ৷ মমাঙদা থাজখিবা নুপীশিং অসি ময়ূম পান্দ্রিবী লৈশাবী ওইনা ঐখোয়না থেংনৈ ৷ অদুবু চৌরজিত মহারাজনদি মহাক্কী লৈমশিংগী মনুংদগী অমবু লাই সনামহীদা কতলম্বা অসীনি ৷ ‘চৈথারোল কুম্বাবা’দা ইরম্মী

‘... অহিংদা মৈদিংঙু ৱাইরং পামহৈবনা লাইৱা হায়বদা ইপি কোঞ্জেংবীবু নিংঙেন ফুংকা ২ গা সনা তাঙ্গা ১ লুপা তাঙ্গা ১ গা কতএ ৷’ –লা. ১৯৫

‘মৈহৌবরোন সঙ্গায় ফম্মাং’গী মতুং ইন্না ৱাইরং পামহৈবা (চৌরজিত)গী লৈমা ৫০ গী মিং পনবদা কোঞ্জেংবী (কোঞ্জেংবম নিঙোল) অসী পল্লম্বা থেংনদে ৷ মিং অমা চীত্থরম্বদি লৈ, মদু ওইরম্বসু য়াই ৷ নত্ত্রগা কনানো হায়না মখা তানা থিজিন্নীংঙাই লৈরি ৷

লাইদা নিঙোল থাজবা অমসুং দেবদাসিঃ টেম্পল প্রোষ্টিট্যুসন

মীতৈগী চতনবীদা লাইদা নিঙোল থাজবা অসীগা চাউরাক্না মান্নবা মচত অমা ভারতকী খা অমসুং নোংপোক থংবা শরুক্তা চতনরম্বা উবা ফংই ৷ মসী মপূং ওইনা হিন্দুগী ওইবা চতনবী অমনি ৷ লাইদা থাজরবা নিঙোল মচা অদুবু ‘দেবদাসি’ হায়না খঙনৈ অমসুং মখোয়না মখোয়গী লেমহৌরিবা পুন্সী অসী ঈশ্বরগী থৌগলগীদমক কত্থোকই ৷

In Hinduism, a devadasi (Sanskrit: servant of deva or devi (god)) is a girl “married” to a deity and dedicated to worship and service of the deity or a temple for the rest of her life.

চতনবী অসী অন্ধ্র প্রদেশ য়াওনা খা ভারততা লাইনীংগা মরী লৈননা পাঙথোকপা চতনবী অমনি ৷ চতনবী অসীদা মমা-মপানা মপুং-মরৈ ফাদ্রিবা, অঙাং ওইরিবা মচা নিঙোলবু লাই নত্ত্রগা লাইশঙ অমদা থাজবিরম্মী ৷ মখোয়না মপূং মরৈ ফারগা ওক্তবী, পৈশা খানবী ওইদুনা লাইনীংগা মরী লৈনবা অৱাংবা থাক্কী মীওইশিংবু পেলহল্লি ৷ মখোয় অসিবু যোগিনিসু কৌই ৷ মখোয় কৈদৌঙৈদসু তাইবংপানগী ওইবা লুহোং খোঙদোংবা অসী য়ারমদে ৷

Devadasi system is a religious practice in parts of southern India, including Andhra Pradesh, whereby parents marry a daughter to a deity or a temple. The marriage usually occurs before the girl reaches puberty and requires the girl to become a prostitute for upper-caste community members. Such girls are known as jogini. They are forbidden to enter into a real marriage.

মমা-মপানা মচা নিঙোলবু লাইদা নত্ত্রগা লাইশঙ অমদা লুহোংবিরগা মপূং-মরৈ ফারক্লবা মতুংদা পৈশা খানবী ওইননবা মমল লৌরগা য়োন্থোকপীবনি ৷ মমল অদুগী মথক্তা মখোয়গী নোংমগী শেন্থোক অদুবুসু ইমুং-মনুং পুননবা মমা-মপানা লৌবিরম্মী ৷ মখোয়না লাইশঙগা মরী লৈনবা পাণ্ডাশিং অমসুং অতৈ ধর্ম্মগা মরী লৈনবা অৱাংবা থাক্কী মীওইশিং পেলহনবতা নত্তনা লাইশঙদা লাইনীংগা মরী লৈননা লাকপা ভক্তশিংবুসু মমল লৌদুনা পেলহল্লি ৷ অসুম্না পৈশা খানবগী থবক অসীদা দেবদাসি অমনা নোংমদা লুপা ২০০/৩০০ রোম তানবা ঙম্মী ৷ মশক-মতৌ খরা হেন্না ফজবী, নহা ওইবী, ফীবম মুর্তি চঙখোনবী ওইরবদি ৬০০/৭০০ ফাওবা তানবা ঙম্মী অমসুং হৌজিক ফাওবদা ইন্দিয়াদা দেবদাসি মশীং অসী লাক্ষ ৪.৫ লৈ হায়না রিপোর্ট তৌই ৷

লাইগী মনাইনুবী ওইনা লৈবা অসীদা দেবদাসিনা লাইশঙদা জগোই শাই ৷ জগোইগী থাক মথং-মথং কাখতলক্লগা জগোই শাবী অদুগী ফিজেত অদু ময়েং তাথরকই অমসুং জগোইগী অরোইবা তাংককতা নুপী অদুগী হকচাংদা ফি পক্তে ৷ ফি পক্ত্রবা জগোই শাবী অদুনা লাইশঙদা লৈরিবা অশাবা লাই অদুদা কোনশিল্লগা লৈ ৷ অদুগী মতুংদা মহাকপু পুরোহিত নত্ত্রগা জমিদার নত্ত্রগা লাই সেবা তৌবা নুপাশিংনা মখোয়বু লাইশঙমক্তদা ফিদিন্নৈ হায়বসীনি ৷

অসুম তৌবসিনা, মখোয়না মপা-মশক খঙদবা অঙাং কয়ামরোম পোক্লম্মী ৷ মখোয়বু খুনাইনা হন্থনা লৌনরম্মী ৷ মখোয়না লাইশঙদা পৈসা খানবী (টেম্পল প্রোষ্টিট্যুট) ওইনা লৈবা মতমসীদা কোন্দোমনচিংবা ইশা কঞ্জবা য়াবা পাম্বৈ অমত্তা শীজিন্নরমদে ৷ মরম অদুনা যোগিনিশিং অসীদগী সেক্সুএল্লি ত্রান্সমিতেদ দিজিজেজ (এস তি দি) অমসুং ঐচ আই ভি এইদস নচিংবা কয়া পক্লম্মী অমসুং শন্দোক্লম্মী ৷ হৌজিক্তি জ্ঞান তানরক্তুনা কোন্দোম শীজিন্নবা হৌরে হায়রি ৷ হৌজিক্তি মখোয়গী খুনাই অমা লৈরে ৷ খুনাই অদুবু দোম্রা (domra) হায়না খঙনৈ ৷

মণিপুরদসু লাইশঙদা পৈশা খানবী (টেম্পল প্রোষ্টিট্যুসন) থম্বগী চতনবী লৈখিবরা

দেবদাসিবু যোগিনি কৌরিবসী অন্ধ্র প্রদেশতনি, মখোয়বু জোগিন অমসুং ভোগম-বন্দি হায়নসু খঙনরম্মী ৷ মখোয়বু মহারাষ্ট্রদা মুরালি, জোগাতিন অমসুং অরাধিনি কৌই, কেরেলাদা মহারি, অসামদা নটি, কর্ণাটকাদা যোগাতি (অহল নুপীদা) অমসুং বাসবী (নহা নুপীদা), গোৱাদা ভাবনি, তামিলদা টেবরদিয়র, উরিষ্যাদা মহারি হায়না খঙনবগুম মণিপুরদা শীজ লাইরোইবী (লাইওঙবী) হায়না খঙনরম্ব্রা হায়বসী ৱাহং অমা লাক্লি ৷ লাইরিক অমসুং চীন্থাং ৱারী খরদা চীংথংখোম্বা নিংথৌগী মচা ইবেম, লাই গোবিন্দদা থাজবা বিম্বাবতি অদু মীরোনখি হায়না খঙহনবা কন্না পাম্লিবসী মণিপুরদসু লাইশঙদা পৈশা খানবী (টেম্পল প্রোষ্টিট্যুসন) লৈহনবগী চতনবী লৈখি হায়নীংলিবরা ৷ চতনবী অদুগীদমক চীংথংখোম্বা নিংথৌনা মশামক্কী মচা ইবেমবু গোবিন্দদা থাজদুনা পৈশা খানবীমক ওইহনখি হায়বা পাম্লিবরা ৷ গোবিন্দগী লাইশঙ অসীমক পৈশা খানবী ওইরবী বিম্বাবতিবু ফিদিন্নফম ওইখি হায়নীংলিবরা হায়বসী ৱাহং ওইরক্লি ৷

মসীগীসু মথক্তা লাই কসা, লাই সনামহী (লাইৱা হায়বা), লাই মারজিংনচিংবগী লাইশঙসু অদুগুম্বা নুপীশিং মমল পীদুনা ফিদিন্নফম ওইখি হায়গদৌরিবরা ৷ নিঙোল মচাতা নত্তনা মৌগী শীংদা চল্লবী ফাওবা লাই সেবা তৌবা মীওইশিং পেলহন্নবগীদমক থিন্থরম্বা, থৈথরম্বা, থাজবিরম্বরা হায়বসী ৱাহং ওইরক্লি ৷

ওইথোকপা য়াবা অমসুং য়াদবাঃ

মণিপুরদা নুপীশিংবু লাইদা থাজরম্বগী চতনবী অমা লৈরম্বা অসীগী মরমদা কূপ্না খঙনদ্রি ৷ নুপীশিং অসী লাইদা থাজবিরগা পৈশা খানবী ওইহল্লম্বরা হায়বসীসু নাখৈ শেংদ্রি ৷ ঐখোয়না থেংনরিবা নুপী মঙা অসী নিংথৌ কোনুংগা মরী লৈনবা নুপী ঙাক্তনি ৷ মসীদা নিঙোল অমসুং ময়ূম পাল্লবী য়াওরি ৷ মৈদিংঙু তম্লেনখোম্বা (মধুচন্দ্র)না নিংথৌ ওইনা পানবা মতমদা নিংথৌ খুবমদা অকাইবা লাক্কদবা মখৈবু (চাউরাক্না মীওই ১৭ রোম) হাতলগা মখোয়-মখোয়গী নুপী-অঙাং পূম্নমকপু পানা লান্মীশিংদা পীথোক্তুনা য়োঞ্জহনখিবা (নত্তবা লমচত চতহনখিবা) অদুগুম্না নুপীশিংবু লাইদা থাজরগা ফোংনা নত্তবা লমচত চতহল্লম্বরা হায়বসী হংনীংঙাই ওইরক্লি ৷

মণিপুরগী কন্টেক্স অসী ওইথোকপা য়াবা অমসুং য়াদবা অনীদা ফংই ৷ ভারতকী নেশনেল কম্মিসন ফোর ৱিমেননা ইং ২০০২ দা ফোঙদোকখিবা পোইন্ট ১১ গী মনুংদা ওইথোকপা য়াবা অমসুং ওইথোকপা য়াদবা পোইন্ট অনীমক য়াওবা উরি-

ওইথোকপা য়াবা ১. মমাঙ মীরোলগী চতনবী খুদুং ইনবা ২. লাইনীং-লাইশোনগা মরী লৈনবা চতনবী ওইবা ৩. মপা নত্ত্রগা মবুংনা ওইহনবা ৪. ইমুং-মনুংগী য়াইফনবগীদমক ওইহনবা

ওইথোকপা য়াদবা ১. নুপী মতোমতা পোকপা ২. শেন-থুমগী ফীবম ফত্তবা ৩. মমাদু হান্না ফীবম অসীদা ওইরকপা ৪. মমীত তাঙবা, মনা পঙবা নত্ত্রগা অশোয়বা অমা লৈবা

Miraa Baai

মায়কৈ অমরোমদা, বিম্বাবতিবু মিরাবাইগা নক্না থম্লগা নৈনবসু য়ারি ৷ অনীমক কৃষ্ণ ভক্ত ওইবা মপা নিংথৌগী মচা ইবেমা ঙাক্তনি ৷ ৱারীগী মতুং ইন্না মিরানা মশাগী চহী ৭ শুরকপা মতম অদুৱাইদা লুহোংবা অমা উরম্মি ৷ মদুদা মহাক্না মহাক্কী বোর কনানা ওইগদগে হায়না হংবা ৱাহংগী পাউখুম ওইনা মমানা ময়ূমদা লাতলিবা কৃষ্ণগী মুর্তি মমাঙদা লেপহল্লগা ‘মাঙদা লেপ্লিবসী নহাক্কী নপুরোইবনি’ হায়খিবা অদু মহাক্কী মপূক্নীংদা চেতনা থাজখিদুনা মশামক কৃষ্ণগী মনাইনুবীনি হায়না মপুন্সী চূপ্পা লেপ্পা ঙমখি ৷ মবুঙো কৃষ্ণবু শৈথাবা ভজন কয়া লেংদুনা শকচরগা মপুন্সী লেনখি ৷ মতৌ অসুম্না, বিম্বাবতিসু মশাগী চহী ৮ দা মপা ইবুঙোনা কতখিবা নুমীত মঙানিগী রাশলিলাদা রাশেশ্বরী শাখি ৷ মসীগী ঈনশিনবা অসীনা মপুন্সী চূপ্পা মবুঙো গোবিন্দগী মনাইনুবী ওইনা কত্থোক্তুনা পুন্সী লেনখি ৷ মীতয়েং অসোমদগী য়েংলবদি মিরা অমসুং বিম্বাবতি অনীসী ফিদা অমত্তদা থম্বা য়াই ৷

নাকন অমরোমদা অমুক, লম-লমগী খেন্নবা মতুং ইন্না দেবদাসিগী থৌদাং খেন্নবা লৈ৷ মসীদা উরিষ্যাগী মহারি অসী পৈশা খানবগী থবক তৌদে হায়রি৷ অদুম ওইনমক, লাইদা থাজবিবা অদুদি মান্নৈ৷ উরিষ্যাগী পুরিদা অঙাং নুপীমচা লুহোংবিরিবা অসী লাই জগন্নাথতনি৷ উরিষ্যাদা দেবদাসি নুপী লৈশিল্লকত্রে, ২০১২ ফাওবদা ৪ খক্তমক লৈ হায়না রিপোর্ট তৌই৷

ৱারোইশিনঃ

অকক্নবা মরম অমসুং পান্দম খঙবা চপ চানা ঙমদ্রবসু মণিপুরদা নুপী (নিঙোল নত্ত্রগা মৌ)বু লাইদা থাজরম্বগী চতনবী লৈরম্মী হায়বসী য়াম্নমক ময়েক শেংনা খঙবা ঙম্মী ৷ ভারতকী অতৈ লমদা চতনবগুম লাইদা নিঙোল থাজরগা, কোন্নথংদা মপূং মরৈ ফারক্লগা শেল লৌদুনা য়োন্থোকপীরগা, লাইগী মিংদা লাইশঙদা থমদুনা লাইগী মনাই ওইহল্লগা পৈশা খানবী ওইরকপা অদুগুম্বগী মশক্তি মণিপুরদা চতনরিবা অসীগা মান্নবা মশক উবা ফংদ্রি ৷ মরম অদুনা, মসী উরিষ্যাগী দেবদাসিগা মান্নবা মশক লৈব্রা হায়বসীসু পূক্নীং থিংজিন্নীংঙাই লৈরি৷ অদুম ওইনমক, হীরম অসীদা কূপথনা নৈনদুনা চতনবী অসীগী মরুমদা লৈরম্বা মতমদুগী নাতকী অশেংবা মশক অদু খঙনবদি হোতনবা চঙলি৷

চাউরাক্না উবা অহানবা মীতয়েংদা, মণিপুরদা নুপীবু লাইদা থাজরম্লবসু নুপীশিং অদুনা লাইশঙদা লৈরগা পৈশা খানবগী থবক (টেম্পল প্রোষ্টিট্যুসন) চত্থবা অদুমক্তি উবা ফংখিদে ৷ অদুম ওইনমক, হীরম অসীদা ঐখোয়না মখা তানা থিজিন্নীংঙাইদি লৈরি ৷

---০০০---